အခန်း ၃၂၃
Vol. 27 Ch. 323
အခန်း ၃၂၃၊ "မင်္ဂလာပါ"၊ "နှုတ်ဆက်ပါတယ်"
"တကယ်ကို သတိကြီးတဲ့ ကောင်ပဲ၊ ဟို ချော်ရည်နတ်ဘုရားထက် အများကြီး ပိုလည်တာပဲ"
"နှမြောစရာပဲ..."
"ငါ့ဆီမှာ ဒုတိယမြောက် တစ်ခုရှိသေးတယ်ဆိုတာကို မင်း မသိခဲ့ဘူးထင်တယ်"
ရဲချီယန်၏ လက်ဖဝါးအထက်တွင် တရားသူကြီးကတ်က ဖြည်းညင်းစွာ လည်ပတ်နေလေ၏။ မှောင်မိုက်သော ရွှေရောင်အလင်းတန်းများက သူ၏ မျက်စိရှေ့တွင် မြင်ယောင်၍မရနိုင်သော သံကြိုးတစ်ချောင်းအဖြစ်သို့ အသွင်ပြောင်းသွားကာ အရှေ့ဘက်ဆီသို့ ဆန့်ထွက်သွားလေတော့သည်။
ဤသံကြိုးသည် အချိန်နှင့် နေရာဟင်းလင်းပြင်၏ နယ်နိမိတ်များကို ကျော်လွန်ဖြတ်သန်းသွားကာ ပန်းနတ်ဘုရား ထွက်ပြေးနေသည့် နေရာဆီသို့ ဦးတည်သွားချေပြီ။
【ဖမ်းဆီးခြင်း - တရားမျှတမှု အမှတ်အသား သတ်မှတ်ခံထားရသည့် ပစ်မှတ်ကို အရှေ့သို့ တည်နေရာရွှေ့ပြောင်းရန် ကိုယ်ခံစွမ်းအားကို အသုံးပြုရမည်။】
လွင်တီးခေါင်ပြင်၏ အပြင်ဘက်ရှိ ဗလာကျင်းနေသော လေဟာနယ်... အရာခပ်သိမ်းမတည်ရှိနိုင်သော နေရာတစ်ခုပင်။
လေဟာနယ် နတ်ဘုရားရုံးတော်။
ဤနေရာတွင် ပန်းနတ်ဘုရား၏ ပုံရိပ် ထွက်ပေါ်လာလေ၏။ ဧရာမ ပုံရိပ်ယောင်ကြီးများစွာက ဖုံးလွှမ်းထားပြီး ပန်းနတ်ဘုရားသည် ရိုသေလေးစားစွာဖြင့် အရိုအသေပေးလိုက်သည်။
"အို... ကြီးမြတ်လှတဲ့ အမြင့်ဆုံးနတ်ဘုရား၊ ကျွန်တော်မျိုး ပန်းက အရှင်တို့အားလုံးကို ကိစ္စတစ်ခု တင်ပြဖို့ ပြန်လည်ရောက်ရှိလာခဲ့ပါပြီ..."
သို့သော် သူ၏ စကားမဆုံးမီမှာပင် အသံက ရုတ်တရက် ရပ်တန့်သွားလေတော့သည်။
မရေမတွက်နိုင်သော ရွှေရောင်ရင့်ရင့် သံကြိုးများက လေဟာနယ်အတွင်း ထွက်ပေါ်လာကာ ခလွမ်ခလွမ် မြည်သံများနှင့်အတူ ဤနယ်ပယ်တစ်ခုလုံးကို ဆက်တိုက် ပြန့်နှံ့သွားချေပြီ။ ၎င်းတို့က ပန်းနတ်ဘုရား၏ လည်ပင်း၊ ခြေလက်အင်္ဂါများ၊ ကိုယ်လုံးနှင့် အရာအားလုံးကို တင်းကျပ်စွာ ရစ်ပတ် တုပ်နှောင်ထားလိုက်လေ၏။
"အု... အွတ်..."
ပန်းနတ်ဘုရားသည် ဤသံကြိုးများမှ ရုန်းထွက်နိုင်ရန် အပြင်းအထန် ကြိုးစားလေတော့သည်။ သို့သော် ရုန်းကန်လေလေ သံကြိုးများ၏ တုပ်နှောင်မှုက ပိုမို ထိတ်လန့်ဖွယ် ကောင်းလာလေလေပင် ဖြစ်သည်။
စကားပြောဆိုနိုင်ခြင်းမရှိဘဲ အသံများ ပြတ်တောက်သွားကာ စိတ်အသိမှတစ်ဆင့် သတင်းအချက်အလက် ပေးပို့သည့် လမ်းကြောင်းပင်လျှင် လုံးဝ ချိတ်ပိတ်ခံလိုက်ရလေ၏။ ဖမ်းဆီးခံရသည့် အခိုက်အတန့်တွင် ခြေချင်းခတ်ခံထားရသော အကျဉ်းသားတစ်ဦးပမာ သူနှင့် ပတ်သက်သမျှ အရာအားလုံး အပြည့်အဝ ချုပ်နှောင်ခံလိုက်ရချေပြီ။
"ဒါက ဘုရားစူး ကတ်ပြားရဲ့ စွမ်းအားလား"
"ရွံစရာကောင်းလိုက်တာ... ဒါက အရင်က ထွက်ပေါ်ခဲ့ဖူးတဲ့အရာတွေထဲက တစ်ခုမဟုတ်ဘဲ ဘုရားစူး ကတ်ပြား အသစ်စက်စက်လား။ ကျိန်စာသင့် လူသား၊ မင်းက ဘာဖြစ်လို့ ငါတို့ကို အမြဲတမ်း နှောင့်ယှက်နေရတာလဲ"
"သူ့ကို ပြန်ခေါ်ခဲ့၊ သူက ဘုရားသခင်ကို ပြစ်မှားစော်ကားသူနဲ့ ပတ်သက်တဲ့ သတင်းအချက်အလက်တွေကို သိနေတယ်။ ငါတို့ အဲဒီလူကို ရှာဖွေပြီး သတ်ပစ်ရမယ်"
အမြင့်ဆုံးနတ်ဘုရားများထဲမှ တစ်ပါးက ကောင်းကင်ယံအထက်ရှိ တိမ်မည်းကြီးများကို ဖောက်ထွင်းကာ တောင်တန်းကြီးပမာ ဧရာမ လက်ဝါးကြီးဖြင့် အောက်ဘက်သို့ လှမ်းဆွဲလိုက်လေ၏။ တွင်းနက်ကြီးတစ်ခုပမာ အစွမ်းထက်လှသော စုပ်ယူသည့်အင်အားဖြင့် 【တရားသူကြီး】၏ 【ဖမ်းဆီးခြင်း】မှ ပန်းနတ်ဘုရားကို လုယူရန် ကြိုးစားလိုက်ခြင်းပင်။
သို့တိုင် ဤအရာကား ဘုရားစူး ကတ်ပြား၏ စွမ်းအားဖြစ်ပြီး နတ်ဘုရားများကို ပြစ်မှားစော်ကားသည့် ကြီးမြတ်သော စွမ်းအားကြီး ဖြစ်ပေသည်။ အသစ်စက်စက် သံကြိုးများက လေဟာနယ်အတွင်း စုစည်းသွားကာ ထိုဧရာမ လက်ဝါးကြီးကို ရိုက်ခတ်သွားလေတော့သည်။
သွေးစွန်းမှုများ မရှိခဲ့သော်လည်း ပြင်းထန်လှသော နာကျင်မှုနှင့် နတ်ဘုရားများအပေါ် အစွန်းရောက်သော အထူးအကျိုးသက်ရောက်မှုတို့ကြောင့် ထိုဧရာမ လက်ဝါးကြီး၏ ပိုင်ရှင်မှာ ဒေါသတကြီး နာကျင်အော်ဟစ်သံများ ထွက်ပေါ်လာရချေပြီ။
"ကျိန်စာသင့်လောက်တဲ့ ဘုရားသခင်ကို ပြစ်မှားစော်ကားသူ၊ ခွင့်မလွှတ်နိုင်ဘူး၊ သတ်ပစ်၊ သူ့ကို သတ်ပစ်"
အခြား အမြင့်ဆုံးနတ်ဘုရားများကလည်း ဘုရားစူး ကတ်ပြား၏ ထူးခြားသော သဘာဝကို သတိရသွားပုံပေါ်ကာ အတူတကွ တိုက်ခိုက်ပြီး ပန်းနတ်ဘုရားကို ပြန်လည်ရယူရန် ကြိုးပမ်းကြလေ၏။ မဟုတ်သေးပေ။ ပြန်လည်မခေါ်ယူနိုင်လျှင်တောင်မှ ပန်းနတ်ဘုရားကို ဤနေရာမှာပင် သေဆုံးသွားစေရန် လုပ်ဆောင်ကြလိမ့်မည်။
"သူ့ကို သတ်"
သို့သော် အစောပိုင်းက ပြောခဲ့သည့်အတိုင်းပင်။ ဤသည်ကား ဘုရားစူး ကတ်ပြား ဖြစ်သည်။ နတ်ဘုရားများကို ပြစ်မှားစော်ကားသည့် အရာတစ်ခုဖြစ်ရာ သူတို့၏ တားဆီးမှုများကို မည်သို့လျှင် ဂရုစိုက်မည်နည်း။
ချလွမ်...
လေဟာနယ်အတွင်း ရွှေရောင်ရင့်ရင့် အလင်းစက်လေးများက သံကြိုးများအဖြစ် စုစည်းသွားကာ အမြင့်ဆုံးနတ်ဘုရားများ၏ တိုက်ခိုက်မှု အားလုံးကို ချက်ချင်းပင် တားဆီးလိုက်လေတော့သည်။ ထိုအချိန်သည် မျက်တောင်တစ်ခတ်စာမျှသာ ဖြစ်ခဲ့လျှင်တောင်မှ၊ ရဲချီယန် လက်ရှိ အသုံးပြုနေသော ဘုရားစူး ကတ်ပြားက အမြင့်ဆုံးနတ်ဘုရားများ၏ စွမ်းအားကို တောင့်ခံနိုင်စွမ်း မရှိခဲ့လျှင်တောင်မှ။
သို့သော်လုံလောက်နေခဲ့လေပြီ။
ပန်းနတ်ဘုရားသည် ချောက်နက်ကြီးပမာ လိမ်ကောက်နေသော ထိုဟင်းလင်းပြင် တွင်းဝကြီးထဲသို့ အတင်းအဓမ္မ ဆွဲခေါ်ခံလိုက်ရလေ၏။ သူ၏ ခန္ဓာကိုယ်သည် ဤလေဟာနယ် နတ်ဘုရားရုံးတော်မှ ပျောက်ကွယ်သွားချေပြီ။
ဤနေ့တွင် နတ်ဘုရားများ သွေးထွက်သံယို ဖြစ်ခဲ့ရပြီး လေဟာနယ် နတ်ဘုရားရုံးတော်သည် ဒေါသကြောင့် အဆက်မပြတ် တုန်လှုပ်သွားခဲ့ရပေသည်။ ဤနေ့၌ပင် နတ်ဘုရားများသည် "နတ်ဘုရားစော်ကားမှု" ဟူသော အမည်နာမ၏ ထိတ်လန့်ဖွယ်ရာကို နောက်တစ်ကြိမ် ထပ်မံ ခံစားလိုက်ရလေ၏။ အားနည်းလှသော လူသားတစ်ဦးမျှသာ ဖြစ်သော်လည်း သူသည် ဘုရားစော်ကားမှုကို အသုံးပြုကာ သူတို့၏ လက်ထဲမှ "ပန်း" ကို လုယူနိုင်ခဲ့ပေသည်။
"ရွံစရာကောင်းလိုက်တာ၊ အရမ်းကို ရွံစရာကောင်းတယ်"
"လွင်တီးခေါင်ပြင် ဆိုတာ ငါတို့ အစစ်အမှန် နတ်ဘုရားတွေ ပိုင်ဆိုင်သင့်တဲ့ နေရာပဲ။ ဒီလို ဘုရားစော်ကားမှု စွမ်းအားမျိုးကို ငါတို့ကိုယ်တိုင် အုပ်ချုပ်သင့်တာ၊ ယုတ်မာလိုက်တဲ့စနစ်။ မျက်နှာပြောင်တိုက်လွန်းတဲ့ စနစ်ကြီး။ ငါတို့ နတ်ဘုရားတွေကသာ လွင်တီးခေါင်ပြင်ကို ပိုင်ဆိုင်သင့်တာ"
"ကျိန်စာသင့် ဘုရားစော်ကားမှု၊ ကျိန်စာသင့် ရထားစနစ်၊ ကျိန်စာသင့် လူသား။ စောင့်နေကြ၊ စောင့်နေလိုက်။ အချိန်တန်တဲ့ တစ်နေ့ကျရင် အရာအားလုံး ငါတို့ပိုင် ဖြစ်လာလိမ့်မယ်"
လေဟာနယ်အတွင်း ဒေါသတကြီး မိုးခြိမ်းသံများ လင်းလက်သွားလေ၏။
သို့သော်လည်း ဘာဖြစ်သနည်း။
မည်သို့ပင်ဆိုစေကာမူ ပန်းနတ်ဘုရားသည် 【တရားသူကြီး】၏ ဖမ်းဆီးခြင်းကို အောင်မြင်စွာ ခံလိုက်ရပြီဖြစ်ကာ ၎င်းတို့မှာ စွမ်းဆောင်ရည်မဲ့စွာဖြင့် ဒေါသပေါက်ကွဲနေခြင်းမျှသာ ဖြစ်လေသည်။ အကယ်၍ ရဲချီယန်သာ ဤနေရာတွင် ရှိနေမည်ဆိုပါက ထိုစကားစုမျိုးကို ပြောကောင်းပြောပေလိမ့်မည်။
"ခင်ဗျားတို့က အဲဒီလောက် စွမ်းဆောင်နိုင်တယ်ဆိုရင် ဘာဖြစ်လို့ လွင်တီးခေါင်ပြင်ထဲကို တိုက်ရိုက်သွားပြီး မစမ်းကြည့်တာလဲ"
နောက်ဆုံးတွင်တော့ နတ်ဘုရားများနှင့် ရထားစနစ်သည် မည်သည့်အခါမျှ တန်းတူမဖြစ်ခဲ့ပေ။ မဟုတ်သေး၊ ၎င်းတို့သည် မိမိကိုယ်ကို နတ်ဘုရားများဟု ခေါ်ဆိုနေသော မကောင်းဆိုးဝါးများမျှသာ ဖြစ်သည်။
အမြင့်ဆုံး ဟုတ်လား။ ပိုမို အစွမ်းထက်သော မကောင်းဆိုးဝါး အမျိုးအစားထက် မပိုပါချေ။
ဤမျှသာ ဖြစ်ပေသည်။
————
ဥယျာဉ်ကြယ်။
ဝုန်း...
လေဟာနယ်မှ မိုးကြိုးပစ်ခတ်သံတစ်ခုက ကောင်းကင်ယံအနှံ့ ပဲ့တင်ထပ်သွားလေ၏။
ယုံကြည်ကိုးကွယ်မှု မျှော်စင်၏ အမြင့်ဆုံးထိပ်တွင်။ ရဲချီယန်၏ ရှေ့တည့်တည့်၌။
သံကြိုးများဖြင့် ချည်နှောင်ခံထားရပြီး လူသားများနှင့် လုံးဝနီးပါး တူညီသော သက်ရှိတစ်ဦး ထွက်ပေါ်လာလေတော့သည်။ ၎င်းမှာ ပန်းနတ်ဘုရားပင် ဖြစ်၏။
"လူသား၊ မင်း... မင်း... ဒါ မဖြစ်နိုင်ဘူး။ မင်းရဲ့ ဘုရားစော်ကားမှုက ဒီစွမ်းရည်မှ မဟုတ်တာ"
ဤကမ္ဘာမှ လွတ်မြောက်နိုင်ပြီဟု ထင်မှတ်ကာ အစောပိုင်းက ပြသခဲ့သော တည်ငြိမ်မှုများနှင့် လုံးဝ ကွာခြားစွာဖြင့် ပန်းနတ်ဘုရားသည် ထိတ်လန့်တကြား အော်ဟစ်လိုက်လေ၏။ သူ နားမလည်နိုင်ခဲ့ပေ။ လုံးဝကို နားလည်နိုင်စွမ်း မရှိခဲ့ချေ။
ဘုရားစူး ကတ်ပြား၏ စွမ်းအားက အမှန်တကယ်ပင် ဤမျှ ထိတ်လန့်ဖွယ် ကောင်းနေသလော။ အမြင့်ဆုံးနတ်ဘုရား ငါးပါး ပူးပေါင်း လုပ်ဆောင်ခဲ့လျှင်တောင်မှ ဤစွမ်းအားလက်ထဲမှ သူ့ကို ပြန်လည်မခေါ်ယူနိုင်ခဲ့ဘူးလား။ ဘာကြောင့်လဲ။ ၎င်းက ဘုရားစူး ကတ်ပြားတစ်ခု ဖြစ်နေရုံလေးနဲ့လား။ နတ်ဘုရားတွေကို ပြစ်မှားစော်ကားနိုင်တဲ့ စွမ်းအား ဖြစ်နေလို့လား။
သို့သော် ဤလူသား၏ ဘုရားစော်ကားမှု စွမ်းအားက ထိုသံကြိုးများနှင့် လုံးဝ မတူညီခဲ့ပါချေ။ ထိုသံကြိုးများက အဘယ်အရာများ ဖြစ်နေသနည်း။
ကတ်ပြား အစီအစဉ် တစ်မျိုးမျိုးလား။ နတ်ဆိုး တစ်ကောင်ကောင်များလား။
မဟုတ်ဘူး၊ မဖြစ်နိုင်တာ။
သာမန် ကတ်ပြား အစီအစဉ်တစ်ခုက ဤသို့ မလုပ်ဆောင်နိုင်ပေ။ ဤလူသားသည် ဤကမ္ဘာသို့ ရောက်ရှိလာသည်မှာ နှစ်လပင် မပြည့်သေးချေ။ အဲဒါက ဘုရားစူး ကတ်ပြားရဲ့ စွမ်းအားပဲ ဖြစ်ရမယ်။ ပြီးတော့ နောက်ထပ်တစ်ခုလား။ ဒါက ဘယ်လိုလုပ် ဖြစ်နိုင်မှာလဲ။
ထို့ကြောင့် ပန်းနတ်ဘုရားက ခေါင်းမော့လိုက်ပြီး သူ၏ရှေ့တွင် ပြုံးနေသော ဆံပင်နက်နှင့် လူငယ်လေးကို မော့ကြည့်လိုက်လေ၏။ ထိုလူငယ်၏ လက်ထဲတွင် အထက်နှင့်အောက် တစ်ခုနှင့်တစ်ခု အပြန်အလှန် ရောင်ပြန်ဟပ်နေသော မတူညီသည့် ရွှေရောင်ရင့်ရင့် ကတ်ပြားနှစ်ခုကို ကိုင်ဆောင်ထားသည် မဟုတ်ပါလား။
"နှစ်ခု ဟုတ်လား။ ဒါ... ဒါ မဖြစ်နိုင်ဘူး။ မင်းဆီမှာ ဘယ်လိုလုပ် နှစ်ခုရှိနေနိုင်မှာလဲ။ ဒါက လုံးဝကို မဖြစ်နိုင်ဘူး"
လွင်တီးခေါင်ပြင်တွင် မဖြစ်နိုင်သောအရာဟူ၍ မရှိပေ။ ဤသည်မှာ ဤကမ္ဘာသို့ ရောက်ရှိပြီးနောက် ရဲချီယန် နားလည်သဘောပေါက်ခဲ့သော အရာတစ်ခုပင် ဖြစ်သည်။
ရဲချီယန်က အနည်းငယ် ပြုံးလိုက်၏။ တရားသူကြီးက နောက်ဆုတ်သွားကာ နေရာရွှေ့ပြောင်းအမှတ်အသားက အရှေ့သို့ တိုးထွက်လာလေသည်။ ပထမဆုံးအကြိမ် လူချင်း တွေ့ဆုံရသော ဤပန်းနတ်ဘုရားကို သူက အလွန် ယဉ်ကျေးစွာဖြင့် နှုတ်ဆက်လိုက်လေတော့သည်။
"မင်္ဂလာပါ၊ နောက်ဆုံးတော့ ကျွန်တော်တို့ တွေ့ကြပြီပေါ့။ လာပါ၊ ခင်ဗျား ဖြေစရာမလိုတဲ့ မေးခွန်းတစ်ခုလောက် ကျွန်တော် မေးပါရစေ..."
"ခင်ဗျား သေမှာလား"
ရဲချီယန် ပြောခဲ့သည့်အတိုင်းပင် ပန်းနတ်ဘုရားက ဖြေဆိုရန် မလိုအပ်ခဲ့ပေ။ အကြောင်းမှာ ရဲချီယန်သည် ဤအဖြေကို မရေမတွက်နိုင်အောင် ကြားခဲ့ဖူးပြီးဖြစ်သောကြောင့်တည်း။
ထို့နောက် ချက်ချင်းပင် ရဲချီယန်က အလွန်ယဉ်ကျေးစွာဖြင့် နှုတ်ဆက်စကား ဆိုလိုက်ပြန်၏။
"အင်း... ခင်ဗျား သေချာပေါက် သေရပါလိမ့်မယ်။ ဒါက ကံကြမ္မာက သတ်မှတ်ထားပြီးသား ကိစ္စလေ"
"ဒါကြောင့် နှုတ်ဆက်ပါတယ်"
ဒုတ်... ဒုတ်...
"နေရာရွှေ့ပြောင်းအမှတ်အသား"
အသံက ကျယ်လောင်လွန်းခြင်းမရှိသလို တိုးညင်းလွန်းခြင်းလည်း မရှိခဲ့ပေ။ ကမ္ဘာကြီးက ကျယ်ပြန့်လွန်းခြင်းမရှိသလို ကျဉ်းမြောင်းလွန်းခြင်းလည်း မရှိခဲ့ပါချေ။
ကတ်ပြားပေါ်မှ မျက်နှာမဲ့လူက ကျောက်ဆူးကို မြှောက်ချီလိုက်လေ၏။ နေရာရွှေ့ပြောင်းအမှတ်အသား သုံးခုက စတင် မှေးမှိန်လာတော့သည်။
စိတ်အားထက်သန်မှု... သီဆိုမှု... ချီးမွမ်းမှု...
တောက်ပလှသော ရွှေရောင် အလင်းဘီးကြီးက ပန်းနတ်ဘုရားကို ချက်ချင်းပင် မြဲမြံစွာ သော့ခတ် ချုပ်နှောင်လိုက်လေတော့သည်။
ရွှေရောင်ရင့်ရင့် အလင်းတန်းကြီးတစ်ခုက ကောင်းကင်ယံသို့ ထိုးတက်သွားချေပြီ။ ဤအလင်းတန်းက ဟင်းလင်းပြင်ကို ကျော်လွန်ကာ ကမ္ဘာကြီးကိုပင် ဖြတ်သန်းသွားလေ၏။
ဤအခိုက်အတန့်တွင် မြို့တော်တစ်ခုလုံးရှိ မည်သူမဆို ဤအလင်းတန်းရှိရာ အရပ်ဆီသို့ အလိုအလျောက် လှမ်းကြည့်မိသွားကြသည်။ သူတို့ မြင်တွေ့လိုက်ရသည်။ ထို ကြောက်မက်ဖွယ်ကောင်းသော၊ နားလည်နိုင်စွမ်းမရှိသော၊ ကြီးကျယ်ခမ်းနားလှသော ဘုန်းကျက်သရေရှိသည့် အလင်းရောင်ကို သူတို့ မြင်တွေ့လိုက်ရလေ၏။
"ဒါက ဘုရားစော်ကားမှုရဲ့ စွမ်းအားလား"
ဖန်ဟော့က သူ့ကိုယ်သူ တီးတိုးရေရွတ်လိုက်သည်။ သူက မယုံကြည်နိုင်စွာဖြင့် နေကာမျက်မှန်ကို ချွတ်လိုက်လေ၏။
"ဘယ်သူလဲ။ ဘုရားစူး ကတ်ပြားကို ဘယ်သူ အသုံးပြုနေတာလဲ။ ကျူရှင်းထူ များလား"
"မဟုတ်ဘူး၊ သူမပဲ ဖြစ်ရမယ်။ ဒီအချိန်မှာ ဒီကို ရောက်နေမယ့် ဘုရားစူး ကတ်ပြား ပိုင်ရှင်က... သူမကလွဲလို့ တခြားဘယ်သူ ဖြစ်နိုင်ဦးမှာလဲ"
"ငါ... အသုံးချခံလိုက်ရတာလား။ ဒီမိန်းမ... ဘာဖြစ်လို့ ရုတ်တရက်ကြီး နတ်ဘုရားတွေကို စိတ်ဝင်စားသွားရတာလဲ"
————
"ဟင့်အင်း၊ မဟုတ်ဘူး"
"ငါ မလုပ်နိုင်ဘူး၊ ငါ လွင်တီးခေါင်ပြင်ထဲကို မဝင်ချင်ဘူး။ အခုချိန်တော့ မဟုတ်ဘူး"
"ရွံစရာကောင်းလိုက်တာ၊ လူသား။ မင်းက ဘာဖြစ်လို့ ဒီလောက်တောင် ရန်လိုနေရတာလဲ"
"ငါ ကျေနပ်နိုင်ဘူး။ ငါ လုံးဝ မကျေနပ်နိုင်ဘူး။ ငါ့ရဲ့ ကိုယ်ပိုင် နတ်ဘုရားနိုင်ငံတော်ကို ပိုင်ဆိုင်ဖို့ ခြေတစ်လှမ်းပဲ လိုတော့တာကို"
ပန်းနတ်ဘုရား၏ ခန္ဓာကိုယ်သည် နေရာရွှေ့ပြောင်းအမှတ်အသား၏ ပြည်နှင်ဒဏ်ပေးခြင်း အလင်းရောင်ဖြင့် အပြည့်အဝ ဖုံးလွှမ်းခံလိုက်ရလေပြီ။ မိုးရေစက်များက အထက်သို့ လည်ပတ်တက်သွားကာ ကောင်းကင်ယံရှိ အမည်မသိ နေရာတစ်ခုဆီသို့ လမ်းကြောင်းတစ်ခု ဖန်တီးပေးနေလေ၏။
ရဲချီယန်၏ ပတ်ပတ်လည်တွင် ရွှေရောင်ရင့်ရင့် အလင်းတန်းများက သူ့ကို ထင်ရှားပေါ်လွင်စေပြီး နတ်ဘုရားက သူ၏ရှေ့မှောက်တွင် ပျပ်ဝပ်နေကာ သူက နတ်ဘုရား၏ ရှေ့မှောက်တွင် စကားဆိုနေလေ၏။ လူငယ်လေးက ဖြည်းညင်းစွာ စကားဆိုလိုက်သည်။ ပန်းနတ်ဘုရားကို လုံးဝ မျှော်လင့်ချက်မဲ့သွားစေသော စကားလုံးကို သူ ပြောထုတ်လိုက်လေတော့သည်။
"ပြည်နှင်ဒဏ်ပေးခြင်း"
ဝုန်း...
ကျောက်ဆူးကြီး ပြုတ်ကျလာလေပြီ။ ဤအခိုက်အတန့်တွင် ကမ္ဘာကြီးတစ်ခုလုံးက ဟိန်းဟောက်သွားတော့သည်။ အလင်းတန်းများက အရည်အဖြစ် အခဲဖွဲ့သွားသည့်အလား ကောင်းကင်ယံသို့ ထိုးတက်သွားချေပြီ။
ထိုအလင်းတန်းများကြားတွင် ပန်းနတ်ဘုရားသည် နောက်ဆုံးအနေဖြင့် မျှော်လင့်ချက်မဲ့စွာ အစွမ်းကုန် ခုခံလိုက်လေ၏။ သူ၏ ခန္ဓာကိုယ်မှာ အက်ကွဲသွားပြီး သူ၏ နောက်ဆုံး ပန်းဝတ်မှုန်များက မြေကြီးထဲသို့ ပေါင်းစပ်ဝင်ရောက်သွားတော့သည်။
"လူသား... ငါ သေရလိမ့်မယ်။ ဒါပေမယ့် မင်းလည်း လွယ်လွယ်ကူကူ နေရမယ်လို့ မထင်နဲ့"
"မင်း... မင်းလည်း လွတ်မှာမဟုတ်ဘူး။ ဒီနေရာက မင်းရဲ့ တိုတောင်းလှတဲ့ ဘဝအတွက် နောက်ဆုံး သင်္ချိုင်းဂူပဲ"
"ဟား... ဟားဟားဟားဟား။ မင်းကို ငါနဲ့အတူ အသေခံခိုင်းမယ်"
ရွှီး...
အလင်းရောင်များ တဖြည်းဖြည်း မှေးမှိန်သွားသည်နှင့်အမျှ ကမ္ဘာကြီးက တိတ်ဆိတ်ငြိမ်သက်ခြင်းဆီသို့ ပြန်လည်ရောက်ရှိသွားလေတော့သည်။
လွင်တီးခေါင်ပြင်... အမည်မသိ နေရာတစ်နေရာတွင်...
ပန်းနတ်ဘုရား ဤနေရာသို့ ရောက်ရှိလာသည့် အခိုက်အတန့်မှာပင် အလွန်အမင်း ပြင်းထန်လှသော ဒေါသတရားကို ခံစားလိုက်ရလေ၏။ သူ၏ စွမ်းအားများက ချက်ချင်းပင် ချိတ်ပိတ်ခံလိုက်ရပြီး တစ်ကိုယ်လုံးမှာလည်း အဆုံးအစမရှိသော ဆွဲငင်အားဖြင့် မြေပြင်ပေါ်သို့ ဖိချေခံလိုက်ရချေပြီ။
【ဒင်... ဒင်... ဒင်...】
မျက်စိကျိန်းမတတ် ရဲရဲတောက်နေသော အလင်းမျက်နှာပြင်များ မရေမတွက်နိုင်အောင် ထွက်ပေါ်လာလေ၏။ ၎င်းတို့က ကောင်းကင်ယံတစ်ခုလုံးကို ဖုံးလွှမ်းသွားတော့သည်။ ၎င်းတို့က ရထားစနစ်၏ ဒေါသတရားကို ထင်ဟပ်ပြသနေပေသည်။
【"နတ်ဘုရား အမှတ်စဉ် - C-04 - ပန်း"】
【"လွင်တီးခေါင်ပြင်ထဲသို့ ဝင်ရောက်လာခဲ့ပြီ။ စည်းမျဉ်းများကိုလည်း ကြီးမားစွာ ချိုးဖောက်ခဲ့သည်"】
【"ယခု အမြင့်ဆုံး ပြစ်ဒဏ်ကို ပေးအပ်မည်"】
【"ကြီးမားသော အပြစ်ကူးလွန်မှုအတွက် တရားစီရင်ခြင်း စတင်နေပြီ"】
【"ပြစ်မှု ၁ - နတ်ဘုရားတစ်ပါးအဖြစ် ကိုယ်တိုင် ခံယူထားခြင်း"】
【"ပြစ်မှု ၂ - ကမ္ဘာကြီးကို ခိုးယူခြင်း"】
【"မရေမတွက်နိုင်သော ပြစ်မှုများ။ နောက်ဆုံး တရားစီရင်မှုကို လုပ်ဆောင်နေသည်"】
【"ဖျက်ဆီးပစ်ခြင်း..."】
【"ဤတရားစီရင်မှုကို ဝင်ရောက်စွက်ဖက်၍ မရနိုင်ပါ"】
အေးစက်စက်နှင့် ရက်စက်ကြမ်းကြုတ်လှသော၊ ရထားမောင်းနှင်သူများနှင့် အလွန်ရင်းနှီးကျွမ်းဝင်နေသည့် ထိုကြေညာသံက ယခုအခါ "နတ်ဘုရား" တစ်ပါး၏ သေဆုံးခြင်းကို ကြေညာလိုက်လေပြီ။
ပန်းနတ်ဘုရားတွင် ခုခံနိုင်စွမ်း အနည်းငယ်မျှပင် မရှိတော့သလို စကားပြောဆိုရန် အခွင့်အရေးပင် မရရှိလိုက်ချေ။ တိတ်ဆိတ်သော လေပြေလေးတစ်ဖြူး တိုက်ခတ်သွားချိန်တွင်... သူ၏ ခန္ဓာကိုယ်၊ သူ၏ စိတ်အသိနှင့် သူ၏ ဖြစ်တည်မှုတို့သည်... ထိုကဲ့သို့ပင် လွင်တီးခေါင်ပြင်ထဲရှိ သာမန် သဲပွင့်များအဖြစ်သို့ ပြောင်းလဲသွားလေတော့သည်။
လေနှင့်အတူ လွင့်စဉ်သွားကာ အရာအားလုံးက ထိုအတိုင်းပင် ပျောက်ကွယ်သွားခဲ့ချေပြီ။
【နတ်ဘုရား - ပန်း】 ကျဆုံးသွားလေပြီ။