အခန်း ၂၂၃

အခန်း ၂၂၃ အသက်ဆုံးရှုံးစေခဲ့သော မီးလောင်မှုကြီး

“ထူးဆန်းလိုက်တာ”

လူများက တစ်ယောက်တစ်ပေါက် ဝိုင်းဝန်းဆွေးနွေး‌ပြောဆိုနေကြသည်။

"ဒီခေတ်ကြီးထဲမှာ ထူးဆန်းတဲ့အရာမှန်သမျှ ဖြစ်ပျက်နိုင်တာပဲ။ မိုးကြိုးနတ်မင်းက လူဆိုးတွေကိုပဲ မိုးကြိုးပစ်ချတာ ကြားဖူးပါတယ်၊ ဆေးဆိုင်ကြီးကို မီးရှို့ဖျက်ဆီးပစ်တယ်ဆိုတာတော့ တစ်ခါမှမကြားဖူးပါဘူး"

"လျိုမိသားစုဆေးဆိုင်က ဆေးအတုတွေရောင်းပြီး မတရားအမြတ်ကြီးစားလို့များလား။ ဒါကြောင့် မိုးကြိုးနတ်မင်းက အမျက်ထွက်ပြီး လျိုမိသားစုဆေးဆိုင်ကြီးတစ်ခုလုံးကို ပြာကျအောင် မီးရှို့ပစ်လိုက်တာ ထင်တယ်"

"သေချာပေါက် အဲဒီလိုပဲ ဖြစ်ရမယ်။ မိုးကြိုးနတ်မင်းက လူကောင်းတွေကို ဘယ်တော့မှ မတရားမလုပ်ပါဘူး။ ကောင်းကင်က မိုးကြိုးနတ်မင်းဆင်းပြီး လျိုမိသားစုဆေးဆိုင်ကို မီးရှို့ပစ်လိုက်ကတည်းက သူတို့တွေ အပြစ်အကြီးအကျယ် ကျူးလွန်ထားလို့ပဲ ဖြစ်ရမယ်..."

မနေ့ညက လောင်ကျွမ်းခဲ့သည့်မီးကြီးကြောင့် လျိုမိသားစုဆေးဆိုင်သည် ပြာပုံအတိ ဖြစ်သွားခဲ့ရပြီးလျိုဟန်လျန် အပါအဝင် လျိုမိသားစုဝင် တစ်ဆယ့်သုံးယောက်စလုံး မီးတောက်များထဲတွင် အသက်ပျောက်ခဲ့ကြရသည်။

အာဏာပိုင်များ၏ အဆိုအရဤအရာသည် မတော်တဆ မီးလောင်မှုကြောင့် ဖြစ်ပွားရသော ဝမ်းနည်းစရာ မတော်တဆမှုတစ်ခုသာဖြစ်၏။သို့သော် သာမန်အရပ်သူအရပ်သားများကကောင်းကင်မိုးကြိုးသီအိုရီကိုသာ ပိုမိုယုံကြည်ကြသည်။ မနေ့က တစ်ညလုံး မိုးရွာနေခဲ့ပြီး နေရာတိုင်း စိုစွတ်နေပါလျက်နှင့် ဤမျှအထိ ကြီးမားသော မီးလောင်မှုကြီး မည်သို့ ဖြစ်ပွားနိုင်မည်နည်း။ ၎င်းသည် မိုးကြိုးနတ်မင်း စေလွှတ်လိုက်သော ကောင်းကင်မီးသာ ဖြစ်ရမည်။

ကျေးလက်ဒဏ္ဍာရီများအရ လူဆိုးများက အပြစ်ကျူးလွန်ပါက ကောင်းကင်ဘုံ၏ ပြစ်ဒဏ်ခတ်ခြင်းကို မုချခံရလေ့ရှိသည်။ လျိုမိသားစုဆေးဆိုင် မီးလောင်မှုသည်လည်း ဤကဲ့သို့သော အမှုကိစ္စမျိုးသာ ဖြစ်ရမည်။

လျိုမိသားစုဆေးဆိုင်က မည်မျှအထိ ဆိုးရွားလှသော အပြစ်များကို ကျူးလွန်ခဲ့သနည်းဆိုသည်ကိုမူ မည်သူမျှ သေသေချာချာ မပြောနိုင်ကြချေ။ ဘာပဲဖြစ်ဖြစ် မိုးကြိုးနတ်မင်းသည် နတ်သက်ကြွေသူ ဖြစ်သဖြင့် လူကောင်းများကိုတော့ သေချာပေါက် မတရားမလုပ်နိုင်ပေ။

ထိုနေရာသို့ မတော်တဆ ဖြတ်သန်းသွားမိသော ဝူကျိရှန်းသည်ကား ကောင်းကင်မိုးကြိုးသီအိုရီကို ယုံကြည်သူမဟုတ်ချေ။ တစ်စုံတစ်ယောက်က တမင်တကာ မီးရှို့ခဲ့ခြင်း ဖြစ်ရမည်ကို သူကောင်းစွာ သိရှိနေ၏။

မနေ့က တစ်ညလုံး မိုးရွာသွန်းနေခဲ့ရာ ရာသီဥတုမျိုးတွင် မီးက အလိုအလျောက် စတင်တောက်လောင်ရန် မဖြစ်နိုင်ချေ။ မတော်တဆ မီးလောင်ခဲ့ခြင်း ဖြစ်လျှင်ပင် ဤမျှအထိ ပြာကျသွားအောင် လောင်ကျွမ်းနိုင်စရာ အကြောင်းမရှိပေ။

ထို့အပြင် ယခုအချိန်သည် နွေဦးရာသီ ဖြစ်သဖြင့် မိုးခြိမ်းသံပင်မကြားဖူးရာ မိုးကြိုးပစ်လို့ မီးလောင်ရတယ် ဆိုသော အခြေအနေမျိုးလုံးဝမရှိနိုင်ချေ။

မတော်တဆမှုကြောင့် မီးလောင်ခဲ့ခြင်း ဖြစ်လျှင်ပင် လျိုမိသားစုဝင် တစ်ဆယ့်သုံးယောက်စလုံး အပြင်သို့ တစ်ယောက်မျှ မလွတ်မြောက်နိုင်ရခြင်းမှာ

ထူးခြားဆန်းပြားလှ၏။

မကြာသေးမီကပင်လျိုဟန်လျန်သည် တော်ဝင်ဆေးရုံ၏ အတွင်းပိုင်း အဂတိလိုက်စားမှုများကို ဝူကျိရှန်းထံသို့ လာရောက်ဖွင့်ဟခဲ့သည်။မကြာမီပင် သူ၏မိသားစုသည် ဤကဲ့သို့သော ကံဆိုးမိုးမှောင်ကျမှုနှင့် ကြုံတွေ့ခဲ့ရခြင်း ဖြစ်၏။၎င်းမှာ နှုတ်ပိတ်ရန်အတွက် လူသတ်မီးရှို့ခဲ့ခြင်းသာ လုံးဝဥဿုံ ဖြစ်ရမည်။

လွန်ခဲ့သော ရက်များက အန်ကုန်းနျူးဟန်ဆေးလုံးများကို စုံစမ်းစစ်ဆေးစဉ် ဝူကျိရှန်းအနေဖြင့် မည်သည့်အရာမျှ ရှာမတွေ့ခဲ့သော်လည်း လျိုမိသားစုဆေးဆိုင်၏မီးလောင်မှုကြီးသည်တစ်စုံတစ်ခုကို အရိပ်အမြွက် ပြသနေသလိုဖြစ်‌ နေခဲ့သည်။

တော်ဝင်ဆေးရုံတွင် အလွန်ဆိုးရွားသော ပြဿနာတစ်ခု သေချာပေါက် ရှိနေရမည် ဖြစ်ပြီး သို့မဟုတ်ပါက ၎င်းတို့အနေဖြင့် ဤမျှအထိ ရက်စက်ကြမ်းကြုတ်သော နည်းလမ်းများကို အသုံးပြုလိမ့်မည် မဟုတ်ချေ၊ လူပေါင်းတစ်ဒါဇင်ကျော်၏ အသက်များမှာ ရုတ်ချည်း ပျောက်ကွယ်သွားခဲ့ရပြီ ဖြစ်သည်။

ဝူကျိရှန်းသည် စိတ်ထဲတွင် တိတ်တဆိတ် ဆုံးဖြတ်ချက် ချလိုက်သည်။ စုံစမ်းရမည်၊ သူသေချာပေါက် အမြစ်ပြတ်အောင် စုံစမ်းစစ်ဆေးရမည်။

သူထိုကဲ့သို့ ခိုင်မာသော ဆုံးဖြတ်ချက်ချရခြင်းမှာ လျိုမိသားစု၏ မတရားသေဆုံးခဲ့ရသော ဝိညာဉ်များအတွက် တရားမျှတမှု ရှာဖွေပေးရန်အတွက်သာ မဟုတ်ဘဲ သူကိုယ်တိုင်၏ ဘေးကင်းလုံခြုံမှုနှင့်ပါ သက်ဆိုင်လာသောကြောင့် ဖြစ်၏။

တော်ဝင်ဆေးရုံ၏ ရေကန်သည် မည်မျှပင် နက်ရှိုင်းပါစေ၊ မီးကို စက္ကူနှင့် ဖုံးအုပ်ထား၍ ဘယ်သောအခါမျှ မရနိုင်ချေ။ တော်ဝင်ဆေးရုံ၏ အကြီးအကဲတစ်ဦးအနေဖြင့် အကယ်၍ ဤအမှုကိစ္စ ပေါ်ပေါက်လာမည့်နေ့ အမှန်တကယ် ရောက်ရှိလာပါက ဝူကျိရှန်းသည်လည်း တာဝန်ရှိမှုမှ ဘယ်လိုမှ လွတ်မြောက်နိုင်လိမ့်မည် မဟုတ်ပေ။

မိမိကိုယ်တိုင်အတွက်ကြောင့် ဖြစ်လျှင်ပင် သူသည် ထိုကိစ္စရပ်ကို ဦးဆောင်၍ စုံစမ်းစစ်ဆေးရမည် ဖြစ်သည်။ အကယ်၍ နန်းတော်က စုံစမ်းစစ်ဆေးသည်အထိ ထားလိုက်ပါက အလွန်အမင်းနောက်ကျသွားလိမ့်မည်.ဖြစ်သည်။

“ကောင်စုတ်လေး”

ရှန့်ချူရုံသည် ဒေါသချောင်းချောင်း ထွက်‌နေပြီး သခင်လေးကျင်းကို လှဲကျသွားအောင် ကန်ကျောက်လိုက်ပြီးနောက် ခုံတန်းလျားအနိမ့်တစ်ခုကို ကောက်ယူကာ ရက်ရက်စက်စက် ရိုက်နှက်တော့ရာ သခင်လေးကျင်းမှာ မြေပြင်ပေါ်တွင် အလူးလူးအလှိမ့်လှိမ့်ဖြစ်‌နေတော့သည်။

"လျိုမိသားစုဆေးဆိုင်ကို မီးရှို့တယ် ဟုတ်လား၊ လူအသက်ပေါင်း တစ်ဒါဇင်ကျော်ကို နင်က ဘယ်လိုတောင် လုပ်ရဲရတာလဲ"

သခင်လေးကျင်းသည် သူဌေးသား သုံးဖြုန်းသူတစ်ဦး ဖြစ်သဖြင့် မြေတောင်မြှောက်ပေးသည့်ရှန့်ချူရုံကိုအားကိုးကာမကြာခဏဆိုသလို စည်းမဲ့ကမ်းမဲ့ရမ်းကားတတ်ပြီး မည်သည့်နည်းလမ်းကိုမဆို အသုံးပြုလေ့ရှိသူဖြစ်သည်။

သို့သော် ယခုတစ်ကြိမ်တွင်သူသည် အတိုင်းအထက်အလွန် ကျူးလွန်မိသွားခဲ့ပြီ ဖြစ်၏။

“ဦးလေး၊ ကျွန်‌တော့်ရဲ့ ရှင်းပြချက်ကို အရင်ဆုံး နားထောင်ပါဦး”

သခင်လေးကျင်းသည် မိမိမျက်နှာမှ သွေးများကိုပင် မသုတ်ဝံ့ဘဲ ကြမ်းပြင်ပေါ်တွင်သာဝပ်တွား ဦးချနေတော့သည်။

"ကျွန်တော် သေချာ စုံစမ်းစစ်ဆေးပြီးပါပြီ။ အဲဒီလျိုဟန်လျန်က ဝူကျိရှန်းရဲ့ အိမ်ကို တိတ်တဆိတ် သွားခဲ့ပါတယ်။ သူက ပြဿနာရှာဖို့ လုပ်နေတာ သေချာတယ်၊ ဒီလို ဘေးဒုက္ခရဲ့ အမြစ်တွယ်မှုကို ဒီအတိုင်း ချန်ထားလို့ မဖြစ်ပါဘူး"

လျိုဟန်လျန်က ဝူကျိရှန်းနှင့် ဆက်သွယ်မှု ရှိနေခဲ့တယ် ဟုတ်လား။ ပြီးတော့ ဝူကျိရှန်းရဲ့ အိမ်ကိုတောင် သွားခဲ့သေးတယ် ဟုတ်လား။

ရှန့်ချူရုံသည် အခြေအနေ မည်သို့ရှိသည်ကို အကြမ်းဖျင်းအားဖြင့် နားလည်သွားတော့သည်။လျိုဟန်လျန်က ပိုက်ဆံရရှိရန်အတွက် အတွင်းရေးအချို့ကို ဖွင့်ဟခဲ့ခြင်း ဖြစ်ရမည်ဖြစ်ပြီး ထို့ကြောင့်ပင် ဝူကျိရှန်းက အန်ကုန်းနျူးဟန်ဆေးလုံးများကို စတင်စုံစမ်းစစ်ဆေးခဲ့ခြင်း ဖြစ်ပေလိမ့်မည်။

“လျိုဟန်လျန်က တစ်စုံတစ်ခုကို သိနေခဲ့ရင်တောင် သူ့မှာ ခိုင်လုံတဲ့ သက်သေအထောက်အထား မရှိပါဘူး။ သူက ငါ့ကို ဘာလုပ်နိုင်မှာလဲ”

လျိုဟန်လျန်သည် ဝူကျိရှန်းထံ သတင်းပို့ခဲ့သော်လည်း တော်ဝင်ဆေးရုံသည် ကျောက်တုံးကြီးတစ်ခုကဲ့သို့ ခိုင်မာလှပေသည်။ ဝူကျိရှန်းအနေဖြင့် မည်သည့် ခိုင်လုံသော သက်သေကိုမျှ ရရှိနိုင်မည်မဟုတ်သဖြင့် အမှန်တကယ်တော့ အလွန်အမင်း စိုးရိမ်ပူပန်နေရန် မလိုအပ်ချေ။

“အဲဒီဝူကျိရှန်းက သံသယဝင်နေပြီ ။ဒီကိစ္စကို ခက်ခက်ခဲခဲ ဖုံးကွယ်ထားရတာကို နင်က လျိုမိသားစုဆေးဆိုင်ကို မီးရှို့ပစ်လိုက်တယ်။ ဒါက တော်ဝင်ဆေးရုံမှာ ပြဿနာရှိနေပါတယ်လို့ သူ့ကို အတိအလင်း သွားပြောလိုက်တာနဲ့ မတူဘူးလား”

ရှန့်ချူရုံက ဒေါသတကြီး အော်ဟစ်လိုက်သည်။

"နင်က အဖျက်လုပ်ငန်းကလွဲရင် ဘာမှမတတ်တဲ့ အသုံးမကျတဲ့ကောင်ပဲ။ ဒါတွေအားလုံးဟာ နင့်ကြောင့် ဖြစ်ရတာ"

“ကျွန်တော်ကကာကွယ်ဖို့ မီးရှို့လိုက်ရတာပါ”

သခင်လေးကျင်းက မိမိကိုယ်ကိုယ် ခံရသူတစ်ဦးကဲ့သို့ သနားစရာကောင်းအောင် ပြောလိုက်သည်။

"အဲဒီခွေးသူခိုး လျိုဟန်လျန်က ဝူကျိရှန်းကို သတင်းပေးနေတာ။ ဦးလေးကို အန္တရာယ်မပြုနိုင်ဘူးဆိုပေမဲ့ သူက ပုန်းကွယ်နေတဲ့ အန္တရာယ်တစ်ခု ဖြစ်နေတုန်းပဲ။ သူ့ကို စောစောစီးစီး ဖယ်ရှားပစ်လိုက်တာက ပိုကောင်းပါတယ်..."

လျိုဟန်လျန်၏ တိုင်ကြားမှုကြောင့် ၎င်းတို့အနေဖြင့် အသင့်ပြင်ဆင်ထားသော အန်ကုန်းနျူးဟန်‌ ဆေးလုံးသေတ္တာပေါင်း နှစ်ထောင်ငါးရာကို မီးရှို့ဖျက်ဆီးပစ်လိုက်ရသည်။ ကြီးမားလှ‌သောဆုံးရှုံးမှုကြီး ဖြစ်ပေသည်။

ရှဲ့ထျန်းယင်း၏ တိတ်တဆိတ် ကူညီမှုကို ကျေးဇူးတင်ရန်အတွက် ၎င်းတို့အနေဖြင့် ငွေပြားတစ်ထောင်ကိုလည်း လက်ဆောင်ကြေးအဖြစ် ရိုရိုသေသေ ပေးအပ်ခဲ့ရသေးသည်။ အကယ်၍ လျိုဟန်လျန်ကို မဖယ်ရှားပစ်ပါက သူသည် သေချာပေါက် ဆက်လက်၍ တိုင်ကြားနေဦးမည်ဖြစ်ရာ ထိုအချိန်ကျမှ မည်မျှအထိ ဆုံးရှုံးမှုများ ကြုံတွေ့ရဦးမည်ကို မည်သူမျှ မသိနိုင်ချေ။

၎င်းတို့သည် တွက်ချက်၍ရသော ရှင်းလင်းသည့် စာရင်းများ ဖြစ်ကြ၏။ အရေးကြီးဆုံးအချက်မှာ ယခုနှစ်၏ အခွန်ဆက်ဆေးဝါးများသည် ပစ္စည်းစစ်များ ဖြစ်ရမည် ဖြစ်သည်။ ၎င်းတို့အနေဖြင့် အရည်အသွေးညံ့သော ပစ္စည်းများကို အရည်အသွေးကောင်းပစ္စည်းများအဖြစ် အတုအပ ပြုလုပ်ရန် မဝံ့ရဲကြတော့သဖြင့် ဝင်ငွေအမြောက်အမြား ဆုံးရှုံးရတော့မည်ဟူသော အဓိပ္ပာယ်ပင် ဖြစ်သည်။

ရှန့်ချူရုံသည် တစ်စုံတစ်ယောက်၏ စီးပွားရေးလမ်းကြောင်းကို ဖြတ်တောက်ခြင်းသည် မိဘကို သတ်ခြင်းနှင့် တူသည်ဟူသော သဘောတရားကို နားလည်ထားသည်။ ပြဿနာရှာတတ်သော လျိုဟန်လျန်ကို ဖယ်ရှားရမည်ကိုလည်း သူသိရှိသော်လည်း သခင်လေးဂျင်း၏ ဖြေရှင်းပုံမှာအလွန်အမင်း ရိုင်းစိုင်းလွန်းလှပေသည်။

မီးရှို့မှုနှင့်အတူ လူအသက်ပေါင်း တစ်ဒါဇင်ကျော် သေဆုံးခြင်းသည် လူအများ၏ အာရုံစိုက်မှုကို အလွန်အမင်း ရရှိစေခဲ့သည်။

" နင်က ဒီထက်ပိုပြီး သတိရှိရှိနဲ့ မလုပ်နိုင်ဘူးလား။သူ့ကို တိတ်တဆိတ် အဆိပ်ခတ်လိုက်တာဖြစ်ဖြစ်၊ မြစ်ကို ဖြတ်ကူးတဲ့အချိန်မှာ သူ့လှေကို မြုပ်ပစ်လိုက်တာဖြစ်ဖြစ်၊ ဒါမှမဟုတ် ဘာခြေရာလက်ရာမှ မကျန်အောင် ပျောက်ကွယ်သွားစေတာ ဖြစ်ဖြစ်၊ အဲဒီလိုလုပ်တာက ပိုပြီးမကောင်းဘူးလား"

ရှန့်ချူရုံသည် လူသတ်ခြင်းကို ဆန့်ကျင်ခြင်း မဟုတ်ချေ၊ သူသည် သခင်လေးကျင်း၏ သတ်ဖြတ်ပုံ နည်းလမ်းကိုသာ သဘောမတူခြင်းမျှသာ ရှိသည်။

“ဦးလေး၊ စိတ်ချပါ။ ကျွန်တော် ဒါကို ယုံကြည်စိတ်ချရတဲ့ လူယုံအချို့နဲ့ပဲ လုပ်ခဲ့တာပါ။ ဘယ်သူမှ ရှာမတွေ့နိုင်အောင် လုံခြုံမှုရှိပါတယ်လို့ အာမခံပါတယ်”

“နင်နဲ့အတူ မီးရှို့ခဲ့တဲ့ အဲဒီလူတွေကော...”

“သူတို့ကို ပိုက်ဆံအလုံအလောက်ပေးပြီး တခြားဒေသ အဝေးကြီး ပို့လိုက်ပါပြီ။ ဒီလှိုင်းလုံးတွေ ငြိမ်သက်သွားတဲ့အခါမှ သူတို့ ပြန်လာကြလိမ့်မယ်”

“နင် ဘာခြေရာလက်ရာမှ ချန်မထားခဲ့ဘူး မဟုတ်လား”

“လုံးဝ မရှိပါဘူး”

သခင်လေးကျင်းအနေဖြင့် နှုတ်ပိတ်ရန်အတွက် လူသတ်ခဲ့ခြင်းသည်ပထမဆုံးအကြိမ် မဟုတ်ချေ။ သူဘာလုပ်ရမည်ကို ကောင်းစွာ သိရှိနေသဖြင့် အာဏာပိုင်များက စုံစမ်းစစ်ဆေးလျှင်ပင် မည်သည့်အရာမျှ ရှာဖွေတွေ့ရှိနိုင်မည် မဟုတ်ပေ။

ရှန့်ချူရုံသည် သခင်လေးကျင်း၏ ကိစ္စရပ်များကို ကိုင်တွယ်ဖြေရှင်းနိုင်စွမ်းအပေါ် အတော်အတန် ယုံကြည်မှု ရှိပေသည်။

“ကောင်းပြီ၊ ဒါဆိုရင် ဒီကိစ္စက ဒီမှာတင် ပြီးသွားပြီ။ နောက်ဆိုရင် နင်ပိုပြီး သတိထားရမယ်၊ထင်ထင်ပေါ်ပေါ်နဲ့ မာနထောင်လွှားမနေနဲ့တော့...”

“ဟုတ်ကဲ့၊ ကျွန်‌‌တော်ဦးလေးရဲ့ ညွှန်ကြားချက်တွေကို ရင်ထဲမှာ အမြဲမှတ်သားထားပါ့မယ်”

ရှန့်ချူရုံ၏ မျက်နှာအမူအရာပြေလျော့သွားသည်ကို မြင်တွေ့လိုက်ရသဖြင့် သခင်လေးကျင်းသည် ရိုသေကျိုးနွံသော ပုံစံဖြင့်

"ဦးလေး၊ စိတ်မဆိုးပါနဲ့တော့။ ယခုနှစ် အခွန်ဆက်ဆေးဝါးကနေ ပိုက်ဆံမရနိုင်ဘူးဆိုပေမဲ့ နောက်နှစ်ကျရင်တော့ ရနိုင်တာပဲဟာ..."

“နင်က ဘာမှမသိဘူး”

ရှန့်ချူရုံက သူ၏ စိတ်ပျက်မှုကို လုံးဝ ဖုံးကွယ်မထားတော့ချေ။

"ဒီကိစ္စက ဝူကျိရှန်းကို အကြီးအကျယ် သတိပြုမိသွားစေမှာ သေချာတယ်။ ဝူကျိရှန်းက တော်ဝင်ဆေးရုံမှာ ရှိနေသရွေ့တော့ အခွန်ဆက်ဆေးဝါးကနေ ပိုက်ဆံပြန်ရဖို့ လုံးဝမတွေးနဲ့တော့။ အဲဒီဓနအင်အားရဲ့ လမ်းစကတော့ ပျောက်ဆုံးသွားပြီ"

“အဲဒီလိုဆိုရင် ဘာကြောင့်...”

သခင်လေးကျင်း၏ မျက်လုံးထဲတွင် ရက်စက်ကြမ်းကြုတ်သော အမူအရာများ ပေါ်ထွက်လာပြီး သတ်ဖြတ်မည့် အမူအရာပေါ်လာ၏။

"ဝူကျိရှန်းကိုပါ ဖယ်ရှားပစ်ပြီး အရာအားလုံးကို အဆုံးသတ်လိုက်တာကော"

“ပေါက်ကရတွေ၊ ဝူကျိရှန်းကို ဖယ်ရှားပစ်မယ် ဟုတ်လား။ နင်ကမြန်မြန်သေချင်နေတာလား”

ရှန့်ချူရုံသည် ဝူကျိရှန်းကို ဘယ်လိုမှ ဖယ်ရှားပစ်၍ မရနိုင်ကြောင်းကို ကောင်းစွာ သိရှိနေ၏။ သခင်လေးဂျင်း၏ စိတ်ကူးကို လုံးဝဖျက်ဆီးပစ်ရန်နှင့် သူအမှန်တကယ် မလုပ်မိစေရန်အတွက် သူသည် ပြတ်သားလှသော လေသံဖြင့် အလွန်ပြင်းထန်သော သတိပေးချက်တစ်ခုကို ချက်ချင်း‌ ပြောလိုက်သည်။

"အဲဒီဝူကျိရှန်းက ဧကရာဇ်မင်းမြတ် ကိုယ်တိုင် ခန့်အပ်ထားတဲ့ ညွှန်ကြားရေးမှူးချုပ်ပဲ။သူသာ အသတ်ခံရရင် အမှုကြီးတစ်ခု ဖြစ်လာမှာ အသေအချာပဲ။အဲဒီအချိန်ကျရင် နင်ပဲ မဟုတ်ဘူး၊ တော်ဝင်ဆေးရုံတစ်ခုလုံး ဇောက်ထိုးမိုးမျှော် ဖြစ်သွားလိမ့်မယ်။ နင်အဲဒီလိုလုပ်တာကို ငါလုံးဝ ခွင့်မပြုဘူး၊ နားလည်လား"

“ကျွန်တော် နားလည်ပါပြီ”

သခင်လေးကျင်းတွင် အပြစ်အနာအဆာပေါင်း ထောင်ချီရှိနေသော်လည်း သူ့တွင် ကြီးမားသော အားသာချက်တစ်ခု ရှိနေသည်မှာ သူသည် စကားနားထောင်ခြင်း ဖြစ်၏။ သူသည် ရှန့်ချူရုံ၏ ညွှန်ကြားချက်များကို ဘယ်သောအခါမျှ ဆန့်ကျင်ဝံ့လိမ့်မည် မဟုတ်ပေ။

*********