အခန်း ၂၃
Vol. 3 Ch. 23
အခန်း (၂၃) လုပ်ဆောင်ချက်အသစ်၊ သိုင်းပညာအသစ်နှင့် တတိယမြောက်ကိုယ်ပွား
သိုင်းပညာများကို ဝယ်ယူပြီးနောက်တွင်လည်း ချန်ကျီက အနန္တနေရာလွတ်ထဲမှ ချက်ချင်း ပြန်လည်ထွက်ခွာရန် မလောဆောသေးချေ။
အနန္တနေရာလွတ် အဆင့်မြင့်သွားခဲ့ပြီဖြစ်ရာ လုပ်ဆောင်ချက် နှင့် ကျွမ်းကျင်မှု ဝယ်ယူခြင်း မျက်နှာပြင်များအတွင်းရှိ ပစ္စည်းများကလည်း အသစ်ထွက်ပေါ်လာလောက်မည်မှာ အသေအချာပင် ဖြစ်သည်။
ချန်ကျီ အတွေး ဖြင့် လုပ်ဆောင်ချက် ဝယ်ယူခြင်းမျက်နှာပြင်ကို ထပ်မံ၍ ဖွင့်လှစ်လိုက်သည်။
"ကိုယ်ပွားနားနေဆောင် တဲ့လား..."
ဝယ်ယူခြင်းမျက်နှာပြင်ပေါ်တွင် ပေါ်ထွက်လာသည့် အဆောက်အအုံပုံရိပ်တစ်ခုကို ကြည့်ရင်း ချန်ကျီ ရေရွတ်လိုက်မိသည်။
"ကိုယ်ပွားတွေက အနားယူဖို့ မလိုအပ်ဘူး မဟုတ်လား၊ ဒါဆိုရင် ဒီကိုယ်ပွားနားနေဆောင်က ဘာအတွက် အသုံးဝင်မှာလဲ"
ချန်ကျီက ကိုယ်ပွားနားနေဆောင်၏ မိတ်ဆက်စာသားကို အသေးစိတ် စတင်ဖတ်ရှုလိုက်တော့သည်။
'ကိုယ်ပွားနားနေဆောင်' - စျေးနှုန်း အမှတ် ၁၀၀၊ ပြင်းထန်စွာ ဒဏ်ရာရရှိထားသည့် ကိုယ်ပွားများကို ပြန်လည်ကုသပေးနိုင်သည်။ ခြေပြတ်လက်ပြတ်ဖြစ်စေ၊ အသက်အန္တရာယ်စိုးရိမ်ရသည့် အခြေအနေဖြစ်စေ ကိုယ်ပွားတစ်ခုလုံး လုံးဝပျက်စီးမသွားသရွေ့ တစ်နာရီအတွင်း အပြည့်အဝ ပြန်လည်ကောင်းမွန်လာစေမည် ဖြစ်ပြီး အသုံးပြုသည့်အခါတိုင်း နောက်ထပ် အမှတ်များ ထပ်မံကုန်ကျမည် မဟုတ်ပါ။
"ဒါကတော့ တကယ်အဆင်ပြေတာပဲ၊ အချိန်လည်း ကုန်သက်သာသလို အမှတ်တွေ ကုန်ဆုံးမှုကိုလည်း လျှော့ချပေးနိုင်တယ်၊ မဖြစ်မနေ ဝယ်ရမယ်"
ချန်ကျီ မည်သည့်တုံ့ဆိုင်းမှုမျှ မရှိဘဲ အမှတ် ၁၀၀ ကို ချက်ချင်းအသုံးပြုကာ ထိုကိုယ်ပွားနားနေဆောင်ကို ဝယ်ယူလိုက်တော့သည်။
ထိုအချိန်၌ အနန္တနေရာလွတ်အတွင်းရှိ အလိုအလျောက်ကျင့်ကြံခြင်းအခန်း၏ ဘေးဘက်တွင် အဆောက်အအုံတစ်ခု ဆန်းပြားစွာ ပေါ်ထွက်လာခဲ့ချေပြီ။
အဆောက်အအုံ၏ အမြင့်မှာ အလိုအလျောက်ကျင့်ကြံခြင်းအခန်းနှင့် အလားတူသော်လည်း ၎င်း၏ အကျယ်အဝန်းကမူ ကျင့်ကြံခြင်းအခန်းထက်စာလျှင် အများကြီး ပိုမိုကြီးမားလှပေသည်။
အဆောက်အအုံ၏ အပြင်အလှဆင်မှုများမှာ ထုဆစ်မွမ်းမံထားသည့် ပန်းပုလက်ရာများဖြင့် ခန့်ညားလှပပြီး အခြားသော အဆောက်အအုံများ၏ ဟန်ပန်နှင့် အသွင်သဏ္ဌာန်တူညီလှပေသည်။
ချန်ကျီက အတွေး ကို ပြောင်းလဲလိုက်ပြီး ကျွမ်းကျင်မှု ဝယ်ယူခြင်းမျက်နှာပြင်သို့ ကူးပြောင်းလိုက်ပြန်သည်။
"ထင်တဲ့အတိုင်းပဲ... ကျွမ်းကျင်မှု မျက်နှာပြင်ထဲမှာလည်း ကျွမ်းကျင်မှု အသစ်တစ်ခုပဲ တိုးလာတာပဲ"
ချန်ကျီက ထိုကျွမ်းကျင်မှု အသစ်၏ မိတ်ဆက်ကို စတင်ဖတ်ရှုလိုက်သည်။
'ထောင်ချီ ပြောင်းလဲခြင်း' - စျေးနှုန်း အမှတ် ၁၀၀၀၊ အသုံးပြုသူသည် မိမိ၏ ရုပ်သွင်သဏ္ဌာန်နှင့် အခြေအနေမှန်သမျှကို စိတ်ကြိုက် ပြောင်းလဲနိုင်ပြီး အသုံးပြုနေစဉ်အတွင်း မိနစ်တိုင်းအတွက် အမှတ် ၁ မှတ် စီ ကုန်ဆုံးပါမည်။
"အပြင်မှာ သွားလာလှုပ်ရှားဖို့ ကိုယ်ပွားတွေ ရှိနေတာပဲ၊ ငါကိုယ်တိုင် အပြင်ထွက်ပြီး မျက်နှာပြနေစရာ မလိုပါဘူး။ ဒါ့ အပြင် နောင်ကျရင် ကိုယ်ပွားတွေရဲ့ အရေအတွက်ကလည်း ပိုပြီးတော့ များလာမှာ။ ကိုယ်ပွားတွေရဲ့ ရုပ်သွင်ကိုက စိတ်ကြိုက်ပြောင်းလဲလို့ ရနေတာဆိုတော့ ဒီကျွမ်းကျင်မှု က ငါ့အတွက်တော့ နည်းနည်း အပိုဖြစ်နေသလိုပဲ"
"ဒါပေမဲ့လည်း ရှိနေတော့ မဆိုးပါဘူး၊ နောင်တစ်ချိန် အသုံးလိုလာရင်လည်း လိုလာနိုင်တာပဲ၊ နောင်မှ အမှတ်တွေ ပိုလျှံလာတဲ့အခါ ဝယ်ယူလည်း အချိန် မနှောင်းပါဘူး။ အခုလောလောဆယ်တော့ ကိုယ်ပွားတွေ အပြင်မှာ အသုံးပြုဖို့အတွက် ကိုယ်ပျောက်မန္တန် ကို အရင်ဝယ်လိုက်တာက ပိုကောင်းမယ်"
ချန်ကျီက ဝိညာဉ်ကျောက်တုံး ၁၀၀ ကို အသုံးပြုကာ ကိုယ်ပျောက်မန္တန်ကို ဝယ်ယူလိုက်တော့သည်။
ထို့နောက် ချန်ကျီက အနန္တစျေးဆိုင်မှ ထွက်ကာ အလိုအလျောက်ကျင့်ကြံခြင်းအခန်းသို့ ရောက်ရှိလာခဲ့ပြီး သိုင်းပညာစာအုပ်အသစ် သုံးအုပ်လုံးကို ကျင့်ကြံခြင်းအခန်းထဲသို့ ထည့်သွင်းလိုက်သည်။
တစ်ခုချင်းစီ အလှည့်ကျလဲလှယ်ပြီးနောက် သုံးနာရီအကြာတွင် ထိုသိုင်းပညာ သုံးခုလုံးက အခြေခံအဆင့် သို့ ရောက်ရှိသွားခဲ့ပြီဖြစ်ရာ အနည်းဆုံးတော့ စတင်အသုံးပြုနိုင်သည့် အဆင့်သို့ ရောက်ရှိသွားခဲ့ပြီ ဖြစ်သည်။
ချန်ကျီ ထွက်သွားပြီးနောက် ကျင့်ကြံခြင်းအခန်းထဲရှိ ပုံရိပ်ယောင် က မြေကြီးဒိုင်းကာမန္တန်ကို ဆက်လက်၍ လေ့ ကျင့်နေပြန်သည်။
ထိုအချိန်၌ ချန်ကျီ၏ စိတ် အတွင်းတွင် သိုင်းပညာအသစ် သုံးခုလုံး၏ အသုံးပြုပုံနည်းလမ်းများ ရောက်ရှိနေပြီဖြစ်သလို ၎င်းတို့ကို သူ၏ ကိုယ်ပွားနှစ်ခုထံသို့လည်း တစ်ပြိုင်နက်တည်း မျှဝေ ပေးလိုက်ပြီ ဖြစ်သည်။
လမ်းခရီးတွင် သွားလာနေသည့် ကိုယ်ပွား ကျောက်ယွမ်၏ စိတ် အတွင်းသို့လည်း ထိုအချက်အလက်များ တစ်ခဏချင်းမှာပင် ရောက်ရှိသွားခဲ့၏။
ချက်ချင်းဆိုသလိုပင် ကျောက်ယွမ်၏ ပုံရိပ်က ဝုန်းကနဲ လျင်မြန်သွားခဲ့ပြီး ကြိုးကြာ ပျံခြေလှမ်းကို အသုံးပြုကာ ရှေ့သို့ အရှိန်အဟုန်ဖြင့် ပြေးထွက်သွားခဲ့တော့သည်။
ကျောက်ယွမ်က ကြိုးကြာငှက်တစ်ကောင်ကဲ့သို့ ပေါ့ပါးဖျတ်လတ်စွာဖြင့် ခရီးနှင်နေသဖြင့် သူ၏ အမြန်နှုန်း က တစ်ခဏချင်းမှာပင် အဆမတန် မြန်ဆန်သွားခဲ့ရသည်။
ချန်ကျီ အနန္တနေရာလွတ်ထဲမှ ထွက်လာလိုက်ပြီးနောက် တွေးလိုက်သည်။ "သိုင်းပညာအသစ်တွေရဲ့ စွမ်းအားက ဘယ်လောက်အထိ ရှိလဲဆိုတာ စမ်းကြည့်ရသေးတာပေါ့"
ချက်ချင်းပင် ချန်ကျီ၏ လက်ထဲတွင် ချင်းယွမ်ဓား ပေါ်ထွက်လာခဲ့ပြီး ကြယ်ရွှေ့ပြောင်းခြင်း ဓားဆယ့်သုံးချောင်း သိုင်းပညာကို တစ်ခေါက် ထုတ်ဖော်ကပြလိုက်တော့သည်။
"ဒီဆန်းကြယ်အဆင့် သိုင်းပညာရဲ့ စွမ်းအားက တကယ်ပဲ အံ့မခန်းပဲ၊ ဒါပေမဲ့ ငါ့ရဲ့ လက်ရှိ ချီသန့်စင်ခြင်းနယ်ပယ် အဆင့် ၄ ကျင့်ကြံခြင်းအဆင့်အရဆိုရင် ဒန်တျန်အတွင်းက ဝိညာဉ်စွမ်းအားက ဒီတိုက်ကွက် သုံးကွက်လောက် ထုတ်သုံးဖို့ပဲ လောက်ငတာပဲ"
ချန်ကျီက ချက်ချင်းပင် တင်ပျဉ် ခွေထိုင်ကာ ရွှမ်ထျန်းလု ကျင့်စဉ်ကို လည်ပတ်စေလိုက်ပြီး တစ်ပါတည်း ချီစုစည်းဆေးလုံး တစ်လုံးကိုပါ ပါးစပ်ထဲသို့ ထည့်ကာ သကြားလုံးကဲ့သို့ ဝါးစားလိုက်တော့သည်။
အမွေးတိုင်တစ်တိုင် စာ အချိန်ခန့် ကုန်ဆုံးပြီးနောက် ချန်ကျီ မျက်လုံးများကို ပြန်ဖွင့်လိုက်ရာ ခန္ဓာကိုယ်အတွင်းရှိ ဝိညာဉ်စွမ်းအားများက ပြန်လည်ပြည့်ဝသွားခဲ့ပြီ ဖြစ်သည်။
"အခု... ကောင်းကင်ကိုးခု နဂါးဟိန်းသံလှံသိုင်း ကို ထပ်ပြီး စမ်းကြည့်ရအောင်"
လှည့်လည်သောနဂါးလှံက ချန်ကျီ၏ လက်ထဲတွင် ပေါ်ထွက်လာခဲ့ပြီး လှံရှည်ကို လျင်မြန်စွာ ဝေ့ဝဲလိုက်ရာ လှံရှည်က ဖျတ်လတ်လှသည့် နဂါးတစ်ကောင်ကဲ့သို့ ကောင်းကင်ယံတွင် လင်းလက်လှပသည့် အလင်းတန်းတစ်ခုကို ဖန်တီးလိုက်တော့သည်။
နဂါးဟိန်းသံက ထွက်ပေါ်လာခဲ့ပြီး စွမ်းအားကြီးမားလှသည့် အော်ရာများက ကောင်းကင်ကိုးခုကို ဖောက်ထွက်ကာ အရာခပ်သိမ်းကို တုန်လှုပ်ခြောက်ခြားစေနိုင်သည့်အလား ထင်မှတ်ရပေသည်။
ချန်ကျီက လှည့်လည်သောနဂါးလှံကို ကိုင်ဆောင်လျက် ခြေလှမ်းများအောက်တွင် ကြိုးကြာ ပျံခြေလှမ်းကို ထုတ်ဖော်လိုက်ရာ သူသည် ကောင်းကင်တွင် ဝဲပျံနေသည့် ကြိုးကြာ ငှက်တစ်ကောင်ကဲ့သို့ လျင်မြန်စွာ ကူးသန်းလှုပ်ရှားနေခဲ့သည်။
လှည့်လည်သောနဂါးလှံက သူ၏ လက်ထဲတွင် ကောင်းကင်သို့ ပျံတက်သွားသည့် နဂါးကြီးတစ်ကောင်ကဲ့သို့ အရှိန်အဟုန်ပြင်းစွာဖြင့် ရှေ့သို့ ထိုးစိုက်သွားခဲ့၏။
တိုက်ကွက်တိုင်းတွင် ပြင်းထန်လှသည့် အအေးဓာတ်များနှင့် အေးစက်လှသည့် အလင်းတန်းများ ပါဝင်နေပြီး နဂါးဟိန်းသံများပါ တစ်ပြိုင်နက်တည်း ထွက်ပေါ်နေခဲ့သည်။
ချန်ကျီ၏ လှုပ်ရှားမှု ခြေလှမ်းနှင့် လှံသိုင်းပညာတို့ ပေါင်းစပ်သွားသည်နှင့်အမျှ ကြိုးကြာ ပျံခြေလှမ်းနှင့် ကောင်းကင်ကိုးခု နဂါးဟိန်းသံလှံသိုင်းတို့၏ စွမ်းအားက ပိုမို၍ ကြောက်မက်ဖွယ်ကောင်းလာခဲ့ရသည်။
ရုတ်တရက် ချန်ကျီ၏ ခန္ဓာကိုယ်က ရပ်တန့်သွားခဲ့ပြီး လှည့်လည်သောနဂါးလှံကို မြေကြီးတွင် ထောက်လျက် အသက်ကို ပြင်းပြင်းထန်ထန် ရှူသွင်းနေရတော့သည်။
"ကျင့်ကြံခြင်းအဆင့်က နိမ့်လွန်းသေးတယ်"
ကောင်းကင်ကိုးခု နဂါးဟိန်းသံလှံသိုင်း အစုံအလင်ကိုပင် ဆုံးအောင် မကပြရသေးချေ၊ ချန်ကျီ၏ ဝိညာဉ်စွမ်းအားများက ထပ်မံ၍ ကုန်ဆုံးသွားခဲ့ပြန်ချေပြီ။
လှည့်လည်သောနဂါးလှံနှင့် ချင်းယွမ်ဓားတို့ကို အနန္တနေရာလွတ်ထဲသို့ ပြန်လည်သိမ်းဆည်းလိုက်ပြီးနောက် ချန်ကျီက တင်ပျဉ် ခွေထိုင်လျက် ရွှမ်ထျန်းလု ကျင့်စဉ်ကို ထပ်မံလည်ပတ်စေလိုက်ပြန်သည်။
အမွေးတိုင်တစ်တိုင် စာ အချိန်ခန့် ကုန်ဆုံးပြီးနောက်
ချန်ကျီ၏ ဝိညာဉ်စွမ်းအားများက ထပ်မံ၍ ပြန်လည်ပြည့်ဝသွားခဲ့ပြီ ဖြစ်သည်။
ဒန်တျန်အတွင်း တစ်ဖန်ပြန်လည် ပြည့်ဝသွားခဲ့သည့် ဝိညာဉ်စွမ်းအားများကို ခံစားရင်း ချန်ကျီ၏ နှုတ်ခမ်းထက်တွင် ကျေနပ်သည့် အပြုံးတစ်ခု ပေါ်ထွက်လာခဲ့ရသည်၊ ဤသို့သော ခံစားချက်က သူ့ကို စိတ်အေးချမ်းတည်ငြိမ်မှုကို ပေးစွမ်းနိုင်ပေသည်။
"ဆန်းကြယ်အဆင့် သိုင်းပညာတွေက တကယ်ပဲ အစွမ်းထက်တာပဲ၊ ဒီကြယ်ရွှေ့ပြောင်းခြင်း ဓားဆယ့်သုံးချောင်း က လျင်မြန်ဖြတ်လတ်မှုကို အဓိကထားပြီး ကောင်းကင်ကိုးခု နဂါးဟိန်းသံလှံသိုင်း ကတော့ အလွန်တရာ အစွမ်းထက်ပြီး လွှမ်းမိုးနိုင်စွမ်းရှိတယ်"
"ဒီလောက်အထိ အချိန်အကြာကြီး ကျင့်ကြံလိုက်ရတာ... ဗိုက်တောင် နည်းနည်း ဆာလာပြီပဲ"
ချန်ကျီက ချန်ဖန်ကို လှမ်းခေါ်ပြီး ဟင်းချက်ခိုင်းရန် စဉ်းစားလိုက်သော်လည်း...
"ထားလိုက်ပါတော့... ကိုယ်ပွားကို ခဏခဏ ပြန်ခေါ်နေရတာလည်း အဆင်မပြေဘူး၊ ဘာပဲဖြစ်ဖြစ် အခု ဝိညာဉ်ကျောက်တုံးတွေလည်း ရှိနေတာပဲ၊ နောက်ထပ် ကိုယ်ပွားအသစ် တစ်ခု ထပ်ပြီး ဝယ်လိုက်တာပေါ့"
"ဝိညာဉ်ကျောက်တုံးတွေ ကုန်သွားလည်း ထပ်ပြီး ရှာလို့ရတာပဲဥစ္စာ"
ချန်ကျီ စိတ်ထဲတွင် တွေးတောလိုက်ပြီးနောက် သူ၏ အသိစိတ်က အနန္တစျေးဆိုင်ထဲသို့ ဝင်ရောက်သွားခဲ့ပြီး ကိုယ်ပွားအသစ်တစ်ခုကို တိုက်ရိုက် ဝယ်ယူလိုက်တော့သည်။
ယခုတစ်ကြိမ်တွင်မူ သူက လွန်စွာ တွေးတောတုံ့ဆိုင်းမနေပါချေ၊ အဘယ်ကြောင့်ဆိုသော် သူ၏ စိတ်ထဲတွင် ကိုယ်ပွားအသစ်အတွက် ရုပ်သွင်သဏ္ဌာန်ကို ကြိုတင်တွေးတောထားပြီးဖြစ်သောကြောင့် ဖြစ်သည်။
အမှတ် ၃၀၀ ကုန်ဆုံးသွားခဲ့ပြီးနောက် ကိုယ်ပွား၏ ပုံ ရိပ်က စတင်ထွက်ပေါ်လာခဲ့သည်။
ထို့နောက် ထိုပုံရိပ်က တဖြည်းဖြည်း ထင်ရှားပြတ်သားလာခဲ့ပြီးနောက် လှပချောမောလွန်းလှသည့် မိန်းမပျိုတစ်ဦး၏ ပုံရိပ် ပေါ်ထွက်လာခဲ့တော့သည်။
သူမတွင် တောက်ပပြီး ကြည်လင်လှသည့် မျက်ဝန်းအစုံ ရှိနေပြီး ၎င်းမှာ တန်ဖိုးကြီးမားလှသည့် ရတနာနှစ်ပါးကဲ့သို့ပင် သူမ၏ လိမ္မာပါးနပ်မှုနှင့် ကြင်နာတတ်မှုများကို ဖော်ပြနေခဲ့သည်။
သူမ၏ မျက်ဝန်းအိမ်က မှောင်မိုက်သည့် ညဖက်တွင် တောက်ပနေသည့် ကြယ်တာရာများကဲ့သို့ပင် ဖြစ်ပြီး ၎င်းတို့က သူမ၏ ဖြူစင်ဝင်းပလှသည့် ပါးပြင်ထက်တွင် တည်ရှိနေသဖြင့် လွန်စွာ ဆွဲဆောင်မှုရှိလှပေသည်။
သူမ၏ ဆံနွယ်များက ပိုးသားကဲ့သို့ နူးညံ့ချောမွေ့နေပြီး ပခုံးထက်တွင် ဝေ့ဝဲကျနေကာ နက်မှောင်တောက်ပလျက် လင်းလက်နေခဲ့သည်။
သူမ၏ အပြုံးက နွေးထွေးပြီး ချိုသာလှသဖြင့် ဆောင်းရာသီ၏ နေရောင်ခြည်ကဲ့သို့ပင် လူသားတို့၏ နှလုံးသားကို နွေးထွေးစေနိုင်ပေသည်။
သူမက ပေါ့ပါးလှသည့် ဝတ်ရုံဖြူကို ဝတ်ဆင်ထားပြီး ဝတ်ရုံလက် က မြူခိုးများကဲ့သို့ပင် လွင့်မျောနေကာ ဝတ်ရုံစများ လှုပ်ရှားသွားသည့်အခါတိုင်းတွင် သူမ၏ နူးညံ့မှုနှင့် ဖြူစင်သည့် အော်ရာများက ပတ်ဝန်းကျင်ကို ငြိမ်းချမ်းတည်ငြိမ်မှုများ ပေးစွမ်းနေသကဲ့သို့ ခံစားရစေသည်။
သူမ၏ ကိုယ်ဟန်က သွယ်လျနွဲ့နှောင်းနေပြီး သိမ်မွေ့လှသည့် ခါးကျဉ်းကျဉ်း လေးက လှပနူးညံ့လှကာ လှုပ်ရှားမှုတိုင်းတွင် ယဉ်ကျေးသိမ်မွေ့သည့် အလှတရားများ ထွက်ပေါ်နေခဲ့သည်။
"တူလိုက်တာ... တကယ်ကို တူလွန်းလှတယ်" ချန်ကျီ ရှေ့မှောက်ရှိ ပုံရိပ်ကို ကြည့်ရင်း သူ့ကိုယ်သူ မသိလိုက်ဘဲ ရေရွတ်လိုက်မိတော့သည်။
ယခု ဖန်တီးလိုက်သည့် ကိုယ်ပွား၏ ရုပ်သွင်ကမူ လူအများက 'နတ်သမီးအစ်မတော်' ဟု ခေါ်တွင်ကြသည့် 'ကျောက်လင်းအာ' ၏ ရုပ်သွင်ပင် ဖြစ်သည်။
ခဏအကြာတွင် ကိုယ်ပွား ကျောက်လင်းအာက သူမ၏ နှုတ်ခမ်းနီနီလေးကို ဖွင့်ဟလိုက်၏။
"သခင်..."
ကျောက်လင်းအာ၏ အသံက နံနက်ခင်းတွင် တွန်ကျူးနေသည့် ငှက်ငယ်လေး၏ အသံကဲ့သို့ပင် ချိုသာငြိမ့်ညောင်းလှပေသည်။
ထိုအသံကို ကြားလိုက်ရသည့် အခါတွင် ချန်ကျီ၏ နှလုံးသားက လှုပ်ခတ်သွားခဲ့ရသည်။
တစ်ခဏချင်းမှာပင် အရာအားလုံးက အိမ်မက်ကဲ့သို့ မရေမရာ ဖြစ်သွားသကဲ့သို့ ခံစားလိုက်ရ၏။
ချန်ကျီက ကျောက်လင်းအာ၏ ရုပ်သွင်ကို ဆွံ့အစွာ ကြည့်နေမိသည်၊ ၎င်းမှာ သူ၏ မှတ်ဉာဏ်ထဲရှိ ပုံရိပ်နှင့် အတိအကျပင် တူညီလွန်းလှပေသည်။
"ဒါက ငါ့ရဲ့ ကိုယ်ပွားတစ်ခုပဲ ဖြစ်ပေမဲ့လည်း ဒီလိုမျိုး ကိုယ်ပွားတစ်ခုက ငါ့ရဲ့ ဘေးနားမှာ ပြုစုလုပ်ကျွေးနေတာကို မြင်ရတာကလည်း စိတ်ကြည်နူးစရာပဲ"
ချန်ကျီ ကျောက်လင်းအာကို ကြည့်ရင်း ခဏမျှ မိန်းမောသွားခဲ့သော်လည်း မကြာမီမှာပင် ပုံမှန်အတိုင်း ပြန်လည်ဖြစ်သွားခဲ့ပြီး သူ၏ တာအိုနှလုံးသား ကမူ အစဉ်အမြဲပင် ခိုင်မာမြဲမြံနေဆဲ ဖြစ်သည်။
ချန်ကျီက ညင်သာစွာ ပြောလိုက်၏။ "နောက်ဆိုရင် မင်းရဲ့ နာမည်က ကျောက်လင်းအာ ပဲ၊ ငါနဲ့အတူ အပြင်ကို ထွက်ခဲ့တော့"
ကျောက်လင်းအာက ချန်ကျီကို ယဉ်ကျေးစွာ အရိုအသေပေး လိုက်ပြီး ပြန်ဖြေသည်။ "ဟုတ်ကဲ့ပါ သခင်"
ထို့နောက်တွင်မူ ချန်ကျီနှင့် ကျောက်လင်းအာတို့၏ ပုံရိပ်များက အနန္တစျေးဆိုင်အတွင်းမှ တစ်ဦးပြီးတစ်ဦး ပျောက်ကွယ်သွားခဲ့ကြတော့သည်။