အခန်း ၈၅၄
Vol. 57 Ch. 854
အခန်း (၈၅၄) - အသေအလဲ တိုက်ပွဲ
နတ်ဆိုးသခင်က ရူးသွပ်စွာ တိုက်ခိုက်နေပြီး အနက်ရောင် အလင်းတန်းများက ယွင်ယိုဇီ၏ ခန္ဓာကိုယ်ပေါ်ရှိ ရွှေရောင် စွမ်းအင် ဒိုင်းကာကို အဆက်မပြတ် ရိုက်ခတ်နေတော့၏။ နတ်ဆိုးသခင်၏ စွမ်းအားက ကြောက်မက်ဖွယ် ကောင်းလှသော်လည်း ယခု အခိုက်အတန့်တွင် ယွင်ယိုဇီ၏ ရွှေရောင် စွမ်းအင် ဒိုင်းကာကိုမူ တုန်လှုပ်အောင်ပင် မစွမ်းဆောင်နိုင်ခဲ့ချေ။
“အင်မော်တယ်အဆင့် အင်းကွက်လား...”
နတ်ဆိုးသခင်၏ အံ့အားသင့်နေသော အသံက ဟင်းလင်းပြင်အတွင်း ပဲ့တင်ထပ်သွား၏။ သူ၏ လှုပ်ရှားနေသော ပုံရိပ်က ရုတ်တရက် ရပ်တန့်သွားပြီး ယွင်ယိုဇီကို မယုံကြည်နိုင်လောက်သော အကြည့်များဖြင့် စူးစိုက်ကြည့်နေတော့သည်။
ချီယွမ်၊ ကျန်းဝူဟန်နှင့် အခြားသူများလည်း တစ်ပြိုင်နက်တည်း အံ့အားသင့်သွားကြသလို နတ်ဘုရားနန်းတော်မှ လိန်ယွင်ခုံး အပါအဝင် အစွမ်းထက် ပညာရှင်များ အားလုံးလည်း မှင်သက်သွားကြရ၏။
“တကယ်ကြီး အင်မော်တယ်အဆင့် အင်းကွက်ပါလား...”
ချီယွမ်က အလွန်အမင်း ထိတ်လန့်တကြား အော်ဟစ်လိုက်မိ၏။
“ဒီအဘိုးကြီးက အင်မော်တယ်အဆင့် အင်းကွက်ကို တကယ် ဖန်တီးနိုင်တာလား... ဒါက တိုက်ကြီးပေါ်မှာ နှစ်ထောင်ချီအောင် ဘယ်အင်းကွက်ဆရာမှ မလုပ်နိုင်ခဲ့တဲ့ ဒဏ္ဍာရီလာ အင်းကွက်ပဲ...”
လိန်ယွင်ခုံး၏ ရင်ထဲတွင် ပြင်းထန်စွာ တုန်လှုပ်သွားရတော့သည်။ သူတို့အားလုံးမှာ မြေကမ္ဘာအဆင့် အင်းကွက်များကိုသာ ကြားဖူးခဲ့ကြပြီး ၎င်း၏ ကြောက်မက်ဖွယ် စွမ်းအားကိုလည်း မျက်မြင်ကိုယ်တွေ့ ကြုံဖူးခဲ့ကြသည်။ သို့သော် အင်မော်တယ်အဆင့် အင်းကွက်ကိုမူ လူတိုင်းက ကြားသာကြားဖူးပြီး တစ်ခါမျှ မမြင်ဖူးခဲ့ကြချေ။ တိုက်ကြီး၏ အစွမ်းအထက်ဆုံး ပညာရှင်ဟု သတ်မှတ်ထားသော လိန်ယွင်ခုံး ကိုယ်တိုင်ပင် တစ်ခါမျှ မတွေ့ဖူးခဲ့ပေ။
“အင်မော်တယ်အဆင့် အင်းကွက်ပါလား... ဒါ ဒဏ္ဍာရီလာ အင်းကွက်ကြီးပဲ...”
“အင်မော်တယ်အဆင့် အင်းကွက်ရဲ့ စွမ်းအားက အရမ်း ကြောက်ဖို့ကောင်းတာပဲ... အင်မော်တယ် သိုင်းကွက်တွေနဲ့တောင် ရင်ဘောင်တန်းနိုင်တယ်... တကယ်လို့ စီနီယာ ယွင်ယိုဇီက သိုင်းကွက်တွေနဲ့သာ ပေါင်းစပ်လိုက်မယ် ဆိုရင်တော့... အဲဒီ စွမ်းအားက မှန်းဆလို့တောင် ရမှာ မဟုတ်တော့ဘူး...”
“ငါ့ဘဝမှာ ဒဏ္ဍာရီလာ အင်မော်တယ်အဆင့် အင်းကွက်ကို မျက်မြင်ကိုယ်တွေ့ မြင်လိုက်ရပြီ ဆိုတော့... အခု သေရမယ် ဆိုရင်တောင် နောင်တရမှာ မဟုတ်တော့ဘူးဗျာ...”
ပေရွှမ်ဂိုဏ်းမှ တပည့်များမှာ စိတ်လှုပ်ရှားလွန်း၍ ပွက်လောရိုက်သွားကြပြီး အင်းကွက်ပညာကို လေ့လာနေသော တပည့်များမှာလည်း ဝမ်းသာအားရ ဖြစ်နေကြတော့၏။
"ဝူး.. ဝူး... ဝူး"
ထိုစဉ် ရွှေရောင် ဒိုင်းကာ အတွင်းမှ ကြီးစိုးသော အင်အားကြီး တစ်ခု သိပ်သည်းလာပြီး ဟင်းလင်းပြင် တစ်ခုလုံး တုန်ခါသွားတော့၏။ ၎င်းက ရူးသွပ်သော အရှိန်အဟုန်ဖြင့် ရှေ့သို့ တိုးဝင်သွားရာ တားဆီး၍ မရနိုင်လောက်အောင်ပင်။
“မကောင်းတော့ဘူး...”
နတ်ဆိုးသခင်၏ မျက်နှာအမူအရာ အနည်းငယ် ပြောင်းလဲသွားပြီး အလျင်အမြန် နောက်သို့ ဆုတ်ခွာလိုက်ရသည်။ ကြောက်မက်ဖွယ်ကောင်းသော စွမ်းအားက အံ့မခန်း မြန်ဆန်လွန်းလှပြီး မျက်တောင်တစ်ခတ် အတွင်းမှာပင် နတ်ဆိုးသခင် အနားသို့ ရောက်ရှိလာခဲ့၏။
“မိစ္ဆာစွမ်းအင် ဒိုင်းကာ...”
နတ်ဆိုးသခင်က ချက်ချင်းပင် ဟိန်းဟောက်လိုက်တော့သည်။
“ဘုန်း…”
သို့သော်ငြား ထိုကြောက်မက်ဖွယ် စွမ်းအားက နတ်ဆိုးသခင်ကို အဝေးသို့ လွင့်စင်သွားစေခဲ့သည်။ ကံကောင်းထောက်မစွာဖြင့် သူက စွမ်းအင် ဒိုင်းကာကို အချိန်မီ ဖန်တီးနိုင်ခဲ့သဖြင့်သာ ဒဏ်ရာအပြင်းအထန် မရရှိခဲ့ခြင်းပင်။
“အင်မော်တယ်အဆင့် အင်းကွက်ကို မြေကမ္ဘာအဆင့် သိုင်းကွက်၊ အင်မော်တယ် လက်နက်တို့နဲ့ ပေါင်းစပ်လိုက်တာက... ဒီလောက်အထိ အစွမ်းထက်တာလား...”
နတ်ဆိုးသခင်က မျက်မှောင်ကြုတ်လျက် လေးနက်သော အမူအရာဖြင့် ရေရွတ်လိုက်၏။ ဤမြင်ကွင်းကို ကြည့်ရင်း ချီယွမ်နှင့် အခြားသူများမှာ ဆွံ့အ မှင်သက်နေကြရပြီး လိန်ယွင်ခုံး ကိုယ်တိုင်လည်း အလွန်အမင်း အံ့အားသင့်နေသဖြင့် သူတို့ အားလုံး တိုက်ပွဲဝင်ရန်ပင် မေ့လျော့နေကြတော့သည်။
ဒါက ဘယ်လို ကြောက်စရာကောင်းတဲ့ စွမ်းအားမျိုးလဲ... တိုက်ပွဲ အခြေအနေက ပြောင်းပြန် လှန်တော့မှာလား...။
ယွင်ယိုဇီ ထုတ်လွှတ်လိုက်သော ပေါက်ကွဲအားကြီးက လူတိုင်းကို မျှော်လင့်ချက် ရောင်ခြည်လေး မြင်တွေ့လိုက်ရသကဲ့သို့ ဖြစ်သွားစေတော့သည်။ သူတို့၏ မျက်နှာများပေါ်တွင် ကြောက်ရွံ့မှုများနှင့် စိုးရိမ်မှုများ အစား ပျော်ရွှင်သော အပြုံးလေးများ စတင် ထွက်ပေါ်လာတော့၏။
“ဒါက ကာကွယ်ရေး အင်းကွက် တစ်ခုပဲ ရှိသေးတာ... ဒီအဘိုးကြီးက တကယ်ကို မရိုးရှင်းဘူးပဲ... ဒါပေမဲ့ သူ့ရဲ့ အားနည်းချက်က အနီးကပ် တိုက်ပွဲပဲ ဖြစ်ရမယ်...”
နတ်ဆိုးသခင်က မျက်မှောင်ကြုတ်လျက် တိတ်တဆိတ် သုံးသပ်လိုက်၏။ ထိုသို့ တွေးတောပြီးနောက် သူ၏ မိစ္ဆာစွမ်းအင်များကို ဖိအားပေး အသက်သွင်းလိုက်သည်။ အလျင်အမြန်ပင် အမြန်ဆုံး အမြန်နှုန်းဖြင့် ရှေ့သို့ တဟုန်ထိုး ပြေးဝင်သွားတော့၏။
နတ်ဆိုးသခင်က မျက်တောင်တစ်ခတ် အတွင်းမှာပင် ရောက်ရှိလာပြီး ယခင်ကထက် ပိုမို ပြင်းထန်သော လက်သီးတစ်ချက်ဖြင့် ယွင်ယိုဇီကို ထိုးနှက်လိုက်ရာ လက်သီး လေပြင်းကပင် ကြောက်မက်ဖွယ် လေဓားများပမာ လှည့်ပတ်နေတော့သည်။ ယွင်ယိုဇီကလည်း ဤအခြေအနေကို အာရုံခံမိသော်လည်း နည်းနည်းလေးမျှ ကြောက်ရွံ့ခြင်း မရှိဘဲ သူ၏ အင်မော်တယ်အဆင့် အင်းကွက်အပေါ် အပြည့်အဝ ယုံကြည်မှု ရှိ၏။
“ဂျုန်း”
နတ်ဆိုးသခင်၏ လက်သီးချက် ကျရောက်သွားသည်နှင့် မိုးခြိမ်းသံပမာ ပေါက်ကွဲသံ ထွက်ပေါ်လာပြီး အဖျက်စွမ်းအားများက ဟင်းလင်းပြင် တစ်ခုလုံးကို နောက်တစ်ကြိမ် အကြမ်းပတမ်း မွှေနှောက်တော့၏။
မြေပြင်များ ပြိုကျ ပျက်စီးသွားပြီး လူတိုင်း၏ ခန္ဓာကိုယ်များမှာလည်း ပြင်းထန်စွာ တုန်ယင်နေကြတော့သည်။
“ဘာ...”
နတ်ဆိုးသခင်ကို အံ့အားသင့်သွားစေသည့် အရာမှာ သူ၏ အစွမ်းကုန် လက်သီးချက်က ယွင်ယိုဇီ၏ စွမ်းအင် ဒိုင်းကာကို မချိုးဖျက်နိုင်ခြင်းပင်။ အင်မော်တယ်အဆင့် အင်းကွက်၏ စွမ်းအားက အမှန်တကယ်ပင် ကြောက်စရာ ကောင်းလွန်းလှ၏။
“ဒါ ဘယ်လိုလုပ် ဖြစ်နိုင်မှာလဲ...”
နတ်ဆိုးသခင်က သူ၏ ရင်ထဲတွင် အလွန်အမင်း တုန်လှုပ်သွားရ၏။ သူ၏ အစွမ်းကုန် အင်အားဖြင့် တိုက်ခိုက်ခဲ့သည့်တိုင် အင်းကွက်၏ ကာကွယ်မှုကို မချိုးဖျက်နိုင်သည်ကို သူ လုံးဝ မယုံကြည်နိုင်အောင် ဖြစ်နေတော့သည်။
“နတ်ဆိုးသခင်... အင်မော်တယ်အဆင့် အင်းကွက်ကို အထင်မသေးနဲ့ဦး... ငါ့ရဲ့ အင်မော်တယ်အဆင့် အင်းကွက်က သာမန် အင်မော်တယ် သိုင်းကွက်တွေနဲ့တောင် မယှဉ်နိုင်ဘူး...”
ယွင်ယိုဇီက အေးစက်စွာ ပြောလိုက်ပြီး သူ၏ အိုမင်းသော မျက်လုံးများဖြင့် နတ်ဆိုးသခင်ကို စူးစိုက်ကြည့်လိုက်၏။
“မြေကမ္ဘာအဆင့် အဆင့်မြင့် သိုင်းကွက်... ဝူကျိ ရေပြင်နယ်ပယ်...”
ယွင်ယိုဇီက ပြင်းထန်စွာ ဟိန်းဟောက်လိုက်ရာ သူ၏ ကြောက်မက်ဖွယ် ရေနဂါး အစစ်အမှန်ယွမ်များ ပေါက်ကွဲထွက်လာတော့၏။
ကျန်းသောင်းချီ ကျယ်ဝန်းသော ဟင်းလင်းပြင်ကြီး တစ်ခုက ရုတ်တရက် ဖွဲ့တည်လာပြီး နတ်ဆိုးသခင်ကို အတွင်း၌ ပိတ်လှောင်လိုက်၏။ ၎င်းက ဧရာမ သမုဒ္ဒရာကြီး တစ်ခုပမာ ခမ်းနား ကြီးကျယ်လှပြီး မြင်တွေ့ရသူတိုင်းကို အသက်ရှူမှားသွားစေတော့သည်။
အင်မော်တယ်အဆင့် အင်းကွက်နှင့် မြေကမ္ဘာအဆင့် သိုင်းကွက်တို့ ပေါင်းစပ်လိုက်သည့်အခါ ဝူကျိ ရေပြင်နယ်ပယ်၏ စွမ်းအားမှာ အလွန်တရာ ကြောက်မက်ဖွယ် ကောင်းနေတော့သည်။
“ဟွန့်... ဒီလောက်လေးနဲ့ ငါ့ကို ပိတ်လှောင်ထားနိုင်မယ် ထင်နေတာလား...”
နတ်ဆိုးသခင်က ခက်ထန်စွာ ကြိမ်းမောင်းလိုက်ပြီး သူ၏ ကြောက်မက်ဖွယ် မိစ္ဆာစွမ်းအင်များကို အစွမ်းကုန် အသက်သွင်းကာ ရေပြင်နယ်ပယ်ကို ဖိအားပေး ရုန်းထွက်ရန် ကြိုးစားလိုက်တော့၏။
“ဝှစ်…”
ထိုအခိုက်အတန့်တွင် နတ်ဆိုးသခင်က သူ၏ မိစ္ဆာစွမ်းအင်များကို အသက်သွင်းလိုက်သည်နှင့် တစ်ပြိုင်နက် ရေပြင်နယ်ပယ် အတွင်းရှိ အရပ်မျက်နှာ အသီးသီးမှ ဧရာမ ရေဝဲကြီးများ ရုတ်တရက် ထွက်ပေါ်လာ၏။ ၎င်းတို့က မိစ္ဆာ မြွေကြီးများပမာ သူ့ထံသို့ တဟုန်ထိုး ပြေးဝင်လာကြတော့သည်။
“ဟွန့်...”
နတ်ဆိုးသခင်က အေးစက်စွာ နှာမှုတ်လိုက်ပြီး သူ၏ လက်နှစ်ဖက်ကို ဖြန့်ကာ အပြင်ဘက်သို့ လက်ဝါးဖြင့် တွန်းထုတ်လိုက်ရာ ထူးဆန်းသော အနက်ရောင် အခိုးအငွေ့များ ထွက်ပေါ်လာပြီး ပတ်ဝန်းကျင်ရှိ ရေပြင်နယ်ပယ်မှာ ဖိအားပေး ဖယ်ရှားခံလိုက်ရတော့၏။
“မိစ္ဆာသိုင်း... လောကဖျက် မိစ္ဆာဓား...”
နတ်ဆိုးသခင်က ကျယ်လောင်စွာ ဟိန်းဟောက်လိုက်ပြီး သူ၏ လက်နှစ်ဖက်ကို အဆက်မပြတ် ဝှေ့ယမ်းလိုက်ရာ ကြောက်မက်ဖွယ် အနက်ရောင် ဓားအလင်းတန်းများ ပစ်ထွက်သွားပြီး ၎င်းတို့၏ အရှိန်အဟုန်မှာ အလွန်တရာ ရက်စက်ကြမ်းကြုတ်လှ၏။
“ဘုန်း... ဘုန်း... ဘုန်း…”
“ ဝီ…”
ကြောက်မက်ဖွယ် ရေဝဲကြီးများနှင့် ဓားအလင်းတန်းများ ပြင်းထန်စွာ ဝင်တိုက်မိသွားကြပြီး ရေပြင်နယ်ပယ် အတွင်းမှ ပေါက်ကွဲသံများ ဆက်တိုက် ထွက်ပေါ်လာကာ တစ်နယ်ပယ်လုံးကို ပြင်းထန်စွာ တုန်ခါသွားစေတော့၏။ နတ်ဆိုးသခင်က အလွန်တရာ အစွမ်းထက်လှပြီး ရေဝဲကြီးများ အားလုံးကို အလွယ်တကူ ဖျက်ဆီးပစ်နိုင်ခဲ့သဖြင့် နတ်ဆိုးမျိုးနွယ်စု၏ သိုင်းကွက်များ မည်မျှအထိ စွမ်းအား ကြီးမားကြောင်း ထင်ရှားစွာ သက်သေပြလိုက်ခြင်းပင်။
“မင်းမှာ တခြား ဘာတွေ ကျန်သေးလဲ... အကုန် ထုတ်သုံးလိုက်စမ်းပါ...”
နတ်ဆိုးသခင်က မောက်မာစွာ ကြွေးကြော်လိုက်ရာ သူ၏ အရှိန်အဟုန်က ကောင်းကင်ယံသို့ ထိုးတက်နေတော့သည်။
“တခြား ဘာကျန်သေးလဲ ဟုတ်လား... မင်းက အင်းကွက်ဆရာ တစ်ယောက်ကို အဲဒီလို တကယ်ပဲ မေးနေတာလား...”
ယွင်ယိုဇီက အေးစက်စက် ပြန်လည် တုံ့ပြန်လိုက်၏။
“မြေကမ္ဘာအဆင့် အဆင့်မြင့် အင်းကွက်... မိုးကြိုးကျိန်စာ...”
ယွင်ယိုဇီက နောက်ထပ် အင်းကွက် တစ်ခုကို ဆင့်ခေါ်လိုက်ပြန်သည်။ သူ၏ လက်ကို ဝှေ့ယမ်းလိုက်သည်နှင့် တစ်ပြိုင်နက် အင်းကွက်က လျှပ်စီးပမာ ပစ်ထွက်သွားသည်။ ဧရာမ အဖြူရောင် စွမ်းအင် အဖြစ် ပြောင်းလဲသွားကာ ရေပြင်နယ်ပယ် တစ်ခုလုံးကို လွှမ်းခြုံ ကာကွယ်လိုက်တော့၏။ စွမ်းအင် အလွှာ၏ မျက်နှာပြင်ပေါ်တွင် လျှပ်စီးတန်းများစွာ တဝီဝီ မြည်ဟည်းလျက် လှည့်ပတ်နေပြီး မိုးကြိုးစွမ်းအင်များက အလွန်တရာ ကြောက်မက်ဖွယ် ကောင်းလှသည်။
ကြည့်ရသည်မှာ ယွင်ယိုဇီသည် နတ်ဆိုးသခင် တစ်ယောက် ရေပြင်နယ်ပယ် အတွင်းမှ ထွက်ပြေးသွားမည်ကို စိုးရိမ်သဖြင့် ဘေးကင်းအောင် ကြိုတင် ကာကွယ်လိုက်ခြင်းပင်။ အင်းကွက်ဆရာ တစ်ဦး၏ ကြောက်စရာကောင်းသော အချက်မှာ အမျိုးမျိုးသော တိုက်ခိုက်ရေး အင်းကွက်များကို ဖန်တီးနိုင်ပြီး သိုင်းကွက်များကို ကျင့်ကြံစရာ မလိုဘဲ သိုင်းကွက်များနှင့် ရင်ဘောင်တန်းနိုင်သော စွမ်းအားများကို ထုတ်ဖော်နိုင်ခြင်းပင် ဖြစ်၏။
“နတ်ဆိုးသခင်... ငါ့ရဲ့ နယ်ပယ်ထဲကနေ ထွက်ပြေးဖို့ လုံးဝ စိတ်မကူးနဲ့ဦး...”
ယွင်ယိုဇီက အေးစက်စွာ ဟိန်းဟောက်လိုက်ပြီး သူ၏ လက်များဖြင့် လျှို့ဝှက်ဆန်းကြယ်သော လက်ဟန်များကို ဖော်လိုက်သည်။ ထို့နောက် ကျယ်လောင်စွာ ကြွေးကြော်လိုက်တော့၏။
“အင်မော်တယ်သိုင်း... မိုးတိမ်ဝိညာဉ်ချေမှုန်းဓား...”
ကျယ်ဝန်းလှသော ရေပြင်နယ်ပယ် အတွင်း၌ မိုးကြိုးစွမ်းအင်များ ပြည့်နှက်နေသော ဓားတစ်လက် ယွင်ယိုဇီ၏ ထိန်းချုပ်မှုဖြင့် ဖွဲ့တည်လာပြီး နတ်ဆိုးသခင်ထံသို့ လျှပ်စီးပမာ တဟုန်ထိုး ပစ်ထွက်သွားတော့၏။
“ဟွန့်... ဒီလောက် ကြီးမားတဲ့ စွမ်းအားတွေက ငါ့ရဲ့ စွမ်းအားတွေနဲ့သာ ပေါင်းစပ်လိုက်မယ် ဆိုရင်... မင်းရဲ့ နယ်ပယ်က တောင့်ခံနိုင်ပါ့မလား...”
နတ်ဆိုးသခင်က ရက်စက်စွာ ပြောလိုက်ပြီး သူ၏ မျက်လုံးများကို အနည်းငယ် မှေးကျဉ်းလိုက်ရာ အေးစက်သော အလင်းတန်းများ လျှပ်တစ်ပြက် ဖြတ်ပြေးသွားတော့၏။
“စမ်းကြည့်လိုက်လေ...”
ယွင်ယိုဇီက ခပ်ရေးရေး ပြုံးလိုက်၏။
“မင်းကို ကြောက်နေမယ် ထင်လား... လုံးဝပဲ...”
နတ်ဆိုးသခင်က ဟိန်းဟောက်လိုက်ပြီး သူ၏ လက်နှစ်ဖက်ဖြင့် လက်ဟန် ဖော်လိုက်ရာ ကြီးစိုးသော အရှိန်အဝါ တစ်ခု ပေါက်ကွဲထွက်လာပြီး ကျယ်လောင်စွာ အော်ဟစ်လိုက်တော့သည်။
“မိစ္ဆာသိုင်း... ကောင်းကင်ချေမှုန်း မိစ္ဆာ...”
နတ်ဆိုးသခင်၏ ခန္ဓာကိုယ်မှ ကြောက်မက်ဖွယ်ကောင်းသော စွမ်းအားများ ဖြာထွက်လာ၏။
တောက်ပသော အနက်ရောင် အလင်းတန်းများက ကျယ်ဝန်းလှသော ရေပြင်နယ်ပယ် တစ်ခုလုံးကို ဖုံးလွှမ်းသွားတော့၏။ ရေပြင်နယ်ပယ်ကြီးမှာ ပြင်းထန်စွာ တုန်ခါလာပြီး အချိန်မရွေး ပြိုကျ ပျက်စီးတော့မည့် အခြေအနေသို့ ရောက်ရှိနေတော့သည်။
--