အခန်း ၃၂

အပိုင်း ၃၂ - စနစ်၏ မစ်ရှင်

လင်းစုယွီသည် မစ်ရှင်ရှုံးနိမ့်ပါက မည်သို့သောအပြစ်ပေးခံရမည်ကို သိချင်နေမိသည်။ သို့သော် ချန်လီလီက လန်ရှုယင်းကို အလောတကြီး ဆွဲခေါ်သွားသဖြင့် ထိုအဖြေကို ချန်လီလီတစ်ယောက်သာ သိနိုင်ပေတော့မည်။

စနစ်တစ်ခု ပေါ်ပေါက်လာခြင်းကြောင့် လင်းစုယွီမှာ မိမိ၏ တိုက်ခိုက်ရေးစွမ်းရည်ကို မြှင့်တင်ရန် ပို၍ပင် စိတ်လောသွားရသည်။ လက်ရှိတွင် သူမမှာ အလွန်အားနည်းနေဆဲဖြစ်သည်။ လက်ရှိတွင် ကာလရှည်ကြာ အာဟာရချို့တဲ့မှုကြောင့် သူမကိုယ်သူမ အရပ်ပုပြီး ခွန်အားမရှိသလို ခံစားနေရသည်။

စိတ်ဝိညာဉ်စမ်းရေက သူမ၏ ကိုယ်ခံအားကို ကောင်းမွန်စေသော်လည်း မလုံလောက်သေးဟု သူမယူဆသည်။ လေ့ကျင့်ခန်းလုပ်ခြင်းဖြင့် ကြံ့ခိုင်မှုကို မြှင့်တင်ရန်လိုအပ်သလို၊ တိုက်ခိုက်ရေးစွမ်းရည် တိုးတက်စေရန် ကိုယ်ခံပညာကိုလည်း လေ့ကျင့်ဖို့လိုနေသည်။

လောလောဆယ်တွင် ထူးခြားသောနည်းလမ်းမရှိသေးသဖြင့် သူမ၏ နေရာလွတ်ကို အမြန်ဆုံးအဆင့်မြှင့်တင်ပြီး မည်သို့ဖြစ်လာမည်ကို စောင့်ကြည့်ရုံသာ ရှိတော့သည်။ ပြီးခဲ့သည့်အကြိမ်က နေရာလွတ်နယ်မြေကို အခြေခံအဆင့်မှ အဆင့် (၁) သို့ မြှင့်တင်လိုက်စဉ်က စိတ်ဝိညာဉ်စွမ်းအားကို ပြင်ပသို့ ထုတ်လွှတ်နိုင်သော စွမ်းရည်ရရှိခဲ့သည်။ သူမလိုချင်သောအရာမှာ နေရာလွတ်နယ်မြေ အဆင့်မြှင့်တင်ခြင်းမှသာ ရရှိနိုင်မည်လားဟု တွေးမိသည်။

ထိုစဉ် ချန်လီလီနှင့် တွဲဆက်ထားသော ချို့ယွင်းချက်ရှိသည့် စနစ်ကို လင်းစုယွီ ရုတ်တရက် သတိရသွားသည်။ ထိုစနစ်ထဲတွင် တစ်ခုခုသော ဖြေရှင်းချက်ကို သူမ ရှာတွေ့နိုင်ကောင်းပါရဲ့။

တစ်ဖက်တွင်လည်း ချန်လီလီသည် လန်ရှို့ယင်းကို လင်းစုယွီ၏ အိမ်မှ အတင်းဆွဲခေါ်လာခဲ့သော်လည်း တည်းခိုခန်းသို့ မရောက်မီမှာပင် စနစ်၏ လျှပ်စစ်ရှော့ခ်တိုက် အပြစ်ပေးခြင်းကို ခံလိုက်ရသည်။

"လီလီ... ဘာဖြစ်တာလဲ"

မိမိ၏ သမီးဖြစ်သူ ရုတ်တရက် တက်သလိုဖြစ်ပြီး တုန်ယင်ကာ လဲကျသွားသည်ကို မြင်သောအခါ လန်ရှို့ယင်းမှာ သူမကိုဖမ်းရန် ရှေ့သို့ အပြေးအလွှားလှမ်းလိုက်သဖြင့် သူမကိုယ်တိုင်ပင် မြေကြီးပေါ်သို့ မှောက်ရက်လဲကျလုနီးပါး ဖြစ်သွားသည်။

"လီလီလား"

လန်ရှို့ယင်းသည် ချန်လီလီ၏ ပါးပြင်ကိုပုတ်ကာ လှုပ်နှိုးနေမိသည်။ သမီးဖြစ်သူ၏ သရဲပူးသလို ဖြစ်နေသော ပုံစံကြောင့် လန်ရှို့ယင်းမှာ အလွန်အမင်း ထိတ်လန့်သွားပြီး မျက်နှာတစ်ခုလုံး သွေးဆုတ်ဖြူလျော်သွားလေသည်။

ချန်လီလီသည် တစ်မိနစ်ခန့် ဆက်တိုက်တုန်ယင်နေပြီးနောက် နောက်ဆုံးတွင် မခံနိုင်တော့ဘဲ မျက်ဖြူလန်ကာ သတိလစ်သွားတော့သည်။

လန်ရှို့ယင်းမှာ ပို၍ပင် စိုးရိမ်ပူပန်လာသည်။ လမ်းမပေါ်တွင်လည်း ကူညီမည့်သူမရှိသဖြင့် သမီးဖြစ်သူကို သူမကိုယ်တိုင် ကျောပိုးလိုက်သည်။

ကနဦးတွင် ဆေးရုံသို့သွားရန် ကြံရွယ်သော်လည်း ပါလာသောငွေများအားလုံး ကုန်သလောက်ဖြစ်နေသည်ကို သတိရသွားသည်။

"လီလီရယ်... အမေ့ကို ဒီလိုကြီးမခြောက်ပါနဲ့" တိုးတိုးလေးရေရွတ်ရင်း သူမသည် ဆေးရုံသို့မသွားတော့ဘဲ အခြေအနေကို စောင့်ကြည့်ရန် တည်းခိုခန်းသို့သာ ပြန်ရန် ဆုံးဖြတ်လိုက်သည်။ ကံကောင်းထောက်မစွာဖြင့် ခဏအကြာတွင် ချန်လီလီသည် လန်ရှို့ယင်း၏ကျောပေါ်၌ နိုးလာခဲ့သည်။

အမေဖြစ်သူ ခေါ်နေသံကို ဝေဝေဝါးဝါးကြားလိုက်ရသောအခါ ချန်လီလီက နုံးချိစွာ ပြောလိုက်သည်။ "အမေ... သမီး အခုအဆင်ပြေသွားပါပြီ၊ တစ်ကိုယ်လုံး အားအင်ကုန်နေလို့။ တည်းခိုခန်းကိုပဲ အရင်ခေါ်သွားပေးပါ"

မစ်ရှင်ကျရှုံးခြင်း၏ ခါးသီးသောအရသာကို ခံစားလိုက်ရပြီးနောက် ချန်လီလီသည် လင်းစုယွီအပေါ် အငြိုးအတေး ပိုထားမိသွားပြီး သူမကို အိမ်သို့ခေါ်သွားချင်စိတ် ပိုပြင်းထန်လာသည်။ လင်းစုယွီသာ သူမအိမ်သို့ရောက်လာပါက မိမိစိတ်ကြိုက် ခြယ်လှယ်နိုင်မည့် သနားစရာ သတ္တဝါလေးတစ်ကောင် ဖြစ်သွားမည်ဟု သူမတွေးနေသည်။

"အမေ... ကျင်းမန်မြို့မှာ လင်းမိသားစုနဲ့ ရင်းနှီးတဲ့သူ ဘယ်သူရှိလဲ။ သူတို့ဆီ သွားကြည့်ရအောင်။ ဒါမှမဟုတ် လင်းစုယွီရဲ့ အိမ်ထောင်စုစာရင်းကို မြို့တော်က ကျွန်မတို့အိမ်ဆီ ပြောင်းလို့ရမလားဆိုတာ ရပ်ကွက်ရုံးမှာ သွားစုံစမ်းရအောင်"

ချန်မိသားစုမှာ နောက်အိမ်ထောင်နှင့် ပေါင်းစည်းထားသော မိသားစုဖြစ်သဖြင့် ချန်လီလီသည် ငယ်စဉ်ကတည်းက အခြားသူများထက် ပို၍ပါးနပ်သည်။ အိမ်ထောင်စုစာရင်း၏ အရေးပါမှုကို သူမနားလည်၏။ အိမ်ထောင်စုစာရင်းကို ထိန်းချုပ်နိုင်ခြင်းသည် လူကို ထိန်းချုပ်နိုင်ခြင်းပင် ဖြစ်သည်။

"လျန်မိသားစုနဲ့ လင်းမိသားစုက ဆွေမျိုးတော်စပ်မှုရှိတယ်။ ဒါပေမဲ့ လျန်ကတော်က ငါ့အပေါ် အမြဲတမ်း အမြင်မကြည်ဘူး။ ငါ့ကို မနှစ်သက်တဲ့အတွက် သူမဆီက အကူအညီတောင်းဖို့က မဖြစ်နိုင်သလောက်ပဲ" ဟု လန်ရှို့ယင်းက ဆိုသည်။

"ဒါဆို လျန်မိသားစုမှာ တခြားဘယ်သူတွေရှိသေးလဲ"

လျန်ကတော်ကို မစည်းရုံးနိုင်ပါက သူမ၏ ကလေးများကို စည်းရုံး၍ ရနိုင်ကောင်းသည်။ ကလေးတိုင်းသည် လင်းစုယွီကဲ့သို့ ခေါင်းမာကြမည် မဟုတ်ပေ။

သူမသည် အပြောကောင်းသူဖြစ်သဖြင့် အမြဲလူချစ်လူခင်များခဲ့သော်လည်း ယနေ့တွင် လင်းစုယွီ၏ နှိမ်ချခြင်းကို ခံလိုက်ရသဖြင့် အလွန်ဒေါသထွက်နေမိသည်။

"လျန်မိသားစုမှာ သားသုံးယောက်နဲ့ သမီးတစ်ယောက်ရှိတယ်။ သမီးအငယ်ဆုံးက လင်းစုယွီနဲ့ အတန်းဖော်ပဲ။ သားအကြီးဆုံးက စစ်ထဲမှာ၊ ဒုတိယသားက တက္ကသိုလ်က ဘွဲ့ရခါစ၊ အငယ်ဆုံးသားကတော့ အထက်တန်းကျောင်းသား။ ဘာလို့မေးတာလဲ"

"လျန်ကတော်က ကိုင်တွယ်ရခက်ရင် လျန်မိသားစုရဲ့ နောက်မျိုးဆက်ကလေးတွေကို ချဉ်းကပ်ကြည့်ရအောင်။ သူတို့က ကျွန်မတို့ကို ကူညီချင် ကူညီကြမှာပါ"

ယေဘုယျအားဖြင့် လူငယ်များသည် ကိုင်တွယ်ရ ပိုလွယ်ကူသည်။ ထို့ကြောင့် ချန်လီလီသည် လျန်ကတော်၏ သားသမီးများဖြင့် စတင်ရန် ဆုံးဖြတ်လိုက်သည်။ ထို့အပြင် လင်းစုယွီ၏ သူငယ်ချင်းများနှင့် ပိုထိတွေ့ခြင်းဖြင့် စနစ်၏ မစ်ရှင်တစ်ခုခု ပေါ်လာနိုင်သည်ဟုလည်း သူမ မျှော်လင့်နေသည်။

"ကောင်းပြီ... ဒီနေ့တော့ နားလိုက်ဦး။ မနက်ဖြန်ကျမှ လျန်မိသားစုဆီ သွားကြတာပေါ့"

လန်ရှို့ယင်းသည် သူမ၏ သမီးဖြစ်သူ၏ ပါးနပ်မှုကို အမြဲသဘောကျသူဖြစ်သဖြင့် ဤအကြံဉာဏ်ကို အပြည့်အဝ ထောက်ခံလေသည်။

မည့်သူကို အရင်ဆုံး ချဉ်းကပ်ရန် လွယ်ကူမည်ကို သိရှိနိုင်ရန် လန်ရှို့ယင်းသည် လျန်မိသားစုအိမ်အနီးသို့ သွားကာ ကလေးများ၏ စရိုက်များကို စုံစမ်းရန်ပင် စီစဉ်လိုက်သေးသည်။

ညနေစောင်းသောအခါ လန်ရှို့ယင်းသည် လျန်မိသားစုနှင့်ပတ်သက်သော သတင်းအချက်အလက်များနှင့်အတူ ပြုံးရွှင်စွာပြန်ရောက်လာသည်။ သူမ၏မျက်နှာကို ကြည့်ခြင်းအားဖြင့် အသုံးဝင်သော အချက်အလက်များစွာ ရခဲ့ပုံရသည်။

"လီလီ... အမေ အကုန်စုံစမ်းခဲ့ပြီးပြီ။ လျန်မိသားစုရဲ့ သမီးအငယ်ဆုံးလေးက အရမ်းရိုးသားဖြူစင်တယ်။ အရင်က သူငယ်ချင်း သိပ်မရှိဘူး၊ ဒါပေမဲ့ အခုတလောမှာ လင်းစုယွီနဲ့ အရမ်းရင်းနှီးနေတယ်တဲ့။ သမီးသာ သူနဲ့ သူငယ်ချင်းဖြစ်အောင် လုပ်နိုင်ရင် ငါတို့ရဲ့ ရည်မှန်းချက်က အောင်မြင်ဖို့ အများကြီး လွယ်သွားလိမ့်မယ်"

လန်ရှို့ယင်းက လျန်ဟွေ့အကြောင်း ပြောလိုက်သည်နှင့် တစ်ပြိုင်နက် စနစ်၏ မစ်ရှင်အချက်ပေးသံ ထွက်ပေါ်လာသည်။ ချန်လီလီ၏ ရင်ခုန်သံမှာလည်း မြန်ဆန်သွားတော့သည်။

ကောင်းလေစွ၊ နောက်ထပ် မစ်ရှင်တစ်ခုပေါ့။ အရင်မစ်ရှင်၏ ဆုလာဘ်များမှာ အလွန်ကောင်းမွန်ခဲ့သဖြင့် သူမသည် မစ်ရှင်များ ပိုရရှိရန် အမြဲမျှော်လင့်နေခဲ့ခြင်း ဖြစ်သည်။ ယနေ့ မစ်ရှင်အသေးစားလေး ကျရှုံးခဲ့သော်လည်း တစ်မိနစ်စာ လျှပ်စစ်ရှော့ခ်တိုက်ခံရသည့် ပြစ်ဒဏ်ကို သူမ ခံလိုက်ရသည်။

လျန်ဟွေ့ကို ချဉ်းကပ်ရန်၊ သူမ၏ အသိအမှတ်ပြုမှုကို ရယူရန်၊ သူငယ်ချင်းဖြစ်အောင်လုပ်ရန်နှင့် လက်ဆောင်ဖလှယ်ရန်။

ဤမစ်ရှင်မှာ ယနေ့ လင်းစုယွီကို ချဉ်းကပ်ခဲ့သည့် မစ်ရှင်နှင့် အလွန်ဆင်တူသဖြင့် သူမအတွက် ရင်းနှီးပြီးသား ဖြစ်နေသည်။

အမေဖြစ်သူ စုံစမ်းလာသော သတင်းများသာ မှန်ကန်ပါက လျန်ဟွေ့ကို သူမ သေချာပေါက် သိမ်းသွင်းနိုင်မည်ဟု ယုံကြည်နေသည်။ ထို့ကြောင့် ချန်လီလီသည် မစ်ရှင်ကို ယုံကြည်မှုအပြည့်ဖြင့် လက်ခံလိုက်သည်။

ထို့နောက် သားအမိနှစ်ယောက်မှာ နောက်တစ်နေ့တွင် လျန်ဟွေ့ကို မည်သို့ချဉ်းကပ်မည်ကို အသေးစိတ် စီစဉ်ကြတော့သည်။

ချန်လီလီသည် ငယ်စဉ်ကတည်းက ပရိယာယ်ကြွယ်ဝစွာ ကြီးပြင်းလာသူဖြစ်သည်။ လျန်ဟွေ့မှာမူ သူမနှင့် လုံးဝဆန့်ကျင်ဘက်ဖြစ်၏။ သူမ ကြုံတွေ့ခဲ့ဖူးသမျှ အဆိုးဆုံး မနာလိုမှုဆိုသည်မှာ သူမ၏ ဝမ်းကွဲမောင်နှမဖြစ်သူ လင်းရှင်းယောင်၏ မောက်မာစွာ ဆက်ဆံခံရမှုလောက်သာ ရှိသည်။

ထို့ကြောင့် လျန်ဟွေ့ကဲ့သို့ ရိုးသားဖြူစင်သော မိန်းကလေးတစ်ယောက်မှာ ချန်လီလီနှင့် သူမ၏အမေတို့အတွက်တော့ အပိုင်တွက်ထား၍ ရသော သားကောင်လေးသာ ဖြစ်တော့သည်။

နောက်တစ်နေ့တွင် လန်ရှို့ယင်းနှင့် ချန်လီလီတို့သည် လျန်ဟွေ့၏အိမ်အနီးတွင် စောင့်ဆိုင်းနေကြသည်။ သူတို့သည် အရင်ဆုံး လူမိုက်ပုံစံရှိသူတစ်ယောက်ကို ငှားရမ်းကာ လျန်ဟွေ့အား ခြောက်လှန့်စေပြီး လူသူမရှိသော နေရာသို့ မောင်းထုတ်ခိုင်းလိုက်သည်။

ထိုအချိန်တွင် လန်ရှို့ယင်းနှင့် သမီးဖြစ်သူတို့က အချိန်ကိုက် ပေါ်လာကြပြီး ထိုလူမိုက်အား မောင်းထုတ်ပေးကာ လျန်ဟွေ့ကို ဂရုတစိုက် နှစ်သိမ့်ပေးလိုက်ကြသည်။ ဤလုပ်ရပ်ကြောင့် လျန်ဟွေ့၏ ယုံကြည်မှုကို ချက်ချင်း ရရှိသွားတော့သည်။

"ကျေးဇူးတင်ပါတယ် အဒေါ် နဲ့ မမကြီးရယ်။ အဒေါ် တို့သာ မရောက်လာရင် သမီး ဘာလုပ်ရမှန်းတောင် သိမှာမဟုတ်ဘူး"

တစ်သက်လုံး မိသားစု၏ အရိပ်အောက်တွင် လုံခြုံစွာ ကြီးပြင်းလာရသဖြင့် လျန်ဟွေ့မှာ ဤကဲ့သို့သော အခြေအနေမျိုးကို တစ်ခါမှ မကြုံဖူးချေ။ သူမ၏ အသံများမှာ တုန်ယင်နေဆဲ ဖြစ်သည်။

"ညီမလေး... ဘာမှမဖြစ်ဘူးမလား။ အိမ်အထိ လိုက်ပို့ပေးရမလား"

ချန်လီလီမှာ ဖော်ရွေပျူငှာစွာဖြင့် လူကို မြူဆွယ်ရာတွင် အလွန်တော်လှလေကာ လန်ရှို့ယင်းသည်လည်း နူးညံ့သိမ်မွေ့သည့် ပုံဖမ်းထားလေသည်။

လျန်ဟွေ့သည် လူစိမ်းများအပေါ် ထားရှိသော သတိကို လျှော့ချလိုက်သည်နှင့် ချန်လီလီက သူမနှင့် သူငယ်ချင်းဖြစ်အောင် ချက်ချင်းပင် လုပ်ဆောင်နိုင်ခဲ့သည်။

လျန်ဟွေ့က ကျေးဇူးဆပ်သည့်အနေဖြင့် ထမင်းကျွေးလိုကြောင်း ပြောသောအခါ သူတို့သားအမိနှစ်ယောက်လုံးက ကလေးတစ်ယောက်၏ ပိုက်ဆံကို အကုန်မခံနိုင်ပါဟုဆိုကာ ငြင်းဆန်လိုက်ကြသည်။

"ရှောင်ဟွေ့ရယ် ... တစ်ယောက်ယောက်က ကျွေးရမယ်ဆိုရင် အ‌ဒေါ်ကပဲ ကျွေးရမှာပေါ့။ အဒေါ်က ဝင်ငွေရှိတဲ့ လူကြီးပဲ၊ ကလေးဆီက ပိုက်ဆံကို ဘယ်သုံးရက်ပါ့မလဲ။ ဒီနေ့က သမီးနဲ့ ရှောင်ဟွေ့ သူငယ်ချင်းဖြစ်တဲ့ အထိမ်းအမှတ်အဖြစ် အဒေါ်ကပဲ ကျွေးပါရစေ"

ဤမျှအထိ သဘောထားကြီးပြီး နားလည်မှုရှိသော အဒေါ်တစ်ယောက်ကို တွေ့လိုက်ရသဖြင့် လျန်ဟွေ့မှာ မည်သည့် သံယောဇည်မှ မရှိတော့ဘဲ သူမ၏ ရင်ထဲရှိသမျှကိုပင် ဖွင့်ပြောပြချင်စိတ် ပေါက်လာတော့သည်။

ထို့နောက် လန်ရှို့ယင်းသည် ချန်လီလီနှင့် လျန်ဟွေ့တို့ကို အစိုးရပိုင် စားသောက်ဆိုင်သို့ ခေါ်သွားကာ အသားဟင်းများကိုသာ မှာပေးလိုက်သည်။ သူတို့၏ နွေးထွေးသော ဆက်ဆံမှုကြောင့် လျန်ဟွေ့၏ စိတ်ထဲတွင် သူတို့အပေါ် အထင်ကြီးလေးစားမှုများ တဟုန်ထိုး မြင့်တက်လာခဲ့သည်။

"အစ်မလီလီ... ဒီနေ့ ညနေကျရင် ညီမတို့အိမ်ကို လာလည်မလား။ ညီမဆီမှာ ရုပ်ပြစာအုပ်တွေ အများကြီးရှိတယ်၊ အစ်မကြိုက်တဲ့ 'အနောက်ဘက်သို့ ခရီးသွားခြင်း'စာအုပ်တောင် ရှိသေးတယ်"

ချန်လီလီသည် ချက်ချင်း ပြုံးကာ သဘောတူလိုက်သည်။ သူမသည် လျန်ဟွေ့ စိတ်ဝင်စားမည့် ရုပ်ပြစာအုပ်များအကြောင်းကို ရည်ရွယ်ချက်ရှိရှိ ပြောဆိုခဲ့ခြင်းဖြစ်ပြီး၊ လျန်ဟွေ့ဘက်မှ စတင်ကာ သူမကို အိမ်သို့ဖိတ်ခေါ်လာအောင် ဖန်တီးခဲ့ခြင်း ဖြစ်သည်။

"အရမ်းကောင်းတာပေါ့ ရှောင်ဟွေ့ရယ်။ အစ်မလည်း ညီမလေးနဲ့ ကစားချင်တာ။ ညီမလေးကို မြင်မြင်ချင်းပဲ အစ်မတို့က တစ်ခုခု ပတ်သက်နေသလို ရေစက်ပါသလို ခံစားရတယ်... ဘယ်လိုပြောရမလဲ... အော်၊ မြင်မြင်ချင်း ရင်းနှီးသွားတာမျိုးပေါ့။ ဟုတ်တယ်... ညီမလေးနဲ့တွေ့ရတာ သူငယ်ချင်းဟောင်းကြီးနဲ့ ပြန်တွေ့ရသလိုပဲ"

"ဟားဟား... တကယ်လား။ ညီမလည်း အစ်မလီလီကို အရမ်းသဘောကျတယ်"

ထိုအချိန်တွင် လျန်ဟွေ့မှာ ရိုးသားဖြူစင်လှသော မိန်းကလေးတစ်ယောက်ပမာ ချန်လီလီ၏ အချိုသတ်စကားများထဲတွင် နစ်မြောသွားတော့သည်။

၁၉၆၀ ၌ ပြန်လည်မွေးဖွားခြင်း