အခန်း ၃၀
Vol. 3 Ch. 30
အခန်း (၃၀) ယဲ့မိသားစု အစောင့်များထဲသို့ စိမ့်ဝင်ခြင်း
ဒီအချိန်တွင် ဝမ်နန်မြို့ပြင်ရှိ ကိုယ်ပွား ချန်ဖန်က အနန္တ နေရာလွတ်ထဲကနေ အစောင့်၏ အလောင်းကို ထုတ်ယူလိုက်၏။
မီးတောက်မန္တန်ကို နှိုးဆွ လိုက်ပြီး မီးလုံးတစ်လုံးကို အလောင်းပေါ်သို့ ပစ်ပေါက်လိုက်ရာ အလောင်းက ဖြည်းညှင်းစွာ ပြာအတိ ဖြစ်သွားခဲ့ရသည်။
အရာအားလုံး ပြီးမြောက်သွားသည့်အခါ ကိုယ်ပွား ချန်ဖန်က အနန္တ နေရာလွတ်ထဲသို့ ဝင်ရောက်သွား၏။
သူ ထပ်မံ ပေါ်ထွက်လာသည့်အချိန်တွင်မူ ချန်ကျီ၏ အိမ်တော် အတွင်းသို့ ရောက်ရှိနေခဲ့ပြီ ဖြစ်သည်။
"သခင်... အားလုံးကို ရှင်းလင်းပြီးပါပြီ"
"အင်း... ကောင်းကောင်းလုပ်နိုင်ခဲ့တယ်၊ အခုလောလောဆယ် ဒီနေရာမှာ မင်းကို သုံးဖို့ မလိုသေးဘူး။ မင်း ချင်းယွမ်ဂိုဏ်းကို သွားလိုက်တော့၊ အတော်ပဲ ချင်းယွမ်ဂိုဏ်းက တပည့်တွေ လက်ခံမယ့်အချိန်နဲ့ ကွက်တိကျနေတယ်"
"သခင်... ကျွန်တော်က သခင်လေးရဲ့ နာမည်နဲ့ သွားရမှာလား၊ ဒါမှမဟုတ်"
"မင်းရဲ့ ကိုယ်ပိုင်နာမည်ကိုပဲ သုံးလိုက်၊ ကျင့်ကြံခြင်းအဆင့်ကိုလည်း ဖုံးကွယ်ထားဖို့ မလိုဘူး။ မင်းက အဆင့်နိမ့် ဝိညာဉ်အမြစ် ဖြစ်နေပေမဲ့ ချီသန့်စင်ခြင်း အဆင့် ၇ ကျင့်ကြံခြင်းအဆင့်နဲ့ဆိုရင် ချင်းယွမ်ဂိုဏ်းမှာ အပြင်စည်းတပည့်တစ်ယောက် ဖြစ်ဖို့ဆိုတာ ပြဿနာမရှိနိုင်ဘူး"
"ဟုတ်ကဲ့ပါ"
"ချင်းယွမ်ဂိုဏ်းကို ရောက်သွားရင် အဲဒီတာဝန်ခံကို ရှာကြည့်ဖို့ မမေ့နဲ့ဦး၊ သူ ဘယ်လို နေထိုင်ဖြတ်သန်းနေလဲဆိုတာကို ကြည့်ရမယ်"
"သခင်... ကျွန်တော် ချင်းယွမ်ဂိုဏ်းကို သွားတဲ့အခါ တခြား ညွှန်ကြားချက်များ ရှိပါသေးသလား"
"မင်း ချင်းယွမ်ဂိုဏ်းမှာ တပည့်ကောင်းတစ်ယောက်ပီပီ ကောင်းကောင်းမွန်မွန် နေထိုင်သွားရင် ရပါပြီ"
"ဟုတ်ကဲ့ပါ သခင်"
ချန်ဖန်ကို ချင်းယွမ်ဂိုဏ်းသို့ လွှတ်ရန်မှာ ချန်ကျီ အစောကတည်းက ကြိုတင် ဆုံးဖြတ်ထားသည့် အစီအစဉ် ဖြစ်သည်။
မူလခန္ဓာကိုယ်ပိုင်ရှင်၏ နောက်ဆုံးဆန္ဒကိုလည်း သူ ဖြည့်ဆည်းပေးရဦးမည် မဟုတ်ပါလော။
ထို့ပြင် ချင်းယွမ်ဂိုဏ်းက မည်သို့ပင်ဆိုစေကာမူ ကျင့်ကြံခြင်းဂိုဏ်းတစ်ခု ဖြစ်ခြင်းကြောင့် ကူးပြောင်းရောက်ရှိလာသည့် ချန်ကျီအနေဖြင့်လည်း သွားရောက် အကဲခတ်ချင်မိသည်။
၎င်းအပြင် ချင်းယွမ်ဂိုဏ်းအတွင်း၌ ယဲ့မိသားစုဝင် တပည့်များလည်း ရှိနေသဖြင့် သူတို့၏ အခြေအနေ အစစ်အမှန်ကိုပါ သွားရောက် စုံစမ်းရန် လိုအပ်သေး၏။
အငြိုးအတေးကို လက်တုံ့မပြန်ဘဲ နေတတ်ခြင်းမှာ သူ ချန်ကျီ၏ အကျင့်စရိုက် မဟုတ်ချေ။
အစပြုခဲ့သည်မှာ ဆိုင်ရှင် ထုံ ဆီက ဖြစ်သော်လည်း မြစ်ဖျားခံရာ အရင်းအမြစ်မှာမူ ယဲ့မိသားစုတစ်ခုလုံး ဖြစ်သည်။
ထို့ပြင် ယဲ့မိသားစု၏ ရည်မှန်းချက်ကြီးမားမှုက နောက်ဆုံးတွင် ဘေးဒုက္ခတစ်ခု ဖြစ်လာပေလိမ့်မည်။
ချန်ကျီအနေဖြင့် ဝမ်နန်မြို့တွင် အေးအေးချမ်းချမ်းနှင့် ထာဝရ ဖြတ်သန်းသွားချင်ပါက ယဲ့မိသားစုကို ရှောင်ကွင်းသွား၍ မရနိုင်ချေ။
ယဲ့မိသားစု၏ သံနက်မိုင်းတွင်းအတွင်း၌မူ...
အစောင့်အသွင် ဖန်တီးထားသည့် ကိုယ်ပွားက ကိုယ်ပွား ကျောက်ယွမ်တို့ ရှိရာ မိုင်းတွင်းထဲကနေ လှမ်းထွက်လာခဲ့ရုံရှိသေးရာ အခြားအစောင့် အနည်းငယ်က လျှောက်လှမ်းလာကြသည်။
ဦးဆောင်လာသူမှာ ကျင့်ကြံခြင်းအဆင့် ချီသန့်စင်ခြင်း အဆင့် ၈ ရှိသည့် အဖိုးကြီး တစ်ဦး ဖြစ်ပြီး သူက မျက်မှောင်ကြုတ်ကာ မေးမြန်းလိုက်၏။ "ဘာဖြစ်တာလဲ အစောက ဝိညာဉ်စွမ်းအား လှိုင်းကို ခံစားလိုက်ရတယ်"
"ဘာမှမဖြစ်ပါဘူး၊ မိုင်းလုပ်သားတစ်ယောက်က နေမကောင်းချင်ယောင်ဆောင်ပြီး ပျင်းနေလို့ ရှင်းလင်းလိုက်တာပါ" ကိုယ်ပွား အစောင့်က ပြန်လည်ဖြေကြားလိုက်သည်။
ထိုဦးဆောင်သည့် အဖိုးကြီး စကားပြောနေစဉ်မှာပင် အခြား ယဲ့မိသားစုဝင်များက မိုင်းတွင်းထဲသို့ ဝင်ရောက် စစ်ဆေးပြီး ဖြစ်နေကြပြီ ဖြစ်သည်။
သို့သော် မိုင်းတွင်းထဲတွင်မူ တွန့်ဆုတ်ကြောက်ရွံ့နေကြသည့် ကျောက်ယွမ်တို့အဖွဲ့ကိုသာ မြင်တွေ့ရပြီး ကြည့်ရုံနှင့်ပင် ဆုံးမခြင်း ခံထားရသည့် ပုံစံမျိုး ဖြစ်နေသဖြင့် မည်သည့် ထူးခြားချက်ကိုမျှ ရှာမတွေ့ခဲ့ကြချေ။
မိုင်းတွင်းထဲကနေ ထွက်လာသည့် စစ်ဆေးသူက အဖိုးကြီး ကို မျက်ရိပ်ပြလိုက်၏။
"ဘာမှမဖြစ်ရင် ပြီးတာပါပဲ၊ ကျန်းဖျင်... မင်း မကြာခင်က ကျင့်ကြံခြင်းအဆင့် ဘယ်လိုလဲ၊ ဘယ်အချိန်မှာ အဆင့်တက်နိုင်မလဲ"
ထိုအဖိုးကြီး က သူ့ကို နာမည်ခေါ်လိုက်သည့်အခါ ကိုယ်ပွားက ယခု သူ ဖန်တီးထားသည့် ယဲ့မိသားစုအစောင့်၏ နာမည်မှာ ယဲ့ကျန်းဖျင် ဖြစ်ရမည်ကို သိရှိသွားခဲ့သည်။
ကိုယ်ပွား ယဲ့ကျန်းဖျင်က ပြန်ဖြေလိုက်၏။ "မကြာခင် အဆင့်တက်တော့မှာပါ၊ မကြာသေးခင်ကပဲ ကျင့်ကြံခြင်းအဆင့်က လှုပ်ခတ်မှု အရိပ်အယောင် ပြနေပါတယ်"
"ကောင်းတယ်... နောက်နောင် မျှော်လင့်ချက်ရှိတာပဲ၊ ငါတို့ ယဲ့မိသားစုရဲ့ အနာဂတ်က မင်းတို့လို လူငယ်တွေအပေါ်မှာပဲ မူတည်တော့တယ်၊ ကဲ... ဒီမှာ ဘာမှမရှိတော့ရင် အားလုံးပဲ ပြန်ပြီး ကျင့်ကြံကြတော့။ အခုအချိန်က မိသားစုမှာ လူအင်အား လိုအပ်နေတဲ့အချိန်ပဲ၊ မိသားစုအကြီးအကဲက အမိန့်ချမှတ်ထားပြီးပြီ ဖြစ်လို့ လူတိုင်းရဲ့ ကျင့်ကြံခြင်း အရင်းအမြစ်တွေကို တိုးမြှင့်ပေးထားတယ်။ အားလုံးပဲ မိသားစုရဲ့ မျှော်လင့်ချက်ကို အပျက်အစီးမခံကြနဲ့"
"ဟုတ်ကဲ့ပါ"
ယဲ့မိသားစု အစောင့်များအားလုံး ထွက်သွားကြပြီး ကိုယ်ပွားသည်လည်း ယဲ့မိသားစုအတွင်းသို့ အောင်မြင်စွာ စိမ့်ဝင်နိုင်ခဲ့ပြီ ဖြစ်သည်။
ကိုယ်ပွား ယဲ့ကျန်းဖျင်က သူ ပုံမှန်နားနေကျ နေရာသို့ ပြန်သွားကာ ကျင့်ကြံချင်ယောင်ဆောင်နေလိုက်၏။
ဒါတွေအားလုံးက ကျောက်ယွမ်တို့အဖွဲ့ ဒီရက်ပိုင်းအတွင်း သေချာ သတိပြုမိထားခဲ့သည့် အချက်အလက်များ ဖြစ်သည်။
ချန်ကျီ၏ အစီအစဉ်က အားလုံး ချောမွေ့နေပြီး နောက်ထပ် လုပ်ဆောင်ရမည့်အရာမှာ ကိုယ်ပွား ယဲ့ကျန်းဖျင်အပေါ်တွင်သာ မူတည်တော့သည်။
နောက်ထပ် နှစ်ရက် ကုန်ဆုံးသွားခဲ့သည်။ ကိုယ်ပွား ယဲ့ကျန်းဖျင်က တစ်ဖက်တွင် ကိုယ်ပွား ကျောက်ယွမ်တို့အဖွဲ့ကို စောင့်ကြပ်ချင်ယောင်ဆောင်ရင်း အခြားတစ်ဖက်တွင်မူ မိုင်းတွင်း အတွင်းရှိ အခြေအနေများကို အကဲခတ်နေခဲ့သည်။
ရံဖန်ရံခါတွင် အခြား ယဲ့မိသားစုဝင်များနှင့် စကားစမြည်ပြောဆိုရင်း မသိသေးသည့် အခြေအနေများကို စုံစမ်းထောက်လှမ်းခဲ့၏။
ပိုမိုသိရှိလာရလေလေ ကိုယ်ပွား ယဲ့ကျန်းဖျင်က သူ၏ သရုပ်မှန်အသစ်ကို ပိုမိုကျွမ်းကျင်လာလေလေ ဖြစ်သည်။
ယဲ့မိသားစုက ဤသံနက်မိုင်းတွင်းပေါ်တွင် ချမှတ်ထားသည့် စီစဉ်မှုများကိုလည်း ပိုမို ရှင်းလင်းစွာ သိမြင်လာခဲ့ရသည်။
ယခုအခါ သူက ယဲ့မိသားစုဝင်များကြားထဲသို့ လုံးဝ ဝင်ဆံ့သွားခဲ့ပြီဖြစ်ရာ မည်သူတစ်ဦးတစ်ယောက်ကမျှ သူ့ကို သံသယမဝင်ကြချေ။
ဒီနေ့တွင်မူ ကျင့်ကြံချင်ယောင်ဆောင်နေသည့် ကိုယ်ပွား ယဲ့ကျန်းဖျင်သည် တစ်စုံတစ်ဦးက သူ့ကို လှမ်းခေါ်နေသည့်အသံကို ကြားလိုက်ရသည်။
"ကျန်းဖျင်... မင်းတို့အဖွဲ့ကို ခေါ်ပြီး အပြင်မှာ ကင်းလှည့်ဖို့ သွားတော့၊ ကင်းလှည့်တဲ့အခါ သေချာ ဂရုစိုက်ကြ"
စကားပြောလာသူမှာ အခြားမဟုတ်ဘဲ ရှေ့ညက လာရောက်စစ်ဆေးခဲ့သည့် ဦးဆောင်သူ အဖိုးကြီး ပင် ဖြစ်သည်။
"ဟုတ်ကဲ့ပါ" ယဲ့ကျန်းဖျင်က တိုတိုတုတ်တုတ်ပင် ပြန်ဖြေလိုက်၏။
မိုင်းတွင်းထဲရှိ ယဲ့မိသားစု အစောင့်များက နေ့စဉ် မိုင်းတွင်းအပြင်တွင် အလှည့်ကျ ကင်းလှည့်ရသည့် စည်းကမ်းချက် ရှိသည်။
ယဲ့မိသားစု အစောင့်များ၏ ကင်းလှည့်အဖွဲ့က တစ်ကြိမ်လျှင် သုံးယောက်တစ်တွဲ ဖြစ်သည်။
တစ်ခါစီတွင် လူအင်အား စီစဉ်ပြီး အပြင်ဘက်သို့ သွားရောက် ကင်းလှည့်ခိုင်းရသည့် ရည်ရွယ်ချက်မှာလည်း ဤသံနက်မိုင်းတွင်းကြီးကို သူတစ်ပါး ရှာမတွေ့စေရန်အတွက် ဖြစ်သည်။
ကိုယ်ပွား ယဲ့ကျန်းဖျင်နှင့်အတူ လိုက်ပါကင်းလှည့်သူ နှစ်ယောက်မှာလည်း သူ ဒီရက်ပိုင်းအတွင်း အတော်အတန် ရင်းနှီးသွားခဲ့သည့် လူနှစ်ယောက် ဖြစ်သည်။
တစ်ယောက်က ယဲ့ကျန်း ဖြစ်ပြီး အခြားတစ်ယောက်ကမူ ယဲ့ထုံ ဖြစ်သည်။
သုံးယောက်စလုံး၏ ကျင့်ကြံခြင်းအဆင့်က တူညီကြပြီး ချီသန့်စင်ခြင်း အဆင့် ၆ များ ဖြစ်ကြ၏။
လူသုံးယောက်က လမ်းတစ်လျှောက် စကားတပြောပြောနှင့် မိသားစုအတွင်းရှိ လက်ရှိအခြေအနေများကို လာမည့်အကြောင်းအရာအဖြစ် ဆွေးနွေးခဲ့ကြပြီး ယဲ့မိသားစုတွင် လက်ရှိ အရေးအပါဆုံးဖြစ်သည့် ပါရမီရှင် ယဲ့ဖေးရန် အကြောင်းကိုပါ ပြောဆိုခဲ့ကြသည်။
စကားပြောနေစဉ်အတွင်း အခြားလူနှစ်ယောက်၏ မျက်နှာပေါ်တွင် ရံဖန်ရံခါ မနာလို အားကျသည့် အရိပ်အယောင်များ ပေါ်ထွက်နေခဲ့သည်။
သို့သော် ထိုအားကျမှုထဲတွင်မူ မနာလိုဝန်တိုမှု အငွေ့အသက်အချို့ ကိန်းအောင်းနေပုံရ၏။
"ယဲ့ဖေးရန်က ဒီရက်ပိုင်း နည်းနည်း လွန်လာပြီ၊ မိသားစုခေါင်းဆောင် ရဲ့ အမိန့်ကိုတောင် မနာခံချင်တော့ဘူး"
"ဟုတ်ပ... ကြားရသလောက်တော့ ပြီးခဲ့တဲ့အကြိမ်က မိသားစု အစည်းအဝေးခေါ်တာတောင် သူက ပြန်မလာချင်ဘူးတဲ့"
"မတတ်နိုင်ဘူးလေ... ဘာပဲဖြစ်ဖြစ် သူ့မှာ အဖေကောင်းရှိနေတာကိုး၊ မိသားစုရဲ့ ကျင့်ကြံခြင်း အရင်းအမြစ် အတော်များများကို သုံးစွဲထားရလို့သာ အဲဒီလောက် မြန်မြန် ကျင့်ကြံနိုင်တာ နေမှာပါ"
"မှန်တယ်... အရင်တုန်းက သူ့ရဲ့ ကျင့်ကြံခြင်းအမြန်နှုန်း က ဒီလောက်အထိ မမြန်ပါဘူး"
သူတို့ ပြောဆိုနေကြသည့် စကားများကို နားထောင်ရင်း ကိုယ်ပွား ယဲ့ကျန်းဖျင်က ပထမဆုံးအကြိမ် ကြားဖူးခြင်း ဖြစ်သောကြောင့် သိပ်မသိလှသဖြင့် လိုက်ပါ ထောက်ခံနေရုံသာ ပြုလုပ်နိုင်ခဲ့သည်။
ဤကဲ့သို့သော စကားမျိုးကို ထိုလူများက မိုင်းတွင်းအတွင်း၌မူ မပြောရဲကြချေ။
ယဲ့ဖေးရန်သည် ယဲ့မိသားစုက လက်ရှိအချိန်တွင် အလေးအနက်ဆုံး ထားရှိသည့် မျိုးဆက်သစ်ဖြစ်ရာ အကယ်၍ အခြားသူများက သူတို့၏ ဝေဖန်ပြောဆိုမှုကို သိရှိသွားပါက အပြစ်ပေးခြင်း ခံရမည်မှာ အသေအချာပင် ဖြစ်သည်။
သို့သော် ယခုအခါ အပြင်သို့ ရောက်ရှိနေခြင်းကြောင့် သူတို့က အတားအဆီးမဲ့စွာ ပြောဆိုနေကြခြင်း ဖြစ်သည်။
၎င်းအပြင် မိုင်းတွင်းနှင့်လည်း ပိုမို ဝေးကွာလာခဲ့ပြီဖြစ်ရာ တစ်စုံတစ်ဦးက ချောင်းမြောင်းနားထောင်မည်ကို စိုးရိမ်စရာ မလိုတော့ချေ။
"ကျန်းဖျင်... မင်း ဒီနေ့ ဘာလို့ စကားမပြောတာလဲ၊ အရင်တုန်းကဆို ယဲ့ဖေးရန်ကို မင်း အများဆုံး ဆဲဆိုနေကျလေ"
"ဟုတ်တယ်... မိုင်းတွင်းနဲ့ ဒီလောက်တောင် ဝေးနေပြီပဲ၊ ဘာကို ကြောက်နေတာလဲ"
ကိုယ်ပွား ယဲ့ကျန်းဖျင်က ခပ်ပြုံးပြုံးဖြင့် "ဟမ့်... ဟုတ်လို့လား"
ယဲ့ကျန်းနှင့် ယဲ့ထုံတို့က ယဲ့ကျန်းဖျင်ကို ဇဝေဇဝါဖြင့် ကြည့်လိုက်ကြပြီး သူ ယနေ့တွင် အနည်းငယ် ထူးဆန်းနေသည်ဟု ခံစားလိုက်ရသည်။
"ကျန်းဖျင်... မင်း ဘာဖြစ်နေတာလဲ"
"ဟဲဟဲ..." ယဲ့ကျန့်ဖျင်က စကားမပြောဘဲ ရယ်ရုံသာ ရယ်နေလိုက်၏။
သူ ရယ်မောရခြင်းအကြောင်းမှာ ဤလူနှစ်ယောက်က သေလူ ဖြစ်တော့မည်ကို သူတို့ကိုယ်သူတို့ မသိရှိသေးသောကြောင့် ဖြစ်သည်။
"မလှုပ်ရှား ရတာ ကြာပြီပဲ၊ ငါတို့တွေ လေ့ကျင့်ကြည့်ကြမလား" ပြောရင်း ယဲ့ကျန်းဖျင်၏ လက်ထဲတွင် လှံရှည်တစ်စင်း ပေါ်ထွက်လာခဲ့ရာ ၎င်းမှာ ရိုလုံ လှံ ဖြစ်သည်။
ယဲ့ကျန်းနှင့် ယဲ့ထုံတို့က ကိုယ်ပွား ယဲ့ကျန်းဖျင်၏ လုပ်ရပ်ကြောင့် ကြောင်အသွားကြပြီး နေရာတွင်ပင် ဆွံ့အသွားခဲ့ကြရသည်။
ရိုလုံလှံ ပေါ်ထွက်လာသည့်အချိန်မှာပင် သူတို့က ရိုလုံလှံ၏ အော်ရာ ကို ခံစားလိုက်ရပြီး ဖြစ်သည်။
"ဆန်းကြယ် အဆင့် လက်နက်လား"
"ဟားဟား... မင်းတို့ မျက်စိရှိသေးတာပဲ"
ကိုယ်ပွား ယဲ့ကျန်းဖျင်က အပိုစကားများ ဆက်မပြောတော့ချေ၊ ကောင်းကင်ကိုးခု နဂါးဟိန်းသံလှံသိုင်းကို သူလည်း တတ်ကျွမ်းထားသည် မဟုတ်ပါလော။
လှံကို မြှောက်ကာ ချိန်ရွယ်လိုက်ပြီး "နဂါးဟိန်း ကောင်းကင်ကိုးခု" ဟူသော သိုင်းကွက် တစ်ကွက်ကို ထုတ်ဖော်လိုက်ရာ လှံသွားက နဂါး ဟိန်း လိုက်သကဲ့သို့ ကောင်းကင်တုန်ဟည်းမတတ် အသံကြီး ထွက်ပေါ်လာပြီး လှံကိုယ်ထည်မှ ပြင်းထန်လှသည့် နဂါးဟိန်းသံများ ချက်ချင်း ပေါက်ကွဲထွက်လာခဲ့သည်။
လှံသွားက အလွန်မြန်ဆန်သော အမြန်နှုန်း ဖြင့် ယဲ့ကျန်းနှင့် ယဲ့ထုံ နှစ်ဦးထံသို့ ထိုးနှက်သွားခဲ့ရာ ပြင်းထန်ထက်မြလှသည့် တိုက်ခိုက်မှုက လျင်မြန်သလို တိကျလွန်းလှပြီး သောင်းကျန်းနေသည့် နဂါးကြီးတစ်ကောင်ကဲ့သို့ လူနှစ်ဦးကို ကိုက်ခဲရန် ပြေးဝင်သွားတော့သည်။
"ယဲ့ကျန်းဖျင်... မင်း ရူးသွားပြီလား"
ယဲ့ကျန်းနှင့် ယဲ့ထုံတို့က ဤလှံချက် ပြေးဝင်လာသည်ကို မြင်လိုက်ရသည့်အခါ သူတို့ လုံးဝ ခုခံနိုင်မည်မဟုတ်ကြောင်း သိရှိသွားကြသည်။
သူတို့သည် အသက်ဘေးက ကာကွယ်မည့် နည်းလမ်းမှန်သမျှကို ရူးသွပ်စွာ ထုတ်ဖော် ခုခံရင်း တစ်ပြိုင်နက်တည်းမှာပင် အော်ဟစ်နေကြ၏။
သူတို့ မည်သို့မျှ စဉ်းစား၍မရနိုင်သည်မှာ မိသားစုဝင်အချင်းချင်း ဖြစ်သည့် ယဲ့ကျန်းဖျင်က ဘာကြောင့် ရုတ်တရက် တိုက်ခိုက်လာရသလဲ ဆိုတာပင် ဖြစ်သည်။
ထို့ပြင် အသုံးပြုထားသည်မှာလည်း ဆန်းကြယ် အဆင့် လက်နက် ဖြစ်သလို ဤသိုင်းကွက်ကိုလည်း သူတို့ တစ်ခါမျှ မမြင်ဖူးကြချေ။
ခဏချင်းအတွင်းမှာပင် ကိုယ်ပွား ယဲ့ကျန်းဖျင်က "နဂါးဟိန်းသံ ကောင်းကင်ကိုးခု" အကွက်ကို ဆက်တိုက် ထိုးနှက်လိုက်သည်။
ယဲ့ကျန်းနှင့် ယဲ့ထုံတို့၏ ခန္ဓာကိုယ်တစ်ခုလုံးတွင် လှံဒဏ်ရာ အပေါက်များစွာ ဗြန်းဗြန်းတောက် ဖြစ်သွားခဲ့ရပြီး သူတို့၏ ခုခံမှုက မည်သည့် အကျိုးသက်ရောက်မှုမျှ မရှိခဲ့ချေ။
အကျိုးသက်ရောက်မှု မရှိသည်မှာ သဘာဝပင် ဖြစ်သည်၊ ကျင့်ကြံခြင်းအဆင့်အရ ကိုယ်ပွား ယဲ့ကျန်းဖျင်က သူတို့ထက် နှစ်ဆင့်မျှ မြင့်မားနေသည်ကို ထားဦးတော့။
ဂရန်းမာစတာ အဆင့် ကျွမ်းကျင်မှုရှိသည့် ကောင်းကင်ကိုးခု နဂါးဟိန်းသံလှံသိုင်းကို ချီသန့်စင်ခြင်း အဆင့် ၅ မျှသာ ရှိသည့် သူတို့က ခုခံနိုင်စွမ်း ရှိမည် မဟုတ်ပါချေ။