အခန်း ၄၁၂

အခန်း (၄၁၂) ရှိုက်ငိုသံ

ချန်ဖေးက သူတို့ကို ကယ်တင်ရန် အောက်သို့ အလျင်စလို ဆင်းမသွားခဲ့ပေ။ ယွီရှီကျင်းနှင့် သူ၏ ညီမဖြစ်သူတို့မှာ အခြေအနေ အနည်းငယ် ဆိုးရွားနေသော်လည်း အသက်အန္တရာယ် စိုးရိမ်ရသည့် အခြေအနေမျိုးကား မဟုတ်ချေ။

အသက်အန္တရာယ် ကြုံလာရလျှင်ပင် သူတို့အဖွဲ့တွင် ကိုယ်ပိုင် အသက်ကယ် သတ်ကွက်များ ရှိရမည်ကို ချန်ဖေး သိထား၏။ ယွီမိသားစုကဲ့သို့သော မိသားစုအင်အားစု တစ်ခုအနေဖြင့် နတ်တိမ်ဓားဂိုဏ်းထက် ယေဘုယျ သယံဇာတ ပိုမိုမပိုင်ဆိုင်နိုင်သကဲ့သို့ ပို၍ပင် နည်းပါးနိုင်သေးသည်။

ယေဘုယျ သယံဇာတများမှာ ကန့်သတ်ချက် ရှိသော်လည်း ယွီမိသားစု၏ တိုက်ရိုက်ဆင်းသက်လာသူ အရေအတွက်မှာလည်း နည်းပါးလှသည်။ ဤသယံဇာတများကို တစ်ဦးချင်းစီအတွက် ခွဲဝေပေးလိုက်သောအခါ လူတစ်ဦးစီ ရရှိနိုင်သော သယံဇာတများမှာ အလွန်ပင် ပေါများကြွယ်ဝသွားတော့သည်။

ယွီရှီကျင်းနှင့် သူ၏ညီမဖြစ်သူတို့က အပြင်သို့ ထွက်ရဲကြသည်ဆိုမှတော့ သူတို့တွင် အန္တရာယ်မှ လွတ်မြောက်နိုင်မည့် ရတနာများ ပိုင်ဆိုင်ထားရမည် ဖြစ်သည်။ ထို့ကြောင့် သူတို့၏ လုံခြုံရေးအတွက် ချန်ဖေး စိုးရိမ်နေရန် မလိုအပ်ပေ။

ကိုယ်ပွားက ချန်ဖေးထံမှ ခွဲထွက်သွားပြီး ပင့်ကူဂူထဲသို့ တိတ်တဆိတ် ဝင်ရောက်သွား၏။ ဤပင့်ကူများက သက်ရှိများ၏ အသက်ရှူသံနှင့် လှုပ်ရှားမှုများကို အလွန်အကဲဆတ်စွာ သိရှိနိုင်သော်လည်း ကိုယ်ပွားက ဤအရာနှစ်ခုစလုံးမှ ကင်းလွတ်နေသည်။ ယခုအချိန်တွင် ထိုပင့်ကူတို့၏ အာရုံစိုက်မှုက ယွီရှီကျင်းနှင့် ချန်ဖေးတို့ထံတွင်သာ ရှိနေသဖြင့် ကိုယ်ပွားက ဂူထဲသို့ အောင်မြင်စွာ ဝင်ရောက်သွားနိုင်ခဲ့သည်။

ဂူထဲတွင် မှောင်မိုက်စိုစွတ်နေပြီး အချင်းချင်း ကိုက်ဖြတ်နေကြသော ပင့်ကူငယ် အများအပြားကို ချန်ဖေး တွေ့လိုက်ရသည်။ တစ်ချိန်တည်းမှာပင် အကောင်ပေါက်နေသော ပင့်ကူဥ အများအပြားကိုလည်း သူ တွေ့လိုက်ရ၏။ ပင့်ကူဥ တစ်လုံးစီက အနည်းငယ် တုန်ခါနေပြီး ပတ်ပတ်လည်တွင် ပျစ်ချွဲသော အရည်များ ပြန့်ကျဲနေသည်။

အနီးကပ် ကြည့်လိုက်သောအခါ ဥများအတွင်းမှ အဆစ်အမြစ်များ ပါရှိသော ခြေလက်များ လှုပ်ရှားသွားလာနေသည်ကို မြင်တွေ့နိုင်သည်။ ချန်ဖေး၏ မျက်နှာအမူအရာက ပြောင်းလဲသွားခြင်း မရှိသော်လည်း ဤနေရာက မည်သို့လုပ်၍ ဤမျှများပြားသော ပင့်ကူမိစ္ဆာများ ပေါက်ဖွားရှင်သန်ရန် ထောက်ပံ့ပေးနိုင်သနည်း ဆိုသည်ကို အနည်းငယ် တွေးတောနေမိသည်။

အပြင်ဘက်တွင် ယွီရှီကျင်းကို ဝိုင်းရံတိုက်ခိုက်နေသော ပင့်ကူများစွာမှာ အဆင့် ၂ မိစ္ဆာများ ဖြစ်ကြသည်။ သို့မဟုတ်ပါက ဒွာရသန့်စင်ခြင်း အစောပိုင်းအဆင့် ပညာရှင်နှစ်ဦးကို ထွက်မပြေးနိုင်အောင် ထိန်းချုပ်ထားနိုင်မည် မဟုတ်ချေ။

ချန်ဖေးက ပိုမိုနက်ရှိုင်းသော နေရာသို့ ဆက်လက်ဝင်ရောက်သွားရာ နောက်ဆုံးတွင် ဧရာမ ဂူကြီးတစ်ခုသို့ ရောက်ရှိသွား၏။ ဤနေရာက သဘာဝအတိုင်း ဖြစ်ပေါ်နေခြင်း မဟုတ်ဘဲ တောင်၏ အတွင်းပိုင်းကို တူးဆွဖောက်လုပ်ထားသကဲ့သို့ ရှိသည်။ ဤနေရာသို့ ရောက်ရှိလာသောအခါ အားကောင်းသော ကောင်းကင်နှင့်မြေကြီး မူလယွမ်ချီများကို ချန်ဖေး ရှင်းလင်းစွာ အာရုံခံမိလိုက်သည်။

တောင်တန်းငယ်တစ်ခုစာခန့် ကြီးမားသော ပင့်ကူဘုရင်မကြီး တစ်ကောင်က ဗဟိုချက်တွင် ဝပ်နေပြီး အဆင့် ၂ အလယ်အလတ်အဆင့်တွင် ရှိကာ လူသားများ၏ ဒွာရသန့်စင်ခြင်း အလယ်အလတ်အဆင့်နှင့် ညီမျှသည်။ သို့သော်လည်း သာမန် ဒွာရသန့်စင်ခြင်း အလယ်အလတ်အဆင့် တစ်ဦးအနေဖြင့် ကျင့်စဉ်များ အလွန်အမင်း မြင့်မားမနေပါက ဤမျှ ကြီးမားသော ပင့်ကူဘုရင်မကို ရင်ဆိုင်ရာတွင် အခက်တွေ့နိုင်ပြီး အသက်ပင် သေဆုံးသွားနိုင်သည်။

ချန်ဖေး၏ အကြည့်များက ပင့်ကူဘုရင်မ၏ အောက်ဘက် နေရာသို့ ကျရောက်သွား၏။ တစ်ဂူလုံးတွင် လှုပ်ခတ်နေသော ကောင်းကင်နှင့်မြေကြီး မူလယွမ်ချီများမှာ ဤနေရာမှ ထွက်ပေါ်လာခြင်း ဖြစ်သည်။ ကြယ်စင်ကြည့်ရှုခြင်း ကျင့်စဉ်ကို အသက်သွင်းလိုက်သောအခါ ချန်ဖေး၏ မျက်လုံးများက တောက်ပသွားပြီး ပင့်ကူဘုရင်မ အောက်ရှိ အရာကို အပြည့်အဝ မြင်တွေ့လိုက်ရသည်။

"ဝိညာဉ်ကျောက်တုံး သတ္တုကြောလား..."

ချန်ဖေး အနည်းငယ် အံ့အားသင့်သွားပြီး အဘယ်ကြောင့် ဤမျှများပြားသော ပင့်ကူများ ရှင်သန်နိုင်သနည်း ဆိုသည့် ယခင်က သံသယအချို့လည်း ရှင်းလင်းသွားတော့သည်။ တကယ်လို့ သည်နေရာက ဝိညာဉ်ကျောက်တုံး သတ္တုကြော ဖြစ်နေမည်ဆိုလျှင် ဤမျှများပြားသော ပင့်ကူမိစ္ဆာ အရေအတွက်မှာ ထူးဆန်းလှသည်တော့ မဟုတ်ပေ။

ပင့်ကူဘုရင်မ၏ အောက်ဘက်သို့ စူးစမ်းကြည့်ရှုရင်း ချန်ဖေး၏ မျက်လုံးများက ပို၍ တောက်ပလာ၏။ သူ၏ စူးစမ်းရှာဖွေမှုက ကျယ်လောင်လွန်းနေ၍ ဖြစ်မည်၊ အိပ်ချင်ယောင်ဆောင်နေသော ပင့်ကူဘုရင်မကြီးမှာ အနည်းငယ် တုန်ခါသွားပြီး နိုးထတော့မည့်အလား ဖြစ်လာသည်။

ချန်ဖေးက ဂရုမစိုက်ဘဲ အတန်ကြာ စစ်ဆေးကြည့်ပြီးနောက် သူ၏မျက်လုံးထဲမှ အလင်းရောင်များ တဖြည်းဖြည်း မှေးမှိန်သွားသည်။ ဝိညာဉ်ကျောက်တုံး သတ္တုကြောကို ရှာဖွေတွေ့ရှိလိုက်ရသဖြင့် အစပိုင်းတွင် ဖြစ်ပေါ်ခဲ့သော စိတ်လှုပ်ရှားမှုများမှာ ချန်ဖေး၏ မျက်နှာပေါ်မှ ပျောက်ကွယ်သွားပြီ ဖြစ်၏။ ချန်ဖေး အကဲဖြတ်မှု မှားယွင်းသွားခြင်းတော့ မဟုတ်ပေ။ ပင့်ကူဘုရင်မအောက်တွင် ဝိညာဉ်ကျောက်တုံး သတ္တုကြော ရှိနေသည်မှာ မှန်သော်လည်း သိပ်မကြီးမားဘဲ သေးငယ်သော သတ္တုကြောလေး တစ်ခုသာ ဖြစ်နေသည်။

နှစ်များစွာ ကြာလာသည်နှင့်အမျှ ဤပင့်ကူများ၏ စုပ်ယူစားသုံးမှုကြောင့် ဤဝိညာဉ်ကျောက်တုံး သတ္တုကြောမှာ အတော်လေး သေးငယ်သွားခဲ့ပြီ ဖြစ်သည်။ ချန်ဖေး၏ ခန့်မှန်းချက်အရ ယခုအချိန်တွင် ဤဝိညာဉ်ကျောက်တုံး သတ္တုကြောကို သိမ်းပိုက်နိုင်လျှင်ပင် အများဆုံး ဝိညာဉ်ကျောက်တုံး တစ်ဒါဇင်ခန့်သာ တူးဖော်ရရှိနိုင်မည် ဖြစ်သည်။

ဝိညာဉ်ကျောက်တုံး တစ်ဒါဇင်ဆိုသည်မှာ အမှန်တကယ်တော့ အတော်လေး များပြားလှသည်။ ငွေကြေးအဖြစ် ပြောင်းလဲလိုက်ပါက ငွေစင် တစ်သိန်းကျော် တန်ဖိုးရှိသဖြင့် ကြောက်မက်ဖွယ်ကောင်းသော ပမာဏ ဖြစ်သည်။

သို့သော်လည်း ယခုလက်ရှိ ချန်ဖေးအတွက်မူ ဝိညာဉ်ကျောက်တုံး တစ်ဒါဇင်ခန့်က မရှိတာထက်စာလျှင် တော်သေးသည် ဆိုသည့် အခြေအနေမျိုးသာ ဖြစ်နေသည်။ ထောင်ရှီယဲ့ကို သတ်ဖြတ်ပြီးနောက် ရရှိခဲ့သော အဆင့်မြင့် ဝိညာဉ်ဓားကို မည်သို့ စနစ်တကျ ကိုင်တွယ်ဖြေရှင်းရမည်ကို ချန်ဖေး မစဉ်းစားရသေးပေ။ အောင်မြင်စွာ ရောင်းချနိုင်ပါက အခြား ဝိညာဉ်ကျောက်တုံး နှစ်ထောင်ခန့် ထပ်မံရရှိဦးမည် ဖြစ်သည်။ ထို့ကြောင့် ဝိညာဉ်ကျောက်တုံး တစ်ဒါဇင်ခန့်က ချန်ဖေး၏ စိတ်ခံစားမှုကို များစွာ လှုပ်ခတ်နိုင်စွမ်း မရှိတော့ပေ။

ယွီရှီကျင်းနှင့် အခြားလူတစ်ဦးသာ အပြင်ဘက်တွင် မရှိနေပါက ချန်ဖေးအနေဖြင့် အထဲသို့ အတင်းဝင်ရောက်၍ ပင့်ကူဘုရင်မကို ကန်ထုတ်ကာ ဝိညာဉ်ကျောက်တုံးများကို တူးဖော်ယူရန် အနည်းငယ် အားထုတ်ကောင်း အားထုတ်မိလိမ့်မည်။ သို့သော် ယခုအချိန်တွင်တော့ သူ အမှန်တကယ် စိတ်မဝင်စားတော့ပေ။

ချန်ဖေး ပတ်ဝန်းကျင်ကို ဝေ့ကြည့်လိုက်ရာ ထောင့်တစ်နေရာတွင် အဆင့်နိမ့် ဝိညာဉ်ဓား တစ်လက်ကို တွေ့လိုက်ရ၏။ မည်သည့် ဒွာရသန့်စင်ခြင်း အဆင့်ရှိသူတစ်ဦးက ဤပင့်ကူမိစ္ဆာများ၏ စားသုံးခြင်းကို ခံလိုက်ရသည် မသိပေ။ ဤအဆင့်နိမ့် ဝိညာဉ်ဓားမှာလည်း ဝိညာဉ်အနှစ်သာရများ ပျောက်ကွယ်သွားပြီး သံချေးတက်ကာ ချို့ယွင်းနေသော အရာတစ်ခုအဖြစ် ပြောင်းလဲသွားခဲ့ပြီ ဖြစ်သည်။

အခြား ထူးထူးခြားခြား ရှာဖွေတွေ့ရှိမှုများ မရှိတော့ချေ။ ဤနေရာမှာ ဝိညာဉ်ကျောက်တုံး သတ္တုကြောကြောင့် ဖြစ်ပေါ်လာသော ပင့်ကူမိစ္ဆာများ၏ အသိုက်တစ်ခုမျှသာ ဖြစ်သည်။ ထိုစဉ်က ရွမ်ချောင်ကျွင်း၏ ဖခင်မှာ အလွန်ကံကောင်းခဲ့သည်ဟု ဆိုရမည်။ သူက ဤနေရာတွင် ကောင်းကင် ရွှေကျောက်တုံးများကို ရှာဖွေတွေ့ရှိခဲ့ပြီး ဘေးကင်းစွာ လွတ်မြောက်နိုင်ခဲ့သည်။ ကံတရား အနည်းငယ်မျှ ညံ့ဖျင်းသူသာ ဆိုပါက ခန္ဓာကိုယ်ကြံ့ခိုင်ခြင်း အဆင့်ဖြင့် ပြာအဖြစ်သို့ ပြောင်းလဲသွားလောက်ပြီ ဖြစ်သည်။

ဒွာရသန့်စင်ခြင်း အစောပိုင်းအဆင့် ရှိသူပင်လျှင် တုံ့ပြန်မှု နှေးကွေးပါက ထိုအဆင့်နိမ့် ဝိညာဉ်ဓားပိုင်ရှင်ကဲ့သို့ ဝိုင်းရံသတ်ဖြတ်ခြင်းကို ခံရနိုင်သည်။ ချန်ဖေး ခေါင်းခါလိုက်ပြီး သူ၏ ပုံရိပ်က လေထဲတွင် ပျောက်ကွယ်သွားကာ ဂူထဲမှ ထွက်ခွာသွားတော့သည်။ ပင့်ကူဘုရင်မက မျက်လုံးဖွင့်၍ ပတ်ဝန်းကျင်ကို ကြည့်လိုက်သော်လည်း ထူးခြားမှုကို မတွေ့ရသဖြင့် မျက်လုံးများကို ဖြည်းညင်းစွာ ပြန်မှိတ်သွား၏။

ဂူအပြင်ဘက်တွင်။

ချန်ဖေးက ရုန်းကန်နေရဆဲဖြစ်သော ယွီရှီကျင်းနှင့် အခြားလူတစ်ဦးကို လှမ်းကြည့်လိုက်ပြီးနောက် ထိုနေရာမှ လျှပ်တစ်ပြက် ပျောက်ကွယ်သွားသည်။ သူ မိုင်အနည်းငယ်မျှ ခရီးဆက်လာပြီးနောက် နောက်ကျောဘက်မှ ဧရာမ ပေါက်ကွဲသံကြီး တစ်ခုနှင့်အတူ ပင့်ကူများ မသေဆုံးမီ ကျယ်လောင်စူးရှစွာ အော်ဟစ်သံများကို သဲ့သဲ့မျှ ကြားလိုက်ရ၏။

ယွီမောင်နှမ နှစ်ယောက်က အခြေအနေ မဟန်တော့သည်ကို မြင်သောအခါ သူတို့၏ အသက်ကယ် ရတနာများကို အသုံးပြုလိုက်ပြီ ဖြစ်ကြောင်း ရှင်းလင်းနေသည်။ ဂူထဲသို့ ဆက်လက်ဝင်ရောက်ရန် သေချာပေါက် မဖြစ်နိုင်တော့သော်လည်း ဤနေရာမှ လွတ်မြောက်ရန်ကတော့ ပြဿနာ မရှိနိုင်တော့ပေ။ ဤသည်က သူတို့ ခွန်အား၏ အခြေခံအုတ်မြစ်ပင် ဖြစ်သည်။

အခြားသော ဒွာရသန့်စင်ခြင်း အစောပိုင်းအဆင့် တစ်ယောက်သာ ထိုကဲ့သို့သော အခက်အခဲမျိုးနှင့် ရင်ဆိုင်ရပါက သေချာပေါက် သေဆုံးရန်သာ ရှိတော့မည် ဖြစ်သည်။ သွေးလောင်ကျွမ်းခြင်း ကျင့်စဉ် သို့မဟုတ် ဒွာရ ဖျက်ဆီးခြင်း ကျင့်စဉ် စသည့် သေကြောင်းကြံ သတ်ကွက်များကို အသုံးပြုလျှင်ပင် အသုံးဝင်မည် မဟုတ်ပေ။

ချန်ဖေးက ရှင်းဖန်မြို့ဆီသို့ အလွန်မြန်ဆန်သော အမြန်နှုန်းဖြင့် ဦးတည်သွားနေသော်လည်း ရှင်းဖန်မြို့နားသို့ ရောက်ခါနီးတွင် အခြားလမ်းတစ်ခုသို့ ပြောင်းလဲသွားခဲ့သည်။

ဒွာရသန့်စင်ခြင်း နောက်ဆုံးအဆင့်သို့ အောင်မြင်စွာ တက်လှမ်းနိုင်ပြီးနောက် ချန်ဖေး၏ အဓိက တာဝန်မှာ ဌာနေပြန်ဓားမျှော်စင် ကိစ္စကို ဖြေရှင်းရန်ပင် ဖြစ်သည်။ ဌာနေပြန်ဓားမျှော်စင် ကိစ္စကို ဖြေရှင်းပြီးနောက်တွင် ယခင်က မဖြေရှင်းရသေးသော အခြားကိစ္စအချို့ကိုလည်း ချန်ဖေး ဖြေရှင်းလိုသေးသည်။

တစ်ခုက မီရွာဖြစ်ပြီး နောက်တစ်ခုက ဖျင်ရင်ခရိုင်၏ ထူးဆန်းမှုတို့ ဖြစ်သည်။ ချန်ဖေး ဒွာရသန့်စင်ခြင်း အစောပိုင်းအဆင့်သို့ စတင်တက်လှမ်းနိုင်ချိန်က သူ၏ ခွန်အားဖြင့် ထိုနေရာနှစ်ခုစလုံးကို တစ်ကိုယ်တည်း ဝင်ရောက်လွှမ်းမိုးနိုင်စွမ်း မရှိသေးပေ။ အတင်းအကျပ် ဝင်ရောက်မည်ဆိုပါက ပြဿနာများကြားထဲသို့ ကိုယ့်ကိုယ်ကိုယ် တွန်းပို့သကဲ့သို့ ဖြစ်သွားမည်သာတည်း။ ဒွာရသန့်စင်ခြင်း အလယ်အလတ်အဆင့်သို့ ရောက်ချိန်၌ပင် ချန်ဖေး သိပ်ပြီး ယုံကြည်ချက် မရှိခဲ့ချေ။

ယခု ဒွာရသန့်စင်ခြင်း နောက်ဆုံးအဆင့်သို့ ရောက်ရှိလာမှသာလျှင် ချန်ဖေး၏ အမှန်တကယ် စွမ်းရည်များကို အပြည့်အဝ ဖော်ထုတ်နိုင်ခဲ့ပြီ ဖြစ်သည်။ ဒွာရသန့်စင်ခြင်း နောက်ဆုံးအဆင့်ဖြင့်ပင် ဤနေရာနှစ်ခုကို မဖြေရှင်းနိုင်သေးဘူး ဆိုပါက ချန်ဖေး နောက်တစ်ကြိမ် ပြန်လာမည့်အချိန်တွင် ဒွာရသန့်စင်ခြင်း အထွတ်အထိပ်အဆင့်မျှသာ မဟုတ်တော့ဘဲ ဒွာရပေါင်းစည်းခြင်း အဆင့်ဖြင့် အကြမ်းပတမ်း ဖယ်ရှားရှင်းလင်းပစ်မည် ဖြစ်သည်။

ထူထပ်သော တောအုပ်ထဲတွင် ချန်ဖေးက သစ်ပင်ထိပ်ဖျားတစ်ခုပေါ်၌ မတ်တတ်ရပ်နေ၏။ သစ်ပင်ထိပ်ဖျားက လေထဲတွင် ယိမ်းနွဲ့နေပြီး ချန်ဖေးမှာလည်း အလေးချိန် မရှိသည့်အလား သစ်ပင်ထိပ်ဖျားနှင့်အတူ ညင်သာစွာ ယိမ်းနွဲ့နေသည်။ ချန်ဖေးက သူ့ရှေ့ရှိ ချိုင့်ဝှမ်းတစ်ခုကို ကြည့်ရင်း မျက်မှောင်အနည်းငယ် ကြုတ်လိုက်၏။ ယခင်က မီရွာမှာ အောက်ဘက်တွင် ရှိခဲ့သော်လည်း ယခုအခါ အောက်ဘက်ရှိ ချိုင့်ဝှမ်းမှာ ချိုင့်ဝှမ်းတစ်ခုမျှသာ ဖြစ်နေပြီး မြူခိုးများ ဖုံးလွှမ်းနေတတ်သော မီရွာမှာ ပျောက်ကွယ်သွားပြီ ဖြစ်သည်။

ချန်ဖေးက ညာဘက်ခြေထောက်ဖြင့် သစ်ပင်ထိပ်ဖျားကို ဖွဖွလေး နင်းလိုက်ပြီး အတောင်ပံ ဖြန့်ကျက်ထားသော လင်းယုန်ငှက်ကြီး တစ်ကောင်ကဲ့သို့ ဧရာမ စက်ဝိုင်းခြမ်းပုံစံ ဆွဲကာ ချိုင့်ဝှမ်းထဲသို့ ဆင်းသက်လိုက်သည်။ အတိတ်က အေးစက်ချမ်းစိမ့်သော လေထုမှာ ပျောက်ကွယ်သွားခဲ့ပြီ ဖြစ်သည်။ ချန်ဖေး ပတ်ဝန်းကျင်ကို ဝေ့ကြည့်လိုက်ရာ တစ်ချိန်က တည်ရှိခဲ့သော ထူးဆန်းသည့် အရာ၏ အရိပ်အယောင်မျှပင် မတွေ့ရတော့ချေ။

ချန်ဖေး တစ်ခဏမျှ စဉ်းစားလိုက်ပြီးနောက် ညာဘက်လက်ဖြင့် ဓားလက်ကွက် ဖော်ကာ သူ၏ မျက်ခုံးကြားကို ပွတ်ဆွဲလိုက်သည်။

‘ဌာနေပြန်ဓားမျက်လုံး!’

ချန်ဖေး၏ သိမြင်မှု ပင်လယ်ထဲတွင် စိတ်စွမ်းအားများ လှိုင်းထန်လာပြီး ဌာနေပြန်ဓားမျက်လုံးက ဤနေရာရှိ ချီအငွေ့အသက်များကို နောက်ကြောင်းပြန် ခြေရာခံတော့သည်။ ဌာနေပြန်ဓားမျက်လုံးက အချိန်ကို မည်မျှကြာအောင် နောက်ကြောင်းပြန်နိုင်သနည်း ဆိုသည်မှာ အသုံးပြုသူ၏ စိတ်စွမ်းအား ထောက်ပံ့နိုင်မှုအပေါ် များစွာ မူတည်သည်။

ယခုအချိန် ချန်ဖေး၏ မျက်လုံးထဲတွင် ချိုင့်ဝှမ်းတစ်ခုလုံး၏ စွမ်းအင်များက ပြင်းထန်စွာ တုန်လှုပ်နေပြီး ရှေ့သို့ ရွေ့လျားမနေဘဲ အတိတ်ဆီသို့ လျင်မြန်စွာ နောက်ကြောင်းပြန် လိမ့်ဆင်းသွားနေသည်။

ဤခံစားချက်က အလွန် မှော်ဆန်လှသည်။ အတိတ်ကို ပြန်လည်ကြည့်ရှုနေရသကဲ့သို့ သို့မဟုတ် အချိန်ကို နောက်ကြောင်းပြန်လှည့်နေရသကဲ့သို့ အံ့သြဖွယ်ကောင်းသော ခံစားချက်ကို ရရှိစေသည်။ သို့သော်လည်း အချိန်တိုလေးအတွင်းမှာပင် ချန်ဖေး ရပ်တန့်လိုက်ရ၏။ သူ၏ စိတ်စွမ်းအား တစ်ဝက်ခန့် ကုန်ဆုံးသွားပြီ ဖြစ်သော်လည်း မည်သည့်အရာကိုမျှ မမြင်တွေ့ရချေ။

မီရွာမှာ ချန်ဖေး ခန့်မှန်းထားသည်ထက် များစွာ စော၍ ပျောက်ကွယ်သွားခဲ့ပြီ ဖြစ်ကြောင်း ရှင်းလင်းနေပြီး ဤသည်က ယနေ့ ချန်ဖေး ခြေရာခံနိုင်သော အချိန်ကာလကို ကျော်လွန်နေသည်။ ချန်ဖေး ပတ်ဝန်းကျင်ကို ဝေ့ကြည့်လိုက်၏။

မီရွာအတွင်းရှိ သယံဇာတများမှာ ယခုအချိန်တွင် သူ့အတွက် သိပ်အရေးတကြီး လိုအပ်နေသည်တော့ မဟုတ်ပေ။ သို့သော်လည်း သူ့ကို ရွာသူကြီးက မီရွာမှ နှင်ထုတ်ခဲ့ဖူးသဖြင့် ယခုတစ်ကြိမ်တွင် မီရွာရှိ ရွာသားတိုင်းနှင့် မည်သို့ပင်ဖြစ်စေ ပြန်လည်တွေ့ဆုံကာ နောက်ဆုံးတွင် ကျန်ရစ်မည့်သူ ဖြစ်ရန် ချန်ဖေး ဆုံးဖြတ်ထားခဲ့သည်။ ယခုတော့ မီရွာက သူ့ကို ထိုအခွင့်အရေး မပေးတော့ပေ။

‘ကျွန်တော်က နှုတ်ဆက်ရုံလေး နှုတ်ဆက်ချင်တာပါ... ဘာလို့ ဒီလောက် ခက်ခဲနေရတာလဲ…’

ချန်ဖေး၏ ပုံရိပ်က လျှပ်တစ်ပြက် လှုပ်ရှားသွားပြီး ထိုနေရာမှ ပျောက်ကွယ်သွားသည်။ လေညင်းတစ်ချို့က ချိုင့်ဝှမ်းထဲသို့ တိုက်ခတ်လာပြီး မြေပြင်ပေါ်မှ သဲနှင့် ဖုန်မှုန့်များကို လွင့်စင်သွားစေသည်။ သဲနှင့် ဖုန်မှုန့်များက ရစ်ဝဲကာ လေပွေတစ်ခုအဖြစ် တဖြည်းဖြည်း ပြောင်းလဲသွား၏။ လေတိုက်သံကို သေချာနားထောင်ကြည့်မည် ဆိုပါက ရှိုက်ငိုသံတစ်ခုနှင့်ပင် ဆင်တူနေသည်။

မကြာမီမှာပင် အဝေးမှ ဖျင်ရင်ခရိုင်၏ မြို့ရိုးများကို ချန်ဖေး မြင်တွေ့လိုက်ရသည်။ မီရွာမှာ ဆန္ဒအလျောက် ထွက်ခွာသွားခြင်းလား သို့မဟုတ် ဖျက်ဆီးခံလိုက်ရခြင်းလား ဆိုသည်မှာ မသေချာပေ။

ဖျင်ရင်ခရိုင် ကဲ့သို့သော ကြီးမားသည့် နေရာမျိုးကော အခြား မသိနိုင်သော နေရာတစ်ခုခုသို့ ထွက်ပြေးပုန်းအောင်းသွားနိုင်သလား ဆိုသည်ကို ချန်ဖေး တွေးတောနေမိသည်။ ဖျင်ရင်ခရိုင်၏ ထူးဆန်းသော ဖြစ်စဉ်များက ထိုသို့ ပြုလုပ်ပုံမပေါ်ဘဲ ယနေ့တိုင် ဤနေရာတွင် ရှိနေဆဲ ဖြစ်သည်။

ဖျင်ရင်ခရိုင်ကို အဝေးမှ လှမ်းကြည့်မည်ဆိုပါက သာမန်လူတစ်ယောက်အတွက် မှားယွင်းနေသည်များကို မြင်တွေ့ရန် ခက်ခဲသည်။ သာမန် ခရိုင်မြို့ငယ်လေး တစ်ခုသာဖြစ်ပြီး မြို့ရိုးများပင် အနည်းငယ် ဟောင်းနွမ်းပျက်စီးနေပုံ ပေါက်နေသည်။

သို့သော် ချန်ဖေး၏ မျက်လုံးထဲတွင်တော့ ဖျင်ရင်ခရိုင်မှာ အေးစက်စိမ့်အေးသော လေထုဖြင့် ဖုံးလွှမ်းခံနေရပြီ ဖြစ်သည်။ ချန်ဖေး နောက်ဆုံးမြင်တွေ့ခဲ့ရသည့် အချိန်နှင့် နှိုင်းယှဉ်ပါက ဖျင်ရင်ခရိုင်၏ ထူးဆန်းသော စွမ်းအားများမှာ အတော်လေး ကြီးထွားလာခဲ့ပြီ ဖြစ်သည်။

ဤစွမ်းအားမျိုးမှာ သာမန် ဒွာရသန့်စင်ခြင်း နောက်ဆုံးအဆင့်ရှိသူများ ရင်ဆိုင်နိုင်စွမ်း ရှိသော်လည်း ဖိနှိပ်ရန်မူ အလွန်ခက်ခဲပေလိမ့်မည်။ အဆင့်မြင့် ဝိညာဉ်လက်နက် တစ်ခုခု ပိုင်ဆိုင်ထားမှသာ အနည်းငယ်မျှ အခွင့်အရေး ရှိနိုင်မည် ဖြစ်သည်။ ထို့အပြင် အခွင့်အရေး အနည်းငယ်မျှသာ ရှိသေးသည်။ အဘယ်ကြောင့်ဆိုသော် ဤထူးဆန်းသော အရာမှာ ဖျင်ရင်ခရိုင်တွင် အခြေချနေခြင်း ဖြစ်သည်။ အပြီးတိုင် မဖိနှိပ်နိုင်ပါက ပြန်လည်ခုခံရန်အတွက် စွမ်းအားများကို အဆက်မပြတ် ဆွဲယူအသုံးပြုနိုင်စွမ်း ရှိသည်။

ဒွာရသန့်စင်ခြင်း နောက်ဆုံးအဆင့်မှာ မူလစွမ်းအင်များ ပေါများကြွယ်ဝသော်လည်း ဤကဲ့သို့သော အရင်းအမြစ် ကုန်ခမ်းစေမည့် တိုက်ပွဲမျိုးကို ကြာရှည်မခံနိုင်ဘဲ နောက်ဆုံးတွင် ဆုတ်ခွာသွားရဖွယ် ရှိသည်။ ချန်ဖေး၏ လက်ထဲမှ အေးစက်သော ကြယ်ပွင့်လေးတစ်ခု လွင့်မျောလာ၏။ ဤကြယ်ပွင့်လေးမှာ ဖျင်ရင်ခရိုင်ရှိ ထူးဆန်းသော စွမ်းအားများနှင့် မူလအစတူညီပြီး ထိုစဉ်က ချန်ဖေးအပေါ်တွင် ချန်ရစ်ခဲ့သော အမှတ်အသားတစ်ခု ဖြစ်သည်။

ချန်ဖေးက ဤအမှတ်အသားကို စောစောကတည်းက ဖျက်ဆီးပစ်နိုင်သော်လည်း တစ်နေ့နေ့တွင် ဤထူးဆန်းသော သတ္တဝါထံသို့ လူကိုယ်တိုင် ပြန်ပေးရန် တွေးကာ သိမ်းဆည်းထားခဲ့ခြင်း ဖြစ်သည်။ ‘လူ့ဘဝမှာဖြစ်စေ၊ အလုပ်မှာဖြစ်စေ အရာရာကို အစအဆုံး တာဝန်ယူ တတ်ရမည် မဟုတ်ပါလား…’

သံမဏိ လေးရှည်တစ်လက်က ချန်ဖေး၏ လက်ထဲတွင် ပေါ်လာရုံသာမက မြေပြင်ပေါ်တွင်လည်း အခြား လေးရှည် တစ်ဒါဇင်ကျော် ထွက်ပေါ်လာသည်။ ဖျင်ရင်ခရိုင်ရှိ ထူးဆန်းသော သတ္တဝါများကို လာရောက်တိုက်ခိုက်ရာတွင် ချန်ဖေးက မြို့ထဲသို့ လူကိုယ်တိုင် ဝင်ရောက်ရန် လုံးဝ မရည်ရွယ်ထားခဲ့ပေ။ ထိုနေရာက သတ္တဝါများ၏ နယ်မြေ ဖြစ်သည်။ ယခု ချန်ဖေးတွင် အဝေးပစ် တိုက်ခိုက်နိုင်စွမ်း ရှိနေပြီဖြစ်သဖြင့် အဝေးမှနေ၍ ဖျင်ရင်ခရိုင်ရှိ ထူးဆန်းသော သတ္တဝါများကို တိုက်ရိုက် ချေမှုန်းရန်သာ ရွေးချယ်လိုက်သည်။

"ဂျစ်... ဂျစ်..."

လျှပ်စစ်သံလိုက် အသံများ မြည်ဟည်းလာပြီး ချန်ဖေး၏ ခန္ဓာကိုယ်ပေါ်မှ အရှိန်အဝါများ တဖြည်းဖြည်း မြင့်တက်လာသည်။ ဌာနေပြန်ဓားမျှော်စင်၏ ကျင့်စဉ်များကို ရရှိပြီးနောက် ဌာနေပြန်ဓား၏ လျှို့ဝှက်ချက်များကို ချန်ဖေး စုပ်ယူနိုင်ခဲ့ကာ လျှပ်စစ်သံလိုက် အမြောက်၏ အားသွင်းနှုန်းမှာ ယခင်ကထက် များစွာ မြန်ဆန်လာခဲ့ပြီ ဖြစ်သည်။ ထို့အပြင် ဌာနေပြန်ဓားမျှော်စင်တွင် ပစ်ခတ်ခဲ့သော မြားထက် ပိုမိုအစွမ်းထက်သော မြားတစ်စင်းကို ပစ်ခတ်နိုင်မည်ဟုလည်း ချန်ဖေး ယုံကြည်ချက် ရှိနေသည်။

အကြောင်းရင်းမှာ အလွန်စွမ်းအားကြီးပြီး အလွန်လည်း ပျော့ပျောင်းမှုရှိသော ရေကျောက်စိမ်း ဓားသိုင်းကြောင့်ပင် ဖြစ်သည်။ ထိုဓားသိုင်းသည် လျှပ်စစ်သံလိုက် အမြောက်အတွင်းရှိ စွမ်းအားများအတွက် အကာအကွယ်တစ်ခုအဖြစ် လုပ်ဆောင်ပေးပြီး လျှပ်စစ်သံလိုက် အမြောက်ကို ပိုမိုတည်ငြိမ်စေကာ စွမ်းအားကန့်သတ်ချက်ကိုလည်း မြှင့်တင်ပေးသည်။

လုံးဝ ငြိမ်သက်နေခဲ့သော ဖျင်ရင်ခရိုင်မှာ ရုတ်တရက် အနည်းငယ် တုန်ခါသွား၏။ တင်းကျပ်စွာ ပိတ်ထားသော မြို့တံခါးပေါ်တွင် ရုတ်ခြည်းပင် ဧရာမ အက်ကွဲကြောင်းကြီး နှစ်ခု ပေါ်လာပြီး သွေးရောင်လွှမ်းနေသော မျက်လုံးနှစ်လုံးကို ဖော်ပြလိုက်သည်။ ထိုအခိုက်အတန့်တွင် ထိုမျက်လုံးနှစ်လုံးက ချန်ဖေးကို တိုက်ရိုက် ကြည့်လာပြီး သူတို့၏ အကြည့်များ ဆုံတွေ့သွားကြသည်။

စွမ်းအားတစ်ရပ်က သူ့ဆီသို့ အဟုန်ပြင်းစွာ တိုးဝင်လာ၏။ ချန်ဖေး အနည်းငယ် အံ့အားသင့်သွားသည်။ ဖျင်ရင်ခရိုင်ရှိ ထူးဆန်းသော သတ္တဝါက ဤမျှဝေးကွာသော နေရာမှနေ၍ မည်သို့များ တိုက်ခိုက်မှု ပြုလုပ်နိုင်သနည်း...

"ဖြောင်း..."

ထင်းများ လောင်ကျွမ်းနေသော အသံက လေထုထဲတွင် ပျံ့နှံ့သွားပြီး ချန်ဖေးက ခေါင်းလှည့်ကာ အနည်းငယ် ဇဝေဇဝါဖြင့် ကြည့်လိုက်သည်။ မီးရောင်က မှေးမှိန်နေပြီး နံရံများက ဟောင်းနွမ်းပျက်စီးနေကာ ရှေ့တွင် ကျိုးပဲ့နေသော ရုပ်တုတစ်ခု ရှိနေသည်။ ယခု တဖျပ်ဖျပ် လင်းလက်နေသော မီးရောင်နှင့်အတူ နံရံပေါ်ရှိ ရုပ်တုများက မိစ္ဆာများကဲ့သို့ ကခုန်နေသယောင် ထင်ရသည်။

ချန်ဖေး ငုံ့ကြည့်လိုက်ရာ သူ၏ လက်ထဲတွင် လေးနှင့် မြား ရှိမနေတော့ချေ။ သူက ယုန်တစ်ကောင်ကို ကိုင်ကာ မီးပေါ်တွင် ကင်နေခြင်း ဖြစ်သည်မှာ ထင်ရှားနေသည်။ ဆေးခန်းမမှ အလုပ်သမားများက အချင်းချင်း စကားစမြည် ပြောဆိုနေကြရင်း ချန်ဖေး လက်ထဲရှိ ယုန်ကို ကြည့်ကာ တိတ်တဆိတ် တံတွေးမြိုချနေကြ၏။

ဆေးခန်းမ၏ အစားအသောက်များတွင် ငါး သို့မဟုတ် အသားများ မပါဝင်ပေ။ အသားစားချင်ပါက အပြင်ထွက်၍ ကိုယ့်ဘာသာကိုယ် ဝယ်စားရသည်။ သို့သော် အလုပ်ကြမ်းသမား တစ်ယောက်၏ လုပ်အားခဖြင့် တစ်လလျှင် တစ်ကြိမ်ပင် အသားစားရမည် မဟုတ်ချေ။

‘ဒေါက်... ဒေါက်... ဒေါက်…!’

တံခါးခေါက်သံ ထွက်ပေါ်လာပြီး အစေခံတစ်ဦးက ရှေ့ထွက်၍ တံခါးဖွင့်ပေးလိုက်သည်။ အေးစက်သော လေတစ်ချက် တိုက်ခတ်လာပြီး ချန်ဖေးလည်း မသိစိတ်အရ အပြင်ဘက်သို့ လှမ်းကြည့်လိုက်မိသည်။

"ကောင်းလိုက်တာ... ယုန်သားပဲ... ငါ ဗိုက်ဆာနေတာ..."

တံခါးဝရှိ ယုန်ကင်ကို မြင်လိုက်ရသဖြင့် ချီချွန်းက ဝမ်းသာအားရ အော်ဟစ်လိုက်သည်။

"မင်း တစ်ယောက်တည်းလား... တခြားလူတွေကော မင်းနဲ့အတူ ရှိနေတယ် ထင်တာ..."

တံခါးဖွင့်ပေးသော အစေခံက အပြင်ဘက်ကို ကြည့်ရင်း အံ့သြတကြီး မေးလိုက်သည်။

"ငါလည်း မသိဘူး..."

ချီချွန်းက ခေါင်းခါလိုက်ပြီး မြေကြီးပေါ်တွင် ထိုင်ချကာ ကျက်လုနီးပါး ဖြစ်နေသော ယုန်သားကို ကြည့်လိုက်သည်။

"ဖြောက်... ဖြောက်..."

စိုစွတ်နေဆဲဖြစ်သော ထင်းများဆီမှ တဖြောက်ဖြောက် အသံများ ထွက်ပေါ်နေသည်။ တိတ်ဆိတ်လွန်းနေသည်ဟု ခံစားရသဖြင့် ချီချွန်းက စကားစပြောလိုက်၏။

"ဒီနေ့ ငါ့ကို ဘာတွေဖြစ်ခဲ့လဲ ဆိုတာ ခန့်မှန်းကြည့်ပါလား... မင်းတို့ ကြားပြီးသွားရင် လက်ခုပ်တီးသွားမယ် ဆိုတာ ငါ အာမခံတယ်..."

"ဘာကိစ္စလဲ... ပြောပြပါဦး..." အခြား အစေခံများကလည်း စိတ်ဝင်တစား မေးလိုက်ကြသည်။

"ရွှစ်..."

ခုတ်ပိုင်းသံ တစ်သံနှင့်အတူ ချန်ဖေးက သူ၏ လက်ထဲရှိ ယုန်ကို ခုတ်ပိုင်းပစ်လိုက်ရာ အစိမ်းအတိုင်း ရှိနေဆဲဖြစ်ပြီး သွေးများ ပြည့်နှက်နေ၏။ သူက ယုန်ကို မီးထဲသို့ ပေါ့ပေါ့ပါးပါး ပစ်ထည့်လိုက်ပြီး မတ်တတ်ရပ်လိုက်သည်။ ဘေးပတ်လည်ရှိ အစေခံများက ချန်ဖေးကို ကြောင်အမ်းအမ်းဖြင့် စိုက်ကြည့်နေကြပြီး သူ ဘာလုပ်နေသနည်းဟု တွေးနေမိကြသည်။ ‘ချန်ဖေး ဘာဖြစ်လို့ ရုတ်တရက်ကြီး ဒီလို ပြုမူနေရတာလဲ…’

"ဒီမြင်ကွင်းက ငါ့ရဲ့ မှတ်ဉာဏ်ထဲကနေ လုံးဝနီးပါး ပျောက်ကွယ်သွားခဲ့ပြီ... မင်းက ဒါကို ပြန်ဖော်လာလိမ့်မယ်လို့ ငါ မထင်ထားဘူး..."

ချန်ဖေး၏ ဓားက လက်ခနဲ ဖြစ်သွားပြီး လွန်ခဲ့သော နှစ်များစွာကဲ့သို့ပင် ချီချွန်း၏ ခေါင်းက မြေပြင်ပေါ်သို့ ပြုတ်ကျသွားသည်။ သို့သော် ယခုတစ်ကြိမ်တွင် ချန်ဖေးက ထွက်ပြေးမသွားဘဲ ဟောင်းနွမ်းနေသော ဘုရားကျောင်း ပျက်ကြီးထဲရှိ အခြား အစေခံများကို ကြည့်လိုက်၏။

ချန်ဖေး ရုတ်တရက် လူသတ်လိုက်သည်ကို မြင်သောအခါ အစေခံများအားလုံး ထိတ်လန့်သွားကြပြီး ဘုရားကျောင်း ပျက်ကြီး၏ တံခါးပေါက်မှနေ၍ ကျယ်လောင်စွာ အော်ဟစ်ကာ အပြင်သို့ ပြေးထွက်သွားကြသည်။ မျက်စိတစ်မှိတ်အတွင်းမှာပင် ဘုရားကျောင်း ပျက်ကြီးထဲတွင် ချန်ဖေးနှင့် ချီချွန်းတို့သာ ကျန်ရစ်တော့သည်။ ချန်ဖေး ပတ်ဝန်းကျင်ကို ဝေ့ကြည့်လိုက်ပြီးနောက် သူ၏ ဝက်ခုတ်ဓားမက လက်ခနဲ ဖြစ်သွားကာ နံရံပေါ်တွင် အဆက်မပြတ် လှုပ်ရှားနေသော အရိပ်ထဲသို့ ထိုးစိုက်ဝင်သွားသည်။