အခန်း ၄၀
Vol. 4 Ch. 40
အခန်း (၄၀) အုတ်မြစ်ချခြင်းအဆင့်နှင့် ဓားထိန်းချုပ်ခြင်း
ချန်ကျီ၏ အိမ်တော်ထဲတွင်
အိပ်ရာကနေ လတ်လတ်ဆတ်ဆတ် နိုးလာရုံသာ ရှိသေးသည့် ချန်ကျီက သူ့ ခန္ဓာကိုယ်ထဲတွင် စွမ်းအားလှိုင်းတစ်ခု ပေါက်ကွဲထွက်ပေါ်လာသည်ကို ရုတ်တရက် ခံစားလိုက်ရသည်။
ယခင်က ဒန်တျန် ထဲတွင် စုစည်းနေသည့် ဝိညာဉ်စွမ်းအား များက အလွန် လျင်မြန်သော အမြန် နှုန်းဖြင့် ဝဲကယက်တစ်ခုအသွင် ကူးပြောင်းကာ ဝိညာဉ်စွမ်းအား များက အဆက်မပြတ် ဖိသိပ်ခြင်းကို ခံနေရချေပြီ။
ဖြည်းဖြည်းချင်းပင် ဒန်တျန် ထဲတွင် မိုးဖွဲလေးများ ရွာသွန်းနေသကဲ့သို့ ဖြစ်ပေါ်လာခဲ့သည်။
ယခင်က စုစည်းထားသည့် ဝိညာဉ်စွမ်းအား များက ဒန်တျန် ထဲသို့ တစ်စက်ချင်းစီ ကျဆင်းလာခဲ့ကာ ရေကန်ငယ်လေးတစ်ခုအသွင် ပုံဖော်လာခဲ့တော့သည်။
"ဒါက အုတ်မြစ်ချခြင်းအဆင့်လား။ အရင် ချီသန့်စင်ခြင်းအဆင့်တုန်းက ဒန်တျန် ထဲမှာ စုပ်ယူထားတဲ့ ဝိညာဉ်စွမ်းအား တွေက အခုတော့ အားလုံး အရည်အသွင်ကို ပြောင်းလဲသွားပြီပဲ။ စကားပုံတစ်ခု ရှိတယ်၊ ချီတွေ စုစည်းပြီး အရည်ဖြစ်သွားရင် အုတ်မြစ်ချခြင်း အောင်မြင်ပြီ တဲ့"
ထိုအကြောင်းကို နားလည်သဘောပေါက်သွားပြီးနောက် ချန်ကျီက ဝိညာဉ်စွမ်းအားကို လွှတ်ထုတ်လိုက်ကာ အသိစိတ် ကို အခန်းအပြင်ဘက်သို့ ဖြန့်ကြက် လိုက်သည်။
အသိစိတ်က အပြင်ဘက်သို့ ဆက်တိုက် တိုးထွက်သွားရာ အိမ်တော်ထဲကနေ လွန်မြောက်ပြီး အိမ်တော်အပြင်ဘက်ရှိ လမ်းမကြီးပေါ်အထိ ရောက်ရှိသွားခဲ့ကာ မီတာ ၁၀၀ အကွာအဝေးသို့ ရောက်သည့်အခါတွင်မူ အသိစိတ်က ထပ်မံ၍ မတိုးနိုင်တော့ပါချေ။
"အုတ်မြစ်ချခြင်းအဆင့်ရဲ့ အသိစိတ်က ဒီမီတာ ၁၀၀ အကွာအဝေးကိုပဲ စူးစမ်းနိုင်တာပဲ။ ဒါပေမဲ့လည်း ချီသန့်စင်ခြင်းအဆင့်တုန်းကထက်စာရင် အများကြီး ပိုပြီး သန်မာလာတာတော့ အမှန်ပဲ။"
"ဓားထိန်းချုပ်ခြင်း ကို လေ့ ကျင့်ဖို့ အချိန်တန်ပြီ"
ထိုသို့ တွေးလိုက်မိသည်နှင့် ချန်ကျီ၏ အသိစိတ်က အနန္တနေရာလွတ် ထဲသို့ ဝင်ရောက်သွားခဲ့ကာ အနန္တစျေးဆိုင် ဆီသို့ တိုက်ရိုက် ရောက်ရှိသွားခဲ့သည်။
အနန္တစျေးဆိုင် ထဲတွင် ဝတ်စုံစိမ်းနှင့် အမျိုးသမီးက ဤနေရာတွင် သူ စောင့်ဆိုင်းနေသည်မှာ ကြာပြီဖြစ်သည့်အလား ရှိနေချေပြီ။
ချန်ကျီလည်း အပိုစကားများစွာ ပြောမနေတော့ချေ၊ အနန္တစျေးဆိုင်ထဲတွင် လဲလှယ်နိုင်သည့် ပစ္စည်းများကိုမူ သူက စောစောကတည်းက ရင်ထဲတွင် အလွတ်ရနေပြီးသား ဖြစ်သည်။
ချန်ကျီက တိုက်ရိုက်ပင် ပြော လိုက်၏။ "ငါ ဓားထိန်းချုပ်ခြင်း လဲချင်တယ်"
"ဓားထိန်းချုပ်ခြင်း လဲလှယ်ခြင်းအတွက် အမှတ် ၅၀ ကုန်ကျပါမယ်၊လဲလှယ်ဖို့ သေချာပါသလား"
"သေချာတယ်"
ဝယ်ယူခြင်း မျက်နှာပြင်ပေါ်တွင် အမှတ် ၇၀၀ ကနေ တိုက်ရိုက် အမှတ် ၆၅၀ သို့ ပြောင်းလဲသွားခဲ့သည်။
တစ်ပြိုင်နက်တည်းမှာပင် စာအုပ်တစ်အုပ်က ချန်ကျီ၏ ရှေ့မှောက်တွင် ပေါ်ထွက်လာခဲ့၏။
ချန်ကျီက လက်ဆန့်ကာ စာအုပ်ကို ယူလိုက်ပြီး တိုက်ရိုက် လှန်လှောကြည့်ရိုက်သည်။ "သေစမ်း... စာလုံးတွေကို သိနေပေမဲ့ ဘာဖြစ်လို့ ဖတ်လို့ နားမလည်နိုင်ရတာလဲ"
"ငါ့ရဲ့ အဆင့်နိမ့် ဝိညာဉ်အမြစ် ပါရမီ အရည်အချင်းကလည်း တကယ့်ကို ညံ့ဖျင်းလွန်းတာပဲ၊ ဓားထိန်းချုပ်ခြင်း ကျင့်စဉ် ကိုတောင် ချက်ချင်း သဘောမပေါက်နိုင်ဘူး"
ချန်ကျီက သက်ပြင်းတစ်ချက် ချလိုက်မိသည်။ "ထားလိုက်တော့၊ ဂရုမစိုက်တော့ဘူး၊ အလိုအလျောက် ကျင့်ကြံခြင်းအခန်းကိုပဲ တိုက်ရိုက် သွားတော့မယ်"
ချန်ကျီ စိတ်ကူးလိုက်သည်နှင့် အလိုအလျောက် ကျင့်ကြံခြင်းအခန်းထဲတွင် ချက်ချင်း ပေါ်ထွက်လာခဲ့ပြီ ဖြစ်သည်။
ဓားထိန်းချုပ်ခြင်း ကို အလျင်အမြန် အစားထိုး ထည့်သွင်းလိုက်ပြီး တိတ်တဆိတ် စောင့်ဆိုင်းနေလိုက်၏။
"ကျစ်... ငါ ဘယ်တော့မှ ဒီလိုမျိုး နားလည်မှု မျိုး ရှိလာမှာလဲ မသိဘူး၊ နောင်ကျရင် အနန္တစျေးဆိုင်ထဲမှာ ပါရမီ လိုမျိုး ပစ္စည်းတွေ ထွက်လာမလားဆိုတာလည်း မသိဘူး။ အကယ်၍ ရှိလာခဲ့ရင် အဲဒီအချိန်ကျရင် ထိပ်တန်း ပါရမီ တစ်ခုကို သေချာပေါက် လဲပစ်ရမယ်။ အခုလိုမျိုးကတော့ တကယ့်ကို ညံ့ဖျင်းလွန်းတယ်၊ ကျင့်စဉ်စာအုပ်တစ်အုပ် ကြည့်တာတောင် နားမလည်နိုင်ဘူး။ ဒါကို တခြားလူတွေ သိသွားရင်တော့ တကယ့်ကို အရှက်ကွဲပြီး သေရလိမ့်မယ်"
အတွေးပွားနေသည့် ချန်ကျီက ထိုအချိန်တွင် သူ့ စိတ် ထဲ၌ အချက်အလက်အချို့ ပိုမို တိုးလာသကဲ့သို့ ရုတ်တရက် ခံစားလိုက်ရသည်။
ထိုအချိန်တွင် ပုံရိပ် ၏ ဘေးနားရှိ မျက်နှာပြင်ပေါ်တွင် ဖော်ပြလာခဲ့၏။ "ဓားထိန်းချုပ်ခြင်း အခြေခံအဆင့် 1/100"
ဓားထိန်းချုပ်ခြင်းကို ပြန်လည် ဖယ်ထုတ်လိုက်ပြီးနောက် ချန်ကျီ၏ အသိစိတ်က အနန္တနေရာလွတ်ထဲကနေ ထွက်လာခဲ့ပြီ ဖြစ်သည်။
ချန်ကျီ၏ ပုံရိပ်က ခြံဝင်းထဲသို့ ရောက်ရှိလာခဲ့ကာ လက်ထဲတွင်လည်း ချင်းယွမ် ဓား တစ်လက် ထွက်ပေါ်လာခဲ့ချေပြီ။
ဓားထိန်းချုပ်ခြင်း ၏ စွမ်းအား လည်ပတ်ပုံအတိုင်း ချင်းယွမ် ဓားကို ကောင်းကင်ယံတွင် မျောလွင့်နေစေရန် ညွှန်ကြားလိုက်၏။
ချင်းယွမ် ဓား ငြိမ်သက်သွားသည်ကို စောင့်ဆိုင်းပြီးနောက် ချန်ကျီက ကိုယ်ကို မြှောက်ကာ ချင်းယွမ် ဓားပေါ်သို့ ခုန်တက်လိုက်သည်။
ချင်းယွမ် ဓားက မြေပြင်ကနေ တစ်ပေခန့်သာ တက် နေပြီး ချန်ကျီက ၎င်းအပေါ်တွင် မတ်တတ်ရပ်နေရင်း ကိုယ်ဟန်က နည်းနည်း မငြိမ်မသက် ဖြစ်နေသေးကာ ဟန်ချက်ညီမည့် နေရာကို ရှာဖွေရင်း ဘယ်ပြန်ညာပြန် လှုပ်ရမ်းနေမိသည်။
ဖြည်းဖြည်းချင်းပင် ချန်ကျီက ချင်းယွမ် ဓားပေါ်တွင် မတ်တတ်ရပ်ရသည့် ခံစားချက်ကို ကျင့်သားရသွားခဲ့ပြီ ဖြစ်ကာ ချင်းယွမ် ဓားကို ဖြည်းဖြည်းချင်း အရှေ့သို့ ပျံသန်းရန် စတင် စေခိုင်းလိုက်တော့သည်။
အမြန် နှုန်းက အလွန် နှေးကွေးလှသလို ပထမဆုံးအကြိမ် ဖြစ်သဖြင့် ချန်ကျီက ချင်းယွမ် ဓားကို အလွန်အမင်း အမြင့်ကြီး မပျံသန်းရဲပါချေ။
ဤသို့ဖြင့် ဖြည်းဖြည်းချင်းပင် ချန်ကျီက ဓားပျံစီးပြီး ပျံသန်းရသည့် ခံစားချက်ကို လုံးဝ နေသားတကျ ရှိသွားခဲ့ပြီ ဖြစ်သည်။
"ဒါက လေယာဉ်စီးရတာထက် အများကြီး ပိုခက်တာပဲ၊ ကြည့်ရတာ ကျွမ်းကျင်မှုအဆင့်က မလောက်သေးတာ ထင်တယ်၊ ဒီဓားပျံရဲ့ အမြန် နှုန်းက ဘယ်လို ရှိမလဲဆိုတာလည်း မသိဘူး"
ဝမ်နန်မြို့ထဲတွင် ချန်ကျီက ဓားပျံစီးပြီး ပျံသန်းနေသည့်သူတစ်ယောက်ကိုမျှ တစ်ခါမှ မမြင်ဖူးသေးချေ။ "ဝမ်နန်မြို့ထဲမှာ ပျံသန်းတာကို ပိတ်ပင်ထားသလား ဆိုတာလည်း မသိရဘူး"
ချန်ကျီက ချင်းယွမ် ဓားကို မူလနေရာသို့ ပြန်လည် ပျံသန်းလာစေရန် စေခိုင်းလိုက်ပြီး ဓားပေါ်ကနေ ခုန်ဆင်းလိုက်ရာ ချင်းယွမ် ဓားက မြေပြင်ကနေ တစ်ပေအကွာအဝေးတွင် ကွာလျက်သား မျောလွင့်နေဆဲ ဖြစ်သည်။
ထိုအချိန်တွင် ကျောက်လင်းအာကလည်း လျှောက်လှမ်းလာခဲ့၏။ "သခင် အုတ်မြစ်ချခြင်းအဆင့်ကို ကျော်ဖြတ်သွားနိုင်တာကို ဂုဏ်ပြုပါတယ်၊ သခင်က ဓားထိန်းချုပ်ခြင်း ကို လေ့ကျင့်နေတာလား"
"အင်း... ဒီနေရာက နည်းနည်း ကျဉ်းလွန်းလို့ လှုပ်ရှားရတာ အဆင်မပြေဘူး" ချန်ကျီက သူကိုယ်တိုင် ကျွမ်းကျင်မှု မရှိသေးခြင်း ဖြစ်သည်ဟု သဘာဝကျကျဖြင့် ထုတ်ပြောမည် မဟုတ်ပါချေ။
"သခင် မြို့ပြင်ကို သွားပြီး တစ်ခေါက် စမ်းသပ်ကြည့်လို့ ရပါတယ်" ကျောက်လင်းအာက ကြင်နာစွာဖြင့် ပြော လိုက်၏။
"မသွားတော့ပါဘူး၊ ငါက မြို့ပြင်ကို တစ်ခါမှ မရောက်ဖူးသေးသလို မြို့ပြင်က အခြေအနေကိုလည်း မသိဘူး" ချန်ကျီက လက်ကို ထပ်ခါတလဲလဲ ယမ်းရင်း ပြော လိုက်သည်။
သူ့မှာ မြို့ပြင်သို့ ထွက်ရန် စိတ်ကူး လုံးဝ မရှိချေ၊ ဤဝမ်နန်မြို့ထဲတွင် ရှိနေခြင်းက ဘယ်လောက်အထိ ဘေးကင်းလှသလဲ၊ အပြင်ကို ထွက်ပြီး ဘာသွားလုပ်မှာလဲ။
"ဒါပေမဲ့ ငါ စမ်းသပ်လို့ မရပေမဲ့ စမ်းသပ်လို့ရတဲ့သူ တစ်ယောက်တော့ ရှိတာပေါ့" ချန်ကျီက ရေရွတ်လိုက်ပြီးနောက် ချင်းယွမ် ဓားကို အနန္တနေရာလွတ်ထဲသို့ သိမ်းဆည်းလိုက်သည်။
တစ်ပြိုင်နက်တည်းမှာပင် တွေး လိုက်၏။ "ကျောက်ယွမ်၊ မင်း အခု ဘယ်ကို ရောက်နေပြီလဲ"
"သခင်၊ ကျွန်တော် ထွက်လာတာ တစ်ရက်ပဲ ရှိသေးတာဆိုတော့ အခု လောလောဆယ် ဝမ်နန်မြို့နဲ့ မိုင်တစ်ထောင် တောင် မပြည့်သေးတဲ့ အကွာအဝေးမှာပဲ ရှိပါသေးတယ်"
"အင်း... သွားတာ တော်တော် မြန်တာပဲ၊ ဒါပေမဲ့ ဒါက အရေးမကြီးပါဘူး။ ငါ အခုတင် ဓားထိန်းချုပ်ခြင်း ကို လေ့ကျင့်လိုက်တယ်၊ မင်းလည်း သေချာပေါက် တတ်မြောက်သွားပြီ ထင်တယ်။ ချင်းယွမ် ဓားက အနန္တနေရာလွတ်ထဲမှာ ရှိတယ်၊ မင်း အဲဒါကို သုံးပြီး ခရီးသွားလိုက်တော့"
"ဟုတ်ကဲ့ပါ သခင်"
ကျောက်ယွမ်က နည်းနည်းတော့ ဝေခွဲမရသကဲ့သို့ ခံစားလိုက်ရသော်လည်း ချန်ကျီ ပြောသည့်အတိုင်း အနန္တနေရာလွတ်ထဲကနေ ချင်းယွမ် ဓားကို ထုတ်ယူလိုက်သည်။
ကျောက်ယွမ်က စဉ်းစားတွေးတောနေစရာပင် မလိုချေ၊ ဓားထိန်းချုပ်ခြင်း က သူကိုယ်တိုင် အစဉ်အမြဲ တတ်မြောက်ထားခဲ့သည့်အလား ရှိနေချေပြီ။
ချင်းယွမ် ဓားကို ကောင်းကင်ယံတွင် မျောလွင့်နေစေရန် တိုက်ရိုက် စေခိုင်းလိုက်ပြီး ခြေနှစ်ဖက်ကို မြှောက်ကာ ချင်းယွမ် ဓားပေါ်သို့ ခုန်တက်လိုက်သည်။
ကျောက်ယွမ်က စိတ်ထဲကနေ ထပ်မံ အမိန့်ပေးလိုက်ပြီး ဝိညာဉ်စွမ်းအား များကို ချင်းယွမ် ဓားပေါ်သို့ စီးဆင်းစေကာ စိတ်ထဲကနေ ရေရွတ်လိုက်၏။ "တက်"
ချင်းယွမ် ဓားက ဖြည်းဖြည်းချင်း ကောင်းကင်ယံသို့ မြင့်တက်သွားခဲ့ရာ မြေပြင်ကနေ ဆယ်မီတာခန့် အကွာအဝေးသို့ ရောက်ရှိသွားခဲ့သည်။
ကျောက်ယွမ်က စိတ်ထဲကနေ ထပ်မံ အမိန့်ပေးလိုက်ပြီး တိုးတိုးလေး ရေရွတ်လိုက်ပြန်သည်။ "သွား"
ချင်းယွမ် ဓားက အရှေ့သို့ ပျံသန်းသွားခဲ့တော့သည်။
သို့သော်လည်း တစ်ခဏချင်းမှာပင် ကျောက်ယွမ်က မျက်နှာတစ်ခုလုံး အရှက်ရသွားသကဲ့သို့ ခံစားလိုက်ရ၏။ "ဒီအမြန် နှုန်းက တကယ့်ကို နှေးကွေးလွန်းတာပဲ၊ ငါ ခြေကျင်ပြေးတာလောက်တောင် မမြန်ဘူး"
ချင်းယွမ် ဓားက လက်ရှိတွင် ပျံသန်းနေသည် ဆိုသော်လည်း အမြန် နှုန်းကတော့ အကန့်အသတ်အထိ နှေးကွေးလွန်းလှပေသည်။
အိမ်တော်ထဲရှိ ချန်ကျီက အသိစိတ်ကို ကျောက်ယွမ်၏ ကိုယ်ပေါ်သို့ ရောက်ရှိစေထားသဖြင့် လက်ရှိ ကျောက်ယွမ်၏ အခြေအနေကို သူက အလွန် ရှင်းလင်းစွာ မြင်တွေ့နေရသည်။
သူကိုယ်တိုင်လည်း မျက်နှာတစ်ခုလုံး အရှက်ရသကဲ့သို့ မနေနိုင်တော့ချေ။ "ကြည့်ရတာ ကျွမ်းကျင်မှုအဆင့်က မလောက်သေးတာ အမှန်ပဲ"
ချန်ကျီက ဓားပျံ၏ အမြန် နှုန်း နှေးကွေးရသည့် အကြောင်းအရင်းကို စဉ်းစားတွေးတောနေမိသည်။
ကျောက်ယွမ်ကမူ ချင်းယွမ် ဓားပေါ်တွင် မတ်တတ်ရပ်ရင်း နှေးကွေးစွာဖြင့် ဆက်လက် ပျံသန်းနေဆဲ ဖြစ်၏။
သူ့စိတ်ထဲက အတွေးကတော့ ချန်ကျီက သူ့ကို လုပ်ခိုင်းခြင်း ဖြစ်သဖြင့် သူ လုပ်ခြင်းက သေချာပေါက် မှားယွင်းစရာ မရှိဟု ထင်မြင်နေခြင်း ဖြစ်သည်။
ချန်ကျီဘက်ကလည်း ကျောက်ယွမ်၏ လှုပ်ရှားမှုကို သတိပြုမိသွားခဲ့သဖြင့် တွေး လိုက်ကာ နည်းနည်း အရှက်ရနေသည့် အချက်အလက်တစ်ခုကို ကျောက်ယွမ်ထံသို့ ပေးပို့လိုက်၏။
"ဆင်းလိုက်တော့၊ နောက်ရက်တွေကျလို့ ကျွမ်းကျင်မှုအဆင့် မြင့်လာမှပဲ ထပ်ပျံတော့"
"ဟုတ်ကဲ့"
ကျောက်ယွမ်က သတင်းစကား ကို လက်ခံရရှိပြီးနောက် ကိုယ်ကို မြှောက်ကာ ချင်းယွမ် ဓားပေါ်ကနေ တိုက်ရိုက် ခုန်ဆင်းလိုက်ပြီး ချင်းယွမ် ဓားကိုလည်း အနန္တနေရာလွတ်ထဲသို့ ပြန်လည် သိမ်းဆည်းလိုက်တော့သည်။
"သခင်၊ ဓားပျံကို စမ်းသပ်ရတာ ဘယ်လိုလဲ"
ကျောက်လင်းအာက ကိုယ်ပွားတစ်ခုသာ ဖြစ်သဖြင့် သူမက ချန်ကျီကဲ့သို့ အခြား ကိုယ်ပွားများ၏ လှုပ်ရှားမှု တိုင်းကို မြင်တွေ့နိုင်ခြင်း မရှိချေ။
"အဆင်ပြေပါတယ်" ချန်ကျီ၏ အမူအရာက အလွန် တည်ငြိမ်နေချေသည်။
"သခင်၊ မနေ့က သံနက်မိုင်းတွင်းရဲ့ အရေအတွက်ကို စာရင်း တွက်ချက်ပြီးပါပြီ၊ စုစုပေါင်း ၇၅၀၀ ကီလိုဂရမ် ရှိပါတယ်"
"မျှော်လင့်ထားတဲ့အတိုင်းပါပဲ"
ကျောက်လင်းအာက ထပ်မံ ပြော ပြန်သည်။ "ဒါပေမဲ့ သံနက်မိုင်းတွင်းထဲမှာ ယဲ့မိသားစုဝင် အချို့က အမိန့်ကို သိပ်ပြီး နာခံမှု မရှိကြဘူး"
"အမိန့်ကို မနာခံရင် အချို့ကို သတ်ပစ်လိုက်ရုံပဲ။ ကိုယ်ပွားတွေကို အများကြီး တွေးမနေခိုင်းနဲ့၊ မိုင်းတူးဖို့ လူနည်းနည်း လျော့သွားတာ ကိစ္စမရှိဘူး။ အခုက အုတ်မြစ်ချခြင်းအဆင့်ကို ရောက်နေပြီဆိုတော့ မိုင်းတူးတဲ့ အမြန် နှုန်းက ပိုပြီးတော့ပဲ မြန်ဆန်လာလိမ့်မယ်"
"ဟုတ်ကဲ့ပါ၊ လင်းအာ အခုပဲ သွား အကြောင်းကြားလိုက်ပါ့မယ်"
ကျောက်လင်းအာက အနန္တနေရာလွတ်ထဲသို့ သတင်းစကား ပေးပို့ရန် ထွက်သွားခဲ့ပြီ ဖြစ်သည်။
"တော်သေးတာပေါ့၊ စောစောက အရှက်မကွဲလိုက်ဘူး၊ ဓားထိန်းချုပ်ခြင်း ကို သေသေချာချာ လေ့ ကျင့်ရမယ်၊ အခုလို ပုံစံမျိုးကတော့ ပျံသန်းနေတာထက် မပျံသန်းတာကမှ ပိုကောင်းဦးမယ်"
"အခုက အုတ်မြစ်ချခြင်းအဆင့်ကို ရောက်သွားပြီဆိုတော့ ကျွမ်းကျင်မှုအဆင့်ရဲ့ လိုအပ်ချက်ကလည်း သေချာပေါက် မြင့်တက်လာပြီ ထင်တယ်"
မျက်စိတစ်မှိတ်အတွင်းမှာပင် ချန်ကျီ၏ အရှေ့ တွင် စနစ် မျက်နှာပြင် ပေါ်ထွက်လာခဲ့ချေပြီ။
အမည် : ချန်ကျီ
ကျင့်ကြံခြင်းအဆင့် : အုတ်မြစ်ချခြင်း အဆင့် ၁ (1/200)
ပါရမီ : မြေကြီး အဆင့်နိမ့် ဝိညာဉ်အမြစ်
ကျင့်စဉ် :
ရွှမ်ထျန်းလု (ပြီးပြည့်စုံခြင်း ) 115/800
မန္တန် :
နှလုံးဖောက်တိုက်ခိုက်မှု (ကျွမ်းကျင်အဆင့်) 1/200
ဝိညာဉ်ရှာဖွေခြင်း (ကျွမ်းကျင်အဆင့်) 2/200
ကြယ်ရွှေ့ပြောင်းခြင်း ဓား ဆယ့်သုံးလက် ဓား သိုင်း (ဂရန်းမာစတာ အဆင့်) 950/5000
ကြိုးကြာပျံခြေလှမ်း (အခြေခံအဆင့်) 1/100
ကောင်းကင်ကိုးခု နဂါးဟိန်းသံလှံ သိုင်း (ဒဏ္ဍာရီအဆင့်)
မီးတောက် မန္တန် (ဒဏ္ဍာရီအဆင့်)
အသက်ရှူသံဖျောက် မန္တန် (ဒဏ္ဍာရီအဆင့်)
မြေကြီး ဒိုင်းကာ မန္တန် (ဒဏ္ဍာရီအဆင့်)
အနန္တနေရာလွတ် : အဆင့် ၂
"မှန်းထားတဲ့အတိုင်း လိုအပ် ချက်တွေက ဆတိုး တက်လာတာပဲ"
ဤမျှလောက် ကြာမြင့်စွာ အနန္တနေရာလွတ်ကို အသုံးပြုခဲ့ပြီးနောက် ချန်ကျီက စနစ် ၏ လုပ်ဆောင်ပုံ ကို အခြေခံအားဖြင့် သဘောပေါက်ထားပြီး ဖြစ်သည်။
ထိုအချိန်တွင် ဝမ်နန်မြို့၏ မြို့တံခါးဝ၌ ယိုင်တိုင်တိုင်နှင့် ပုံရိပ်တစ်ခုက ခြေလှမ်းများ မမြဲဘဲ ဝမ်နန်မြို့ထဲသို့ လှမ်းဝင်လာခဲ့ချေပြီ။