အခန်း ၂၂၂၁

အခန်း (၂၂၂၁) ထိုက်ရှီ သေဆုံးရမည့် အချိန်

လွန်ခဲ့သော နှစ်ဝက် ကျော်ခန့်ကတည်းက သိန်းငှက်အိုကြီးမှာ မြောက်ဘက် ဝင်ရိုးစွန်းဒေသမှနေ၍ အလွန် ထူးခြားလှသော ဝင်ရိုးစွန်း ငှက်တစ်မျိုးကို ဖမ်းဆီး ရမိခဲ့သည်။ ၎င်းမှာ အအေးဒဏ်ကို အလွန်အမင်း ခံနိုင်ရည် ရှိလှပေသည်။ ထို့ပြင် သိန်းငှက်အိုကြီးအနေဖြင့် ဝမ်ချောင်ထံမှ ဧရာမ ရေခဲခေတ်ကြီးနှင့် ပတ်သက်၍ အစောကြီးကတည်းက သိရှိထားခဲ့ပြီ ဖြစ်ရာ၊ လွန်ခဲ့သော အချိန်အတော်ကြာကတည်းက အလွန်အမင်း အေးစက်လှသော ရာသီဥတုမျိုးတွင် ပျံသန်းနိုင်စွမ်းရှိပြီး၊ တစ်ချိန်တည်းမှာပင် သတင်းများ စုံစမ်းထောက်လှမ်းနိုင်ကာ သတင်း ပေးပို့နိုင်သည့် အထူး သိမ်းငှက် အဖွဲ့ငယ်တစ်ခုကို လေ့ကျင့်ပေးရန် စတင်ကြိုးပမ်းနေခဲ့ပြီ ဖြစ်သည်။

ယခုအခါ လေ့ကျင့်မှု ရလဒ်များမှာ အပြည့်အဝ ပေါ်ထွက်လာခဲ့ပြီ ဖြစ်သည်။ လက်ရှိ အခြေအနေမျိုးတွင် မဟာထန်ဘက်မှ စုံစမ်းထောက်လှမ်းရေး လုပ်ငန်းစဉ်များ အားလုံးနီးပါးမှာ သိန်းငှက်အိုကြီး၏ ဤသိမ်းငှက်များမှတစ်ဆင့်သာ လုံးဝပြီးမြောက် အောင်မြင်နေခြင်း ဖြစ်သည်။

သိန်းငှက်အိုကြီး၏စကားကို ကြားလိုက်ရသည့်အခါ ဘေးပတ်ဝန်းကျင်ရှိ ဝမ်ကျုံးစစ်၊ ကျန်းရှို့ကွေး၊ အာပုစစ်နှင့် အခြားသူများ အားလုံးမှာ မျက်ခုံးများ ကြုတ်သွားကြပြီး ရင်ထဲ၌ အလွန်အမင်း လေးလံသွားတော့သည်။ နိုင်ငံအသီးသီးဘက်မှ တိုးတက်မှု အခြေအနေများမှာ သူတို့ တွေးတောထားသည်ထက် များစွာပိုမိုမြန်ဆန်နေခဲ့ရာ ဤအရာမှာ မဟာထန်အတွက် သတင်းကောင်း တစ်ခု လုံးဝမဟုတ်ပါချေ။

မသိစိတ်က ခိုင်းစေမှုအရ ဗိုလ်ချုပ်များအားလုံးမှာ ခေါင်းလှည့်ကာ ရှေ့တည့်တည့်တွင် ရပ်နေသော ဝမ်ချောင်ကို လှမ်းကြည့်လိုက်ကြသည်။ သို့သော် ဝမ်ချောင်၏ မျက်နှာအမူအရာကို မြင်တွေ့လိုက်ရသည့် မျက်တောင်တစ်ခတ် အတွင်းမှာပင် လူတိုင်း မှင်တက်သွားကြတော့သည်။

ဝမ်ချောင်၏မျက်နှာအမူအရာမှာ အလွန်ပင် အေးဆေးတည်ငြိမ်နေခဲ့ပြီး အနည်းငယ်မျှပင် ဂရုစိုက်နေပုံ မပေါ်ပါချေ။

"နားလည်ပြီ"

ဝမ်ချောင်က အေးဆေးတည်ငြိမ်စွာဖြင့် ဆိုလိုက်ရာ လူတိုင်း၏ရင်ထဲ၌ အလွန်အမင်း အံ့ဩသွားကြတော့သည်။

လက်ရှိ အင်ပါယာ၏ အခြေအနေမှာ မည်သူတစ်ဦးတစ်ယောက်ကမျှ မသိရှိသူ မရှိလောက်အောင်ပင် ဖြစ်သည်။ အခြေအနေများမှာ လုံးဝအကောင်းမြင်နိုင်စွမ်း မရှိပါချေ၊ နန်းတွင်း ဘက်တွင်ဖြစ်စေ အရှေ့မြောက်ပိုင်း ရှေ့တန်းတွင်ဖြစ်စေ အချိန်အကြာကြီး တောင့်ခံထားနိုင်တော့မည် မဟုတ်ပါချေ၊ ဝမ်ချောင်အနေဖြင့် မည်သူ့ထက်မဆို ပို၍နားလည် သိရှိထားသင့်ပေသည်။ သို့သော် သူ အဘယ်ကြောင့် ဤမျှလောက် အေးဆေးတည်ငြိမ်နေသနည်း ဆိုသည်ကိုမူ မည်သူကမျှ မသိရှိနိုင်ကြပါချေ။

"သိပ်မမြန်သေးဘူး၊ သိပ်လည်း အလျင်လို မနေသေးဘူး။ ဒါက ငါတို့ နောက်ဆက်တွဲ လှုပ်ရှားမှုတွေအတွက်တောင် အကျိုးမရှိ ဖြစ်သွားနိုင်တယ်။ ယိုကျိုးဘက်မှာတော့ အခု နှင်းတွေ၊ ရေခဲတွေ ဖုံးလွှမ်းနေပြီဆိုတော့၊ ရိက္ခာ ဖြစ်ဖြစ်၊ အအေးဒဏ် ကာကွယ်ရေး ပစ္စည်းတွေဖြစ်ဖြစ် သူတို့ရဲ့ အခြေအနေက ငါတို့ထက် ပိုပြီးတော့တောင် ဆိုးရွားနေဦးမယ်"

"ယိုကျိုးက စစ်အစီအရင်က အအေးဒဏ်ကို လုံးဝအပြည့်အဝ မကာကွယ်ပေးနိုင်ပါဘူး"

ဝမ်ချောင်၏အကြည့်များမှာ ရှေ့တည့်တည့်ကို အဝေးသို့ လှမ်းကြည့်နေခဲ့သည်။

လူတိုင်း၏ မျက်နှာအမူအရာများ မှင်တက်သွားကြပြီး တစ်ခုခုကို စဉ်းစား တွေးတောနေကြတော့သည်။

မှန်ပေသည်၊ နိုင်ငံအသီးသီး မဟာမိတ်တပ်ဖွဲ မှာ ယခုအချိန်တွင် အစွမ်းထက်နေပြီး စစ်ပွဲ၏ ဟန်ချက်ကို လုံးဝဖျက်ဆီးပစ်နိုင်စွမ်းရှိသည့် ရွဲလော့ဟယ်တပ်ဖွဲ့ကို ပိုင်ဆိုင်ထားသည် ဆိုသော်ငြားလည်း၊ အခြားတစ်ဖက်တွင် နိုင်ငံအသီးသီး မှ စစ်တပ်များကို အသုံးပြုထားခြင်းမှာ မိသားစုလိုက် အားလုံးပါဝင်လာကြခြင်းဖြစ်ရာ အစာစားမည့် ပါးစပ်ပေါင်း မရေမတွက်နိုင်အောင် ပိုမိုများပြားလာခြင်းပင် ဖြစ်တော့သည်။

နိုင်ငံအသီးသီး၏ လက်ရှိအခြေအနေမှာ မူလကတည်းက ရိက္ခာ အလွန်အမင်း ရှားပါး ပြတ်လပ်နေသော အခြေအနေ မျိုးတွင် ရှိနေခဲ့ရာ၊ ဤကဲ့သို့သော အခြေအနေမျိုးတွင် သူတို့သည် မဟာထန်ထက် ပို၍ပင် လျင်မြန်စွာ တောင့်ခံနိုင်စွမ်းမရှိ ဖြစ်လာကြပေလိမ့်မည်။

ထို့ပြင် စုံစမ်းထောက်လှမ်းရရှိသော အခြေအနေများအရ ကြည့်မည်ဆိုပါက၊ အမည်းရောင်ဝတ်စုံဝတ် အဖွဲ့အစည်းက ယိုကျိုးတွင် တည်ဆောက်ထားသော ထို ဧရာမ မဟာစစ်အစီအရင်ကြီးမှာ အအေးဒဏ်အများစုကို ကာကွယ်ပေးနိုင်သည် ဆိုသော်ငြားလည်း၊ ယိုကျိုး၏ နယ်နိမိတ် အတွင်း၌ ရာသီဥတု လေးမျိုးစလုံး နွေဦးပေါက် ရာသီအလား နွေးထွေးနေမည်ဟု ဆိုလိုခြင်း လုံးဝ မဟုတ်ပါချေ။

နိုင်ငံအသီးသီးမှ ပြည်သူများအတွက် အအေးဒဏ်ကို ကာကွယ်ရန် ပစ္စည်းများ လိုအပ်နေဆဲပင်ဖြစ်ရာ၊ ဤအချက်နှင့် ပတ်သက်၍ နိုင်ငံအသီးသီးဘက်တွင် လုံးဝကြိုတင် ပြင်ဆင်မှု မရှိခဲ့ပါချေ။

မဟုတ်ပါ၊ ရယူနိုင်သော ပစ္စည်းများပင်လျှင် လုံးဝမရှိခဲ့ပါဟု ဆိုရပေမည်၊ ကြီးမားကျယ်ပြန့်ပြီး အဆုံးအစမရှိသော "မြက်ခင်းပြင်ကြီးပေါ်မှ မြက်ခင်းစိမ်းစိမ်းလေးများ" ပြည့်နှက်နေသော တာ့ခ် မဟာမြက်ခင်းပြင်ပေါ်တွင် အအေးဒဏ်ကို ကာကွယ်ရန် အသုံးပြုနိုင်သည့် အရာများ လုံးဝ မရှိခဲ့ပါချေ။

ဤအချက်နှင့် ပတ်သက်၍ နိုင်ငံအသီးသီးမှာ အမှန်တကယ်ပင် မဟာထန်ထက် ပိုမို၍ အလျင်လိုနေကြပေသည်။

"ဒါဆိုရင် ငါတို့ နောက်ပိုင်း ဘယ်လို ဆက်လုပ်ကြမလဲ"

မင်းဆရာ ဝမ်ကျုံးစစ်က မေးမြန်းလိုက်တော့သည်။

ဤတစ်ကြိမ် စစ်ဆင်ရေး အစီအစဉ်နှင့် ပတ်သက်၍ ဝမ်ကျုံးစစ်၊ ကျန်းရှို့ကွေး၊ အာပုစစ်တို့အားလုံး အများအပြား သိရှိထားကြသည် ဆိုသော်ငြားလည်း၊ အပြည့်အစုံသော စစ်ဆင်ရေး အစီအစဉ်ကိုမူ ဝမ်ချောင်တစ်ဦးတည်းသာလျှင် သိရှိထားပေသည်။ ဝမ်ချောင်တစ်ဦးတည်းတွင်သာ ယုံကြည်မှု ရှိနေပြီး၊ လူတိုင်းမှာ ဤစစ်ပွဲကြီးကို သေချာပေါက် အနိုင်ရမည်ဟူသော ယုံကြည်ချက်ဖြင့်သာ တိုက်ခိုက်နေကြခြင်း ဖြစ်သည်။

"မလောပါနဲ့၊ အရာရာတိုင်းကို အရင်တိုင်းပဲ ဆက်လုပ်ကြမယ်။ ဒီလို အချိန်မျိုးမှာ ပိုပြီးတော့ အေးအေးဆေးဆေး နေရမယ်၊ ငါတို့ ပိုပြီးတော့ အေးအေးဆေးဆေး နေနိုင်လေ၊ ယိုကျိုးဘက်က ပိုပြီးတော့ အလျင်လိုလာလေ ဖြစ်လိမ့်မယ်"

ဝမ်ချောင်၏အကြည့်များမှာ အလွန်ပင် ဝေးကွာနေခဲ့ပြီး သူ၏လက်ချောင်းများဖြင့် သံမဏိခံတပ်၏ မြို့ရိုးပေါ်တွင် ဖွဖွလေး နှစ်ချက် ခေါက်လိုက်ရာ၊ သူ၏စကားလုံးများအတွင်းမှ အလွန်အမင်း အစွမ်းထက်လှသော ယုံကြည်ချက်တစ်ခု ပေါက်ကွဲထွက်ပေါ်လာတော့သည်။

အရှေ့မြောက်ဘက် ယိုကျိုး၏ ဤစစ်ပွဲကြီးမှာ ကုန်းမြေလောကတစ်ခုလုံးတွင် နောက်ဆုံး ဖြစ်ပွားမည့် မင်းဆက်တို့၏ကံကြမ္မာစစ်ပွဲပင် ဖြစ်တော့မည်။

ဤတစ်ကြိမ်တွင် ဝမ်ချောင်အနေဖြင့် အဆင့်တိုင်း ခြေလှမ်းတိုင်းတွင် အလွန်ပင် ဂရုတစိုက် တွက်ချက်ကာ လှုပ်ရှားခဲ့ပြီးအဆင့်ဆင့် စုဆောင်းမှုများ ပြုလုပ်ခဲ့ရာ နောက်ဆုံးတွင် ဤနေရာသို့ ရောက်ရှိလာခဲ့ပြီ ဖြစ်သည်။ မဟာထန်မှာ ကပ်ဘေး အကြိမ်ကြိမ် ဖြတ်သန်းခဲ့ရသော်လည်း ယခင်ဘဝကကဲ့သို့ ကျဆင်းသွားမည့် လမ်းကြောင်းပေါ်သို့ ရောက်ရှိမသွားခဲ့ဘဲ၊ ယခင်အချိန်များ အားလုံးထက် များစွာပိုမိုအင်အား ကြီးမားလာခဲ့ပြီ ဖြစ်သည်။

သူ ဤနေရာတွင် မတ်မတ်ရပ်နေသရွေ့ အန်းလုရှန်းအား ပုန်ကန်ရန် အခွင့်အရေး အနည်းငယ်မျှ လုံးဝပေးမည် မဟုတ်ပါချေ။

"ခီးးးးး"

တွေးတောနေစဉ် အတွင်းမှာပင် သိမ်းငှက်၏စူးရှလှသော အော်ဟစ်သံကြီးတစ်ခုမှာ လေပြင်းများကို ထိုးဖောက်လျက် ကောင်းကင်ယံ အနက်ပိုင်းမှနေ၍ ရုတ်တရက် ထွက်ပေါ်လာခဲ့ရာ၊ ထိုအသံမှာ ယခင်အချိန်များ အားလုံးနှင့် လုံးဝကွဲပြားခြားနားနေတော့သည်။

ဝမ်ချောင်၏ မျက်ခုံးများ ကြုတ်သွားခဲ့ပြီး မသိစိတ်ဖြင့် ခေါင်းလှည့်ကာ အနောက်ဘက်ရှိ သိန်းငှက်အိုကြီးကို လှမ်းကြည့်လိုက်တော့သည်။

"မကောင်းတော့ဘူး၊ နှင်းသိမ်းငှက်ရဲ့ သတင်းပို့ချက်အရ အရာတစ်ခုခုက ငါတို့ဆီကို..."

သိန်းငှက်အိုကြီး၏ မျက်လုံးများ လင်းလက်သွားခဲ့ပြီး ကောင်းကင်ယံကို မော့ကြည့်လျက် အလွန်အမင်း အံ့ဩထိတ်လန့်နေတော့သည်။

သိန်းငှက်အိုကြီး မွေးမြူထားသော သိမ်းငှက်များမှာ သတင်းများ စုံစမ်းထောက်လှမ်းရာတွင် အခြားမည်သူ့ထက်မဆို အဆများစွာ သာလွန်လှပေသည်။ သူ တီထွင်ဖန်တီးထားသော ထူးခြားလှသည့် "သိမ်းငှက် အလံပြ သင်္ကေတများ"မှာ အလွန်ပင် ကျယ်ပြန့်ပြီး အလွန်အမင်း အသေးစိတ်ကျလှပေသည်။

သို့သော် သိမ်းငှက်များမှာ လူများ မဟုတ်ကြပါချေ၊ လူများကဲ့သို့ လွတ်လပ်စွာ ဖော်ပြနိုင်စွမ်း မရှိကြပါချေ။ အချို့သော အရာများကို သိမ်းငှက်များအနေဖြင့် အလားတူပင် ဖော်ပြနိုင်စွမ်း မရှိကြပါချေ။ ယခု သိမ်းငှက်မှ ထုတ်လွှတ်လိုက်သော အသံကို သိန်းငှက်အိုကြီး ကိုယ်တိုင်ပင်လျှင် ယခင်က တစ်ခါမျှ မကြားဖူးခဲ့ပါချေ။ သူ သတ်မှတ်ထားသော အလံပြ သင်္ကေတများထဲတွင်လည်း လုံးဝပါဝင်ခြင်း မရှိပါချေ။

သိန်းငှက်အိုကြီး၏ စကားပင် မဆုံးသေးမီ သနားစရာကောင်းလောက်အောင် အော်ဟစ်သံကြီးတစ်ခုနှင့်အတူ၊ ကောင်းကင်ယံရှိ ထိုနှင်းသိမ်းငှက်၏ အော်ဟစ်သံမှာ ရုတ်တရက် ရပ်တန့်သွားတော့သည်။

မျက်တောင်တစ်ခတ်မျှ အချိန်လေး အတွင်းမှာပင် သိန်းငှက်အိုကြီး၏ မျက်နှာအမူအရာမှာ ရုတ်တရက် ပြောင်းလဲသွားတော့သည်။

သို့သော် ဤအရာများမှာ လုံးဝပြီးဆုံးသွားခြင်း မရှိသေးပါချေ၊ မျက်တောင်တစ်ခတ်မျှ အချိန်လေး အတွင်းမှာပင် ဝမ်ချောင်၏ မျက်နှာအမူအရာမှာ လေးနက်သွားခဲ့ပြီး အရာတစ်ခုခု ကို တစ်ပြိုင်နက်တည်း သတိပြုမိသွားခဲ့ကာ၊ မျက်နှာချင်းဆိုင်ရှိ နှင်းမုန်တိုင်း များ၏ အနက်ပိုင်း ကို စိုက်ကြည့်လျက် အနည်းငယ်မျှ မလှုပ်မယှက် ရပ်နေတော့သည်။

"ဝုန်း ဝုန်း ဝုန်း"

အစပိုင်းတွင် လူတိုင်းအနေဖြင့် မည်သည့် အရာကိုမျှ သတိမပြုမိကြသေးပါချေ။ သို့သော် လျင်မြန်စွာပင် မိုးကြိုးသံအလား ပြင်းထန်လှသော မြည်ဟည်းသံကြီးတစ်ခုမှာ အဝေးမှနေ၍ အနီးသို့ မယုံနိုင်စရာ ကောင်းလောက်အောင် မြန်ဆန်လှသော အရှိန်ဖြင့် သံမဏိမြို့တော်ရှိရာ အရပ်ဆီသို့ ပြေးဝင်လာတော့သည်။

ထိုအသံမှာ အစပိုင်းတွင် ရှိနေသလိုလို မရှိသလိုလို ဖြစ်နေသေးသော်လည်း၊ မျက်တောင်တစ်ခတ် အတွင်းမှာပင် နားကွဲမတတ် ဆူညံသွားခဲ့ပြီး ကောင်းကင်နှင့် မြေကြီး တစ်ခုလုံးတွင် ပဲ့တင်ထပ်သွားတော့သည်။ လူတိုင်း၏ အကြည့်များ အောက်တွင် ရက်စက်ကြမ်းတမ်းလှသော စွမ်းအင်တစ်ခုမှာ လိမ့်ဆင်းလာသော နှင်းလုံးကြီး တစ်ခုအလား၊ လုံးဝဖျက်ဆီးပစ်နိုင်စွမ်း ရှိသည့် ခွန်အားများကို သယ်ဆောင်လျက် မိုးကြိုးလျှပ်စီးနှယ် မြန်ဆန်လှသော အရှိန်ဖြင့် လူတိုင်းရှိရာ အရပ်ဆီသို့ တစ်ဟုန်ထိုး ပြေးဝင်လာတော့သည်။

"ထိုက်ရှီ"

ဝမ်ချောင်၏မျက်လုံးသူငယ်အိမ်များ ကျုံ့သွားခဲ့ပြီး အကြည့်များမှာ လုံးဝအေးစက်သွားတော့သည်။

သူ၏ အနောက်ဘက်ရှိ ဝမ်ကျုံးစစ်နှင့် အခြားသူများ အားလုံး၏ မျက်နှာအမူအရာများလည်း အသီးသီး ပြောင်းလဲသွားကြတော့သည်။ ထိုစွမ်းအင်၏ အဆင့်အတန်းမှာ အလွန်အမင်း ကြီးမားလှပေရာ အင်ပါယာ၏ ဗိုလ်ချုပ်အဆင့်ကိုပင် ကျော်လွန်နေပြီ ဖြစ်သည်။ ဤမျှလောက် ပြင်းထန်လှသော တိုက်ခိုက်မှုမျိုးကို လူတိုင်း အနေဖြင့် လုံးဝတောင့်ခံနိုင်စွမ်း မရှိပါချေ။

ပေ သုံးထောင်

ပေ နှစ်ထောင်

ပေ ငါးရာ

......

ထိုလုံးဝ ဖျက်ဆီးပစ်နိုင်စွမ်း ရှိသည့် စွမ်းအင်၏အရှိန်မှာ အလွန်မြန်ဆန်လှပေသည်။ ထို့ပြင် လိမ့်ဆင်းလာသည့် ဖြစ်စဉ်အတွင်းမှာပင် ကောင်းကင်နှင့်မြေကြီးအကြားရှိ နှင်းမုန်တိုင်း စွမ်းအင်များ အတွင်းမှနေ၍ ခွန်အားများကို အဆက်မပြတ် စုပ်ယူနေခဲ့ရာ၊ သံမဏိခံတပ်သို့ ရောက်ရှိလာသည့်အချိန်တွင် ထိုစွမ်းအင်မှာ ပေ ရာနှင့်ချီ အချင်း ရှိသော အတိုင်းအတာအထိ ကြီးထွားလာခဲ့ပြီဖြစ်သည်။ ထိုအမြစ်ပြတ် ချေမှုန်းနိုင်စွမ်း ရှိသည့် အရှိန်အဝါကြီးကြောင့် လူတိုင်း၏ရင်ထဲ၌ အလွန်အမင်း ထိတ်လန့်သွားကြတော့သည်။

ဝမ်ချောင်တစ်ဦးတည်းသာ အေးဆေးတည်ငြိမ်စွာ နေနိုင်ခဲ့ပြီး မြို့ရိုးပေါ်တွင် တိတ်ဆိတ်စွာ မတ်မတ်ရပ်နေလျက် တားဆီးရန် အရိပ်အယောင် အနည်းငယ်မျှ လုံးဝ မရှိခဲ့ပါချေ။

နောက်ဆုံးတွင်…

"ဝုန်း"

ကမ္ဘာတုန်ဟိန်းမတတ် ပြင်းထန်လှသော မြည်ဟည်းသံကြီး တစ်ခုကိုသာ ကြားလိုက်ရပြီး၊ သံမဏိခံတပ်၏ မြို့ရိုးနှင့် မီတာ ဆယ်ကျော်ခန့် အကွာအဝေး တွင် ပုံသဏ္ဌာန်မဲ့သော အကာအကွယ် အမိုးအကာတစ်ခုမှာ သံမဏိများအလား ခိုင်မာစွာဖြင့် ရုတ်တရက် ပေါ်ထွက်လာခဲ့ပြီး ထို လုံးဝ ဖျက်ဆီးပစ်နိုင်စွမ်း ရှိသည့် စွမ်းအင် ဘောလုံး ကြီး ၏ ရှေ့တွင် တားဆီးလိုက်တော့သည်။

ပေါက်ကွဲသံကြီးတစ်ခု ထွက်ပေါ်လာခဲ့ပြီး ထိုလုံးဝဖျက်ဆီးပစ်နိုင်စွမ်းရှိသည့် စွမ်းအင်များမှာ ကောင်းကင်နှင့် မြေကြီးကို လွှမ်းခြုံသွားခဲ့ပြီး သံမဏိခံတပ်၏ ရှေ့တည့်တည့်တွင် ဖျက်ဆီးခြင်း လှိုင်းလုံးကြီးများ အမြောက်အမြားကို ဖြစ်ပေါ်စေခဲ့သည်။ သို့သော် ဖျက်ဆီးခြင်း လှိုင်းလုံးကြီးများအားလုံးမှာ ထိုပုံသဏ္ဌာန်မဲ့သော အကာအကွယ် အမိုးအကာ၏တားဆီးခြင်းကို ခံလိုက်ရတော့သည်။

သံမဏိခံတပ်၏ မြို့ရိုးပေါ်တွင် မဟာထန်၏ အင်ပါယာ ခေါင်းဆောင်ကြီးများ ကိုယ်ပေါ်ရှိ သံချပ်ကာများမှာ ချွင် ချွင် မြည်သံများနှင့်အတူ တုန်ခါသွားခဲ့ကြသည်။ သို့သော် မည်သူ တစ်ဦးတစ်ယောက်ကမျှ ဒဏ်ရာ ရရှိသွားခြင်း မရှိခဲ့ပါချေ။

"ထိုက်ရှီ... မင်းကိုယ်မင်း အမြဲတမ်း နတ်ဘုရား တစ်ပါးအဖြစ် သတ်မှတ်ထားတာ မဟုတ်ဘူးလား၊ နတ်ဘုရားတွေက ဒီလိုမျိုး နောက်ကွယ်ကနေ ခိုးကြောင်ခိုးဝှက် တိုက်ခိုက်တတ်တဲ့ လူယုတ်မာမျိုးတွေလား"

ဝမ်ချောင်က လက်နှစ်ဖက်ကို အနောက်တွင် ပိုက်ထားလျက် မတ်မတ်ရပ်နေခဲ့ပြီး ခေါင်းပေါ်ရှိ ဆံပင်ရှည်ကြီးများမှာ လေထဲတွင် လွင့်ပျံနေခဲ့ကာ၊ မျက်နှာချင်းဆိုင်ကို စိုက်ကြည့်ရင်း နှုတ်ဖွင့်ဆိုလိုက်တော့သည်။

မြို့ရိုး၏ မျက်နှာချင်းဆိုင်တွင် နှင်းမုန်တိုင်းများ ပြည့်နှက်နေခဲ့ပြီး လုံးဝတိတ်ဆိတ် ငြိမ်သက်နေခဲ့သည်။ သို့သော် လျင်မြန်စွာပင် အေးစက်စက် ရယ်မောသံတစ်ခု ထွက်ပေါ်လာတော့သည်။

"သေရမှာကို မကြောက်တဲ့ကောင်… သေရမယ့် အချိန် ရောက်နေတာတောင် မသိသေးဘူး၊ ဒီနတ်ဘုရားရဲ့ ရှေ့မှာများ ကြွားလုံးထုတ်ရဲသေးတယ်"

"ဟူးး"

ဤအသံနှင့်အတူ လေပြင်းများ ရက်စက်ကြမ်းတမ်းစွာ တိုက်ခတ်လာခဲ့ပြီး ကြီးမားကျယ်ပြန့်လှသော ခွန်အားတစ်ခုမှာ လေပြင်းမုန်တိုင်းကြီး တစ်ခုအလား အရပ်မျက်နှာ အားလုံးသို့ ပြင်းထန်စွာ ရိုက်ခတ်သွားခဲ့ရာ၊ ကောင်းကင်ယံအပြည့် နှင်းမုန်တိုင်းများ အကြား၌ ဟာလာဟင်းလင်းပြင်ကြီးတစ်ခုကို အတင်းအကျပ် ဖန်တီးလိုက်တော့သည်။

နောက်တစ်ခဏတွင် မြို့ရိုးပေါ်ရှိ လူတိုင်း၏မျက်နှာအမူအရာများ တင်းမာသွားကြပြီး၊ ပေ တစ်ရာကျော်ခန့် အကွာအဝေး ရှိ လေထဲတွင် ရပ်နေသော ထိုက်ရှီကို အားလုံး မြင်တွေ့လိုက်ရတော့သည်။

သူ၏ကိုယ်ပေါ်တွင် ရှေးဟောင်း ရွှေရောင် နတ်ဘုရား သံချပ်ကာကို ဆင်မြန်းထားဆဲဖြစ်ပြီး တစ်ကိုယ်လုံးမှ ကြီးမားကျယ်ပြန့်လှသော ဖိအားတစ်ခု အဆက်မပြတ် ထွက်ပေါ်နေခဲ့ရာ၊ ဝမ်ချောင်မှလွဲ၍ ကျန်ရှိနေသော လူတိုင်း၏ ရင်ထဲ၌ ကြီးမားကျယ်ပြန့်လှသော ဖိအား တစ်ခုကို ခံစားလိုက်ရတော့သည်။ သူ၏အေးစက်ပြီး စူးရှလှသော မျက်ဝန်းများမှာ တောက်ပလင်းလက်နေခဲ့ရာ ကြီးမားကျယ်ပြန့်လှသော နှင်းမုန်တိုင်းကြီးများပင်လျှင် ဖုံးကွယ်ထားနိုင်စွမ်း မရှိပါချေ။

ထိုက်ရှီမှာ မြို့ရိုးပေါ်ရှိ ဝမ်ချောင်ကို စိုက်ကြည့်နေခဲ့ပြီး ရင်ထဲရှိ အလွန်အမင်း ထင်ရှားလှသော သတ်ဖြတ်လိုစိတ်များကို အနည်းငယ်မျှ ဖုံးကွယ်ထားခြင်း မရှိပါချေ။

ဤသံမဏိခံတပ်ကြီးမှာ သူ တွေးတောထားခဲ့သည်ထက် များစွာပိုမို ခိုင်မာလွန်းလှသည်။ ခုနက တိုက်ခိုက်မှုတွင် သူ အနည်းဆုံး ခွန်အား ၇၀ ရာခိုင်နှုန်းခန့် အသုံးပြုခဲ့သည် ဆိုသော်ငြားလည်း နောက်ဆုံးတွင် ဤ မြို့ကြီး ကို အနည်းငယ်မျှပင် တုန်ခါသွားအောင် မပြုလုပ်နိုင်ခဲ့ပါချေ။

‘မြွေကိုက်ခံရဖူးရင် ဆယ်နှစ်လောက် ကြိုးမြင်တိုင်း လန့်တယ်’ မြို့တော်တွင် ဖြစ်ပွားခဲ့သော တိုက်ပွဲ၌ ထိုက်ရှီမှာ ဝမ်ချောင်က ရှန်းလျို မဟာစစ်အစီအရင်ကို အသုံးပြုကာ ရုပ်ပိုင်းဆိုင်ရာ ခန္ဓာကိုယ်ကို အမှုန့်ဖြစ်သွားအောင် ပေါက်ကွဲစေခဲ့ရာမှ၊ ဝိညာဉ်ပင်လျှင် လုံးဝပျောက်ကွယ်သွားလုနီးပါး ဖြစ်ခဲ့ရသည်။ ယခုအခါ ဤကဲ့သို့ ဧရာမ စစ်အစီအရင်မျိုးနှင့် ထပ်မံကြုံတွေ့ရပြန်ရာ မိမိကိုယ်ကို အန္တရာယ်အတွင်းသို့ အလွယ်တကူ ကျရောက်ခံဝံ့မည် မဟုတ်ပါချေ။

ဤမြို့ကြီးအတွင်း၌ ရှန်းလျို မဟာစစ်အစီအရင် မရှိဘူး ဆိုလျှင်တောင်မှ ထိုက်ရှီ အနေဖြင့် အလွယ်တကူ မစမ်းသပ်ဝံ့ပါချေ။

အခြားသော ထောင်ချောက် များ ထပ်ရှိနေမလား ဆိုတာ ဘယ်သူက သိနိုင်မှာလဲ။

ယခုအခါ ဝမ်ချောင်မှာ သံမဏိခံတပ် အတွင်း၌ ရှိနေပြီ ဖြစ်ရာ၊ ထိုက်ရှီအနေဖြင့် ကြွက်ကို ခဲနဲ့ ပစ်ချင်ပေမဲ့ ပန်းကန်လုံး ကွဲသွားမှာကို စိုးရိမ်နေရသကဲ့သို့ အလွယ်တကူ တိုက်ခိုက်ဝံ့ခြင်း မရှိပါချေ။

သူတို့ နှစ်ဦးမှာ ဤကဲ့သို့သော အလွန်အမင်း သိမ်မွေ့လှသည့် ရင်ဆိုင်နေရမှုနှင့် ကာကွယ်မှု အကြား၌ ရှိနေကြတော့သည်။

"အဓိပ္ပာယ် မရှိတာတွေ… တကယ်တမ်း သေရမယ့် အချိန် ရောက်နေတာက မင်းပဲ"

ဝမ်ချောင်က အေးစက်စက် ပြုံးလိုက်ပြီး လူတိုင်း၏တုန်လှုပ်နေသော အကြည့်များ အောက်တွင် ရုတ်တရက် ခြေလှမ်း တစ်လှမ်း ရှေ့သို့ လှမ်းထွက်လိုက်ရာ သံမဏိခံတပ် ၏ မြို့ရိုး နယ်နိမိတ် အတွင်းမှနေ၍ ချက်ချင်း ထွက်ခွာသွားတော့သည်။

ဤအလွန် ရိုးရှင်းလှသော လှုပ်ရှားမှုလေးက မျက်နှာချင်းဆိုင်ရှိ နှင်းမုန်တိုင်းများ အကြားတွင် ရှိနေသော ထိုက်ရှီ၏ မျက်လုံးသူငယ်အိမ်များကို ကျုံ့သွားစေခဲ့ပြီး မျက်နှာအမူအရာမှာ အနည်းငယ် ပြောင်းလဲသွားတော့သည်။

ဤသည်မှာ အလွန်အမင်း ထင်ရှားလှသော ရန်စမှုတစ်ခုပင် ဖြစ်သည်။ ခဏတာ လအနည်းငယ်မျှ အချိန်တိုလေး အတွင်းမှာပင် တစ်ချိန်က သူ၏မျက်လုံးထဲ၌ ပုရွက်ဆိတ် တစ်ကောင်အလား ဖြစ်နေပြီး လုံးဝအရေးမပါခဲ့သော လူငယ်လေးမှာ ဤကဲ့သို့သော အဆင့်တစ်ခု အထိ ကြီးထွားလာလိမ့်မည် ဟု သူ လုံးဝမတွေးတောထားခဲ့မိပါချေ။

မျက်နှာချင်းဆိုင်တွင် ဝမ်ချောင်က ထိုက်ရှီ၏ တုံ့ပြန်မှုများကို မျက်လုံးထဲတွင် အားလုံး သိမ်းဆည်းထားလိုက်ပြီး ရင်ထဲ၌ အထင်သေးစွာ ပြုံးလိုက်တော့သည်။

တစ်ချိန်က အခြေအနေနှင့် ယခုအခြေအနေမှာ လုံးဝမတူညီတော့ပါချေ။ လက်ရှိ ဝမ်ချောင်မှာ မရေမတွက်နိုင်သော သိုင်းပညာရှင်များ မော့ကြည့်ရလောက်အောင် ကြီးထွားလာခဲ့ပြီ ဖြစ်သည်။ ထိုက်ရှီကဲ့သို့သော ထိုက်မျိုးဆက်၏ ရှေးဟောင်း သိုင်းပညာရှင်များ၏ ရှေ့မှောက်တွင်ပင်လျှင် အနည်းငယ်မျှ နိမ့်ကျနေခြင်း လုံးဝမရှိတော့ပါချေ။

စစ်အစီအရင်၏ အကာအကွယ် လုံးဝမရှိဘူး ဆိုလျှင်တောင်မှ လက်ရှိ ဝမ်ချောင်မှာ ထိုက်ရှီကို ရင်ဆိုင်ရာတွင် အနည်းငယ်မျှ ကြောက်ရွံ့ခြင်း မရှိတော့ပါချေ။

"မင်း အခုထိ မသိလောက်သေးဘူး၊ အရှင်မင်းကြီး သေဆုံးမသွားခင်မှာ စာရွက်လေးတစ်ရွက် ချန်ထားခဲ့တယ်၊ အဲဒီအထဲမှာ မင်း သေရမယ့်အချိန်ကို သေချာတွက်ချက်ထားပြီးသားပဲ"

"အရင်တုန်းက မြို့တော် တိုက်ပွဲ တုန်းက မင်းကို ထွက်ပြေးခွင့် ပေးလိုက်တာက မင်း သေရမယ့် အချိန် မရောက်သေးလို့ပဲ၊ ဒါပေမဲ့ ဒီတစ်ကြိမ်မှာတော့ မင်း လွတ်တော့မှာ မဟုတ်ဘူး"

ဝမ်ချောင်က အေးစက်စွာ ဆိုလိုက်တော့သည်။

"…"

ဝမ်ချောင်၏ လွယ်ကူပေါ့ပါးစွာ ပြောဆိုလိုက်သော စကားတစ်ခွန်းကြောင့် မျက်နှာချင်းဆိုင်ရှိ ထိုက်ရှီ၏မျက်နှာမှာ ရွှီးခနဲ ဖြူရော်သွားခဲ့ပြီး ယခင်ကကဲ့သို့ အေးဆေးတည်ငြိမ်သော အမူအရာများ လုံးဝ ပျောက်ကွယ်သွားတော့သည်။

နတ်ဘုရား အဖွဲ့အစည်း၏ ခေါင်းဆောင် အဆင့်ရှိ ပုဂ္ဂိုလ်တစ်ဦးအနေဖြင့် 'ထိုက်' မျိုးဆက် အစွမ်းထက် သိုင်းပညာရှင် တိုင်းမှာ မိမိကိုယ်ကို အလွန်အမင်း အထင်ကြီးလေ့ ရှိကြသည်။ သာမန် လောက၏အင်ပါယာ အာဏာများ၊ ထိပ်တန်း အစွမ်းထက် သိုင်းပညာရှင်များ အပါအဝင် အားလုံးကို သူတို့မျက်လုံးထဲတွင် အနည်းငယ်မျှပင် ဂရုမစိုက်ကြပါချေ၊ သို့သော် နှစ်ပေါင်းများစွာ ကြာမြင့်ခဲ့သည့်တိုင်အောင် ချွင်းချက်တစ်ဦးတည်းသာ ရှိခဲ့ပေသည်။

ထိုသူမှာ သေဆုံးသွားခဲ့ပြီ ဖြစ်သော သူတော်စင်ဧကရာဇ် လီထိုက်ယီပင် ဖြစ်တော့သည်။

လီထိုက်ယီ၏ ခွန်အားမှာ အလွန် မြင့်မားလှသည်။ သို့သော် သူ၏ဉာဏ်ပညာနှင့် တွက်ချက်မှုများမှာ ပို၍ပင်ကြောက်မက်ဖွယ် ကောင်းလွန်းလှပေသည်။

နှစ်ပေါင်းများစွာ ကြာအောင် နတ်ဘုရား အဖွဲ့အစည်းအနေဖြင့် သူ့ကို သတ်ဖြတ်ရန် အမြဲတမ်း ကြိုးစားနေခဲ့ကြသည်။ သို့သော် လီထိုက်ယီမှာ အကြိမ်ကြိမ် တမင်တကာ အားနည်းချက်များ ပြသလေ့ ရှိသည်။

နတ်ဘုရား အဖွဲ့အစည်းဘက်မှ သေချာစွာ ကာကွယ်ထားခဲ့သည် ဆိုသော်ငြားလည်း အကြိမ်ကြိမ် လှည့်စားခံခဲ့ရဆဲပင် ဖြစ်သည်။ အဘယ်ကြောင့်ဆိုသော် လီထိုက်ယီ၏ နည်းလမ်းများမှာ အလွန်ပင် ပါးနပ်လွန်းလှသောကြောင့်ပင် ဖြစ်သည်။

နောက်ဆုံးတွင် စမ်းသပ်မှုများ ပြုလုပ်ခဲ့ပြီးနောက် နတ်ဘုရား အဖွဲ့အစည်း ၏ 'ထိုက်' မျိုးဆက် အစွမ်းထက် သိုင်းပညာရှင် အနည်းဆုံး နှစ်ဦးခန့်မှာ လီထိုက်ယီ၏လက်ထဲတွင် သေဆုံးသွားခဲ့ရပြီ ဖြစ်သည်။

ထိုက်ရှီမှာ မိမိကိုယ်ကို အလွန်အမင်း အထင်ကြီးသူတစ်ဦး ဖြစ်သည် ဆိုသော်ငြားလည်း လီထိုက်ယီကိုမူ အလွန်အမင်း ကြောက်ရွံ့နေခဲ့ရဆဲပင် ဖြစ်တော့သည်။

******