အခန်း ၁၀၆

Chapter 106

ရုန်းကန်သည်။

ရူးသွပ်စွာ ရုန်းကန်သည်။

အသက်လု၍ ရုန်းကန်သည်။

"အားယွမ်၊ မင်းကတော့ အကွက်ပေါ်လာပြီပဲ၊ မင်းလို ယုတ်မာညစ်ပတ်ပြီး အရှက်မရှိတဲ့ လူယုတ်မာက နောက်ဆုံးတော့ မအောင့်နိုင်တော့ဘူးပေါ့၊ ငါအိပ်ပျော်နေတုန်း ခိုးတိုက်ခိုက်ရဲတယ်၊ သတ္တိရှိရင် ငါ့ကို ရှေ့ကနေ ရင်ဆိုင်ရဲလား၊ အရှက်မရှိတဲ့ကောင်၊ ယုတ်မာတဲ့မျောက်၊ လာလေ"

ချန်ကျိုးသည် တံတွေးများ တဖျန်းဖျန်း ထွက်အောင် အော်ဟစ်ဆဲဆိုနေသည်။ ၎င်းမှာ အဆိပ်သင့်နေသည့် ပုံစံနှင့် လုံးဝမတူဘဲ အားအင်အပြည့်ဖြင့် ဆဲဆိုနေသဖြင့် လုံခြုံရေးဝန်ထမ်း လေးဦးပင် သူ့ကို မနည်းချုပ်ကိုင်ထားရသည်။

ဒေါက်တာ အားယွမ်သည် ဤသို့သော အခြေအနေများကို ကြုံတွေ့နေကျ ဖြစ်သဖြင့် ကုတင်အောက်ရှိ ပန်းရောင်မျက်နှာသုတ် ပုဝါလေးကို ကောက်ယူကာ ချန်ကျိုး၏ပါးစပ်ဘေးမှ အမြှုပ်များကို သုတ်ပေးလိုက်သည်။

ထို့နောက် ချန်ကျိုး ဒေါသတကြီး အော်ဟစ်ဆဲဆိုနေသည့် အခွင့်အရေးကို အသုံးချ၍ ဆေးသုံးလုံးကို ချန်ကျိုး၏လည်ချောင်းထဲသို့ တိကျစွာ ပစ်ထည့်လိုက်သည်။ ချန်ကျိုး အခန်းထဲတွင် ရေမရှိသဖြင့် ချန်ကျိုး သောက်လက်စ ကိုကာကိုလာကို သူ့ ပါးစပ်ထဲသို့ အတင်းလောင်းထည့်လိုက်တော့သည်။

ထိုဆေးလုံးအသေးလေး သုံးလုံးသည် ချန်ကျိုး၏လည်ချောင်းမှတစ်ဆင့် ဝမ်းဗိုက်ထဲသို့ အလွယ်တကူ စီးဆင်းသွားခဲ့သည်။

[စနစ် - ဒေါက်တာအားယွမ်တွင် ပြင်းထန်သော အအေးမိရောဂါ ခံစားနေရသည်ကို စစ်ဆေးတွေ့ရှိသည်၊ ဒေါက်တာ အားယွမ်၏ ဆေးဘက်ဆိုင်ရာ အကူအညီကိုထောက်ရှု၍ ဤစနစ်သည် Host ၏ကိုယ်စား အမှန်ကန်ဆုံးသော ရွေးချယ်မှုကို ပြုလုပ်ပေးပြီး ရောဂါအရင်းအမြစ်ကို ဖယ်ရှားပေးလိုက်သည်]

ချန်ကျိုးအား ဆေးကို အတင်းအကျပ် တိုက်ကျွေးပြီးနောက် ဒေါက်တာအားယွမ်သည် ကျန်ရှိသော ဆေးများကို သိမ်းဆည်းကာ လုံခြုံရေးဝန်ထမ်းများနှင့်အတူ ထွက်ခွာသွားခဲ့သည်။

ချန်ကျိုး၏ အခန်းငယ်လေးထဲမှ ထွက်ခွာလာသော အားယွမ်သည် ရုတ်တရက် တစ်ကိုယ်လုံး ပေါ့ပါးသွားသကဲ့သို့ ခံစားလိုက်ရသည်။ နှာပိတ်နေခြင်းလည်း မရှိတော့ဘဲ ခေါင်းမူးခြင်းနှင့် လည်ချောင်းနာခြင်းများလည်း ပျောက်ကွယ်သွားခဲ့သည်။

အားယွမ်သည် ချန်ကျိုး၏အခန်းငယ်လေးဆီသို့ သံသယဖြင့် လှည့်ကြည့်လိုက်သည်။ ခဏမျှ စဉ်းစားပြီးမှ ခေါင်းကို ခါယမ်းကာ ထွက်ခွာသွားခဲ့သည်။

မိမိကို လုပ်ကြံသွားသည်ဟု ထင်မှတ်နေသော ချန်ကျိုးသည် မည်သည့်နေရာမှ ခွန်အားများ ရောက်ရှိလာမှန်းမသိဘဲ ကုတင်ပေါ်မှ ထရပ်ကာ ခြေဗလာဖြင့် ဒေါက်တာအားယွမ်၏ နောက်သို့ လိုက်လံဆဲဆိုတော့သည်။

"ခွေးမသား အားယွမ်၊ မင်းက လူယုတ်မာနည်းလမ်းကို သုံးပြီး ငါ့ကို နောက်ကွယ်ကနေ လုပ်ကြံရဲတယ်ပေါ့၊ သတ္တိရှိရင် ငါနဲ့ ရှေ့ကနေ ရင်ဆိုင်ရဲလား"

လမ်းတွင် ဖြတ်သန်းသွားသော ဆေးဘက်ဆိုင်ရာ ဝန်ထမ်းများသည် စိတ်ပျက်စွာဖြင့် ခေါင်းကို ခါယမ်းနေကြသည်။ ချန်ကျိုး၏ အားအင်များကို ကြည့်ခြင်းအားဖြင့် ဒေါက်တာအားယွမ်သည် ယနေ့တွင် တစ်နေကုန် အဆဲခံရပေဦးမည်။

မိနစ်နှစ်ဆယ် ကြာမြင့်ပြီးနောက် ဝင်းထဲတွင် ဆဲဆိုနေသော ချန်ကျိုး၏အသံသည် ရုတ်တရက် ရပ်တန့်သွားပြီး မြေပြင်ပေါ်သို့ အန်ဖတ်များ အန်ချလိုက်တော့သည်။

အန်ပြီးနောက် ချန်ကျိုးသည် အခြားနေရာတစ်ခုသို့ ပြောင်းရွှေ့ကာ ဆက်လက်ဆဲဆိုပြန်သည်။

"အားယွမ်၊ ငါ့ကို ခိုးတိုက်ခိုက်ရဲတယ်ပေါ့၊ သတ္တိရှိရင် အောက်ကို ဆင်းလာခဲ့လေ၊ ဒီချန်ကျိုးကြီးနဲ့ ဝေါ့"

နောက်ထပ် နေရာတစ်ခုသို့ ထပ်မံပြောင်းရွှေ့ကာ ဆက်လက်ဆဲဆိုပြန်သည်။

ရုံးအဆောက်အအုံပေါ်ရှိ ဆရာဝန်အားယွမ်သည် ဆေးစွမ်းပြလောက်မည့် အချိန်ကို တွက်ချက်ကာ အပေါ်ထပ်မှ ငုံ့ကြည့်လိုက်ရာ ချန်ကျိုး ဝင်းထဲတွင် အဆက်မပြတ်အန်နေသည်ကို အကဲဖြတ်မိလိုက်သည်။

“အန်ထုတ်လိုက်ရင် ကောင်းသွားမှာပါ”

ဝင်းထဲရှိ ချန်ကျိုးသည် အားယွမ်က အပေါ်ထပ်မှ မိမိ၏အဖြစ်ကို ကြည့်ကာ ရယ်မောနေသည်ကို မြင်တွေ့ရသဖြင့် အန်ချင်စိတ်ကို အောင့်အည်းကာ ဆရာဝန်အားယွမ်အား လက်ခလယ်ထောင်ပြပြီး ပိုမိုကျယ်လောင်စွာ ဆဲဆိုတော့သည်။

"ခွေးမသားအားယွမ်၊ မင်း အောက်ဆင်းလာပြီး ဒီချန်ကျိုးကြီးနဲ့ ချရဲလား၊ ဒီချန်ကျိုးကြီးက မင်းရဲ့ ခေါင်းကို အိမ်သာထဲ နှစ်ပစ်မယ်"

အားယွမ်သည် သက်ပြင်းချလိုက်သည်။ ကြည့်ရသည်မှာ ဘာပြဿနာမှ မရှိတော့ချေ။

ချန်ကျိုးသည် ထိုစကားလုံးများကိုပင် ထပ်ခါတလဲလဲ ဆဲဆိုနေသဖြင့် ဒေါက်တာ အားယွမ်သည် နားငြီးလာကာ ရုံးခန်းထဲတွင် ထိုင်ရင်း နားထဲသို့ ဂွမ်းစို့ကာ ဂိမ်းကစားနေတော့သည်။

ချန်ကျိုးသည် သုံးနာရီကျော်တိုင်တိုင် ဆဲဆိုပြီးနောက် နောက်ဆုံးတွင်မူ အန်လွန်းသဖြင့် ရေဓာတ်ခမ်းခြောက်ကာ အားအင်ကုန်ခမ်းသွားခဲ့ရသည်။ ထို့ကြောင့် ဒေါသတကြီးဖြင့် အခန်းငယ်လေးသို့ ပြန်လာခဲ့သည်။

ဒေါသများ ထွက်ပေါက်ရသွားသဖြင့် ခေါင်းကိုက်ခြင်းမှာလည်း မသိမသာ ပျောက်ကွယ်သွားပြီး လူကလည်း လန်းဆန်းလာခဲ့သည်။

အခန်းငယ်လေး၏ တံခါးဝသို့ ရောက်ရှိချိန်တွင် ထုပ်ပိုးထားသော ဗူးအများအပြားကို မြင်တွေ့ရသဖြင့် ချန်ကျိုးသည် ခြေဗလာဖြင့် ကန်ကျောက်လိုက်ရင်း ပြောလိုက်သည်။

"ဘယ် ခွေးမသားက ငါ့တံခါးဝမှာ အမှိုက်တွေ လာပစ်ထားတာလဲ"

ဟွမ်‌ရှောင်မော့သည် ၎င်း၏သွားအဖြူလေးများကို ပေါ်အောင် ဖြဲပြရင်း မဝံ့မရဲဖြင့် ပြောလိုက်သည်။

"ချန်ကျိုး၊ အဲဒါ ငါပါ"

"မင်း ဟုတ်လား"

ချန်ကျိုးသည် ဟွမ်‌ရှောင်မော့ကို မျက်လုံးပြူး၍ စိုက်ကြည့်လိုက်သည်။

ဟွမ်‌ရှောင်မော့၏အမွှေးအမျှင်များ ထောင်မတ်သွားရသည်၊ ၎င်းသည် ဒေါသအိုးကို သွား၍ ဆွမိခြင်း ဖြစ်သည်။

"ငါ ဝယ်ထားတာပါ၊ မင်းအတွက် ဝယ်ပေးတာ"

ဟွမ်‌ရှောင်မော့သည် ပါဆယ်ဗူးများ၏ဘေးသို့ ပြေးသွားကာ ဗူးတစ်ခုကို အမြန်ဖောက်လိုက်ရာ အထဲတွင် အပြာရောင် ဖိနပ်အကြီးကြီးတစ်စုံ ရှိနေသည်။

"ငါ့အတွက် ဝယ်ပေးတာ ဟုတ်လား"

ချန်ကျိုးသည် အခြား ပါဆယ်ဗူးအများအပြားကို ထပ်မံကြည့်ရှုလိုက်ရင်း မေးလိုက်သည်။

"ကျန်တာတွေကော ဘာတွေလဲ"

ဟွမ်‌ရှောင်မော့သည် ပြုံးလျက် ကိုယ်ကို လှည့်လိုက်သည်။ ၎င်း၏ မျက်နှာအမူအရာမှာ ငိုသည်ထက်ပင် ကြည့်ရဆိုးလှသည်။

ပါဆယ်ဗူးများထဲတွင် အချိန်အတော်ကြာ ရှာဖွေပြီးနောက် ဗူးတစ်ခုကို တွေ့ရှိသဖြင့် ပြုံးရွှင်သော မျက်နှာထားဖြင့် ချန်ကျိုးအား ကမ်းပေးလိုက်သည်။

[အမျိုးသားသုံး ခြေအိတ် - ဆယ်ယွမ်လျှင် သုံးစုံ]

"ဟွန်း၊ မင်းလို ကြောင်စုတ်လေးက အသိတရား ရှိသားပဲ၊ ငါ့ဖုန်းကော"

ချန်ကျိုးသည် နောက်ဆုံးတွင်မူ ဖုန်းကို သတိရသွားခဲ့သည်။

ဟွမ်‌ရှောင်မော့၏ မျက်နှာမှာ ကြွက်သေကို စားမိသကဲ့သို့ ဖြစ်သွားပြီး အခန်းငယ်လေးရှိ ဆိုဖာဆီသို့ ညွှန်ပြလိုက်သည်။

ချန်ကျိုးသည် အခန်းငယ်လေးထဲသို့ ဝင်ရောက်ကာ ဖုန်းဖြင့် မိမိ ကုတင်ပေါ်တွင် အားနည်းစွာ လှဲလျော်နေသည့် ပုံစံကို ဓာတ်ပုံရိုက်ပြီး လူမှုကွန်ရက်တွင် စာသားတင်လိုက်သည်။

“ယနေ့တွင် အားယွမ်၏လုပ်ကြံမှုကို သေလုနီးပါး ခံလိုက်ရသည်၊ တော်သေးတာပေါ့ ဒီချန်ကျိုးကြီးရဲ့ ကျင့်ကြံမှုက နက်ရှိုင်းလို့ အားယွမ်ရဲ့ ယုတ်မာတဲ့ လက်ချက်ကို ခုခံနိုင်ခဲ့တယ်၊ အားယွမ်ကို နှိမ်နင်းနိုင်ခဲ့ပေမဲ့ ဒီချန်ကျိုးကြီးလည်း ဒဏ်ရာအပြင်းအထန် ရသွားခဲ့ရတယ်”

ဟွမ်‌ရှောင်မော့သည် ချန်ကျိုးကို ကျောခိုင်းကာ တံခါးဘေးတွင် မှီရပ်လျက် ထိုပါဆယ်ဗူးများကို ကြည့်ရင်း တစ်ကိုယ်လုံး ပျော့ခွေသွားကာ လက်သည်းလေးများဖြင့် ရင်ဘတ်ကို ပွတ်သပ်လျက် သက်ပြင်းချလိုက်ရသည်။

“တော်သေးတာပေါ့ ချန်ကျိုးက ဆက်ပြီး မစစ်ဆေးတော့လို့”

ကျန်တဲ့ အရာတွေကတော့ ၎င်း တိတ်တဆိတ် ဝယ်ယူထားတဲ့ ပစ္စည်းတွေချည်းပဲ ဖြစ်သည်။

[ကြောင်ကုတ်စင် - ၁၂၈ ယွမ်]

[အိမ်မွေးတိရစ္ဆာန်သုံး ရေသန့်စက် - ၄၄၉ ယွမ်]

[အိမ်မွေးတိရစ္ဆာန်သုံး နွေရာသီဝတ် တီရှပ် - နှစ်ဆယ့်သုံးထည်၊ ၅၄၂ ယွမ်]

[ကြောင်သုံး မိုးကာအင်္ကျီ]

တစ်နာရီ ကြာမြင့်ပြီးနောက် ကားအချို့သည် ချင်ရှန်း စိတ်ကျန်းမာရေးဆေးရုံ၏ တံခါးဝတွင် ရပ်တန့်သွားခဲ့သည်။

လော့ယွီမင်၊ ကျိုးအိုက်ကော်၊ ကျန်းယိုယို၊ လီချင်ရှန်းနှင့် ဝူပေါ်ထုံတို့သည် ချန်ကျိုး၏ လူမှုကွန်ရက်ကို အမြဲမပြတ် စောင့်ကြည့်နေကြသူများ ဖြစ်သဖြင့် အာဟာရဖြည့်စွက်စာများနှင့် မုန့်အများအပြားကို ယူဆောင်လာကြသည်။

"ဘာတွေဖြစ်တာလဲ၊ ငါ့ဆရာက ဝိညာဉ်ကမ္ဘာက ပြန်လာတာကို ဘာလို့ ဖျားနာနေရတာလဲ"

လီချင်ရှန်းက ပြောသည်။

"ချန်ကျိုးက အရက်သောက်ထားတာကို အားယွမ်ရဲ့ ပဋိဇီဝဆေးတွေကို ခိုးသောက်လိုက်တာလေ"

"ဒါကို လျှောက်သောက်လို့ရမလား၊ ပဋိဇီဝဆေးနဲ့ အရက်က ချက်ချင်းအသက်ထွက်သွားနိုင်တယ် မဟုတ်လား"

ဝူပေါ်ထုံက ပြောလိုက်သည်။

ကျိုးအိုက်ကော်သည် ပတ်ဝန်းကျင်၏စကားများကို လိုက်လံမမေးမြန်းဘဲ စကားလမ်းကြောင်း လွှဲလိုက်သည်။

"မင်းတို့ ကြားမိကြလား၊ ကျင့်ကြံသူတွေရဲ့ စခန်းထဲမှာ သတင်းတွေ ပျံ့နေတယ်၊ ကောင်းကင်မိစ္ဆာ ဂိုဏ်းရဲ့ ဂိုဏ်းချုပ်နဲ့ သူတော်စင်မတို့က ဖောက်ပြန်နေကြတာတဲ့၊ ဌာနမှူးလော့၊ မင်း အသေးစိတ်အခြေအနေကို သိလား"

လီချန်းရှန်းသည် အတင်းအဖျင်း သတင်းကို ကြားရသဖြင့် မျက်လုံးများ လင်းလက်သွားခဲ့သည်။

"တကယ်လား၊ မုသားလား"

ကျန်းယိုယိုက ပြောသည်။

"ကျင့်ကြံသူတွေရဲ့ အသိုင်းအဝိုင်းတစ်ခုလုံး ပေါက်ကွဲမတတ်ဖြစ်နေတာ၊ ဒါက မုသား ဖြစ်နိုင်ပါ့မလား"

လော့ယွီမင်က စဉ်းစားပြီးမှ ပြောလိုက်သည်။

"အသေးစိတ် အခြေအနေကို ငါလည်း အများကြီး မသိပါဘူး၊ ကြားရသလောက်တော့ ကောင်းကင်မိစ္ဆာဂိုဏ်းရဲ့ ဂိုဏ်းချုပ်နဲ့ သူတော်စင်မတို့မှာ ကလေးတစ်ယောက်ရှိနေတယ်တဲ့၊ အဲဒါကို ဂိုဏ်းချုပ်ကတော် သိသွားလို့ ကိုယ့်ကိုယ်ကိုယ် သေကြောင်း ကြံစည်နေတယ်လို့ ကြားတယ်"

"ဒီလောက်တောင် စိတ်လှုပ်ရှားစရာ ကောင်းတာလား၊ ကလေးတောင် ရှိနေပြီ ဟုတ်လား"

ကျိုးအိုက်ကော်က ထပ်မံမေးမြန်းလိုက်သည်။

ကျန်းယိုယိုက ပြောသည်။

"ကျင့်ကြံသူတွေရဲ့ စခန်းမှာ အပြင်းအထန်ဆွေးနွေးနေကြတာ၊ ကောင်းကင်မိစ္ဆာဂိုဏ်းဘက်က ဘယ်လိုရှိမလဲ မသိဘူး၊ ဒီသတင်းက ဝိညာဉ်ကမ္ဘာကနေ ပျံ့နှံ့လာတာလို့ ကြားတယ်"

အမှန်တော့ ဤကိစ္စ၏ကနဦး ဗားရှင်းမှာ ဤသို့ ဖြစ်သည်။

ပထမဆုံး သတင်းလွှင့်သူ ချန်ကျိုးကြီးသည် ဝိညာဉ်စျေးတွင် ကောင်းကင်မိစ္ဆာဂိုဏ်းချုပ်နှင့် သူတော်စင်မတို့ ထွက်ပြေးသွားကြ ပြီဟု လူသိရှင်ကြား ကောလဟာလလွှင့်ခဲ့သည်။

ဒုတိယမြောက် သတင်းလွှင့်သူ “မင်းတို့ သိလား၊ ကောင်းကင်မိစ္ဆာဂိုဏ်းရဲ့ ဂိုဏ်းချုပ်နဲ့ သူတော်စင်မတို့က ဖောက်ပြန်နေကြတာ၊ ဂိုဏ်းချုပ်ကတော်က အိပ်ရာပေါ်မှာတင် အမိဖမ်းမိသွားတာတဲ့”

တတိယမြောက် သတင်းလွှင့်သူ “မင်းတို့ကို ကိစ္စတစ်ခုပြောပြမယ်၊ အခြားသူကို လုံးဝမပြောနဲ့ဦး၊ ကောင်းကင်မိစ္ဆာဂိုဏ်းရဲ့ ဂိုဏ်းချုပ်နဲ့ သူတော်စင်မတို့က အတူတူ နေနေကြတာ၊ အခု ကိုယ်ဝန်တောင် ရှိနေပြီတဲ့၊ အဲဒါက ဂိုဏ်းချုပ်ကတော်ရဲ့ ညီမအရင်းလေ”

စတုတ္ထမြောက် သတင်းလွှင့်သူ “လွန်ခဲ့တဲ့ နှစ်အနည်းငယ်က ကောင်းကင်မိစ္ဆာဂိုဏ်းချုပ်က သူတော်စင်မကို အတင်းအကျပ် သိမ်းပိုက်ခဲ့တာ၊ အခုဆိုရင် ဂိုဏ်းချုပ်နဲ့ သူတော်စင်မတို့မှာ ကလေးတောင် ရှိနေပြီ၊ ဂိုဏ်းချုပ်ကတော်က ကိုယ့်ကိုယ်ကိုယ် သေကြောင်းကြံစည်နေတယ်တဲ့”

ပဉ္စမမြောက် သတင်းလွှင့်သူ “ကောင်းကင်မိစ္ဆာဂိုဏ်းချုပ်က သူတော်စင်မနဲ့ လျှို့ဝှက်ဆက်ဆံရေး ရှိနေတာ ကြာပြီ၊ သူတို့နှစ်ယောက်ရဲ့ ကလေးက ဈေးဝယ်ထွက်တတ်နေပြီ၊ မွေးကတည်းက နိုင်ငံခြားကိုပို့ထားတာ၊ အခု ဂိုဏ်းချုပ်ကတော် သိသွားလို့ ကြိုးဆွဲချသေသွားပြီတဲ့”

ကောလဟာလများသည် အချက်အလက် စုံလင်လှသဖြင့် ၎င်းတို့သည် အခင်းဖြစ်ပွားရာ နေရာတွင် ကိုယ်တိုင် မြင်တွေ့ခဲ့ရသည့်အတိုင်း ဖြစ်နေတော့သည်။