အခန်း ၄၅၅

အခန်း။ ၄၅၅

တစ်ချိန်တည်းမှာပင် သူသည် ဒီမိစ္ဆာမျိုးနွယ်စုတွေက တကယ့်ကို တိရစ္ဆာန်တွေပဲ။ ဦးနှောက်ထဲမှာ တိုက်ခိုက်သတ်ဖြတ်ဖို့ပဲ ရှိတယ်ဟု စိတ်ထဲကနေ ကျိန်ဆဲလိုက်တော့သည်။

စစ်ဗျူဟာအစီအစဉ်တစ်ခုက တစ်ခါတစ်ရံမှာ ဓားတစ်စင်းထက်တောင် ပိုပြီး ထက်ရှနိုင်တယ်ဆိုတာကို သူတို့တွေ မသိကြဘူးလား။

"ငါတို့က မင်းလို လူသားအဆင့်နိမ့်တစ်ယောက်ရဲ့ အကူအညီကို လိုအပ်လို့လား"

ကျားမိစ္ဆာကြီးက နှာခေါင်းရှုံ့လျက် ထပ်မံတိုက်ခိုက်ရန် ပြင်ဆင်လိုက်ပြန်သည်။

"နေဦး..."

ဖားပြုပ်မိစ္ဆာကြီးက ၎င်းကို တားဆီးလိုက်၏။ ၎င်း၏ ပြူးထွက်နေသော မျက်လုံးအစုံသည် လည်ပတ်သွားခဲ့ပြီး ကောက်ကျစ်စဉ်းလဲလှသော အလင်းတန်းများ ဖြာထွက်လျက် အနက်ရောင်ဝတ်ရုံခြုံထားသော အမျိုးသားကို စိုက်ကြည့်ကာ "မင်းက ငါတို့ကို ကူညီချင်တယ်လို့ ပြောတယ် ဘယ်လိုနည်းလမ်းနဲ့လဲ" ဟု မေးလိုက်သည်။

"ငါတို့ရဲ့ ဟွမ်ချွမ်ဂိုဏ်းက ကျင့်ကြံခြင်းလောကထဲမှာ နှစ်ပေါင်းများစွာတိုင်တိုင် မပြိုလဲဘဲ မတ်တတ်ရပ်တည်နိုင်ခဲ့တာပဲ။ သာမန် ခန္ဓာကိုယ်ကျင့်ကြံသူတစ်ယောက်ကို သတ်ဖို့က ဘာခက်ခဲလို့လဲ"

အနက်ရောင်ဝတ်ရုံခြုံထားသော အမျိုးသားက လှောင်ပြုံးပြုံးလိုက်ရင်း သူ၏ လက်ထဲ၌ အနက်ရောင်သစ်သားဖြင့် ပြုလုပ်ထားသော ရှေးဟောင်းမှန်တစ်ချပ်ကို ရုတ်ချည်း ထုတ်ဖော်ပြသလိုက်တော့သည်။

၎င်းမှာ လက်ဖဝါးအရွယ်အစားခန့်သာ ရှိပြီး နက်မှောင်သော သစ်သားဘောင်ပေါ်တွင် ဆန်းကြယ်လှသော မန္တန်အကွက်များကို ထုဆစ်ထားကာ၊ မှန်မျက်နှာပြင်ထက်တွင်မူ အစိမ်းရောင်အလင်းတန်းများ လင်းလက်လို့နေသည်။

"ဒါကတော့ ငါတို့ဂိုဏ်းကနေ နှစ်ပေါင်းများစွာတိုင်တိုင် သိမ်းဆည်းလာခဲ့တဲ့ ရတနာတစ်ခုဖြစ်တဲ့ စစ်မှန်ခြင်းမှန်ပြားပဲ။

ဘယ်လိုမျက်လှည့်အတတ်၊ အသွင်ပြောင်းလဲခြင်းတို့ မျက်စိလှည့်စားခြင်းအတတ်မျိုးပဲဖြစ်ဖြစ် ဒီမှန်ရဲ့အောက်ကနေ ဘယ်တော့မှ မလွတ်မြောက်နိုင်ဘူး"

"အနီရောင်သူရဲကောင်းက မင်းတို့ကို ချောင်းမြောင်းတိုက်ခိုက်နိုင်တာက... သူက မျက်စိလှည့်စားခြင်းအတတ်ကို အသုံးပြုထားလို့ မဟုတ်ဘူးလား။

ဒါပေမဲ့ ဒီစစ်မှန်ခြင်းမှန်ပြား ရှိနေသရွေ့တော့ သူ မင်းတို့ကို ဘယ်တော့မှ ချောင်းမြောင်းလို့ရမှာ မဟုတ်တော့ဘူး။ အကယ်၍ သူသာ ဒီဝန်းကျင်ကို ရောက်လာခဲ့ရင် ဒီမှန်က သူ့ကို ချက်ချင်း ဖော်ထုတ်ပေးလိမ့်မယ်"

ထိုသို့ပြောကြားပြီးနောက် အနက်ရောင်ဝတ်ရုံခြုံထားသော အမျိုးသားလက်ထဲရှိ ရှေးဟောင်းမှန်ကြီးမှနေ၍ စူးရှတောက်ပလှသောအလင်းတန်းများ ပေါက်ကွဲထွက်လာခဲ့သည်။

၎င်းမှာ အစိမ်းရောင် နေမင်းတစ်စင်းပမာ အစိမ်းရောင်အလင်းတန်းများသည် တစ်ခဏအတွင်း ထိုနေရာ၏ အရပ်မျက်နှာအနှံ့သို့ ဖြာကျသွားခဲ့တော့၏။

ထိုအစိမ်းရောင်အလင်းတန်းများ ၎င်းတို့၏ အရေပြားပေါ်သို့ ကျရောက်လာသောအခါ မိစ္ဆာကြီးများသည် မသက်မသာဖြင့် ၎င်းတို့၏ ခန္ဓာကိုယ်များကို လှုပ်ခါလိုက်ကြရသည်။

၎င်းမှာ ၎င်းတို့၏ ရင်ထဲ၌ရှိသော လျှို့ဝှက်ချက်အားလုံးကို ထိုမှန်ကြီးက အတိုင်းသား မြင်တွေ့နေရသည့်အလား ခံစားချက်မျိုး ဖြစ်သည်။

လူသားတို့၏ စကားဖြင့် ပြောရလျှင်မူ ၎င်းတို့တစ်ကိုယ်လုံး ဗလာကျင်းနေသည့်အလား ခံစားလိုက်ရခြင်းပင်။

"မင်းတို့ကလည်း လူသားတွေပဲ။ ငါတို့က ဘာဖြစ်လို့ မင်းတို့ကို ယုံကြည်ရမှာလဲ"

ဖားပြုပ်မိစ္ဆာကြီးက အဆက်မပြတ် နှာခေါင်းရှုံ့လျက် သံသယဖြင့် ထပ်မံမေးမြန်းလိုက်ပြန်သည်။

"ရန်သူရဲ့ ရန်သူက ငါတို့ရဲ့ မိတ်ဆွေပဲဆိုတဲ့ စကားကို မင်းတို့မကြားဖူးဘူးလား"

အနက်ရောင်ဝတ်ရုံခြုံထားသော အမျိုးသားက တည်ငြိမ်စွာဖြင့် ပြောလိုက်သည်။

"ငါတို့ရဲ့ ဟွမ်ချွမ်ဂိုဏ်းနဲ့ အလောင်းထိန်းချုပ်ခြင်းဂိုဏ်းတို့ကြားက ဆက်ဆံရေးကို မင်းတို့ စုံစမ်းကြည့်လို့ရပါတယ်။ ငါတို့ကြားက အမုန်းတရားကတော့ အတူတူယှဉ်တွဲနေထိုင်လို့ မရနိုင်လောက်အောင်ကို နှစ်ပေါင်းထောင်ချီပြီး နက်ရှိုင်းခဲ့တာ။

အလောင်းထိန်းချုပ်ခြင်းဂိုဏ်း ပျက်စီးသွားမှာကို ငါတို့ထက် ပိုပြီး မြင်ချင်တဲ့သူ ဒီလောကမှာ မရှိတော့ဘူး"

"အကယ်၍ အဲဒီအသုံးမကျတဲ့ အနီရောင်သူရဲကောင်းက ဘယ်တော့မှ ရောက်မလာရင်ကော"

မိစ္ဆာတစ်ကောင်က မေးလိုက်သည်။

"ဒါဆိုရင်လည်း သူရောက်လာအောင် အတင်းအကျပ် ဖိအားပေးရမှာပေါ့"

အနက်ရောင်ဝတ်ရုံခြုံထားသော အမျိုးသားက မကောင်းဆိုးဝါးဆန်စွာ ရယ်မောလိုက်သည်။

"မင်းတို့တွေက အနီရောင်သူရဲကောင်းထွက်ပေါ်လာဖို့အတွက် ပြင်းထန်တဲ့ စိန်ခေါ်စကားတွေကို အရင်ဆုံး ထုတ်ပြန်လိုက်ကြ။ အကယ်၍ သူ ထွက်မလာဘူးဆိုရင်တော့ မြို့ကို အစုလိုက်အပြုံလိုက် သတ်ဖြတ်ပစ်လိုက်ကြပေါ့။

ပြီးတော့မှ မင်းတို့ရဲ့ အင်အားအားလုံးကို စုစည်းပြီး ဟွိုင်မြို့ကို အစွမ်းကုန် ဝင်ရောက်တိုက်ခိုက်ကြ။

အကယ်၍ သူသာ ထွက်မလာရဲဘူးဆိုရင် မြို့ကြီးကျိုးပျက်သွားတာနဲ့တစ်ပြိုင်နက် သူ့ရဲ့ အရှိန်အဝါဂုဏ်သတင်းတွေလည်း သေချာပေါက် ပျက်စီးသွားလိမ့်မယ်"

"ဒါတင်မကသေးဘူး... ဒီကောင်က လူသားတွေဘက်ကနေ ကူညီဖျက်ဆီးပေးဖို့ပဲ စိတ်ဝင်စားနေတာမို့ လူသားမြို့တော်ကြီး ပျက်စီးသွားမှာကို သေချာပေါက် မြင်ချင်မှာမဟုတ်ဘူး။ ဒါက သူ မဖြစ်မနေ ကယ်တင်ရမယ့်အရာကို အသုံးချပြီး တိုက်ခိုက်တာပဲ"

အနက်ရောင်ဝတ်ရုံခြုံထားသော အမျိုးသား၏ စကားကို ကြားရပြီးနောက် ထိုနေရာရှိ မိစ္ဆာကြီးများသည် တစ်ကောင်ကိုတစ်ကောင် လှမ်းကြည့်လိုက်ကြသည်။

၎င်းမှာ အကျိုးအကြောင်းရှိလှသော်လည်း လူသားမျိုးနွယ်၏ စကားကိုမူ ၎င်းတို့ လွယ်လွယ်နှင့် မနာခံရဲကြချေ။

ကျားမိစ္ဆာကြီးသည် ခဏမျှ တွေးတောလိုက်ပြီးနောက် ရေကန်ဘေးသို့ လျှောက်လှမ်းသွားခဲ့ပြီး ရိုသေကိုင်းညွတ်စွာဖြင့် လှမ်းမေးလိုက်တော့သည်။

"သခင်ကြီး... ကျွန်တော်တို့ ဘာဆက်လုပ်သင့်တယ်လို့ ထင်ပါသလဲ ခင်ဗျာ"

ခဏမျှ ကြာမြင့်ပြီးနောက် ရေကန်ကြီးအတွင်း၌ ဧရာမ အရိပ်မည်းကြီးတစ်ခု ထပ်မံပေါ်ထွက်လာခဲ့ပြန်ရာ ရေကန်မျက်နှာပြင်တစ်ခုလုံး ပြင်းထန်စွာ လှုပ်ခါသွားခဲ့ရုံမျှမက ဝန်းကျင်ရှိ မြေပြင်ကြီးကိုပါ ရိုက်ခတ်သွားစေခဲ့တော့သည်။

မလှမ်းမကမ်းရှိ ကျင့်ကြံခြင်းအဆင့်နိမ့်သော မိစ္ဆာအချို့မှာမူ မတ်တတ်ပင် မရပ်တည်နိုင်တော့ဘဲ မြေပြင်ထက်သို့ လဲပြိုကုန်ကြရှာ၏။

ဝင့်ကြွားလှသော အနက်ရောင်ဝတ်ရုံခြုံထားသော အမျိုးသားပင်လျှင် မျက်နှာပျက်သွားခဲ့ရပြီး တစ်ကိုယ်လုံးရှိ အမွေးအမှင်များ ထောင်ထသွားခဲ့ရသည်။

ဤအရိပ်မည်းကြီးထံမှ ထွက်ပေါ်လာသော ဖိအားမှာ လွန်စွာကြီးမားလွန်းသည်။

၎င်းမှာ သူတို့ဂိုဏ်းအတွင်းရှိ ထိပ်သီးအကြီးအကဲများနှင့် ယှဉ်လျှင်ပင် စိုးစဉ်းမျှ လျော့နည်းခြင်းမရှိလှချေ။

ဒီမိစ္ဆာကတော့... သေချာပေါက် မိစ္ဆာမျိုးနွယ်စုတွေကြားထဲမှာ အရမ်းရှားပါးလှတဲ့ ရှေးဟောင်းမျိုးရိုးသွေးကို ပိုင်ဆိုင်ထားတာ ဖြစ်ရမယ်...

အနက်ရောင်ဝတ်ရုံခြုံထားသော အမျိုးသားက စိတ်ထဲကနေ မတွေးဘဲ မနေနိုင်တော့ချေ။

"ဒါဆိုရင်လည်း ဟွိုင်မြို့ကို မင်းတို့ရဲ့ အင်အားအားလုံးနဲ့ ဝင်ရောက်တိုက်ခိုက်ကြတာပေါ့..." ခဏမျှ တွေးတောပြီးနောက် မိုးခြိမ်းသံပမာ ပြင်းထန်လှသော အသံကြီးသည် ရေကန်အတွင်းရှိ အရိပ်မည်းကြီးထံမှ ထွက်ပေါ်လာခဲ့တော့သည်။

"ဒါဆိုရင် အခြားသော ပါရမီရှင် မိစ္ဆာခေါင်းဆောင်တွေကိုပါ ပူးပေါင်းဖို့ ဖိတ်ခေါ်ပေးပါ သခင်ကြီး သခင်ကြီးသာ ရှိနေရင် အဲဒီကောင်တွေ သေချာပေါက် ရောက်လာကြမှာပါ"

ကျားမိစ္ဆာကြီးက ဆက်ပြောလိုက်သည်။

"အထူးသဖြင့် မြူခိုးမိစ္ဆာမျိုးနွယ်စုတွေပေါ့... လူသားမြို့တော်ကို ချိုးဖျက်ဖို့အတွက် သူတို့မပါရင် မဖြစ်ဘူးခင်ဗျာ။ ဒါပေမဲ့ သူတို့မျိုးနွယ်စုက အရမ်းမာနကြီးလွန်းလို့ ကျွန်တော်တို့ သွားပင့်ရင် မရနိုင်ပါဘူး။ သခင်ကြီးရဲ့ မျက်နှာနဲ့မှသာ ရနိုင်မှာပါ"

"ကောင်းပြီ..."

၎င်းကို သဘောတူညီပြီးနောက် အရိပ်မည်းကြီးသည် ရေကန်အတွင်းသို့ တဖြည်းဖြည်း ပြန်လည်ပျောက်ကွယ်သွားခဲ့ပြီး ရေပြင်ကြီးမှာလည်း ငြိမ်သက်သွားခဲ့ရာ ထိုနေရာရှိ လူတိုင်းသည် သက်ပြင်းချနိုင်ခဲ့ကြတော့သည်။

"စိတ်အေးအေးထားကြပါ... ငါတို့ဂိုဏ်းရဲ့ စစ်မှန်ခြင်းမှန်ပြား ရှိနေသရွေ့တော့ အနီရောင်သူရဲကောင်းဘယ်နေရာမှာပဲ ပုန်းနေပုန်းနေ အလွယ်တကူ ရှာဖွေတွေ့ရှိနိုင်မှာပါပဲ"

အနက်ရောင်ဝတ်ရုံခြုံထားသော အမျိုးသားက ယုံကြည်မှုအပြည့်ဖြင့် ပြုံးရွှင်စွာ ပြောဆိုလိုက်တော့သည်။

ထို့နောက်တွင်မူ ရေကန်အတွင်းရှိ ရေမိစ္ဆာကြီးသည် မည်သည့် လျှို့ဝှက်နည်းလမ်းကို အသုံးပြုလိုက်သည်မသိချေ။

ယနေ့ကုန်ဆုံးသွားပြီးနောက်တွင် အနီးနားရှိ မြို့အသီးသီးမှ အခြားသော မိစ္ဆာခေါင်းဆောင်ကြီးများက ဤနေရာဆီသို့ တရဟော ဦးတည်ရောက်ရှိလာကြတော့သည်။

ထိုရောက်ရှိလာကြသော မိစ္ဆာကြီးများထဲတွင် အတောင်ပံများ ဖြန့်လိုက်ပါက ကောင်းကင်ပြင်ကြီးတစ်ခုလုံးကို ဖုံးလွှမ်းသွားစေနိုင်သော ဧရာမလင်းယုန်ကြီးတစ်ကောင်၊ မီးလျှံများကို အဆက်မပြတ် မှုတ်ထုတ်နေသည့် အမြီးခြောက်ချောင်းပါ ဝံပုလွေမြေခွေးမိစ္ဆာတစ်ကောင်နှင့် ၎င်းဖြတ်သန်းသွားရာ လမ်းကြောင်းတစ်ခုလုံးကို အအေးဓာတ်များဖြင့် လုံးဝခဲပျစ်သွားစေသည့် ဧရာမ သတ္တဝါကြီးများ... စသည်ဖြင့် ပါဝင်နေခဲ့ကြတော့သည်။

ရောက်ရှိလာကြသော မိစ္ဆာများထဲတွင် အားအနည်းဆုံးအကောင်သည်ပင် အဆင့်နိမ့် မိစ္ဆာစစ်သူကြီးအဆင့်တွင် ရှိနေပြီး ၎င်းတို့ကြား၌ အလယ်အလတ်အဆင့် မိစ္ဆာစစ်သူကြီးများလည်း မြောက်မြားစွာ ပါဝင်နေခဲ့ကြသည်။

ဟွိုင်မြို့၏ အပြင်ဘက်တွင်မူ တစ်ကောင်ပြီးတစ်ကောင် ပိုမိုအစွမ်းထက်လှသော မိစ္ဆာမျိုးနွယ်စု ပါရမီရှင်ကြီးများမှာ ဆက်တိုက်ဆိုသလို ရောက်ရှိလာနေခဲ့ကြပြီ ဖြစ်သည်။

ကြောက်မက်ဖွယ်ကောင်းလှသော အရှိန်အဝါများ တစ်စုတစ်ဝေးတည်း စုစည်းမိသွားကြပြီး မိစ္ဆာစွမ်းအားများ ကောင်းကင်ယံသို့ ထိုးတက်သွားခဲ့ရာ စခန်းချရာနယ်မြေ၏ အထက်ကောင်းကင်ယံ၌ ဘယ်လိုမှ လွင့်စင်မသွားနိုင်တော့သည့် ဧရာမ အရိပ်မည်းတိမ်တိုက်ကြီးတစ်ခုကိုပင် ဖြစ်ပေါ်စေခဲ့တော့သည်။

"လူသားမျိုးနွယ်တွေက အရမ်ူအားနည်းလွန်းတယ်။ ငါတို့ရဲ့ စားနပ်ရိက္ခာဖြစ်ဖို့ပဲ တန်တဲ့ကောင်တွေပဲ။ ဒါတောင်မှ ဒီလောက်ကျယ်ပြန့်တဲ့ ကုန်းမြေတွေကို သိမ်းပိုက်ထားကြတာ... ဘယ်မှာလာပြီး တရားမျှတပါ့မလဲ"

အမြီးခြောက်ချောင်းပါ ဝံပုလွေမြေခွေးမိစ္ဆာက ဝင့်ကြွားစော်ကားစွာဖြင့် အော်ဟစ်လိုက်တော့သည်။

"လူသားတွေရဲ့ ဆန်းကြယ်လှပါတယ်ဆိုတဲ့ စစ်ဗျူဟာအစီအရင်တွေက... ငါတို့ မြူခိုးမိစ္ဆာမျိုးနွယ်စုအတွက်တော့ ဟာကွက်တွေနဲ့ ပြည့်နှက်နေတာပဲ ရှိတာပါကွာ..."

တစ်ကိုယ်လုံးကို ဖြူဖွေးလှသော မြူခိုးတန်းများဖြင့် ဖုံးလွှမ်းထားပြီး ပုံသဏ္ဍာန်ကို သေသေချာချာ မမြင်တွေ့နိုင်သော ဆန်းကြယ်လှသည့် မိစ္ဆာတစ်ကောင်သည် လေထဲ၌ လွင့်မြောလျက် ရောက်ရှိလာခဲ့ရာ ထိုအခြင်းအရာကြောင့် မိစ္ဆာမျိုးနွယ်စုဝင် အများအပြား၏ မျက်နှာထက်တွင် ဝမ်းမြောက်ပျော်ရွှင်ရသော အရိပ်အယောင်များ ထွက်ပေါ်လာခဲ့ကြရသည်။

"နောက်ဆုံးတော့ မြူခိုးမိစ္ဆာမျိုးနွယ်စုက လူတစ်ယောက် ရောက်လာခဲ့ပြီပဲ... လူသားမြို့တော်ရဲ့ မြို့စောင့်စစ်ဗျူဟာအစီအရင်ကိုတော့ ဘယ်အချိန်မဆို အလွယ်တကူ ချိုးဖျက်ပစ်လို့ ရနိုင်ပြီဟေ့"

"ဒီမြို့စောင့်စစ်ဗျူဟာအစီအရင်ရဲ့ အကာအကွယ်သာ မရှိတော့ရင်... လူသားမျိုးနွယ်တွေက ငါတို့ကို ဘယ်လိုနည်းနဲ့ ယှဉ်ပြိုင်တိုက်ခိုက်နိုင်တော့မှာလဲ"

ထို့နောက်တွင်မူ ယခင်ကထက် ပိုမို၍ အရေးပါအရာရောက်လှသော ဧရာမ မိစ္ဆာကြီးတစ်ကောင် ထပ်မံထွက်ပေါ်လာခဲ့ပြန်သည်။

ဒုန်း... ဒုန်း... ဒုန်း...

မီတာတစ်ရာကျော်ခန့် မြင့်မားလှသော ကုန်းမြေကုန်းကစွန်းငယ်တစ်ခုသည် ၎င်းတို့ရှိရာဆီသို့ မတ်တတ်ရပ်လျက် လျှောက်လှမ်းလာခဲ့၏။

သေသေချာချာ စိုက်ကြည့်လိုက်သည့်အခါမှသာ ၎င်းတွင် ခြေလက်အင်္ဂါများနှင့် ဦးခေါင်းတစ်ခု ရှိနေသည့် ပုံသဏ္ဍာန်ကို မရေမရာ မြင်တွေ့လိုက်ရတော့သည်။

၎င်းမှာ စိမ်းပြာရောင်ဝံပုလွေတောင်တန်းရှိ မြောက်မြားစွာသော မိစ္ဆာများထဲတွင် အင်အားအကြီးမားဆုံးသော အမျိုးအစားများထဲမှ တစ်ခုဖြစ်သည့် ကုန်းမြေဘီလူးကြီးပင်။

၎င်းသည် တူညီသောအဆင့်ရှိ ဝံပုလွေမျိုးနွယ်စု ထိပ်သီးများနှင့်ပင် အင်အားချင်း ယှဉ်ပြိုင်နိုင်စွမ်းရှိသည်ဟု ကောလာဟလများ ထွက်ပေါ်နေခဲ့သည့် သတ္တဝါကြီး ဖြစ်သည်။

"ဘယ်ကလာတဲ့ အဓိပ္ပါယ်မရှိတဲ့ အနီရောင်သူရဲကောင်းလဲ... သူ့ကို ဘာဖြစ်လို့ ဂရုစိုက်နေမှာလဲ မြို့ကို တိုက်ရိုက်ချိုးဖျက်ပြီး သိမ်းပိုက်လိုက်ရင် အားလုံးပြီးသွားတာပဲကို..."

ကုန်းမြေဘီလူးကြီး၏ အသံမှာ မိုးခြိမ်းသံကြီးပမာ ဟိန်းထွက်သွားခဲ့ပြီး သူ၏ စကားလုံးတစ်လုံးချင်းစီ တိုင်းတွင်လည်း လေထုထဲ၌ ဧရာမ အဖြူရောင် လေလှိုင်းကြီးများကို ထွက်ပေါ်စေခဲ့သည်။

ထို့ပြင် ၎င်း၏ ကျင့်ကြံခြင်းအဆင့်မှာလည်း ထိုနေရာရှိ မိစ္ဆာအားလုံးထဲတွင် အမြင့်မားဆုံးဖြစ်ပြီး အဆင့်မြင့် မိစ္ဆာစစ်သူကြီးအဆင့်သို့ပင် ရောက်ရှိနေခဲ့ပြီ ဖြစ်သည်။

ပတ်ဝန်းကျင်ရှိ မိစ္ဆာကြီးများသည် ၎င်း၏အနားသို့ လွယ်လွယ်နှင့် မချဉ်းကပ်ရဲကြချေ။ ရေကန်အတွင်းရှိ ရေမိစ္ဆာကြီးပင်လျှင် ရေပြင်ထက်သို့ ပေါ်ထွက်လာခဲ့ပြီး ထိုကုန်းမြေဘီလူးကြီးကို ရိုသေစွာဖြင့် လှမ်း၍ အလေးပြုလိုက်ရရှာသည်။

ဟွိုင်မြို့ပြင်ပတွင် စုစည်းမိနေကြသော မိစ္ဆာမျိုးနွယ်စုကြီးသည် နောက်ထပ် ဆယ်ရက်အကြာတွင် ဟွိုင်မြို့ကို အစွမ်းကုန် ဝင်ရောက်တိုက်ခိုက်တော့မည်ဖြစ်ကြောင်းနှင့် အကယ်၍ အနီရောင်သူရဲကောင်းသာ ထွက်ပေါ်လာခြင်းမရှိပါက မြို့တစ်ခုလုံးကို အစုလိုက်အပြုံလိုက် ရက်စက်စွာ သတ်ဖြတ်ပစ်မည်ဖြစ်ကြောင်း တစ်လောကလုံးကို ကြေညာလိုက်တော့သည်။

ဤသတင်းဆိုးကြီးက ကျောက်နိုင်ငံတစ်ခုလုံးကို လှုပ်ခါသွားစေခဲ့တော့၏။

အလောင်းထိန်းချုပ်ခြင်းဂိုဏ်းသည်လည်း သူတို့၏ အင်အားများကို အရေးပေါ် စုစည်းလိုက်ကြပြီး ဂိုဏ်းအတွင်းရှိ ထိပ်သီးပညာရှင်များကို စေလွှတ်လျက် ကူညီပံ့ပိုးပေးစေခဲ့သလို ဝန်းကျင်မြို့များရှိ ဂိုဏ်းအကြီးအကဲများကိုလည်း ဟွိုင်မြို့အတွင်းသို့ အမြန်ဆုံး စုစည်းကြရန် အမိန့်ထုတ်ပြန်လိုက်တော့သည်။

မိစ္ဆာမျိုးနွယ်စုများဘက်မှ မိစ္ဆာစစ်သူကြီးများ စုစည်းမိနေကြသလို လူသားမျိုးနွယ်များဘက်မှလည်း အခြေခံအုတ်မြစ်တည်ဆောက်ခြင်းအဆင့်ရှိ မဟာကျင့်ကြံသူကြီးများ စုဝေးမိနေကြပြီဖြစ်ရာ ဧရာမ စစ်ပွဲကြီးတစ်ခုမှာ အချိန်မရွေး ပေါက်ကွဲထွက်လာတော့မည့်အလား ဖြစ်နေခဲ့ပြီ ဖြစ်သည်။

တစ်ချိန်တည်းမှာပင် အနီရောင်သူရဲကောင်းတကယ်ပဲ ထွက်ပေါ်လာမလား မလာဘူးလား ဆိုသည့်အပေါ်၌ ငြင်းခုံဆွေးနွေးမှုများမှာလည်း ပွက်ပွက်ဆူလို့နေခဲ့သည်။

"အနီရောင်သူရဲကောင်းသေချာပေါက် လာမှာပါ။ သူက ဒီမိစ္ဆာမျိုးနွယ်စုတွေကို ကြောက်နေလိမ့်မယ်လို့ မင်းတို့ ထင်နေတာလား"

"အကယ်၍ အနီရောင်သူရဲကောင်းသာ တကယ်ထွက်လာရင်တော့ သူက တကယ့် လူ့အမှိုက်ပဲ။ သူက လုပ်ကြံသတ်ဖြတ်သူတစ်ယောက်လေ... အမှောင်ထဲကနေ တိုက်ခိုက်မှသာ ရန်သူကို သေစေလောက်တဲ့ ထိုးနှက်ချက် ပေးနိုင်မှာ။ အကယ်၍ သူသာ အလင်းထဲကို ထွက်လာခဲ့ရင် သူ့ရဲ့ အကြီးမားဆုံးသော အားသာချက်ကို ဆုံးရှုံးသွားလိမ့်မယ်"

"ဒါပေမဲ့ အနီရောင်သူရဲကောင်းသာ ရောက်မလာရင်... မြို့ထဲက အပြစ်မဲ့တဲ့ ပြည်သူတွေရဲ့ အသက်အန္တရာယ်က ဘယ်လိုလုပ်မလဲ"

"မင်းတို့က ဒီလောက်တောင် လေကြီးလေကျယ် ပြောနိုင်နေရင် ဘာဖြစ်လို့ ကိုယ်တိုင် သွားပြီး မတိုက်ခိုက်ကြတာလဲ"

ကျောက်နိုင်ငံတစ်ခုလုံးတွင် အနီရောင်သူရဲကောင်းပေါ်လာမည့်အရေးနှင့် ပတ်သက်၍ အငြင်းပွားမှုများ အဆက်မပြတ် ဖြစ်ပွားနေခဲ့ကြသလို ဟွိုင်မြို့ရှိ ပြည်သူလူထု၏ ဘေးကင်းလုံခြုံရေးအတွက် စိုးရိမ်ပူပန်မှုများမှာလည်း တစ်နေ့ထက်တစ်နေ့ ပိုမိုကြီးမားလာခဲ့ရသည်။

သူတို့တွေက ငါ့ကို အလင်းထဲထွက်လာအောင် အတင်းအကျပ် ဖိအားပေးနေကြတာပဲ။ ငါ မိစ္ဆာစစ်သူကြီးအချို့ကို သတ်ပစ်လိုက်ရုံလေးနဲ့ ဒီလောက်အထိ လုပ်ဖို့ လိုအပ်လို့လား...

လုံယီသည် ထိုသတင်းကို ကြားရပြီးနောက် ဆွံ့အသွားခဲ့ရပြီး စိတ်ပျက်လက်ပျက်ဖြင့် ခေါင်းကိုသာ ခါယမ်းလိုက်မိတော့သည်။

သူသည် သူ၏ အသွင်ပြောင်းလဲခြင်းပါရမီက ဘယ်လောက်တောင် ကြောက်မက်ဖွယ်ကောင်းလှကြောင်းနှင့် ဤကမ္ဘာလောကကြီး၏ စနစ်စံနှုန်းများကိုပင် ကျော်လွန်နေခဲ့ပြီဖြစ်ကြောင်းကို ကိုယ်တိုင် သေသေချာချာ သဘောမပေါက်ခဲ့ချေ။

သူသာ ကိုယ့်ကိုကိုယ် ထုတ်ဖော်ပြသခြင်းမရှိပါက လူသားဖြစ်စေ၊ မိစ္ဆာဖြစ်စေ သူ့ကို မည်သူမျှ သတ်ဖြတ်နိုင်မည် မဟုတ်ချေ။

အတိုချုပ်ပြောရလျှင်မူ သူ၏ စွမ်းရည်စက်ယန္တရားကြီးမှာ စံနှုန်းများထက် လွန်စွာကျော်လွန်နေခဲ့ပြီး၊ ဂိမ်းထဲတွင် မတရားသော လျှို့ဝှက်ကုဒ်များကို အသုံးပြုထားသကဲ့သို့ ဖြစ်နေခဲ့သဖြင့် မိစ္ဆာအားလုံးက သူ့ကို သေစေချင်နေကြခြင်းပင်။

သို့သော်လည်း လုံယီသည် ငတုံးမဟုတ်ချေ။ သူသည် မိစ္ဆာများ၏ ထောင်ချောက်အတွင်းသို့ လွယ်လွယ်ကူကူဖြင့် သက်ဆင်းသွားမည်မဟုတ်ပေ။

သူသာ တိတ်တဆိတ် ဆက်လက်ကျင့်ကြံနေပြီး သူ၏ ကျင့်ကြံခြင်းအဆင့်များ တဖြည်းဖြည်း မြင့်မားလာခဲ့မည်ဆိုပါက နောက်ဆုံးတွင် ဤစွမ်းအားများက ကျောက်နိုင်ငံကို ဘေးအန္တရာယ်မှ ကယ်တင်ရန်အတွက် သေချာပေါက် ကူညီပေးနိုင်လိမ့်မည်ပင်။

အကယ်၍ သူ တစ်ခုခုကို လုပ်ဆောင်နိုင်မည့် အခွင့်အရေးရှိလာခဲ့လျှင်လည်း သူသည် ဆက်လက်ကြိုးပမ်းအားထုတ်သွားရန် ဝန်လေးနေမည် မဟုတ်ချေ။

လုံယီသည် သူ၏ စွမ်းရည်ပြမျက်နှာပြင်ကို လှမ်း၍ ကြည့်လိုက်သည်။

မိစ္ဆာမြောက်မြားစွာကို သတ်ဖြတ်ပြီးနောက်တွင်မူ သူ၏ ချီစွမ်းအင်တန်ဖိုးမှာ ကိုးသောင်းရှစ်ထောင်ကျော်အထိ ရောက်ရှိနေခဲ့ပြီ ဖြစ်သည်။

နီးစပ်နေပြီ...

လိုအပ်ချက် ပြည့်မီဖို့အတွက် လွန်စွာနီးစပ်နေခဲ့ပြီ ဖြစ်သည်။

သူသည် တောရိုင်းမြေပြင်များအတွင်း၌ ကစဉ့်ကလျား ဖြစ်နေသော မိစ္ဆာအချို့ကို ဆက်လက်၍ လိုက်လံအမဲလိုက် သုတ်သင်နေခဲ့သည်။

နှစ်ရက်မျှ ကြာမြင့်ပြီးနောက်တွင်မူ လုံယီ၏ စုစုပေါင်း ချီစွမ်းအင်တန်ဖိုးမှာ နောက်ဆုံးတွင် တစ်သိန်းအထိ ချိုးဖျက်ဝင်ရောက်သွားခဲ့တော့သည်။

သူသည် စွမ်းရည်ပြမျက်နှာပြင်ထက်ရှိ အဆင့်နှစ်ဆင့် အသက်ရှူခြင်းကျင့်စဉ်ကို စိုက်ကြည့်လိုက်၏။

တစ်ချိန်တည်းမှာပင် ထိုကျင့်စဉ်၏ ဘေးနားရှိ ဆင့်ကဲဆန်းစစ်ခြင်းဟူသော စကားလုံးများမှာ ရုတ်ချည်းပင် စူးရှတောက်ပစွာ လင်းလက်လာခဲ့သည်။