အခန်း ၂၂၃၀

အခန်း (၂၂၃၀) ရှီဘုရင်မ ရှုံးနိမ့်သွားခြင်း

အဝေးဆီရှိ အန်းလုရှန်းပင်လျှင် ဤအခိုက်အတန့်၌ မျက်ခွံများ လှုပ်ရှားသွားခဲ့ပြီး၊ ရှီဘုရင်မ၏ စွမ်းရည်များ ကြောင့် အလွန်အမင်း အံ့ဩတုန်လှုပ်သွားတော့သည်။

"မယုံနိုင်စရာပဲ... ဒီမိန်းမကို တကယ်ပဲ အထင်သေးမိသွားတာပဲ"

ခီတန်ဘုရင်က တိုးတိုးလေး ရေရွတ်လိုက်တော့သည်။

ဘေးနားရှိ ယွန်းဂျယ်စိုးမွန်းနှင့် ဝူဆူမစ်ရှ် ခါဂန်း အစရှိသူများမှာ စကားတစ်ခွန်းမျှ မဆိုကြသော်လည်း၊ မသိမသာ ခေါင်းညိတ်ပြလိုက်ကြတော့သည်။

နိုင်ငံအသီးသီး မဟာမိတ်တပ်ဖွဲ့အနေဖြင့် ရှီဘုရင်မ၏အပေါ်တွင် အမြဲတမ်း အနည်းနှင့်အများ ဆိုသလို အထင်သေးလေ့ ရှိကြသည်။ သို့သော် ဤအခိုက်အတန့်၌ ရှီဘုရင်မ ပြသလိုက်သော စွမ်းရည်များမှာ သူတို့ကိုပင် ကျော်လွန်နေလောက်ပြီ ဖြစ်ရာ၊ ဤနေရာတွင် ရှိနေသော လူတိုင်းကို အလွန်အမင်း အံ့ဩချီးကျူးသွားစေရန် လုံလောက်ပေသည်။

"ဟွန်း"

ရှီဘုရင်မက သူမကိုယ်တိုင် ဖန်တီးလိုက်သောလက်ရာကို ကြည့်ရင်း အလွန်အမင်း မာနထောင်လွှားသော မျက်နှာဖြင့် ဆိုလိုက်တော့သည်။

"ဘာစောင့်နေကြတာလဲ၊ မြန်မြန် သွားတိုက်ကြစမ်း"

"ဝုန်း"

အရပ်မျက်နှာ အားလုံးမှ အောင်ပွဲခံ အော်ဟစ်သံများ ထွက်ပေါ်လာခဲ့ပြီး၊ နောက်တစ်ခဏတွင် မရေမတွက်နိုင်သော စစ်မြင်းများမှာ ရေခဲမြစ်များပေါ်သို့ ခုန်တက်သွားကြပြီး မြို့ရိုးဆီသို့ တစ်ဟုန်ထိုး ပြေးဝင်သွားကြတော့သည်။

ရှီဘုရင်မမှာ လျင်မြန်စွာ လှည့်လိုက်ပြီး မြို့ရိုး ပေါ်ရှိ ဝမ်ချောင်ကို ရန်စသည့် အကြည့်ဖြင့် လှမ်းကြည့်လိုက်တော့သည်။

မင်းက ငါတို့ နိုင်ငံအသီးသီး ကို အထင်သေးနေတာ မဟုတ်ဘူးလား။ မင်းကိုယ်မင်း သေချာပေါက် အနိုင်ရမယ်လို့ ထင်နေတာ မဟုတ်ဘူးလား။ အခု မင်း ဘယ်လို လုပ်မလဲ ဆိုတာ ကြည့်ရသေးတာပေါ့။

နိုင်ငံအသီးသီး၏ စစ်တပ်ကြီးမှာ တစ်ဟုန်ထိုး ပြေးဝင်လာသည်ကို မြင်တွေ့လိုက်ရသည့်အခါ မြို့ရိုးပေါ်ရှိ လေထုမှာ ချက်ချင်းပင် အလွန်အမင်း တင်းမာလာတော့သည်၊ ထို သံမဏိများအလား ခိုင်မာလှသော ရေခဲ တံတားကြီးများကို ကြည့်ရင်း ကျန်းချိုးကျန့်ချုံးနှင့် အခြားသူများ၏ မျက်နှာအမူအရာများမှာ အလွန်အမင်း ဆိုးရွားလာကြတော့သည်။

"ဒီရှီဘုရင်မက အမြဲတမ်း ကြီးမားတဲ့ ပြဿနာကြီးတစ်ခု ဖြစ်နေတာပဲ"

ကျန်းချိုးကျန့်ချုံးက မျက်ခုံးများကို တင်းကျပ်စွာ ကြုတ်ရင်း ဆိုလိုက်တော့သည်။

ယခင်က ရှီဘုရင်မ၏ စွမ်းရည်များ အကြောင်းကို သူ ကြားဖူးခဲ့သည် ဆိုသော်ငြားလည်း၊ ထိုအချိန်က နောက်ကျမှ ရောက်ရှိလာခဲ့သဖြင့် ကိုယ်တိုင်မျက်မြင်ကိုယ်တွေ့ မမြင်တွေ့ခဲ့ရရာ ကြီးကြီးမားမား ခံစားချက် လုံးဝမရှိခဲ့ပါချေ။ သို့သော် ယခုအခါ သူမ၏ အလွန်အမင်း အံ့ဩတုန်လှုပ်ဖွယ် ကောင်းလှသော ရေခဲစွမ်းရည်ကို အသုံးပြုကာ သံမဏိခံတပ်၏ သဘာဝအတားအဆီးကြီးကို လုံးဝပျောက်ကွယ်သွားစေသည်ကို ကိုယ်တိုင်မြင်တွေ့လိုက်ရသည့်အခါတွင်မူ၊ ကျန်းချိုးကျန့်ချုံး၏ ရင်ထဲ၌ အလွန်အမင်း ကိုင်တွယ် ဖြေရှင်းရန် ခက်ခဲလှသည်ဟု ခံစားလိုက်ရပြီး စိုးရိမ်ပူပန်မှုများ အပြည့် ဖြစ်လာတော့သည်။

"ငါနဲ့ ကျန်းချို ညီအစ်ကို အတူတူ သွားပြီး ဒီရေခဲမြစ်တွေကို ဖြေရှင်းလိုက်ကြရအောင်"

ထိုအချိန်မှာပင် အချိန်အတော်ကြာအောင် စကားမပြောဘဲ နေခဲ့သော မင်းဆရာ ဝမ်ကျုံးစစ်က ရုတ်တရက် ဆိုလိုက်တော့သည်။

နှင်းမုန်တိုင်းကြီး ဆင်းသက်လာခဲ့ပြီးနောက် ရှီဘုရင်မမှာ အကြီးမားဆုံးသော အကျိုးအမြတ် ရရှိသူပင် ဖြစ်သည်။ ဝမ်ကျုံးစစ်၏ သိုင်းအဆင့်မှာ အခြားသူများထက် ပိုမိုမြင့်မားလှပေရာ သူ၏အာရုံခံနိုင်စွမ်းမှာလည်း ပိုမို၍စူးရှလှပေသည်။ ဤရေခဲ တံတားများ၏ ဖွဲ့စည်းတည်ဆောက်ပုံ မှာ အလွန်အမင်း သိပ်သည်းကျစ်လျစ်လွန်းလှရာ သာမန်လူများအနေဖြင့် ဖျက်ဆီးပစ်ရန် လုံးဝခက်ခဲလှပေသည်။ သူ့အနေဖြင့် ကျန်းချိုးကျန့်ချုံးကဲ့သို့သော အင်ပါယာ၏ ဗိုလ်ချုပ်များနှင့်အတူ ကိုယ်တိုင် ကိုယ်ကျ သွားရောက် ဖြေရှင်းမှသာ ဖြစ်နိုင်ပေလိမ့်မည်။ ဤသို့ ပြုလုပ်ခြင်းက အနည်းငယ် ဒုက္ခများပြီး အားစိုက်ထုတ်ရမည် ဆိုသော်ငြားလည်း အကောင်းဆုံးသော နည်းလမ်းပင် ဖြစ်တော့သည်။

"မလိုအပ်ပါဘူး၊ ဒီရှီဘုရင်မကို ငါပဲ ကိုင်တွယ် ဖြေရှင်းလိုက်ပါ့မယ်"

ဝမ်ချောင်က ရှေ့တည့်တည့်ကို ကြည့်ရင်း ခေါင်းလှည့် မကြည့်ဘဲ အေးဆေးတည်ငြိမ်စွာဖြင့် ဆိုလိုက်တော့သည်။

လူတိုင်း၏ ရင်ထဲ၌ မှင်တက်သွားကြပြီး တုံ့ပြန်ရန် အချိန်ပင် မရလိုက်မီမှာပင် ရုတ်တရက် ပေါ့ပါးလှသော ခြေသံလေးများမှာ နားထဲသို့ ရုတ်တရက် တိုးဝင်လာခဲ့သည်။ တစ်ချိန်တည်းမှာပင် ဝမ်ချောင်နှင့် ၆၀၊၇၀ ရာခိုင်နှုန်းခန့် တူညီနေသော်လည်း လုံးဝတူညီခြင်း မရှိသော အရှိန်အဝါတစ်ခုမှာ လူတိုင်း၏ အာရုံခံနိုင်စွမ်း အတွင်းသို့ ရုတ်တရက် ဝင်ရောက်လာတော့သည်။

လူတိုင်းမှာ လှည့်ကြည့်လိုက်ရာ ဒုတိယမြောက် ဝမ်ချောင်တစ်ဦးမှာ ဖြည်းညင်းစွာ ခြေလှမ်းများ လှမ်းလျက် မြို့ရိုး ပေါ်သို့ တက်လာသည်ကို မြင်တွေ့လိုက်ရတော့သည်။

"အသေးအမွှား လှည့်ကွက်လေးတွေပါပဲ၊ ပြောနေစရာတောင် မလိုပါဘူး။ လုံးဝစိုးရိမ်စရာ မလိုပါဘူး"

တတိယမြောက် ရှန်ထိုက်က ပြောဆိုနေရင်းဖြင့် ရှေ့သို့ လျှောက်လှမ်းလာတော့သည်။

လူတိုင်းမှာ ပထမဆုံးအနေဖြင့် မှင်တက်သွားကြပြီး၊ တတိယမြောက်ရှန်ထိုက်၏ ကိုယ်ပေါ်ရှိ အေးစိမ့်လှသော အရှိန်အဝါကို ခံစားမိလိုက်သည့်အခါမှသာ လျင်မြန်စွာ စိတ်အေးသွားကြတော့သည်။

ဤ ဧရာမ နှင်းမုန်တိုင်းကြီး အတွင်း၌ အကျိုးအမြတ် ရရှိသူမှာ ရှီဘုရင်မ တစ်ဦးတည်း လုံးဝမဟုတ်လောက်ပါချေ။

တစ်ချိန်တည်းမှာပင် မြို့ရိုးပေါ်တွင် ရုတ်တရက် ထွက်ပေါ်လာသော ဒုတိယမြောက် "ဝမ်ချောင်"ကို မြင်တွေ့လိုက်ရသည့်အခါ ရှီဘုရင်မ ၏ မျက်ခုံးများလည်း အနည်းငယ် ကျုံ့သွားတော့သည်။

"ဒီကောင်က ဘာတွေများ လုပ်ချင်နေတာလဲ?"

ရှီဘုရင်မ၏ ရင်ထဲ၌ အနည်းငယ် လေးလံသွားတော့သည်။ ဝမ်ချောင်၏ ဧရာမ ကိုယ်ပွားကြီးများအကြောင်းကို သူမ အနည်းအကျဉ်း သိရှိထားသည် ဆိုသော်ငြားလည်း၊ ယခင်က တစ်ခါမျှ မတိုက်ခိုက်ဖူးခဲ့ရာ သူမ သိရှိထားသည်များမှာ အလွန်ပင် ကန့်သတ်ချက် ရှိလွန်းလှပေသည်။

အဝေးဆီရှိ မြို့ရိုးပေါ်တွင်မူ ဝမ်ချောင်၏ တတိယမြောက် ရှန်ထိုက်မှာ ထွက်ပေါ်လာခဲ့ပြီးနောက် စကားများများ ပြောမနေခဲ့ပါချေ။ သူ၏အကြည့်များမှာ အလွန်အမင်း ခမ်းနားကြီးကျယ်လှသော "ရှေးဟောင်း ရေခဲမြစ်"ဆယ်ခုခန့်နှင့် ရှေးဟောင်း ရေခဲမြစ်များပေါ်မှ တဟုန်ထိုး ပြေးဝင်လာနေသော နိုင်ငံအသီးသီး မှ စစ်တပ်များကို တစ်ချက် ဝေ့ကြည့်လိုက်ပြီးနောက်၊ ရှေ့သို့ တစ်လှမ်း လှမ်းထွက်လိုက်ရာ လေထဲတွင် ရပ်လျက်သား ဖြစ်သွားခဲ့သည်။ တစ်ချိန်တည်းမှာပင် လက်တစ်ဖက်ကို ဖြည်းညင်းစွာ မြှောက်လိုက်ပြီး ရှေးဟောင်း ရေခဲမြစ်များအားလုံးကို အဝေးမှ ချိန်ရွယ်လိုက်တော့သည်။

"ပြိုကွဲစမ်း"

"ပျက်စီးစမ်း"

ဝမ်ချောင်၏ တတိယမြောက်ရှန်ထိုက်မှာ ပါးစပ်ကို ဟကာ စကားလုံး နှစ်လုံးကိုသာ ဆိုလိုက်သည်။ ဝုန်းခနဲ မြည်သံနှင့်အတူ ဟင်းလင်းပြင်ကြီး တုန်ခါသွားခဲ့ပြီး ရှီဘုရင်မနှင့် မရေမတွက်နိုင်သော လူများ၏ အံ့ဩတုန်လှုပ်နေသော အကြည့်များ အောက်တွင်၊ လုံးဝဖျက်ဆီးပစ်နိုင်စွမ်း ရှိသည့် ခွန်အား တစ်ခုမှာ ရှေးဟောင်း ရေခဲမြစ်များ၏ အတွင်းပိုင်းမှနေ၍ ရုတ်တရက် ပေါက်ကွဲထွက်ပေါ်လာတော့သည်။

ဤလုံးဝဖျက်ဆီးပစ်နိုင်စွမ်းရှိသည့် ခွန်အားမှာ မီးတောက်များအလား အလွန်အမင်း လျင်မြန်ပြင်းထန်လှပြီး၊ မျက်တောင်တစ်ခတ်မျှ အချိန်လေး အတွင်းမှာပင် ရှေးဟောင်း ရေခဲမြစ် ဆယ်ဂဏန်းခန့်၏ အတွင်းပိုင်း ဖွဲ့စည်းတည်ဆောက်ပုံကို လုံးဝဖျက်ဆီးပစ်လိုက်တော့သည်။

ဝုန်း ဝုန်း ဝုန်း ပြင်းထန်လှသော မြည်ဟည်းသံကြီးများကိုသာ ကြားလိုက်ရပြီး မရေမတွက်နိုင်သောလူများ၏ အံ့ဩတုန်လှုပ်နေသော အကြည့်များအောက်တွင်၊ သံမဏိများအလား ခိုင်မာမာကျောပြီး ခမ်းနား ကြီးကျယ်လှသော ရှေးဟောင်း ရေခဲမြစ်များမှာ ချက်ချင်းပင် လုံးဝပြိုကွဲ ပျက်စီးသွားပြီး ပေါက်ကွဲထွက်သွားတော့သည်၊ မရေမတွက်နိုင်သော ရေခဲအပိုင်းအစလေးများနှင့် ရေခဲတုံးကြီးများမှာ နေရာအနှံ့အပြားသို့ လွင့်စင်သွားကြပြီး ကောင်းကင်ယံမှနေ၍ ပြုတ်ကျလာကြတော့သည်။

"အားးး"

တစ်ချိန်တည်းမှာပင် သနားစရာကောင်းလောက်အောင် အော်ဟစ်သံများ အဆက်မပြတ် ထွက်ပေါ်လာခဲ့ပြီး၊ ရှေးဟောင်းရေခဲမြစ်ပေါ်သို့ ယခုလေးတင် တက်ရောက်လာခဲ့ကြသော နိုင်ငံအသီးသီးမှ သံချပ်ကာမြင်းတပ်များမှာ သနားစရာကောင်းလောက်အောင် အော်ဟစ်ရင်း မိုးပေါက်များအလား ထိန်းချုပ်၍ မရနိုင်တော့ဘဲ အောက်သို့ ပြုတ်ကျလာကြတော့သည်။

"…."

မျက်တောင်တစ်ခတ်မျှ အချိန်လေး အတွင်းမှာပင် စစ်မြေပြင်ကြီး တစ်ခုလုံးတွင် ဧရာမ ဖရိုဖရဲ ဖြစ်မှုကြီးတစ်ခုကို ဖြစ်ပေါ်စေခဲ့ပြီး ဤမြင်ကွင်းကို မြင်တွေ့လိုက်ရသည့်အခါ လူတိုင်း အလွန်အမင်း အံ့ဩ တုန်လှုပ်သွားကြတော့သည်။

"ခွေးကောင်"

ရှီဘုရင်မမှာ ဤမြင်ကွင်းကို မြင်တွေ့လိုက်ရသည့်အခါ ဒေါသထွက်လွန်း၍ တစ်ကိုယ်လုံး တုန်ယင်သွားတော့သည်။ သူမ အနေဖြင့် အစွမ်းကုန် ကြိုးစားကာ ဖန်တီးလိုက်သော ရှီမျိုးနွယ်စု၏ အမြင့်ဆုံး အထွတ်အထိပ် သိုင်းပညာကြီးမှာ၊ လူတိုင်း၏မျက်စိရှေ့တွင် ဝမ်ချောင်၏ ဤမျှလောက် လွယ်လွယ်ကူကူ ဖျက်ဆီးပစ်ခြင်းကို ခံလိုက်ရလိမ့်မည်ဟု လုံးဝတွေးတောထားခဲ့ခြင်း မရှိပါချေ။

"ငါက မင်းကို မယှဉ်နိုင်ဘူး ဆိုတာ လုံးဝမယုံဘူး"

ရှီဘုရင်မ၏ အံကို တင်းကျပ်စွာ ကြိတ်ထားခဲ့ပြီး ရုတ်တရက် အလွန်အမင်း ရက်စက် ကြမ်းတမ်းသွားကာ၊ အနည်းငယ်မျှ တွေဝေခြင်းမရှိဘဲ သူမ၏အစွမ်းထက်လှသော ရေခဲစွမ်းရည်များကို နောက်တစ်ကြိမ် ထပ်မံ အသုံးပြုလိုက်ပြန်သည်။

"ရှေးဟောင်း ရေခဲမြစ်”

ရှီဘုရင်မ၏ ဒေါသတကြီး အော်ဟစ်သံကြီးနှင့်အတူ၊ နောက်တစ်ခဏတွင် ကောင်းကင်ယံ အပြည့်ရှိ နှင်းမုန်တိုင်းကြီး၏ စွမ်းအင်များမှာ နောက်တစ်ကြိမ် ထပ်မံလိပ်တက်လာခဲ့ပြန်သည်။ ဟာလာဟင်းလင်းပြင်ကြီးအတွင်း၌ အလင်းနှင့် အရိပ်များ ရောယှက်သွားခဲ့ပြီး ရှေးဟောင်း ရေခဲမြစ်များ၏ ပုံရိပ်ယောင်များမှာ နောက်တစ်ကြိမ် ထပ်မံထွက်ပေါ်လာခဲ့ပြန်သည်။ ထို့ပြင် ပထမဆုံး အကြိမ်ထက် ပို၍အရေအတွက် များပြားလာသလို ပိုမို၍လည်း ခမ်းနား ကြီးကျယ်လှပေသည်။

"သေချင်နေတာပဲ"

ထိုအချိန်မှာပင် အေးစက်ပြီး ခံစားချက် အနည်းငယ်မျှ လုံးဝမရှိသော ကြိမ်းမောင်းသံကြီး တစ်ခုမှာ ရှီဘုရင်မ၏ နားဘေးတွင် ရုတ်တရက် ထွက်ပေါ်လာတော့သည်။ သူမ တုံ့ပြန်ရန် အချိန်ပင် မရလိုက်မီမှာပင် ဝုန်းခနဲ မြည်သံနှင့်အတူ ဖွဲ့စည်းပေါ်ထွက်လာတော့မည့် ရှေးဟောင်း ရေခဲမြစ်များမှာ ဟင်းလင်းပြင်ကြီးအတွင်းရှိ အလားတူ သဘာဝ ရှိသော အခြားစည်းမျဉ်း ခွန်အားတစ်ခု၏ လှုပ်ခတ်မှုကြောင့် မျက်တောင်တစ်ခတ် အတွင်းမှာပင် လုံးဝပြိုကွဲ ပျက်စီးသွားတော့သည်။

ဤမျှသာမက ရှေးဟောင်း ရေခဲမြစ်များ ပြိုကွဲပျက်စီးသွားသည့် တစ်ချိန်တည်းမှာပင်၊ ရှီဘုရင်မ၏ တစ်ကိုယ်လုံး ရုတ်တရက် တုန်ခါသွားခဲ့ပြီး ရင်ထဲ၌ အလွန်အမင်း အန္တရာယ် ကြီးမားလှသော ခံစားချက်တစ်ခု ရုတ်တရက် ပေါ်ထွက်လာတော့သည်။ အလွန်အမင်း အန္တရာယ် ကြီးမားလှသော အရာတစ်ခုခု ၏ ပစ်မှတ်ထားခြင်းကို ခံလိုက်ရသည့်အလား ဖြစ်နေတော့သည်။

"ရွှီးး"

ထိုအချိန်မှာပင် နားကွဲမတတ် ပြင်းထန်လှသော လေဖြတ်သန်းသံကြီး တစ်ခုမှာ နားထဲသို့ တိုးဝင်လာခဲ့သည်။ ရှီဘုရင်မက မျက်လုံး ဖွင့်ကြည့်လိုက်ရာ ရွှေဝါရောင် မြားတံတစ်စင်းမှာ လေပြင်းများနှင့် မိုးကြိုးများကို အားပြုလျက် သူမရှိရာ အရပ်ဆီသို့ လျှပ်စစ်မီးပွင့်အလား ပြေးဝင်လာသည်ကို မြင်တွေ့လိုက်ရတော့သည်။

ထိုမြားတံ၏အရှိန်မှာ အလွန်မြန်ဆန်လွန်းလှသည်။ အစပိုင်းတွင် ပေဆယ်ဂဏန်းခန့် အကွာအဝေးတွင် ရှိနေသေးသော်လည်း ရှီဘုရင်မ မျက်လုံးဖွင့်ကြည့်လိုက်သည့် အချိန်တွင်မူ လက်တစ်ကမ်း အကွာအဝေးသို့ ရောက်ရှိနေပြီဖြစ်ပြီး ရှီဘုရင်မ၏မျက်နှာဆီသို့ တိုက်ရိုက်ဦးတည်ပြေးဝင်လာနေတော့သည်။

"ဒုက္ခပဲ"

မျက်တောင်တစ်ခတ်မျှ အချိန်လေး အတွင်းမှာပင် ရှီဘုရင်မ၏မျက်နှာမှာ ဖြူရော်သွားတော့သည်။

ဤမြားတံကို သူမအနေဖြင့် ရင်းနှီးကျွမ်းဝင်ခြင်း မရှိသည်တော့ မဟုတ်ပါချေ။ ထိုစဉ်က မြို့တွင်း၌ ချူးလော့ဟိုကလည်း ဤကဲ့သို့ ပစ်ခတ်ဖူးသည်။ သို့သော် ထိုမြားတံနှင့် ယခုမြားတံ၏အခြေအနေမှာ ကောင်းကင်နှင့် မြေကြီးလောက် ကွာခြားလှပေသည်။

ဤမြားတံ၏အရှိန်မှာ အလွန်အမင်း မြန်ဆန်လွန်းလှပေရာ ရှီဘုရင်မအနေဖြင့် ရှောင်တိမ်းရန် ကြိုးစားလိုက်သည့် အချိန်တွင် အချိန် လုံးဝ မမီတော့ပါချေ။

"ပြီးပြီ... မရှောင်နိုင်တော့ဘူး"

ရှီဘုရင်မ၏ တစ်ကိုယ်လုံး တုန်ယင်သွားခဲ့ပြီး အလွန်အမင်း တုန်လှုပ်စွာဖြင့် ရေရွတ်လိုက်သည်။ မျက်ဝန်းထဲ၌ မျှော်လင့်ချက် ကင်းမဲ့နေသော အရိပ်အယောင် အချို့ ဖြတ်ပြေးသွားတော့သည်။

ဘုန်း

ရှီဘုရင်မမှာ မျက်လုံးများကို မှိတ်ကာ သေခြင်းတရား ကို စောင့်ဆိုင်းနေသည့် အချိန်လေး အတွင်းမှာပင်၊ ရုတ်တရက် ကြီးမားကျယ်ပြန့်လှသော ခွန်အားတစ်ခုမှာ သံမဏိများအလား ခိုင်မာစွာဖြင့် ဘေးတိုက်မှနေ၍ လျှပ်စစ်မီးပွင့်အလား ပစ်ခတ်လာခဲ့ပြီး၊ တိုက်ခိုက်မှုတစ်ချက်တည်းဖြင့်ပင် ထိုရွှေဝါရောင် မြားတံကို အဝေးသို့ လွင့်စင်သွားစေတော့သည်။

"တော်ပြီ... မင်း အနောက်ကို ဆုတ်လိုက်တော့… မင်းရဲ့ အခုလက်ရှိ ခွန်အားနဲ့ သူ့ကို ဘယ်လိုမှ ယှဉ်နိုင်မှာ မဟုတ်ဘူး"

ရင်းနှီးကျွမ်းဝင်နေသော အသံတစ်ခု ထွက်ပေါ်လာခဲ့ပြီး ထိုက်ရှီမှာ နတ်ဘုရား သံချပ်ကာကို ဆင်မြန်းထားလျက်၊ ဘယ်အချိန်ကတည်းကမှန်းမသိ လေထဲတွင် ရပ်လျက်သား ဖြစ်နေသည်ကို မြင်တွေ့လိုက်ရတော့သည်။

ထိုက်ရှီကို မြင်တွေ့လိုက်ရသည့်အခါ ရှီဘုရင်မမှာ ရှည်လျားလှသော သက်ပြင်းကြီး တစ်ခုကို ချလိုက်နိုင်တော့သည်။ သူမ၏ တစ်ကိုယ်လုံးမှာ သေတွင်းမှနေ၍ ပြန်လည် အသက်ရှင်လာရသည့်အလားဖြစ်သွားခဲ့ပြီး ကပ်ဘေးကြီး တစ်ခု မှ လွတ်မြောက်သွားခဲ့ရာ၊ တစ်ကိုယ်လုံးတွင် ချွေးစေးများ ပြည့်နှက်သွားတော့သည်။

"ထိုက်ရှီ သခင်ကြီး... ကျေးဇူးတင်ပါတယ်"

ရှီဘုရင်မ၏မျက်နှာအမူအရာမှာ ကျေးဇူးတင်နေပုံရပြီး နက်နက်ရှိုင်းရှိုင်း အရိုအသေ ပေးလိုက်သည်။ သူမ အနေဖြင့် ရှေ့တန်းတွင် ဆက်လက်နေထိုင်ဝံ့ခြင်း လုံးဝမရှိတော့ပါချေ။

သူမသည် အမြဲတမ်း သူမ၏အစွမ်းထက်လှသော ရေခဲစွမ်းရည်များကို ဂုဏ်ယူဝင့်ကြွားလေ့ ရှိသည်။ သို့သော် မည်မျှပင် ဂုဏ်ယူဝင့်ကြွားနေပါစေ ဤအခိုက်အတန့်၌ ရှီဘုရင်မမှာ သူမနှင့်ဝမ်ချောင်၏အကြားတွင် မသေးငယ်လှသော ကွာဟချက် ကြီးတစ်ခု ရှိနေကြောင်းကို ရှင်းလင်းစွာ သိရှိသွားခဲ့ပြီ ဖြစ်သည်။

ရှီဘုရင်မ၏ ရင်ထဲ၌ အလွန်အမင်း ထိတ်လန့်နေခဲ့ပြီး လျင်မြန်စွာပင် လှည့်၍ မြင်းပေါ်သို့ တက်ကာ ထွက်ခွာသွားတော့သည်။

"ငါ့အမိန့်ကို ပေးလိုက်စမ်း၊ နတ်ဘုရားနိုင်ငံတော် သံချပ်ကာ တပ်ဖွဲ့ကို စေလွှတ်လိုက်စမ်း"

ထိုက်ရှီမှာ လေထဲတွင် တွဲလောင်း ဖြစ်နေလျက် ရှီဘုရင်မကို ဆက်လက်၍ ဂရုစိုက်မနေတော့ဘဲ အေးဆေးတည်ငြိမ်စွာဖြင့် အမိန့်ပေးလိုက်တော့သည်။

"ဟုတ်ကဲ့ပါ"

ထိုက်ရှီ၏အနောက်ဘက်တွင် ပုံရိပ်တစ်ခု ရုတ်တရက် ပေါ်ထွက်လာခဲ့ပြီး ခါးကို ကိုင်းညွတ်ကာ အရိုအသေ ပေးလိုက်ပြီးနောက် လျင်မြန်စွာ လှည့်ထွက်သွားတော့သည်။

"သတ်"

ကြီးမားကျယ်ပြန့်လှသော စစ်မြေပြင်ကြီးမှာ ရှီဘုရင်မ ထွက်ခွာသွားမှုနှင့် ယခင်က ရှေးဟောင်း ရေခဲမြစ်များပေါ်မှ စစ်သည်များ ပြုတ်ကျသွားမှုများကြောင့် ကြီးမားသော လှိုင်းဂယက်များ ဖြစ်ပေါ်လာခြင်း လုံးဝမရှိခဲ့ပါချေ။ အဆုံးအစမရှိ များပြားလှသော စစ်တပ်မှာ တစ်သုတ်ပြီး တစ်သုတ် အဆက်မပြတ် တဟုန်ထိုး ပြေးဝင်တိုက်ခိုက်နေကြဆဲပင် ဖြစ်သည်။

အမိန့်များ ထုတ်ပြန်ပြီး စစ်ဆင်ရေး အစီအစဉ်များ ရေးဆွဲပြီးသည့် အခါတွင် လူတိုင်းမှာ စစ်တုရင် ခုံပေါ်ရှိ နယ်ရုပ်များအလား ဖြစ်သွားကြပြီး အစွမ်းကုန် အကောင်အထည် ဖော်ဆောင်ရန်သာ ရှိတော့သည်။ မည်သည့် ယာယီ အပြောင်းအလဲများကမျှ နောက်ဆုံး ရလဒ်ကို သက်ရောက်မှု ရှိနိုင်မည် မဟုတ်ပါချေ။

စစ်တပ်မှာ ကမ်းခြေကို ရိုက်ခတ်နေသော ဒီရေလှိုင်းလုံးကြီးများအလား အဆက်မပြတ် လိမ့်ဝင်လာနေတော့သည်။ သို့သော် စစ်တပ်ကြီး အတွင်း၌ အလွန် ထူးခြားလှသော တပ်ဖွဲ့ တစ်ဖွဲ့မှာ အလွန်အမင်း ထင်ရှားနေတော့သည်။

ဤတပ်ဖွဲ့တွင် ဆင်မြန်းထားသော သံချပ်ကာများမှာ လက်ရှိ ခေတ်ကာလရှိ မင်းဆက်များ အားလုံး၏ပုံစံများနှင့် လုံးဝကွဲပြားခြားနားနေတော့သည်။ သံချပ်ကာများမှာ ရွှေရောင်နှင့် အနီရောင်ကို အဓိကထား၍ ပြုလုပ်ထားပြီး အချို့သောနေရာများတွင် သံချေးများ တက်နေပုံ ရသော်လည်း တစ်ခုလုံး အနေဖြင့် အကောင်းပကတိ ရှိနေဆဲပင် ဖြစ်သည်။

နတ်ဘုရားနိုင်ငံ သံချပ်ကာ။

ဤသည်မှာ လွန်ခဲ့သော အချိန်အတော်ကြာကတည်းက ထိုက်ရှီ ကိုယ်တိုင် အမြစ်ပြတ် ချေမှုန်းပစ်ခဲ့သော အခြားသော ယဉ်ကျေးမှုခေတ်တစ်ခုမှ အကြွင်းအကျန် အပိုင်းအစများပင် ဖြစ်သည်။ ထိုအင်ပါယာမှာ သံချပ်ကာ သွန်းလုပ်ရေးတွင် အလွန်နာမည်ကြီးလေ့ ရှိသည်။ သို့သော် အလွန်အမင်း "မာနထောင်လွှား" လွန်းလှသဖြင့် နောက်ဆုံးတွင် လုံးဝ အမြစ်ပြတ် ပျက်စီးသွားမည့် ကပ်ဘေးကြီးကို ဖိတ်ခေါ်မိသလို ဖြစ်သွားခဲ့ရသည်။

ဤတစ်ကြိမ်တွင် အရှေ့မြောက်ဘက်ဒေသ၌ အချိန်အတော်ကြာအောင် တိုက်ခိုက်ခဲ့သော်လည်း အောင်မြင်မှု မရရှိခဲ့ခြင်းနှင့် ထန်လူမျိုးများ၏ လေးနှင့် မြားများမှာ အလွန်အမင်း ထက်မြက်လွန်းလှခြင်းတို့ကြောင့် ထိုက်ရှီမှာ ပျောက်ဆုံးသွားသော ယဉ်ကျေးမှုခေတ်၏ခွန်အားကို ရုတ်တရက် အမှတ်ရလာခဲ့ခြင်းပင် ဖြစ်သည်။

စစ်ခေတ္တရပ်နားထားသော အချိန်ကာလအတွင်း ထိုက်ရှီမှာ အချိန်အနည်းငယ် ယူကာ ထိုယဉ်ကျေးမှု ခေတ်၏ အကြွင်းအကျန် အပျက်အစီးများထဲမှနေ၍ ဤသံချပ်ကာများကို အထူးတူးဖော်ယူဆောင်လာခဲ့ခြင်း ဖြစ်သည်။ တစ်ချိန်တည်းမှာပင် နိုင်ငံအသီးသီး၏ စစ်တပ်များ အတွင်းမှ အဆင့်မြင့် စစ်သည် ခုနစ်ထောင်၊ ရှစ်ထောင်ခန့်ကို ရွေးချယ်ကာ ဤ အထူး တိုက်ခိုက်ရေး တပ်ဖွဲ့ကို ဖွဲ့စည်းလိုက်ခြင်းပင် ဖြစ်တော့သည်။

"သွားကြ"

ဤနတ်ဘုရားနိုင်ငံတော် သံချပ်ကာတပ်ဖွဲ့၏ရှေ့ဆုံးနေရာတွင် နတ်ဘုရား အဖွဲ့အစည်းမှ အစွမ်းထက်ပညာရှင်အချို့မှာ ပြင်းထန်စွာ အော်ဟစ်လိုက်ကြပြီး၊ လျင်မြန်စွာပင် လူတိုင်းကို ဦးဆောင်ကာ မျောက်ဝံများအလား မြို့ရိုးဆီသို့ တစ်ဟုန်ထိုး ပြေးဝင်သွားကြတော့သည်။

ချွင် ချွင် ချွင်

သံချိတ် ကြိုးများ တစ်ချောင်းပြီး တစ်ချောင်း မြို့ရိုးပေါ်သို့ ပစ်တင်လိုက်ကြပြီးနောက်၊ နတ်ဘုရားနိုင်ငံတော် သံချပ်ကာ တပ်ဖွဲ့မှာ မြို့ရိုးပေါ်မှနေ၍ ပစ်ခတ်လာသော စစ်ရထားလေးများနှင့် ထိပ်တန်း မြားသမားများ၏ တိုက်ခိုက်မှုများကို ရင်ဆိုင်လျက် လမ်းတစ်လျှောက် လျင်မြန်စွာ တွယ်တက်လာကြတော့သည်။

ထိုထက်မြက်လှသော မြားတံများမှာ သူတို့၏ ကိုယ်ပေါ်ရှိ သံချပ်ကာ များကို မှန်ကန်သွားသည့် အခါတွင် နားကွဲမတတ် ပြင်းထန်လှသော သံမဏိချင်း ရိုက်ခတ်သံများ ထွက်ပေါ်လာခဲ့ပြီး မြားတံများအားလုံးမှာ အဝေးသို့ လွင့်စင်သွားကြတော့သည်။

ထိုက်ရှီမှာ အပေါ်စီးမှနေ၍ နတ်ဘုရားနိုင်ငံတော် သံချပ်ကာ စစ်သည်တစ်ဦး မြို့ရိုး ပေါ်သို့ တွယ်တက်သွားသည်ကို ငုံ့ကြည့်နေခဲ့ပြီး လျင်မြန်စွာ အကြည့်များကို ရုပ်သိမ်းလိုက်ကာ၊ မျက်နှာချင်းဆိုင်ရှိ သံမဏိခံတပ်၏ အထက်ပိုင်းမှ ထိုလူငယ်လေး၏ပုံရိပ်ကို လှမ်းကြည့်လိုက်တော့သည်။

"ဘုန်း"

ဝမ်ချောင် ၏ ဆံပင်ရှည်ကြီးများမှာ လေထဲတွင် တလွင့်လွင့် လွင့်ပျံနေခဲ့ပြီး ရုတ်တရက် ရှေ့သို့ ခြေတစ်လှမ်း လှမ်းထွက်လိုက်ကာ၊ မြို့ရိုးပေါ်မှနေ၍ လေထဲသို့ တက်လှမ်းလာခဲ့ပြီး ထိုက်ရှီရှိရာ အရပ်ဆီသို့ ဖြည်းညင်းစွာ လျှောက်လှမ်းလာသည်ကို မြင်တွေ့လိုက်ရတော့သည်။

"ထိုက်ရှီ... မင်း ဘာလုပ်ချင်နေပါစေ အားလုံး အလကားပဲ"

သူတို့နှစ်ဦး၏ အကွာအဝေးမှာ အဆက်မပြတ် နီးကပ်လာခဲ့ပြီး ဝမ်ချောင်မှာ မျက်နှာချင်းဆိုင်ရှိ ထိုက်ရှီကို ကြည့်ရင်း အေးဆေးတည်ငြိမ်စွာဖြင့် ဆိုလိုက်ရာ သူ၏မျက်နှာအမူအရာမှာ အနည်းငယ်မျှပင် ကြောက်ရွံ့နေပုံ မရှိပါချေ။

သူတို့နှစ်ဦးမှာ ပထမဆုံးအကြိမ် တိုက်ခိုက်ခြင်း လုံးဝမဟုတ်တော့ပါချေ။ လက်ရှိ ထိုက်ရှီနှင့် ပတ်သက်၍ ဝမ်ချောင်၏ စိတ်နေစိတ်ထားမှာ ယခင်ကနှင့် လုံးဝ ကွဲပြားခြားနားနေပြီ ဖြစ်သည်။

မသိမသာဖြင့် ဝမ်ချောင်မှာ ထိုက်ရှီ နှင့် တန်းတူ ရည်တူ ရပ်တည်နိုင်သည့်အဆင့်သို့ ရောက်ရှိနေပြီ ဖြစ်၏။

"ဟွန်း… မင်းက အရမ်းကို ကလေးဆန်လွန်းသေးတယ်။ နတ်ဘုရားတွေနဲ့ ရန်သူ လုပ်ရင် ဘယ်လို နောက်ဆက်တွဲ ရလဒ် မျိုးတွေ ဖြစ်လာမလဲ ဆိုတာကို မင်း လုံးဝ နားမလည်သေးဘူး။ မဟာထန်က အရမ်းကို မာနထောင်လွှားလွန်းတယ်။ လီထိုက်ယီကလည်း အရမ်းကို မာနထောင်လွှားလွန်းတယ်။ မင်းကလည်း အရမ်းကို မာနထောင်လွှားလွန်းတယ်။ မင်းတို့ရဲ့ မာနတွေကြောင့် ထန်အင်ပါယာကြီးတစ်ခုလုံးဟာ အရင်က ယဉ်ကျေးမှုခေတ်တွေ အင်ပါယာတွေလိုပဲ လုံးဝအမြစ်ပြတ် ပျောက်ကွယ်သွားလိမ့်မယ်"

"ဒီအင်ပါယာကြီး တည်ရှိခဲ့တဲ့ သဲလွန်စတွေ အားလုံး လုံးဝဖျက်ဆီးခံရလိမ့်မယ်၊ အနာဂတ်မှာ ဘယ်သူမှ မဟာထန် ဆိုတာကို မှတ်မိတော့မှာ မဟုတ်ဘူး၊ မဟာထန်က အရင်ခေတ်က ယဉ်ကျေးမှုတွေအကြောင်းကို မသိခဲ့သလိုမျိုး ပေါ့"

ထိုက်ရှီက အလွန်အမင်း ရက်စက်ကြမ်းတမ်းသော မျက်နှာအမူအရာဖြင့် ဆိုလိုက်တော့သည်။

******