အခန်း ၁၂၄၃
Vol. 108 Ch. 1243
အခန်း ၁၂၄၃
အင်ပါယာကြီးလေးခု၏ ရေတပ်အုပ်စုများသည် ၎င်းတို့၏လမ်းကို ပိတ်ဆို့ထားသော စစ်သင်္ဘောများနှင့် ရေအောက်ရှိ ရေငုပ်သင်္ဘောများကိုပါ မောင်းထုတ်နိုင်ခဲ့ပြီ ဖြစ်သည်။
ဧကရာဇ်လေးပါးစလုံးသည် အလွန်ဝမ်းမြောက်ဝမ်းသာ ဖြစ်သွားခဲ့ကြသည်။
“ဒီယီရန်ပင်း မဟာမိတ်အဖွဲ့က ပြောသလောက်လည်း မဟုတ်ပါဘူး။ သူတို့ကို တန်ပြန်နိုင်မယ့် နည်းလမ်းကို ရှာတွေ့ရုံနဲ့ ငါတို့ သူတို့ကို အနိုင်ယူနိုင်တယ်။”
အော်ကုက ရယ်မောရင်း ပြောလိုက်သည်။ ကျန်သော ဧကရာဇ်သုံးပါးကလည်း အပြည့်အဝ ထောက်ခံသည့်အနေဖြင့် ခေါင်းငြိမ့်လိုက်ကြသည်။
ယခုအခါ ပင်လယ်ရေပြင်ပေါ်နှင့် ရေအောက်ရှိ အင်အားစုများကို မောင်းထုတ် အနိုင်ယူပြီးပြီဖြစ်ရာ ကောင်းကင်မှ လေယာဉ်များသာ ကျန်တော့သည်။ ၎င်းတို့တွင် လေကြောင်းရန်ကာကွယ်ရေး အမြောက်များ ရှိထားသဖြင့် ယီရန်ပင်းမဟာမိတ်အဖွဲ့၏ လေကြောင်းအင်အားကို လုံးဝ စိုးရိမ်စရာမလိုတော့ပေ။
ကျွန်းပေါ်သို့ ဆင်းသက်ပြီးနောက် ဖြစ်ပွားမည့် တိုက်ပွဲအတွက်မူ သူတို့က ပို၍ပင် ယုံကြည်ချက်ရှိနေသေးသည်။
ယီရန်ဖင်မဟာမိတ်အဖွဲ့ ဒီလောက်အစွမ်းထက်နေရတာက ဒီအဆင့်မြင့်လက်နက်တွေ ရှိနေလို့ မဟုတ်ဘူးလား။
ကျွန်းပေါ်ရောက်သွားသည်နှင့် မိမိတို့၏ ကိုယ်ပိုင်အင်အားအပေါ်၌သာ မူတည်တော့မည်ဖြစ်ပြီး လက်နက်များဆိုသည်မှာ နောက်ဆက်တွဲ အကူအညီမျှသာ ဖြစ်သည်။
အင်ပါယာကြီးလေးခုသည် ၎င်းတို့ စစ်သားများ၏ စွမ်းရည်အပေါ်တွင် အလွန် ယုံကြည်မှု ရှိနေဆဲပင်။
အင်ပါယာကြီးလေးခု၏ ရေတပ်အုပ်စုများသည် ကမ်းခြေသို့ တရွေ့ရွေ့ နီးကပ်လာ၏။ ချူရှန်းတို့အဖွဲ့သည်မူ ရန်သူကို လုံးဝ ထိအောင်မပစ်နိုင်တော့သဖြင့် နောက်ဆုတ်ခဲ့ရသည်။
အကယ်၍ ယခင်က တိုက်ပွဲများတွင် ဖြစ်ပါက ရန်သူ့သံချပ်ကာသင်္ဘောများသည် အဆင့်မြင့်ဆုံးမဟုတ်သေးသဖြင့် အရှိန်ကို အသုံးချကာ အတင်းတိုးဝင် တိုက်ခိုက်နိုင်ခဲ့သော်လည်း ယခုမူ လုံးဝ အခွင့်အရေးမရှိတော့ပေ။ ရန်သူ့သံချပ်ကာသင်္ဘောများအားလုံးသည် ထိပ်တန်းအဆင့်များဖြစ်ကြပြီး အဆင့်မြှင့်တင်ထားခြင်းလည်း ခံထားရသည်။ ယီရန်ပင်းမဟာမိတ်အဖွဲ့၏ သင်္ဘောအရှိန်သည် အင်ပါယာကြီးလေးခု၏ သင်္ဘောအရှိန်ကို အမှန်တကယ် မယှဉ်နိုင်တော့ပေ။
မကြာမီမှာပင် ချူရှန်းတို့အဖွဲ့သည် ကျွန်းပေါ်သို့ အတင်းအကျပ် ဆုတ်ခွာခဲ့ရပြီး မဟာမိတ်အဖွဲ့၏ သံချပ်ကာသင်္ဘောများသည်မူ ကျွန်းကို ပတ်ကွေ့ကာ ပင်မကျွန်းဆီသို့ ဦးတည်မောင်းနှင်သွားကြသည်။
“ကျွန်းပိုင်ရှင်... နည်းပြကျန်း၊ ကျုပ်တို့ ကျွန်းပေါ်ကို ဆုတ်ခွာပြီးပါပြီ။ သူတို့နဲ့ အနီးကပ်တိုက်ခိုက်ဖို့ ပြင်ဆင်ထားပါတယ်။”
ချူရှန်းက လေးနက်သော အသံဖြင့် သတင်းပို့လိုက်သည်။
ခရီးအနည်းငယ်မတိုင်မီကပင် ချူရှန်းသည် ရန်သူ့အမြောက်များ၏ ပစ်ခတ်မှုအတိုင်းအတာကို သတင်းပို့ခဲ့သဖြင့် ကျန်းယွင်ထျန်းက ၎င်းတို့ကို ကျွန်းပေါ်သို့ ချက်ချင်းဆုတ်ခွာရန် အမိန့်ပေးခဲ့ခြင်းဖြစ်သည်။
“ကောင်းပြီ... ရန်သူ့အမြောက်ကျည် ကျဲချတာကို သတိထား။ အရပ်သားတွေ အားလုံးကို ဗုံးခိုကျင်းတွေထဲ ဆုတ်ခွာခိုင်းလိုက်။”
ကျန်းယွင်ထျန်းက ပြောလိုက်သည်။
“ဟုတ်ကဲ့။”
မဟာမိတ်အဖွဲ့၏ အရှေ့မြောက်ဘက်ကျွန်းရှိ သာမန်အရပ်သားများသည် စစ်သားများ၏ လမ်းညွှန်မှုအောက်တွင် ဗုံးခိုကျင်းများထဲသို့ ချက်ချင်း ဆုတ်ခွာသွားကြသည်။
ယခုအခါ လူတိုင်းတွင် မိုဘိုင်းလ်ဖုန်းများ ရှိနေကြပြီဖြစ်ရာ တစ်ယောက်က ဤဘေးလွတ်ရာသို့ ရွှေ့ပြောင်းနေရန် အွန်လိုင်းမှ တိုက်ရိုက်ထုတ်လွှင့်ပြသခဲ့သည်။
သတင်းအချက်အလက်များသည် အွန်လိုင်းပေါ်တွင် အလွန်လျင်မြန်စွာ ပျံ့နှံ့သွားပြီး မကြာမီမှာပင် ထိုကိစ္စအကြောင်း ယီရန်ပင်းမဟာမိတ်အဖွဲ့တစ်ခုလုံး သိရှိသွားကြတော့သည်။
“စောစောက တိုက်လေယာဉ်တွေ အများကြီး ပျံသန်းနေတာ တွေ့ရတာ မဆန်းတော့ဘူးပဲ...။ ရန်သူတွေ တကယ်ပေါ်လာတာကိုး။”
“အရှေ့မြောက်ဘက် အရပ်မှာလား...။ အကူအညီ လိုသေးအပ်လား။ ကျုပ် အဆင်သင့်ပြင်ထားပြီးပြီ။”
“အခြေအနေက နည်းနည်း အန္တရာယ်များနေသလိုပဲနော်။ လူတိုင်းကို ဗုံးခိုကျင်းတွေထဲအထိ ခေါ်သွားပြီဆိုတော့လေ။ ငါတို့ မဟာမိတ်အဖွဲ့ကို ဒီလိုအခြေအနေမျိုးအထိ တွန်းပို့နိုင်တာ ဘယ်လိုအင်အားစုမျိုးလဲ။”
“တကယ့်ကို... မယုံနိုင်စရာပဲ။ ငါတို့ မဟာမိတ်အဖွဲ့က ဒီလောက်အစွမ်းထက်တာကို အခု ရန်သူက ငါတို့ထက်တောင် ပိုပြီး အင်အားကြီးနေတာလား။”
“မဟုတ်သေးပါဘူး...။ ငါ အရှေ့မြောက်ဘက်ကျွန်းက ငါ့သူငယ်ချင်းတွေဆီ ဖုန်းဆက်ပြီး ဘာဖြစ်နေလဲဆိုတာ မြန်မြန်မေးကြည့်ဦးမှပဲ။”
မဟာမိတ်အဖွဲ့အတွင်းရှိ အချို့သော ဒေသခံမျိုးနွယ်စုများပင် ထိုသတင်းကို ရရှိသွားကြပြီး ရှောင်းယီအား ဝိုင်းဝန်းမေးမြန်းလာခဲ့ကြလေသည်။
“ကျွန်းပိုင်ရှင်... အရှေ့မြောက်ဘက်ကျွန်းက အခြေအနေ ဘယ်လိုရှိလဲ။ ကျွန်မတို့ နတ်သူငယ်တွေ သွားပြီး ကူညီပေးဖို့ လိုသေးလား။”
“ကျွန်းပိုင်ရှင် စကားတစ်ခွန်းပဲ ပြောလိုက်ပါ။ ကျုပ်တို့ လူပုမျိုးနွယ်စုက အမြဲတမ်း အဆင်သင့်ပဲ။”
“ကျွန်းပိုင်ရှင်... ငါတို့ ဧရာမဘီလူးမျိုးနွယ်စုက ထူးခြားတဲ့ စွမ်းရည်တွေ မရှိပေမဲ့ ကျေးဇူးပြုပြီး ငါတို့ကို တိုက်ပွဲမှာ ထည့်သွင်းပေးပါ။”
...
အမျိုးမျိုးသော ဒေသခံမျိုးနွယ်စုများက တိုက်ပွဲတွင် ပါဝင်ခွင့်တောင်းလာခဲ့ကြရာ ရှောင်းယီက ၎င်းတို့ကို အပြုံးတစ်ခုဖြင့်သာ ပြန်လည်ဖြေကြားခဲ့သည်။
“အားလုံးပဲ စိတ်အေးအေးထားကြပါ။ ဒီရန်သူက တကယ်ပဲ အတော်လေး အင်အားတောင့်တင်းတာ မှန်ပေမဲ့ ကျုပ်တို့ ယီရန်ပင်းမဟာမိတ်အဖွဲ့ကို အနိုင်ယူနိုင်မယ်လို့ ထင်နေတာကတော့ စိတ်ကူးယဉ် အိမ်မက်သက်သက်ပါပဲ။”
“ဒါပေမဲ့ တကယ်လို့ စိတ်ဝင်စားတဲ့လူရှိရင်တော့ အရှေ့မြောက်ဘက်ကျွန်းကို သွားသွားကြည့်လို့ရပါတယ်။ ဒါပေမဲ့ သတိတော့ ထားရမယ်နော်။”
ရှောင်းယီက ဆက်ပြောလိုက်သည်။
ဤဒေသခံမျိုးနွယ်စုများသည် ယီရန်ပင်းမဟာမိတ်အဖွဲ့ထဲသို့ ဝင်ရောက်လာပြီးဖြစ်သောကြောင့် မဟာမိတ်အဖွဲ့တွင် ကိစ္စရပ်များရှိလာသည့်အခါ ၎င်းတို့ကို ပိုမိုပါဝင်ခွင့်ပေးခြင်းက မဟာမိတ်အဖွဲ့တစ်ခုလုံးအတွင်းသို့ ပိုမိုကောင်းမွန်စွာ ပေါင်းစည်းဝင်ဆံ့သွားစေရန် ကူညီပေးနိုင်လိမ့်မည် ဖြစ်သည်။
“ဟုတ်ကဲ့။”
ဒေသခံမျိုးနွယ်စုများက တစ်ယောက်ပြီးတစ်ယောက် ပြန်ဖြေလိုက်ကြသည်။
မကြာမီမှာပင် ပင်မကျွန်းပေါ်တွင် နေထိုင်ကြသော ဒေသခံမျိုးနွယ်စုများသည် ၎င်းတို့၏အဖွဲ့များကို ခေါ်ဆောင်ကာ တည်နေရာကူပြောင်းခြင်း အစီအရင်ဖြင့် အရှေ့မြောက်ဘက်ကျွန်းသို့ ကူးပြောင်းသွားကြတော့သည်။
၎င်းတို့ အစီအရင်ပြင်ပသို့ ခြေချလိုက်သည်နှင့် အရှေ့မြောက်ဘက်ကမ်းခြေကို ပြင်းထန်စွာ ဗုံးကြဲပစ်ခတ်နေသည့် သိပ်သည်းလှသော အမြောက်သံများကို ကြားလိုက်ရတော့သည်။
ထိုအချိန်တွင် ချူရှန်းသည် ၎င်းတို့ကို ကုန်းတွင်းပိုင်း၌သာ တိုက်ခိုက်ရန် ဆုံးဖြတ်ထားပြီးဖြစ်သောကြောင့် ကမ်းခြေရှိ တပ်ဖွဲ့ဝင်များကို လုံးဝ ဆုတ်ခွာခိုင်းထားပြီး ဖြစ်သည်။
ထိုနေရာတွင် ဆက်ရှိနေပါက ရန်သူ့အမြောက်ဒဏ်ကို အလဟဿ ခံရရုံသာရှိမည်ဖြစ်ရာ ဆုတ်ခွာပြီး ၎င်းတို့ တက်လာမည့်အချိန်ကို စောင့်ဆိုင်းခြင်းက ပို၍ကောင်းမွန်ပေသည်။
ချူရှန်းတို့အဖွဲ့ စောင့်ဆိုင်းနေစဉ်မှာပင် ရန်သူများ ရောက်မလာသေးဘဲ ဒေသခံမျိုးနွယ်စုများသာ တစ်သုတ်ပြီးတစ်သုတ် ရောက်ရှိလာကြသည်။
“လာရောက်ကူညီပေးကြတဲ့အတွက် အားလုံးကို ကျေးဇူးတင်ပါတယ်။ လူတိုင်း လောလောဆယ် ဒီနေရာမှာပဲ နားနေကြပါဦး။ သူတို့ ကုန်းပေါ်တက်လာမှ ကျုပ်တို့ လှုပ်ရှားကြမယ်။”
ချူရှန်းက အမျိုးမျိုးသော ဒေသခံမျိုးနွယ်စုများကို ကျေးဇူးတင်စကား ပြောလိုက်သည်။
ထိုဒေသခံမျိုးနွယ်စုများကလည်း တစ်ယောက်ပြီးတစ်ယောက် ခေါင်းငြိမ့်ပြလိုက်ကြပြီး ထိုနေရာတွင်ပင် အနားယူနေလိုက်ကြသည်။
ဤအချိန်တွင် လေယာဉ်တင်သင်္ဘောသည်လည်း အရှေ့မြောက်ဘက် ပင်လယ်ပြင်ဧရိယာသို့ ရောက်ရှိလုနီးပါး ဖြစ်နေပြီဖြစ်သည်။ လေယာဉ်တင်သင်္ဘော၏ အရွယ်အစားမှာ အလွန်အမင်း ကြီးမားလွန်းလှသဖြင့် ၎င်း၏အရှိန်ကိုလည်း ကန့်သတ်ချက် ဖြစ်စေခဲ့သည်။
အရင်ကမ္ဘာတွင် နျူကလီးယား လေယာဉ်တင်သင်္ဘောတစ်စင်း၏ အမြင့်ဆုံးအရှိန်မှာ ၃၆ နော့ မှ ၃၇ နော့ (တစ်နာရီလျှင် ၆၆ ကီလိုမီတာမှ ၆၉ ကီလိုမီတာ) မျှသာရှိပြီး ၎င်းသည်ပင် ပင်လယ်ရေပြင်အခြေအနေ ကောင်းမွန်ကာ လေသင့်တိုက်ခတ်နေသည့် အချိန်မျိုးတွင် ဖြစ်သည်။
ရှောင်းယီတို့အဖွဲ့ လိုက်ပါလာသည့် နျူကလီးယား လေယာဉ်တင်သင်္ဘောမှာမူ အဆင့်မြှင့်တင်မှုဘောနပ်စ်များကြောင့် အမြင့်ဆုံးအရှိန်မှာ တစ်နာရီလျှင် ကီလိုမီတာ ၁၀၀ အထိ ရောက်ရှိနိုင်သော်လည်း ၎င်းသည် ထိပ်တန်းအဆင့် သံချပ်ကာသင်္ဘောများ၏ အရှိန်နှင့်ဆိုလျှင်မူ လုံးဝ နှိုင်းယှဉ်၍မရနိုင်သေးပေ။
ထိုအချိန်တွင် ရှောင်းယီသည် ကျွန်းအထိမ်းအမှတ်ကျောက်တိုင်ဆီသို့ ရောက်ရှိလာပြီး လက်နက်များနှင့် ခဲယမ်းမီးကျောက်အားလုံးကို ချက်ချင်း ပြန်လည်ရုပ်သိမ်းလိုက်ကာ တစ်ချိန်တည်းမှာပင် ယီထျန်းဂရုချက်ထဲသို့ စာတစ်စောင် ပေးပို့လိုက်လေသည်။
“အားလုံးပဲ... လောလောဆယ် ခင်ဗျားတို့ရဲ့ လက်နက်တွေနဲ့ ခဲယမ်းမီးကျောက်တွေကို မရောင်းချကြပါနဲ့ဦး။”
“ဟင်... သူဌေးက လက်နက်တွေနဲ့ ခဲယမ်းတွေအားလုံးကို ပြန်ရုပ်သိမ်းသွားတဲ့ပုံပဲ။”
“ဟုတ်တယ်...။ ဒါက ဘာအခြေအနေလဲ။ ဘာလို့ အရောင်းရပ်လိုက်တာလဲ။”
“စိတ်ချပါ သူဌေး... ကျွန်တော့်လက်ထဲမှာရှိတဲ့ လက်နက်တွေနဲ့ ခဲယမ်းတွေကို လုံးဝ အပြင်ကို ထုတ်မရောင်းပါဘူး။”
“ဒေသခံအချို့က သူဌေးရဲ့ လက်နက်တွေကိုသုံးပြီး သူဌေးကို ပြန်တိုက်ခိုက်နေတာမျိုး ဖြစ်နိုင်မလား။”
“မင်းတစ်ယောက်တည်းပဲ သိနေတတ်နေတာလား...။ ပါးစပ်ပိတ်ပြီးနေရင် သေသွားမှာမို့လို့လားကွ။”
လူတိုင်းသည် ဤအခြေအနေကို ခန့်မှန်းမိကြသော်လည်း ၎င်းကို အော်ဟစ်ပြောဆိုနေခြင်းက မရိုးသားသော ရည်ရွယ်ချက်ရှိသူများ၏ အသုံးချခြင်းကို ခံရနိုင်သည်။ ဥပမာအားဖြင့် နိုင်ငံခြားသား အသက်ရှင်ကျန်ရစ်သူများသည် ယီရန်ပင်းတစ်ယောက် ထိပ်ဆုံးတွင် အထီးတည်း ကြီးစိုးနေသည်ကို မမြင်လိုကြသည်ဖြစ်ရာ အခွင့်အရေးရပါက ၎င်းတို့သည် ဒုက္ခရောက်နေသူကို ပို၍ နှိပ်ကွပ်ရန် သေချာပေါက် ကြိုးပမ်းကြပေလိမ့်မည်။
“ငါဆဲလိုက်ရ...။ မင်းက နိုင်ငံခြားသားတွေ လွှတ်လိုက်တဲ့ သူလျှိုလား။ မင်း အဲ့ဒီလိုပြောလိုက်တော့ သူဌေးက သေချာပေါက် ပစ်မှတ်ထားခံရတော့မှာပေါ့။”
“ကျွန်တော် မှားသွားပါတယ် သူဌေး။ သူဌေး ဘယ်ကျွန်းမှာ တိုက်ခိုက်ခံနေရတာလဲဆိုတာ ပြောပြပါ။ ကျွန်တော် အခုချက်ချင်း လာကူပါ့မယ်။ သူဌေးကို ကူညီဖို့အတွက် ကျွန်တော့် မဟာမိတ်အဖွဲ့ထဲက ရှိသမျှအရာအားလုံးကို အကုန်အကျခံနိုင်ပါတယ်။”
ထိုအခါ ရှောင်းယီက ဝင်ရောက်ပြောဆိုလိုက်သည်။
“ကိစ္စမရှိပါဘူး။ ခင်ဗျားတို့ မပြောရင်တောင် မရိုးသားတဲ့ ရည်ရွယ်ချက်ရှိတဲ့လူတွေက ဒါကို သေချာပေါက် တွေးမိကြမှာပဲ။ စိတ်အေးအေးထားပါ...။ ကျုပ် ဘာအကူအညီမှ မလိုပါဘူး။ ကျုပ် လောလောဆယ် သူတို့ရဲ့ လက်နက်နဲ့ ခဲယမ်းထောက်ပံ့မှုကို ဖြတ်တောက်ချင်ရုံတင်ပါ။ သူတို့ ဘယ်လောက်အထိ တောင့်ခံနိုင်မလဲဆိုတာ ကျုပ် ကြည့်ချင်သေးတယ်။”
“ကျေးဇူးတင်ပါတယ် သူဌေး။ ဒါပေမဲ့ ကျွန်တော် တကယ် လာကူချင်တာပါ။ ပထမနေရာကို တခြားနိုင်ငံတွေဆီ အကျဆုံးမခံချင်ဘူး။”
“ဟုတ်ပါတယ် သူဌေး...။ ကျွန်တော်တို့ကို လိပ်စာတစ်ခုပဲပေးပါ။ ကျွန်တော့် ညီအစ်ကိုတွေကိုပါ အတူတူ ခေါ်လာခဲ့ပါ့မယ်။”
“ဟုတ်တယ်... ကျွန်တော်တို့ ကိုယ်ပိုင်မဟာမိတ်အဖွဲ့ ဆုံးရှုံးသွားရင်တောင် သူဌေးရဲ့ ပထမနေရာ အားသာချက်ကိုတော့ မပျက်စီးအောင် ကာကွယ်ရမယ်။”
“အားလုံးရဲ့ စေတနာအတွက် ကျုပ် လှိုက်လှိုက်လှဲလှဲ ကျေးဇူးတင်ပါတယ်။ ဒါပေမဲ့ ဒီတစ်ကြိမ်တော့ အကူအညီ တကယ်မလိုပါဘူး။ ဒီတစ်ခေါက်လာတဲ့ ဒေသခံတွေက နည်းနည်း လက်ပေါက်ကတ်တာ မှန်ပေမဲ့ သူတို့ ကျုပ်တို့ကို နိုင်မယ်လို့ ထင်နေတာကတော့ စိတ်ကူးယဉ် အိမ်မက်သက်သက်ပဲ။”
ရှောင်းယီက ယုံကြည်ချက်အပြည့်ဖြင့် ပြောလိုက်၏။
“သူဌေးအတွက် လုံးဝ ပြဿနာမရှိနိုင်ဘူးဆိုတာ ငါ အစကတည်းက သိသားပဲ။”
“ပေါက်ကရတွေ... ငါက သူဌေးကို သွားပြီး အားပေးချင်ရုံပဲ။”
“သူဌေး... ကျွန်တော်တို့ သွားမကူရရင်တောင်မှ ကျွန်တော်တို့ မဟာမိတ်အဖွဲ့ကို သူဌေးရဲ့ တိုက်ပွဲကို အဝေးကနေ လာရောက်လေ့လာခွင့်ပေးလို့ ရမလား။”
ရှောင်းယီ အနည်းငယ် ဆွံ့အသွားခဲ့သည်။
“စစ်မြေပြင်က အရမ်းအန္တရာယ်များလွန်းတယ်။ ခင်ဗျားတို့ လာမယ်ဆိုရင် ခင်ဗျားတို့ရဲ့ ဘေးကင်းလုံခြုံမှုကို ကျုပ် အာမမခံနိုင်ဘူး။”
“ရပါတယ်...။ ဒါက ကျွန်တော်တို့ ကိုယ်ပိုင်ကိစ္စပါ။ သူဌေးဘက်က ခွင့်ပြုရင်ပဲ အဆင်ပြေပါပြီ။”