အခန်း ၄၀၈

အခန်း (၄၀၈) ခြေနင်းတုံး အဖြစ် အသုံးပြုခံရခြင်း

ကြိုးမျှင်တစ်ထောင် ကျင့်စဉ် အဆင့်တက်သွားခြင်းက ချန်ဖေး၏ အားကောင်းပြီးသား စိတ်ပိုင်းဆိုင်ရာ ကာကွယ်ရေးကို ပို၍ အံ့မခန်း ဖြစ်သွားစေသည်။ တစ်ချိန်တည်းမှာပင် သူ ဖန်တီးနိုင်သော စိတ်ဝိညာဉ် အပိုင်းအစ အရေအတွက်ကလည်း သိသိသာသာ တိုးလာခဲ့သည်။

သူ၏ စိတ်ပိုင်းဆိုင်ရာ ကိုယ်ပိုင် ကြီးထွားမှု အမြန်နှုန်းပင် သိသိသာသာ တိုးလာခဲ့၏။ သို့သော် ချန်ဖေးက ယခုအခါ နှလုံးသားနယ်မြေမှ နှလုံးသား မိစ္ဆာများကို ရမ်းသန်း သတ်ဖြတ်နိုင်ပြီ ဖြစ်သောကြောင့် ဤတိုးတက်မှုက သူ့အတွက် အကျိုးသက်ရောက်မှု အနည်းဆုံး ဖြစ်သည်။

ဆယ်ရက်ကျော် ကျင့်ကြံပြီးနောက် ချန်ဖေး၏ ကျင့်ကြံမှု အဆင့်က တစ်ရှိန်ထိုး တိုးတက်လာခဲ့ပြီး သူ စောင့်မျှော်နေသော မူလ ဝိညာဉ် ဒီရေက နောက်ဆုံးတွင် ရောက်ရှိလာတော့မည် ဖြစ်သည်။

မည်သူတစ်ဦးတစ်ယောက်ကမျှ သတိပေးစရာ မလိုဘဲ ကောင်းကင်နှင့်မြေကြီး၏ မူလစွမ်းအင်များ အပြောင်းအလဲ အချို့ ဖြစ်ပေါ်နေသည်ကို ချန်ဖေး ရှင်းလင်းစွာ ခံစားသိရှိနိုင်ပြီး ဤအပြောင်းအလဲများ၏ အရင်းအမြစ်မှာ အင်ပါယာ မြို့တော်၏ အတွင်းတွင် ဖြစ်သည်။

အင်ပါယာ မြို့တော် တစ်ခုလုံးမှာ ထိုအခိုက်အတန့်တွင် တိတ်ဆိတ်နေပြီး လူတိုင်းက မူလ ဝိညာဉ် ဒီရေ ရောက်ရှိလာမည့် အချိန်ကို တိတ်တဆိတ် စောင့်မျှော်နေကြ၏။

ဒွာရသန့်စင်ခြင်း အဆင့်မှသည် သိုင်းပညာလမ်းစဉ်သို့ အသစ်ရောက်လာသော အရေပြားသန့်စင်ခြင်း အဆင့်များအထိ လူတိုင်းက ဤမူလ ဝိညာဉ် ဒီရေမှ တစ်စုံတစ်ရာ အကျိုးအမြတ် ရရှိရန် မျှော်လင့်နေကြသည်။ မည်မျှပင် တိုးတက်စေကာမူ တိုးတက်မှု မှန်သမျှက အမြဲတမ်း ကောင်းမွန်သည်။

အင်ပါယာ မြို့တော်၏ မြို့တော်အတွင်းဘက် ဘေးတွင် ထျန်းယန် စံအိမ်မှ ဒွာရသန့်စင်ခြင်း အဆင့် ပညာရှင်များ စုဝေးနေသော စံအိမ်တစ်ဆောင် ရှိသည်။

မူလ ဝိညာဉ် ဒီရေ ဖြစ်ပေါ်လာသောအခါ မူလ ဝိညာဉ် ဒီရေ၏ အကျိုးသက်ရောက်မှုကို အများဆုံး ရရှိစေရန် အင်ပါယာ မြို့တော်က ဝိညာဉ်စွမ်းအင် အပြောင်းအလဲကို အစီအရင်ဖြင့် ပိတ်လှောင်ထားမည် ဖြစ်သည်။

ထို့ကြောင့် ထျန်းယန် စံအိမ်မှ လူများက မြို့တော်အတွင်းဘက်သို့ စောစီးစွာ ရောက်ရှိလာကြခြင်း ဖြစ်သည်။

ထျန်းယန် စံအိမ်မှ လူများအတွက်ပင်လျှင် မူလ ဝိညာဉ် ဒီရေ တစ်ခုစီတိုင်းသည် လက်လွတ်မခံနိုင်သော ကြီးကျယ်ခမ်းနားသည့် အခမ်းအနား တစ်ခု ဖြစ်သည်။ အခွင့်အရေးကို ဆုပ်ကိုင်နိုင်ပါက သူတို့၏ ကျင့်ကြံမှု အဆင့်ကို ကြီးမားစွာ တိုးတက်စေနိုင်ပြီး နှစ်အတော်ကြာ ပြင်းပြင်းထန်ထန် ကျင့်ကြံရမည့် အချိန်များကို သက်သာစေနိုင်သည်။

"နတ်ဘုရား ဆေးလုံးကို ပြင်ဆင်ထားကြ..."

နင်းဖူရှန်းက သူ၏ ဂိုဏ်းတူညီအစ်ကိုများကို ကြည့်၍ အသံတိမ်တိမ်ဖြင့် ပြောလိုက်၏။

"ဂိုဏ်းတူအစ်ကို နင်း... ကျွန်မတို့ အားလုံး အဆင်သင့်ပါပဲ..."

ထန်ထိုက်ထင်က သူမ၏ လက်ထဲရှိ ဆေးပုလင်းကို လှုပ်ယမ်း၍ ပြုံးလိုက်သည်။

နင်းဖူရှန်းက ခေါင်းညိတ်လိုက်ပြီး ဘာမှ ထပ်မပြောတော့ချေ။ ထျန်းယန် စံအိမ်မှ လူများ အနေဖြင့် သူတို့တွင် ဤမျှလောက် အခြေခံ အသိပညာ ရှိသင့်သည်။ နင်းဖူရှန်း၏ စောစောက စကားမှာ ယဉ်ကျေးစွာ သတိပေးခြင်း သက်သက်သာ ဖြစ်သည်။

ထန်ထိုက်ထင်က သူမ၏ လက်ထဲရှိ နတ်ဘုရား ဆေးလုံးကို စူးစမ်းလိုစိတ် အနည်းငယ်ဖြင့် ကြည့်လိုက်၏။ ဤသည်မှာ သူမ နတ်ဘုရား ဆေးလုံးကို ပထမဆုံး အကြိမ် သောက်သုံးဖူးခြင်း ဖြစ်သည်။ ခန္ဓာကိုယ် ကြံ့ခိုင်ခြင်း အဆင့်တွင် ရှိစဉ်ကပင် မူလ ဝိညာဉ် ဒီရေ ရှိသော်လည်း နတ်ဘုရား ဆေးလုံး ကဲ့သို့သော အရာမျိုး ဘယ်သောအခါမှ မရရှိခဲ့ဖူးချေ။

ထန်ထိုက်ထင်က အခြား ဂိုဏ်းတူအစ်ကို၊ အစ်မများထံမှ ကြားဖူးသည်မှာ မူလ ဝိညာဉ် ဒီရေ ရောက်ရှိလာသောအခါ နတ်ဘုရား ဆေးလုံးက စိတ်အာရုံကို မူလ ဝိညာဉ် ဒီရေ အတွင်းရှိ ဝိညာဉ်စွမ်းအင်နှင့် တိုက်ရိုက် တိုက်မိစေပြီး ကောင်းကင်နှင့်မြေကြီး၏ စွမ်းအားကို ငှားရမ်းကာ ကျင့်စဉ်များကို အတင်းအကျပ် နားလည်သဘောပေါက်စေနိုင်သည်ဟု ဆိုသည်။

မူလ ဝိညာဉ် ဒီရေက ကျင့်ကြံမှုကို မြှင့်တင်ပေးနိုင်သကဲ့သို့ ကျင့်စဉ်များ နားလည်သဘောပေါက်မှုကိုလည်း အရှိန်မြှင့်တင်ပေးနိုင်သည်။ ခန္ဓာကိုယ် ကြံ့ခိုင်ခြင်း အဆင့် အများစုက ပထမ နည်းလမ်းကို ရွေးချယ်ကြမည် ဖြစ်သည်။

ဒွာရသန့်စင်ခြင်း အဆင့်များအတွက်မူ၊ အထူးသဖြင့် ထျန်းယန် စံအိမ်မှ လူများအတွက် ကျင့်စဉ်များကို အသေးစိတ် နားလည်သဘောပေါက်ခြင်းက အရေးအကြီးဆုံး ဖြစ်သည်။ သူတို့၏ ကျင့်စဉ် နားလည်မှုက အမီလိုက်နိုင်သရွေ့ ထျန်းယန် စံအိမ်တွင် သူတို့၏ ကျင့်ကြံမှု အဆင့်ကို မြှင့်တင်ရန် ကူညီပေးမည့် သယံဇာတ အလုံအလောက် ရှိသည်။

နတ်ဘုရား ဆေးလုံးများ ဖော်စပ်ရန်မှာ အလွန် ခက်ခဲပြီး ထျန်းယန် စံအိမ်တွင်ပင် အရေအတွက် အကန့်အသတ်သာ ရှိသည်။ ကံကောင်းစွာဖြင့် မူလ ဝိညာဉ် ဒီရေက နှစ်အနည်းငယ် ကြာမှ တစ်ကြိမ်သာ ရောက်ရှိလာသဖြင့် နောက်ထပ် တစ်သုတ် ဖော်စပ်ရန် အချိန် လုံလုံလောက်လောက် ရှိသည်။

နင်းဖူရှန်း၏ မျက်လုံးများက ရုတ်တရက် အနည်းငယ် လက်ခနဲ ဖြစ်သွားပြီး မြို့တော်အတွင်းဘက်သို့ လှည့်ကြည့်လိုက်၏။ သူ၏ အာရုံခံစားမှုတွင် အလွန် အားကောင်းသော ဝိညာဉ်စွမ်းအင် တစ်ခုက တစ်နေရာရာမှ ထွက်ပေါ်လာပြီး အင်ပါယာ မြို့တော် အတွင်းရှိ ကောင်းကင်နှင့်မြေကြီး၏ မူလစွမ်းအင်များ ချက်ချင်း ပြောင်းလဲသွားသည်။

နင်းဖူရှန်း၏ ဘေးနားရှိ လူများကလည်း ဤအရာကို တစ်ယောက်ပြီး တစ်ယောက် သတိပြုမိသွားကြပြီး အလျင်အမြန် တင်ပျဉ်ခွေ ထိုင်ကာ နတ်ဘုရား ဆေးလုံးကို မျိုချလိုက်ကြသည်။

နောက်တစ်ခဏတွင် မြေပြင်ပေါ်၌ အစီအရင် ပုံကြမ်း တစ်ခု လင်းလက်သွားပြီး ထျန်းယန် စံအိမ် အဖွဲ့ဝင်များ၏ ချီစွမ်းအင်များကို တစ်ခုတည်းအဖြစ် ပေါင်းစပ်ပေးလိုက်သည်။ ဤပုံကြမ်းက သူတို့ကို ဝိညာဉ်စွမ်းအင်၏ တိုက်ခိုက်မှုများကို ပိုမို ကောင်းမွန်စွာ လက်ခံရရှိစေပြီး ကျင့်စဉ်များ နားလည်သဘောပေါက်မှုကို ကူညီပေးမည် ဖြစ်သည်။

ကြီးမားသော အင်အားစုများက ဘာကြောင့် ဤမျှ အားကောင်းရသနည်း။ ကံကြမ္မာကို ဖိနှိပ်ထားသော အားကောင်းသည့် ဒွာရပေါင်းစည်းခြင်း အဆင့် ပညာရှင်များ ရှိခြင်းအပြင်၊ အဓိကသော့ချက်မှာ ကျင့်ကြံခြင်း၏ ကဏ္ဍပေါင်းစုံတွင် အခြားသူများထက် ခြေတစ်လှမ်း အမြဲတမ်း စောရောက်နိုင်စွမ်း ရှိခြင်းပင် ဖြစ်သည်။

သိုင်းပညာ ကျွမ်းကျင်မှု လမ်းကြောင်း ဆိုသည်မှာ အမြဲတမ်း ခြေလှမ်းတစ်လှမ်းပြီး တစ်လှမ်း ရှေ့ရောက်နေခြင်း ဖြစ်သည်။ သင် အနည်းငယ် နောက်ကျကျန်ခဲ့ပြီး အမီလိုက်နိုင်မည်ဟု ထင်ပါက သင် မော့ကြည့်လိုက်သောအခါ သင့်ရှေ့မှ လူ ပျောက်ကွယ်သွားပြီ ဖြစ်ကြောင်း တွေ့ရပေလိမ့်မည်။

"မူလ ဝိညာဉ် ဒီရေ ရောက်လာပြီ!"

ဖူလိုင် တည်းခိုခန်း အတွင်းမှ လူတစ်ယောက်က စိတ်လှုပ်ရှားစွာ အော်ဟစ်လိုက်၏။

ဧည့်ခန်းထဲတွင် ချန်ဖေးက ကောင်းကင်နှင့်မြေကြီး၏ မူလစွမ်းအင်များ ပြောင်းလဲသွားသည်ကို ခံစားလိုက်ရပြီး သူ၏ မျက်လုံးများကို ဖြည်းညင်းစွာ မှိတ်လိုက်သည်။

အသိစိတ် ပင်လယ် အတွင်း၌ ချန်ဖေးက သူ၏ စိတ်အာရုံများ တဖြည်းဖြည်း ပိုမို တက်ကြွလာသည်ကို တွေ့လိုက်ရသည်။ သူ ဒွာရသန့်စင်ခြင်း နောက်ဆုံးအဆင့်သို့ ရောက်ရှိစဉ်က ဝိညာဉ်စွမ်းအင် လျှပ်တစ်ပြက် ပေါ်လာသည့် ခံစားချက်မျိုးနှင့် အနည်းငယ် ဆင်တူသည်။

သို့သော်လည်း မူလ ဝိညာဉ် ဒီရေ အတွင်းရှိ ဝိညာဉ်စွမ်းအင်များမှာ ယခုအခါ သနားစရာကောင်းလောက်အောင် နည်းပါးနေပြီး ယခင်ကထက် အများကြီး လျော့နည်းနေသည်။ ဤဝိညာဉ်စွမ်းအင်များကို မိမိ၏ စိတ်ဖြင့် ဖမ်းဆုပ်ရန် ကြိုးစားခြင်းက အလွန် ခက်ခဲပြီး စိတ်ပိုင်းဆိုင်ရာ စွမ်းအင်များကို အလဟဿ ဖြုန်းတီးရာပင် ကျနိုင်သည်။

ဤဝိညာဉ်စွမ်းအင်များက ဘာမှ မရှိခြင်းထက်စာလျှင် ပိုကောင်းပြီး ကျင့်စဉ်များကို နားလည်သဘောပေါက်ရာတွင် အတိုင်းအတာ တစ်ခုအထိ အထောက်အကူ ပြုသည်။

"မြို့တော်အတွင်းထဲမှာ ဘာရှိလို့ ဒီလောက် ဝိညာဉ်စွမ်းအင်တွေ ထွက်ပေါ်နေရတာလဲ..."

ချန်ဖေးက မျက်လုံးဖွင့်၍ မြို့တော်အတွင်းဘက်ဘက်သို့ လှမ်းကြည့်လိုက်ပြီး သူ၏ စိတ်ထဲတွင် စူးစမ်းလိုစိတ်များ ပြည့်နှက်နေ၏။ စူးစမ်းလိုစိတ် သက်သက်သာ ဖြစ်သည်။ ချန်ဖေး အနေဖြင့် ယခုအချိန်တွင် မြို့တော်အတွင်းဘက်ထဲသို့ အတင်း ဝင်ရောက်ရန် စွမ်းအား မရှိချေ။ အဘယ်ကြောင့်ဆိုသော် ထိုနေရာတွင် ဒွာရပေါင်းစည်းခြင်း အဆင့်များ တပ်စွဲထားသောကြောင့် ဖြစ်သည်။

ချန်ဖေးက မတ်တတ်ရပ်လိုက်ပြီး သူ၏ လက်ထဲသို့ ယွမ်ချန် ဓား ကျရောက်လာသည်။ ထိုကဲ့သို့သော ဝိညာဉ်စွမ်းအင်မျိုးက ရှားပါးလှ၏။ အခြားသူများအတွက် ကျင့်စဉ်များ နားလည်သဘောပေါက်ရာတွင် အရှိန်မြှင့်တင်မှုက သိသာထင်ရှားသည်။ သို့သော် ချန်ဖေးအတွက်မူ စနစ်က ပေးစွမ်းသော အရှိန်မြှင့်တင်မှုလောက် မသိသာချေ။

မြို့တော်အတွင်းဘက်နှင့် ပိုမို နီးကပ်သော နေရာတွင် ဝိညာဉ်စွမ်းအင်များ ပိုမို ရှိနိုင်သော်လည်း ယေဘုယျအားဖြင့် စနစ်၏ လုပ်ဆောင်နိုင်စွမ်းကို ကျော်လွန်နိုင်ခြင်း ရှိမရှိကိုမူ စောင့်ကြည့်ရဦးမည် ဖြစ်သည်။

မူလ ဝိညာဉ် ဒီရေကို တွေ့ကြုံခံစားပြီးနောက် ချန်ဖေးက နောက် တစ်ရက်၊ နှစ်ရက် အတွင်း ထွက်ခွာရန် ဆုံးဖြတ်လိုက်သည်။ မြို့တော်ရှိ သူ၏ လုပ်ငန်းများ အားလုံး ပြီးစီးသွားပြီ ဖြစ်ရာ ဆက်နေရန် အကြောင်း မရှိတော့ချေ။

လျင်မြန်သော လှုပ်ရှားမှု တစ်ခုနှင့်အတူ ချန်ဖေးက ဧည့်ခန်း အလယ်သို့ ရောက်ရှိသွား၏။ ကြယ်တာရာညဓားသိုင်းကို လေ့ကျင့်ရန် ပြင်လိုက်စဉ်မှာပင် ချန်ဖေး၏ လက်က အနည်းငယ် ရပ်တန့်သွားသည်။

ဝိညာဉ်စွမ်းအင်များက ချန်ဖေး အနီးတစ်ဝိုက်မှ သူ့ထံသို့ စုဝေးရောက်ရှိလာနေ၏။ ချန်ဖေးက ဘာမှ မလုပ်ရသေးသော်လည်း ဤဝိညာဉ်စွမ်းအင်များက သူ့အနီးတွင် အလိုအလျောက် စုဝေးလာကြသည်။

ဝိညာဉ်စွမ်းအင် စုစည်းမှုက မသိသာသောကြောင့် ချန်ဖေးက အစောပိုင်းက သတိမထားမိခဲ့ချေ။ သို့သော် အချိန်ကြာလာသည်နှင့်အမျှ ဤစုစည်းမှုက တဖြည်းဖြည်း မြန်ဆန်လာသဖြင့် ချန်ဖေး ချက်ချင်း ဖမ်းဆုပ်နိုင်ခဲ့ခြင်း ဖြစ်သည်။

ချန်ဖေးက သူ၏ အသိစိတ် ပင်လယ်ကို စစ်ဆေးကြည့်လိုက်ရာ မစုပ်ယူရသေးသော နှလုံးသား မိစ္ဆာများ ဖြစ်နေကြောင်း တွေ့လိုက်ရသည်။ မူလအစ စွမ်းအင်က ဤဝိညာဉ်စွမ်းအင်များကို အဆက်မပြတ် စုဆောင်းနေ၏။ ချန်ဖေးက သူ၏ စိတ်အာရုံများ ပိုမို သွက်လက်လာသည်ကို ခံစားလိုက်ရပြီး သူ ဉာဏ်အလင်းပွင့်စဉ်က အစောပိုင်း ကာလများကို ပြန်လည် အမှတ်ရသွားစေသည်။

‘နှလုံးသား မိစ္ဆာတွေရဲ့ မူလအစ စွမ်းအင်မှာ ဒီလို အကျိုးသက်ရောက်မှု ရှိနေတာပဲ…’

ချန်ဖေးမှာ အံ့အားသင့်သွား၏။ ဝိညာဉ်စွမ်းအင်များက မပေါများသေးသော်လည်း အချိန်ကြာလာသည်နှင့်အမျှ အတော်လေး မြင့်မားသော အဆင့်သို့ ရောက်ရှိလာမည်ဟု သူ ခန့်မှန်းမိသည်။ ထိုအချိန်ရောက်လျှင် သူ၏ နားလည်သဘောပေါက်နိုင်စွမ်း အမြန်နှုန်းက စနစ်ထက် ကျော်လွန်သွားမည် ဖြစ်သည်။

ချန်ဖေးက ခဏမျှ စဉ်းစားပြီးနောက် ကြယ်တာရာည ဓားသိုင်းကို စတင် လေ့ကျင့်လိုက်၏။ အလျင်စလို လုပ်စရာ မလိုချေ။ လုံလောက်သော ဝိညာဉ်စွမ်းအင်များ ရရှိသည်အထိ စောင့်မည် ဖြစ်သည်။

အင်ပါယာ မြို့တော် အတွင်း၌ လူအများစုက တင်ပျဉ်ခွေ ထိုင်၍ တရားမှတ်နေကြစဉ် ချန်ဖေး တစ်ယောက်တည်းသာ ဓားသိုင်း လေ့ကျင့်နေ၏။ ဤသို့ လေ့ကျင့်မှုက သုံးနာရီကြာ ဆက်တိုက် ဖြစ်နေခဲ့သည်။

ချန်ဖေး၏ အသိစိတ် ပင်လယ် အတွင်း၌ ဝိညာဉ်စွမ်းအင်များ အဆက်မပြတ် စုဆောင်းနေပြီး နှလုံးသား မိစ္ဆာများ၏ မူလအစ စွမ်းအင်ကလည်း အဆက်မပြတ် သုံးစွဲခံနေရသည်။ ချန်ဖေး အနေဖြင့် မူလအစ စွမ်းအင်အတွက် နှမြောမနေချေ။ နောက်တစ်ကြိမ် နှလုံးသားနယ်မြေသို့ ပြန်သွားပြီး နောက်ထပ် တစ်ကောင်ကို ထပ်ရှာ၍ သတ်လိုက်ရုံပင်။

လက်ရှိ နှလုံးသား မိစ္ဆာများ၏ မူလအစ စွမ်းအင် သုံးစွဲမှုနှုန်းအရ တစ်ရက်လောက် ခံနိုင်သဖြင့် ကြီးမားသော ပြဿနာ မဟုတ်ချေ။

ချန်ဖေးက ယွမ်ချန် ဓားကို သိမ်းလိုက်ပြီး တင်ပျဉ်ခွေ ထိုင်ကာ ရေကျောက်စိမ်း ဓားသိုင်းကို စတင် နားလည်သဘောပေါက်ရန် ကြိုးစားလိုက်သည်။

ရေကျောက်စိမ်း ဓားသိုင်းကို လွန်ခဲ့သော အချိန်ကတည်းက ချန်ဖေးသည် အထွတ်အထိပ်ရောက်အောင် လေ့ကျင့်ခဲ့ပြီး ဖြစ်သည်။ သာမန် သိုင်းပညာရှင် တစ်ယောက်၏ နားလည်သဘောပေါက်နိုင်စွမ်း အမြန်နှုန်းအရ ကျင့်စဉ် အဆင့် ပိုမြင့်လေ နားလည်သဘောပေါက်ရန် ပို၍ ခက်ခဲလေ ဖြစ်သည်။

စနစ်၏ အကူအညီဖြင့် ချန်ဖေး၏ နားလည်သဘောပေါက်မှု စွမ်းဆောင်ရည်က လျော့ကျသွားမည် မဟုတ်သော်လည်း အချိန်ပို၍ ယူရမည်မှာ အမှန်ပင် ဖြစ်သည်။ ယခုအခါ ဝိညာဉ်စွမ်းအင်များ စုဆောင်းမှုနှင့်အတူ ချန်ဖေး၏ အသိစိတ် ပင်လယ် အတွင်း၌ ရေကျောက်စိမ်း ဓားသိုင်းအပေါ် သူ၏ နားလည်မှုက တဖြည်းဖြည်း တိုးလာခဲ့သည်။

ချန်ဖေး၏ မျက်နှာပေါ်တွင် အလိုအလျောက် အပြုံးတစ်ခု ပေါ်လာ၏။ သူ၏ နားလည်သဘောပေါက်မှု အမြန်နှုန်းက စနစ်ထက် အမှန်တကယ် ကျော်လွန်သွားခဲ့ပြီး သူ ဉာဏ်အလင်းပွင့်စဉ်က ခံစားခဲ့ရသော ခံစားချက်က တဖြည်းဖြည်း ပိုမို ထင်ရှားလာခဲ့သည်။

ပြင်းထန်မှု အားဖြင့်တော့ ပြီးခဲ့သည့် အကြိမ်ကလောက် မများသကဲ့သို့ အခြေအနေများကလည်း မတူညီချေ။ သို့သော် ကျန်ရှိနေသော အချိန်နှင့်ဆိုလျှင် ချန်ဖေးက ရေကျောက်စိမ်း ဓားသိုင်းကို အလွန် မြင့်မားသော အဆင့်သို့ တွန်းပို့နိုင်မည် ဖြစ်သည်။

ကျင့်ကြံရာတွင် အချိန်များ ရပ်တန့်နေသကဲ့သို့ ရှိပြီး ချန်ဖေးမှာ တွေးတောဆင်ခြင်မှုများထဲတွင် နစ်မြောနေ၏။

ထိုအခိုက်အတန့်တွင် အားကောင်းသော ပုဂ္ဂိုလ်တစ်ဦးသာ လေထဲတွင် ရပ်နေမည်ဆိုပါက ဖူလိုင် တည်းခိုခန်း အနီးတစ်ဝိုက်ရှိ ဝိညာဉ်စွမ်းအင်က အနည်းငယ် ထူးဆန်းနေကြောင်း သတိပြုမိပေလိမ့်မည်။ သို့သော် အနည်းငယ်သာ ထူးဆန်းပြီး ရုတ်တရက်ကြီး ဖြစ်မနေချေ။

အဘယ်ကြောင့်ဆိုသော် ဝိညာဉ်စွမ်းအင်သည် ကောင်းကင်နှင့်မြေကြီး၏ မူလစွမ်းအင်များ လှုပ်ရှားမှုအပေါ် မူတည်ပြီး မူလစွမ်းအင်မှာ သဘာဝအားဖြင့် ကြိုတင်ခန့်မှန်း၍ မရနိုင်သောကြောင့် ဖြစ်သည်။ အားကောင်းသော ဒွာရပေါင်းစည်းခြင်း အဆင့် ပုဂ္ဂိုလ်များပင်လျှင် ကောင်းကင်နှင့်မြေကြီး၏ မူလစွမ်းအင် အပြောင်းအလဲများကို အပြည့်အဝ နားလည်သည်ဟု မပြောရဲကြချေ။

ထို့အပြင် ဤအခိုက်အတန့်တွင် မည်သည့် အားကောင်းသော ပုဂ္ဂိုလ်များမျှ လေထဲတွင် ရပ်မနေကြချေ။ သူတို့က ဝိညာဉ်စွမ်းအင် အုံနှင့်ကျင်းနှင့် ထွက်ပေါ်လာသော နေရာ၏ ဗဟိုတွင် ရှိနေပြီး လက်ရှိတွင် ကျင့်စဉ်များကို နားလည်သဘောပေါက်ရန် ကြိုးစားနေကြသည်။

လထွက်လာပြီး နေဝင်သွားသောအခါ ဧည့်ခန်းထဲတွင် ချန်ဖေး၏ ခန္ဓာကိုယ် ပတ်လည်ရှိ မူလစွမ်းအင်များက အနည်းငယ် တုန်ခါသွားပြီး အဆက်မပြတ်သော သဘောတရား တစ်ခုက အပြင်ဘက်သို့ လှိုင်းထသွားကာ ချန်ဖေးကို ကျယ်ပြောလှသော သမုဒ္ဒရာကြီး တစ်ခုထဲတွင် ရှိနေသကဲ့သို့ ထင်မှတ်ရစေသည်။

တစ်ချက်တစ်ချက် ပေါ်လာလိုက်၊ ပျောက်သွားလိုက် ဖြစ်နေသော်လည်း သေချာ ကြည့်လိုက်သောအခါ လူက တစ်လက်မမျှပင် မရွေ့လျားဘဲ ထိုနေရာတွင် ရှင်းလင်းစွာ ရှိနေသေးသည်။

နေထွက်လာပြီး လဝင်သွားသောအခါ၊ နေရောင်ခြည်က တောက်ပစွာ ထွန်းလင်းလာသည်နှင့်အမျှ အင်ပါယာ မြို့တော် အတွင်းရှိ ဝိညာဉ်စွမ်းအင်က တဖြည်းဖြည်း လျော့နည်းလာပြီး ကောင်းကင်နှင့်မြေကြီး၏ မူလစွမ်းအင် သိပ်သည်းဆပင် သိသိသာသာ လျော့ကျသွားခဲ့သည်။

ခန္ဓာကိုယ် ကြံ့ခိုင်ခြင်း အဆင့် သိုင်းပညာရှင် အချို့က သူတို့၏ မျက်လုံးများကို ဖွင့်လိုက်ကြ၏။ သူတို့ အပေါ် မူလ ဝိညာဉ် ဒီရေ၏ အရှိန်မြှင့်တင်မှု အကျိုးသက်ရောက်မှုကို သူတို့ ဆက်လက် မခံစားရတော့ဘဲ အင်ပါယာ မြို့တော် တစ်ခုလုံးမှာ တစ်ဖန် ပြန်လည် ဆူညံလာခဲ့သည်။

ဧည့်ခန်းထဲတွင် ချန်ဖေး၏ ပတ်လည်၌ ဝဲလှည့်နေသော သဘောတရားများက စတင် ပျောက်ကွယ်သွားပြီး ချွန်ထက်၍ စူးရှသော အရည်အသွေး တစ်ခုအဖြစ် ပြောင်းလဲသွားကာ ပြိုင်ဘက်ကင်း ဓားတစ်လက်က ဓားသွားကို စတင် ပြသနေသကဲ့သို့ ဖြစ်နေသည်။

တစ်နာရီ အကြာတွင် ချန်ဖေးက သူ၏ မျက်လုံးများကို ဖြည်းညင်းစွာ ဖွင့်လိုက်ပြီး သူ၏ အကြည့်ထဲတွင် ကြွင်းကျန်နေသေးသော ကျေနပ်မှု အရိပ်အယောင်များ ရှိနေ၏။

ရေကျောက်စိမ်း ဓားသိုင်း ပြီးပြည့်စုံသော အထွတ်အထိပ် အဆင့်၊ သတ်ဖြတ်ခြင်းဓားသွား ဓားသိုင်း အထွတ်အထိပ် အဆင့်။

တစ်ရက်တည်း အတွင်း ကျင့်စဉ် နှစ်ခုစလုံးက ကြီးမားသော တိုးတက်မှုများ ရရှိခဲ့ပြီး အထူးသဖြင့် ရေကျောက်စိမ်း ဓားသိုင်းက ကနဦး အထွတ်အထိပ် အဆင့်မှသည် ပြီးပြည့်စုံသော အထွတ်အထိပ် အဆင့်သို့ တိုက်ရိုက် ရောက်ရှိသွားခဲ့သည်။

ချန်ဖေးက သူ၏ ညာလက်ဖြင့် ဓားလက်ညှိုး ပုံစံ လုပ်လိုက်ရာ ယွမ်စွမ်းအားများက သူ၏ လက်ချောင်းထိပ်များတွင် လွတ်လပ်စွာ စီးဆင်းသွား၏။ အမြင့်မြတ်ဆုံး ကောင်းမြတ်ခြင်းက ရေကဲ့သို့ ဖြစ်ပြီး အမြင့်ဆုံးခွန်အားနှင့် အမြင့်ဆုံး နူးညံ့သိမ်မွေ့ခြင်း နှစ်ခုစလုံးကို ပိုင်ဆိုင်ထားသည်။ ဤသည်မှာ ရေကျောက်စိမ်း ဓားသိုင်း၏ စစ်မှန်သော အဓိပ္ပာယ်ပင် ဖြစ်သည်။

ရေကျောက်စိမ်း ဓားသိုင်းက ပြီးပြည့်စုံသော အထွတ်အထိပ် အဆင့်သို့ ထိုးဖောက် ရောက်ရှိသွားပြီး ယွမ်ချန်ဓားကျမ်းစာထဲသို့ ပေါင်းစပ်သွားသည်နှင့်အမျှ ချန်ဖေး၏ အကန့်အသတ် ဖွင့်လှစ်ထားသော ဒွာရများက ယခုအခါ ၁၀၃ ခု အထိ ရောက်ရှိလာပြီး ၁၀၈ ခု နှင့် ပိုမို နီးကပ်လာခဲ့ပြီ ဖြစ်သည်။

ချန်ဖေးက သူ၏ လက်ချောင်းထိပ်များမှ ယွမ်စွမ်းအားကို ဖျောက်ဖျက်လိုက်ပြီး သူ၏ မျက်လုံးများကို တစ်ဖန် ပြန်မှိတ်ကာ သူ၏ ထိုးထွင်းသိမြင်မှုများကို ခိုင်မာစေပြီး သူ၏ ကိုယ်ပိုင် စွမ်းအားအဖြစ် ပြောင်းလဲရန် ကြိုးစားလိုက်၏။

နှစ်ရက် အကြာတွင်။

ချန်ဖေးက ဖူလိုင် တည်းခိုခန်းမှ တိတ်တဆိတ် ထွက်ခွာလာခဲ့သည်။ သူက ထျန်းယန် စံအိမ်၏ ကျောက်စိမ်း စာလိပ်ကို ဧည့်ခန်းထဲတွင် ထားရစ်ခဲ့ပြီး မြို့တော်မှ တိုက်ရိုက် ထွက်ခွာရန် ဆုံးဖြတ်လိုက်၏။

ချန်ဖေးက အခြား ခန္ဓာကိုယ် ကြံ့ခိုင်ခြင်း အဆင့်များကဲ့သို့ လူအုပ်ထဲတွင် ရောနှောသွားသည်။ မြို့တံခါးမှ အကွာအဝေး တစ်ခုအထိ ရောက်ရှိသွားပြီးနောက် ချန်ဖေး၏ အမြန်နှုန်းက တဖြည်းဖြည်း တိုးလာခဲ့သည်။

အင်ပါယာ မြို့တော်မှ မိုင်အနည်းငယ် အကွာသို့ ရောက်သောအခါ ချန်ဖေးက မျက်မှောင် အနည်းငယ် ကုတ်လိုက်ပြီး ရှေ့မှ တိုက်ခိုက်နေသည့် အသံများကို အာရုံခံလိုက်မိ၏။

ချန်ဖေးက ပါဝင်ပတ်သက်ရန် ရည်ရွယ်ချက် မရှိသဖြင့် ဦးတည်ရာကို ပြောင်းပြီး ဆက်လက် ပြေးလွှားသွားသော်လည်း လမ်းတစ်ဝက်တွင် ရပ်တန့်သွားခဲ့သည်။

"ထျန်းယန် စံအိမ်က လူသတ်နေတယ်... ထျန်းယန် စံအိမ်က လူသတ်နေတယ်... လူကြီးမင်း... ကျွန်တော့်ကို ကယ်ပါဦး... ခင်ဗျား သူတို့ လုပ်ရပ်ကို တွေ့သွားပြီ ဆိုတော့ သူတို့ ခင်ဗျားကိုလည်း အလွတ်ပေးမှာ မဟုတ်ဘူး..."

ရှန်းရန်ယွမ်က အော်ဟစ်ရင်း ချန်ဖေးထံသို့ ပြေးဝင်လာ၏။

ချန်ဖေးက မျက်လုံးများကို အနည်းငယ် မှေးကျဉ်းလိုက်ပြီး ရှန်းရန်ယွမ်၏ နောက်ကျောဘက်သို့ ကြည့်လိုက်ရာ ထောင်ရှီယဲက အဆင့်မြင့် ဝိညာဉ်လက်နက် ဓားတစ်လက်ကို ကိုင်ဆောင်၍ ခြေလှမ်းအနည်းငယ် အတွင်းမှာပင် ရှန်းရန်ယွမ်၏ အရှိန်ကို တဖြည်းဖြည်း အမီလိုက်လာသည်ကို တွေ့လိုက်ရသည်။

ချန်ဖေးက ဘာမှ မပြောသော်လည်း သူ၏ ပုံရိပ်က လင်းလက်သွားပြီး အခြား ဦးတည်ရာသို့ ပြေးထွက်သွား၏။

ချန်ဖေး ပြေးသွားသည်ကို မြင်သောအခါ ရှန်းရန်ယွမ်က လက်သင်္ကေတများ ပြုလုပ်လိုက်ရာ သူ၏ ယွမ်စွမ်းအားများ ရုတ်တရက် တစ်ဟုန်ထိုး တက်လာသည်။ သူ၏ အလွန် မြန်ဆန်နေပြီ ဖြစ်သော အမြန်နှုန်းက ပို၍ပင် တိုးလာခဲ့၏။ အခြား မည်သည့် ဦးတည်ရာသို့မျှ မပြေးဘဲ ချန်ဖေးထံသို့သာ ပြေးဝင်လာခဲ့သည်။

ကိုယ်စား အသေခံပေးမည့်သူ မရှိလျှင် သူ သေရတော့မည် ဖြစ်သည်။ ရှန်းရန်ယွမ်က လူတစ်ယောက်ကို သူနှင့်အတူ ဆွဲချသွားချင်နေ၏။

"ချန်မူ လား... သူတို့ အားလုံး ဒီကို ထွက်ပြေးလာတာ... စံအိမ်ထဲကလည်း သတင်း ဘာမှ မရသေးဘူး..."

ထောင်ရှီယဲက ချန်ဖေး ဆုတ်ခွာသွားသည့် ပုံရိပ်ကို ကြည့်လိုက်ပြီးနောက် ရှန်းရန်ယွမ် အသက်သွင်းလိုက်သော အမြန်နှုန်းကို အကဲခတ်ကာ အေးစက်စက် နှာခေါင်းရှုံ့လိုက်ပြီး သူ၏ ဓားသဘောတရားကို အသက်သွင်း၍ အနီးကပ် လိုက်ပါသွားတော့သည်။