အခန်း ၁၉၉

အခန်း (၁၉၉) - အလိုအလျောက် သိုင်းကွက်ကို အသက်သွင်းခြင်း

ချန်လော့သည် သူ၏ လက်ထဲရှိ ရွှေရောင်အနှစ်သာရဆေးလုံး၏ ဆေးဖော်စပ်နည်းကို ထပ်မံ ကြည့်ရှုလိုက်သည်။ ကောင်းကင်နှင့် မြေကြီး ရတနာ အများစုမှာ ရရှိထားပြီး ဖြစ်ကာ မျဉ်းကြောင်းများဖြင့် မှတ်သားထား၏။

ပါဝင်ပစ္စည်း ဆယ်မျိုးခန့် ကျန်ရှိနေသေးသော်လည်း ကံကောင်းစွာဖြင့် ၎င်းတို့အားလုံးမှာ အခြားနေရာများတွင် ဝယ်ယူနိုင်သော အရာများ ဖြစ်ကြသည်။

ပါဝင်ပစ္စည်း သုံးမျိုးအပြင် ကြယ်ကိုးပွင့်ပန်း၊ နွေဦးနွယ်ပင် နှင့် ကျောက်စိမ်းအိပ်မက် အနှစ်သာရ တို့လည်း ရှိနေသေးသည်။

ထိုပါဝင်ပစ္စည်း သုံးမျိုးအနက် ကြယ်ကိုးပွင့်ပန်း နှင့် နွေဦးနွယ်ပင် တို့မှာ ကောင်းကင်နတ်ဆိုးတောအုပ်၏ ဒေသထွက်ပစ္စည်းများ ဖြစ်ကြသည်။

ကောင်းကင်နတ်ဆိုးတောအုပ်ကလွဲ၍ တခြား ဘယ်နေရာမှာမှ မတွေ့ဖူးချေ။

သို့သော် လွန်ခဲ့သော နှစ် ၇၀၀ က အချက်အလက်များ ဖြစ်သဖြင့် ချန်လော့နှင့် အခြားသူများသည် ယခုအခါ ထိုအရာမျး တည်ရှိနေသေးသလားဆိုသည်ကို သေချာ မသိနိုင်ကြချေ။

သူတို့အဖွဲ့သည် ကြယ်ကိုးပွင့်ပန်းနှင့် နွေဦးနွယ်ပင်ကို ရှာဖွေရင်း ပတ်ဝန်းကျင်ကို သတိထားကာ ရှေ့ဆက်သွားခဲ့ကြသည်။

ကောင်းကင်နတ်ဆိုးတောအုပ်သည် သူ အရင်က သွားခဲ့ဖူးသော နေရာများနှင့် အလွန် ကွာခြားကြောင်း ချန်လော့ တွေ့ရှိခဲ့ရသည်။

‘ငါ အရင်က သွားခဲ့တဲ့ နေရာတွေမှာ ရှဲ့ဖုန်းတောင်ကြားပဲဖြစ်ဖြစ် မြေမီးကျောက်တောပဲဖြစ်ဖြစ် နှစ်တစ်ရာကျော် သက်တမ်းရှိတဲ့ အပင်တွေ လုံးဝမရှိသလောက်ပဲ..’

ဤကောင်းကင်နတ်ဆိုးတောအုပ်တွင် နှစ်တစ်ရာကျော် သက်တမ်းရှိသော သစ်ပင်ကြီးများနှင့် အပင်များကို နေရာတိုင်းလိုလိုတွင် တွေ့မြင်နိုင်သည်။

အချို့သော ပေါင်းပင်များနှင့် တောပန်းများသည် ဝိညာဉ်စွမ်းအင်ကို စုစည်းနိုင်ပြီး ဝိညာဉ်သတ္တဝါများအဖြစ် ပြောင်းလဲနိုင်သည့် အလားအလာပင် ရှိနေကြ၏။

သေချာသည်မှာ ဤပေါင်းပင်များနှင့် တောပန်းများသည် အောင်မြင်စွာ ပြောင်းလဲနိုင်ခဲ့လျှင်တောင် သိပ်ပြီး အသုံးဝင်မည် မဟုတ်သလို ဖော်စပ်ရာတွင်လည်း အသုံးမဝင်ချေ။

အများဆုံးအနေဖြင့် ၎င်းကို ပါးစပ်ထဲထည့်ကာ အစိမ်းစားခြင်း သို့မဟုတ် ဟင်းချိုများတွင် အနည်းငယ် ထည့်ချက်ခြင်းတို့သာ ပြုလုပ်နိုင်သည်။ ၎င်းကို စားသုံးခြင်းဖြင့် ဝိညာဉ်စွမ်းအင် အနည်းငယ် ပြန်လည်ပြည့်ဖြိုးလာနိုင်သည်။ ထိုမျှသာ ဖြစ်သည်။

မည်သို့ပင်ဆိုစေ ဆေးဖက်ဝင်အပင်များ ကဲ့သို့သော အရာများသည် မွေးရာပါ အရည်အသွေး တစ်ခု ရှိနေပြီးသား ဖြစ်သည်။ ရုပ်ဆိုးသော ဘဲကလေးသည် မည်မျှပင် လှပနေစေကာမူ ငန်းတစ်ကောင်၏ အလှကို မယှဉ်နိုင်ပေ။

သေချာသည်မှာ မျိုးရိုးဗီဇ ပြောင်းလဲလာသော မျိုးကွဲများမှာ ချွင်းချက် ဖြစ်သည်။

လမ်းတစ်လျှောက်တွင် ချန်လော့သည် လမ်းဘေးမှ နှစ်တစ်ရာကျော် သက်တမ်းရှိသော ဆေးဖက်ဝင်အပင် များစွာကို ခူးယူစုဆောင်းခဲ့၏။

သူ ခူးယူခဲ့သော ဆေးဖက်ဝင်အပင်များမှာ များသောအားဖြင့် သာမန် ဆေးဖက်ဝင်အပင်များ ဖြစ်ပြီး အနည်းငယ် ဟောင်းနွမ်းနေသည်မှလွဲ၍ အထူးတလည် ထူးခြားမှု မရှိချေ။

နှစ်ကာလများ ကုန်လွန်သွားလျှင်ပင် ဈေးနှုန်းမှာ သိပ်ပြီး တက်လာမည် မဟုတ်ပေ။

မည်သို့ပင်ဆိုစေကာမူ ဆေးဖက်ဝင်အပင် တစ်ခု၏ တန်ဖိုးမှာ တစ်ခါတစ်ရံတွင် ၎င်း၏ သက်တမ်းအပေါ် မူတည်ခြင်း မဟုတ်ဘဲ ဆေးလုံးတစ်လုံး ဖော်စပ်ရန် လိုအပ်သော အခြေအနေများအပေါ်တွင် မူတည်ပေသည်။

ဥပမာအားဖြင့် ချင်ရှန်းပန်း ကို ကြည့်ပါက ဤဆေးဖက်ဝင်အပင်သည် ဆေးဆရာများ အများဆုံး တွေ့ကြုံရသည့် ဆေးဖက်ဝင်အပင်များထဲမှ တစ်ခု ဖြစ်သည်။

၎င်းကို "ပြန်လည်အားဖြည့် ဆေးလုံးငယ်"၊ "နွေဦးရှောင်လွှဲ ဆေးလုံး" နှင့် "စိတ်ငြိမ် ဆေးလုံး" ကဲ့သို့သော ဆေးလုံးများကို ဖော်စပ်ရာတွင် အသုံးပြုနိုင်ပေသည်။

သို့သော် ဆေးလုံး၏ ဆေးဖော်စပ်နည်းအတွက် လိုအပ်ချက်များမှာ ဝါကျတစ်ကြောင်းတည်းဖြင့် ရိုးရှင်းစွာ ဖော်ပြထား၏။

"မတ်လတွင် ပွင့်တော့မည့် အဖူးများကို ရွေးချယ်ပါ... ပိုများလျှင် အဆင်ပြေသော်လည်း နည်း၍ မရပါ..."

ဤအရာက ဘာကိုဆိုလိုသနည်း။

သူတို့ဖော်စပ်မည့် ဆေးလုံးသည် အနည်းဆုံး သုံးလခန့် ကျင့်ကြံမှုရှိသည့် ချင်ရှန်းပန်းကို လိုအပ်ကြောင်း ဆိုလိုသည်။ အချိန်ပိုကြာလျှင် အဆင်ပြေသော်လည်း အချိန်တိုလျှင် အဆင်မပြေပေ။

ဤအဆင့်နိမ့် ဆေးလုံးများကို ဖော်စပ်ခြင်းမှလွဲ၍ ချင်ရှန်းပန်းသည် လက်တွေ့တွင် အသုံးမဝင်ချေ။

ထို့ကြောင့် သင်သည် နှစ်တစ်သောင်း သက်တမ်းရှိသော ချင်ရှန်းပန်းကို ရရှိလျှင်ပင် ၎င်း၏ ဈေးနှုန်းမှာ အတူတူပင်ဖြစ်ပြီး သာမန် ချင်ရှန်းပန်းထက် အများဆုံး စျေးအနည်းငယ်သာ ပိုကြီးမည် ဖြစ်သည်။

သေချာသည်မှာ အကယ်၍ သင်သည် စုဆောင်းရသည်ကို နှစ်သက်သော ရောင်းချသူတစ်ဦးနှင့် တွေ့ဆုံပါက ဈေးနှုန်းမှာ သုံးဆမှ ငါးဆအထိ သို့မဟုတ် ဆယ်ဆအထိပင် တက်သွားနိုင်သော်လည်း ဤသို့ဖြစ်လေ့ဖြစ်ထ မရှိပေ။

အခြားအခြေအနေတစ်ခုမှာ ဆေးဖက်ဝင်အပင်တစ်မျိုး၏ အာနိသင်သည် နှစ်အလိုက် ကွဲပြားပြီး ဈေးနှုန်းမှာလည်း အလွန် ကွာခြားသွားခြင်း ဖြစ်သည်။

ဥပမာအားဖြင့် တစ်နှစ်သက်တမ်းရှိသော ဆည်းဆာကြာပန်းကို အဆင့် ၁ ခန္ဓာကိုယ်သန်မာစေသော ဆေးလုံး ဖော်စပ်ရာတွင် အသုံးပြုနိုင်ပြီး ၊ နှစ်တစ်ရာ သက်တမ်းရှိသော ဆည်းဆာကြာပန်းကို အဆင့် ၃ ပြန်လည်အားဖြည့် ဆေးလုံး ဖော်စပ်ရာတွင် အသုံးပြုနိုင်သည်။

ထို့အပြင် နှစ်တစ်ထောင် သက်တမ်းရှိသော ဆည်းဆာကြာပန်းကို အဆင့် ၅ ဆေးလုံး "စိတ်ငြိမ်ဆေးလုံး" ဖော်စပ်ရာတွင်ပင် အသုံးပြုနိုင်ပေသည်။

ဈေးနှုန်းမှာ အဆင့်ပေါ်မူတည်၍ သိသိသာသာ ကွာခြားသွားမည် ဖြစ်သည်။

ချန်လော့သည် သူ၏ ကံကို စမ်းသပ်လိုသော မျှော်လင့်ချက်ဖြင့် လမ်းတစ်လျှောက်တွင် ဤဆေးဖက်ဝင်အပင်များကို စုဆောင်းခဲ့ခြင်း ဖြစ်သည်။

အကယ်၍ သူသာ ဆည်းဆာကြာပန်း ကဲ့သို့သော ဆေးဖက်ဝင်အပင်မျိုးနှင့် ကြုံတွေ့ရပါက ၎င်းကို ပြန်လည်ရောင်းချခြင်းဖြင့် သူသည် ကြီးကျယ်သော စည်းစိမ်ကို ရရှိနိုင်မည် ဖြစ်သည်။

ဘေးတွင် ရပ်နေသော ချိုးယွီနင်သည်လည်း ချန်လော့၏ အပြုအမူကို သတိပြုမိပြီး သူ့အပေါ် ပို၍ လေးစားလာမိသည်။

သူ၏အမြင်တွင် ချန်လော့သည် အဆိုးရွားဆုံး ပါရမီမှ လက်ရှိအဆင့်သို့ ရောက်ရှိလာသည်အထိ တစ်ဆင့်ချင်း ကျင့်ကြံနိုင်ခဲ့ခြင်းမှာ သူ၏ လုံ့လဝီရိယနှင့် ချွေတာမှုတို့ကြောင့် ဖြစ်ပုံရပေသည်။

ထို့နောက် အဖွဲ့သည် မြောက်ဘက်သို့ မိနစ်အနည်းငယ် ထပ်မံ လျှောက်သွားခဲ့ကြ၏။ ချန်လော့သည် လမ်းတစ်လျှောက်တွင် ဆေးဖက်ဝင်အပင်များကို ခူးယူကာ ပျော်ရွှင်စွာ အချိန်ဖြုန်းနေခဲ့သည်။

ထိုအချိန်တွင် ချိုးယွီနင်သည် ရုတ်တရက် ရပ်တန့်သွားပြီး ပိုင်ယီယီနှင့် လျူချီတို့လည်း ရပ်တန့်သွားကြသည်။

ချန်လော့လည်း ချက်ချင်း တစ်ခုခုကို ခံစားလိုက်ရပြီး သူ၏ ခန္ဓာကိုယ်မှာ တောင့်တင်းသွားကာ ဖြည်းညင်းစွာ မော့ကြည့်လိုက်မိသည်။

မလှမ်းမကမ်းတွင် သုံးမီတာနီးပါး မြင့်မားသော ဧရာမ သားရဲကြီး တစ်ကောင်က သူတို့၏ လမ်းကို ပိတ်ဆို့နေ၏။

၎င်း၏ အမွှေးအမျှင်များသည် ဖြူဖွေးနေပြီး၊ ကျောဘက်တွင် အတောင်ပံတစ်စုံ ပါရှိသော ခြင်္သေ့မိစ္ဆာ တစ်ကောင်ဖြစ်သည်။

အဖြူရောင်အတောင်ပံပါသော ခြင်္သေ့မိစ္ဆာ၏ အသွင်အပြင်ကို မြင်တွေ့လိုက်ရချိန်တွင် ချန်လော့သည် ၎င်း၏ ကျင့်ကြံမှုအဆင့်ကို ချက်ချင်း ခံစားမိလိုက်သည်။

ရိုးရှင်းသော ဝါကျတစ်ကြောင်းဖြင့် အကျဉ်းချုံးပြောရမည်ဆိုပါက၊

"သူ့ရဲ့ စွမ်းအားက မှန်းဆလို့မရနိုင်လောက်အောင် နက်ရှိုင်းတယ်... ဒါပေမဲ့ သူ့ဆီကနေ ထွက်ပေါ်လာတဲ့ ဖိအားက လောချင်းယွီ အရင်တုန်းက ငါ့အပေါ် သက်ရောက်ခဲ့တဲ့ ဖိအားထက် အားနည်းပုံမရဘူး... သူက အနည်းဆုံး နတ်ဝိညာဉ်အဆင့်ပဲ..."

နတ်ဝိညာဉ်အဆင့် သားရဲတစ်ကောင် ထွက်ပေါ်လာသဖြင့် ချန်လော့၏ ထွက်ပြေးလိုသော ဗီဇမှာ ချက်ချင်း အသက်ဝင်သွားတော့သည်။

ဒုတိယအကြိမ် စဉ်းစားခြင်းပင် မရှိဘဲ သူသည် လှည့်ကာ ထွက်ပြေးလေတော့သည်။

စက္ကန့်အနည်းငယ် ပြေးပြီးနောက် ချန်လော့သည် တစ်ခုခုကို ရုတ်တရက် သတိရသွားပြီး လှည့်ကြည့်လိုက်ရာ ၊ ချိုးယွီနင်နှင့် အခြားသူများ ပါမလာကြောင်း တွေ့လိုက်ရသည်။

"သေစမ်း... ငါ အခု ဖြောင့်မတ်တာအို ဘက်မှာ ရှိနေတာကို မေ့သွားတယ်..."

ဤအကြောင်းကို တွေးမိသောအခါ ချန်လော့၏ မျက်နှာပေါ်တွင် ရှက်ရွံ့သော အမူအရာ ပေါ်လာတော့သည်။

သို့သော် ချန်လော့သည် တည်ငြိမ်အောင် အတတ်နိုင်ဆုံး ကြိုးစားကာ မူလနေရာသို့ ပြန်လျှောက်လာခဲ့သည်။

ထို့နောက် တည်ငြိမ်စွာဖြင့် ချိုးယွီနင်ကို ကြည့်ကာ မေးမြန်းလိုက်သည်။

"ဒီကောင်နဲ့ ထိပ်တိုက် ရင်ဆိုင်ကြမလား..."

ချန်လော့၏ မျက်နှာအမူအရာမှာ သူ တစ်ခါမှ ထွက်မပြေးခဲ့ဖူးသည့်အလား တည်ငြိမ်နေသည်။

ချိုးယွီနင်လည်း သတိပြန်ဝင်လာ၏။

ချန်လော့ ရုတ်တရက် ထွက်ပြေးသွားခြင်းအတွက် အနည်းငယ် အံ့အားသင့်သွားသော်လည်း သူ ဘာမှ ထပ်မပြောခဲ့ချေ။

ပါရမီအနိမ့်ဆုံးအဆင့်ဖြင့် ကျင့်ကြံလာခဲ့ရသည့် ကျင့်ကြံသူတစ်ယောက်အဖို့ မိစ္ဆာတာအို၏ ရက်စက်ကြမ်းတမ်းသော လောကကြီးတွင် အသက်ရှင်ရပ်တည်ရန်မှာ အလွန်ပင် ရုန်းကန်ကြိုးပမ်းရသည်။

ခြေလှမ်းတိုင်းကို သတိကြီးစွာဖြင့် လျှောက်လှမ်းနေရသူအတွက် အန္တရာယ်နှင့် ကြုံတွေ့သည့်အခါ ပထမဆုံးအနေဖြင့် ထွက်ပြေးလွတ်မြောက်ရန် ကြိုးစားခြင်းသည် သဘာဝကျပေသည်။

ထို့အပြင် ချန်လော့တစ်ယောက် ပြန်ရောက်လာခဲ့ပြီ မဟုတ်လော။