အခန်း ၂၉၅

အပိုင်း ၂၉၅

"......"

တင်ဟမ်သည် ဆွံ့အသွားခဲ့ရသည်၊ ဒါက ကြီးမားသော ဝန်ထုပ်ဝန်ပိုးတစ်ခု ဖြစ်သည်။

ရုတ်တရက်ဆိုသလို ၎င်းက သူ့အပေါ်သို့ ကျရောက်လာခဲ့သည်။ သူ၏ သေးငယ်သော ပုခုံးနှစ်ဖက်က တောင့်ခံနိုင်ပါ့မလား။

ဒါပေမဲ့ တစ်ဖက်က ပြန်ကြည့်ရင်လည်း သူက စိန်ခေါ်မှုတွေကို နှစ်သက်တဲ့ လူတစ်ယောက် ဖြစ်သည်။ အကယ်၍ သူက စိန်ခေါ်မှုတွေကို မနှစ်သက်ဘူးဆိုရင် ဘာစီအသင်းမှာပဲ ဆက်နေခဲ့မှာပေါ့။

ထိုအသင်းသည် ယခုအခါ အောင်မြင်နေသော အသင်းတစ်သင်းဖြစ်ပြီး ဘာစီတွင် အင်အားအကြီးဆုံး အသင်းများထဲမှ တစ်သင်း ဖြစ်နေသည်ကို သူသိပါသည်။ သူက ဒုတိယမန်နေဂျာတစ်ဦး ဖြစ်ပြီး အာဏာရှိသော ဒုတိယမန်နေဂျာတစ်ဦးလည်း ဖြစ်သည်။ အေးအေးဆေးဆေးနှင့် တည်ငြိမ်စွာ ဆက်နေရမည်ဆိုပါက အလွန်ကောင်းမွန်လှသည်။

သို့သော်လည်း သူက အပြင်သို့ ရုန်းထွက်ပြီး ပတ်ဝန်းကျင်အသစ်တစ်ခုသို့ လာရန် ရွေးချယ်ခဲ့သည်၊ ထို့ပြင် သူက အရည်အချင်းရှိသူတစ်ဦး ဖြစ်သည်။ အကယ်၍ သူက မိမိကိုယ်ကိုယ် စိန်ခေါ်မှု မပြုလုပ်ချင်ဘူးဆိုလျှင် ဒါက ဘာဖြစ်နိုင်ပါမည်နည်း။

၎င်းက ကြီးမားသော စိန်ခေါ်မှုတစ်ခု မဟုတ်သလို၊ မဖြစ်နိုင်သောအရာလည်း မဟုတ်သည်ကိုမူ ဆိုဖွယ်ရာမရှိပေ။

ယခုအခါ လုံထန်ဘောလုံးကလပ်ဟု အမည်ပြောင်းလဲလိုက်သော အသင်း၏ နောက်ကွယ်တွင် မည်ကဲ့သို့သော တည်ရှိမှုမျိုးက ကျောထောက်နောက်ခံပြု မတ်တပ်ရပ်နေသည်ကို မမေ့ပါနှင့်။

လုံထန်လုပ်ငန်းစု၊ လုံထန်လုပ်ငန်းစု။

ကဲ၊ လင်းဖန်။

နာမည်တစ်ခုရုံမျှသာ။

ဤနာမည်တစ်ခုတည်းနှင့်တင် လုံလောက်နေပြီ ဖြစ်သည်။

မှန်ပါသည်၊ ထိုမျှနှင့်တင် လုံလောက်ပါသည်။ သူသည် ရှန်ကျန့်မြို့နှင့် တရုတ်နိုင်ငံတစ်ခုလုံးတွင် နံပါတ်တစ် ပုဂ္ဂိုလ်ကြီး ဖြစ်သည်။ ဤကဲ့သို့သော ကျောထောက်နောက်ခံမျိုးနှင့်ဆိုလျှင် သူသည် မြို့ထဲက လူများနှင့် စကားပြောရန် သာ၍ ယုံကြည်မှု ရှိလာပြီး မိမိ အောင်မြင်နိုင်မည်ဟု ယုံကြည်သည်။

သေချာတာပေါ့၊ နောက်ဆုံးတွင်တော့ ပြောစရာမရှိတော့ပေ။ တင်ဟမ်သည် တာဝန်ကို လက်ခံခဲ့ပြီးနောက် အခြားသော အကြောင်းအရာများကို ပြောဆိုရင်း ထွက်ခွာသွားခဲ့သည်။

ကျန်ဖန်လည်း ထွက်ခွာသွားခဲ့သည်။ သူသည် ဗဟုသုတများ ရရှိခဲ့သော်လည်း သူ့တွင် လုပ်ဆောင်ရန် ကိစ္စရပ်များစွာ ရှိနေသေးသဖြင့် ရုံးခန်းသို့ ပြန်သွားခဲ့သည်။

သို့သော်လည်း လင်းဖန်ကမူ ထွက်မသွားခဲ့ပေ။ သူသည် ရုံးခန်းထဲတွင် ဆက်ရှိနေဆဲဖြစ်ကာ စာရွက်စာတမ်းများကို ကိုင်တွယ်ဖြေရှင်းနေခဲ့သည်။ သူက အလွန် အလုပ်များနေပြီး အနာဂတ်တွင် သာ၍ပင် အလုပ်များလာဦးမည် ဖြစ်သည်။ သူ ပျင်းရိနေ၍မရပါ၊ သို့မဟုတ်ပါက သူသည် ယခုနှစ်တွင် သက်တောင့်သက်သာရှိသော ဘဝကို ဖြတ်သန်းနိုင်လိမ့်မည် မဟုတ်ပေဥစ္စာ.......။

အချိန်က အလျင်အမြန် ကုန်ဆုံးသွားခဲ့ပြီး မကြာမီ အောက်တိုဘာလနှောင်းပိုင်းသို့ ရောက်ရှိလာခဲ့သည်။

လင်းဖန်သည် ယခုအခါ စက်ရုပ်များကို တပ်ဆင်ခြင်းထဲတွင် လုံးဝ စိတ်ရောကိုယ်ပါ နစ်မြောနေခဲ့သည်။ သူသည် နေ့တိုင်း ကုမ္ပဏီသို့လာပြီး စက်ရုပ်များကို တပ်ဆင်ကာ ထို့နောက် စာအုပ်များ ဖတ်ရှုလေ့ရှိသည်။

ဒါက အချိန်အတော်ကြာ ပြင်းပြင်းထန်ထန် ကြိုးစားခဲ့ရခြင်း ဖြစ်ပြီး ယခုအခါ စက်ရုပ်တပ်ဆင်ခြင်းမှာ နောက်ဆုံးတွင် ပြီးစီးလုနီးပါး ဖြစ်နေပြီ ဖြစ်သည်။

နောက်ဆုံး ဝက်အူကို ဝက်အူပေါက်ထဲသို့ လှည့်သွင်းပြီးနောက် လင်းဖန်သည် သူ့လက်ထဲရှိ ဝက်အူလှည့်ကို လွှင့်ပစ်လိုက်ကာ မေးစေ့ကို ပွတ်သပ်ရင်း စမ်းသပ်ခုံပေါ်တွင် လှဲလျောင်းနေသော စက်ရုပ်ကို ကြည့်ရှုလိုက်သည်။

ယခုအချိန်တွင် ဆေးသုတ်ထားခြင်း မရှိသေးသဖြင့် စက်ရုပ်သည် ကာဗွန်လူမီနီယံ အလွတ်သတ္တုစပ်နှင့် ပလတ်စတစ်တို့၏ သဘာဝအရောင်အတိုင်း ရှိနေဆဲ ဖြစ်သည်။

ဤစက်ရုပ်က သူ့ထံမှ ကြိုးပမ်းအားထုတ်မှုများစွာကို ယူဆောင်သွားခဲ့သည်။

၎င်း၏ ကိုယ်ထည်အတွင်းတွင် ကြီးမားသော ဆီလီကွန်ခရစ္စတယ်ဆဲလ်သုံးခု ရှိပြီး ပေါင်တစ်ဖက်စီတွင် တစ်ခုစီနှင့် ဝမ်းဗိုက်တွင် တစ်ခု ရှိသည်။ ကံကောင်းထောက်မစွာဖြင့် ကာဗွန်ခရစ္စတယ်၏ သိပ်သည်းဆက မမြင့်မားသောကြောင့် ၎င်းက စက်ရုပ်၏ အလေးချိန်အပေါ် ကြီးမားသော သက်ရောက်မှု မရှိပေ။

မိုက်ခရိုကွန်ပျူတာ ထိန်းချုပ်မှုစနစ်၏ လွတ်လပ်သော လှုပ်ရှားမှုများနှင့် တွက်ချက်မှုများ၊ ဒါက စွမ်းအင် အများဆုံး ကုန်ဆုံးသည့် နေရာ ဖြစ်သည်။ ၎င်းကို အချိန်အတော်ကြာ လှုပ်ရှားတက်ကြွနေစေရန်အတွက် ကြီးမားသော ဘက်ထရီ သုံးလုံးမှာ မဖြစ်မနေ လိုအပ်သည်။

အဆစ်တစ်ခုစီတွင် ဆာဗိုမော်တာ (Servo motors) သေးသေးလေးများနှင့် စတက်ပါမော်တာ (Stepper motors) များကို မောင်းနှင်သည့် ကိရိယာများအဖြစ် အသုံးပြုထားပြီး ခြေကျင်းဝတ်များတွင်လည်း ဟိုက်ဒရောလစ် ရိုက်ချက်ထိန်းကိရိယာ (Hydraulic shock absorbers) များ ရှိသည်။

ဒါက လူသားများ မတ်တပ်ရပ် လမ်းလျှောက်ခြင်းကို သာ၍ နီးကပ်စွာ တုပနိုင်မည် ဖြစ်သည်။

ခြေနှစ်ချောင်းဖြင့် လမ်းလျှောက်ခြင်းက အလွန် မတည်ငြိမ်လှပေ၊ ထို့ကြောင့် စက်ရုပ်တစ်ရုပ်က မတ်တပ်ရပ် လမ်းလျှောက်လိုပါက ၎င်းတွင် ဟန်ချက်ထိန်းကိရိယာတစ်ခု ရှိရမည် ဖြစ်သည်။ ယခု ဤစက်ရုပ်အတွင်း၌ ထည့်သွင်းထားသော ဟန်ချက်ထိန်းစနစ်မှာ ဂျိုင်းရိုးစကုပ်အစုံတစ်ခု ဖြစ်သည်။

ထိန်းချုပ်မှုစနစ်မှာ ဗဟိုချုပ်ကိုင်မှုလျှော့ချထားသော ထိန်းချုပ်မှုဖြစ်သည်။

စက်ရုပ်ကို ထိန်းချုပ်ရန် မိုက်ခရိုကွန်ပျူတာ အမြောက်အမြားကို အသုံးပြုထားသည်။ ခေါင်းပေါ်ရှိ မိုက်ခရိုကွန်ပျူတာသည် စနစ်စီမံခန့်ခွဲမှု၊ ဆက်သွယ်ရေးနှင့် ရွေ့လျားမှုဆိုင်ရာ တွက်ချက်မှုများနှင့် ညွှန်ကြားချက်များ ပေးပို့ခြင်းတို့အတွက် တာဝန်ရှိသည်။

အဆစ်တစ်ခုစီတွင် ထိန်းချုပ်မှုနှင့် အတွင်းပိုင်းတွက်ချက်မှု လုပ်ငန်းစဉ်များကို လုပ်ဆောင်ရန် သက်ဆိုင်ရာ စီပီယူ (CPU) တစ်ခုစီ ရှိကြသည်။

ဤကဲ့သို့သော ထိန်းချုပ်မှုမျိုးက ပင်မ မိုက်ခရိုကွန်ပျူတာအပေါ် ကျရောက်မည့် ဝန်ထုပ်ဝန်ပိုးကို လျှော့ချပေးနိုင်သည်။

နောက်ဆုံး အာရုံခံကိရိယာများ ဖြစ်ကြသည့် လေဆာအာရုံခံကိရိယာများ၊ အပူလှိုင်းအာရုံခံကိရိယာများ၊ အသံအာရုံခံကိရိယာများ၊ အရည်စီးဆင်းမှု အာရုံခံကိရိယာများ စသည်တို့မှာ စက်ရုပ်၏ အာရုံခံအင်္ဂါရပ်များအဖြစ် လုပ်ဆောင်ကြသည်။

အထက်အောက် နေရာအနှံ့တွင် ဤမျှများပြားလှသော အရာများ တပ်ဆင်ထားရာ ဤဘက်ထရီစွမ်းအင်သုံး စက်ရုပ်သည် မည်မျှအထိ ကြာကြာ လည်ပတ်နိုင်မည်ကို လင်းဖန် မသိရှိပေ။

၎င်းကို စတင် လည်ပတ်နိုင်ခြင်း ရှိမရှိ စမ်းသပ်ကြည့်ရမည်။

လင်းဖန်သည် ပါဝါကို ဖွင့်လိုက်ရာ စက်ရုပ်၏ မျက်သူငယ်အိမ်များနှင့် ရင်ဘတ်ကြားရှိ လေဆာအာရုံခံကိရိယာက လင်းထိန်သွားခဲ့သည်။

ရတယ်ဟ။ လင်းဖန်သည် သက်ပြင်းတစ်ချက် ချလိုက်မိသည်။

"ဝက်ဝံကြီး အဲဒါကို ချိတ်ဆက်လို့ ရမလား။" လင်းဖန်က မေးလိုက်သည်။

"ရပါတယ်"

ရှုံ့တာ၏ ကလေးဆန်သော အသံ ထွက်ပေါ်လာခဲ့သည်။

"မင်း အခု ၎င်းကို ထိန်းချုပ်ပြီး မတ်တပ်ရပ်ဖို့ ကြိုးစားကြည့်လို့ ရပြီ။ မင်း စက်ထဲမှာ ၎င်းကို မလည်ပတ်စေချင်ဘူး။ ၎င်းက မင်းရဲ့ လုပ်ငန်းစဉ်ကို မပံ့ပိုးပေးနိုင်ဘူး။ မင်း ၎င်းဆီ ညွှန်ကြားချက်တွေ ပေးပို့ပြီး ညွှန်ကြားချက်တွေအတိုင်း လှုပ်ရှားခိုင်းလိုက်။ ဤနည်းလမ်းအတိုင်း ၎င်းကို ထိန်းချုပ်လိုက်။" လင်းဖန်က ပြောလိုက်သည်။

"ကောင်းပါပြီ။"

ရှုံ့တာ၏ အသံ ဆုံးသွားသည်နှင့်တစ်ပြိုင်နက် စမ်းသပ်ခုံပေါ်ရှိ စက်ရုပ်သည် ထထိုင်လိုက်သည်။

စက်ရုပ် ထထိုင်ပြီးနောက် လင်းဖန်သည် ၎င်း၏ ကန့်သတ်ချက် တန်ဖိုးများပုံမှန် ဟုတ်မဟုတ် စစ်ဆေးရန် ကွန်ပျူတာကို ကြည့်ရှုလိုက်သည်။ ဒါက သိပ္ပံနှင့် နည်းပညာစာကြည့်တိုက်မှ ရရှိထားသော ဒီဇိုင်းပုံစံ ဖြစ်သောကြောင့် ကြီးမားသော ပြဿနာ ရှိစရာ အကြောင်းမရှိပေ။

"အခု လမ်းလျှောက်ကြည့်စမ်း။"

... ဘုန်း။

မြေပြင်ပေါ်တွင် မတ်တပ်ရပ်နေသော စက်ရုပ်သည် ရုတ်တရက် ဟန်ချက်ပျက်သွားပြီး မြေပြင်ပေါ်သို့ တန်းတန်းမတ်မတ် လဲကျသွားခဲ့သည်။

"ဟန်ချက်ထိန်းစနစ်မှာ တစ်ခုခု မှားယွင်းနေတာလား။" လင်းဖန်သည် ဆောင့်ကြောင့်ထိုင်ချကာ စစ်ဆေးလိုက်သည်။

"အကြီးအကဲ၊ ဒါက ဟန်ချက်ထိန်းစနစ်ရဲ့ ပြဿနာမဟုတ်ပါဘူး။ ကျွန်တော့်မှာ လူသားတွေ မတ်တပ်ရပ် လမ်းလျှောက်တာနဲ့ ပတ်သက်တဲ့ တိကျတဲ့ ဒေတာတွေ မရှိလို့ပါ။ လမ်းလျှောက်မယ့် ပုံစံနဲ့ အားအင်ပမာဏကို ကျွန်တော် မဆုံးဖြတ်နိုင်လို့ပါ။" ရှုံ့တာက ပြောလိုက်သည်။

"ဘာအကြံဉာဏ်ရှိလဲ။" လင်းဖန်က မေးလိုက်သည်။

"လူတစ်ယောက် လမ်းလျှောက်တဲ့ လှုပ်ရှားမှု ဒေတာတွေကို စမ်းသပ်ဖို့ပါပဲ၊ ကျွန်တော် သူ့ရဲ့ လမ်းလျှောက်တဲ့ ပုံစံကို တုပကြည့်ပါ့မယ်။" ရှုံ့တာက ပြောလိုက်သည်။

"ကြည့်ရတာ မနက်ဖြန်ကျမှပဲ စမ်းသပ်လို့ ရတော့မယ် ထင်တယ်၊ ဒါကြောင့် သိပ်ပြီး အလျင်စလို လုပ်စရာတော့ မလိုပါဘူး။"

လင်းဖန်သည် စက်ရုပ်၏ ပါဝါကို ပိတ်လိုက်ပြီး ၎င်းကို စမ်းသပ်ခုံပေါ်သို့ ပြန်လည် သယ်ဆောင်ကာ ပတ်တီးစဖြင့် ဖုံးအုပ်လိုက်ပြီး ကျန်းဖန်၏ ဖုန်းနံပါတ်သို့ ဖုန်းခေါ်ဆိုလိုက်သည်။

"ဘာကိစ္စရှိလို့လဲ ဥက္ကဋ္ဌကြီး။"

"မင်း လူတစ်ယောက်ယောက်ကို အပြေးစက်နှစ်လုံး ရှာခိုင်းပြီး မနက်ဖြန် အသုံးပြုဖို့အတွက် စမ်းသပ်ခန်းထဲကို ပို့ခိုင်းလိုက်ပါ။"

ကျန်ဖန်က ဘာမှ ထပ်မစဉ်းစားဘဲ သဘောတူခဲ့သည်။

တစ်နာရီအကြာတွင် ဝန်ထမ်းအချို့သည် အပြေးစက် နှစ်လုံးနှင့်အတူ စမ်းသပ်ခန်းအပြင်ဘက်သို့ ရောက်ရှိလာခဲ့ကြသည်။

"အပြေးစက်တွေကို စမ်းသပ်ခန်း တံခါးဝဆီ ရွှေ့လိုက်ပါ။" လင်းဖန်က အလုပ်သမားအချို့ကို ပြောလိုက်သည်။

ယခုအခါ သူ့စမ်းသပ်ခန်းထဲသို့ လူများကို မဆင်မခြင် ဝင်ခွင့်မပြုနိုင်တော့ပေ၊ အထူးသဖြင့် ကိစ္စရပ်များစွာ ဆက်တိုက် ဖြစ်ပွားခဲ့ပြီးနောက်ပိုင်း ဖြစ်သည်။ ထို့ပြင် စက်ရုပ်များလည်း ရှိနေရာ ဤသုတေသနလုပ်ငန်းများကို သာမန်ဝန်ထမ်းများအား မသိရှိစေနိုင်သဖြင့် သူသည် ၎င်းတို့ကို စမ်းသပ်ခန်းအတွင်းသို့ တိုက်ရိုက် ရွှေ့ပြောင်းခွင့် မပြုခဲ့ခြင်း ဖြစ်သည်။

"ကောင်းပါပြီ ဥက္ကဋ္ဌကြီး။"

ဝန်ထမ်းအချို့သည် အပြေးစက်များကို စမ်းသပ်ခန်း၏ အဝင်ဝတွင် ထားရှိခဲ့ပြီး စမ်းသပ်ခန်းမှ ထွက်ခွာသွားခဲ့ကြသည်။

အပြေးစက်များတွင် ဘာပြဿနာမျှမရှိကြောင်း အတည်ပြုပြီးနောက် သူသည် ကျန်ဖန်၏ ဖုန်းနံပါတ်သို့ ဖုန်းခေါ်ဆိုလိုက်သည်။

"ဥက္ကဋ္ဌကြီး၊ ဘာများ ဖြစ်လို့လဲခင်ဗျာ။"

"ယွီလိကို ကျုပ်ဆီ လာခိုင်းလိုက်ပါ။" လင်းဖန်က ပြုံးလျက် ပြောလိုက်သည်။

"ကောင်းပါပြီ။"

ကျန်ဖန်က အဘယ်ကြောင့်လဲဟု မမေးမြန်းခဲ့ဘဲ သုတေသနစင်တာ၏ ညွှန်ကြားရေးမှူးဖြစ်သူ ရွှီလိထံသို့ အလျင်အမြန် အကြောင်းကြားလိုက်သည်။

......................................