အခန်း ၇၀၃

အခန်း ၇၀၃ - ကြီးမားသော ရိတ်သိမ်းမှုနှင့် စစ်မှန်သော ဝိညာဉ် မီးနဂါးကို ရရှိခြင်း (အပိုင်း - ၂)

"ငါက ဘာလို့ မင်းနဲ့ စာချုပ်ချုပ်ရတာလဲ။"

"ယုတ်မာပြီး အရှက်မရှိတဲ့ လူသား... မင်း ငါ့ကို ဘာတွေလုပ်လိုက်တာလဲ။"

နဂါးပေါက်လေးသည် ဖြည်းညင်းစွာ နိုးထလာပြီး ကျန်းဖန်ကို ချက်ချင်း မြင်လိုက်ရသည်။ ထို့နောက် တစ်စုံတစ်ခု မှားယွင်းနေကြောင်း ၎င်း သတိပြုမိသွားသည်။

ဘယ်အချိန်ကတည်းကန်းမသိ၊ သူ့ရှေ့မှာရှိနေတဲ့ ဒီလူသားနဲ့ သူ စာချုပ်တစ်ခု ချုပ်ဆိုမိပြီးသား ဖြစ်နေသည်။

သာမန်စာချုပ်မဟုတ်ဘဲ ဝိညာဉ်သားရဲ စာချုပ်ပင် ဖြစ်နေလေသည်။

ဒါက လုံးဝကို ရယ်စရာကောင်းလွန်းလှသည်။

သေးသိမ်တဲ့ လူသားတစ်ယောက်က စစ်မှန်သော ဝိညာဉ်သားရဲ တစ်ကောင်နဲ့ ဘယ်လိုလုပ်ပြီး စာချုပ်ချုပ်နိုင်မှာလဲ။

ချက်ချင်းပင် ၎င်းမှာ အံ့ဩခြင်း၊ ဒေါသထွက်ခြင်းတို့ ရောယှက်သွားကာ ကျန်းဖန်ကိုပင် ဝင်ရောက်တိုက်ခိုက်ချင်စိတ် ပေါ်လာတော့သည်။

"ကောင်လေး... ငြိမ်ငြိမ်နေစမ်း။"

ကျန်းဖန်က သူ၏ လက်ဝါးကြီးဖြင့် လှမ်းကာ နဂါးပေါက်လေးကို ချက်ချင်း ဖမ်းဆုပ်လိုက်သည်။

လျှို့ဝှက်ဆန်းကြယ်သော စွမ်းအားတစ်ရပ်က ၎င်း၏ ခန္ဓာကိုယ်ကို လွှမ်းခြုံသွားပြီး လှုပ်ရှား၍မရအောင် ပြုလုပ်လိုက်သည်။

"အရှက်မရှိတဲ့ လူသား၊ မင်းက ငါ့ကို ဒီလိုမျိုး စော်ကားရဲတယ်ပေါ့လေ။"

နဂါးပေါက်လေးမှာ အလွန်အမင်း ဒေါသထွက်သွားပြီး မျက်နှာလေး နီရဲလာကာ ၎င်း၏ ခန္ဓာကိုယ်မှ မီးတောက်များ ပန်းထွက်လာတော့သည်။

၎င်း၏ မိခင်က ပွေ့ဖက်ထားသလိုမျိုး သေးသိမ်သော လူသားတစ်ယောက်၏ ဖမ်းဆုပ်ကိုင်တွယ်ခြင်းကို ပထမဆုံးအကြိမ် ခံရခြင်းဖြစ်သည်။

သို့သော်လည်း စာချုပ်၏ စွမ်းအားကြောင့်၊ ၎င်းမှာ ရုန်းကန်ရန်ပင် မစွမ်းသာခဲ့ပေ။

၎င်း၏ ခွန်အားက တစ်ဖက်လူကို အနည်းငယ်မျှပင် အန္တရာယ်မပေးနိုင်ခဲ့ချေ။

"မင်းနာမည် ဘယ်လိုခေါ်လဲ။"

ကျန်းဖန်က မေးလိုက်သည်။

"ငါ့နာမည်က ဂျင် ။ မင်း ငါ့ဆီက ဒီစာချုပ်ကို မြန်မြန် ဖျက်သိမ်းပေးတာ ကောင်းမယ်။"

"အဲ့လိုမှမဟုတ်ရင် ငါ့မေမေ ပြန်လာတဲ့အခါ မင်း နောင်တရသွားလိမ့်မယ်။"

နဂါးပေါက်လေး ဂျင်က မုန်းစရာကောင်းသော ဤလူသားကို ခြိမ်းခြောက်ရန် ကြိုးစားလိုက်သည်။

"မေမေ ဟုတ်လား။ မင်းရဲ့ အမေ သေသွားတာ ကြာလောက်ပြီလို့ ငါ ထင်တယ်။"

ကျန်းဖန်က မျက်ခုံးပင့်ကာ ပြောလိုက်သည်။

"မဖြစ်နိုင်ဘူး။ ငါ့မေမေက အင်မတန် စွမ်းအားကြီးတဲ့ တည်ရှိမှုတစ်ခုပဲ၊ ဘယ်လိုလုပ် သေနိုင်မှာလဲ။"

"နေပါဦး... မီးနဂါး နန်းတော်ကြီးက ဘာတွေဖြစ်ကုန်တာလဲ။ မိစ္ဆာတွေ အများကြီးက ဘာလို့ ကျူးကျော်ဝင်ရောက်လာကြတာလဲ။"

"ဘာလို့ ဒီလောက်တောင် ပျက်စီးယိုယွင်းနေရတာလဲ။"

ထိုအခိုက်အတန့်တွင် နဂါးငယ်လေး ဂျင်သည် ၎င်း၏ ပတ်ဝန်းကျင်ကို သတိထားမိသွားသည်။

မူလ မီးနဂါးနန်းတော်ကြီးမှာ မိစ္ဆာများစွာ၏ ကျူးကျော်ဝင်ရောက်မှုကြောင့် ဖျက်ဆီးခံလိုက်ရကြောင်း ၎င်း ရုတ်တရက် တွေ့ရှိလိုက်ရသည်။ ကြီးမားပြင်းထန်လှသော မိစ္ဆာချီ အငွေ့အသက်များသည် မီးနဂါး လျှို့ဝှက်နယ်မြေ တစ်ခုလုံးကို လွှမ်းမိုးတိုက်ခတ်နေပြီး ဤနေရာကို မိစ္ဆာနယ်မြေ အဖြစ် ပြောင်းလဲပစ်ရန် ကြိုးစားနေပုံရသည်။

ယခုအခါတွင်မူ စာချုပ်ကိစ္စကို ၎င်း ယာယီ မေ့ထားလိုက်တော့သည်။

မည်သို့ပင်ဖြစ်စေ၊ မီးနဂါး လျှို့ဝှက်နယ်မြေသည် ၎င်း၏ အိမ်၊ ၎င်း၏ ပိုင်နက်နယ်မြေ ဖြစ်သည်။

ယခုကဲ့သို့ မိစ္ဆာများစွာ၏ ကျူးကျော်ဝင်ရောက်မှုကို ခံရခြင်းမှာ မီးနဂါးတစ်ကောင်အနေဖြင့် လုံးဝ သည်းခံနိုင်စရာ အကြောင်းမရှိပေ။

ထို့ကြောင့် ယခုအခါတွင် ၎င်းသည် အလွန်အမင်း ဒေါသထွက်နေလေပြီ။

"ဒီမိစ္ဆာတွေ ဘယ်ကရောက်လာသလဲ ဆိုတာကို ငါလည်း မသိဘူး။"

"ရှေးဟောင်းခေတ်ကာလတုန်းက ဘာတွေဖြစ်ခဲ့သလဲဆိုတာကိုလည်း ငါမသိဘူးလေ။"

ကျန်းဖန်က ခပ်ပေါ့ပေါ့ပင် ပြောလိုက်သည်။

"ရှေးဟောင်းခေတ်ကာလ ဟုတ်လား။ အချိန်တွေ အဲဒီလောက်တောင် ကြာသွားခဲ့ပြီလား။"

"မေမေက ငါ့ကို သက်စောင့်မူလကျောက်တုံးထဲမှာ ချိတ်ပိတ်ခဲ့တာ အချိန်တွေ ဒီလောက်တောင် ကုန်လွန်သွားခဲ့ပြီပေါ့။"

"ငါ့မေမေ တကယ်ပဲ ဒုက္ခတစ်ခုခုများ ကြုံတွေ့သွားခဲ့ရတာလား။"

ဤစကားကို ကြားသောအခါ နဂါးငယ်လေး ဂျင်၏ နှလုံးသားထဲတွင် စိုးရိမ်ပူပန်မှုများ ပြည့်နှက်သွားတော့သည်။

ရှေးဟောင်းခေတ်ကာလတွင် မည်သည့်အရာများ ဖြစ်ပျက်ခဲ့သည်ကို ၎င်းလည်း ရေရေရာရာ မသိပေ။ ၎င်း သိထားသည်မှာ မွေးဖွားစဉ်က မတော်တဆမှုတစ်ခုနှင့် ကြုံတွေ့ခဲ့ရပြီး လမစေ့သော ကလေးငယ်ကဲ့သို့ ချို့တဲ့အားနည်းမှုများ ဖြစ်ပေါ်ခဲ့ရသည် ဆိုသည်ကိုသာ ဖြစ်သည်။

မူလက ၎င်းမိခင်၏ စွမ်းဆောင်ရည်အရဆိုလျှင် ဤကိစ္စမှာ ပြဿနာကြီးကြီးမားမား မဟုတ်ပေ။

၎င်း၏ ချို့တဲ့မှုကို ကုစားရန် ရတနာများစွာကို သေချာပေါက် ရှာဖွေပေးနိုင်မည် ဖြစ်သည်။

မမျှော်လင့်ဘဲ မတော်တဆမှုတစ်ခု ဖြစ်ပွားခဲ့ပြီး ကြီးမားသော ကပ်ဘေးဆိုးကြီးတစ်ခု ချဉ်းကပ်လာသည့်ပုံ ပေါ်နေသည်။

ထို့ကြောင့် ၎င်း၏မိခင်မှာ ၎င်းကို ယာယီ ချိတ်ပိတ်ထားရန် ဖိအားပေးခံခဲ့ရခြင်း ဖြစ်သည်။

မိခင်ဖြစ်သူမှ ၎င်းကို မြန်မြန်ဆန်ဆန် ပြန်လည်လွှတ်ပေးလိမ့်မည်ဟု မူလက ထင်မှတ်ထားခဲ့သော်လည်း၊ ဤမျှလောက် အချိန်တွေ ကုန်လွန်သွားသည့်တိုင်အောင် ကယ်တင်ခြင်း မခံရသေးပေ။

ယင်းအစား၊ မုန်းစရာကောင်းလှသော သူစိမ်း လူသားကျင့်ကြံသူ တစ်ဦး၏ ကယ်တင်ခြင်းကိုသာ ခံလိုက်ရသည်။

ဤအချက်က ၎င်း၏မိခင် အမှန်တကယ်ပင် အန္တရာယ်တစ်ခုခုနှင့် ကြုံတွေ့ခဲ့ရပြီဟု သံသယဝင်သွားစေတော့သည်။

ထိုသို့မဟုတ်လျှင် ဤမျှ ကာလကြာရှည်သည်အထိ သတင်းအစအနလေးမျှပင် ပျောက်ဆုံးနေမည် မဟုတ်ပေ။

"ဘာတွေပဲ ဖြစ်ခဲ့ဖြစ်ခဲ့၊ ဒီမိစ္ဆာတွေ ဒီနေရာမှာ ဆက်နေခွင့် လုံးဝမရှိစေရဘူး။"

"သူတို့ကို အမြစ်ပြတ် သုတ်သင်ပစ်ရမယ်။"

နဂါးငယ်လေး ဂျင်က ဒေါသတကြီး ပြောလိုက်သည်။

မည်သို့ပင်ဆိုစေကာမူ၊ မီးနဂါး လျှို့ဝှက်နယ်မြေသည် အမြဲတမ်း ၎င်း၏ ပိုင်နက်ဖြစ်သဖြင့် ဤမိစ္ဆာများကို ဤနေရာတွင် ဖျက်ဆီးသောင်းကျန်းခွင့် လုံးဝ မပြုနိုင်သည်မှာ သဘာဝပင် ဖြစ်သည်။

"အို... မင်းမှာ ဒီမိစ္ဆာတွေကို ရှင်းလင်းပစ်ဖို့ နည်းလမ်းရှိလို့လား။"

ကျန်းဖန်က သိချင်စိတ်ဖြင့် မေးလိုက်သည်။

နဂါးငယ်လေး၏ ကျင့်ကြံခြင်းအဆင့်မှာ အများဆုံး ရွှေအမြုတေအဆင့်ခန့်သာ ရှိကြောင်း သူ အာရုံခံသိရှိထားသည်။

ဤမိစ္ဆာအုပ်စုကြီးကို အမြစ်ပြတ်ချေမှုန်းရန်မှာ အခြေခံအားဖြင့် မဖြစ်နိုင်ပေ။

"ဟွန်း... ဒါက မီးနဂါး လျှို့ဝှက်နယ်မြေ၊ ငါ့ရဲ့ ပိုင်နက်၊ နဂါးအသိုက်ပဲ။"

"ဒီလျှို့ဝှက်နယ်မြေကမ္ဘာ တစ်ခုလုံးက ငါ့ရဲ့ ထိန်းချုပ်မှုအောက်မှာ ရှိတယ်။"

"အရင်က ငါ ချိတ်ပိတ်ခံထားရတဲ့ အခြေအနေမှာ ရှိနေလို့သာ ဒီမိစ္ဆာတွေ ဒီနေရာမှာ သောင်းကျန်းနိုင်ခဲ့ကြတာ။"

"အခု ငါ နိုးလာပြီဆိုတော့ ဒီမှာ သူတို့ကို ဆက်ပြီး သည်းခံနေမှာ မဟုတ်တော့ဘူး။"

နဂါးငယ်လေး ဂျင်က မာနတခွဲသားဖြင့် ပြောလိုက်သည်။

ရွှစ်

၎င်း၏ကိုယ်လုံးလေး လင်းလက်သွားပြီး ကျန်းဖန်၏ ရင်ခွင်ထဲမှ ချက်ချင်း ပြေးထွက်သွားကာ နန်းတော်၏ အတွင်းပိုင်း နက်ရှိုင်းရာဆီသို့ ပျံသန်းသွားတော့သည်။

ဘုန်း~~

နောက်တစ်စက္ကန့်တွင်၊ နီရဲနေသော နဂါးပုလဲလုံးကြီးတစ်ခု ရုတ်တရက် ထွက်ပေါ်လာသည်။ လေဟာနယ်ထဲမှ ပျံသန်းထွက်ပေါ်လာသည့်အလား၊ မီးနဂါးငယ်လေး ဂျင်၏ စွမ်းအားက ဆွဲငင်လိုက်ကြောင်း သိသာထင်ရှားနေသည်။

ထိုအရာက မီးနဂါး လျှို့ဝှက်နယ်မြေ၏ အဓိက အသက်သွေးကြောပင် ဖြစ်သည်။

ဤအဓိကအသက်သွေးကြောကို ထိန်းချုပ်နိုင်သရွေ့ မီးနဂါး လျှို့ဝှက်နယ်မြေတစ်ခုလုံးကို ထိန်းချုပ်နိုင်သည်နှင့် တူညီပေသည်။

သို့သော်လည်း၊ မီးနဂါးပေါက်လေး တစ်ကောင်သာလျှင် ဤအဓိကအသက်သွေးကြောကို ထိန်းချုပ်နိုင်စွမ်းရှိမည်မှာ ယုံမှားသံသယဖြစ်ဖွယ် မရှိချေ။

အခြား မည်သည့် သတ္တဝါပင်ဖြစ်စေ၊ မီးနဂါး လျှို့ဝှက်နယ်မြေကို ထိန်းချုပ်ရန်မှာ လုံးဝ မဖြစ်နိုင်ပေ။

မျက်စိတစ်မှိတ်အတွင်းမှာပင် မီးနဂါးငယ်လေး ဂျင်သည် နီရဲနေသော နဂါးပုလဲကို ဆုပ်ကိုင်လိုက်ပြီး၊ မီးနဂါး လျှို့ဝှက်နယ်မြေ၏ နက်ရှိုင်းရာ အရပ်ရှိ တားမြစ်အစီအရင်ကို ချက်ချင်း လှုံ့ဆော်လိုက်ရာ၊ ဧရာမ ငလျင်ကြီးတစ်ခု လှုပ်ခတ်သွားသကဲ့သို့ နယ်မြေတစ်ခုလုံး တုန်ဟီးသွားလေသည်။

ဤစွမ်းအားသည် လျှို့ဝှက်နယ်မြေကမ္ဘာ၏ ထောင့်စွန်းတိုင်းကို ရိုက်ခတ်လွှမ်းမိုးသွားသည်။

ဒေါင်~~

မီးနဂါး ဂျင်၏ ထိန်းချုပ်မှုအောက်တွင် ဤကျယ်ပြောခမ်းနားလှသော အစီအရင်ကြီး စတင်လည်ပတ်လာကာ၊ ကောင်းကင်နှင့်မြေကြီးကြားရှိ အဆုံးအစမဲ့သော မီးလျှံစွမ်းအင်များကို စုဆောင်းလိုက်ပြီး၊ ကောင်းကင်ယံကို ဖောက်ထွင်းသွားမည့် ဧရာမ မီးနဂါးကြီးတစ်ကောင်အဖြစ် စုစည်းသွားတော့သည်။

ရှေးဟောင်းခေတ်ကာလမှ စစ်မှန်သော ဝိညာဉ်မီးနဂါးကြီးသည် ဤခေတ်ကာလတွင် ရှင်သန်ထမြောက်လာသည့်အလားပင်။

ဤမီးနဂါးကြီး ထွက်ပေါ်လာသည့် အခိုက်အတန့်တွင်၊ မီးလျှံများကို အုပ်စိုးထားသည့်အလား ကမ္ဘာမြေကြီးကို တုန်လှုပ်သွားစေမည့် ဟိန်းဟောက်သံကြီးကို ထုတ်လွှတ်လိုက်လေသည်။

အလွန်တရာ ကြီးမားလှသော မီးလျှံစွမ်းအားကြီးသည် ကောင်းကင်ဘုံ ကိုးလွှာနှင့် ကမ္ဘာမြေ အရပ်ဆယ်မျက်နှာအနှံ့ တိုက်ခတ်သွားတော့သည်။

မီးနဂါး လျှို့ဝှက်နယ်မြေ တစ်ခုလုံး မီးတောက်များထဲတွင် လွှမ်းခြုံခံလိုက်ရပြီး အဆုံးအစမဲ့သော မီးပင်လယ်ကြီးအဖြစ် ပြောင်းလဲသွားလေသည်။

သံသယဖြစ်ဖွယ်မရှိ၊ ဤအရာများသည် သာမန် မီးတောက်များ မဟုတ်ဘဲ၊ ဘယ်သောအခါမှ ငြိမ်းသတ်၍မရသော မီးနဂါး၏ မီးလျှံပင် ဖြစ်သည်။

ထို့ကြောင့် ဤမီးလျှံများ ထွက်ပေါ်လာသောအခါ မိစ္ဆာတိုင်းကို စတင် လောင်ကျွမ်းတော့သည်။

သို့သော် ဤမိစ္ဆာများသည် မီးလျှံ၏ စွမ်းအားကို မည်သို့ ခံနိုင်ရည်ရှိမည်နည်း။

အချိန်တိုလေးအတွင်းမှာပင်၊ ရေတွက်၍မရနိုင်သော မိစ္ဆာများစွာမှာ ပြာကျသွားပြီး၊ နေရာအနှံ့ ပျံ့နှံ့နေသော မိစ္ဆာချီများပင်လျှင် လုံးဝ ခြေမှုန်းခံလိုက်ရလေသည်။

ဤအချိန်တွင် မြေပြင်ပေါ်၌ မီးများ တိုက်ခတ်လောင်ကျွမ်းသွားသဖြင့် ချော်ရည်မြစ်ကြီးများ ဖြစ်ပေါ်လာတော့သည်။

တစ်ချိန်တည်းမှာပင်၊ ဧရာမ မီးတောင်ကြီးများ ဆက်တိုက် ပေါက်ကွဲလာပြီး ချော်ရည်ပူများကို ပန်းထုတ်နေလေသည်။

မရေမတွက်နိုင်သော သစ်ပင်ပန်းမန်များစွာလည်း မီးထဲတွင် လုံးဝ ပျက်စီးသွားခဲ့ရသည်။

မီးနဂါး လျှို့ဝှက်နယ်မြေကြီးသည် မီးလျှံကမ္ဘာကြီးတစ်ခုအဖြစ် ပြောင်းလဲသွားသကဲ့သို့ဖြစ်ကာ နေရာအနှံ့တွင် ကန့်အနံ့အသက်များ ထူထပ်စွာ ပြည့်နှက်နေလေသည်။

"ဟွန်း... သာမည မိစ္ဆာလေးတွေကများ မီးနဂါး လျှို့ဝှက်နယ်မြေကို ကျူးကျော်ဖို့ ကြိုးစားနေသေးတယ်။"

"ဒါက သူတို့ကိုယ်သူတို့ သေလမ်းရှာနေတာနဲ့ အတူတူပဲ။"

ဤမြင်ကွင်းကို ကြည့်ရင်း မီးနဂါးငယ်လေး ဂျင် အလွန် ကျေနပ်သွားလေသည်။

၎င်း၏ ကိုယ်ပိုင် စွမ်းအား မဟုတ်ဘဲ လျှို့ဝှက်နယ်မြေအတွင်းရှိ အစီအရင်၏ စွမ်းအား ဖြစ်သော်လည်း၊ ၎င်း၏ မိခင်ကလည်း လျှို့ဝှက်နယ်မြေထဲတွင် စွမ်းအားအချို့ ချန်ရစ်ထားခဲ့ပေသည်။

သို့သော် ဤနေရာသည် ၎င်း၏ ပိုင်နက်ဖြစ်ပြီး၊ ဤကဲ့သို့သော စွမ်းအားကို ပိုင်ဆိုင်ထားခြင်းက ၎င်း၏ ကိုယ်ပိုင် လုံခြုံရေးကိုလည်း ကာကွယ်ပေးနိုင်ပေသည်။

"ဒါက အတိတ်က စစ်မှန်တဲ့ ဝိညာဉ်မီးနဂါးကြီး ချန်ထားခဲ့တဲ့ စွမ်းအား ဖြစ်ရမယ်။"

"မမျှော်လင့်ဘဲ အချိန်တွေ ဒီလောက်ကြာသွားတာတောင် ဒီလိုစွမ်းအားမျိုး ရှိနေသေးတာပဲ။"

"စစ်မှန်တဲ့ ဝိညာဉ်သားရဲ ဆိုတဲ့ နာမည်နဲ့ တကယ်ကို ထိုက်တန်ပါပေတယ်။"

မိစ္ဆာတုန်လှုပ် ခေါင်းလောင်းလေးက အလွန်တရာ အထင်ကြီးလေးစားစွာဖြင့် မှတ်ချက်ချလိုက်သည်။

မီးနဂါး လျှို့ဝှက်နယ်မြေထဲတွင် မိစ္ဆာမည်မျှ ကျန်ရှိနေသေးသည်ကို ၎င်း ကောင်းကောင်း သိထားသည်။ အခြေခံအားဖြင့် ရေတွက်၍ပင် မရနိုင်ပေ။

သို့တိုင်အောင်၊ ဤမိစ္ဆာများအားလုံး အမြစ်ပြတ် သုတ်သင်ခံလိုက်ရလေသည်။

ဤလျှို့ဝှက်နယ်မြေကမ္ဘာတွင် စွမ်းအားမည်မျှ ပါဝင်နေသည်ကို စိတ်ကူးကြည့်ရုံဖြင့် သိနိုင်ပေသည်။

အကယ်၍သာ ဤမီးနဂါးငယ်လေး စောစောကတည်းက နိုးထလာခဲ့မည်ဆိုလျှင်၊ ဤမိစ္ဆာများသည် မီးနဂါး လျှို့ဝှက်နယ်မြေထဲတွင် ဆက်လက် ခိုအောင်းနေနိုင်မည် မဟုတ်ဘဲ၊ အစောကြီးကတည်းက အမြစ်ပြတ် သုတ်သင်ခံရပြီး ဖြစ်ပေလိမ့်မည်။

"မီးနဂါးကြီးက တကယ်ပဲ အဲဒီလောက် အစွမ်းထက်တယ်ဆိုရင်၊ အဲဒီမီးနဂါးကြီးက ဘယ်ကို ရောက်သွားတာလဲ။"

"ထွက်ပြေးသွားတာလား၊ ဒါမှမဟုတ် သေဆုံးသွားတာလား။"

သောင်းပြောင်းဖန်ဆင်း ဆေးဖိုလေးက သိချင်စိတ်ဖြင့် မေးလိုက်သည်။

"သေချာမသိဘူး၊ ဒါက ပဟေဠိတစ်ခုပဲ။"

မူလအဆောင် စုတ်တံလေးက လေးနက်သောအသံဖြင့် ပြောလိုက်သည်။

၎င်းကိုယ်တိုင်လည်း ထိုလျှို့ဝှက်ချက်ကို သိချင်နေလေသည်။

သို့သော် ကံမကောင်းစွာဖြင့်၊ ယခုအချိန်အထိ ဆက်စပ်နေသော မည်သည့် အချက်အလက်ကိုမျှ ရှာမတွေ့သေးပေ။

ရှေးဟောင်းခေတ်ကာလက ဖြစ်ရပ်များသည် သမိုင်းရေစီးကြောင်းထဲတွင် မြုပ်နှံပျောက်ကွယ်သွားခဲ့သည်မှာ ကြာပြီဖြစ်ဟန်တူသည်။

"ဒါနဲ့ စကားမစပ်၊ ဟိုလူသား ကျင့်ကြံသူတွေရော သေကုန်ပြီလား။"

ထိုက်ရီ မီးခိုးငွေ့ငါးသွယ် ပိုက်ကွန်လေးက သိချင်စိတ်ဖြင့် မေးလိုက်သည်။

"သူတို့ မသေသေးပါဘူး။ မီးနဂါး လျှို့ဝှက်နယ်မြေထဲကနေ ထွက်သွားတာ ကြာလောက်ပြီ ဖြစ်ရမယ်။"

"သူတို့ရဲ့ စွမ်းဆောင်ရည်က သိပ်မကြီးမားပေမယ့်၊ ထွက်ပြေးတာတော့ မြန်ကြတယ်။"

သေသပ်လှပသော ရတနာ မျှော်စင်လေးက အထင်သေးဟန်ဖြင့် ပြောလိုက်သည်။

"တကယ်ပဲ"

ထိုအခိုက်အတန့်တွင် ကျန်းဖန်သည် ပတ်ဝန်းကျင်ကို ဝေ့ကြည့်လိုက်ပြီး အလွန် ကျေနပ်သွားလေသည်။

မီးနဂါးငယ်လေး ဂျင်က ဤလျှို့ဝှက်နယ်မြေကမ္ဘာကို ထိန်းချုပ်ထားခြင်းသည် သူ့အနေဖြင့် ထိန်းချုပ်ထားသည်နှင့် တူညီပေသည်။

ထို့အပြင်၊ မီးနဂါး လျှို့ဝှက်နယ်မြေသည် သားရဲသောင်းချီ လျှို့ဝှက်နယ်မြေထက်ပင် ပိုမို ကြီးမားကျယ်ဝန်းပြီး ၎င်းမှာ ပဉ္စမအဆင့် လျှို့ဝှက်နယ်မြေကမ္ဘာ တစ်ခု ဖြစ်လေသည်။

ဤလျှို့ဝှက်နယ်မြေကမ္ဘာသည် မူလအဆောင်ဂိုဏ်း၏ ပိုင်နက်နယ်မြေများထဲမှ တစ်ခု သေချာပေါက် ဖြစ်လာနိုင်သည်ဟု ဆိုနိုင်သည်။

သားရဲသောင်းချီ လျှို့ဝှက်နယ်မြေနှင့် မီးနဂါး လျှို့ဝှက်နယ်မြေတို့ကို ချိတ်ဆက်ရန်အတွက် နေရာရွှေ့ပြောင်းခြင်း အစီအရင် တစ်ခုကိုပင် တည်ဆောက်နိုင်ပေသေးသည်။

ဤနည်းအားဖြင့် အနောက်ဘက် တိုက်ကြီးနှင့် နဂါးမည်း ပင်လယ်ဒေသ တို့ ချိတ်ဆက်မိသွားနိုင်ပေသည်။

ဤသည်မှာ မူလအဆောင်ဂိုဏ်း၏ ဖွံ့ဖြိုးတိုးတက်မှုအတွက် ကြီးမားလှသော အကျိုးကျေးဇူးကို သေချာပေါက် ဖြစ်ထွန်းစေမည် ဖြစ်သည်။

"မီးနဂါး လျှို့ဝှက်နယ်မြေ ရှိနေတော့၊ နဂါးမည်း ပင်လယ်ဒေသမှာ အခြေစိုက်စခန်း တစ်ခုရှိနေသလိုပဲ။"

"အနာဂတ်မှာ ဒီပင်လယ်ဒေသမှာ လျင်လျင်မြန်မြန် တိုးတက်လာဖို့ ဒီလျှို့ဝှက်နယ်မြေကမ္ဘာကို အသုံးပြုလို့ ရပြီ။"

ကျန်းဖန်သည် သူ၏ လက်သီးကို တင်းတင်းဆုပ်လိုက်လေသည်။

……….