အခန်း ၅၉၁

အခန်း (၅၉၁)

လင်တုံး၏ ပြောင်းလဲသွားပုံကို သတိပြုမိလိုက်သော ချင်ယွမ်ဖုန်းသည် သူ၏ရှေ့ရှိ ခေါက်ဆွဲပန်းကန်နှစ်လုံးအနက် တစ်လုံးကို သူမဘက်သို့ တွန်းပေးလိုက်ပြီး ပြုံး၍ ဆိုလိုက်သည်။

"ခေါက်ဆွဲစားဖို့ အချိန်တန်ပြီ"

လင်တုံးသည် ချင်ယွမ်ဖုန်းကို ကြည့်လိုက်ရာ အံ့အားသင့်သွားဟန်ရှိပြီး မည်သို့မျှမဆိုဘဲ ခေါင်းငုံ့ကာ ခေါက်ဆွဲကို စတင်စားသောက်လေသည်။

သို့သော်လည်း သူမ၏ အကြည့်တို့သည် ချင်ယွမ်ဖုန်းထံသို့ အခါခါ ပြန်ရောက်လာနေ၏။

ချင်ယွမ်ဖုန်းသည် ပြုံးလျက် ခေါင်းခါကာ "မေးချင်တာရှိရင် မေးလိုက်ပါ၊ မင်း အောင့်အီးထားရတာ အတော်ခက်ခဲနေမှန်း ငါမြင်နေရတယ်" ဟု ဆိုသည်။

ထိုစကားကို ကြားလိုက်ရသောအခါ လင်တုံးသည် အမြန်ပင် ခေါင်းမော့လာပြီး သူမ၏ မျက်ဝန်းတို့မှာ ကြယ်တာရာတို့ဖြင့် ပြည့်နှက်နေသကဲ့သို့ ချင်ယွမ်ဖုန်းကို စိုက်ကြည့်နေမိသည်။

"နင်. နင်က ချင်ယွမ်ဖုန်းပဲ"

ချင်ယွမ်ဖုန်းသည် ခေါင်းညိတ်၍ "ဟုတ်ပါတယ်၊ တကယ်တော့ မင်းကို အကြာကြီးကတည်းက ပြောပြချင်ခဲ့တာပါ၊ ဒါပေမဲ့ ဘယ်လိုပြောရမှန်း မသိခဲ့လို့ပါ" ဟု ဆိုသည်။

"ကျွန်မ သိသားပဲ"

လင်တုံးသည် စားပွဲကို ပုတ်၍ တန်းမတ်ရပ်လိုက်ပြီး သူမ၏မျက်နှာတွင် အလွန်အမင်း ဝမ်းသာအားရဖြစ်နေသည့် အမူအရာတို့ ပေါ်လွင်နေကာ နားရွက်တို့ပင် နီရဲလာသည်။

"အသံကို လျှော့ထားပါ" ဟု ဆိုကာ ချင်ယွမ်ဖုန်းသည် လင်တုံးကို အမြန်ပင် ပြန်ထိုင်စေလိုက်သည်။ အနီးအနားရှိ လူအချို့က သူတို့နှစ်ဦးကို ထူးဆန်းသောအကြည့်များဖြင့် ကြည့်နေကြသောကြောင့် ဖြစ်သည်။

လင်တုံးသည် အမြန်ပင် ခေါင်းညိတ်လျက် "ဟုတ်ကဲ့၊ ကျွန်မ သတိထားပါ့မယ်၊ တကယ်တော့ အကိုကြီးချင်က ချင်ယွမ်ဖုန်းပဲဆိုတာ အကြာကြီးကတည်းက သတိထားမိခဲ့သင့်တာပါ၊ အရမ်းတော်ပြီးတော့ ချင် ဆိုတဲ့ နာမည်တူလေးလည်း ဖြစ်နေတာကိုး" ဟု ဆိုသည်။

"ငါ့ရဲ့ ပရိသတ်တစ်ယောက်ကို ဒီနေရာမှာ တွေ့ရလိမ့်မယ်လို့ မထင်ထားခဲ့မိဘူး" ဟု ချင်ယွမ်ဖုန်းသည် ပြုံးလျက် ဆိုသည်။ "ကဲပါ၊ ဒီလျှို့ဝှက်ချက်ကို မင်းပဲ သိထားရင် ရပါပြီ၊ နော်"

"ဟုတ်ကဲ့" လင်တုံး၏ မျက်နှာတွင် ပျော်ရွှင်ကြည်နူးနေသည့် အမူအရာတို့ ပေါ်လွင်နေသည်။ မိမိ၏ အားကျရသောသူအတွက် လျှို့ဝှက်ချက်တစ်ခုကို ထိန်းသိမ်းပေးထားနိုင်ခြင်းသည် သူမအတွက် အပျော်ရဆုံး အရာတစ်ခုပင် ဖြစ်သည်။

အရေးကြီးဆုံးမှာ သူမ၏ အားကျရသူက သူမကို နှစ်ကြိမ်တိုင်တိုင် ကယ်တင်ခဲ့ခြင်း၊ ဒဏ်ရာများကို ကုသပေးခဲ့ခြင်းနှင့် စျေးဝယ်ထွက်ခြင်း၊ စကားပြောဆိုခြင်းတို့အတွက် အဖော်ပြုပေးခဲ့ခြင်း—ယခင်က အိပ်မက်ပင် မမက်ရဲခဲ့သော ကိစ္စရပ်များ ဖြစ်သည်။

လင်တုံးသည် သူမအနေဖြင့် ယခင်ဘဝက ကမ္ဘာကြီးကို ကယ်တင်ခဲ့ဖူးသူ ဖြစ်မည်ဟု ခံစားလိုက်ရသည်။

တစ်နေ့တာလုံးတွင် လင်တုံးသည် မူးဝေဝေဖြစ်နေကာ သူမ၏ မျက်နှာတွင် ကျေနပ်အားရနေသည့် အပြုံးများဖြင့် ချင်ယွမ်ဖုန်း၏ ဘေးတစောင်းပုံရိပ်ကို ကြည့်ကာ မိုက်မဲစွာပင် ရယ်မောနေမိသည်။

သူမပြောနေကျဖြစ်သော ချင်အစ်ကိုကြီးမှာ သူမ၏ အားကျရသူ ချင်ယွမ်ဖုန်းပင် ဖြစ်ကြောင်း သိလိုက်ရချိန်မှစ၍ ချင်ယွမ်ဖုန်းသည် လင်တုံး၏ မျက်လုံးထဲတွင် ထူးခြားသော အရှိန်အဝါတို့ဖြင့် ပို၍ပို၍ ရုပ်ရည်ချောမောလာသည်။

စိန်ခေါ်ပွဲနေ့ နီးကပ်လာသည်နှင့်အမျှ စိန်ခေါ်ရာမြို့တော်သည် ပိုမို၍ လူစည်ကားလာသည်။

မြို့ထဲရှိ လူများမှာ ချင်ယွမ်ဖုန်းနှင့် ချင်ဝူယန်းတို့ နှစ်ဦးစလုံး အနိုင်ရနိုင်ခြေ ငါးဆယ်ရာခိုင်နှုန်းစီ ရှိသည်ဟု လောင်းကြေးများပင် ထပ်ခဲ့ကြသည်။

စိန်ခေါ်ပွဲမတိုင်မီ သုံးရက်အလိုတွင် ချီဖုန်းချောက်ကမ္ဘာ၌ ဖြစ်ရပ်တစ်ခု ဖြစ်ပွားခဲ့သည်။

စိန်ခေါ်ရာမြို့တော်သည် ချီဖုန်းချောက်ကမ္ဘာ၏ အနောက်ဘက်၊ နယ်နိမိတ်အနီးတွင် တည်ရှိသော်လည်း ရုတ်တရက် လူအုပ်စုတစ်ခု ပေါ်ပေါက်လာကာ ချီဖုန်းချောက်ကမ္ဘာနှင့် စိန်ခေါ်ရာမြို့တော်ကို ခြားထားလိုက်သည်။

အချို့လူများက စုံစမ်းမေးမြန်းကြည့်ရာ မြူနှင်းဂိုဏ်းက ငှားရမ်းထားခြင်းဖြစ်ပြီး ချင်ဝူယန်းနှင့် ချင်ယွမ်ဖုန်းတို့၏ စိန်ခေါ်ပွဲကို မည်သူမျှ ကြည့်ရှုခွင့်မရစေရန် တားဆီးထားခြင်း ဖြစ်ကြောင်း သိရှိရသည်။

ဤလုပ်ရပ်သည် လူအများ၏ စိတ်ကို မနှစ်မြို့စေသော်လည်း ငှားရမ်းခံထားရသော ထိုသိုင်းပညာရှင်တို့မှာ မဟာဆရာနယ်ပယ်မှ ကျွမ်းကျင်သူများ ဖြစ်ကြသဖြင့် လူအများစုမှာ စိတ်ပျက်လက်ပျက်ဖြင့်သာ သက်ပြင်းချနိုင်ကြသည်။

ကံကောင်းသည်မှာ ချီဖုန်းချောက်ကမ္ဘာ၏ ဘေးနှစ်ဖက်ရှိ တောင်ထိပ်များတွင် အစောင့်အရှောက်များ မရှိသဖြင့် ထိုနေရာသို့ တက်ရောက်ကြည့်ရှုပါက စိန်ခေါ်ပွဲကို ကြည့်ရှုနိုင်သေးသော်လည်း တောင်ထိပ်မှ အောက်သို့ ငုံ့ကြည့်ပါက အရိပ်မည်းကလေးနှစ်ခုကိုသာ မြင်တွေ့ရပေလိမ့်မည်။

"လင်တုံး၊ မင်းကို ငါ့ရဲ့ မြေနက်မြေဆီ ပြန်ပို့ပေးမယ်၊ ဒီစိန်ခေါ်ပွဲကို မကြည့်သင့်ဘူး" ဟု ချင်ယွမ်ဖုန်းသည် ရုတ်တရက် လင်တုံးအား ပြောလိုက်သည်။

"ဘာလို့လဲ" လင်တုံးသည် သိလိုစိတ်ဖြင့် ချင်ယွမ်ဖုန်းကို ကြည့်သည်။

ချင်ယွမ်ဖုန်းသည် အနည်းငယ် တွေးတောလိုက်သော်လည်း တိကျသောအကြောင်းပြချက်ကိုမူ မပေးနိုင်ခဲ့ပေ။

ပြီးခဲ့သည့် ရက်အနည်းငယ်အတွင်း သူ၏စိတ်ထဲတွင် တစ်စုံတစ်ခု ဖြစ်ပျက်တော့မည့်အလား မရေမရာသော စိုးရိမ်စိတ်တို့ ဖြစ်ပေါ်နေခြင်းသာ ဖြစ်သည်။

"အန္တရာယ်ရှိနိုင်တယ်၊ ပြီးတော့ ငါတို့ရဲ့ တိုက်ပွဲက အရမ်းနီးကပ်နေရင် မင်းကို ထိခိုက်မိလိမ့်မယ်" ဟု ချင်ယွမ်ဖုန်းက အမှန်အတိုင်း ပြောပြသည်။

လင်တုံးသည် သူမ၏ အားကျရသူကို ကြည့်လိုက်ပြီးနောက် လွယ်လွယ်ကူကူပင် သဘောတူလိုက်သည်။

မည်သို့ဆိုစေ သူမသည် သူမ၏ အားကျရသူနှင့်အတူ တစ်လခွဲခန့် တစ်ယောက်တည်း နေထိုင်ခဲ့ရပြီးဖြစ်ကာ မြေနက်မြေသို့ ပြန်သွားပါက ချင်ယွမ်ဖုန်းလည်း နောက်ဆုံးတွင် ထိုနေရာသို့ ပြန်ရောက်လာမည်ပင်။

ထိုအခါ သူမသည် သူမ၏ အားကျရသူကို နေ့စဉ် မြင်တွေ့နိုင်တော့မည် ဖြစ်သည်။

ထိုအကြောင်းကို တွေးမိရုံမျှဖြင့် သူမမှာ အလွန်ပင် စိတ်လှုပ်ရှားနေမိသည်။

လင်တုံးသည် ချင်ယွမ်ဖုန်း ရှုံးနိမ့်သွားပါက မည်သို့ဖြစ်မည်ကို တစ်ခါမျှ မတွေးခဲ့ဖူးပေ။ သူမ၏ စိတ်ထဲတွင် ချင်ယွမ်ဖုန်းမှာ ရှုံးနိမ့်မည်မဟုတ်ဟု ယုံကြည်ထား၏။

လင်တုံး သဘောတူသည်ကို မြင်သောအခါ ချင်ယွမ်ဖုန်းသည် သူမကို ခေါ်ဆောင်၍ မြောက်ဘက်သို့ ဦးတည်သွားသည်။

ချင်ယွမ်ဖုန်းသည် အစီအရင်ကို လျှို့ဝှက်သော နေရာတစ်ခုတွင် ထားရှိခဲ့ပြီး ထိုနေရာမှာ ချီဖုန်းချောက်ကမ္ဘာ၏ မြောက်ဘက်တွင် ဖြစ်သည်။

ချီဖုန်းချောက်ကမ္ဘာသည် ပင်လယ်နှင့် ချိတ်ဆက်ထားသော အဓိကလမ်းကြောင်းတစ်ခုကဲ့သို့ ဖြစ်နေပြီး ချင်ယွမ်ဖုန်းမှာ အစီအရင်ကို ပင်လယ်ကမ်းစပ်ရှိ ကျောက်ဆောင်တစ်ခုပေါ်တွင် ထားရှိခဲ့ခြင်း ဖြစ်သည်။

လင်တုံးသည် အစီအရင်ကို အသုံးပြုခြင်းမှာ ပထမဆုံးအကြိမ် ဖြစ်သော်လည်း ချင်ယွမ်ဖုန်း သူမ၏ ဘေးတွင် ရှိနေခြင်းက သူမကို လုံခြုံစိတ်ချမှု အပြည့်အဝ ရှိစေသည်။

ခဏတာ မူးဝေသွားပြီးနောက် လင်တုံးနှင့် ချင်ယွမ်ဖုန်းတို့မှာ ဆေးနတ်ဘုရားဂိုဏ်းသို့ ပြန်လည်ရောက်ရှိသွားသည်။ ထို့နောက် ချင်ယွမ်ဖုန်းသည် လင်တုံးကို ပွေ့ဖက်၍ မြေနက်မြေဆီသို့ တန်းမတ် ပျံသန်းသွားသည်။

ထိုအချိန်တွင် ပိုင်ဖုန်းမှာ ပြန်မရောက်သေးသော်လည်း လင်တုံး၏ ဆွေမျိုးအားလုံးကို သူမ ပြန်ခေါ်လာလိမ့်မည်ဟု ချင်ယွမ်ဖုန်း ယုံကြည်ထားသလို ယန်ရွှမ်တို့မှာလည်း ချင်ယွမ်အင်ပါယာသို့ ဤမျှမြန်မြန် ပြန်မလာနိုင်ကြသေးပေ။

လင်တုံးကို နေရာချပေးပြီးနောက် ချင်ယွမ်ဖုန်းမှာ ချီဖုန်းချောက်ကမ္ဘာအတွက် စိတ်ပူစရာ မလိုတော့ဘဲ ချက်ချင်းပင် နောက်သို့ ပြန်လှည့်လိုက်သည်။

နောက်ဆုံးတွင် စိန်ခေါ်ပွဲနေ့သို့ ရောက်ရှိလာပြီး စိန်ခေါ်ရာမြို့တော် တစ်ခုလုံးမှာ ဆူညံပွက်လောရိုက်သွားသည်။

ချင်ယွမ်ဖုန်းမှာ တိုက်ကြီးပေါ်တွင် အလွန်ထင်ရှားသော လူငယ်ကျွမ်းကျင်သူတစ်ဦးအဖြစ် သတ်မှတ်ခံထားရပြီး ချင်ဝူယန်း၏ လုပ်ဆောင်ချက်များကို တွင်တွင်ကျယ်ကျယ် မပြောစမှတ်ပြုကြသော်လည်း မြူနှင်းဂိုဏ်း၏ တပည့်တစ်ဦးဖြစ်ခြင်းနှင့် ထူးခြားသော ခန္ဓာကိုယ်အင်္ဂါရပ်ကို ပိုင်ဆိုင်ထားခြင်းက သူမကို ပို၍ ဆွဲဆောင်မှုရှိစေသည်။

ထိပ်တန်းကျွမ်းကျင်သူနှစ်ဦး၏ တိုက်ပွဲမှာ တိုက်ကြီးတစ်ခုလုံးကိုပင် စိတ်ဝင်စားမှု တိုးပွားစေခဲ့သည်။

ချင်ယွမ်ဖုန်းသည် သူ၏ အမြင့်ဆုံးအခြေအနေအထိ ပြင်ဆင်ပြီးနောက် ချီဖုန်းချောက်ကမ္ဘာဆီသို့ ခြေလှမ်းတစ်လှမ်းချင်းစီ လျှောက်လှမ်းသွားသည်။

ခြေလှမ်းတိုင်းတွင် သူ၏ အရှိန်အဝါတို့မှာ ပိုမို၍ စုစည်းလာသည်။

ချီဖုန်းချောက်ကမ္ဘာသို့ သူရောက်ရှိချိန်တွင် ချင်ယွမ်ဖုန်း၏ အရှိန်အဝါမှာ ကောင်းကင်သို့ပင် ထိုးတက်သွားတော့မတတ် ဖြစ်နေသည်။

အဝေးမှကြည့်လျှင် ဧရာမလူသားတစ်ဦး ဖြည်းဖြည်းချင်း ချဉ်းကပ်လာသည့်အလား ကြီးမားသော ဖိအားကို ပေးစွမ်းနေသည်။

ချင်ယွမ်ဖုန်း ပြန်လည်မွေးဖွားလာချိန်မှစ၍ ဤဘဝ၏ မှတ်ဉာဏ်အားလုံးကို သူ၏ စိတ်ထဲတွင် သယ်ဆောင်ထားခဲ့သည်။

မေ့မရနိုင်သော အရှက်ရမှု၊ မိခင်ကို ဆုံးရှုံးရသည့် ဝေဒနာနှင့် ဆင်းရဲဒုက္ခအားလုံးတို့မှာ ယနေ့တွင် အဆုံးသတ်တော့မည် ဖြစ်သည်။

ချင်ယွမ်ဖုန်းသည် သူ အဆင်သင့်ဖြစ်နေပြီဟု ယုံကြည်ထားသည်။

"ဒါတွေအားလုံးကို ဒီနေ့မှာပဲ အဆုံးသတ်စေရမယ်"

ချင်ယွမ်ဖုန်း လျှောက်သွားရာ ချီဖုန်းချောက်ကမ္ဘာကို ပိတ်ဆို့ထားသော မည်သည့်သိုင်းပညာရှင်မျှ သူ၏လမ်းကို တားဆီးရဲခြင်း မရှိကြဘဲ အားလုံးပင် လမ်းဖယ်ပေးလိုက်ကြသည်။

ချောက်ကမ္ဘာထဲတွင် တောင်နံရံနှစ်ဖက်မှာ မတ်စောက်ပြီး မြေပြင်နှင့် ကိုးဆယ်ဒီဂရီနီးပါး ရှိနေသည်။ ကျောက်နံရံထိပ်မှ ကြည့်ရှုသူတို့မှာ ထိုနေရာသို့ တက်ရောက်ရန် အလွန်ပင် ကြိုးပမ်းခဲ့ရသည်။

ချင်ယွမ်ဖုန်းမှလွဲ၍ ချင်ဝူယန်းမှာ မရောက်လာသေးပေ။

လေပြင်းများမှာ ချောက်ကမ္ဘာအတွင်း ဟိန်းသံပေးလျက် ထူးဆန်းသော အသံများကို ဖြစ်ပေါ်စေသော်လည်း ချင်ယွမ်ဖုန်းမှာ ထိုအသံများအကြားတွင် ဖြည်းဖြည်းချင်း ထိုင်ချလိုက်သည်။

သူ၏ အံ့ဩဖွယ်ကောင်းသော အရှိန်အဝါမှာလည်း ဖြည်းဖြည်းချင်း စုစည်းနေဆဲပင်။

နောက်ဆုံးတွင် နေ့လယ်ပိုင်းနီးကပ်ချိန်၌ မြူနှင်းဂိုဏ်းမှာ နောက်ကျ၍ ရောက်ရှိလာသည်။

လူဆယ်ဂဏန်းခန့်မှာ ကောင်းကင်ယံမှ ပျံသန်းလာကြပြီး ခမ်းနားထည်ဝါလှသည်။ ချင်ဝူယန်းအပြင် မြူနှင်းဂိုဏ်းမှ လူဦးရေ စုစုပေါင်း ငါးဆယ်ခန့်ကို စေလွှတ်လိုက်သည်

ချင်ဝူယန်း၏ ဆရာ ဖုမိုချိုး၊ မုန့်ချီလော့၏ ဆရာ ကူရှီချိူးနှင့် မုန့်ချီလော့ ကိုယ်တိုင်ပါမကျန် ရောက်ရှိလာကြသဖြင့် မြူနှင်းဂိုဏ်း၏ ရည်ရွယ်ချက်မှာ မည်သို့ရှိသည်ကို တွေးတောစရာ ဖြစ်လာသည်။

သူတို့အပြင် အခြားသော လူခုနစ်ဦးမှာလည်း အသက်ရှူနှုန်းနှင့် အရှိန်အဝါတို့မှာ တည်ငြိမ်နေကြပြီး အစွမ်းထက်သော ကျွမ်းကျင်သူများ ဖြစ်ကြကြောင်း သိသာထင်ရှားနေသည်။