အခန်း ၈၁

အခန်း (၈၁) သိုင်းတာအိုအစစ်အမှန်ဝိညာဉ်ကို နိုးထစေခြင်းနှင့် နိဗ္ဗာနနယ်ပယ်သို့ ဝင်ရောက်ခြင်း

မကြာမီမှာပင် သူဟာ သွေးပင်လယ်နှင့် အလောင်းပုံတောင်တန်း၏ အမြင့်ဆုံးနေရာသို့ ရောက်ရှိသွားခဲ့သည်။

ဤနေရာတွင် လူတစ်ဦးက အရိုးဖြူများဖြင့် ပြုလုပ်ထားသော ပလ္လင်ပေါ်တွင် ထိုင်နေသည်။

လက်တစ်ဖက်ကို ပလ္လင်ပေါ်တွင် တင်ထားပြီး ကျန်လက်တစ်ဖက်ကမူ ဓားရှည်တစ်လက်ကို ဆုပ်ကိုင်ထားကာ ရှုချွမ်းကို ဘေးတစ်ဖက်မှ စိုက်ကြည့်နေသည်။

ရှုချွမ်း အနီးကပ် ကြည့်လိုက်သောအခါ သူ့ရှေ့ကလူသည် သူနှင့် တစ်ထပ်တည်းကျနေရုံသာမက လက်ထဲက ဓားရှည်မှာလည်း နတ်ဘုရားသတ်ဓား ဖြစ်နေသည်ကို တွေ့လိုက်ရသည်။

တစ်ခုတည်းသော ကွာခြားချက်မှာ ဤလူသည် ထူထပ်လှသော သတ်ဖြတ်လိုစိတ်များကို ထုတ်လွှတ်နေပြီး သူ၏ မျက်ခုံးများကြားတွင် မိစ္ဆာချီများ စွဲထင်နေခြင်းပင် ဖြစ်သည်။

"မင်းက ဘယ်သူလဲ"

ရှုချွမ်းက မျက်မှောင်ကြုတ်ကာ သူ့ရှေ့ကလူကို မေးလိုက်သည်။

"ငါက မင်းပဲလေ"

ပလ္လင်ပေါ်က ရှုချွမ်းက စိတ်ဝင်စားစရာကောင်းသောအရာကို ရှာဖွေတွေ့ရှိသွားသကဲ့သို့ ပြုံး၍ ပြောလိုက်သည်။

"သိုင်းတာအို အစစ်အမှန်ဝိညာဉ်ကို နိုးထစေပြီးနောက် ဖြစ်လာမယ့် မင်းရဲ့ပုံစံပေါ့၊ ငါက မိစ္ဆာအရှင်သခင် ဖြစ်လာတာ၊ မင်းမြင်လား... အောက်က အလောင်းတွေအားလုံးကို ငါကိုယ်တိုင် သတ်ခဲ့တာ"

ဒါကို ကြားရသောအခါ ရှုချွမ်း မကြာခင်မှာပင် သူ ပြုံးလိုက်သည်။

သူ့ရှေ့က ဤလူက ဘယ်သူလဲဆိုတာ သူ ခပ်ရေးရေး သိလိုက်ပြီ ဖြစ်သည်။

နှလုံးသားနတ်ဆိုး တစ်ကောင်...

သိုင်းတာအို နှလုံးသားနတ်ဆိုး

"သူတို့က သေသင့်လို့ သတ်ပစ်လိုက်တာပဲ၊ ဘာမိစ္ဆာအရှင်သခင်လဲ၊ ဒါက သန်မာသူက အားနည်းသူကို ဝါးမြိုတဲ့ လောကနိယာမပဲ၊ တခြားသူတွေက ငါ့ကို သတ်ချင်နေတာကို ငါက သူတို့ကို ပြန်မသတ်ရဘူးလား"

"မင်းရဲ့ အရည်အချင်းက ညံ့ဖျင်းနေရင် သေရမှာပဲ၊ ဒီလို အဓိပ္ပာယ်မရှိတာတွေ လာပြောနေဖို့ လိုလို့လား"

ရှုချွမ်းက တွန့်ဆုတ်ခြင်းမရှိဘဲ အသံကျယ်ကျယ်ဖြင့်ပြောလိုက်သည်။

"သိုင်းတာအို အစစ်အမှန်ဝိညာဉ်ကို နိုးထစေပြီးရင် မင်းဟာ ငါ့လိုပဲ လူပေါင်းထောင်သောင်းများစွာရဲ့ အပြစ်တင်တာနဲ့ လိုက်လံသတ်ဖြတ်တာကို ခံရလိမ့်မယ်၊ မင်း မကြောက်ဘူးလား"

ပလ္လင်ပေါ်က ရှုချွမ်းက တိုးတိုးလေး မေးလိုက်ပြန်သည်။

သူ့အသံတွင် ကြီးမားသော စွမ်းအားတစ်ခု ပါဝင်နေသဖြင့် ကြားလိုက်ရသူတိုင်း မသိစိတ်က သူတို့၏ စိတ်ရင်းအမှန်ဆုံး အဖြေကို ပေးမိသွားသလိုပါပဲ။

"ငါ တို့ သိုင်းပညာရှင် တွေဆိုတာ ငါတို့နှလုံးသားအတိုင်း လျှောက်လှမ်းဖို့ပဲ လောကအနှံ့ ခရီးနှင်ကြတာ၊ ဘာကို ကြောက်နေရမှာလဲ"

ရှုချွမ်းက ခေါင်းခါကာ အသံကျယ်ကျယ်ဖြင့် ပြန်ဖြေလိုက်သည်။

သိုင်းတာအိုက နှလုံးသားကို မေးမြန်းခြင်းဖြစ်ရာ မိမိ၏ အမှန်ကန်ဆုံး အတွေးကိုသာ ပြောချရမည် ဖြစ်သည်။

"မင်းရဲ့ ဂိုဏ်းရှင်သန်မှုကို တစ်ယောက်ယောက်က ခြိမ်းခြောက်လာရင်ကော ဘယ်လိုလုပ်မလဲ"

သူက ထပ်မံ မေးပြန်သည်။

"ဒါဆိုရင်လည်း သတ်ရုံပေါ့၊ သူတို့ နောက်ထပ် မခြိမ်းခြောက်ရဲတော့တဲ့အထိ သတ်ပစ်မယ်"

ရှုချွမ်းက တည်ကြည်စွာ ပြောလိုက်သည်။

"တစ်နေ့မှာ တစ်ကမ္ဘာလုံးက မင်းကို ရန်သူလို ဆန့်ကျင်လာရင်ကော ဘယ်လိုလုပ်မလဲ"

တတိယမြောက် မေးခွန်းကို မေးမြန်းလာခဲ့ပြီ ဖြစ်သည်။

ရှုချွမ်း အတန်ငယ် အံ့အားသင့်သွားသည်။

တစ်ကမ္ဘာလုံးက သူ့ကို ဆန့်ကျင်ကြမည်။

ဒါက သူတစ်ခါမှ မစဉ်းစားဖူးသည့် အရာ ဖြစ်သည်။

သူ့နားထဲတွင် ထိုအသံများ ပဲ့တင်ထပ်နေပြီး သူ့ကို အကြိမ်ကြိမ် မေးခွန်းထုတ်နေခဲ့သည်။

ရှုချွမ်းလည်း အတွေးထဲ နစ်မြုပ်သွားတော့သည်။

သူဟာ ကမ္ဘာမြေမှ ကူးပြောင်းလာခဲ့ပြီး ဒီနေရာဟာ သိုင်းတာအို ထွန်းကားသည့် ကမ္ဘာတစ်ခုဖြစ်ကြောင်းသိရှိခဲ့ပြီး သူ့မိသားစုရဲ့စည်းစိမ်ဥစ္စာအားလုံးကို သုံးစွဲကာ ထိုက်ယိမြင့်မြတ်နယ်‌မြေသို့ ဝင်ရောက်ခဲ့သည်။

ပြန်လည်မွေးဖွားလာတဲ့အခါ သူဟာ နောက်တစ်ကြိမ် အသုံးမကျသူအဖြစ် မနေလိုတော့ပေ။

သို့သော်လည်း တစ်စုံတစ်ရာ မသိသော အကြောင်းပြချက်ကြောင့် သူ၏ အရည်အချင်းသည် အမှိုက်များကြားတွင် အမှိုက်သရိုက်များကဲ့သို့ ဖြစ်နေခဲ့သည်။

ယခုအချိန်ရောက်မှသာ သူနောက်ဆုံးတော့ နားလည်သွားခဲ့တော့သည်။

အကယ်၍ စနစ်၏ အကူအညီသာမရှိလျှင် သူက ယခုအချိန်၌ မြေကြီးထဲက အရိုးပြာပုံတစ်ခု ဖြစ်နေလောက်ပြီ ဖြစ်သည်။

စနစ်ကြောင့်သာ ယခုကဲ့သို့ နတ်ဘုရားစွမ်းအားနယ်ပယ် ကျင့်ကြံခြင်းအဆင့်ကိုရရှိပြီး ထိုက်ယိ မြင့်မြတ်နယ်‌မြေ၏ တပည့်တစ်ဦး ဖြစ်လာနိုင်ခဲ့ခြင်းပင်။

သူကို အစကတည်းက ဤလောကကြီး၏ ငြင်းပယ်ခြင်းကို ခံထားရပြီးသား ဖြစ်သည်။

ဒါဆိုရင် တစ်ကမ္ဘာလုံးက သူ့ကို ဆန့်ကျင်မှာကို ဘာကြောက်စရာရှိလို့လဲ။

မသိစိတ်အတွင်းမှာပင် ရှုချွမ်း၏ စိတ်ထဲ၌ အဖြေက ထွက်ပေါ်လာခဲ့ပြီ ဖြစ်သည်။

သူ အသက်ကို ပြင်းပြင်းရှူလိုက်သည်။

သူ့မျက်လုံးတွေက တဖြည်းဖြည်း တောက်ပလာပြီး အရင်ကလို စိတ်ရှုပ်ထွေးမှု မရှိတော့‌ပေ။

သူရဲ့ အော်ရာ တစ်ခုလုံးသည် အမြင့်ဆုံးအဆင့်သို့ ပြန်လည်ရောက်ရှိသွားပြီး မြင့်မားသောယုံကြည်ချက်၊ ပြိုင်ဘက်ကင်းသော မောက်မာမှုတို့နှင့်အတူ သူက ပြောလိုက်သည်။

"တစ်ကမ္ဘာလုံးက ငါ့ကို ဆန့်ကျင်ရင်လည်း... ကောင်းကင်ကြီး ပြောင်းပြန်လှန်ပြီး ကမ္ဘာကြီး ပျက်စီးသွားတဲ့အထိ ငါ သတ်ပစ်မယ်၊ တစ်လောကလုံး အသစ်ပြန်ဖြစ်သွားတဲ့အထိ သတ်ပစ်မယ်"

"ဒါမှမရသေးရင်လည်း ဒီလောကကြီးကို ငါ ဖျက်ဆီးပစ်ပြီး အရာအားလုံးကို အစကနေ ပြန်စပစ်မယ်"

ဘုန်း

ရှုချွမ်း ပြောပြီးသွားသည့် အခိုက်အတန့်တွင်

သူက ပေါ့ပါးသွားသကဲ့သို့ ခံစားလိုက်ရပြီး ပုခုံးပေါ်က ပိနေသော အလေးချိန်ကြီး လွတ်ကျသွားသလို ခံစားလိုက်ရသည်။

ခဏအတွင်းမှာပဲ သူ အသစ်တစ်ဖန် မွေးဖွားသွားခဲ့သည်။

"ဟားဟား၊ ကောင်းတယ်၊ အရမ်းကောင်းတယ်"

ပလ္လင်ပေါ်က ရှုချွမ်းက ဒီစကားများကို ကြားရပြီးနောက် အားရပါးရ ရယ်မောလိုက်ပြီး ရှုချွမ် ရှေ့တွင် ပျောက်ကွယ်သွားတော့သည်။

ထို့နောက်တွင် အလောင်းပုံတောင်တန်းနှင့် သွေးပင်လယ် မြင်ကွင်းကြီးသည် မှန်တစ်ချပ်ကဲ့သို့ အပိုင်းပိုင်းကွဲအက်သွားသည်။

ပတ်ဝန်းကျင်မြင်ကွင်းက ပြောင်းလဲသွားပြီး ရှုချွမ်း၏ အသိစိတ်သည် သူ၏ အသိစိတ်ပင်လယ်ထဲသို့ ပြန်လည်ရောက်ရှိသွားသည်။

မရေမတွက်နိုင်သော တာအိုနိယာမများသည် ရှုချွမ်း၏ တုန်လှုပ်မှုမရှိသော အဖြေများနှင့်အတူ ဓားဝိညာဉ်မျိုးစေ့ထဲသို့ ရူးသွပ်စွာ တိုးဝင်သွားကြတော့သည်။

ခရက်

အသံတစ်ခုနှင့်အတူ ဓားဝိညာဉ်မျိုးစေ့သည် လုံးဝ အက်ကွဲပွင့်ထွက်သွားသည်။

ကောင်းကင်တိုင်အောင် ထိုးတက်သွားသော သတ်ဖြတ်ခြင်းအရှိန်အဝါတစ်ခု ပေါ်ထွက်လာပြီးနောက် ၎င်းအထဲမှ ရှုချွမ်းနှင့် ဆင်တူသော လူပုံသဏ္ဌာန်အသေးလေးတစ်ခု လမ်းလျှောက် ထွက်လာခဲ့သည်။

ရှုချွမ်း နားလည်လိုက်သည်။

ဒါက သိုင်းပညာရှင် တိုင်း အပတ်တကုတ် ရှာဖွေကြသည့် သိုင်းတာအို အစစ်အမှန်ဝိညာဉ်ပင်။

သူ့ရဲ့ ထူးခြားတဲ့ 'သတ်ဖြတ်ခြင်းဓားဝိညာဉ်'။

ဒီနေရာတွင် ရှုချွမ်းက သူ၏ သိုင်းတာအို အစစ်အမှန်ဝိညာဉ်ကို လုံးဝ နိုးထစေခဲ့ပြီ ဖြစ်သည်။

နိုးထပြီးနောက်တွင် ရှုချွမ်း ရှင်းလင်းစွာ ခံစားလိုက်ရသည်။

သူ့ရဲ့ ခန္ဓာကိုယ်က ကမ္ဘာကို တုန်လှုပ်စေနိုင်တဲ့ ပြောင်းလဲမှုတွေကို တွေ့ကြုံလိုက်ရသည်။

သူ၏ အလွန်သန်မာလှပြီးသားဖြစ်သော '‌ နေသူတော်စင် ခန္ဓာ' သည် စတင် ဆင့်ကဲပြောင်းလဲလာပြီး ပိုမိုသန်မာလာခဲ့သည်။

မသိစိတ်အတွင်းမှာပင် ရှုချွမ်း၏ ခန္ဓာကိုယ်ထဲရှိ မဟာယန်ကျင့်စဉ် သည် အလိုအလျောက် စတင်လည်ပတ်လာပြီး ပြင်ပက မူလချီများကို စုပ်ယူကာ သူ၏ ခွန်အားကို မြှင့်တင်ပေးနေသည်။

ဤစမ်းသပ်မှု နေရာလွတ် အတွင်း၌ ဘာမှမရှိသော်လည်း ကောင်းကင်နှင့်မြေကြီး မူလချီများမူ လျော့နည်းခြင်းမရှိပေ။

ဤစမ်းသပ်ကွင်းသည် တစ်လောကလုံးတွင် မူလချီ အသိပ်သည်းဆုံးနေရာဟုပင် ပြောနိုင်သည်။

ထို့ကြောင့် မဟာယန်ကျင့်စဉ်သည် ဤနေရာ၌ ကောင်းကင်နှင့်မြေကြီး မူလချီများကို အလုံအလောက် စုပ်ယူနိုင်သည်။

အတိုင်းအဆမဲ့သော မူလချီများသည် ရှုချွမ်း၏ ခန္ဓာကိုယ်ထဲသို့ စုပ်ယူခြင်း ခံလိုက်ရသည်။

သူ၏ ကျင့်ကြံခြင်းအဆင့်သည် စတင်၍ ဒုံးပျံကဲ့သို့ ထိုးတက်သွားပြီး သူ၏ ခန္ဓာကိုယ်သည်လည်း အဆက်မပြတ် သန်မာလာခဲ့သည်။

နတ်ဘုရားစွမ်းအားနယ်ပယ် အဆင့်၆

နတ်ဘုရားစွမ်းအားနယ်ပယ် အဆင့်၇

နတ်ဘုရားစွမ်းအားနယ်ပယ် အဆင့်၈

...

နတ်ဘုရားစွမ်းအားနယ်ပယ် အဆင့်၉

နောက်ဆုံးတွင် ရှုချွမ်း၏ ကျင့်ကြံခြင်းအဆင့်သည် နတ်ဘုရားစွမ်းအားနယ်ပယ် အဆင့်၉ အထွတ်အထိပ်သို့ ရောက်ရှိသွားသောအခါ သူ၏ ခန္ဓာကိုယ်ထဲက မူလချီများမှာ လုံးဝ ပေါက်ကွဲထွက်သွားပြီး တောက်ပလှသော နေ တစ်စင်းအသွင် သူ့ခန္ဓာကိုယ်မှ ရုတ်တရက်ထွက်ပေါ်လာသော တောက်ပသောနေ တစ်လုံး ဖွဲ့စည်းလိုက်ပြီး ၎င်း၏တောက်ပသောအလင်းရောင်သည် စမ်းသပ်နယ်မြေ တစ်ခုလုံးကို လင်းလက်တောက်ပစေပြီး အလင်းတိုင်၏အလင်းရောင်ကို ဖုံးလွှမ်းသွားသည်။

ဘုန်း

ကြီးကျယ်ခမ်းနားတဲ့ နေမင်းက ထွက်ပေါ်လာခဲ့သည်။

အဆုံးမဲ့သော အော်ရာ များနှင့် ကြီးမားလှသော မူလချီများ သယ်ဆောင်လာသည်။

စမ်းသပ်မှု ဧရိယာတစ်ခုလုံး ထိုအော်ရာ ကြောင့် တုန်ခါသွားရသည်။

ဤကြောက်စရာကောင်းသော ဖြစ်စဉ်ကြီးကြောင့် ရှိနေသမျှ သိုင်းပညာရှင် အားလုံး အလန့်တကြား ဖြစ်သွားကြရသည်။

သူတို့အားလုံး မျက်လုံးများ ရွှေ့ကာ ကြည့်လိုက်ကြပြီး ရှုချွမ်းဆီမှ ထွက်ပေါ်လာသော အားကောင်းပြီး ခန့်ညားလှသည့် ဖိအားများကို ခံစားရကာ လုံးဝ ဆွံ့အအံ့ဩသွားကြတော့သည်။

"ဒါ... ဂျူနီယာညီလေးရှု ဘာဖြစ်သွားတာလဲ"

ချွေ့ကျန်းသည် ပါးစပ်အဟောင်းသားဖြစ်ရင်း ရှုချွမ်းကို အံ့ဩတကြီး ကြည့်နေမိသည်။ ရှုချွမ်းက ဘယ်လိုလုပ်ပြီး ခဏလေးအတွင်းမှာ ဒီလောက်တောင် သန်မာသွားရတာလဲ။

အခြားသိုင်းပညာရှင်များမှာမူ ပို၍ပင် ထိတ်လန့်နေကြသည်။

"ဒါ ဘာတွေဖြစ်နေတာလဲ"

"သူက ဘယ်သူမို့လို့ ဒီလောက် ကြောက်စရာကောင်းတဲ့ ဖြစ်စဉ်ကြီးကို ဖြစ်ပေါ်စေနိုင်ရတာလဲ"

"ဒီအော်ရာ က အရမ်းပြင်းထန်လွန်းတယ်၊ ငါ အသက်ရှူရတာတောင် ခက်လာပြီ"

"တကယ့်ကို ကြောက်စရာကောင်းလိုက်တာ"

သိုင်းပညာရှင်များ အချင်းချင်း ဆွေးနွေးနေကြစဉ်အတွင်း

ရှုချွမ်း၏ အော်ရာ သည် နောက်တစ်ကြိမ် ထပ်မံ ထိုးတက်သွားပြန်သည်။

မဟာနေမင်း၏ အလင်းရောင်အောက်တွင် သူသည် နိဗ္ဗာနနယ်ပယ်သို့ တစ်ဟုန်ထိုး ဖြတ်ကျော်ဝင်ရောက်သွားခဲ့ပြီ ဖြစ်သည်။

သူ၏ နေသူ‌တော်စင်ခန္ဓာကိုယ်သည်လည်း ပိုမိုကြီးမားသော ဆင့်ကဲပြောင်းလဲမှုကို ကြုံတွေ့လိုက်ရသည်။

ပိုမိုသန်မာလာပြီး ပိုမိုဆန်းကြယ်လာခဲ့သည်။

တစ်ချိန်တည်းမှာပဲ နိဗ္ဗာနနယ်ပယ်သို့ ခြေချပြီးနောက် သူဟာ ကောင်းကင်အဆင့် နတ်ဘုရားစွမ်းရည်တစ်ခုဖြစ်သည့် 'မူလအစကို ထိုးထွင်းသိမြင်ခြင်း' ကိုပါ ထပ်မံ နိုးထစေခဲ့သည်။

ဘယ်ဟာမဆို ထိုးထွင်းမြင်နိုင်ပြီး အရာအားလုံး၏ မူလအရင်းအမြစ်ကို ပိုင်းခြားစိတ်ဖြာနိုင်သည်။

သူ၏ မျက်လုံးများမှ လွတ်ကင်းနိုင်ခြင်း မရှိတော့ပေ။

"ဒီတစ်ကြိမ် ကျင့်ကြံမှုက ကောင်းကင်အဆင့်သိုင်းပညာဖြစ်တဲ့ နတ်ဘုရားသတ်ဓားသိုင်းကို တတ်မြောက်စေရုံတင်မကဘူး၊ ငါ့ရဲ့ သတ်ဖြတ်ခြင်းဓားဝိညာဉ်ကိုလည်း လုံးဝ နိုးထစေခဲ့တယ်၊ ဒါ့အပြင် နိဗ္ဗာနနယ်ပယ်ကိုပါ ဖြတ်ကျော်နိုင်ခဲ့ပြီ"

"ဒီရှေးဟောင်းနန်းတော်ကမ္ဘာထဲမှာတော့ ငါ အေးဆေး လွတ်လွတ်လပ်လပ် သွားလာနိုင်ပြီ"

"အခုတော့..."

"ငါဟာ အစွမ်းထက် ကျင့်ကြံသူတစ်ယောက်ဖြစ်ဖို့ ပထမဆုံး ခြေလှမ်းကို လှမ်းလိုက်နိုင်ပြီ"

ရှုချွမ်းသည် စိတ်ထဲတွင် တွေးလိုက်ပြီး မျက်နှာတွင် အပြုံးခပ်ပါးပါးတစ်ခု ပေါ်လာသည်။

ထို့နောက် သူ့မျက်လုံးများကို ရုတ်တရက် ဖွင့်လိုက်ရာ နတ်ဘုရားအလင်းတန်းနှစ်ခု ဖြာထွက်သွားပြီး ကောင်းကင်ယံထဲသို့ တည့်တည့် ထိုးတက်သွားတော့သည်။

"စီနီယာအစ်ကိုရှု... ရှင့် ကျင့်ကြံခြင်းအဆင့် ဖြတ်ကျော်သွားတာလား၊ ဂုဏ်ယူပါတယ်နော်"

ရှုချွမ်းကို ပထမဆုံး လာရောက်ဂုဏ်ပြုသူမှာ စုမြောင်ရင်ပင် ဖြစ်သည်။

ရှုချွမ်းထံမှ ဖြစ်စဉ်ကြီး ပေါက်ကွဲထွက်လာကတည်းက သူမသည် သူ့အနားသို့ ရောက်ရှိလာခဲ့ပြီး တစ်ချိန်လုံး စောင့်ရှောက်ပေးနေခဲ့ခြင်း ဖြစ်သည်။

"အင်း"

ရှုချွမ်းက စုမြောင်ရင်၏ နုနယ်လှပသော မျက်နှာလေးကို စိုက်ကြည့်ကာ တိုးလှသော အသံဖြင့် ပြောလိုက်သည်။

"ငါ့ကို စောင့်ရှောက်ပေးလို့ ကျေးဇူးတင်ပါတယ်"

"ဒါက ကျွန်မ လုပ်ရမယ့် တာဝန်ပါပဲ"

စုမြောင်ရင်က ချိုသာစွာ ပြုံးပြလိုက်သည်။

ရှုချွမ်းလည်း နောက်ထပ် စကားမဆိုတော့ဘဲ မိစ္ဆာများနှင့် မိစ္ဆာ သားရဲများ အစောပိုင်းက ပေါ်လာခဲ့သည့် လမ်းကြောင်းဘက်သို့ မျက်လုံးရွှေ့ကာ ကြည့်လိုက်သည်။

သူ့ခန့်မှန်းချက်အရ တတိယအချီ စမ်းသပ်မှုက မကြာမီ စတင်တော့မည် ဖြစ်သည်။

အမှတ်တွေ၏ အကျိုးကျေးဇူးကို တစ်ကြိမ်ခံစားဖူးတဲ့သိုင်းပညာရှင် များဟာ နောက်တစ်ချီ စမ်းသပ်မှုတွင် အမှတ်များများရရန် သေချာပေါက် အစွမ်းကုန် ကြိုးစားကြပေလိမ့်မည်။

သူလည်း အတူတူပင်၊ ပိုမိုကောင်းမွန်သော ဆုလာဘ်များနှင့် လဲလှယ်နိုင်ရန်အတွက် အမှတ်များ ပိုမိုလိုအပ်နေသေးသည်။