အခန်း ၄၄၂

အခန်း။ ၄၄၂

ထိုညမှာပင်...

ပန်မြို့တော်၏ အပြင်ဘက် ဆယ်မိုင်ကျော်အကွာရှိ မိစ္ဆာတပ်စခန်း၏ အဓိက အကျဆုံးသော ဗဟိုချက်မနေရာ၌ ဖြစ်သည်။

ဂုလု လုလု...

ဟူး... ဟူး...

နားကွဲလုမတတ် ဟောက်သံကြီးများမှာ စဉ်ဆက်မပြတ် ပဲ့တင်ထပ်နေ၏။

မိစ္ဆာအုပ်ကြီးသည် မြေပြင်ပေါ်တွင် ဟန်ပန်အိန္ဒြေမရှိဘဲ ဗိုက်ကြီးများအကာလျက် နှစ်ခြိုက်စွာ အိပ်မောကျနေကြပြီး သွားရည်များ တတောက်တောက်ကျကာ ကောင်းကင်ယံတစ်ခုလုံးတွင်လည်း ညှော်နံ့ဆိုးများ ဖုံးလွှမ်းလို့နေတော့သည်။

ထိုဗဟိုချက်မနယ်မြေရှိ ကျားမိစ္ဆာ၊ ဝက်ဝံမိစ္ဆာ၊ သမင်မိစ္ဆာ၊ ကျားသစ်မိစ္ဆာ စသည့် မိစ္ဆာကြီးများထဲတွင် အသေးဆုံးကောင်ပင် အလျားပေငါးဆယ်၊ ခြောက်ဆယ်ခန့် (ငါးစပ်၊ ခြောက်စပ်ဇန့်) ရှိကြသည်။

လုံယီ၏ ယခင်ဘဝက ကုန်းပေါ်တွင် အကြီးဆုံးဆိုသော ဆင်ကြီးများပင် လျှင် ဤမိစ္ဆာကြီးများ၏ ရှေ့မှောက်၌မူ သေးကွေးလွန်းလှသည်ဟု ထင်မှတ်ရပေလိမ့်မည်။

မိုးထိမတတ် မြင့်မားလှပြီး အလျားပေငါးရာခန့် (အဆင့်လေးဆယ်၊ ငါးဆယ်ဇန့်) ရှိသော သစ်ပင်မိစ္ဆာကြီးမှာမူ မြေပြင်ပေါ်တွင် မတ်မတ်ကြီး ရပ်တန့်နေ၏။

စည်ပိုင်းခန့် ထူထဲသော ၎င်း၏ အနက်ရောင်အမြစ်များစွာမှာ မြေအောက်သို့ ထိုးဖောက်ဝင်ရောက်နေပြီး အမြစ်များပေါ်၌ အလင်းတန်းများ တဖျတ်ဖျတ် တောက်ပနေသည်မှာ ယခင်တိုက်ပွဲမှ ဆုံးရှုံးသွားသော ချီစွမ်းအင်များကို ပြန်လည်ဖြည့်တင်းရန် မြေအောက်စွမ်းအားကို ငတ်မွတ်တကြီး စုပ်ယူနေသည့်အလားပင်။

ထိုအချိန်တွင် သွယ်လျသော လူရိပ်တစ်ခုသည် မိစ္ဆာတပ်စခန်းအတွင်းသို့ ရဲရဲဝံ့ဝံ့ ဝင်ရောက်လာခဲ့သည်။

အလျားပေခုနစ်ဆယ်၊ ရှစ်ဆယ်ခန့် အလွယ်တကူရှိကြသော မိစ္ဆာကြီးများနှင့် နှိုင်းယှဉ်ပါက သူ၏ ခန္ဓာကိုယ်မှာ ခြင်ကောင်တစ်ကောင်ကဲ့သို့ပင် သေးငယ်လွန်းလှ၏။

ဤအကြောင်းရင်းကြောင့်ပင် လက်ရှိရှိနေကြသော မိစ္ဆာအားလုံးမှာ မျက်လုံးပွင့်လျက် နိုးနေသောကောင်များပင် ရှိသော်လည်း သူ ရောက်ရှိလာခြင်းကိုမူ ဂရုမထားဘဲ လျစ်လျူရှုထားကြသည်။

ထိုလူရိပ်သည် သစ်ပင်မိစ္ဆာကြီးရှိရာသို့ တည့်တည့်လျှောက်သွားပြီး ခပ်ဖွဖွလေး ခုန်တက်ကာ သူ၏ လက်သီးကို မြှောက်လိုက်တော့၏။

ဘုန်း

လက်သီးချက် ထွက်ပေါ်သွားသည်နှင့်အတူ လေထုထဲ၌ မိုးကြိုးပစ်ချလိုက်သကဲ့သို့ အသံကြီး ပေါက်ကွဲသွားတော့သည်။

ဟင်းလင်းပြင်ထဲတွင် အဖြူရောင် လေစီးကြောင်းများစွာ ဖြစ်ပေါ်လာကာ ဝဲပျံနေပြီး မျက်စိဖြင့် မြင်တွေ့နိုင်သော အပြာရောင်မီးပွားများမှာလည်း တဖျတ်ဖျတ် လင်းလက်တောက်လောင်ကာ ငြိမ်းသတ်သွားကြ၏။

"အား"

သစ်ပင်မိစ္ဆာကြီးထံမှ စူးစူးဝါးဝါး အော်ဟစ်ညည်းတွားသံကြီး ထွက်ပေါ်လာသည်။

အဘိုးအိုတစ်ဦး၏ မျက်နှာအသွင် ဖန်တီးထားသော သစ်ပင်စည်ပိုင်းကြီးပေါ်တွင် ကြိတ်ဆုံကျောက်ခဲခန့် ကြီးမားသော အပေါက်ကြီးတစ်ပေါက် ဖြစ်ပေါ်သွားပြီး ၎င်းအပေါက်ထဲမှ စိမ်းဖန့်ဖန့် အရည်များမှာ ပန်းကန်လုံးအလား အဆက်မပြတ် ပန်းထွက်နေတော့၏။

ပင့်ကူအိမ်ပမာ အထက်အောက် ပျံ့နှံ့သွားသော အက်ကြောင်းများစွာသည်လည်း ၎င်း၏ ပင်မခန္ဓာကိုယ် စည်ပိုင်းကြီးတစ်ခုလုံးတွင် ပြည့်နှက်သွားရသည်။

"ဟင်... မသေသေးဘူးပဲ"

ဤသို့ တိတ်တဆိတ် ဝင်ရောက်တိုက်ခိုက်လိုက်သူမှာ အခြားသူမဟုတ်ဘဲ လုံယီပင် ဖြစ်ကာ သူကိုယ်တိုင်လည်း အနည်းငယ် အံ့အားသင့်သွားမိသည်။

သူ၏ ရုပ်ဖျက်ခြင်းပါရမီကို လှုပ်ရှားနေသည့် အခြေအနေများတွင်ပါ အသုံးပြုနိုင်သဖြင့် ဤနေရာအထိ အလွယ်တကူ ချဉ်းကပ်လာနိုင်ခြင်းပင်။

ထို့ပြင် ယခုပစ်သွင်းလိုက်သော လက်သီးချက်မှာ သူ၏ အခြေခံခွန်အား ပေါင်ချိန်ငါးသိန်း အပြင် ဝံပုလွေအရိုးပါရမီ၏ ငါးဆယ်ရာခိုင်နှုန်း ထပ်မံမြှင့်တင်ပေးမှုကြောင့် ပေါင်ချိန်ရှစ်သိန်း နီးပါးအထိ ရောက်ရှိသွားသည်။

၎င်းအပြင် နဂါးထိုးဖောက်ခြင်းအတတ်ကိုပါ ပေါင်းစပ်လိုက်သောအခါ ပေါင်ချိန်တစ်သန်း အထိ ရောက်ရှိရန် မဝေးတော့ပေ။

ပေါင်ချိန်တစ်သန်းနီးပါးရှိသော လက်သီးချက်နှင့်အတူ လုံယီ၏ အံ့မခန်းဖွယ် လက်သီးအရှိန်အဟုန်ကြောင့် ဖြစ်ပေါ်လာသော ရွေ့လျားချီစွမ်းအင်မှာ အလွန်အမင်း ပြင်းထန်လှပြီး ဖျက်ဆီးနိုင်စွမ်းမှာလည်း စိတ်ကူးပင် မယဉ်နိုင်လောက်အောင် ကြီးမားသည်။

သို့သော်လည်း သစ်ပင်မိစ္ဆာကြီး၏ ဇီဝအသက်စွမ်းအားမှာ အံ့ဩစရာကောင်းလောက်အောင်ပင် ခိုင်မာလွန်းလှသည်။

၎င်းသည် ပြင်းထန်သော ဒဏ်ရာများကို ရရှိခဲ့သော်လည်း ကိုယ်ခန္ဓာပြန်လည်တည်ဆောက်ခြင်းပါရမီကို ပိုင်ဆိုင်ထားသည်။

မကြာမီမှာပင် ဧရာမဒဏ်ရာကြီးနှင့် အက်ကြောင်းများမှာ မျက်စိဖြင့် မြင်တွေ့နိုင်သော အရှိန်အဟုန်ဖြင့် ပြန်လည်ပြုပြင်ကာ သက်သာလာတော့၏။

"ဟွမ်..."

လုံယီ၏ ခန္ဓာကိုယ်အတွင်းမှ ချီစွမ်းအင်များ ပေါက်ကွဲထွက်လာပြီး သူ၏ တစ်ကိုယ်လုံးမှာ တောက်ပသော အနီရောင်အလင်းတန်းများ လွှမ်းခြုံသွားတော့သည်။

ဘုန်း

မျက်စိတစ်မှိတ်အတွင်းမှာပင် သူသည် လက်သီးချက်ပေါင်းများစွာကို ထိုးနှက်လိုက်ရာ အားလုံးမှာ ခုနက သူ ဖောက်ထွင်းခဲ့သော အပေါက်ကြီးပေါ်သို့ တည့်တည့်မတ်မတ် ကျရောက်သွားတော့၏။

ဒိုင်း

သစ်ပင်မိစ္ဆာကြီး၏ ခန္ဓာကိုယ်မှာ ပေါက်ကွဲသွားပြီး ရေတွက်၍မရနိုင်သော မီးခိုးရောင် သစ်သားအစအနများအဖြစ်သို့ ပြောင်းလဲကာ အရပ်မျက်နှာအနှံ့သို့ ရူးသွပ်စွာ လွင့်စင်သွားတော့သည်။

ရုတ်ချည်းဆိုသလိုပင် ပတ်ပတ်လည်၌ အဆက်မပြတ် အော်ဟစ်သံများ ပြည့်နှက်သွားရ၏။

အနီးအနားရှိ မိစ္ဆာအုပ်ကြီးမှာ ထိုမာကျောလှသော သစ်သားအစအနများ၏ ထိုးဖောက်ခြင်းကို ခံလိုက်ရသဖြင့် တစ်ကိုယ်လုံး အပေါက်ပေါင်းများစွာ ဖြစ်ကာ ပြန်လည်မရှင်သန်နိုင်တော့ဘဲ သေဆုံးသွားကြရတော့သည်။

မိစ္ဆာစစ်သူကြီး၏ ခန္ဓာကိုယ်သည် သာမန် ဝိညာဉ်အဆင့်မှော်ရတနာများကဲ့သို့ပင် မာကျောလှသည်။

ကံကောင်း၍ မသေဆုံးသေးသူများမှာလည်း ခန္ဓာကိုယ်ပေါ်တွင် သွေးအိုင်ငယ်များစွာ ဖြစ်ပေါ်နေပြီး သွေးများ တသွင်သွင် စီးကျနေကြသည်။

"အခုထိ မသေသေးဘူးလား"

လုံယီမှာ အနည်းငယ် အံ့အားသင့်သွားမိ၏။

အဘယ်ကြောင့်ဆိုသော် စွမ်းရည်ပြမျက်နှာပြင်ပေါ်တွင် မည်သည့်အကြောင်းကြားချက်မျှ ထွက်ပေါ်မလာသေးခြင်းကြောင့် ဖြစ်ကာ သစ်ပင်မိစ္ဆာကြီးကို အမှန်တကယ် သတ်ဖြတ်နိုင်ခြင်း မရှိသေးကြောင်း ဖော်ပြနေခြင်းပင်။

သူ၏ မျက်လုံးများထဲတွင် အနီရောင်အလင်းတန်းတစ်ခု ဖြတ်သန်းသွားပြီး တစ်ချိန်တည်းမှာပင် စွမ်းရည်ပြမျက်နှာပြင်၏ အသစ်မြှင့်တင်ထားသော နယ်မြေထောက်လှမ်းခြင်းစွမ်းရည်ကို အသက်သွင်းလိုက်သည်။

မျက်စိဖြင့် မမြင်နိုင်သော ချီစွမ်းအင်လှိုင်းတစ်ခုသည် သူ၏ ခန္ဓာကိုယ်ဗဟိုချက်မှ ပတ်ပတ်လည်သို့ ပျံ့နှံ့သွားပြီး မြေအောက်နယ်မြေအကျယ်ကြီးကိုပါ လွှမ်းခြုံသွားနိုင်၏။

ပတ်ပတ်လည်ရှိ မိစ္ဆာအားလုံး၏ အသက်ရှူလှုပ်ရှားမှုများမှာ သုံးဖက်မြင်မြေပုံတစ်ခုကဲ့သို့ပင် သူ၏ စိတ်ထဲ၌ ကွက်ကွက်ကွင်းကွင်း ပေါ်လွင်လာတော့သည်။

ဘုန်း

ပြင်းထန်သော ပေါက်ကွဲသံကြီး ထွက်ပေါ်လာချိန်တွင် လုံယီ၏ လူရိပ်မှာ ပေတစ်ထောင်ကျော်အကွာအဝေးသို့ ရောက်ရှိသွားသည်။

သူသည် မြေအောက်သို့ ချက်ချင်းပင် ငုပ်လျှိုးဝင်ရောက်ကာ ပျောက်ကွယ်သွားတော့၏။

သူ ပြန်လည်ပေါ်ထွက်လာသောအခါ သူ၏လက်ထဲတွင် မီးခိုးရောင် သစ်သားအစအနတစ်ခုကို ကိုင်ဆောင်ထားသည်။

ထိုသစ်သားစမှာ တစ်ပေခန့် ရှည်လျားပြီး မကျေမနပ်ဖြစ်စွာဖြင့် ဝူးဝူးဟု တုန်ခါလျက် ထွက်ပြေးရန် ကြိုးစားနေသော်လည်း အချည်းနှီးသာ ဖြစ်ရ၏။

အခြားသော ပုံသဏ္ဌာန်မမှန်သည့် သစ်သားစများနှင့် နှိုင်းယှဉ်ပါက ဤသစ်သားစမှာ ပိုမိုလုံးဝန်းလာပြီး အစွန်းအထွက်များ ပျောက်ကွယ်သွားပြီ ဖြစ်ရာ ၎င်း၏ ပြန်လည်တည်ဆောက်ခြင်းပါရမီ စတင်အသက်ဝင်နေပြီဖြစ်ကြောင်း ထင်ရှားသည်။

အကယ်၍ ၎င်းကို ဒီအတိုင်းသာ လွှတ်ထားလိုက်ပါက သစ်ပင်မိစ္ဆာကြီးမှာ မကြာမီအချိန်အတွင်း မူလအတိုင်း ပြန်လည်ကောင်းမွန်လာလိမ့်မည် ဖြစ်ကြောင်း တွေးဆကြည့်နိုင်သည်။

"သစ်ပင်မိစ္ဆာရဲ့ ဇီဝအသက်စွမ်းအားက တကယ်ကို ကြံ့ခိုင်လွန်းတာပဲ"

လုံယီက သက်ပြင်းချလိုက်မိသည်။

သူ၏လက်များပေါ်တွင် ကြည်လင်သော အနီရောင်ချီစွမ်းအင်များ ဖုံးလွှမ်းသွားပြီးနောက် ညင်သာစွာ ဆုပ်နယ်လိုက်ရာ ထိုသစ်သားစမှာ ဒုတိယအကြိမ် ထပ်မံခြေဖျက်ခြင်းကို ခံလိုက်ရပြီး တဖြည်းဖြည်းနှင့် မှုန့်မှုန့်ညက်ညက် အမှုန့်များအဖြစ်သို့ ပြောင်းလဲသွားတော့သည်။

"အသက်ချမ်းသာပေးပါ..."

သစ်ပင်မိစ္ဆာကြီး၏ အသံမှာ ရုတ်ချည်းပင် ပြတ်တောက်သွားတော့သည်။

တစ်ချိန်တည်းမှာပင် လုံယီ၏ လက်ထဲ၌ ကြက်ဥခန့်ကြီးမားသော စိမ်းဖန့်ဖန့် ကျောက်သလင်းတုံးတစ်ခု ပေါ်လာပြီး ၎င်းမှာ ကျောက်စိမ်းကဲ့သို့ ဝင်းပနေကာ သင်းပျံ့သော သစ်ပင်သစ်တောရနံ့ကလေး တစ်ချက် ထွက်ပေါ်လာ၏။

ထိုကျောက်သလင်းတုံး၏ အတွင်းဘက်၌ မည်းနက်သော အရိပ်တစ်ခု လှုပ်ရှားနေသည်ကို မြင်တွေ့နိုင်သည်။

"ချပ်ဝတ်ထိုးဖောက်ခြင်း"

"အား"

မည်းနက်သော အရိပ်ကလေးမှာ ချက်ချင်းပင် အပိုင်းပိုင်းအစစ ကြေမွသွားတော့၏။

ယခုတစ်ကြိမ်တွင်မူ သစ်ပင်မိစ္ဆာကြီးမှာ အမှန်တကယ်ပင် အသက်ပျောက်သွားခဲ့ပြီဖြစ်ရာ လုံယီ၏လက်ထဲ၌ ဆန်းကြယ်သော သစ်ပင်ကျောက်သလင်းတုံးတစ်ခုသာ ကျန်ရစ်ခဲ့တော့သည်။

"သူ... သူက ဘုရင်ကြီးကို သတ်လိုက်ပြီ"

"ဘုရင်ကြီးအတွက် ကလဲ့စားချေကြစမ်း"

ဘေးပတ်ဝန်းကျင်မှ သစ်ပင်မိစ္ဆာငယ်များနှင့် နွယ်ပင်မိစ္ဆာအချို့မှာ အန္တရာယ်ကို သတိမပြုမိဘဲ လုံယီကို ဝိုင်းရံတိုက်ခိုက်ရန် အလောတကြီး ပြေးဝင်လာကြသည်။

သို့သော်လည်း လုံယီ၏ သံမဏိလက်သီးချက်များအောက်တွင် ဤမိစ္ဆာအငယ်လေးများမှာ အစအနပင်မကျန် ကျိုးပဲ့ကာ ပျက်စီးကုန်ကြရတော့၏။

အခြားသော မိစ္ဆာအများစုမှာမူ ရှေ့ဆက်မတိုးရဲတော့ဘဲ အသက်လွတ်ရုန်းကာ ဝေးရာသို့ အလန့်တကြား ထွက်ပြေးကြတော့သည်။

လုံယီ၏ မျက်နှာမှာ မည်သည့်ခံစားချက်မျှမရှိဘဲ တည်ငြိမ်နေလျက် သူ၏ လက်ချောင်းဆယ်ချောင်းကို ဖြန့်ကားလိုက်၏။

သူ၏ ခန္ဓာကိုယ်အတွင်းမှ လက်ချောင်းခန့် ထူထဲသော အနီရောင်ချီစွမ်းအင်တန်းများ အဆက်မပြတ် ထွက်ပေါ်လာပြီး မျက်စိတဆုံးရှိသမျှ မိစ္ဆာငယ်များကို ရက်ရက်စက်စက် ခြေမှုန်းပစ်ကာ ချီစွမ်းအင်များကို အလုံးအရင်းဖြင့် သိမ်းကျုံးစုဆောင်းတော့သည်။

ဤမျှလောက်ကြီးမားသော လှုပ်ရှားမှုကြီးကြောင့် ပန်မြို့တော်ကို စောင့်ကြပ်နေသည့် အကြီးအကဲချန်မှာ ချက်ချင်းပင် အာရုံပြုမိသွားတော့၏။

သူသည် ဓားကိုစီးနင်းကာ တိုက်ပွဲဖြစ်ပွားရာနေရာသို့ အပြေးအလွှား ပျံသန်းရောက်ရှိလာသောအခါ တောက်ပသော အနီရောင်အလင်းတန်းများ လွှမ်းခြုံထားသဖြင့် ရုပ်အသွင်ကို သဲသဲကွဲကွဲမမြင်ရသော လူရိပ်တစ်ခုက မိစ္ဆာအုပ်ကြီးကို ညှာတာမှုကင်းမဲ့စွာ သုတ်သင်နေသည်ကို မြင်တွေ့လိုက်ရသည်။

"မင်းက... ဟိုတုန်းက လက်ဝှေ့သိုင်းကျင့်စဉ်သမားလား"

အနည်းငယ် စဉ်းစားကြည့်ပြီးနောက် အကြီးအကဲချန်သည် လုံယီ၏ နောက်ကြောင်းကို ရိပ်မိသွားသည်။

"ဒါက ကျွန်တော့်ရဲ့ ဆန္ဒအလျောက် လုပ်တာမဟုတ်ပါဘူး"

ထိုအနီရောင်အလင်းတန်းပိုင်ရှင်က သူ၏ အမှတ်အသားကို ငြင်းဆန်ခြင်းမပြုခဲ့ပေ။

"မင်းက အမှန်တကယ် ဘယ်သူလဲ"

တစ်ဖက်လူ၏ မကြုံစဖူး ထူးကဲလှသော သွေးချင်းချင်းနီသည့် ချီစွမ်းအင်ကို အာရုံခံမိသောအခါ အကြီးအကဲချန်၏ မျက်နှာပေးမှာ အနည်းငယ် လေးနက်တည်ကြည်သွားတော့သည်။

"ကျွန်တော့်နာမည်က ချန်ချန် ပါ"

နားလည်မှုလွဲမှားခြင်းနှင့် ဂိုဏ်းတွင်းပဋိပက္ခများ ဖြစ်ပွားမည်ကို စိုးရိမ်သဖြင့် လုံယီသည် အကြီးအကဲချန်နှင့် အများကြီး စကားမဆိုတော့ဘဲ ထိုနေရာမှ ချက်ချင်းပင် ပျောက်ကွယ်သွားခဲ့တော့၏။

သဘာဝအတိုင်း သတိကြီးလှသော အကြီးအကဲချန်သည်လည်း နောက်ကနေ လိုက်လံဖမ်းဆီးခြင်းမပြုဘဲ မပြတ်သားသော မျက်နှာပေးဖြင့်သာ ထိုနေရာတွင် ရပ်ကျန်ရစ်ခဲ့သည်။

"ချန်ချန် တဲ့လား... ဒါက နာမည်အရင်းလား ဒါမှမဟုတ် နာမည်ဝှက်လား"

"ထားလိုက်ပါတော့လေ သူက ငါတို့ဂိုဏ်းကို တမင်သက်သက် ဒုက္ခပေးဖို့ လုပ်ခဲ့တာမှ မဟုတ်တာ"

"ဒီသစ်ပင်မိစ္ဆာကိုတော့ ရင်ဆိုင်လို့ရသေးတယ်။ ဒါပေမဲ့ နောက်ပိုင်းကျရင် ဘယ်လိုမိစ္ဆာတွေ ဘာကောင်တွေ ထပ်လာဦးမလဲဆိုတာ ဘယ်သူသိနိုင်မှာလဲ..."

အကြီးအကဲချန်သည် သက်ပြင်းချလိုက်ရာ သူ၏မျက်နှာမှာ ပို၍ပင် ညှိုးငယ်သွားတော့ပြီး ပန်မြို့တော်ဆီသို့ ပြန်လည်ဆုတ်ခွာသွားခဲ့တော့သည်။

တစ်ဖက်တွင်မူ လုံယီသည် လမ်းကြောင်းလွှဲကာ မြို့အတွင်းသို့ တိတ်တဆိတ် ပြန်လည်ရောက်ရှိလာပြီး သူ၏ အခန်းထဲသို့ ဝင်ရောက်လိုက်၏။

သူသည် ယခုတစ်ကြိမ် တိုက်ခိုက်မှုမှ ရရှိခဲ့သော အကျိုးအမြတ်များကို စတင်စုဆောင်းပြင်ဆင်တော့သည်။

ပထမဆုံးအနေဖြင့် သစ်ပင်မိစ္ဆာကြီးထံမှ ရရှိသောအရာ ဖြစ်သည်။

[ကောက်ယူနိုင်သော ပစ္စည်းတစ်ခုကို တွေ့ရှိရပါသည်။ အောက်ပါအချက် သုံးခုထဲမှ တစ်ခုကို ရွေးချယ်ပါ]

[ချီစွမ်းအင်အမှတ်များ]

[သစ်သားဓာတ်ဆွဲဆောင်မှု အနည်းငယ် မြင့်မားလာခြင်း]

[ပါရမီ - ကိုယ်ခန္ဓာပြန်လည်တည်ဆောက်ခြင်း]

[သင် ရွေးချယ်လိုပါသလား]

လုံယီသည် သဘာဝအတိုင်းပင် ကိုယ်ခန္ဓာပြန်လည်တည်ဆောက်ခြင်း ပါရမီကို ရွေးချယ်လိုက်တော့၏။

[ကိုယ်ခန္ဓာပြန်လည်တည်ဆောက်ခြင်း (အလုပ်သင်အဆင့် သုည/ငါး) → ကိုယ်ခန္ဓာပြန်လည်တည်ဆောက်ခြင်း (အခြေခံအဆင့် သုည/နှစ်ဆယ် + သစ်ပင်ကျောက်သလင်းတုံး တစ်တုံး)]

ပါရမီမှာ အခြေခံအဆင့်သို့ တက်လှမ်းသွားပြီးနောက်တွင်လည်း အပေါင်းလက္ခဏာမှာ ပျောက်ကွယ်မသွားသေးပေ။

ဒီပစ္စည်းက ခုနက သစ်ပင်ကျောက်သလင်းတုံးကို ပြောတာလား။

လုံယီ၏ လက်ထဲ၌ သစ်ပင်မိစ္ဆာကို နှိမ်နင်းပြီးနောက် ရရှိခဲ့သော စိမ်းဖန့်ဖန့် ကျောက်သလင်းတုံးကလေး ပေါ်လာသည်။

သူက အပေါင်းလက္ခဏာကို ထပ်မံနှိပ်လိုက်သောအခါ ထိုကျောက်သလင်းတုံးမှာ ချက်ချင်းပင် အရည်ပျော်သွားပြီး လုံယီ၏ လက်ဖဝါးအတွင်းသို့ စိမ့်ဝင်သွားကာ အေးမြသော ခံစားချက်တစ်ခုသည်လည်း သူ၏ တစ်ကိုယ်လုံးသို့ ပျံ့နှံ့သွားတော့၏။

[ကိုယ်ခန္ဓာပြန်လည်တည်ဆောက်ခြင်း (အခြေခံအဆင့် သုည/နှစ်ဆယ် + သစ်ပင်ကျောက်သလင်းတုံး တစ်တုံး) → ကိုယ်ခန္ဓာပြန်လည်တည်ဆောက်ခြင်း (ကျွမ်းကျင်အဆင့် သုည/တစ်ရာ + သက်စောင့်ဝိညာဉ်နှလုံးသား တစ်ခု)]

[ကိုယ်ခန္ဓာပြန်လည်တည်ဆောက်ခြင်းသည် ခန္ဓာကိုယ် ထိခိုက်ဒဏ်ရာရရှိသည့်အခါ အတိုင်းအတာတစ်ခုအထိ သူဘာသာ ပြန်လည်ပြုပြင်နိုင်သည်။ သွေးချင်းချင်းနီသည့် ချီစွမ်းအင် ပိုမိုသန်မာလေလေ၊ ပြန်လည်ကောင်းမွန်မှုနှုန်း ပိုမိုမြန်ဆန်လေလေ ဖြစ်သည်]

တစ်နည်းအားဖြင့်ဆိုရသော် အကယ်၍ လုံယီသည် နောင်တွင် ခြေလက်အင်္ဂါများ ဆုံးရှုံးသွားခဲ့ရလျှင်ပင် ၎င်းတို့မှာ လျင်မြန်စွာ ပြန်လည်ပေါက်ပွားလာလိမ့်မည်ပင်။

စွမ်းရည်ပြမျက်နှာပြင်ပေါ်၌ မူလကတည်းက ရှိနေသော ကုသခြင်းစွမ်းရည်နှင့် ပေါင်းစပ်လိုက်ပါက သူ၏ အသက်ရှင်သန်နိုင်စွမ်းမှာ နောက်ထပ် အဆင့်မြင့်မားသော နယ်ပယ်တစ်ခုသို့ တက်လှမ်းသွားခဲ့ပြီ ဖြစ်သည်။

သစ်ပင်မိစ္ဆာထံမှ ရရှိသော ပါရမီအပြင် လုံယီသည် ခုနကတင် မိစ္ဆာငယ်အကွေးပေါင်း ရာဂဏန်းခန့်ကို သုတ်သင်ခဲ့သဖြင့် ချီစွမ်းအင်အမှတ်များလည်း အဆမတန် မြင့်တက်သွားခဲ့သည်။ မြို့တော်ကာကွယ်ရေးတိုက်ပွဲမှ ယခင်ရရှိထားသော ဆုလာဘ်များနှင့် ပေါင်းစပ်လိုက်သောအခါ သူ၏ စုစုပေါင်းချီစွမ်းအင်မှာ သုံးသောင်းကျော်အထိ ကျော်လွန်သွားခဲ့ပြီပင်။

၎င်းအပြင် သူသည် ယင်ဓာတ်ဆွဲဆောင်မှု ဆယ်ဆထက်မက မြင့်မားခြင်းကိုလည်း ရရှိခဲ့သည်။

ယင်ဝိညာဉ်အမြစ်မှာလည်း အဆက်မပြတ် တိုးတက်နေပြီး အဆင့်မြင့်အဆင့်သို့ ရောက်ရှိရန် နီးကပ်လာခဲ့ပြီ ဖြစ်သည်။

ဒေါက်... ဒေါက်... ဒေါက်

မကြာမီမှာပင် တံခါးကို အလောတကြီး လာရောက်ခေါက်သံ ကြားလိုက်ရသည်။

စမ်းသပ်အာရုံခံကြည့်စရာပင်မလိုဘဲ ဤသူမှာ ပိယောင်ယောင်မှတစ်ပါး အခြားသူမဖြစ်နိုင်ကြောင်း လုံယီ သိရှိလိုက်၏။

တံခါးကို ဖွင့်လိုက်သောအခါ ပိယောင်ယောင်၏ မျက်နှာမှာ ရဲရဲနီနေပြီး သူမ၏ အရေပြားမှာ ပန်းသီးနီကလေးတစ်လုံးကဲ့သို့ စိုပြည်လျက် စိတ်လှုပ်ရှားမှုများ ပြည့်နှက်နေသည်ကို မြင်လိုက်ရသည်။

"ဘာကိစ္စရှိလို့လဲ"

"ဟို ဝံပုလွေသခင်လေးကို သတ်ခဲ့တဲ့ ဆန်းကြယ်တဲ့ လက်ဝှေ့သိုင်းသမားကြီး လာပြန်ပြီဟ။ အခု သစ်ပင်မိစ္ဆာကြီးကိုလည်း သတ်ပစ်လိုက်ပြီ"

"အော်... ဒါက သတင်းကောင်းပဲဥစ္စာ"

"နင် ခုနက ဘယ်သွားနေတာလဲ"

ပိယောင်ယောင်က လုံယီကို သံသယမျက်လုံးများဖြင့် စိုက်ကြည့်လိုက်သည်။

"အိပ်နေတာလေ"

လုံယီက သမ်းဝေလိုက်ပြီး "မယုံရင် ဝင်ပြီး စမ်းကြည့်လိုက် အိပ်ရာက အခုထိ နွေးနေတုန်းပဲ"

"သွားသေလိုက်ပါလား"

ပိယောင်ယောင်၏ လှပသော မျက်နှာလေးမှာ ရှက်သွေးဖြန်းကာ နီမြန်းသွားပြီး လုံယီကို ထုရိုက်တော့မည့်အလား သူမ၏ လက်သီးစုပ်ကလေးကို စနောက်ကာ ဝှေ့ယမ်းလိုက်သည်။

ထို့နောက် သူမက အကြံပြုချက်တစ်ခု ပေးလာ၏။

"သစ်ပင်မိစ္ဆာလည်း သေသွားပြီဆိုတော့ ပန်မြို့တော်က လောလောဆယ် ဘေးကင်းသွားပြီ။ ငါတို့ တခြားနေရာတစ်ခုခုကို ပြောင်းကြမလား"

"ငါ့ရဲ့ ကျင့်စဉ်အတားအဆီးက လျော့ရဲလာသလို ခံစားနေရတယ်။ အစစ်အမှန် တိုက်ပွဲတွေက ကျင့်စဉ်အဆင့် တက်လှမ်းဖို့ တကယ့်ကို အထောက်အကူပြုတာပဲ"

ပိယောင်ယောင်သည် လက်ရှိတွင် ချီစွမ်းအင်စုဆောင်းခြင်း ဆဋ္ဌမအဆင့်သို့ ရောက်ရှိနေပြီး အထက်ပိုင်းအဆင့်သို့ ရောက်ရှိရန် ခြေတစ်လှမ်းသာ လိုတော့သည်။

အကယ်၍ သူမသာ အောင်မြင်စွာ ကျင့်စဉ်အဆင့် တက်လှမ်းနိုင်ခဲ့လျှင် ဂိုဏ်းတော်၏ စစ်မှန်သော တပည့်အရင်းအဖြစ်သို့ ရောက်ရှိသွားမည်ပင်။

"ကောင်းပြီလေ... ဒါဆို ငါတို့ ရုမြို့တော်ကို သွားကြမလား"

ရုံရွှယ်ကျန်းလည်း ရောက်ရှိလာပြီး သုံးဦးသား စုပေါင်းကာ တိုင်ပင်ကြတော့သည်။

ဤတိတ်တဆိတ် စီးနင်းတိုက်ခိုက်မှုအပြီးတွင် လုံယီသည် အချို့သောအကျိုးကျေးဇူးများကို ကောင်းကောင်းကြီး အရသာတွေ့သွားခဲ့ပြီ ဖြစ်သည်။

သူ၏ ရုပ်ဖျက်ခြင်းပါရမီနှင့် ထောက်လှမ်းခြင်းစွမ်းရည်တို့ကြောင့် သူသည် ဤကမ္ဘာပေါ်တွင် အင်အားအကောင်းဆုံးသော လူသတ်သမားတစ်ဦး ဖြစ်နေသည်။

အကယ်၍ ရင်ဆိုင်၍မရနိုင်လောက်အောင် သန်မာနေပါက လျစ်လျူရှုထားမည်ဖြစ်ပြီး ရင်ဆိုင်နိုင်စွမ်းရှိပါက ခေါင်းဖြတ်တိုက်ခိုက်မှုကို လွယ်လွယ်ကူကူနှင့် ပြတ်ပြတ်သားသား လုပ်ဆောင်နိုင်သည်။

ချီစွမ်းအင်အမှတ်များကို ရရှိနိုင်ရုံသာမကဘဲ ဆန်းကြယ်သော ပါရမီများကိုပါ ရရှိနိုင်မည့် အခွင့်အရေးပင် ရှိနေသေးသည်။

အရေးကြီးဆုံးအချက်မှာ ကျောက်နိုင်ငံကို မိစ္ဆာမျိုးနွယ်စုများ လာရောက်ကျူးကျော်ရခြင်း၏ ပင်မတရားခံမှာ လုံယီကိုယ်တိုင်ပင်။

သူ ဖြစ်ပွားစေခဲ့သော ပြဿနာကို သူကိုယ်တိုင်ပင် နည်းလမ်းရှာပြီး ဖြေရှင်းကာ အမှားကို ပြင်ဆင်ရပေလိမ့်မည်။

ထို့ကြောင့် သုံးဦးသားမှာ ပန်မြို့တော်မှ ထွက်ခွာပြီး အနီးအနားရှိ ရုမြို့တော်ဆီသို့ ဦးတည်ရန် သဘောတူညီလိုက်ကြတော့သည်။