အခန်း ၄

Vol. 1 Ch. 4

အခန်း (၄) အကြွေးလာတောင်းခြင်း၊ ငါးရက်သာ အချိန်ပေးခြင်း

ဤအချိန်တွင် အိမ်အပြင်ဘက်မှ တံခါးခေါက်သံက ထပ်မံ ထွက်ပေါ်လာပြန်၏။ "ချန်မျိုးရိုး... မင်းသာ တံခါးကို ထပ်မဖွင့်ရင် ငါ မင်းရဲ့ စုတ်ပြတ်နေတဲ့ တံခါးကို ဖျက်ဆီးပစ်မယ်"

တစ်ဖက်လူက ထိုသို့ပြောသည်ကို ကြားလိုက်ရသဖြင့် ချန်ကျီက ကုတင်ပေါ်မှ အမြန်ထကာ အခန်းတံခါးဝဆီသို့ အပြေးအလွှား သွားရောက်၍ တံခါးကို ဖွင့်ပေးလိုက်တော့သည်။

တံခါးပွင့်သွားသည့် တစ်ခဏအတွင်းမှာပင် ချန်ကျီသည် ကြီးမားသော လက်ဝါးကြီးတစ်ဖက်က သူ့မျက်နှာဆီသို့ ရိုက် ရန် တိုးဝင်လာသည်ကို မြင်လိုက်ရ၏။

ကံကောင်းစွာဖြင့် ချန်ကျီက အချိန်မီ တုံ့ပြန်နိုင်ခဲ့ပြီး အနောက်သို့ တစ်လှမ်း ဆုတ်လိုက်သဖြင့်သာ ဤလက်ဝါးရိုက်ချက်က သူ့မျက်နှာပေါ်သို့ ကျရောက်မလာခဲ့ခြင်း ဖြစ်သည်။

တံခါးကို လာထုသည့်လူက ရုတ်တရက် လွဲသွားသဖြင့် ခန္ဓာကိုယ်ပါ ယိုင်နဲ့သွားခဲ့ရ၏။ ကံကောင်းသည်က ဤလူသည်လည်း ကျင့်ကြံသူတစ်ယောက် ဖြစ်သဖြင့် တုံ့ပြန်မှု မြန်ဆန်ကာ သူ့ ခန္ဓာကိုယ်ဟန်ချက်ကို ချက်ချင်း ပြန်ထိန်းလိုက်နိုင်ခြင်းပင်။

ချန်ကျီက မျက်စိရှေ့က လူသန်ကြီးကို သံသယစိတ်ဖြင့် စိုက်ကြည့်လိုက်ရာ ဝိညာဉ်စွမ်းအား လှိုင်းကို ခံစားလိုက်ရသဖြင့် ကျင့်ကြံသူ ဖြစ်ကြောင်း သံသယဝင်နေစရာ မလိုချေ။ သို့သော်လည်း ကျင့်ကြံခြင်းအဆင့်ကိုမူ ထိုးဖောက်မမြင်နိုင်သဖြင့် ၎င်းက အနည်းဆုံးတော့ သူ့ထက် ကျင့်ကြံခြင်းအဆင့် သုံးဆင့်ခန့် ပိုမိုမြင့်မားရပေမည်။

သို့သော်ငြား မျက်စိရှေ့က လူသန်ကြီးကို သူ ဘာမှတ်ဉာဏ်မှ ရှိမနေသလို မှတ်ဉာဏ်ဟောင်းများထဲတွင်လည်း ဤလူသန်ကြီးနှင့်ပတ်သက်သည့် အချက်အလက်များကို ရှာမတွေ့ခဲ့ချေ။

ချန်ကျီက အားငယ်စွာဖြင့် မေးလိုက်၏။ "မင်းက... ဘယ်သူလဲ"

လူသန်ကြီးက ချန်ကျီကို တစ်ချက် စောင်းငဲ့ကြည့်ပြီး ဂရုမစိုက်ဘဲ ဘေးသို့ ဆုတ်ခွာပေးလိုက်ကာ တံခါးဝနေရာကို ဖယ်ပေးလိုက်သည်။ ထိုလူသန်ကြီးက ခန့်ညားထည်ဝါသော ဝတ်စုံကို ဝတ်ဆင်ထားသည့် လူလတ်ပိုင်းအမျိုးသားတစ်ဦး၏ အနောက်သို့ ဆုတ်သွားခဲ့ခြင်း ဖြစ်၏။

ချန်ကျီကတော့ ယခုမှသာ တံခါးအပြင်ဘက်တွင် ရောက်ရှိနေသည်က ထိုလူသန်ကြီး တစ်ယောက်တည်း မဟုတ်ဘဲ အခြားလူနှစ်ယောက် ရှိနေသေးကြောင်း သေသေချာချာ မြင်လိုက်ရတော့သည်။ ၎င်းတို့အားလုံးက ကျင့်ကြံသူများ ဖြစ်ကြပြီး ကျင့်ကြံခြင်းအဆင့်ကိုလည်း ထိုးဖောက်မမြင်နိုင်ချေ။

ချန်ကျီက အကဲခတ်ကြည့်လိုက်ရာ ခန့်ညားထည်ဝါသော ဝတ်စုံနှင့် လူလတ်ပိုင်းအမျိုးသားက အဓိက ဦးဆောင်သူ ဖြစ်ပုံရပြီး သူ့အနောက်က လူနှစ်ယောက်ကတော့ သူ့လက်အောက်ငယ်သားများ ဖြစ်ပေလိမ့်မည်။

ချန်ကျီက ထိုလူလတ်ပိုင်းအမျိုးသားကို အနည်းငယ် ရင်းနှီးနေသကဲ့သို့ ခံစားလိုက်ရသော်လည်း ဘယ်နေရာမှာ မြင်ဖူးသလဲဆိုသည်ကိုမူ ချက်ချင်း စဉ်းစားမရခဲ့ချေ။

ဒါတွေအားလုံးက မူလပိုင်ရှင်ကြောင့်သာ ဖြစ်၏။ ယခင်က အရက်ကို အလွန်အကျွံ သောက်လွန်းသဖြင့် နေ့တိုင်း မူးယစ်ရီဝေကာ ဦးနှောက်ကလည်း ထိုင်းမှိုင်းနေခဲ့ရာ ဦးနှောက်ပင် ပျက်စီးလုနီးပါး ဖြစ်ခဲ့ရသဖြင့် ဘာကို မှတ်မိနိုင်တော့မည်နည်း။

ချန်ကျီက ဤလူသုံးယောက်သည် အကြောင်းရင်းမရှိဘဲ တံခါးဝအထိ ရောက်လာမည်မဟုတ်ကြောင်း သိရှိထားပေသည်။ ၎င်းတို့က ကျင့်ကြံသူများ ဖြစ်ကြပြီး သူ့ထက်လည်း ကျင့်ကြံခြင်းအဆင့် မြင့်မားကြသဖြင့် သူ့လို ဆင်းရဲမွဲတေသူတစ်ယောက်ကို လာရောက် ပြဿနာရှာနေစရာ မလိုချေ။

ကြည့်ရတာ တစ်ဖက်လူ ပြောသည့် ပိုက်ဆံပြန်ဆပ်ရမည်ဟူသောအချက်က အမှန်တရား ဖြစ်ပေလိမ့်မည်။

သို့သော်လည်း မူလပိုင်ရှင်က သူတပါးထံတွင် ပိုက်ဆံမည်မျှ အကြွေးတင်နေသလဲဆိုသည်ကို မသိရချေ။ အကယ်၍ အတိုးနှုန်းကြီးမားသော အကြွေးများကို ချေးယူထားပြီး ပြန်မဆပ်နိုင်လျှင်မူ မည်သို့ ထွက်ပြေးတိမ်းရှောင်ရမလဲဆိုသည်ကိုသာ ကြိုတင်စီမံရတော့မည် ဖြစ်သည်။

တိုက်ခိုက်မည်ဆိုပါကလည်း မည်သို့မျှ အနိုင်ရနိုင်မည်မဟုတ်ချေ။ ယခုအချိန်တွင် သူ က မျက်စိရှေ့က အရှုံးကို လက်ခံရမည် ဖြစ်သဖြင့် အရင်ဆုံး သေသေချာချာ မေးမြန်းစုံစမ်းတာက ပိုကောင်းပေလိမ့်မည်။

ချန်ကျီ၏ နှလုံးသားထဲတွင် စိတ်ပျက်အားငယ်သွားရ၏။ မူလပိုင်ရှင် တင်ခဲ့သည့် အကြွေးကို ဘာဖြစ်လို့ သူ့ကို လာဆပ်ခိုင်းနေရတာလဲ။

"အားနာပါတယ်... ကျွန်တော် အရက်နာကျပြီး ခုမှ နိုးတာမို့လို့ အကြောင်းအရာ တော်တော်များများကို ချက်ချင်း စဉ်းစားလို့မရဖြစ်နေလို့ပါ။ တစ်ချက်လောက် မေးပါရစေ... ကျွန်တော် မင်းဆီမှာ ပိုက်ဆံ ဘယ်လောက် အကြွေးတင်နေလို့" ချန်ကျီက စမ်းသပ်သည့်အနေဖြင့် မေးလိုက်၏။

လူလတ်ပိုင်းအမျိုးသားက ချန်ကျီကို တစ်ချက် စောင်းငဲ့ကြည့်လိုက်ပြီး ပြောလိုက်သည်။ "လူအ လုပ်ပြီး အကြွေးဆပ်ရမှာကို ငြင်းချင်တာလား"

ထိုလူလတ်ပိုင်းအမျိုးသား ပြောပြီးသည်နှင့် သူ့အနောက်က လူသန်ကြီးနှစ်ယောက်က အကြွေးမဆပ်ဘဲ နေလျှင် မည်သို့သော အကျိုးဆက်မျိုး ရှိလာမလဲဆိုသည်ကို သိရှိသွားစေရန် သူ့ကို ပညာပေးဖို့ ရှေ့သို့ တိုးလာသည်ကို ချန်ကျီ မြင်လိုက်ရ၏။

ချန်ကျီက အမြန်ပဲ ပြုံးပြလိုက်ရင်း "မရှိပါဘူး... လုံးဝ မရှိပါဘူး၊ ကျွန်တော် အရက်နာကျပြီး ခုမှ နိုးတာမို့ ဦးနှောက်က နည်းနည်း ထိုင်းနေလို့ ချက်ချင်း စဉ်းစားလို့ မရရုံတင်ပါ၊ အကြွေးဆပ်ရမှာကို ငြင်းချင်တဲ့စိတ် လုံးဝ မရှိပါဘူး"

ချန်ကျီက ထိုသို့ပြောသည်ကို ကြားလိုက်ရသဖြင့် လူလတ်ပိုင်းအမျိုးသားက ချန်ကျီကို ထပ်မံကြည့်လိုက်ရာ ချန်ကျီက တစ်စုံတစ်ခု ပြောင်းလဲသွားသကဲ့သို့ ခံစားလိုက်ရသည်။

လူလတ်ပိုင်းအမျိုးသားက ချန်ကျီ၏ ရိုးသားဖြောင့်မတ်နေသော မျက်နှာအမူအရာကို ကြည့်ပြီး လိမ်ညာနေပုံမရသဖြင့် လက်ကို ဝှေ့ယမ်းကာ လူသန်ကြီးနှစ်ယောက်ကို တားဆီးလိုက်၏။

လူလတ်ပိုင်းအမျိုးသား စိတ် ထဲတွင် သံသယဖြစ်သွားသည်။ "ဒီကောင်လေးက... တစ်ခုခု ပြောင်းလဲသွားသလိုပဲ"

"မင်း ငါတို့ ထုံဖူစားသောက်ဆိုင်မှာ တင်နေတဲ့ အရက်ဖိုးကို ဘယ်တော့ ပြန်ဆပ်မှာလဲ"

တင်နေသည့်အကြွေးက အရက်ဖိုး ဖြစ်ကြောင်း ကြားလိုက်ရသဖြင့် ချန်ကျီက အနည်းငယ် စိတ်အေးသွားခဲ့ရသည်။ တော်သေးတာပေါ့... အတိုးနှုန်းကြီးတဲ့ အကြွေးမဟုတ်လို့၊ အရက်သောက်တာတင် ပိုက်ဆံ ဘယ်လောက်အထိ ကုန်သွားနိုင်မှာမို့လို့လဲ။

ချန်ကျီက မေးလိုက်၏။ "ဘယ်လောက် တင်နေလို့လဲ... ပမာဏလေး တစ်ချက်လောက် ပြောပြပေးပါ"

လူလတ်ပိုင်းအမျိုးသားက ပြုံးလိုက်ရင်း "အများကြီးတော့ မဟုတ်ပါဘူး... ဝိညာဉ်ကျောက်တုံး ၁၀ တုံးတည်းပါ"

"ဘာ... ဝိညာဉ်ကျောက်တုံး ၁၀ တုံး ဟုတ်လား။ ဒါက အင်မော်တယ် အရက်ကို သောက်ခဲ့တာမို့လို့လား" ချန်ကျီ နှလုံးသားထဲတွင် ထိတ်လန့်သွားခဲ့ရ၏။

ချန်ကျီက လူလတ်ပိုင်းအမျိုးသားနှင့် သူ့လက်အောက်ငယ်သားများကို ထပ်မံကြည့်လိုက်ရာ ယခုအချိန်တွင် စကားကို စည်းလွတ်ဝါးလွတ် ပြော၍ မဖြစ်ချေ။ အနည်းငယ် သတိလက်လွတ်ဖြစ်သွားသည်နှင့် ဖိနှိပ်ခံရလိမ့်မည် ဖြစ်သည်။

"ဝိညာဉ်ကျောက်တုံး ၁၀ တုံးက နည်းနည်း များနေလို့... ရက်အနည်းငယ်လောက် အချိန် ထပ်ပေးလို့ ရမလား။ မင်းလည်း မြင်တဲ့အတိုင်းပါပဲ... ကျွန်တော့်အိမ်ထဲမှာ တန်ဖိုးရှိတဲ့ ပစ္စည်း ဘာတစ်ခုမှ မရှိတော့ ချက်ချင်းဆိုသလို အများကြီး ထုတ်ပေးဖို့က မတတ်နိုင်လို့ပါ"

ချန်ကျီက ပြောပြီးသည်နှင့် ခန္ဓာကိုယ်ကို ဘေးသို့ ဖယ်ပေးလိုက်ကာ လူလတ်ပိုင်းအမျိုးသားကို အခန်းထဲက မြင်ကွင်းကို ရှင်းလင်းစွာ မြင်တွေ့စေလိုက်၏။

လူလတ်ပိုင်းအမျိုးသားက အခန်းထဲသို့ လှမ်းကြည့်လိုက်ပြီး ရယ်မောလိုက်သည်။ "ဟားဟား... အကြွေးနဲ့ အရက်လာသောက်တုန်းကတော့ မင်း ဒီလိုပြောခဲ့တာ မဟုတ်ဘူးနော်"

ထို့နောက် လူလတ်ပိုင်းအမျိုးသားက တမင်တကာ စေတနာကောင်းရှိဟန်ဖြင့် "အတော်ပဲ... ငါ ကျောက်မီးသွေးတွင်းတစ်ခုမှာ ကျောက်မီးသွေးတွင်းအလုပ်သမား အနည်းငယ် လိုအပ်နေတာကို သိတယ်၊ သွားတာနဲ့ ဝိညာဉ်ကျောက်တုံး ၁၀ တုံး ချက်ချင်းပေးမှာဖြစ်ပြီး လတိုင်းမှာလည်း လုပ်ခလစာအဖြစ် ဝိညာဉ်ကျောက်တုံး ၃ တုံး ပေးဦးမှာ၊ မင်းကို အဲဒီနေရာကို သွားဖို့ ငါ လမ်းညွှန်ပေးရမလား"

"ကျောက်မီးသွေးတွင်း တူးရမယ် ဟုတ်လား"

ချန်ကျီ နှလုံးသားထဲတွင် သဘောပေါက်သွားခဲ့သည်။ ဤလူလတ်ပိုင်းအမျိုးသားက သူ အကြွေးပြန်မဆပ်နိုင်သည်ကို ကြိုတင်သိရှိထားပုံရပြီး သူ့ကို ကျောက်မီးသွေးတွင်းတူးရန် ပို့ဆောင်ဖို့ စောင့်ဆိုင်းနေခြင်း ဖြစ်၏။

ချန်ကျီက မှတ်ဉာဏ်များထဲတွင် သိရှိထားသည်က ထိုကျောက်မျက်ရတနာ တွင်းထွက်ပစ္စည်းများကို သာမန်သေမျိုးများက မည်သို့မျှ မတူးဖော်နိုင်ဘဲ သူ့လို ဝိညာဉ်စွမ်းအား ရှိကြသည့် ကျင့်ကြံသူများသာ တူးဖော်နိုင်ခြင်း ဖြစ်သည်။

သို့သော်လည်း ကျောက်မီးသွေးတွင်းတူးရန် ရွေးချယ်ကြသည့် ကျင့်ကြံသူများသည် လမ်းပျောက်ပြီး ဘာရွေးချယ်စရာမှ မရှိတော့သည့် အခြေအနေသို့ ရောက်ရှိသွားသည့် အခါမှသာ ဤသို့သော အလုပ်ကို လုပ်ကိုင်ကြခြင်း ဖြစ်၏။

ထို့ပြင် ကျောက်မီးသွေးတွင်းထဲသို့ ရောက်ရှိသွားပါက သူ့ကိုယ်သူ မပိုင်နိုင်တော့ချေ။

နေ့တိုင်း လုပ်ဆောင်ရမည့်အလုပ်က အဆုံးမရှိသော ကျောက်မီးသွေးတွင်းတူးခြင်းသာ ဖြစ်သဖြင့် ကျင့်ကြံရန်အတွက် အချိန် လုံးဝ ရှိတော့မည်မဟုတ်ချေ။

ကျောက်မီးသွေးတွင်းထဲ ရောက်သွားလျှင် တစ်သက်လုံး ထိုနေရာတွင်သာ နေထိုင်ရတော့မည်ဖြစ်ပြီး ထိုနေရာတွင် အဆုံးမရှိ နှိပ်စက်ညှဉ်းပန်း ခေါင်းပုံဖြတ်ခံရရင်း သေဆုံးသည်အထိ ဖြစ်သွားရပေလိမ့်မည်။

ကျောက်မီးသွေးတွင်းများက မြို့ပြင်တွင် ရှိကြသဖြင့် မြို့ထဲကဲ့သို့ မလုံခြုံချေ။ မြို့ထဲတွင်မူ မြို့သခင် အိမ်တော်၏ အစောင့်အရှောက်များ ရှိသဖြင့် နှိုင်းယှဉ်ချက်အရ လုံခြုံမှု ရှိပေသေးသည်။

သူက စနစ်ကို အားကိုးပြီး ကျင့်ကြံကာ ထာဝရအသက်ကို ရှာဖွေရန် တွေးတောထားခြင်း ဖြစ်သဖြင့် ကျောက်မီးသွေးတွင်းတူးခြင်း အစရှိသည်တို့ကို လုပ်ဆောင်ရန် မည်သို့မျှ မဖြစ်နိုင်ချေ။ ဤဘဝတွင် လုံးဝ မဖြစ်နိုင်ချေ။

"ဆိုင်ရှင်... ရက်အနည်းငယ်လောက် အချိန် ထပ်ပေးလို့ ရမလား၊ ကျွန်တော် ဝိညာဉ်ကျောက်တုံးတွေကို သေချာပေါက် စုဆောင်းပြီး မင်းကို ပြန်ဆပ်ပါ့မယ်။ အကယ်၍ မစုဆောင်းနိုင်ခဲ့ရင်တော့ ကျွန်တော် ကျောက်မီးသွေးတွင်းကို သွားပြီး မင်းကို အကြွေးပြန်ဆပ်ပါ့မယ်" ချန်ကျီက တောင်းပန်တိုးလျှိုးလိုက်၏။

လူလတ်ပိုင်းအမျိုးသားက ခေတ္တမျှ စဉ်းစားလိုက်ပြီး "ကောင်းပြီ... မင်းကို နောက်ထပ် ငါးရက် အချိန်ပေးမယ်၊ မင်းသာ အကြွေးပြန်မဆပ်နိုင်သေးရင်တော့ ငါတို့ကို အပြစ်မတင်နဲ့တော့"

ငါးရက်တာအချိန်ကိုမူ လူလတ်ပိုင်းအမျိုးသားက စောင့်ဆိုင်းနိုင်ပေသေးသည်။ သူက ဝမ်နန်မြို့ထဲတွင် စည်းလွတ်ဝါးလွတ် လက်ရဲဇာတ်ရဲ မလုပ်ချင်ချေ။ အကယ်၍ ကင်းလှည့်အဖွဲ့ကို အာရုံစိုက်မိသွားစေလျှင် ရပိုင်ခွင့်ထက် ဆုံးရှုံးမှုက ပိုမိုကြီးမားသွားပေလိမ့်မည်။

ထိုကျောက်မီးသွေးတွင်းက အမှန်တကယ်တော့ သူနှင့် အခြားလူများ ပူးပေါင်းပြီး တရားမဝင် ဖွင့်လှစ်ထားသည့် မှောင်ခိုလုပ်ငန်းတစ်ခု ဖြစ်သဖြင့် အကယ်၍ ဖော်ထုတ်ခံရပါက မြို့သခင် အိမ်တော်က လူများ၏ ဓားပြတိုက် ခေါင်းပုံဖြတ်ခြင်းကို ခံရပေလိမ့်မည်။

ထို့ပြင် ဤကျောက်မီးသွေးတွင်းကို လူအများအပြားက သိရှိသွားကြလျှင် ဆုံးရှုံးမှုအကြီးမားဆုံးလူက သူသာ ဖြစ်ပေသည်။

ချန်ကျီကဲ့သို့သော ပန်းတိုင်ကို ရှာဖွေရခြင်းမှာလည်း ဤသို့သောလူမျိုးက ခွန်အားလည်း မရှိသလို ကျောထောက်နောက်ခံလည်း မရှိသဖြင့် ကိုင်တွယ်ရ အလွယ်ကူဆုံး ဖြစ်သောကြောင့် ဖြစ်၏။

ငါးရက် ဟုတ်လား။

ချန်ကျီက သွားကို တင်းတင်းကြိတ်လိုက်ရင်း ပြောလိုက်သည်။ "ကောင်းပါပြီ... ငါးရက်ပဲ"

ချန်ကျီက အစီအစဉ် ဆွဲပြီးသား ဖြစ်၏။ အကြွေးပြန်မဆပ်နိုင်လျှင် သူ ထွက်ပြေးတော့မည်။

"ထွက်ပြေးဖို့တော့ မတွေးနဲ့၊ ငါ မင်းကို စောင့်ကြည့်ဖို့ လူလွှတ်ထားမှာ" လူလတ်ပိုင်းအမျိုးသားက ချန်ကျီကို ထိုးဖောက်မြင်နေသည့်အလား မထွက်ခွာမီ စကားတစ်ခွန်း ချန်ထားခဲ့ပြီးနောက် လှည့်ထွက်ကာ လူသန်ကြီးနှစ်ယောက်ကို ခေါ်ဆောင်၍ ထွက်သွားခဲ့တော့သည်။

ချန်ကျီက သူ၏ လက်ဝါးပြင်ထဲမှ မည်သို့မျှ ရုန်းထွက်နိုင်မည်မဟုတ်သည့်အလား သူက ချန်ကျီကို နှလုံးသားထဲတွင် လုံးဝ ထည့်မထားခဲ့ချေ။

လူလတ်ပိုင်းအမျိုးသား ထွက်သွားပြီးနောက် ချန်ကျီက အခန်းတံခါးကို အမြန် ပိတ်လိုက်ပြီး မည်သို့ ထွက်ပြေးရမလဲဆိုသည်ကို စဉ်းစားတော့သည်။

ဝိညာဉ်ကျောက်တုံး ၁၀ တုံးကို ငါးရက်တာ အချိန်အတွင်း သူ မည်သို့မျှ ထုတ်ပေးနိုင်မည်မဟုတ်ချေ။ သူ ယခုအချိန်တွင် ဘာတစ်ခုမှ ရှိမနေချေ။

စဉ်းစားနေသည့် တစ်ပြိုင်နက်တည်းမှာပင် ချန်ကျီက မီးမွှေးခြင်းမန္တန်ကို အသုံးပြုရန် မမေ့လျော့ခဲ့ချေ။ ထွက်ပြေးတိမ်းရှောင်မည်ဆိုလျှင်ပင် သူကိုယ်တိုင် သန်မာဖို့ လိုအပ်ပေသည်။

ဘယ်လိုပဲ စဉ်းစားစဉ်းစား ချန်ကျီက ပြည့်စုံကောင်းမွန်သော အခြေအနေကို ဖြေရှင်းနိုင်မည့် နည်းလမ်းကို ရှာမတွေ့ခဲ့ချေ။

ဝမ်နန်မြို့သည် ချင်းယွမ်ဂိုဏ်းနှင့် နီးစပ်သော မြို့ငယ်လေးတစ်မြို့သာ ဖြစ်သော်လည်း ကျင့်ကြံခြင်းမိသားစုများစွာ အမြစ်တွယ်နေကြပြီး မြို့တော်သခင် အိမ်တော်တစ်ခုလည်း ရှိနေသေးသည်။

ဝမ်နန်မြို့တော်သခင် ၏ ခွန်အားက ဤမိသားစုများထဲတွင် အသန်မာဆုံးဖြစ်ပြီး ကြားသိရသလောက်ဆိုလျှင် အုတ်မြစ်ချခြင်း နယ်ပယ်က အစွမ်းထက်ပုဂ္ဂိုလ်ကြီး ဖြစ်နေကာ ရွှေအူတိုင်နယ်ပယ်သို့ တက် နိုင်ရန်အတွက်လည်း အချိန်တစ်ခုသာ လိုအပ်တော့သည်ဟု ဆိုကြ၏။

ဤဝမ်နန်မြို့ထဲတွင် အောင်မြင်ကျော်ကြားနေကြသည့် လူများက မြို့တော်သခင်အိမ်တော်၊ ထို့ပြင် ကျင့်ကြံခြင်းမိသားစုများနှင့် မကင်းရာမကင်းကြောင်း ပတ်သက်ဆက်နွှယ်မှုများ ရှိကြပေလိမ့်မည်။

ထို့ပြင် ထိုလူလတ်ပိုင်းအမျိုးသားက ကျောက်မီးသွေးတွင်းတစ်ခုနှင့် ဆက်စပ်နေနိုင်သဖြင့် ချန်ကျီအနေဖြင့် သူက ဤပုဂ္ဂိုလ်ကြီးများနှင့် ဆက်သွယ်မှု မရှိဘူးဆိုသည်ကို မယုံကြည်ချေ။

သူက ဝမ်နန်မြို့မှ ထွက်ပြေးတိမ်းရှောင်ချင်လျှင်ပင် အလွန်တရာ ခက်ခဲလှပေလိမ့်မည်။

အတော်ကြာအောင် စဉ်းစားပြီးနောက် ချန်ကျီက မီးမွှေးခြင်းမန္တန်ကို နောက်ထပ် အကြိမ် ၂၀ ထပ်မံအသုံးပြုလိုက်ရာ ဒန်တျန်အတွင်း၌ ဝိညာဉ်စွမ်းအားများ ရှိနေသေးသည်ကို ရုတ်တရက် ခံစားလိုက်ရ၏။

"ကြည့်ရတာ... ကျွမ်းကျင်မှုအဆင့် တက်သွားတာက မီးမွှေးခြင်းမန္တန်ရဲ့ စွမ်းအားကို ကြီးမားသွားစေရုံတင် မဟုတ်ဘဲ ဝိညာဉ်စွမ်းအား သုံးစွဲမှုကိုလည်း နည်းပါးသွားစေတာပဲ"

ချန်ကျီက ခန္ဓာကိုယ်ထဲက ဝိညာဉ်စွမ်းအားများ လုံးဝ ခမ်းခြောက်သွားသည့်အထိ မီးမွှေးခြင်းမန္တန်ကို ဆက်လက်အသုံးပြုနေခဲ့သည်။

"ကျွမ်းကျင်မှုအဆင့်က 'ကျွမ်းကျင်' ကို မြင့်တက်သွားတာက မီးမွှေးခြင်းမန္တန်ကို နောက်ထပ် ၅ ကြိမ် ပိုပြီး သုံးလို့ရစေတာပဲ၊ ဒါကိုသာ အဆုံးအထိ ကျင့်ကြံနိုင်ရင် မီးမွှေးခြင်းမန္တန်ကို အကြိမ်ရာချီ ဆက်တိုက် ထုတ်ဖော်နိုင်တော့မှာပေါ့"