အခန်း ၄၄၁

အခန်း။ ၄၄၁

ထိုဝက်ဝံမိစ္ဆာ၏ ခန္ဓာကိုယ်မှာ အံ့မခန်း ထည်ဝါကြီးမားလှပြီး လုံယီ၏ ယခင်ဘဝက မြင်တွေ့ခဲ့ဖူးသော သံချပ်ကာတင့်ကားကြီးများထက်ပင် အဆပေါင်းများစွာ ပိုမိုကြီးမားနေသေးသည်။

၎င်းက လုံယီရှိရာသို့ အရှိန်အဟုန်ပြင်းစွာ ပြေးဝင်လာသောအခါ မြေပြင်တစ်ခုလုံး ပြင်းထန်စွာ တုန်ခါသွားပြီး လမ်းတွင် မရှောင်သာမတိမ်းသာရှိနေသည့် မိစ္ဆာလေးအချို့မှာ ကောင်းကင်ယံသို့ လွင့်စင်ပျံတက်သွားကြရာ ကြောက်မက်ဖွယ်ရာ အသွင်သဏ္ဌာန်ကြီး ဖြစ်ပေါ်လို့လာတော့သည်။

"မဟန်ဘူး... ဒီမိစ္ဆာရဲ့ ကျင့်စဉ်အဆင့်က မိစ္ဆာစစ်သူကြီးအဆင့်ကို နီးကပ်နေပြီ။ ဂျူနီယာညီလေး လုံယီက ချီစွမ်းအင်စုဆောင်းခြင်း စတုတ္ထအဆင့်ပဲ ရှိသေးတာ။ စုန်းအင်းအစီအရင်က ဘယ်လောက်ပဲ စွမ်းပါစေ ကျင့်စဉ်အဆင့် ကွာခြားချက်က သိပ်ကြီးမားလွန်းနေရင် အတင်းအဓမ္မ ဖျက်ဆီးခံရနိုင်တယ်"

စတုရန်းပုံမျက်နှာနှင့် စီနီယာအစ်ကိုကြီးတစ်ဦးက ထိတ်လန့်တကြား အော်ဟစ်လိုက်သည်။

သူသည် ပျံသန်းခြင်းဓားကို ဝှေ့ယမ်းလိုက်ရာ ၎င်းက ထိုးဖောက်ကွဲရှမည့် အလင်းဖြူတန်းတစ်ခုအသွင် ပြောင်းလဲသွားပြီး ဝက်ဝံမိစ္ဆာထံသို့ ပြင်းထန်စွာ ပြေးဝင်စိုက်ဆင်းသွားတော့၏။

ဒုန်း

ဝက်ဝံမိစ္ဆာ၏ ကိုယ်ထည်မျက်နှာပြင်ပေါ်ရှိ ချိုကဲ့သို့ မာကျောသောအလွှာမှာ ထူထဲလွန်းလှသဖြင့် ထိုပျံသန်းခြင်းဓားကို တိုက်ရိုက်ပင် လွင့်စင်သွားစေပြီး အရေပြားပေါ်၌ မှေးမှိန်သော အဖြူရောင်အမှတ်အသားကလေးတစ်ခုသာ ကျန်ရစ်စေခဲ့သည်။

"ဒီမိစ္ဆာက တကယ့်ကို လက်ပေါက်ကပ်တာပဲ... ဂျူနီယာညီလေးလုံယီ ဖယ်လိုက်တော့"

စတုရန်းပုံမျက်နှာနှင့် စီနီယာအစ်ကိုကြီးက ဒေါသတကြီး ဟိန်းဟောက်လိုက်သည်။

တစ်ချိန်တည်းမှာပင် သူသည် အခြားဂိုဏ်းတူညီအစ်ကိုများကို စုစည်းကာ လုံယီအတွက် ဝက်ဝံမိစ္ဆာကို ဝိုင်းဝန်းပိတ်ဆို့ တားဆီးပေးရန် ပြင်ဆင်တော့သည်။

သို့သော်လည်း လုံယီနှင့်အတူ ပါလာခဲ့ကြသည့် ပိယောင်ယောင်နှင့် ရုံရွှယ်ကျန်းတို့မှာမူ စိုးရိမ်ပူပန်ခြင်း အလျဉ်းမရှိဘဲ သူတို့အလုပ်ကိုသာ ဆက်လက်လုပ်ကိုင်နေကြသည်ကို သူ သတိပြုမိသွား၏။

"မင်းတို့ ဘာလို့ ဝင်မကူကြတာလဲ"

"ပူစရာမလိုပါဘူး... အစီအရင်အတားအဆီး ပျက်စီးသွားရင်တောင် လုံယီက ဒုက္ခရောက်မှာမဟုတ်ဘူး"

ပိယောင်ယောင်က ဂရုမစိုက်ဟန်ဖြင့် အေးအေးလူလူ ပြောလိုက်သည်။

"ဟုတ်တယ်"

ရုံရွှယ်ကျန်းကလည်း မျက်နှာသေဖြင့် ခေါင်းညိတ်ထောက်ခံ၏။

"အယ်….."

စတုရန်းပုံမျက်နှာနှင့် စီနီယာအစ်ကိုကြီးမှာ စိတ်ထဲ၌ အနည်းငယ် ဇဝေဇဝါဖြစ်သွားပြီး သူ၏လှုပ်ရှားမှုများလည်း အလိုအလျောက် နှေးကွေးသွားတော့သည်။

ထို့နောက်တွင် ဝက်ဝံမိစ္ဆာကြီးသည် လုံယီ၏ အစီအရင်အတားအဆီးအတွင်းသို့ ဒိုင်းခနဲ ဝင်ဆောင့်မိသွားသည်ကို သူ မြင်လိုက်ရသည်။

၎င်း၏ ဧရာမခန္ဓာကိုယ်ကြီးမှာ အစီအရင်အတားအဆီးအတွင်း ပျောက်ကွယ်သွားပြီး အစွန်းပိုင်းတွင် သိမ်မွေ့သော ချီစွမ်းအင်ဂယက်အချို့သာ ထွက်ပေါ်လာကာ မကြာမီမှာပင် မည်သည့်လှုပ်ရှားမှုမျှ မရှိတော့ဘဲ ငြိမ်သက်သွားတော့၏။

လုံယီတစ်ယောက် အစီအရင်အတားအဆီး ပျက်စီးပြီး အပိုင်းပိုင်းအစစ ဖြစ်သွားလိမ့်မည်ဟူသော စိတ်ကူးထင်မြင်ချက်မှာ လက်တွေ့နှင့် လုံးဝတခြားစီ ဖြစ်နေခဲ့သည်။

"ငါ မင်းကို စားပစ်မယ်"

ပို၍ပင် ကြီးမားလှသော ကြံ့မိစ္ဆာကြီးတစ်ကောင်က လုံယီထံသို့ ထပ်မံပြေးဝင်လာပြန်သည်။

၎င်း၏တစ်ကိုယ်လုံးမှာ ကတ္တရာစေးကဲ့သို့ မည်းနက်နေပြီး ခန္ဓာကိုယ်အနှံ့တွင် လှံတံကြီးများပမာ အေးစက်စက် တောက်ပနေသော အရိုးစူးချွန်ကြီးများ ရှိနေရာ တောရိုင်းမြေမှ ပြန်လည်နိုးထလာသည့် ရှေးဟောင်းသားရဲကြီးတစ်ကောင်နှင့်ပင် တူနေတော့သည်။

သို့သော်လည်း လုံယီ၏ အစီအရင်အတားအဆီးအတွင်းသို့ ဝင်ရောက်သွားသည်နှင့် ၎င်းသည်လည်း ဝက်ဝံမိစ္ဆာကဲ့သို့ပင် မည်သည့်အသံဗလံမျှ မရှိတော့ဘဲ ပျောက်ကွယ်သွားရပြန်သည်။

တဖြည်းဖြည်းနှင့် စူးစမ်းတတ်သော အခြားမိစ္ဆာများမှာ ရိပ်မိသွားကြတော့၏။

လုံယီ၏ အစီအရင်အတားအဆီးမှာ အသံတိတ်အသားကြိတ်စက်ကြီးတစ်ခုကဲ့သို့ပင်... မည်သူမဆို ဝင်ရောက်သွားပါက တူညီသော နိဂုံးနှင့်သာ ရင်ဆိုင်ရမည်ပင်။

နောက်ပိုင်းတွင် လုံယီချဉ်းကပ်လာသည်ကို မြင်ရုံမျှနှင့် မည်သည့်မိစ္ဆာမဆို ကြောက်လန့်တကြား ထွက်ပြေးကြတော့ရာ သူကိုယ်တိုင်ပင် မိစ္ဆာအစစ်အမှန်ကြီး ဖြစ်နေသကဲ့သို့ပင်။

လုံယီ၏ အံ့မခန်းဖွယ် တိုက်ပွဲစွမ်းရည်မှာ မကြာမီမှာပင် အနှစ်တစ်ထောင်သက်တမ်းရှိ သစ်ပင်မိစ္ဆာကြီး၏ အာရုံစိုက်ခြင်းကို ခံလိုက်ရသည်။

သစ်ပင်မိစ္ဆာကြီးထံမှ ဆူးချွန်များ သိပ်သည်းစွာ ပါရှိသည့် ထူထဲနက်မှောင်သော နွယ်ပင်ဝှေ့ကြိုးကြီးများ ရုတ်ချည်းထွက်ပေါ်လာပြီး ကြာပွတ်များကဲ့သို့ လုံယီထံသို့ ပြင်းထန်စွာ လွှဲရိုက်လိုက်တော့၏။

ဝှစ်... ဝှစ်...

လေထုကို ဖြတ်သန်းသွားသော စူးရှထက်မြက်သည့် အသံများ ပဲ့တင်ထပ်သွားသည်။

ယခုတစ်ကြိမ်တွင်မူ လုံယီသည် အစီအရင်အတားအဆီးကို သုံး၍ ခုခံနိုင်လောက်အောင် မာနမထောင်လွှားတော့ပေ။

သူသည် အစီအရင်အတားအဆီးကို ချက်ချင်းရုပ်သိမ်းလိုက်ပြီး လျင်မြန်ဖြတ်လတ်စွာဖြင့် မြို့တွင်းသို့ ဆုတ်ခွာသွားတော့သည်။

"အောက်တန်းကျတဲ့ လူသား... ငါ မင်းကို သတ်ပစ်မယ်"

လုံယီ၏ ကောက်ကျစ်ဖျတ်လတ်မှုကို မြင်လိုက်ရသောအခါ သစ်ပင်မိစ္ဆာကြီး၏ မျက်လုံးများထဲတွင် ကြောက်မက်ဖွယ်ရာ အနီရောင်အလင်းတန်းများ တောက်ပလာတော့၏။

"မိစ္ဆာကြီး... မင်းရဲ့ပြိုင်ဘက်က ငါကွ"

မြို့ကို စောင့်ကြပ်နေသော အခြေခံအုတ်မြစ် တည်ဆောက်ခြင်းအဆင့်ရှိ ဂိုဏ်းအကြီးအကဲမှာ သူ၏ တပည့်ဖြစ်သူကို အနိုင်ကျင့်ခံနေရသည်ကို ရေငုံနှုတ်ပိတ် ကြည့်မနေနိုင်တော့ဘဲ ရဲရဲဝံ့ဝံ့ ဝင်ရောက်စွက်ဖက်လိုက်တော့သည်။

လုံယီယခင်က စုံစမ်းသိရှိထားသည့် သတင်းအချက်အလက်များအရ ထိုဂိုဏ်းအကြီးအကဲမှာ ဝမ်သောက်တောင်ထွတ်မှ အကြီးအကဲချန် ဖြစ်သည်။

သူသည် ပိန်လှီသော ခန္ဓာကိုယ်ရှိပြီး ဆံပင်အနုအယဉ်ဖြူလျက် မျက်နှာတစ်ခုလုံးတွင် ညှိုးငယ်သော အရိပ်အယောင်များ လွှမ်းမိုးနေတတ်၏။

သူ၏င်္အကျီလက်အတွင်းမှ စူးရှတောက်ပသော အလင်းတန်းတစ်ခု ပျံသန်းထွက်ပေါ်လာကာ ကောင်းကင်ယံသို့ ပျံတက်သွားပြီး ရှေးဟောင်းမှော်ဓားကြီးတစ်ခုအသွင် ပြောင်းလဲသွားသည်။

ထိုမှော်ဓားမှာ ငါးပေခန့် ရှည်လျားပြီး တစ်ကိုယ်လုံး ကြေးနီရောင် သန်းနေကာ ဓားသွားတစ်လျှောက်တွင် စတုရန်းပုံအပေါက် ခုနစ်ပေါက် ရှိနေပြီး ပတ်ပတ်လည်၌ သန့်စင်ဆန်းကြယ်သော အင်းစာလုံးများ ထုဆစ်ထားလျက် ဓားအနီးတွင် သန့်စင်သော အလင်းဖြူများ ဝဲပျံနေတော့၏။

"ခုတ်ပိုင်းစမ်း"

အကြီးအကဲချန်သည် သူ၏ ဝိညာဉ်အနှစ်သာရကို ထုတ်ဖော်လိုက်ရာ ရှေးဟောင်းမှော်ဓား၏ အလင်းရောင်မှာ ဒီရေအလား တိုးပွားလာပြီး ရှေ့သို့ လျင်မြန်စွာ ခုတ်ပိုင်းချလိုက်တော့သည်။

ခဏချင်းတွင်ပင် အံ့မခန်းဖွယ်ကောင်းသော အဖြူရောင်ဓားချီစွမ်းအင်ရာနှင့်ချီ၍ နွယ်ပင်ဝှေ့ကြိုးများဆီသို့ ဒုန်းဆိုင်းပြေးဝင်သွားတော့၏။

ဓားချီစွမ်းအင်များ ဖြတ်သန်းသွားသည့်အခါ ထိုနွယ်ပင်များမှာ တစ်ခုပြီးတစ်ခု ပြတ်တောက်သွားပြီး မြေပြင်ပေါ်သို့ ဘုန်းကနဲ ကျိုးပျက်ကျကာ နက်ရှိုင်းသော ကျင်းကြီးများကို ဖြစ်ပေါ်စေခဲ့သည်။

ထို့နောက် မှော်ဓားကြီးသည် ကောင်းကင်ယံ၌ အလျားပေတစ်ရာကျော် ရှည်လျားသော အံ့မခန်း ဓားချီစွမ်းအင်ကြီးတစ်ခုကို ထပ်မံစုစည်းလိုက်ပြန်သည်။

၎င်းမှာ ကောင်းကင်ထက်တွင် ရုတ်ချည်းတည်ဆောက်လိုက်သည့် အဖြူရောင်သက်တံတက်တံတားကြီးတစ်ခုအလား သစ်ပင်မိစ္ဆာကြီး၏ ကိုယ်ထည်ဆီသို့ ပြင်းထန်စွာ ခုတ်ပစ်လိုက်တော့၏။

သို့သော် သစ်ပင်မိစ္ဆာကြီး၏ အိုမင်းရင့်ရော်သော မျက်နှာထက်တွင် မထီမဲ့မြင်ပြုသော အပြုံးတစ်ခု ထွက်ပေါ်လာသည်။

ခုနကတင် ပြတ်တောက်သွားပြီး တစ်ဝက်တစ်ပျက်သာ ကျန်ရှိတော့သော နွယ်ပင်များမှာ ရုတ်ချည်း ရှည်လျားထွက်ပေါ်လာပြီး ဒဏ်ရာအနာအဆာမရှိ မူလအတိုင်း ပြန်လည်ရှင်သန်လာရာ အဖြတ်ခံထားရသည့် အရိပ်အယောင်ပင် မတွေ့ရတော့ပေ။

ထို့နောက် ထိုနွယ်ပင်များသည် တစ်ခုနှင့်တစ်ခု ထပ်ဆင့်ပတ်ယှက်ကာ ပိုမိုထူထဲလာပြီး နောက်ဆုံးတွင် တစ်သားတည်း ပေါင်းစည်းသွားတော့၏။

၎င်းတို့မှာ ဧရာမ သစ်သားဒိုင်းနက်ကြီးတစ်ခုအသွင် ပြောင်းလဲသွားပြီး ပတ်ပတ်လည်တွင် စစ်မှန်သော ခုခံရေးမှော်ရတနာတစ်ခုကဲ့သို့ အလင်းတန်းများ ဖြာထွက်လျက် ဓားချီစွမ်းအင်၏ လမ်းကြောင်းကို ပိတ်ဆို့လိုက်တော့သည်။

ဒုန်း

ဓားချီစွမ်းအင်သည် သစ်သားဒိုင်းကြီးပေါ်တွင် နက်ရှိုင်းသော အစောင်းကြောင်းကြီးများကို ထုဆစ်သွားပြီး ၎င်းကို ထက်ဝက်ခန့် ကွဲအက်လုနီးပါး ဖြစ်စေခဲ့သော်လည်း နောက်ဆုံးတွင်မူ ရှေ့သို့ ဆက်မတိုးနိုင်တော့ပေ။

"ဒီမိစ္ဆာက တကယ်ကို ရင်ဆိုင်ရခက်တာပဲ..."

အကြီးအကဲချန်က ညည်းတွားလိုက်ရာ သူ၏မျက်နှာမှာ ပို၍ပင် ညှိုးငယ်သွားတော့၏။

"ဂိုဏ်းအနေနဲ့ မီးဓာတ်အခြေခံအုတ်မြစ်အဆင့်တစ်ယောက် လွှတ်ပေးသင့်တာ... မီးဓာတ်က သစ်သားဓာတ်ကို ပိုပြီး နှိမ်နင်းနိုင်တယ်"

သူသည် သစ်ပင်မိစ္ဆာကြီးနှင့် အကြိမ်ပေါင်းများစွာ ထိုးနှက်တိုက်ခိုက်ခဲ့သော်လည်း နှစ်ဖက်စလုံးမှာ တစ်ဦးကိုတစ်ဦး အနိုင်မယူနိုင်ခဲ့ကြပေ။

နောက်ဆုံးတွင် ခမ်းနားကြီးကျယ်လှသော မြို့သိမ်းတိုက်ပွဲကြီးက ညတာကုန်ဆုံးသွားသောအခါ မတင်မကျဖြင့်ပင် ပြီးဆုံးသွားခဲ့ရတော့သည်။

မြို့အတွင်းသို့ ပြန်လည်ရောက်ရှိလာကြသည့်အခါ တပည့်တစ်စုမှာ မြေပြင်ပေါ်တွင် ဟန်ပန်အိန္ဒြေမရှိဘဲ လဲလျောင်းကာ ထိုင်ချလိုက်ကြပြီး တစ်ကိုယ်လုံးတွင်လည်း သွေးချင်းချင်းနီနေကြတော့၏။

မြို့၏ အစီအရင်အတားအဆီး စောင့်ရှောက်မှုကြောင့် အကျအဆုံး အလွန်အမင်း မများပြားခဲ့သော်လည်း ဤသည်မှာ မိစ္ဆာမျိုးနွယ်စုများဘက်မှ စွမ်းအားအပြည့်ဖြင့် မတိုက်ခိုက်သေးခြင်းကြောင့်ဖြစ်ကြောင်း လူတိုင်း သိရှိနေကြသည်။

လုံယီ၏ အံ့မခန်းဖွယ် တိုက်ပွဲစွမ်းရည်ကို ကိုယ်တိုင်မြင်တွေ့ခဲ့ကြရသဖြင့် အလောင်းထိန်းချုပ်ခြင်းဂိုဏ်းမှ တပည့်အများအပြားမှာ လုံယီထံသို့ တဖွဲဖွဲရောက်ရှိလာပြီး နှုတ်ဆက်စကား ပြောကြတော့သည်။

"ငါ ဝမ်သောက်တောင်ထွတ်မှာ မင်းကို တစ်ခါမှ မမြင်ဖူးပါဘူး ဂျူနီယာညီလေး... မင်း အခုမှ ရာထူးတိုးတာလား"

"ဂျူနီယာညီလေး... မင်းရဲ့ စုန်းအင်းအစီအရင်အတတ်က တကယ့်ကို အထင်ကြီးစရာပဲ။ နောင်ကျရင် အစီအရင်အတတ်ပညာရှင်အဖြစ်ပဲ အဓိက အာရုံစိုက်ဖို့ စိတ်ကူးထားတာလား"

"လေးစားရတဲ့ ဂျူနီယာညီလေး... မမက ဟွမ်ရှီးရုန်ပါ။ စီနီယာအစ်မဟွမ်လို့ပဲ ခေါ်နိုင်ပါတယ်။ နောင်ကျရင် ငါတို့တွေ ပိုပြီး ရင်းရင်းနှီးနှီး နေကြရအောင်နော်... ဟီးဟီး..."

ထိုမျှလောက် တက်ကြွရွှင်လန်းနေကြသော စီနီယာအစ်ကိုကြီးများနှင့် စီနီယာအစ်မကြီးများကို ကြည့်ပြီး လုံယီမှာ အနည်းငယ် ကြောင်အမ်းအမ်း ဖြစ်သွားရသော်လည်း တစ်ဦးချင်းစီကို ယဉ်ကျေးပျူငှာစွာပင် ပြန်လည်တုံ့ပြန်လိုက်၏။

ဒါ တကယ် ထူးဆန်းတာပဲ... ငါက ထူးခြားတဲ့ ခွန်အားကို ပြသခဲ့တယ်ဆိုရင်တောင် သူတို့တွေ ဒီလောက်အထိ တကူးတက လာပြီး ဖားယားနေစရာ မလိုပါဘူး။

လုံယီသည် စိတ်ထဲ၌ ဇဝေဇဝါဖြစ်သွားသဖြင့် ပိယောင်ယောင်နှင့် ရုံရွှယ်ကျန်းတို့ရှိရာသို့ သွား၍ မေးကြည့်လိုက်တော့သည်။

"သူတို့က မင်းရဲ့ အစီအရင်အတတ်ပညာရှင်ဆိုတဲ့ အဆင့်အတန်းကို သဘောကျသွားကြတာ ဖြစ်လိမ့်မယ်"

ရုံရွှယ်ကျန်းက ပြုံးလျက် မှတ်ချက်ချလိုက်ပြီး "အစီအရင်ပညာရှင်ဆိုတာ အလွန်ပဲ ရှားပါးတာလေ... ပြီးတော့ ရှေးဟောင်းလူသားတွေရဲ့ အပျက်အစီးနေရာတွေ၊ အမွေအနှစ်တွေ၊ လျှို့ဝှက်

နယ်မြေတွေနဲ့ ရတနာတိုက်တွေက အစီအရင်အတားအဆီးတွေနဲ့ ကာကွယ်ထားလေ့ရှိတော့ အဲဒါတွေကို သွားပြီး ဖြေဖျောက်ဖို့အတွက် အစီအရင်ပညာရှင်တွေကို လိုအပ်တာပေါ့"

"လေးစားရတဲ့ ဂျူနီယာညီလေး... မမကို စီနီယာအစ်မပိလို့ ခေါ်နိုင်ပါတယ်။ နောင်ကျရင် ငါတို့တွေ ပိုပြီး ရင်းရင်းနှီးနှီး နေကြရအောင်နော်..."

ပိယောင်ယောင်က ခုနက စီနီယာအစ်မဟွမ်၏ နူးညံ့ချိုသာလှသော အသံမျိုးကို အတုခိုးကာ လှောင်ပြောင်သရော်လိုက်သည်။

"အဲဒီလောက်လည်း ရွဲ့မနေပါနဲ့"

တောက်

ထို့နောက်တွင် ပိယောင်ယောင်သည် လုံယီ၏ သနားညှာတာမှုကင်းမဲ့သော နဖူးတောက်ခြင်းကို ခံလိုက်ရသဖြင့် သေးငယ်ဖြူစင်သည့် သွားစွယ်ကလေးများကို ပေါ်အောင် ဖြဲပြလျက် သူ့ကို ဒေါသတကြီး စိုက်ကြည့်တော့၏။

အစီအရင်အတတ်ပညာရှင်တွေက ဒီလောက်တောင် အဝယ်လိုက်မယ်လို့ ငါ မထင်ထားခဲ့ဘူး။

ဤသည်မှာ လုံယီ၏ မျှော်လင့်ချက်ထက် အမှန်တကယ် ကျော်လွန်နေခဲ့သည်။

တစ်ချိန်တည်းမှာပင် သူသည် အစီအရင်များဖြင့် ကာကွယ်ထားသော ထိုကဲ့သို့သော ရှေးဟောင်းအပျက်အစီးများနှင့် ဂူဗိမာန်များကို တော်တော်လေး စိတ်ဝင်စားသွားမိသည်။

အဘယ်ကြောင့်ဆိုသော် ထိုနေရာများ၌ သူလိုအပ်နေသော အရေးကြီးသည့်အရာများ ရှိနေနိုင်သောကြောင့်ပင်။

စွမ်းရည်ပြမျက်နှာပြင်ပေါ်ရှိ အရေးကြီးပစ္စည်းများကို ဂိုဏ်း၏ ရတနာတိုက်အများစုတွင် ရှာဖွေတွေ့ရှိနိုင်ရန် ခဲယဉ်းလှပြီး ထိုကဲ့သို့သော ရှေးဟောင်းအပျက်အစီးများနှင့် ဂူဗိမာန်များတွင်သာ ရှာဖွေနိုင်မည်ပင်။

"ဟူး... ဒီသစ်ပင်မိစ္ဆာက တကယ်ကို ရင်ဆိုင်ရခက်တာပဲ"

အကြီးအကဲချန်က သက်ပြင်းချလျက် ပူပန်သောကရောက်နေသော မျက်နှာပေးဖြင့် ပြောလိုက်ရာ အောက်တွင်ရှိသော တပည့်များမှာ တစ်ဦးကိုတစ်ဦး ကြည့်ကာ ဆွံ့အသွားကြတော့သည်။

သူတို့အနေဖြင့် ဤမျှလောက် စိတ်ဓာတ်ကျလွယ်သော အကြီးအကဲမျိုးကို မြင်ဖူးခြင်းမှာ ယခုက ပထမဆုံးအကြိမ်ပင်။

"အကြီးအကဲ... စိတ်မပူပါနဲ့။ ကျွန်တော်တို့မှာ ခုခံဖို့ မြို့ရိုးတွေနဲ့ အစီအရင်အတားအဆီးတွေ ရှိနေတာပဲ... သူတို့ ဝင်လာနိုင်မှာ မဟုတ်ပါဘူး"

တပည့်တစ်ဦးက သူ့ကို စိတ်အေးစေရန် ဖျောင်းဖျပြောဆို လိုက်သည်။

"ဒါက မိစ္ဆာတွေရဲ့ ရှေ့ပြေးတပ်ဖွဲ့ သက်သက်ပဲရှိသေးတာ... အညံ့ဆုံးအမျိုးအစားပေါ့" အကြီးအကဲချန်က ခေါင်းယမ်းလိုက်ပြီး "တကယ့် စွမ်းအားကြီးတဲ့ကောင်တွေက အခုထိ ရောက်မလာသေးဘူး။ ငါတို့တွေ အရမ်းကြီး ရန်မလိုသင့်ဘူး... သေသေချာချာ ခုခံကာကွယ်ဖို့ပဲ လိုတယ်"

ထိုစကားကို ကြားလိုက်ရသောအခါ လူတိုင်း နှုတ်ဆိတ်သွားကြတော့သည်။

လုံယီသည်လည်း ပြောစရာစကားမဲ့သွားရ၏။ စစ်ပွဲအတွင်း၌ တပည့်များ၏ စိတ်အားထက်သန်မှုကို မနှိမ်နင်းဘဲ စိတ်ဓာတ်ကို မြှင့်တင်ပေးသင့်သည်။

သို့သော် ဤအကြီးအကဲမှာမူ အမှန်ပင် ဆန်းကြယ်သည်။

သူသည် ဗီဇအသိဖြင့်ပင် အကြီးအကဲချန်၏အပေါ်၌ ထောက်လှမ်းခြင်းစွမ်းရည်ကို အသက်သွင်းလိုက်၏။

[အမည် - ချန်ချန်ချင်း]

[အသက် - ၁၇၉/]

[ကျင့်စဉ်အဆင့် - အခြေခံအုတ်မြစ် တည်ဆောက်ခြင်းအဆင့် အလယ်ပိုင်း]

[ကျင့်စဉ် -….. ]

[မှော်အတတ် - ….. ]

[ဝိညာဉ်ဓာတ် - ရွှေဓာတ်]

"အခြေခံအုတ်မြစ် တည်ဆောက်ခြင်းအဆင့် အလယ်ပိုင်းမှာရှိတဲ့ အကြီးအကဲတစ်ယောက်က ဘာဖြစ်လို့ အဆင့်နိမ့် မိစ္ဆာစစ်သူကြီးတစ်ကောင်ကို ရင်ဆိုင်ဖို့ ဒီလောက်တောင် ခက်ခဲနေရတာလဲ။

အခြေခံအုတ်မြစ် တည်ဆောက်ခြင်းအဆင့်ပဲ ဖြစ်ဖြစ်၊ မိစ္ဆာစစ်သူကြီးအဆင့်မှာပဲ ဖြစ်ဖြစ်... ကျင့်စဉ်အဆင့် အနည်းငယ်မျှ ကွာခြားရုံနဲ့တင် တိုက်ပွဲစွမ်းရည်မှာ ကြီးမားတဲ့ ကွာဟချက်ကို ဖြစ်ပေါ်စေနိုင်တယ်ဆိုတာ လူတိုင်း သိကြတာပဲဟာ..."

ခဏမျှ စဉ်းစားကြည့်ပြီးနောက် လုံယီသည် အကြောင်းရင်းကို နားလည်သွားခဲ့သည်။

မျိုးစေ့တစ်ခုတည်းမှပင် လူအမျိုးမျိုး ကွဲပြားစွာ ကြီးပြင်းလာနိုင်သည်။

တိုက်ပွဲကို မြတ်နိုးသူများရှိသကဲ့သို့ မုန်းတီးသူများလည်း ရှိကြကာ ရဲရဲဝံ့ဝံ့ ချဉ်းကပ်တတ်သူများ ရှိသကဲ့သို့ သတိကြီးစွာဖြင့် ရှောင်ကွင်းတတ်သူများလည်း ရှိကြ၏။

အကြီးအကဲချန်မှာမူ ထင်ရှားစွာပင် သတိကြီးစွာထားသည့် လမ်းစဉ်ကို လျှောက်လှမ်းနေသူဖြစ်ပြီး အကျိုးကျေးဇူးကို မမျှော်ကိုးဘဲ အမှားအယွင်းမရှိစေရန်သာ အဓိကထားသူ ဖြစ်သည်။

မြို့တော်ကြီး အဖောက်မခံရစေရန် သစ်ပင်မိစ္ဆာကို အချိန်ဆွဲထားခြင်းမှာ အကြီးအကဲချန်၏ အကြီးမားဆုံးသော ဆန္ဒ ဖြစ်ပေလိမ့်မည်။

သစ်ပင်မိစ္ဆာကို သုတ်သင်ပြီး အကျိုးဆောင်မှုကို ရယူရန်ဟူ၍မူ သူ စိုးစဉ်းမျှပင် ထည့်သွင်းစဉ်းစားခဲ့ခြင်း မရှိပေ။

လက်ရှိအခြေအနေမှာ သူ၏ ထိန်းချုပ်မှုအောက်တွင် ရှိနေသေးသည်။

အကယ်၍ သူသာ သစ်ပင်မိစ္ဆာကို သုတ်သင်လိုက်ပါက ပို၍ သန်မာပြီး ရင်ဆိုင်ရ ပိုမိုခက်ခဲသော မိစ္ဆာများကို ဆွဲဆောင်မိသကဲ့သို့ ဖြစ်သွားနိုင်သည်။

မင်းရဲ့ မျိုးရိုးအမည်က ချန်မဖြစ်သင့်ဘူး... ကောက် (လျှို့ဝှက်ပုန်းအောင်းခြင်း) ပဲ ဖြစ်သင့်တယ်။

လုံယီက စိတ်ထဲကနေ ကျိတ်၍ တွေးလိုက်မိသည်။

သူ၏ စိတ်ကူးအတွေးများမှာ လျင်မြန်စွာ လည်ပတ်နေပြီး အစီအစဉ်၏ နောက်ထပ်ခြေလှမ်းကို စတင်တွေးတော နေတော့၏။

...