အခန်း ၆၅

အပိုင်း ၆၅ - လင်းစုယွီ၏ တန်ပြန်တိုက်စစ် (၃)

လင်းစုယွီသည် အလွန်ပင် ဂရုတစိုက် စမ်းသပ်နေမိသည်။ အမှန်အတိုင်းဆိုလျှင် သူမ အတန်ငယ် စိုးရိမ်တုန်လှုပ်နေမိ၏။ ဤကဲ့သို့သော အလုပ်မျိုးကို တစ်ခါမျှ မလုပ်ဖူးသော်လည်း ဤခြေလှမ်းကို မဖြစ်မနေ လှမ်းရမည်ဖြစ်ကြောင်း သူမ သိနေသည်။

မှတ်ဉာဏ်အစုအဝေးများကို အောင်မြင်စွာ ခွဲထုတ်ပြီးနောက်တွင် လင်းစုယွီ၏ စိတ်ဝိညာဉ်စွမ်းအားသည် ထိုမှတ်ဉာဏ်များနှင့် ထိတွေ့လိုက်သည်။ ထိုအခါ လီရှင်းရှင်း၏ မှတ်ဉာဏ်များသည် သူမ၏ မျက်စိရှေ့တွင် ရုပ်ရှင်ကားတစ်ကားကဲ့သို့ ကွင်းကွင်းကွက်ကွက် ပေါ်လာတော့သည်။

ထိုမှတ်ဉာဏ်များထဲတွင် လီရှင်းရှင်း ဝှက်ဖုံးထားသော လျှို့ဝှက်ချက်အချို့ ပါဝင်နေပြီး ယနေ့ညတွင် လူကုန်ကူးသူများနှင့် ပြုလုပ်ရန် သဘောတူထားသည့် အရောင်းအဝယ် အသေးစိတ်အချက်အလက်များလည်း ပါဝင်နေ၏။

"လီရှင်းရှင်း... နင်ကတော့ တကယ်ပဲ သေတွင်းကို ကိုယ်တိုင်တူးနေတာပဲ။ နင့်ကို ဘယ်လိုနည်းနဲ့ အပြတ်ရှင်းရမလဲလို့ ငါ စဉ်းစားနေတာ... အခုတော့ နင့်အစီအစဉ်နဲ့ နင်ပဲ ပြန်ခံရတော့မှာပေါ့"

လီရှင်းရှင်း၏ ရက်စက်လှသော အစီအစဉ်ကို မြင်လိုက်ရသောကြောင့် လင်းစုယွီ ခဏတာ ဒေါသထွက်သွားသည်။ သူမ၏ စိတ်ဝိညာဉ်စွမ်းအားများ ပြင်းထန်စွာ ပေါက်ကွဲထွက်သွားပြီး ထိန်းချုပ်မှု အားနည်းသွားရာမှ လီရှင်းရှင်း၏ ဦးနှောက်မှတ်ဉာဏ်ဗဟိုချက်ကို ထိခိုက်ပျက်စီးသွားစေခဲ့သည်။

သွားပြီ... လီရှင်းရှင်းကတော့ အရူးတစ်ယောက် ဖြစ်သွားပြီပဲ။ လူကုန်ကူးတဲ့သူတွေကတော့ အရူးဖြစ်သွားလဲ ဂရုမစိုက်လောက်ဘူးမလားး။

သူမ၏ စိတ်အခြေအနေ မတည်မငြိမ်ဖြစ်သွားခြင်းအတွက် အပြစ်ဆို၍ မရပေ။ ရာဇဝတ်မှုကျူးလွန်ရန် ဤမျှ ပါရမီပါသော ကလေးမျိုးကို သူမ တစ်ခါမျှ မမြင်ဖူးခဲ့ခြင်းကြောင့် ဖြစ်သည်။ လင်းစုယွီသည် သာမန်အားဖြင့် စိတ်ပုပ်သူတစ်ယောက် မဟုတ်သော်လည်း လီရှင်းရှင်း၏ ယုတ်မာမှုမှာမူ သူမကို အံ့အားသင့်သွားစေခဲ့သည်။

လီရှင်းရှင်းသည် ကျောင်းစာတွင် ထူးချွန်သူမဟုတ်သော်လည်း မကောင်းမှုလုပ်ရာတွင်မူ အလွန်ပင် စနစ်တကျ ရှိလှသည်။ လူကုန်ကူးသူများကို မည်သို့ ဆက်သွယ်ရမည်၊ ဈေးနှုန်းကို မည်သို့ ညှိနှိုင်းရမည်၊ ချက်ချင်း ခေါ်ဆောင်သွားရန် မည်သို့ တောင်းဆိုရမည်နှင့် သဲလွန်စများကို မည်သို့ ဖျောက်ဖျက်ရမည်အထိ အစီအစဉ်ကျလှသည်။

"မွေးရာပါ ရာဇဝတ်ကောင်ဆိုတာ တကယ် ရှိတာပဲ" လင်းစုယွီ သက်ပြင်းမချဘဲ မနေနိုင်တော့ပေ။

ကောင်းပြီလေ... လီရှင်းရှင်းက အကုန်စီစဉ်ထားပြီးမှတော့ သူမရဲ့ ဆန္ဒကို ဖြည့်ဆည်းပေးရမှာပေါ့။ ဒါပေမဲ့... အရူးတစ်ယောက်က လူကုန်ကူးခံရတာကို ဘယ်လိုလုပ်ပြီး နာကျင်စွာ ခံစားမိမှာလဲ။

ထို့ကြောင့် လင်းစုယွီသည် လီရှင်းရှင်း၏ ဦးနှောက်မှတ်ဉာဏ်ဗဟိုချက်ကို ပြန်လည်ပြုပြင်ရန် ဆုံးဖြတ်လိုက်သည်။ ဤသည်မှာလည်း စမ်းသပ်မှုဆိုင်ရာ အတွေ့အကြုံသစ် ရယူနိုင်ရန် အခွင့်ကောင်းတစ်ခု ဖြစ်သည်ဟု သူမ တွေးမိသည်။

တွေးမိသည်နှင့်တစ်ပြိုင်နက် လင်းစုယွီသည် လီရှင်းရှင်း၏ ဦးနှောက်ကို စတင် ပြုပြင်လေသည်။ သူမတွင် ကုသနိုင်သော စွမ်းအားမရှိသော်လည်း ဤဒဏ်ရာမှာ ဝိညာဉ်စွမ်းအားကြောင့် ဖြစ်ရခြင်းဖြစ်သဖြင့် စိတ်ဝိညာဉ်စွမ်းအားဖြင့်ပင် ပြန်လည်ကုစားနိုင်မည်ဟု သူမ ယူဆသည်။

လုပ်ဆောင်ပုံ အဆင့်ဆင့်မှာ အရေးမကြီးသော်လည်း ရလဒ်အနေဖြင့် လီရှင်းရှင်းသည် "တစ်ပိုင်းတစ်စ" အရူး ဖြစ်သွားခဲ့သည်။ ဥပမာအားဖြင့် သူမသည် စိတ်လှုပ်ရှားမှု လုံးဝ မရှိစေရပေ။ စိတ်လှုပ်ရှားသွားသည်နှင့် သူမ၏ ဦးနှောက်ဒဏ်ရာမှာ ပြန်လည်ပွင့်ထွက်လာပြီး စိတ်ပေါ့သွပ်သွားမည် ဖြစ်သည်။

စိတ်တည်ငြိမ်သွားသောအခါမှသာ ဦးနှောက်မှာ ဖြည်းဖြည်းချင်း ပြန်ကောင်းလာမည်ဖြစ်သည်။ ထိုအချိန်တွင် လီရှင်းရှင်းသည် သတိပြန်ဝင်လာမည်ဖြစ်ပြီး သူမ စိတ်လွတ်နေစဉ် လုပ်ခဲ့သမျှကိုလည်း ကောင်းကောင်းကြီး မှတ်မိနေပေလိမ့်မည်။

လင်းစုယွီသည် ဤရလဒ်ကို အလွန်ပင် ကျေနပ်သွားသည်။ လီရှင်းရှင်းအပေါ် စမ်းသပ်မှုလုပ်ရင်း ဝိညာဉ်စွမ်းအားများစွာ ကုန်ဆုံးသွားသဖြင့် စိတ်ဝိညာဉ်စမ်းရေကို သောက်သုံးလိုက်ရသော်လည်း ဤအကျိုးရလဒ်အတွက် ထိုက်တန်သည်ဟု သူမ ယူဆသည်။

လီရှင်းရှင်းအပေါ် စမ်းသပ်မှု ယာယီပြီးဆုံးသွားပြီဖြစ်သည်။ လင်းစုယွီသည် လီရှင်းရှင်းကို သတိလစ်အောင် လုပ်လိုက်ပြီးနောက် သူမ၏ အကြည့်ကို အစ်ကိုကြီးမာ ထံသို့ လွှဲလိုက်သည်။

နေရာလွတ် အဆင့်မြှင့်ပြီးနောက်တွင် လင်းစုယွီ၏ စိတ်ဝိညာဉ်စွမ်းအားမှာ အဆင့် ၃ သာ ရှိသေးသဖြင့် အဝေးကြီးမှ မှတ်ဉာဏ်များကို မမြင်နိုင်သေးပေ။ သို့သော် စိတ်ဝိညာဉ်စွမ်းအားဖြင့် ထိုးဖောက်ဝင်ရောက်ခြင်းဖြင့် လူတစ်ယောက်၏ စရိုက်လက္ခဏာကိုမူ ခံစားသိရှိနိုင်သည်။

သူမသည် သူ၏မှတ်ဉာဏ်များကို သေချာကြည့်ရှုပြီး တွေ့ရှိချက်အပေါ် မူတည်ကာ မည်သို့ ကိုင်တွယ်ရမည်ကို ဆုံးဖြတ်မည်ဖြစ်သည်။

အကယ်၍ မာကောသည် အလွန်အမင်း ဆိုးသွမ်းသူမဟုတ်ခဲ့လျှင် သူမအနေဖြင့် သူ့ကို အလွန်အမင်း ဒုက္ခပေးမည် မဟုတ်ပေ။

ဤသည်မှာ သူမက "သန့်ရှင်းစင်ကြယ်သော မယ်တော်"ဖြစ်နေ၍ မဟုတ်ဘဲ သူမ၏ တန်ဖိုးထားမှုနှင့် ပညာအရည်အချင်းအရ စွမ်းအားရှိနေရုံနှင့် စိတ်အလိုလိုက်ကာ စည်းမဲ့ကမ်းမဲ့ မလုပ်လိုခြင်းကြောင့် ဖြစ်သည်။

အခက်ခဲဆုံးအရာမှာ စွမ်းအားရှိဖို့ မဟုတ်ဘဲ ထိုစွမ်းအားကို ပိုင်ဆိုင်ထားချိန်တွင် ကိုယ့်ကိုယ်ကိုယ် ထိန်းချုပ်နိုင်ရန်၊ တည်ငြိမ်ပြီး ဆင်ခြင်တုံတရားရှိရန်နှင့် ကိုယ့်ရဲ့ စိတ်အလိုနှင့် လောဘနောက်သို့ မပါသွားရန် ဖြစ်သည်။

အရာအားလုံးကို ထိန်းချုပ်နိုင်စွမ်းရှိသူများအတွက် ကိုယ့်ကိုယ်ကိုယ် ပြန်လည်ထိန်းချုပ်ရန်မှာ ပို၍ပင် စိန်ခေါ်မှုကြီးမားလှသည်။

သူတို့သည် ရွေးချယ်စရာများနှင့် မက်လုံးများစွာကို ရင်ဆိုင်ရနိုင်သော်လည်း စိတ်ကို ကြည်လင်စွာထားပြီး မိမိကိုယ်မိမိ တင်းကျပ်စွာ ထိန်းချုပ်နိုင်မှသာ မိမိ၏ အင်အားကို အမှန်တကယ် ပိုင်စိုးနိုင်မည်ဖြစ်သည်။

ဤသို့ပြုလုပ်ခြင်းဖြင့် တစ်ကိုယ်ကောင်းဆန်သော လောဘနှင့် ရည်မှန်းချက်များကြောင့် ဖြစ်လာနိုင်သော လူမှုရေးဆိုင်ရာ ဘေးဒုက္ခများကိုလည်း တားဆီးနိုင်မည်ဖြစ်သည်။

လင်းစုယွီသည် အစ်ကိုကြီးမာကို မနှိုးခဲ့ပေ။ ထိုအစား သူသတိလစ်နေစဉ်မှာပင် စိတ်ဝိညာဉ်စွမ်းအားဖြင့် သူ၏ စိတ်ထဲသို့ ထိုးဖောက်ဝင်ရောက်ရန် ကြိုးစားလိုက်သည်။

'အလေ့အကျင့်က ကျွမ်းကျင်မှုကို ဖြစ်စေသည်'ဆိုသကဲ့သို့ပင်။ ယခုတစ်ကြိမ်တွင် လင်းစုယွီသည် လီရှင်းရှင်း၏ ဦးနှောက်ကို ထိုးဖောက်စဉ်ကထက် များစွာ ပိုလွယ်ကူကြောင်း ခံစားလိုက်ရပြီး မှတ်ဉာဏ်များကို ခွဲထုတ်ရသည်မှာလည်း ပို၍ ရိုးရှင်းလွယ်ကူလာသည်။

တွေ့ရှိရသလောက် အစ်ကိုကြီးမာသည် အခြေခံအားဖြင့် အလေအလွင့်ဖြစ်နေသော လူမိုက်အသေးစားလေး တစ်ဦးသာဖြစ်သည်။ သူ၏ ညီအစ်ကိုများသည်ပင် စစားဝတ်နေရေး ခက်ခဲသောကြောင့် လူမိုက်ဘဝသို့ ရောက်ရှိလာကြသူများ ဖြစ်ကြသည်။

သူတို့ ကျူးလွန်ခဲ့သော အကြီးမားဆုံး အမှားများမှာ ချမ်းသာသော မိသားစု ကလေးများထံမှ ဆက်ကြေးကောက်ခြင်းနှင့် မှောင်ခိုဈေးတွင် လူကြုံအလုပ်များ လုပ်ပေးခြင်းတို့သာ ဖြစ်သည်။

လီရှင်းရှင်းသည် ကျောင်းအပြင်ဘက်တွင် အနိုင်ကျင့်ခံနေရစဉ် အစ်ကိုကြီးမာက တိုက်တိုက်ဆိုင်ဆိုင် ဝင်ကယ်ခဲ့ရာမှ သူတို့ ဆုံတွေ့ခဲ့ကြခြင်း ဖြစ်သည်။ ယခုကြည့်ရသည်မှာ အစ်ကိုကြီးမာသည် မကယ်သင့်သော လူတစ်ယောက်ကို ကယ်ခဲ့မိပုံရသည်။

လီရှင်းရှင်းသည် သူမကိုယ်သူမ "အရင်းရှင်" တစ်ဦး၏ သမီးအဖြစ် နောက်ကြောင်းရာဇဝင်ကို လုပ်ကြံပြောဆိုကာ သူ့ကို နေ့တိုင်း ကျွေးမွေးခဲ့သည်။ အစ်ကိုကြီးမာက သူမပြောသည်ကို ယုံကြည်ခဲ့ပြီး သူမကို အနိုင်ကျင့်ဖူးသမျှ လူတိုင်းကို လိုက်လံ နှိမ်နင်းပေးခဲ့သည်။

မရသင့်သော အကျိုးအမြတ်များကို လက်ခံပြီး မလိုက်သင့်သော မက်လုံးများနောက် လိုက်ခဲ့လျှင် ထိုက်တန်သော နောက်ဆက်တွဲရလဒ်များကို ခံစားရမည်သာ ဖြစ်သည်။

လင်းစုယွီသည် အစ်ကိုကြီးမာ၏ စိတ်ထဲမှ လီရှင်းရှင်းနှင့်အတူ ပြန်ပေးဆွဲရန် ကြံစည်ခဲ့သည့် မှတ်ဉာဏ်များနှင့် သူမ (လင်းစုယွီ) နှင့် ပတ်သက်သည့် မှတ်ဉာဏ်များကို အမြန်ဖျက်ပစ်လိုက်သည်။ ထို့နောက် ယနေ့အတွက် မှတ်ဉာဏ်အသစ်များကို သူ့အတွက် ရက်လုပ်ပေးလိုက်သည်။

အဘယ်ကြောင့်ဆိုသော် လူတစ်ယောက်သည် တစ်နေ့တာလုံး၏ မှတ်ဉာဏ်များကို ရုတ်တရက် ပျောက်ဆုံးသွားပါက မသင်္ကာဖြစ်ကာ စူးစမ်းလိမ့်မည်ဖြစ်ပြီး ထိုမှတစ်ဆင့် ပျောက်ဆုံးသွားသော မှတ်ဉာဏ်များကို ပြန်လည် သတိရသွားနိုင်သောကြောင့် ဖြစ်သည်။

မှန်ပါသည်၊ မှတ်ဉာဏ်များ ပြန်ရသွားနိုင်ခြေမှာမူ ၂၁ ရာစုတွင် ထီပေါက်သကဲ့သို့ပင် အလွန်တရာမှ နည်းပါးလှပါသည်။

လင်းစုယွီသည် ယနေ့ညတွင် အစ်ကိုကြီးမာ၏ ခြေထောက်တစ်ဖက်ကို ချိုးမည်ဟု ကိုယ့်ကိုယ်ကိုယ် ကတိပေးထားသဖြင့် သူ၏စိတ်ထဲတွင် မတော်တဆမှုတစ်ခုကို ထည့်သွင်းပေးလိုက်သည်။ တစ်စုံတစ်ယောက်က သူ့ခေါင်းကို အိတ်ဖြင့်စွပ်ပြီး ခြေထောက်ကို ရိုက်ချိုးသွားသည်ဟု သူ ယုံကြည်သွားစေရန် သူမ ဖန်တီးပေးလိုက်ခြင်း ဖြစ်သည်။

သူမ၏ လက်ဖဝါးထဲသို့ အတွင်းအားများကို စုစည်းလိုက်ပြီးနောက် မာကော၏ ခြေထောက်ကို ပြတ်ပြတ်သားသား ရိုက်ချိုးလိုက်သည်။ "ဂျွတ်" ဟူသော အသံနှင့်အတူ အရိုးကျိုးသွားရာ အစ်ကိုကြီးမာမှာ နာကျင်လွန်းသဖြင့် ခဏတာ သတိဝင်လာသော်လည်း လင်းစုယွီက သူ့ကို ထပ်မံ သတိလစ်အောင် လုပ်လိုက်ပြန်သည်။

အစ်ကိုကြီးမာသည် သတိလစ်နေသော်လည်း နာကျင်မှုကြောင့် ချွေးများ၊ မျက်ရည်များ ထွက်နေရှာသည်။ မြေပြင်ပေါ်ရှိ ရွှံ့နွံများ၊ ဖုန်မှုန့်များနှင့် ရောနှောကာ သူ၏ ပုံစံမှာ အလွန်ပင် သနားစရာ ကောင်းနေတော့သည်။

လင်းစုယွီသည် ကုန်ဆုံးသွားသော စွမ်းအားများအတွက် ဝိညာဉ်စမ်းရေကို အမြန်သောက်လိုက်သည်။ သူတို့နှစ်ဦးလုံး အလွယ်တကူ နိုးလာမည်မဟုတ်ကြောင်း သေချာစေပြီးနောက်တွင်မှ သူမသည် တောအုပ်ငယ်လေးထဲတွင် လမ်းလျှောက်ရန် စိတ်ကူးလိုက်သည်။

ယနေ့ညတွင် သူမကို ဤတောအုပ်ထဲသို့ ခေါ်ဆောင်လာပေးသည့်အတွက် လီရှင်းရှင်းနှင့် အစ်ကိုကြီးမာကို ကျေးဇူးတင်ရပေမည်။ ယခင်က သူမ၏ ဝိညာဉ်အာရုံခံနိုင်စွမ်းမှာ မီတာ ၂၀ သာ ရှိသဖြင့် ဤနေရာတွင် မြေအောက်ခန်းတစ်ခု ရှိနေသည်ကို သူမ မသိခဲ့ပေ။

"ကောင်းကင်ကနေ ရတနာတွေ မိုးရွာချတဲ့ နေ့" တစ်နေ့ပါပဲလား။ ယခုအခါ သူမသည် မီတာ ၆၀ အကွာအဝေးအထိ အာရုံခံနိုင်ပြီဖြစ်ရာ ရတနာရှာဖွေရေး ကျွမ်းကျင်သူလေး ဖြစ်လာလေပြီ။ အမှန်တကယ်ပင် ကမ္ဘာပေါ်တွင် အချမ်းသာဆုံးနေရာမှာ ရတနာများကို မြှုပ်နှံထားသည့် မြေကြီးပင် ဖြစ်သည်။

မြေအောက်ခန်းအဝင်ဝကို မြေကြီးအထူကြီးဖြင့် ဖုံးအုပ်ထားသောကြောင့် မည်သူမျှ ရှာမတွေ့ခဲ့ခြင်း ဖြစ်သည်။ ထိုရတနာပိုင်ရှင်မှာလည်း ဟိုးယခင်ကတည်းက ကွယ်လွန်သွားပြီဖြစ်ကြောင်း လင်းစုယွီ ခန့်မှန်းမိသည်။

သူမ၏ ဝိညာဉ်အာရုံဖြင့် စစ်ဆေးကြည့်ရာ ရတနာသေတ္တာများသည် နှစ်ပေါင်း တစ်ရာကျော်နေပြီ ဖြစ်သဖြင့် အတန်ငယ် ဆွေးမြည့်နေပြီ ဖြစ်သည်။

လင်းစုယွီသည် ပေါက်ပြားတစ်လက်ကို ထုတ်ယူကာ မြေကြီးများကို စတင်တူးဆွလေသည်။ လင်းမိသားစု၏ ခြံဝင်းတစ်ခုလုံးကို ပြောင်သလင်းခါအောင် သိမ်းယူခဲ့သည့် သူမ၏ အမြော်အမြင်ကို တစ်ကျော့ပြန် ကျေးဇူးတင်မိသည်။ မဟုတ်လျှင် ဤကဲ့သို့ အသုံးတည့်သည့် ကိရိယာမျိုးကို သူမ ဘယ်မှာ သွားရှာနိုင်ပါမည်နည်း။

၁၉၆၀ ၌ ပြန်လည်မွေးဖွားခြင်း