အခန်း ၉၅

အခန်း (၉၅) ဝူမိသားစုဆီသွားပြီး တစ်ချက်တည်းနဲ့ ဖျက်ဆီးခြင်း

ရှုချွမ်းရဲ့မိသားစုက မဟာဝေဧကရာဇ်မင်းဆက်ရဲ့ ခရိုင် ၃၆ ခုအနက် တစ်ခုဖြစ်သည့် ဖုန်းယန်စီရင်စု တွင် ရှိသည်။

ရှုမိသားစုကို ဖုန်းယန်စီရင်စုတွင် မိသားစုကြီးတစ်ခုအဖြစ် သတ်မှတ်ကြပြီး မျိုးဆက်ပေါင်းများစွာ ကုန်သွယ်မှုလုပ်ငန်းမှတစ်ဆင့် ကြီးမားသော ချမ်းသာကြွယ်ဝမှုများကို စုဆောင်းခဲ့ကြသည်။

သို့သော် ရှုချွမ်းကို ထိုက်ယိမြင့်မြတ်နယ်မြေသို့ ပို့ဆောင်ရန်အတွက် သူရဲ့မိဘများက သူတို့မိသားစု၏ စည်းစိမ်ဥစ္စာအားလုံးကို အသုံးချခဲ့ပြီး ဖုန်းယန်စီရင်စုတွင် တာဝန်ကျနေသော ဘဏ္ဍာစိုးကို လာဘ်ထိုးကာ ရှုချွမ်းအား ထိုက်ယိမြင့်မြတ်နယ်မြေသို့ အောင်မြင်စွာ ဝင်ရောက်နိုင်စေခဲ့ခြင်း ဖြစ်သည်။

အိမ်မှမထွက်ခွာမီတွင် သူ့မိဘများ ပြန်လည်ချမ်းသာ‌စေရန် နှင့် သူတို့ဘဝတစ်လျှောက်လုံး ဆင်းရဲမွဲတေမှုထဲတွင် မနေထိုင်ရအောင် ကူညီပေးရန်အတွက်...

ထွက်ခွာမသွားမီ ရှုချွမ်းက သူ့မိဘများအား ခေတ်သစ်ဆားသန့်စင်နည်းကို ပေးခဲ့ပြီး ဤကျွမ်းကျင်မှုဖြင့် ငွေကြေးများ ပိုမိုရှာဖွေနိုင်လိမ့်မည်ဟု မျှော်လင့်ခဲ့သည်။

သို့သော် သူ မမျှော်လင့်ထားခဲ့သည်မှာ ဤဆားချက်လုပ်သည့်နည်းလမ်းက သူ့မိဘများအပေါ် သတ်ဖြတ်မှုကပ်ဘေးတစ်ခု ယူဆောင်လာလိမ့်မည်ဟု မထင်မှတ်ထား‌ပေ။

သူသာ ဒါကို ကြိုတင်သိခဲ့လျှင် ရှုချွမ်း ဘယ်တော့မှ ထိုသို့လုပ်ဆောင်ခဲ့မည် မဟုတ်ပေ။

ဝမ်းနည်းစရာကောင်းသည်မှာ ဤလောကတွင် နောင်တအတွက် ကုစားနည်းဆိုတာ မရှိပေ။

ယခုမူ သူက ရန်သူများကို ကိုယ်တိုင်သတ်ဖြတ်ပြီး ကွယ်လွန်သွားသည့် မိဘများကို တောင်းပန်ကာ သူ၏ညီမဖြစ်သူကို ကယ်တင်ရန်သာ တတ်နိုင်တော့သည်။

ဝူမိသားစုမှာ ဖုန်းယန်စီရင်စုတွင် ထိပ်တန်းသိုင်းပညာမိသားစုတစ်စုဖြစ်ပြီး အမြဲတမ်း ရည်မှန်းချက် ကြီးမားကြသည်။

ဆားချက်လုပ်နည်းအတွက်နှင့် ဝူမိသားစုက သူ့မိဘများကိုသတ်ပြီး သူ့ညီမကို ပြန်ပေးဆွဲလိမ့်မည်ဟု ရှုချွမ်း ဘယ်တုန်းကမှ မမျှော်လင့်ထားခဲ့ပေ။

မီးလျှံတောင်ကြားနှင့်ပတ်သက်လျှင် ရှုချွမ်းက ဤနေရာသို့လာရင်း လမ်းခရီး၌ ရှင်းလင်းစွာ မေးမြန်းစုံစမ်းခဲ့ပြီးဖြစ်သည်။

ထိုတောင်ကြားတွင် အသန်မာဆုံး ကျင့်ကြံသူမှာ ကမ္မနယ်ပယ် ကို ပိုင်ဆိုင်ထားသော ၎င်း၏တောင်ကြားသခင် ဖြစ်သည်။

ဖုန်းယန်စီရင်စုကဲ့သို့သော နေရာမျိုးတွင် ကမ္မနယ်ပယ် သိုင်းပညာရှင်တစ်ဦးကို အမြင့်ဆုံးလို့ သတ်မှတ်ကြသည်။

ထို့ကြောင့် ဖုန်းယန်စီရင်စုတစ်ခုလုံးရှိ မိသားစုအားလုံးနီးပါးသည် သူ့အား ဦးညွှတ်ကြရသည်။

ဝူမိသားစုသည်လည်း ခြွင်းချက်မဟုတ်ပေ။

...

ဤအချိန်တွင် ဝူမိသားစုအတွင်းရှိ ခြံဝင်းတစ်ခုထဲ၌ ရှုရှင်းလီ နှင့် သူမ၏ကိုယ်ပိုင်အိမ်ဖော်ဖြစ်သူ ရှုထုံ တို့ကို ချုပ်နှောင်ထားသည်။

တံခါးအပြင်ဘက်တွင် ဝူမိသားစု၏ မဟာအကြီးအကဲက သူတို့ကို စည်းရုံးရန် အစွမ်းကုန် ကြိုးစားနေသည်။

"ရှုရှင်းလီ... အခွင့်အရေးကို လက်လွတ်မခံစမ်းပါနဲ့၊ မီးလျှံတောင်ကြားရဲ့ သခင်လေးနဲ့ လက်ထပ်ရမှာ ဘယ်‌လောက်တောင် ကံကောင်းလိုက်လဲ၊ အဲဒီအချိန်ကျရင် မင်းရဲ့အဆင့်အတန်းက ငါ့ထက်တောင် မြင့်သွားဦးမှာ"

"သူက နောက်နောင် တောင်ကြားသခင် ရာထူးကို ဆက်ခံပြီးတာနဲ့ မင်းက တောင်ကြားသခင်မ ဖြစ်လာမှာလေ"

သူက ထိုသို့ပြောနေသော်လည်း မီးလျှံတောင်ကြား သခင်လေး၏ စရိုက်သဘာဝအရ ရှုရှင်းလီက လက်ထပ်ပြီးလျှင် ကြာကြာအသက်ရှင်လိမ့်မည်မဟုတ်ကြောင်း သူ၏စိတ်ထဲတွင် သိရှိနေသည်။

သို့သော် သူ၏ကိုယ်ပိုင်အနာဂတ် တိုးတက်ရေးအတွက်မူ သူ ဤအရာများကို လုံးဝဂရုမစိုက်ပေ။

"နင်တို့ ဝူမိသားစုဝင်တွေ အကုန်လုံး သေချင်းဆိုးနဲ့ သေရမယ်၊ ငါ နင်တို့အားလုံးကို သေချာပေါက် သတ်ပြီး ငါ့မိဘတွေအတွက် ကလဲ့စားချေမယ်"

တံခါးအတွင်းဘက်မှ ရှုရှင်းလီ၏ မုန်းတီးမှုအပြည့်ရှိသော စကားသံများ ထွက်ပေါ်လာသည်။

ဒါကို ကြားလိုက်ရသောအခါ တံခါးအပြင်ဘက်ရှိ ဝူမိသားစု မဟာအကြီးအကဲ၏ မျက်နှာအမူအရာက ချက်ချင်း မည်းမှောင်သွားသည်။

"ဟမ့်... မင်း ဘယ်လောက်အထိ တောင့်ခံနိုင်မလဲ ကြည့်ကြသေးတာပေါ့"

"ငါတို့ ဝူမိသားစုဝင်တွေကို သတ်မယ် ဟုတ်လား... မင်းမှာ အဲဒီအရည်အချင်း ရှိလို့လား"

"ပြီးတော့ မင်းရဲ့ အသုံးမကျတဲ့ အစ်ကိုကြီးကိုလည်း မျှော်လင့်မနေနဲ့ဦး၊ ဒီလောက်နှစ်တွေအကြာကြီးအထိ သူက အပြင်စည်းတပည့်အဆင့်ပဲ ရှိသေးတာ၊ အခုလောက်ဆို အစေခံ တပည့်အဖြစ် အဆင့်လျှော့ချခံရပြီး လုံးဝကို အမှိုက်ဖြစ်နေလောက်ပြီ"

"သေသေချာချာ ပြန်စဉ်းစားကြည့်စမ်း"

ပြောပြီးနောက် သူက နှာခေါင်းရှုံ့ကာ အလွန်မှုံမှိုင်းသော မျက်နှာထားဖြင့် ဆိုလိုက်သည်။

သူက စည်းရုံးရန် အကြိမ်ကြိမ် လာခဲ့သော်လည်း ဤနှစ်ယောက်မှာ ခေါင်းမာမြဲ ခေါင်းမာနေဆဲ ဖြစ်သည်။

သူက အကယ်၍ နောက်ထပ် သုံးရက်အကြာအထိ ရှုရှင်းလီက ဤကဲ့သို့ ပြင်းထန်သော သဘောထားကို ဆက်လက်ထိန်းသိမ်းထားဦးမည်ဆိုပါက သူမကို ကိုယ်တိုင်ကိုယ်ကျ ရိုက်နှက်မေ့မြောစေပြီး မီးလျှံတောင်ကြား သခင်လေးထံသို့ အတင်းအဓမ္မ ပို့ဆောင်ရန် ဆုံးဖြတ်ထားပြီးဖြစ်သည်။

ဘာပဲဖြစ်ဖြစ် ထိုသခင်လေးကို စိတ်ကျေနပ်အောင် လုပ်ပေးရမည်။

ဤနည်းလမ်းဖြင့်သာ သူတို့ဝူမိသားစုသည် မီးလျှံတောင်ကြားဟူသော သစ်ပင်ကြီးကို မှီခိုပြီး ဖုန်းယန်စီရင်စုတွင် အင်အားအကြီးဆုံး မိသားစု ဖြစ်လာနိုင်မည်ဖြစ်သည်။

တံခါးအတွင်းဘက်မှ မည်သည့်တုံ့ပြန်မှုမျှ ထပ်မံထွက်ပေါ်မလာသည်ကို မြင်သောအခါ သူသည် ဝတ်ရုံစကို ခါယမ်းကာ လှည့်ထွက်ရန် ပြင်လိုက်သည်။

သို့သော်လည်း

ကွက်တိ ထိုအခိုက်အတန့်မှာပင်

ခန့်ညားထည်ဝါလှသော ကောင်းကင်ဘုံသံစဉ်ကဲ့သို့ အသံတစ်သံက ဟိန်းထွက်လာပြီး နေရာအနှံ ပျံ့နှံ့သွားခဲ့သည်။

"မင်းကို ဘယ်သူက လှည့်ထွက်သွားခွင့်ပြုလို့လဲ"

ချက်ချင်းဆိုသလိုပင်

ဝေးကွာသော ကောင်းကင်ယံတွင် တိမ်တိုက်တစ်ခု ပေါ်ထွက်လာသည်။

ထိုတိမ်တိုက်၏ အထက်တွင် နတ်ဘုရားအလင်းတန်းများ ဖုံးလွှမ်းနေပြီး အတိုင်းအဆမရှိသော နတ်ဘုရားတန်ခိုးအရှိန်အဝါများ ဖြာထွက်နေသည့် အလင်းတန်းတစ်ခုက ဝူမိသားစု ရှိရာဆီသို့ တိုက်ရိုက် ပျံသန်းလာခဲ့သည်။

"ဒါ... ဒါက ဘာကြီးလဲ"

ဝူမိသားစုအတွင်းရှိ ယောက်ျား၊ မိန်းမ၊ လူကြီး၊ လူငယ်မရွေး အားလုံးက ဤမြင်ကွင်းကို ထိတ်လန့်အံ့သြသော မျက်လုံးများဖြင့် စိုက်ကြည့်နေကြသည်။

သူတို့လို သာမန်သိုင်းပညာမိသားစုတစ်ခုက ဤကဲ့သို့သော အံ့ဖွယ်ဖြစ်ရပ်မျိုးကို ဘယ်တုန်းက မြင်ဖူးပါမည်နည်း။

သူတို့၏ စိုက်ကြည့်နေမှုအောက်တွင်

ထိုအလင်းတန်းက လျင်မြန်စွာ ချဉ်းကပ်လာခဲ့သည်။

ထိုအချိန်ကျမှသာ ထိုအလင်းတန်းမှာ အမှန်စင်စစ် ဧရာမ မိစ္ဆာသားရဲ ကျားကြီးတစ်ကောင် ဆွဲလာသည့် ရထားလုံးတစ်စီးဖြစ်ကြောင်း သူတို့ သဲသဲကွဲကွဲ မြင်လိုက်ရသည်။

ထိုရထားလုံးမှာ လွန်စွာ ခန့်ညားထည်ဝါလှသည်။

ရေတွက်၍မရနိုင်သော ရုန်း သင်္ကေတများ ရှုပ်ယှက်ခတ်နေပြီး တန်ဖိုးကြီး ရတနာကျောက်မျက်များဖြင့် စီခြယ်ထားကာ တောက်ပသော နတ်ဘုရားအလင်းတန်းများကို ထုတ်လွှတ်နေသည်။

ရထားလုံး၏ အထက်တွင် တာအိုအငွေ့အသက်များနှင့် ပြည့်စုံပြီး လောကုတ္တရာဆန်သော အရှိန်အဝါရှိသည့် ချောမောခန့်ညားသော လူငယ်တစ်ယောက် မတ်တပ်ရပ်နေသည်။

သူ့နောက်တွင်မူ အလွန်အမင်း အစွမ်းထက်သော အော်ရာများကို ထုတ်လွှတ်နေသည့် သက်လတ်ပိုင်းအရွယ် အမျိုးသားတစ်ဦးနှင့် သာမန်မိန်းကလေးငယ်တစ်ဦး ရပ်နေကြသည်။

"ဒီလူတွေက ဘယ်သူလဲ၊ သူတို့က ငါတို့ ဝူမိသားစုဆီ ဦးတည်လာနေတာပဲ"

"တကယ့်ကို ကြောက်စရာကောင်းတဲ့ အော်ရာပဲ၊ ငါ တစ်ချက်ကြည့်လိုက်ရုံနဲ့တင် ဒူးထောက်ပြီး ကိုးကွယ်ချင်စိတ် ပေါက်လာတယ်"

"ဒါတွေက ဘယ်က အဆင့်မြင့်ပုဂ္ဂိုလ်ကြီးတွေလဲ၊ ဘာလို့ ငါတို့ ဝူမိသားစုဆီ လာရတာလဲ"

ဝူမိသားစုအတွင်းရှိ လူတိုင်း ထိတ်လန့်တုန်လှုပ်သွားကြပြီး တိုးတိုးတိတ်တိတ် ဆွေးနွေးနေကြသည်။

ဤလူများနှင့် ဤရထားလုံးမှာ လွန်စွာ ကြီးကျယ်ခမ်းနားလွန်းလှသဖြင့် သူတို့ စိတ်ထဲတွင်ပင် ခုခံချင်စိတ် အနည်းငယ်မျှပင် မမွေးဖွားဝံ့ကြပေ။

ဤအခိုက်အတန့်တွင် ဝူမိသားစု မဟာအကြီးအကဲ၏ မျက်နှာက အကြီးအကျယ် ပြောင်းလဲသွားသည်။

ရှုချွမ်း ငယ်စဉ်အခါက သူ တစ်ကြိမ် မြင်ဖူးခဲ့သည်။ ဤလူငယ်၏ ရုပ်ရည်သွင်ပြင်မှာ သူ၏မှတ်ဉာဏ်ထဲရှိ ရှုချွမ်း၏ ရုပ်ရည်နှင့် ခုနစ်ဆယ်ရာခိုင်နှုန်းခန့် တူညီနေသည်။

ယခင်က ထွက်ပေါ်လာခဲ့သည့် စကားသံနှင့်ပါ ပေါင်းစပ်လိုက်သောအခါ သူ၏စိတ်ထဲတွင် ခန့်မှန်းချက်တစ်ခု ချက်ချင်း ပေါ်ထွက်လာတော့သည်။

"မင်း... မင်းက ရှုရှင်းလီရဲ့ အစ်ကို... ရှုချွမ်း မဟုတ်လား"

သူက မယုံကြည်နိုင်မှုများ ပြည့်နှက်နေသည့် လေသံဖြင့် တုန်တုန်ရင်ရင် မေးမြန်းလိုက်သည်။

တစ်ချိန်တည်းမှာပင် သူ၏နှလုံးသားထဲသို့ ကြောက်ရွံ့ထိတ်လန့်မှုများ ချက်ချင်း တိုးဝင်လာခဲ့သည်။

အကြောင်းမှာ လွန်ခဲ့သည့် မိနစ်ပိုင်းကတင် သူသည် ရှုရှင်းလီကို မီးလျှံတောင်ကြား သခင်လေးနှင့် လက်ထပ်ရန် အတင်းအဓမ္မ ဖိအားပေးနေခဲ့သောကြောင့် ဖြစ်သည်။

အကယ်၍ သူ့ရှေ့မှလူက တကယ်ပဲ ရှုချွမ်း ဖြစ်နေမည်ဆိုလျှင် တစ်ဖက်လူက သူ့ကို မည်သို့ နှိပ်စက်မည်ကို သူ မတွေးရဲတော့ပေ။

"အို... မင်းက ငါ့ကို သိတာပဲလား"

ရှုချွမ်းက မျက်ခုံးပင့်လိုက်သည်။

ဤဝူမိသားစု မဟာအကြီးအကဲက သူ့ကို မှတ်မိလိမ့်မည်ဟု သူ မျှော်လင့်မထားခဲ့ပေ။

"မင်းက ထိုက်ယိမြင့်မြတ်နယ်မြေရဲ့ အပြင်စည်းတပည့်တစ်ယောက်ပဲ ဖြစ်ရမှာလေ... ဘယ်လိုလုပ်ပြီး..."

ဝူမိသားစု မဟာအကြီးအကဲ၏ တစ်ကိုယ်လုံး တုန်ရင်နေပြီး နဖူးမှ ချွေးစက်ကြီးများ တလိမ့်လိမ့် စီးကျလာခဲ့သည်။

သူ စကားကို အဆုံးမသတ်နိုင်ခဲ့ပေ။

အကြောင်းမှာ သူ့ရှေ့မှ လူငယ်ကို ထိုက်ယိမြင့်မြတ်နယ်မြေ၏ အပြင်စည်းတပည့်တစ်ဦးအဖြစ် သူ မည်သို့မျှ ဆက်စပ်တွေးတော၍ မရနိုင်သောကြောင့် ဖြစ်သည်။

"ဘယ်လိုလုပ် ဒီလောက်အထိ အစွမ်းထက်နေရတာလဲ... ဟုတ်တယ်မလား"

ရှုချွမ်းက သာယာစွာ ရယ်မောလိုက်ပြီး တစ်ဖက်လူ မပြောရသေးသည့် စကားများကို ဖြည့်စွက်ပေးလိုက်သည်။

"ငါက အပြင်စည်းတပည့်ပဲ ဖြစ်နေရမယ်လို့ ဘယ်သူက မင်းကို ပြောလဲ"

"ငါ့မိဘတွေကိုသတ်တယ်၊ ငါ့ညီမကို အနိုင်ကျင့်တယ်... မင်းတို့ ဝူမိသားစုဝင်တွေအားလုံး သေတာတောင် နည်းသေးတယ်"

ရှုချွမ်းက သူ၏အပြုံးကို ရုပ်သိမ်းလိုက်ပြီး သူ၏ခန္ဓာကိုယ်မှ မိုးသက်မုန်တိုင်းကဲ့သို့ ပြင်းထန်လှသော သတ်ဖြတ်လိုစိတ်များ ပေါက်ကွဲထွက်လာခဲ့သည်။

သူက လက်ကို ဆန့်ထုတ်ကာ ကြက်ပေါက်စလေးတစ်ကောင်ကို ဖမ်းဆွဲသကဲ့သို့ တစ်ဖက်လူ၏ လည်ပင်းကို လှမ်းဖမ်းကာ အထက်သို့ မြှောက်တင်လိုက်တော့သည်။

သေမျိုးအဆင့်ကျော်လွန်ခြင်းနယ်ပယ် အဆင့်၅ တွင် ရှိသည့် ဝူမိသားစု မဟာအကြီးအကဲသည် သူ၏လက်ထဲတွင် မည်သို့မျှ ခုခံနိုင်စွမ်း မရှိခဲ့ပေ။

ပတ်ဝန်းကျင်ရှိ ဝူမိသားစုဝင်များက ဤမြင်ကွင်းကို အလွန်အမင်း ထိတ်လန့်စွာ စိုက်ကြည့်နေကြသည်။

သို့သော် မည်သူတစ်ဦးတစ်ယောက်မျှ ရှေ့သို့တက်၍ တားဆီးရန် မဝံ့ရဲကြပေ။

သူတို့က မဟာအကြီးအကဲ လေ‌ပေါ်တွင် တွဲလောင်းဆွဲခံထားရသည်ကိုသာ ကြည့်နေနိုင်ကြသည်။

"ကျေး... ကျေးဇူးပြုပြီး... အသက်ချမ်းသာပေးပါ"

လည်ပင်းအညှစ်ခံထားရသဖြင့် မဟာအကြီးအကဲ၏ မျက်နှာတစ်ခုလုံး နီမြန်းနေပြီး အသက်ရှူရ ခက်ခဲနေကာ သွားကိုကြိတ်၍ ဤစကားလုံး အနည်းငယ်ကိုသာ အနိုင်နိုင် ညှစ်ထုတ်ပြောဆိုနိုင်ခဲ့သည်။

"ဟမ့်... မင်းကို အသက်ချမ်းသာပေးရမယ် ဟုတ်လား၊ မင်းမှာ အဲဒီအရည်အချင်း ရှိလို့လား"

ရှုချွမ်းက တည်ငြိမ်အေးစက်သော မျက်နှာထားဖြင့် ဆိုလိုက်သည်။

"ဒီနေ့... မင်းတို့ ဝူမိသားစုထဲက ဘယ်သူတစ်ဦးတစ်ယောက်မျှ ဒီနေရာကနေ အသက်ရှင်လျက် ထွက်သွားခွင့်မရှိစေရဘူး"

ပြောပြီးနောက် ရှုချွမ်းသည် သူ့ကို စကားဆက်ပြောရန် အခွင့်အရေး ထပ်မပေးတော့ပေ။

"ဂြောက်..."

ဝူမိသားစု မဟာအကြီးအကဲ၏ လည်ပင်းကို ရှုချွမ်းက လွယ်လွယ်ကူကူပင် လိမ်ချိုးပစ်လိုက်သည်။

သူ၏လက်ကို လွှတ်လိုက်သောအခါ မဟာအကြီးအကဲ၏ ရုပ်အလောင်းက မြေပြင်ပေါ်သို့ ဖြည်းဖြည်းချင်း ကျရောက်သွားခဲ့သည်။

ထို့နောက် သူက လက်ကို ဝှေ့ယမ်းလိုက်ရာ နေမင်းအစစ်အမှန်မီးတောက် ပေါ်ထွက်လာပြီး ထိုရုပ်အလောင်းကို ပြာအဖြစ်သို့ လုံးဝ ချက်ချင်း ပြောင်းလဲပစ်လိုက်တော့သည်။

လေအဝှေ့တွင် ထိုပြာများအားလုံး လေထဲသို့ လွင့်ပါးပျောက်ကွယ်သွားခဲ့ရသည်။

ဤမြင်ကွင်းက ဝူမိသားစုဝင်အားလုံးကို မှင်တက်သွားစေခဲ့သည်။

မီးလျှံတောင်ကြားကို မှီခိုထားသည့် မဟာအကြီးအကဲက ဤကဲ့သို့ လွယ်လွယ်ကူကူနှင့် သေဆုံးသွားလိမ့်မည်ဟု သူတို့ လုံးဝ မျှော်လင့်မထားခဲ့ကြပေ။

ရုပ်အလောင်းပင်လျှင် ကျန်ရစ်ခဲ့ခြင်း မရှိပေ။

ထို့နောက် သူတို့က ရှုချွမ်း၏ နောက်ဆုံးစကားများကို ပြန်လည်သတိရသွားကြပြီး ချက်ချင်းပင် ဝူမိသားစုတစ်ခုလုံး ရုန်းရင်းဆန်ခတ် ဖြစ်သွားတော့သည်။

မိသားစုဝင်များအားလုံး လွတ်မြောက်ရန်အတွက် အရပ်ရပ်သို့ ထွက်ပြေးကြတော့သည်။

သို့သော်လည်း

ရှုချွမ်းက ဝူမိသားစုတစ်ခုလုံးကို လွှမ်းခြုံထားသည့် အစီအရင်တစ်ခုကို ကြိုတင်၍ အကွက်ချ သတ်မှတ်ထားခဲ့ပြီးဖြစ်သည်။

ဘယ်သူမှ ဤနေရာမှ လွတ်မြောက်နိုင်မည် မဟုတ်‌ပေ။

"အားလုံးပဲ... သူတို့နဲ့အတူ လိုက်ပါ သင်္ဂြိုဟ်လိုက်ကြစမ်း"

ကြီးမားလှသော ဒေါသမီးများ ချက်ချင်း ပွင့်အံလာခဲ့သည်။

ရှုချွမ်းက ကောင်းကင်ယံသို့ ပျံသန်းသွားပြီး နတ်ဘုရားသတ်ဓားကို ဆွဲထုတ်ကာ ဓားတစ်ချက် အပြင်းအထန် ခုတ်ချလိုက်တော့သည်။

တစ်ခဏချင်းအတွင်းမှာပင်

ရှုရှင်းလီနှင့် ရှုထုံတို့ ရှိနေသည့် ခြံဝင်းမှလွဲ၍ ဝူမိသားစုတစ်ခုလုံးက ဤဓားချက်တစ်ချက်တည်းဖြင့် လုံးဝ မှုန့်မှုန့်ညက်ညက် ကြေမွပျက်စီးသွားခဲ့ရသည်။

အတွင်းရှိ ဝူမိသားစုဝင်အားလုံးသည်လည်း တစ်ခဏချင်းအတွင်းမှာပင် ပြာအဖြစ်သို့ ပြောင်းလဲကာ အသက်ပျောက်သွားခဲ့ကြရတော့သည်။

ဤအချိန်မှစ၍ ဖုန်းယန်စီရင်စု၏ ဝူမိသားစုက လုံးဝပျောက်ကွယ် သွားခဲ့ပြီ ဖြစ်သည်။