အခန်း ၂၀၈

အခန်း (၂၀၈) - ဆေးဝါးစက်ရုံ အမှုကြီး

မိဖုရားခေါင်ကြီး၏ သီးသန့်သမားတော်အဖြစ် ဝူကျိရှန်းသည် ရက်အနည်းငယ်လျှင် တစ်ကြိမ် နန်းတော်သို့ ဝင်ရ၏။

ပုံမှန်စစ်ဆေးမှုအချို့ ပြုလုပ်ပြီးနောက် ဝူကျိရှန်းက လျှောက်တင်လိုက်သည်။

"မိဖုရားခေါင်ကြီးရဲ့ ရောဂါအခြေအနေက အခြေခံအားဖြင့် တည်ငြိမ်နေပါပြီ။ ထပ်ပြီး ဆိုးရွားမလာနိုင်တော့ပါဘူး။ ဒါပေမဲ့ အစားအသောက်ကို ဂရုစိုက်ရပါမယ်။ ဆေးဝါးမှီဝဲပြီး ပြုစုစောင့်ရှောက်မှုကိုတော့ ရပ်နားလို့မရပါဘူး..."

ပင်နီဆလင်သည် သက်ဆိုင်ရာ ရောဂါလက္ခဏာများကိုသာ ပျောက်ကင်းစေနိုင်ပြီး လူနာ၏ နာကျင်မှုကို လျှော့ချပေးကာ ရောဂါအခြေအနေ ပိုမိုဆိုးရွားမလာအောင် အချိန်ဆွဲပေးနိုင်သော်လည်း ကျောက်ကပ်ရောင်ရောဂါကိုမူ လုံးဝ အမြစ်ပြတ်အောင် မကုသနိုင်ချေ။

လက်ရှိ ဆေးဝါးကုသမှု အခြေအနေအရ ရောဂါတိုးမလာအောင် ထိန်းချုပ်ပြီး ရေရှည်ပြုစုစောင့်ရှောက်ရမည့် နာတာရှည်ရောဂါအဖြစ်သာ ကုသရန် နည်းလမ်းရှိ၏။

နန်းတွင်းရေးရာ အတော်များများကို အိမ်ရှေ့မင်းသားထံ လွှဲအပ်ထားပြီး ဖြစ်သဖြင့် ကျူးယွမ်ကျန်းသည် မိဖုရားခေါင်ကြီးနှင့်အတူ ရှိနေပေးရန် အချိန်ပိုရလာသည်။

ဟုန်းဝူဧကရာဇ်သည် စိတ်အခြေအနေ အလွန်ကောင်းမွန်နေပြီး ဝူကျိရှန်းကို မျက်မှောက်၌ပင် ချီးကျူးစကား ဆိုလိုက်၏။

"စုန်ကျောင်းနယ်စားကြီးက အစီရင်ခံစာ တင်သွင်းလာတယ်။ အသစ်ပို့လိုက်တဲ့ ဆေးက အံ့ဖွယ်အာနိသင်ရှိပြီး ရှေ့တန်းက စစ်သည်တွေ အလွန်နှစ်သက်ကြတယ်တဲ့။ ဒီဆေးကို မိဖုရားခေါင်ကြီးအတွက် ဖော်စပ်တာမို့ စစ်သည်တွေက ဖုန်းရိမှုန့်လို့ အမည်ပေးထားကြတယ်"

ပင်နီဆလင်သည် အနာအဆာများ အထူးသဖြင့် ပြင်ပဒဏ်ရာများ ရောင်ရမ်းခြင်းကို ပျောက်ကင်းစေရန် မွေးဖွားလာသော ဆေးဝါးဖြစ်သဖြင့် ချက်ချင်း ထိရောက်မှုရှိကာ "ဒဏ်ရာကုသရာ၌ မြတ်စွာသော ဆေးနတ်သား" ဟု ကျော်ကြားလှသည်။ သမိုင်းကို ပြောင်းလဲစေနိုင်သော ဤဆေးဝါးကို မူလက မိဖုရားခေါင်ကြီးကို ကုသရန် ရည်ရွယ်ခဲ့သော်လည်း မိဖုရားခေါင်ကြီးမားကိုယ်တိုင် ထိုမျှအများကြီး သုံးစွဲရန် မလိုသဖြင့် ပိုလျှံသည်များကို ရှေ့တန်းမှ စစ်သည်များထံ ပေးပို့ခဲ့ခြင်း ဖြစ်၏။

ရှေ့တန်းမှ စစ်သည်များသည် မိဖုရားခေါင်ကြီး၏ ကရုဏာတော်ကို ကျေးဇူးတင်သောကြောင့် ပင်နီဆလင်ကို မိမိတို့ဒေသအသုံးအနှုန်းဖြင့် ဖုန်းရိမှုန့်ဟု အမည်ပေးခဲ့ကြသည်။

မိဖုရားခေါင်ကြီးမားက ပြုံးလျက် မိန့်ကြားလိုက်၏။

"သမိုင်းတစ်လျှောက်က ပညာရှိတဲ့ မိဖုရားတွေဟာ အဆောင်တော်ကို ထိန်းသိမ်းတာ ဒါမှမဟုတ် နန်းတွင်းရေးရာတွေကို ကူညီပေးတာကြောင့် သမိုင်းမှာ နာမည်တွင်ခဲ့ကြတာ။ ငါက ဒီဆေးကြောင့် နောင်လာနောက်သားတွေရဲ့ အမှတ်ရမှုကို ခံရမယ်ဆိုရင် ဒါဟာ သမားတော်ဝူရဲ့ ကျေးဇူးကြောင့်ပါပဲ"

မိဖုရားခေါင်ကြီးက ဖုန်းရိမှုန့်ဟု ခေါ်သော ပင်နီဆလင်ကို များစွာ ချီးကျူးခဲ့ပြီး ဤအရာက သမိုင်းကို ပြောင်းလဲရန် အကြောင်းဖန်လာသော်လည်း ဝူကျိရှန်းကမူ ပြောရန် စောလွန်းသေးကြောင်း သိထား၏။

ပင်နီဆလင်၏ အာနိသင်မှာ လုံးဝ သံသယဖြစ်ဖွယ်မရှိသော်လည်း ၎င်းတွင် ကြီးမားသော အားနည်းချက်တစ်ခု ရှိနေသည်မှာ ထုတ်လုပ်နိုင်မှုပမာဏ အလွန်နည်းပါးခြင်း ဖြစ်သည်။

လက်ရှိ ဆေးဝါးစက်ရုံမှာ အမှန်တကယ်တော့ အလွန်ကြီးမားသော ဆေးဝါးဖော်စပ်သည့် အလုပ်ရုံမျှသာ ဖြစ်၏။ ထုတ်လုပ်သမျှ ပင်နီဆလင်၏ အစိတ်အပိုင်းအနည်းငယ်ကို မိဖုရားခေါင်ကြီး သုံးစွဲရန် နန်းတွင်းဆေးတိုက်သို့ ပေးပို့ပြီး ကျန်ရှိသမျှကို ရှေ့တန်းရှိ စစ်သည်များထံ ပေးပို့သည်။

မြောက်ပိုင်းစစ်ဆင်ရေးသည် ကြီးမားပြီး ရေရှည်ဆင်နွှဲရသောစစ်ပွဲဖြစ်သဖြင့် ထိုမျှနည်းပါးလှသော ပင်နီဆလင်ပမာဏမှာ သမုဒ္ဒရာထဲသို့ ရေတစ်စက် ချသကဲ့သို့သာ ရှိ၏။ အာနိသင် အံ့ဖွယ်ကောင်းသော်လည်း သာမန်စစ်သည်အများစုမှာ မသုံးစွဲနိုင်ကြဘဲ အထိမ်းအမှတ်သဘောမျိုးသာ ရှိပေသည်။

အကြီးစား ထုတ်လုပ်မှု ချဲ့ထွင်လာသည်နှင့်အမျှ ပင်နီဆလင်၏ ကုန်ကျစရိတ်မှာ တဖြည်းဖြည်း လျော့နည်းလာသော်လည်း အရည်အသွေးမှာ မြင့်မားလွန်းနေဆဲ ဖြစ်၏။ သာမန်လူထုကို ထားဦး၊ ကြွယ်ဝချမ်းသာသော မိသားစုများပင် ဝယ်ယူရန် မတတ်နိုင်ကြချေ။

တကယ်တော့ ဤအရာမှာ ရှောင်လွှဲ၍မရသော ကိစ္စ ဖြစ်သည်။

ဒုတိယကမ္ဘာစစ်အတွင်း အမေရိကန်တို့၏ စက်မှုထုတ်လုပ်မှု စွမ်းအားကို အပြည့်အဝ အသုံးပြုခဲ့လျှင်ပင် ထိုဆေးကို ရရှိရန် ခက်ခဲခဲ့၏။ ဒုတိယကမ္ဘာစစ် အလယ်ပိုင်းနှင့် နှောင်းပိုင်းကာလများတွင်ပင် ပင်နီဆလင်သည် အလွန်အရေးကြီးသော စစ်ဗျူဟာမြောက် ပစ္စည်းတစ်ခု ဖြစ်ခဲ့ပြီး ငွေရှိလျှင်ပင် ဝယ်ယူ၍မရနိုင်သော ပစ္စည်းဖြစ်သဖြင့် မှောင်ခိုဈေးကွက်တွင် ဈေးနှုန်းများ ကောင်းကင်သို့ ပျံတက်ခဲ့သည်။ ဂျပန်ဆန့်ကျင်ရေး အခြေခံစခန်းများရှိ စစ်တပ်နှင့် ပြည်သူများအနေဖြင့် ဤအဖိုးတန်ဆေးဝါးကို ရရှိရန်အတွက် ကြီးမားသော ပေးဆပ်မှုများကို မကြာခဏ ပြုလုပ်ခဲ့ရသည်။

ဒုတိယကမ္ဘာစစ်အတွင်း၌ပင် ဤကဲ့သို့ ဖြစ်ခဲ့လျှင် မင်မင်းဆက်ကာလတွင် ပိုဆိုဖွယ်ရာသာရှိသည် ။မင်မင်းဆက်ကာလ၌ ပင်နီဆလင်သည် မည်မျှအဖိုးတန်မည်ကို ခန့်မှန်းကြည့်နိုင်ပေသည်။

ထုတ်လုပ်မှုနှင့် ကုန်ကျစရိတ် ကန့်သတ်ချက်များကြောင့် အချိန်တိုအတွင်း ပင်နီဆလင်ကို ကျယ်ကျယ်ပြန့်ပြန့် အသုံးပြုရန်မှာ လုံးဝ မဖြစ်နိုင်ချေ။ကံကောင်းသည်မှာ ဝူကျိရှန်းသည် ပင်နီဆလင်၏ လုပ်ဆောင်ချက်အချို့ကို အစားထိုးနိုင်မည့် ဆေးအသစ်တစ်ခုကို ဖော်စပ်ထားပြီး ဖြစ်၏။

ဝူကျိရှန်းသည် အပြာနှင့်အဖြူရောင်စပ်ထားသော ကြွေပုလင်းငယ်တစ်ခုကို ထုတ်ယူကာ အဝါရောင်သန်းနေသော ဆေးမှုန့်အချို့ကို လောင်းထည့်လိုက်ရင်း လျှောက်တင်သည်။

"အဲဒီတုန်းကကျွန်‌တော်မျိုးက ရှေ့တန်းက စစ်သည်တွေအတွက် ဆေးအသစ် ဖော်စပ်ပေးပါ့မယ်လို့ အရှင်မင်းကြီးရဲ့ ရှေ့မှောက်မှာ ကတိသစ္စာပြုခဲ့ပါတယ်။ အခုတော့ ရလဒ်အချို့ ထွက်ပေါ်လာပါပြီ"

ကျူးယွမ်ကျန်းသည် သာမန်မျှသာရှိသော ဆေးမှုန့်ကို ကြည့်ကာ မေးလိုက်၏။

"ဒါက မင်းအစမ်းထွင်ထားတဲ့ ဆေးအသစ်လား။ ဘာလို့ ခေါ်လဲ"

"ဒီဆေးကို ပိုင်ကျိမှုန့်လို့ ခေါ်ပါတယ်။ အာနိသင်က ဖုန်းရိမှုန့်လောက် မကောင်းပေမဲ့ ရှေ့တန်းက စစ်သည်တွေ သုံးနေတဲ့ သွေးတိတ်ဆေးထုပ်တွေထက်တော့ အများကြီး ပိုပြီး သန့်စင်ပါတယ်"

ဝူကျိရှန်းက ဤအရာကို "ဆေးအသစ်" ဟု ခေါ်ဆိုသော်လည်း အမှန်စင်စစ် အသစ်စက်စက် မဟုတ်ချေ။ ၎င်းမှာ မူလ တရုတ်တိုင်းရင်းဆေးပင် ဖြစ်ပြီး ရိုးရိုးရှင်းရှင်း ပြောရလျှင် ရိုးရာတိုင်းရင်းဆေးပင်များကို ပိုမို သန့်စင်အောင် ပြုလုပ်ထားခြင်း ဖြစ်သည်။

၎င်းသည် မည်သည့် ဓာတုဗေဒဓာတ်ပြုမှုကိုမျှ မဖြတ်သန်းခဲ့သဖြင့် ဓာတုနည်းဖြင့် ပေါင်းစပ်ထားခြင်း လုံးဝမဟုတ်ဘဲ ဆေးအာနိသင် ပိုမိုထိရောက်စေရန် ရုပ်ပိုင်းဆိုင်ရာ နည်းလမ်းများဖြင့် သန့်စင်ထားခြင်းသာ ဖြစ်၏။

တရုတ်တိုင်းရင်းဆေးတွင် ပါဝင်သော အစွမ်းထက် အစိတ်အပိုင်းများကို ထုတ်ယူသန့်စင်ခြင်း ဖြစ်သဖြင့် ထိုကဲ့သို့သော နည်းလမ်းများမှာ အများအားဖြင့် ရှိတတ်ပြီး သာမန် တရုတ်တိုင်းရင်းဆေးအမျိုးအစား ဖြစ်သော်လည်း ထိုခေတ်က တရုတ်တိုင်းရင်းဆေးအများစုတွင် အညစ်အကြေးများ အလွန်များပြားလှသည်။ ဝူကျိရှန်း၏ တိုက်ရိုက် ထုတ်ယူသန့်စင်မှုမှာ ပထမဆုံးအကြိမ် ဖြစ်၏။

၎င်းဆေးမှုန့်သည် လက်တွေ့အသုံးဝင်မှု မြင့်မားလှပြီး စစ်သည်များ သယ်ဆောင်သွားသော ဆေးမှုန့်များထက် များစွာ ပိုမိုသန့်စင်ကာ ထိရောက်မှု ရှိသည်။ ဤဆေးမှုန့်များ၏ အဓိက အစိတ်အပိုင်းများတွင် မီသလင်း အယ်လ်ကာနွိုက် ဒြပ်ပစ္စည်းများ ပါဝင်ပြီး ကာဘီးန်နှင့် အိန်ဂျယ်လီစင် အနည်းငယ်လည်း ပါဝင်၏။

အိန်ဂျယ်လီစင်ဟု အမည်ပေးထားသော်လည်း ဤဒြပ်ပစ္စည်းသည် တရုတ်စမုန်နက်ပင်နှင့် မည်သို့မျှ မသက်ဆိုင်ချေ။ အကြောင်းမူကား ဤဒြပ်ပစ္စည်းများကို တရုတ်နနွင်းနှင့် နနွင်းခက်များမှ ထုတ်ယူထားခြင်းကြောင့် ဖြစ်သည်။

အရေးကြီးဆုံး အချက်မှာ ဤဆေးမှုန့်များ၏ ကုန်ကျစရိတ်မှာ အတော်ပင် သက်သာခြင်း ဖြစ်၏။ ဆေးမှုန့် ငါးဂရမ်သည် တရုတ်နနွင်း လေးပိဿာမှ ခြောက်ပိဿာခန့်နှင့် ညီမျှသည်။ မည်သို့ပင်ဖြစ်စေ တရုတ်နနွင်းတစ်လှည်းစာသည် တန်ဖိုးအများကြီးမရှိသဖြင့် အမြောက်အမြား ထုတ်လုပ်နိုင်သည်။

အမြောက်အမြား ထုတ်လုပ်နိုင်သရွေ့ ရှေ့တန်းရှိ စစ်သည်များ၏ သေကျေဒဏ်ရာရမှုကို သေချာပေါက် လျှော့ချပေးနိုင်မည် ဖြစ်ကြောင်း လုံးဝ ခန့်မှန်းကြည့်နိုင်ပေသည်။

"ကောင်းတယ်၊ အလွန်ကောင်းတယ်။ ဝူကျိရှန်းက တကယ်ပဲ အလုပ်အကျွေးပြုတဲ့သူပဲ"

ကျူးယွမ်ကျန်းသည် သူ၏အနားရှိ အိမ်ရှေ့မင်းသားကို တည်ငြိမ်စွာ ကြည့်လိုက်ရင်း ဆို၏။

"ငါလည်း ပင်ပန်းနေပြီ။ သားတော်နဲ့ ဝူကျိရှန်းတို့ ပြန်နိုင်ကြပါပြီ"

"သားတော် ဂါရဝပြုပါတယ်"

"ကျွန်တော်မျိုးဂါရဝပြုပါတယ်"

ဝူကျိရှန်းနှင့် အိမ်ရှေ့မင်းသား ကျူးပြန်တို့သည် နန်းဆောင်ကြီးမှ အတူတူ ထွက်ခွာခဲ့ကြသည်။ သူသည် နန်းတွင်းဆေးတိုက်သို့ ပြန်ရန် ပြင်ဆင်နေစဉ် ကျူးပြန်က လှမ်းခေါ်လိုက်၏။

"အိမ်ရှေ့မင်းသားမှာ စီမံစရာ ရှိလို့ပါလား"

ကျူးပြန်သည် သူ၏ အင်္ကျီလက်အိတ်ထဲမှ စာရင်းတစ်ခုကို ထုတ်ယူလိုက်သည်။

"မင်းနဲ့ ဒီစာရင်းထဲက လူတွေနဲ့ ဘာပတ်သက်မှုမှ မရှိဘူးမလား"

စာရင်းထဲတွင် ရင်းနှီးနေသော အမည်များကို မြင်လိုက်ရသည့် ခဏ၌ သူ၏ စိတ်ထဲတွင် မကောင်းသော အတိတ်နိမိတ်တစ်ခု ချက်ချင်း ပေါ်လာ၏။

"ဒီလူအများစုက လုပ်ငန်းဝန်ကြီးဌာနကနေ ဆေးဝါးစက်ရုံကို စေလွှတ်ထားတဲ့ အရာရှိတွေပါ။ ကျွန်တော်မျိုးသူတို့နဲ့ အလုပ်သဘောအရ ဆက်ဆံဖူးပါတယ်"

"မင်းနဲ့ ဒီလူတွေနဲ့ ပတ်သက်မှု ရှိလား။ ပုဂ္ဂိုလ်ရေး ခင်မင်မှုလား ဒါမှမဟုတ် အလုပ်သဘောအရလား"

"သေချာပေါက် အလုပ်သဘောအရပါပဲ"

ဆေးဝါးစက်ရုံကို နန်းတွင်းဌာနအချို့ ပူးပေါင်းပြီး တည်ထောင်ထားခြင်း ဖြစ်သဖြင့် ဝူကျိရှန်းအနေဖြင့် ထိုလူများနှင့် ဆက်ဆံရမည်မှာ ရှောင်လွှဲ၍မရချေ။ သို့သော် ၎င်းမှာ ပုံမှန်အလုပ်ကိစ္စများတွင်သာ အတိအကျ ကန့်သတ်ထားခြင်း ဖြစ်သည်။

"ဒီလူတွေထဲမှာ ဆောက်လုပ်ရေးဌာနက လူတွေလည်း ပါသလို ကိရိယာတန်ဆာပလာဌာနက လူတွေလည်း ပါပါတယ်။ ကျွန်တော်မျိုးက မူလက အခွန်ဝန်ကြီးဌာနက လာတာမို့ သူတို့နဲ့ ပုဂ္ဂိုလ်ရေး ဆက်ဆံမှု လုံးဝမရှိပါဘူး"

အိမ်ရှေ့မင်းသား ကျူးပြန်က ဝူကျိရှန်းကို စိုးရိမ်စိတ်ဖြင့် ကြည့်လိုက်ရင်း ဆို၏။

"ပုဂ္ဂိုလ်ရေး ဆက်ဆံမှု မရှိတာ အကောင်းဆုံးပဲ။ အကယ်၍ ရှိနေရင်လည်း ချက်ချင်း ဖယ်ခွာလိုက်ပါ။ ဆေးဝါးစက်ရုံမှာ အမှုကြီးတစ်ခု ဖြစ်တော့မယ်"

ဆေးဝါးစက်ရုံသည် အာဏာရှိသော ဌာနမဟုတ်သလို တရားမဝင် အကျိုးအမြတ်များလည်း မရှိချေ။ မည်သည့် အမှုကြီး ရှိနိုင်မည်နည်း။

ဖုန်းရိမှုန့်က သာမန်ဈေးကွက်ထဲကို ပျံ့နှံ့သွားလို့ အရှင်မင်းကြီး အလွန် အမျက်တော်ထွက်နေတယ်။ သူ ဒီကိစ္စကို စပြီး စုံစမ်းစစ်ဆေးနေပြီ"

အိမ်ရှေ့မင်းသားက ဆက်ပြောသည်။

"ကျင်းယီဝေ (နန်းတွင်းကိုယ်ရံတော်တပ်) တွေက လူဖမ်းဖို့ ပြင်နေကြပြီ။ မင်း ကြိုတင်ပြင်ဆင်ထားနိုင်အောင် ငါ ကြိုပြောထားတာ"

*********