အခန်း ၄၁၀

အခန်း (၄၁၀) မင်းပြောတာကို မင်းရော ယုံရဲ့လား

ကိုယ်ပွား တစ်ခုက ချန်ဖေး၏ ခန္ဓာကိုယ်မှ ထွက်ပေါ်လာပြီး လျှပ်တစ်ပြက်အတွင်း ပျောက်ကွယ်သွားကာ ထုံဝမ်ရွှမ် ရှိရာ နေရာသို့ တိုက်ရိုက် ပြေးဝင်သွား၏။

"ကိုယ်ပွားကို အားကိုးပြီး လူတွေကို တားနိုင်မယ်လို့ မင်း ထင်နေတာလား..."

ချန်ဖေးထံမှ ခွဲထွက်သွားသော ကိုယ်ပွားကို မြင်သောအခါ ထောင်ရှီယဲက အသံကျယ်ကြီးဖြင့် ရယ်မောလိုက်သည်။ ကိုယ်ပွား ဆိုသည်မှာ ကျင့်စဉ် အများအပြားကို အသုံးပြု၍ ဖန်တီးနိုင်သော အရာဖြစ်ပြီး သိပ်တော့ ရှားပါးလှသည် မဟုတ်ချေ။

ထျန်းယန် စံအိမ်ရှိ အမွေအနှစ်များစွာ အနက် ကိုယ်ပွား အဖြစ်သို့ ကျင့်ကြံနိုင်သော အရာ နှစ်ခု ရှိသော်လည်း ကျင့်ကြံသူ အများစုက ထိုကျင့်စဉ်များကို အဓိကထား၍ မလေ့လာကြပေ။

ကိုယ်ပွားသည် တစ်ခါတစ်ရံတွင် အလွန် အသုံးဝင်နိုင်သည်။ ဥပမာအားဖြင့် မသေချာသော နေရာတစ်ခုနှင့် ကြုံတွေ့ရသောအခါ ကိုယ်ပွားကို အရင် ဝင်ခိုင်းပြီး အန္တရာယ် အချို့ကို ကြိုတင် ရှာဖွေတွေ့ရှိနိုင်သည်။

သို့သော် ကိုယ်ပွားတွင် ငြင်းဆန်၍ မရနိုင်သော အားနည်းချက် တစ်ခု ရှိသည်။ ကိုယ်ပွား၏ အစွမ်းက အလွန် အားနည်းလှသဖြင့် တိုက်ရိုက် တိုက်ခိုက်ရေးတွင် များစွာ အထောက်အကူ ပေးနိုင်ရန်မှာ လုံးဝ မဖြစ်နိုင်သလောက်ပင်။

ထျန်းယန် စံအိမ်တွင် ထိုကျင့်စဉ်များကို ရွေးချယ်သူ အများစုမှာ သူတို့၏ ပါရမီ အကန့်အသတ် ရှိကြောင်း သိထားကြသဖြင့် ဒုတိယ အကောင်းဆုံး အရာကိုသာ ရောင့်ရဲလိုက်ကြခြင်း ဖြစ်သည်။

"လူတွေကို တားတဲ့အခါတိုင်း အကြမ်းဖက်ဖို့ လိုလို့လား..."

ချန်ဖေး စကားပြောပြီးသည်နှင့် သူ၏ တစ်ကိုယ်လုံးမှ အလွန် မြင့်မားသော အပူချိန်တစ်ခု ရုတ်တရက် ထွက်ပေါ်လာပြီး သွေးရောင် မီးတောက် ဘောလုံး တစ်ခုက ချန်ဖေး၏ ခန္ဓာကိုယ်မှ ပေါက်ကွဲထွက်လာ၏။

ရှန်းရန်ယွမ် သူ၏ အနှစ်သာရ သွေးများကို လောင်ကျွမ်းစေသည့် မြင်ကွင်းနှင့် ဆင်တူသော်လည်း ဤတစ်ကြိမ် ချန်ဖေး၏ စွမ်းဆောင်ရည်က ပို၍ အစွန်းရောက်လှသည်။ သွေးများက မီးတောက်များအဖြစ် အမှန်တကယ် ပြောင်းလဲသွားသကဲ့သို့ ဖြစ်နေပြီး ချန်ဖေး၏ ဆံပင်များပင်လျှင် တစ်ခဏအတွင်း သွေးရောင် အဖြစ်သို့ ပြောင်းလဲသွားသည်။

သွေးလောင်ကျွမ်းခြင်း!

သွေးကို လောင်စာအဖြစ် အသုံးပြုကာ ခွန်အား တိုးမြှင့်ရန် အပြည့်အဝ လောင်ကျွမ်းစေခြင်း ဖြစ်သည်။

သွေးလောင်ကျွမ်းခြင်းက သိပ်ရှားပါးလှသော ကျင့်စဉ် တစ်ခု မဟုတ်ချေ။ ကျင့်စဉ် အများအပြားတွင် ဤအဆုံးစွန် နည်းလမ်း ပါဝင်သည်။ အထူးသဖြင့် ဖြတ်ကျော်စရာ ဒွာရ မရှိသော ခန္ဓာကိုယ် ကြံ့ခိုင်ခြင်း အဆင့်တွင် သက်စောင့် အနှစ်သာရကို လောင်ကျွမ်းစေခြင်းက တစ်ခုတည်းသော ရွေးချယ်စရာ ဖြစ်သည်။

သွေးလောင်ကျွမ်းခြင်း ကျင့်စဉ်၏ အဆုံးစွန်သော စွမ်းအားမှာ လောင်ကျွမ်းစေသော သွေးအနှစ်သာရတွင် ပါဝင်သည့် စွမ်းအား ပမာဏပေါ်တွင် မူတည်သည်။ သွေးအနှစ်သာရတွင် ပါဝင်သော စွမ်းအား ပိုမို ကြီးမားလေ၊ လောင်ကျွမ်းပြီးနောက် ရရှိမည့် အပိုစွမ်းအားက ပိုမို အားကောင်းလေ ဖြစ်သည်။

ချန်ဖေး၏ အနှစ်သာရနှင့် သွေးများကို နဂါးဆင် ဖိနှိပ်ခြင်းဖြင့် သွန်းလုပ်ထားခြင်း ဖြစ်သည်။ ဒွာရသန့်စင်ခြင်း အဆင့်တွင် ချန်ဖေး အနေဖြင့် သူ့ကိုယ်သူထက် ပိုမို အားကောင်းသော ရုပ်ပိုင်းဆိုင်ရာ ရှိသူကို ဘယ်သောအခါမှ မတွေ့ဖူးခဲ့ချေ။ ဒွာရသန့်စင်ခြင်း အထွတ်အထိပ်အဆင့် ပင်လျှင် ချန်ဖေးနှင့် နှိုင်းယှဉ်၍ မရနိုင်ပေ။

မိုးမျှော်စင်မှ သွေးလောင်ကျွမ်းခြင်း ကျင့်စဉ်ကို ရရှိပြီးနောက် ချန်ဖေးက သွေးရင်းမြစ် ကျင့်စဉ်တွင် မှတ်တမ်းတင်ထားသော လျှို့ဝှက်နည်းလမ်း အချို့နှင့် ပေါင်းစပ်ကာ သွေးလောင်ကျွမ်းခြင်း ကျင့်စဉ်၏ အဆင့်မြှင့်တင်ထားသော ပုံစံတစ်ခုကို ဖန်တီးခဲ့သည်။

သွေးများကို ခြယ်လှယ်ခြင်းနှင့် ပတ်သက်၍ သွေးရင်းမြစ် ကျင့်စဉ်မှာ ချန်ဖေး ယခင်က မြင်ဖူးသမျှထဲတွင် အားအကောင်းဆုံး ကျင့်စဉ် ဖြစ်သည်မှာ သေချာသည်။ ကံမကောင်းစွာဖြင့် ဤကျင့်စဉ်မှာ မိစ္ဆာဆန်ပြီး အရမ်းကာရော ကျင့်ကြံခြင်းက အရှုံးပေါ်မည့် ကိစ္စ ဖြစ်သည်။

အဆင့်မြှင့်တင်ထားသော သွေးလောင်ကျွမ်းခြင်း ကျင့်စဉ်သည် အနှစ်သာရနှင့် သွေးများ အားလုံးကို အမြင့်ဆုံး အတိုင်းအတာအထိ လောင်ကျွမ်းစေမည် ဖြစ်ပြီး မည်သည့် အကန့်အသတ်မှ မရှိဘဲ စွမ်းအား အားလုံးကို ထုတ်ယူမည် ဖြစ်သည်။

ရိုးရိုးရှင်းရှင်း ပြောရလျှင် မိမိကိုယ်ကို နောက်ဆုတ်စရာ လမ်းမထားဘဲ သွေးလောင်ကျွမ်းခြင်း ကျင့်စဉ်၏ အဆင့်မြှင့်တင်ထားသော ပုံစံကို အသုံးပြုခြင်းနှင့် တူသည်။

အခြား သွေးလောင်ကျွမ်းခြင်း ကျင့်စဉ် အသုံးပြုသူများမှာ သာမန် အခြေအနေများတွင် လအနည်းငယ် အနားယူပြီးနောက် ပြန်လည် နာလန်ထူနိုင်ပြီး ပြင်းထန်သော အခြေအနေများတွင် နှစ်အနည်းငယ် ကြာပြီးနောက် ပြန်လည် နာလန်ထူနိုင်သည်။ အကယ်၍ အခြားသူများက ချန်ဖေး၏ သွေးလောင်ကျွမ်းခြင်း ကျင့်စဉ် ပုံစံကို အသုံးပြုပါက သူတို့၏ စွမ်းအားက တိုးလာမည် ဖြစ်သော်လည်း ပြာအဖြစ်သို့ ပြောင်းလဲသွားနိုင်ခြေ ရှိသည်။

ဤသွေးလောင်ကျွမ်းခြင်း ကျင့်စဉ်ကို တုံ့ပြန်သည့် အနေဖြင့် ချန်ဖေးက သွေးရင်းမြစ် ကျင့်စဉ်၏ လမ်းညွှန်ချက်များကို လိုက်နာကာ သူ၏ အနှစ်သာရနှင့် သွေးများကို သိမ်းဆည်းရန် ရင်ဘတ် အခေါင်းပေါက်တွင် အသားနှင့် သွေး နေရာလပ် အသေးစားလေး တစ်ခုကို အထူးတလည် ဖန်တီးခဲ့သည်။

ချန်ဖေးက ထိုနေရာရှိ အနှစ်သာရများကို အခါအားလျော်စွာ သန့်စင်ပေးလေ့ ရှိသဖြင့် ပါဝင်သော စွမ်းအားများကို ပိုမို သန့်စင်သွားစေသည်။ ယခုအခါတွင် သွေးလောင်ကျွမ်းခြင်း ကျင့်စဉ်က ဤနေရာရှိ အနှစ်သာရများကို လောင်ကျွမ်းနေခြင်း ဖြစ်သည်။

ဤနေရာကိုသာ လောင်ကျွမ်းခြင်းက ချန်ဖေး ကိုယ်တိုင်အတွက် မည်သည့် ခြိမ်းခြောက်မှုမျှ မရှိချေ။

ထောင်ရှီယဲက ချန်ဖေး၏ အရှိန်အဝါများ ဆက်တိုက် မြင့်တက်လာသည်ကို ခံစားလိုက်ရပြီး သူ၏ မျက်လုံးများက ရုတ်တရက် ပြောင်းလဲသွား၏။ အစပိုင်းတွင် ချန်ဖေး သွေးလောင်ကျွမ်းခြင်း ကျင့်စဉ်ကို အသုံးပြုသည်ကို မြင်သောအခါ ထောင်ရှီယဲက လေးလေးနက်နက် မထားခဲ့ချေ။

သွေးလောင်ကျွမ်းခြင်း ကျင့်စဉ်က ကောင်းမွန်သော်လည်း ပေးစွမ်းသော အစွမ်းခွန်အား တိုးမြှင့်မှုက အထူးတလည် အံ့မခန်းတော့ မဟုတ်ပေ။

သို့သော် ယခုအခါ ထောင်ရှီယဲက ချန်ဖေးကို ကြည့်လိုက်ရာ ချန်ဖေးသည် သူ၏ ကိုယ်ပိုင် ဒွာရများကို ချိုးဖျက်လိုက်သကဲ့သို့ ခံစားလိုက်ရသည်။ ထိုသို့မဟုတ်ပါက ချီစွမ်းအင် တိုးလာမှုက မည်သို့ ဤမျှ အံ့မခန်း ဖြစ်နိုင်မည်နည်း။

ထုံဝမ်ရွှမ် မကြာမီ ရောက်ရှိလာမည် ဖြစ်သဖြင့် သူ့ကို ရောက်သည်အထိ တောင့်ခံနိုင်မည်ဟု ထောင်ရှီယဲ အစပိုင်းတွင် ယုံကြည်ခဲ့သည်။ သို့သော် ယခုအခါ အခြေအနေများက သူ၏ ထိန်းချုပ်မှု ပြင်ပသို့ ရုတ်တရက် ပြောင်းလဲသွားပြီ ဖြစ်ကြောင်း ထောင်ရှီယဲ သိလိုက်ရသည်။

ချန်ဖေးက ရှေ့သို့ တစ်လှမ်း တိုးလိုက်ရာ ချန်ယွမ်ဓားပေါ်တွင် သွေးရောင် အလင်းဝိုင်း တစ်ခု ဖုံးလွှမ်းသွား၏။ ဓားတစ်ချက် ထိုးသွင်းလိုက်သည်နှင့် ထောင်ရှီယဲက အခြား ဘာကိုမျှ မမြင်နိုင်တော့ချေ။

ဤဓားချက်၏ အရှိန်အဝါက ထောင်ရှီယဲ၏ စိတ်အာရုံ တစ်ခုလုံးကို လွှမ်းမိုးသွား၏။ ဤအခိုက်အတန့်တွင် ထောင်ရှီယဲသည် တွေးတောနိုင်စွမ်း အားလုံးကို ဆုံးရှုံးသွားသကဲ့သို့ ဖြစ်နေသည်။

"အား!"

ထောင်ရှီယဲက ရုတ်တရက် ဒေါသတကြီး ဟိန်းဟောက်လိုက်ပြီး သူ၏ တစ်ကိုယ်လုံးရှိ ဒွာရများက တစ်ခုပြီး တစ်ခု စတင် ကွဲအက်သွားကာ သူ၏ လောင်ကျွမ်းနေသော အသက်ရှူသံက အရပ်မျက်နှာ အားလုံးသို့ လွှမ်းခြုံသွားသည်။

ထုံဝမ်ရွှမ်က လက်တစ်ကမ်း အကွာတွင် ရှိနေသော်လည်း အသက်ရှင်ရန် မျှော်လင့်ချက် တစ်စွန်းတစ်စအတွက် ဒွာရများကို ချိုးဖျက်ရမည့် နည်းလမ်းကို အသုံးပြုရလိမ့်မည်ဟု ထောင်ရှီယဲ ဘယ်သောအခါမှ မမျှော်လင့်ထားခဲ့ချေ။

နောက်ထပ် ဒွာရ လေးခုသာ လိုတော့သဖြင့် ထောင်ရှီယဲသည် ဒွာရသန့်စင်ခြင်း အထွတ်အထိပ်အဆင့်သို့ ဝင်ရောက်နိုင်မည်ဖြစ်ပြီး မရေမတွက်နိုင်သော သိုင်းပညာရှင်များ အိပ်မက်မက်သည့် ဒွာရပေါင်းစည်းခြင်း အဆင့်သို့ ဝင်ရောက်ရန်ပင် အလားအလာ ရှိနေသည်။

သို့သော် ယခု ဒွာရများ ကွဲအက်သွားပြီ ဖြစ်ရာ ယနေ့ သေဘေးမှ အံ့ဖွယ်တမျှ လွတ်မြောက်သွားလျှင်ပင် ဒွာရများ၏ ထိခိုက်ပျက်စီးမှုက ထာဝရ တည်ရှိနေမည် ဖြစ်သည်။ အံ့ဖွယ်အကောင်းဆုံး ကုသရေး ဆေးလုံးများဖြင့်ပင် ဤဒွာရ ဒဏ်ရာများက ကျန်ရှိနေမည် ဖြစ်သည်။

သို့သော် ဒဏ်ရာဟောင်းက ဒဏ်ရာဟောင်းပင် ဖြစ်သည်။ ပြန်လည် နာလန်ထူပြီးနောက် ထောင်ရှီယဲ၏ စွမ်းဆောင်ရည်ကို မထိခိုက်နိုင်သော်လည်း သူ၏ ဒွာရပေါင်းစည်းခြင်း အဆင့်သို့ ပြန်လည် ထိုးဖောက် ဝင်ရောက်ရန်မှာ လုံးဝ မဖြစ်နိုင်တော့ချေ။

နောက်ထပ် ဒွာရ လေးခု ဖွင့်လှစ်ပြီးနောက်တွင်ပင် ဒွာရ ၁၀၈ ခု ကို တစ်ခုတည်းအဖြစ် ပေါင်းစပ်ကာ စစ်မှန်သော ဒွာရသန့်စင်ခြင်း အထွတ်အထိပ်အဆင့် အဖြစ်သို့ ရောက်ရှိနိုင်ခြင်း ရှိမရှိ ဆိုသည်မှာ ကြီးမားသော မေးခွန်းကြီး တစ်ခု ဖြစ်နေသည်။

ဤအခိုက်အတန့်တွင် ထောင်ရှီယဲ၌ အခြား ရွေးချယ်စရာ မရှိတော့ချေ။ သူသည် သွေးလောင်ကျွမ်းခြင်း ကဲ့သို့သော နည်းလမ်းများကို အသုံးပြုနိုင်သော်လည်း ရရှိလာမည့် စွမ်းအားမှာ အကန့်အသတ် ရှိသဖြင့် ဒွာရများကို ချိုးဖျက်ခြင်း တစ်ခုသာ ကျန်တော့သည်။

ဒွာရများကို မချိူဖျက်ပါက ထောင်ရှီယဲသည် ဤဓားချက်ဖြင့် သေဆုံးသွားနိုင်ပေသည်။

သစ်တော အပြင်ဘက်တွင်။

ထုံဝမ်ရွှမ်က ထောင်ရှီယဲ ရှိရာသို့ ပြေးဝင်သွားရန် ပြင်လိုက်စဉ် ရုတ်တရက် ပုံရိပ်တစ်ခုက ချီစွမ်းအင် ရှိရာ နေရာမှ ထုံဝမ်ရွှမ်၏ လမ်းကြောင်းကို ပိတ်ဆို့လိုက်၏။ ထုံဝမ်ရွှမ်က မျက်မှောင် အနည်းငယ် ကုတ်လိုက်သည်။ အဘယ်ကြောင့်ဆိုသော် အရှေ့ရှိ ပုံရိပ်တွင် ချီစွမ်းအင် လုံးဝ မရှိသောကြောင့် ဖြစ်သည်။

"အထဲမှာ တိုက်ပွဲ ဖြစ်နေတယ်... လူကြီးမင်း ဒီလို အလောတကြီး ဝင်သွားရင် ကြားညပ်သွားနိုင်တယ်..."

ချန်ဖေးက ထုံဝမ်ရွှမ်ကို အပြုံးလေးဖြင့် ကြည့်၍ ပြောလိုက်သည်။

"ဟာသတွေ လုပ်မနေနဲ့... ငါ့ အရင်းနှီးဆုံး သူငယ်ချင်း အထဲမှာ ရှိတယ်... မဝင်နဲ့ ပြောရုံနဲ့ မဝင်ဘဲ နေမယ် ထင်နေတာလား..."

ထုံဝမ်ရွှမ်က လှောင်ပြုံး ပြုံးလိုက်ပြီး အရှေ့ရှိ လူကို သူ၏ ဓားဖြင့် ထက်ပိုင်း ပိုင်းဖြတ်ရန် ပြင်လိုက်စဉ် ရုတ်တရက် သစ်တောထဲမှ ဓားချက် နှစ်ခုက ကောင်းကင်သို့ ပစ်တက်သွားပြီး နောက်တွင် ကြီးမားသော တိုက်ခိုက်မှု တစ်ခု ဖြစ်ပေါ်လာ၏။

တစ်မိုင်ကျော် ကွာဝေးနေသော်လည်း တိုက်ပွဲ၏ ဂယက်ရိုက်ခတ်မှုများက ဤဘက်သို့ ရောက်ရှိလာဆဲဖြစ်ပြီး မြေကြီးတစ်ခုလုံးကို ပြင်းထန်စွာ တုန်ခါသွားစေကာ နဂါး တစ်ကောင် လူးလှိမ့်နေသကဲ့သို့ အမှန်တကယ် တုန်လှုပ်ဖွယ် ကောင်းသော မြင်ကွင်းပင် ဖြစ်သည်။

ထုံဝမ်ရွှမ်၏ မျက်လုံးများ အနည်းငယ် ပြောင်းလဲသွား၏။ ထောင်ရှီယဲ၏ ပုံမှန် အခြေအနေတွင်ပင် ဤမျှ အားကောင်းသော သက်ရောက်မှုမျိုးကို မရရှိနိုင်ချေ။

တစ်နည်းဆိုရသော် ထောင်ရှီယဲသည် ပြိုကျလုမတတ် အခြေအနေသို့ ရောက်သွားပြီလား။

ဘယ်လို မျှော်လင့်ချက်မဲ့တဲ့ အခြေအနေမျိုးက မာနကြီးတဲ့ ထောင်ရှီယဲကို အသက်ရှင်ဖို့အတွက် ဒွာရတွေကို ချိုးဖျက်ဖို့ ဆန္ဒရှိစေတာလဲ။

ထုံဝမ်ရွှမ်က အရှေ့ရှိ လူကို ကြည့်လိုက်ရာ ဓားဆွဲရန် ပြင်နေသော သူ၏ လက်က အနည်းငယ် ရပ်တန့်သွား၏။

သစ်တော အတွင်း၌။

ချန်ဖေးက နောက်သို့ ခြေလှမ်း အနည်းငယ် ဆုတ်သွားပြီး သူ၏ စွမ်းအား အားလုံးကို ခြေထောက်များဆီသို့ စုစည်းလိုက်သည်။ ဤသည်မှာ တိုက်ပွဲ စတင်ကတည်းက ချန်ဖေး ပထမဆုံး အကြိမ် ဆုတ်ခွာခြင်း ဖြစ်သည်။ ထောင်ရှီယဲ၏ ဓားချက်က လွန်စွာ အားကောင်းလွန်းလှသည်။

ကံကောင်းစွာဖြင့် ချန်ဖေး၏ စွမ်းအားက ဤအချိန်တွင် ပို၍ ကြီးမားနေသည်။ သူ၏ သွေးမီးတောက် အခြေအနေတွင် ချန်ဖေး၏ ခွန်အားက ယခင်ကထက် များစွာ တိုးတက်လာခဲ့သည်။ နဂါးဆင် ဖိနှိပ်ခြင်း၏ အထောက်အပံ့ဖြင့် ချန်ဖေးသည် ခြေလှမ်း အနည်းငယ် ဆုတ်လိုက်ရခြင်းမှလွဲ၍ ဤဓားချက်ကြောင့် မည်သည့် ဒဏ်ရာမှ မရရှိခဲ့ချေ။

ဆန့်ကျင်ဘက် အနေဖြင့် ထောင်ရှီယဲ၏ မျက်နှာမှာ ပြာနှမ်းနေပြီး သူ၏ စွမ်းအင်နှင့် စိတ်ပိုင်းဆိုင်ရာ အခြေအနေ နှစ်ခုစလုံးမှာ အနိမ့်ဆုံး အမှတ်သို့ ထိုးကျသွားခဲ့သည်။

ထောင်ရှီယဲက ချန်ဖေးကို တစ်ချက်လေးမှ လှည့်မကြည့်ဘဲ ခြေထောက်ဖြင့် ကန်ကာ သစ်တောထဲမှ ပြေးထွက်သွား၏။ ထုံဝမ်ရွှမ်ကို ရှာတွေ့မှသာ ထောင်ရှီယဲအတွက် အသက်ရှင်ရန် အခွင့်အရေး ရှိမည် ဖြစ်သည်။

စောစောက အသံအရ ထုံဝမ်ရွှမ်မှာ အနီးတွင် ရှိသည်မှာ ထင်ရှားပြီး ဘာကြောင့် မရောက်လာသေးသနည်း။

ချန်ဖေးက ညာခြေဖြင့် နောက်သို့ တစ်လှမ်း ဆုတ်လိုက်ပြီး လျှပ်စီးကြောင်းများ တောက်ပမှုကြားတွင် ချန်ဖေးက ပေါ်လာကာ ထောင်ရှီယဲ၏ လည်ပင်းကို ဓားဖြင့် ချိန်ရွယ်လိုက်၏။

ရန်သူ အဖြစ် တိုက်ခိုက်ရန် ရွေးချယ်ပြီးဖြစ်ရာ ချန်ဖေးက မည်သူ့ကိုမျှ အလွတ်ပေးရန် ရည်ရွယ်ချက် မရှိချေ။ နှစ်ဖက်စလုံးမှာ သေကျေ ပျက်စီးရမည့် ရန်သူများ ဖြစ်ကြသဖြင့် တစ်ဦးဦး အမှန်တကယ် ကျဆုံးသွားမှသာ ပဋိပက္ခ ပြီးဆုံးနိုင်မည်မှာ သဘာဝပင် ဖြစ်သည်။

"ငါ့ကို မသတ်ပါနဲ့!"

"ဘုန်း!"

ချန်ဖေးက ထောင်ရှီယဲ၏ ဝိညာဉ်လက်နက် ဓားကို သူ၏ ဓားဖြင့် ရိုက်ချလိုက်၏။ ထောင်ရှီယဲ၏ လက်မောင်းများမှာ ဒဏ်မခံနိုင်တော့ဘဲ ညည်းတွားသွားပြီး နောက်တစ်ခဏတွင် သွေးနှင့် အသားစများ နေရာအနှံ့ ပျံ့ကျဲသွားသည်။ အဆင့်မြင့် ဝိညာဉ်လက်နက် ဓားက တစောင်း လွင့်စင်သွားပြီးနောက် မြေကြီးထဲသို့ စိုက်ဝင်သွားကာ သံချေးတက်သံများ ဆက်တိုက် ထွက်ပေါ်လာ၏။

ထောင်ရှီယဲမှာ ကြီးမားသော အင်အားဖြင့် လွှင့်စင်သွားပြီး မြေပြင်ပေါ်တွင် အကြိမ်ပေါင်း ဒါဇင်နှင့်ချီ၍ လူးလှိမ့်သွားပြီးနောက် တဖြည်းဖြည်း ရပ်တန့်သွားကာ ဖုန်နှင့် အညစ်အကြေးများ ဖုံးလွှမ်းသွားသည်။

"ငါ့ကို သတ်လိုက်ရင် ထျန်းယန် စံအိမ်က မင်းကို အလွတ်ပေးမှာ မဟုတ်ဘူး... နောက်ဆုံးကျရင် မင်းလည်း သေဘေးကနေ လွတ်မှာ မဟုတ်ဘူး..."

ထောင်ရှီယဲက ခေါင်းကို ရုန်းကန် မော့လိုက်ပြီး သူ၏ အရှေ့ရှိ ဖိနပ်အောက်ခံကို မြင်သောအခါ အော်ပြောလိုက်၏။

"မင်းကို မသတ်ရင် ငါတို့ ဒီနေရာမှာ လမ်းခွဲလို့ ရလား..."

"ရပါတယ်... ငါတို့ကြားမှာ ဘာရန်ငြိုးမှ မရှိတော့ဘူး!"

ထောင်ရှီယဲက ပြင်းပြင်းထန်ထန် ခေါင်းညိတ်လိုက်သည်။

"မင်းပြောတာကို မင်းရော ယုံရဲ့လား..."

ချန်ဖေးက တိုးတိုးလေး ပြောလိုက်၏။

ထောင်ရှီယဲက ပြန်ဖြေရန် ပြင်လိုက်စဉ် သူ၏ ခေါင်းထဲတွင် ရုတ်တရက် ပေါ့ပါးသွားသလို ခံစားလိုက်ရသည်။ သူ စကားပြောရန် ကြိုးစားသော်လည်း စကားတစ်ခွန်းမှ မထွက်လာနိုင်ကြောင်း တွေ့လိုက်ရ၏။ အတွေးတစ်ခု ဝင်လာပြီး သူ၏ မျက်လုံးများထဲတွင် ကြောက်လန့်မှုများ ရုတ်တရက် ပြည့်နှက်သွားသည်။

အရှေ့တွင် ပိုမို ကောင်းမွန်သော အနာဂတ် တစ်ခု ရှိနေသည်မှာ ထင်ရှားပါလျက် ဘာကြောင့် ဤလို ဖြစ်သွားရသနည်း။

ချန်ဖေးက ထောင်ရှီယဲ၏ အရှေ့တွင် ရပ်နေပြီး ဝိညာဉ်သတ်ဖြတ်ခြင်း ကျင့်စဉ်ဖြင့် ဝိညာဉ်အနှစ်သာရများက ချန်ယွမ်ဓားထဲသို့ ဝင်ရောက်သွား၏။ ရုတ်တရက် ချန်ဖေးက လျင်မြန်စွာ နောက်ဆုတ်သွားပြီး သွေးရောင် အမှတ်အသား တစ်ခုက ထောင်ရှီယဲ၏ ခန္ဓာကိုယ်မှ ပေါက်ကွဲထွက်လာကာ ချန်ဖေးထံသို့ တိုက်ရိုက် ပြေးဝင်လာသည်။

‘နတ်ဘုရားသတ်ဓား! နတ်ဘုရားသတ်ဓား! နတ်ဘုရားသတ်ဓား!’

ဝိညာဉ်သတ်ဖြတ်ခြင်း ကျင့်စဉ် ထည့်သွင်းထားသော နတ်ဘုရားသတ် ဓားက သွေးကွက်ကို အကြိမ်ကြိမ် တိုက်ခိုက်လိုက်သည်။

ချန်ဖေးက ဤလက်စားချေ သွေးအမှတ်အသားများ ဆိုသည်မှာ ဘာလဲ ဆိုတာကို အထူးတလည် လေ့လာကြည့်ခဲ့ပြီး နောက်ဆုံးတွင် အထူး စိတ်ပိုင်းဆိုင်ရာ သိုင်းပညာများကို အသုံးပြု၍ ဖန်တီးထားသော ကျင့်စဉ်များ ဖြစ်သည်ဟု ကောက်ချက်ချခဲ့သည်။

ထို့ကြောင့် ချိုးဖျက်ရန် အထိရောက်ဆုံး နည်းလမ်းမှာ တူညီသော စိတ်ပိုင်းဆိုင်ရာ နည်းစနစ်ကို အသုံးပြုရန် ဖြစ်သည်။

သို့သော် သွေးတံဆိပ်ကို ဖန်တီးခဲ့သူကလည်း ဤအရာကို တွေးထားပြီး ဖြစ်ပေမည်။ ထို့ကြောင့် ရိုးရှင်းသော စိတ်ပိုင်းဆိုင်ရာ ကျွမ်းကျင်မှု တိုက်ခိုက်မှု သက်သက်ဆိုပါက သွေးတံဆိပ် အမှန်တကယ် ပျောက်ကွယ်သွားနိုင်သော်လည်း ပျောက်ကွယ်သွားသော သွေးတံဆိပ်က သင့် စိတ်ပိုင်းဆိုင်ရာ ကျွမ်းကျင်မှုအပေါ် တိုက်ရိုက် ကပ်တွယ်သွားမည် ဖြစ်သည်။

စိတ်ပိုင်းဆိုင်ရာ ကျွမ်းကျင်မှုသည် မိမိ၏ ကိုယ်ပိုင် စိတ်အာရုံနှင့် ဆက်စပ်နေသည်။ စိတ်ပိုင်းဆိုင်ရာ ကျွမ်းကျင်မှုကို ကပ်တွယ်မိပါက မိမိ၏ စိတ်အာရုံတွင် သွေးအနည်းငယ် စွန်းထင်းသွားမည်မှာ မလွှဲမရှောင်သာ ဖြစ်သည်။

အရေပြားပေါ်သို့ တစ်စက်လေး ရောက်သွားလျှင်ပင် ဖယ်ရှားရန် အလွန် ခက်ခဲသွားပြီး သန့်စင်ရန် အချိန် အတော်အတန် ယူရမည် ဖြစ်သည်။

သို့သော် ချန်ဖေး၏ နတ်ဘုရားသတ် ဓားမှာ သူ၏ စိတ်အာရုံဖြင့် ပုံဖော်ထားသော ပုံရိပ်ယောင် တစ်ခု ဖြစ်သည်။ ပုံရိပ်ယောင် နတ်ဘုရားသတ် ဓားမှာ အရိပ်တစ်ခု သက်သက်သာ ဖြစ်ပြီး ချန်ဖေး၏ စစ်မှန်သော စိတ်အာရုံနှင့် ဆက်သွယ်၍ မရနိုင်ချေ။

ဆက်တိုက် ထုတ်လွှတ်လိုက်သော နတ်ဘုရားသတ် ဓား ချက် ငါးချက်က လေထဲတွင် သွေးတံဆိပ်ကို အပိုင်းပိုင်း အစစ အက်ကွဲသွားစေ၏။

သို့သော် သွေးအမှတ်အသားက နေရာတွင် ပျောက်ကွယ်မသွားဘဲ ကောင်းကင်သို့ ပစ်တက်သွားသော အနီရင့်ရောင် အလင်းတန်း တစ်ခု အဖြစ်သို့ ပြောင်းလဲသွားသည်။ အနီရင့်ရောင် အလင်းက မပြင်းထန်သကဲ့သို့ အရှိန်အဝါကလည်း အားမကောင်းသော်လည်း အလွန် မျက်စိကျစရာ ဖြစ်နေသည်။

သွေးရောင် အလင်းက အနီးအနားရှိ ထျန်းယန် စံအိမ်မှ လူများအား ထျန်းယန် စံအိမ်မှ လူတစ်ယောက် ဤနေရာတွင် အသတ်ခံလိုက်ရကြောင်း အချက်ပြနေခြင်း ဖြစ်သည်။

သွေးတံဆိပ်၏ ပြောင်းလဲမှုများက ချန်ဖေး မျှော်လင့်မထားသော အရာများ ဖြစ်သည်။ ဤအချိန်တွင် သွေးအလင်းကို ချိုးဖျက်ရန် ကြိုးစားခြင်းမှာ အချည်းနှီးသာ ဖြစ်ပေမည်။ မိုင်ဒါဇင်ပေါင်းများစွာ အတွင်းရှိ ထျန်းယန် စံအိမ်မှ လူများက ဤနေရာရှိ အခြေအနေကို အာရုံခံမိနေလောက်ပြီ ဖြစ်သည်။

ချန်ဖေးက သူ၏ လက်ကို ဝှေ့ယမ်းလိုက်ရာ ဓားသဘောတရား တစ်ခုက ဖြတ်သန်းသွားပြီး ထောင်ရှီယဲမှာ ပြာအဖြစ်သို့ ပြောင်းလဲသွား၏။

ချန်ဖေးက အဝေးတွင် ရှိနေသော အဆင့်မြင့် ဝိညာဉ်လက်နက် ဓားကို သိမ်းဆည်းလိုက်သည်။ သဘာဝစွမ်းအင် ကျောက်တုံး အချို့နှင့် ဆေးလုံး တစ်လုံးကို အသုံးပြုကာ ဝိညာဉ်သတ်ဖြတ်ခြင်း ကျင့်စဉ်ကို သုံး၍ အခင်းဖြစ်ပွားရာ နေရာရှိ သူ၏ ကိုယ်ပိုင် အသက်စွမ်းအင်များကို လုံးဝ ဖျောက်ဖျက်ပစ်လိုက်သည်။

ပိုသေချာစေရန် ချန်ဖေးက ဌာနေပြန်ဓားမျက်လုံးကို အသုံးပြု၍ ခြေရာကောက်ကာ ထိုသို့ ခြေရာကောက်နေစဉ်အတွင်း ချီစွမ်းအင်များကို ဖျောက်ဖျက်ရန် ဝိညာဉ်သတ်ဖြတ်ခြင်း ကျင့်စဉ်ကို ဆက်လက် အသုံးပြုခဲ့သည်။ ဤသည်မှာ ဤနေရာရှိ ချီစွမ်းအင်များကို အတင်းအကျပ် အမြစ်ဖြတ်ရန် ဖြစ်သည်။

ယခုအခါ အခြားသူများတွင် တူညီသော လှုပ်ရှားမှုများ ရှိနေလျှင်ပင် ချန်ဖေး အမှန်တကယ် မည်သူဖြစ်ကြောင်း သူတို့ ရှာဖွေနိုင်မည် မဟုတ်ချေ။

ဤအရာများ အားလုံးကို လုပ်ဆောင်ပြီးနောက် ချန်ဖေးက လျှပ်တစ်ပြက်ပျောက်ကွယ်

သွားပြီး အဝေးသို့ ပြေးထွက်သွား၏။ အကယ်၍ သူ မြန်မြန် မထွက်ခွာပါက ထျန်းယန် စံအိမ်မှ ပညာရှင်များ ရောက်ရှိလာမည် ဖြစ်သည်။

သစ်တော အပြင်ဘက်တွင်။

ထုံဝမ်ရွှမ် တွေဝေနေစဉ် သစ်တောထဲမှ ကောင်းကင်သို့ ပစ်တက်သွားသော သွေးရောင် အလင်းတန်း တစ်ခုကို ရုတ်တရက် မြင်လိုက်ရပြီး သူ အံ့အားသင့်သွား၏။

ထောင်ရှီယဲက သူ၏ ကိုယ်ပိုင် ဒွာရများကို ချိုးဖျက်လိုက်သော်လည်း သူက တစ်ခဏအတွင်းမှာပင် အသတ်ခံလိုက်ရသေးသည်လား။ ရန်သူကို သွေးတစ်စက်မျှပင် မထိစေဘဲ သွေးကွက် တစ်ကွက်သာ ကျန်ရစ်ခဲ့သည်။

ထောင်ရှီယဲက ဘယ်လို ကြောက်မက်ဖွယ်ကောင်းတဲ့ လူသတ်သမားမျိုးကို ရန်စမိတာလဲ။

ဒွာရသန့်စင်ခြင်း အထွတ်အထိပ်အဆင့် လား။

ထောင်ရှီယဲက ဒွာရသန့်စင်ခြင်း နောက်ဆုံးအဆင့်ဖြင့် ဒွာရသန့်စင်ခြင်း အထွတ်အထိပ်အဆင့်ကို စိန်ခေါ်လောက်အောင် ပညာမဲ့မည် မဟုတ်ချေ။ သေချာပေါက် သေဒဏ်ချမှတ်ခံရခြင်းပင် ဖြစ်သည်။

သို့သော် သူတို့ နှစ်ယောက်စလုံး ဒွာရသန့်စင်ခြင်း နောက်ဆုံးအဆင့် ဖြစ်ပါက တစ်ဖက်လူက ထောင်ရှီယဲကို ဤမျှ ထိရောက်စွာ မည်သို့ သတ်ဖြတ်နိုင်သနည်း။ ထောင်ရှီယဲ၏ စွမ်းအားက သူ၏ စွမ်းအားထက် များစွာ သာလွန်သည်။

ဤအကြောင်းကို တွေးမိသောအခါ ထုံဝမ်ရွှမ်သည် အကြောင်းပြချက် တစ်ခုခုကြောင့် ရုတ်တရက် သက်သာရာရသွားသလို ခံစားလိုက်ရ၏။ ကံကောင်းစွာဖြင့် သူ အချိန်မီ ဝင်မသွားခဲ့ချေ။

ချန်ဖေး၏ ကိုယ်ပွားက ထုံဝမ်ရွှမ်ကို တစ်ချက် ကြည့်လိုက်ပြီးနောက် လေထဲတွင် ပျောက်ကွယ်သွား၏။

ကိုယ်ပွားက အစမှ အဆုံးတိုင်အောင် သဲလွန်စ တစ်ခုကိုမျှ မပြသခဲ့သဖြင့် အပြစ်အနာအဆာများ ကျန်ရစ်ခဲ့မည်ကို စိုးရိမ်စရာ မလိုချေ။

နာရီဝက် မပြည့်မီ အချိန်အတွင်း ပုံရိပ် အနည်းငယ်က သစ်တောထဲမှ ထွက်ပေါ်လာ၏။ သူတို့ အားလုံးမှာ ထျန်းယန် စံအိမ်၏ ဒွာရသန့်စင်ခြင်း အဆင့်များ ဖြစ်ကြသည်။

ပတ်ဝန်းကျင်ရှိ တိုက်ပွဲ အကြွင်းအကျန်များကို ကြည့်ရင်း လူတိုင်းက တိတ်ဆိတ်သွားကြသည်။

"ဒါ ဂိုဏ်းတူအစ်ကို ထောင် ရဲ့ သတင်းအချက်အလက်ပဲ!"

တစ်စုံတစ်ယောက်က တိုးတိုးလေး ပြောလိုက်၏။ သွေးရောင် အလင်းထဲတွင် ပါဝင်သော အချက်အလက်များက အတော်လေး ထင်ရှားနေသည်။

“ဂိုဏ်းတူအစ်ကို ထောင် ကို သတ်သွားတဲ့ လူအကြောင်း ဘာသတင်းအချက်အလက်မှ ရှာမတွေ့ဘူး!”

"လူယုတ်မာ... မင်း ထျန်းယန် စံအိမ်က လူတွေကို သတ်ပြီး လွတ်မယ် ထင်နေတာလား..."

"သတင်းကို စံအိမ်ဆီ ပြန်ပို့လိုက်ပြီ... နောက်ထပ် လူတွေ မကြာခင် ရောက်လာလိမ့်မယ်..."

လေခွင်းသံ တစ်ခု ထွက်ပေါ်လာပြီး အားကောင်းသော အရှိန်အဝါ တစ်ခုက ကောင်းကင်မှ ဆင်းသက်လာ၏။ ထျန်းယန် စံအိမ်မှ ဒွာရသန့်စင်ခြင်း အထွတ်အထိပ်အဆင့် နင်းဖူရှန်း ပင် ဖြစ်သည်။

နင်းဖူရှန်း၏ မျက်နှာက အမူအရာ ကင်းမဲ့နေသော်လည်း သူ၏ မျက်လုံးများထဲရှိ ဒေါသများကို လူတိုင်း မြင်တွေ့နိုင်၏။ ဒွာရသန့်စင်ခြင်း အထွတ်အထိပ်အဆင့်သို့ တက်လှမ်းနိုင်မည့် အလားအလာရှိသော ပါရမီရှင် ထောင်ရှီယဲ သည် ယခုအခါ ဤနေရာတွင် အသတ်ခံလိုက်ရပြီ ဖြစ်သည်။

ထျန်းယန် စံအိမ်အတွက်ပင် ဤဆုံးရှုံးမှုက အလွန် ကြီးမားလှသည်။

"ဝီ!"

နင်းဖူရှန်း၏ အသိစိတ် ပင်လယ် အတွင်း၌ စိတ်စွမ်းအားများ တစ်ဟုန်ထိုး တက်လာပြီး ဓားသဘောတရားက ပတ်ဝန်းကျင်ကို ဖြတ်သန်းသွားကာ မြေကြီးကို ၃ ပေ အထိ အတင်းအကျပ် တူးဆွလိုက်၏။

နင်းဖူရှန်းက ထောင်ရှီယဲကို သတ်သွားသော လူအကြောင်း ချီစွမ်းအင် ရှာဖွေရန် လိုအပ်သည်။ ချီစွမ်းအင် မရှိဘဲ သူတို့ကို ရှာဖွေရန် နည်းလမ်း မရှိချေ။ သို့သော် နင်းဖူရှန်းက သူ၏ ဓားသဘောတရားကို မည်မျှပင် အသက်သွင်းစေကာမူ လူသတ်သမား အကြောင်း မည်သည့် ချီစွမ်းအင်မျှ ရှာမတွေ့သေးချေ။

ဤလူက လုံးဝ မရှိခဲ့သကဲ့သို့ပင် ဖြစ်သည်။

နင်းဖူရှန်း၏ မျက်လုံးများထဲရှိ အလင်းရောင်က ပိုမို တောက်ပလာပြီး သူ၏ အနီးအနားရှိ လူများက ဖိနှိပ်ခံရသလို ခံစားရသဖြင့် အလိုအလျောက် နောက်ဆုတ်သွားကြ၏။

ခဏအကြာတွင် နင်းဖူရှန်းက ဓားသဘောတရားကို ရုပ်သိမ်းလိုက်သော်လည်း မည်သည့် ချီစွမ်းအင်မျှ ရှာမတွေ့သေးချေ။ နင်းဖူရှန်းက ဓားသဘောတရားကို အသေးစိတ် အပိုင်းပိုင်း ခွဲလိုက်လျှင်ပင် သဲလွန်စ တစ်ခုလေးမျှ ရှာမတွေ့နိုင်ခဲ့ပေ။

"စံအိမ်ကို သွားပြီး ကောင်းကင်ရှာဖွေရေး မှန်ကို ယူခဲ့!"

နင်းဖူရှန်းက အသံတိမ်တိမ်ဖြင့် ပြောလိုက်၏။

"ဟုတ်ကဲ့!"

တစ်စုံတစ်ယောက်က လက်အုပ်ချီ၍ ပြန်ဖြေလိုက်ပြီး ထျန်းယန် စံအိမ် ရှိရာသို့ ပြေးထွက်သွား၏။

နာရီဝက် အကြာတွင် နင်းဖူရှန်း၏ လက်ထဲ၌ မှန်တစ်ချပ် ပေါ်လာသည်။

ကောင်းကင်ရှာဖွေရေး မှန်က အသေးငယ်ဆုံးနှင့် အမှေးမှိန်ဆုံး သဲလွန်စများကိုပင် ရှာဖွေနိုင်သည်။ ဤမှန်ကို ယေဘုယျအားဖြင့် တစ်နာရီထက်ပိုသော သဲလွန်စများကို ရှာဖွေရန် အသုံးပြုလေ့ ရှိသည်။

အခင်းဖြစ်ပွားပြီးပြီးချင်း ဤမျှ မြန်ဆန်စွာ ကောင်းကင်ရှာဖွေရေး မှန်ကို အသုံးပြုရသည့် အခြေအနေမျိုးမှာ ယခင်က လုံးဝ မရှိခဲ့ဖူးချေ။

တစ်ဖက်လူက သူတို့ရဲ့ ချီစွမ်းအင်တွေကို ဘယ်လို ဖုံးကွယ်မလဲ ဆိုတာ နင်းဖူရှန်း ကြည့်ချင်နေသည်။