အခန်း ၁၅

အခန်း (၁၄)

စစ်ဆေးခြင်း

မကြာမီအချိန်အတွင်းမှာပင် အောက်ခြေအရာရှိငယ်တစ်ဦးသည် မြစိမ်းရောင်ဝတ်ရုံရှည်ကို ဆင်ယင်ထားသည့် အရပ်မြင့်မတ်သော လူတစ်ဦးကို ဦးဆောင်ခေါ်ယူလာခဲ့သည်။

သူ၏ခြေလှမ်းများက တည်ငြိမ်လှပြီး ကျောပြင်က မတ်စောက်ကာ၊ အမူအရာတစ်ခုချင်းစီက တင့်တယ်လျောက်ပတ်ပြီး လွတ်လပ်ပေါ့ပါးနေသလို မျက်နှာသွင်ပြင်ကလည်း ခန့်ညားလှပေသည်။

ထူထဲသော မျက်ခုံးအစုံအောက်ရှိ သူ၏မျက်ဝန်းတစ်စုံမှာ သိန်းငှက်ကဲ့သို့ ထက်မြက်လှပြီး နှုတ်ခမ်းအထက်နှင့် မေးစေ့အောက်တွင် မုတ်ဆိတ်တို တိရိ ဖြတ်တောက်ထားသည်။

သူသည် အသက်သုံးဆယ်ကျော်အရွယ်ခန့် ရှိပုံရပေသည်။

ဝမ်ကျင်းသည် ထိုသူကို မြင်လျှင် ဝမ်းသာအားရဖြင့် ကမန်းကတန်း ကြိုဆိုလိုက်မိပြီး ရင်ထဲ၌လည်း တိုးတိုးရေရွတ်လိုက်မိ၏။ ‘ရောက်လာတဲ့သူက အသက်လတ်ပိုင်းအရွယ် စီမာယီ ဖြစ်နေတာပဲ။ သိပ်ကောင်းတာပဲ။’

စီမာယီသည် ဝမ်ကျင်းကို မြင်သည်နှင့် သူ၏ဝတ်ရုံကို သပ်ရပ်အောင် ပြင်ဆင်လိုက်ပြီး ဦးစွာ ဦးညွှတ်အရိုအသေပြုလိုက်သည်။ "လက်အောက်ငယ်သား စီမာယီက စီရင်စုမင်းကြီးကို အရိုအသေပြုပါတယ်။"

ဝမ်ကျင်းသည် ရှေ့သို့ တက်လှမ်းကာ စီမာယီ၏ လက်ကို တင်းတင်းဆုပ်ကိုင်၍ အဆောင်အတွင်းသို့ ဦးဆောင်ခေါ်ယူခဲ့သည်။ "စီမာယိ... ဒီလောက်အထိ ယဉ်ကျေးနေဖို့ မလိုပါဘူးကွာ။ လာပါ... မင်းကို နောင်အတူတူ တာဝန်ထမ်းဆောင်ရမယ့် လုပ်ဖော်ကိုင်ဖက်တွေနဲ့ မိတ်ဆက်ပေးမယ်။"

ကျန်ရှိနေသော အရာရှိများအားလုံးသည် ထိုစကားကို ကြားလျှင် လေးနက်လှသော အဓိပ္ပာယ်ကို ချက်ချင်းပင် သဘောပေါက်လိုက်ကြတော့သည်။ ဤနယ်စားမင်းကြီးအသစ်သည် မိမိယုံကြည်စိတ်ချရသော ကိုယ်ပိုင်လူယုံကို အာဏာစက်အတွင်း သွင်းတော့မည် ဖြစ်ပေသည်။ အပြင်ပန်းအားဖြင့် ထူးခြားထက်မြက်ပြီး လွန်စွာထည်ဝါသော အရှိန်အဝါရှိသည့် ဤပညာတတ်ကြီးသည် နယ်စားမင်းကြီး၏ လက်ရုံးဖြစ်ပုံရပြီး၊ စီရင်စုလက်ထောက်အရာရှိ ဝန်ရှန့်မှာမူ ရာထူးမှ ဆင်းပေးရတော့မည် ထင်၏...။ ဩဇာကြီးမားသော အထက်တန်းလွှာမိသားစုများမှ ဆင်းသက်လာသည့် အရာရှိအချို့မှာမူ သူတစ်ပါးဒုက္ခရောက်သည်ကို ဝမ်းသာအားရဖြစ်မိသည့် အမူအရာများကို ဖုံးကွယ်မထားနိုင်ကြချေ။ အဘယ်ကြောင့်ဆိုသော် ကွန်ဖြူးရှပ်ဂိုဏ်းဝင် ပညာတတ်တစ်ဦးဖြစ်ပြီး ယခင်စီရင်စုမင်းကြီး ကျိုးကို လွန်စွာ အထင်ကြီးလေးစားသော ထိုလက်ထောက်အရာရှိ ဝန်ရှန့်သည် သူတို့နှင့် တစ်ဖက်တည်း မဟုတ်သောကြောင့် ဖြစ်သည်။

ယခုလေးတင် နယ်စားမင်းကြီးက သူတို့ကို ပြန်လည်ထွက်ခွာခွင့်ပြုစဉ်ကလည်း၊ ဝန်ရှန့်တစ်ယောက် သူတို့အပေါ် ကုန်းချောစကားများ အားရပါးရ ပြောကြားခဲ့ပြီးဖြစ်လိမ့်မည်၊ စီရင်စုတစ်ခုလုံးရဲ့ ငွေကြေး၊ ရိက္ခာနဲ့ မြေယာတွေအားလုံးက ထိုမိသားစုတွေရဲ့ လက်ထဲမှာ ရှိနေလို့ ပြည်သူတွေ ဒုက္ခရောက်နေရကြောင်း၊ အစိုးရရဲ့ အသုံးစရိတ်က ဝင်ငွေထက် ကျော်လွန်နေကြောင်း စသည်ဖြင့် တိုင်တန်းခဲ့ပေလိမ့်မည်။ အမှန်စင်စစ်တော့ သူတို့သည် နောင်အနာဂတ်တွင် စီမာယီ အာဏာရရှိလာသည့်အခါ သူတို့အတွက် ကြောက်မက်ဖွယ်ကောင်းသော အိပ်မက်ဆိုးကြီးက ယခုမှသာ စတင်တော့မည် ဖြစ်ကြောင်းကို လုံးဝ ရိပ်မိခြင်း မရှိခဲ့ကြချေ။

ဝမ်ကျင်းသည် စီမာယီ၏ လက်ကို ကိုင်ဆောင်လျက် ပတ်ဝန်းကျင်ကို ဝှေ့ယမ်းကြည့်ရှုလိုက်သည်။ "အားလုံးပဲ... ဒါက ငါ့ရဲ့ သူငယ်ချင်းအရင်း ဖြစ်တဲ့ စီမာယီ ပဲ ဖြစ်တယ်။ ယခုအချိန်ကစပြီး ငါအရာရှိက သူ့ကို ဒီစီရင်စုရဲ့ အတွင်းရေးမှူးချုပ်အဖြစ် ခန့်အပ်လိုက်ပြီး ငါ့ကို အုပ်ချုပ်ရေးကိစ္စရပ်တွေမှာ ကူညီဆောင်ရွက်စေမယ်။"

အားလုံးသည် တစ်ဦးကိုတစ်ဦး အဓိပ္ပာယ်ပါပါ စိုက်ကြည့်လိုက်ကြမိသည်။ သူတို့ ထင်မှတ်ထားသည့်အတိုင်းပင် ဤအတွင်းရေးမှူးချုပ် ရာထူးနေရာမှာ ယာယီမျှသာ ဖြစ်ပုံရပြီး၊ သူ နန်ယန်စီရင်စုရဲ့ အခြေအနေကို အကျွမ်းတဝင် ရှိသွားသည်နှင့် လက်ထောက်အရာရှိ ရာထူးသို့ တိုးမြှင့်ခံရပေလိမ့်မည်။ ဝန်ရှန့်ကမူ ဤအရာအပေါ် ခံစားချက် အလွန်အမင်း မရှိလှချေ။ သူသည် "ဧကရာဇ်အသစ် တက်လျှင် နန်းတွင်းအမတ်အသစ် ခန့်မြဲ" ဟူသော နိယာမတရားကို သဘာဝကျကျပင် နားလည်ထားပြီး ဖြစ်သဖြင့် လွန်စွာ ပုံမှန်ဖြစ်သည်ဟု ယူဆထားသည်။ သူသည် ယခင်စီရင်စုမင်းကြီးက ခန့်အပ်ခဲ့သော လက်ထောက်အရာရှိ ဖြစ်သဖြင့်၊ နယ်စားမင်းကြီးအသစ်က သူ့ကို ယုံကြည်စိတ်ချရသော ကိုယ်ပိုင်လူယုံအဖြစ် သတ်မှတ်လိမ့်မည် မဟုတ်သည်မှာ သဘာဝပင်ဖြစ်သည်။

သူသည် စိတ်ထဲမှ မလိုလားသော်လည်း မတတ်နိုင်ချေ။ မဟာကျင်းမင်းဆက်၏ နယ်စားမင်းကြီးတစ်ဦးတွင် မိမိ၏ အုပ်ချုပ်မှုအောက်ရှိ အရာရှိများကို ခန့်အပ်ပိုင်ခွင့်နှင့် ထုတ်ပယ်ပိုင်ခွင့် အာဏာ အပြည့်အဝ ရှိပေသည်။ ထိုအာဏာကို ဆန့်ကျင်ရန် ကြိုးပမ်းခြင်းသည် ပုရစ်တစ်ကောင်က ရထားလုံးကို တားဆီးရန် ကြိုးစားနေသကဲ့သို့သာ ဖြစ်ပေလိမ့်မည်။ အကယ်၍ သူသာ တတာဝန်ကို ကောင်းမွန်စွာ ထမ်းဆောင်နိုင်ပါက ရာထူးနေရာတစ်ခုတွင် ဆက်လက်တည်ရှိခွင့် ရရှိနိုင်ပြီး၊ သူ၏ တစ်သက်တာ သင်ကြားခဲ့သော ပညာရပ်များဖြင့် သာမန်အရပ်သားပြည်သူများကို ဆက်လက် အကျိုးပြုနိုင်ပေလိမ့်မည်။

"သခင်ကြီး စီမာ... ဂုဏ်ယူဝမ်းမြောက်အပ်ပါတယ် ..." လူအုပ်ကြီးထံမှ ချီးကျူးဂုဏ်ပြုသံများ တညီတညွတ်တည်း ထွက်ပေါ်လာခဲ့တော့သည်။

ဝမ်ကျင်းသည် အပေါ်ယံ အချက်အလက်များအပေါ် အခြေခံ၍ စီရင်စု၏ အခြေအနေကို အကြမ်းဖျင်းအားဖြင့် နားလည်သဘောပေါက်သွားပြီဟု တွေးတောလိုက်မိသည်။ သို့သော်လည်း အစိုးရ၏ ဆန်ဂိုဒေါင်များ၊ လက်နက်တိုက်များ၊ ဘဏ္ဍာတိုက်များနှင့် အခြားသော တရားဝင်ဌာနများကိုမူ ကိုယ်တိုင်ကိုယ်ကျ စစ်ဆေးခြင်း မပြုရသေးချေ။

"လက်ထောက်အရာရှိ ဝန်က ငါအရာရှိကို ဒီစီရင်စုရဲ့ အခြေအနေကို အကြမ်းဖျင်း တင်ပြထားပြီးပြီ၊ ဒါပေမဲ့ ငါအရာရှိအနေနဲ့ သက်ဆိုင်ရာ တရားဝင်ဌာနအသီးသီးကို ကိုယ်တိုင်ကိုယ်ကျ ကွင်းဆင်းစစ်ဆေးဖို့ လိုအပ်သေးတယ်။ ဆန်ဂိုဒေါင်ကနေပဲ အရင်စကြစို့။ ဘယ်သူက ဆန်ဂိုဒေါင်ကို တာဝန်ယူ စောင့်ကြပ်နေတာလဲ။"

မျက်နှာညိုမည်းပြီး ထွားကျိုင်းသန်မာကာ နှုတ်ခမ်းထောင့်စွန်းများတွင် ကွေးညွတ်နေသော မုတ်ဆိတ်မွေးများ ရှိသည့် လူငယ်တစ်ဦးသည် ရှေ့သို့ တက်လှမ်းကာ ပြောကြားခဲ့သည်။

"အရှင်မင်းကြီးအား တင်ပြအပ်ပါတယ်၊ လက်အောက်ငယ်သားက တာဝန်ယူထားရခြင်း ဖြစ်ပါတယ် "

"လမ်းပြစမ်း။"

...အစိုးရမင်းလမ်းမကြီးထက်တွင် ဝမ်ကျင်းသည် မျက်မှောင်ကို တင်းတင်းကြုတ်လျက် လေးလံသော ခြေလှမ်းများဖြင့် အရှေ့ဆုံးမှ ဦးဆောင်လျှောက်လှမ်းနေပြီး၊ နန်ယန်စီရင်စုမှ အဆင့်ဆင့်သော အရာရှိကြီးငယ်အားလုံးသည် သူ၏နောက်မှ ကပ်လျက် လိုက်ပါလာကြသည်။ စစ်ဆေးမှုများ အားလုံး ပြီးမြောက်သွားသောအခါ ဝမ်ကျင်း၏ နှလုံးသားမှာ တစ်ဝက်ခန့် နစ်မြုပ်သွားခဲ့ရတော့သည်။

လက်နက်တိုက်မှာမူ ပြဿနာမရှိလှချေ၊ လေးနှင့် မြှားများ၊ ဒိုင်းလွှားများ စုံလင်စွာ ရှိနေပြီး ဓားများနှင့် လှံများလည်း အပြည့်အဝ ရှိနေကာ၊ စစ်ဝတ်တန်ဆာအများစု ပျက်စီးနေသော်လည်း ဆက်လက်အသုံးပြု၍ ရနိုင်သေးသည်။ သို့သော်လည်း ဆန်ဂိုဒေါင်နှင့် ဘဏ္ဍာတိုက်တို့မှာမူ အမှန်တကယ်ပင် ဟာလာဟင်းလင်း ဖြစ်နေပြီး ရင်နာစရာ ကောင်းလှပေသည်။ ကြွက်တစ်ကောင် ဝင်သွားလျှင်ပင် ငတ်မွတ်၍ သေဆုံးသွားနိုင်လောက်အောင် ဆိုးရွားနေတော့သည်။

‘ကြည့်ရတာ ကုန်သည်အဖွဲ့ တည်ထောင်ခြင်းနဲ့ ဆားချက်ကွင်း လုပ်ငန်းတွေကို အချိန်ဇယားထက် စောပြီး အကောင်အထည်ဖော်ရတော့မယ်၊ မဟုတ်ရင်တော့ ဘယ်လိုမှ အဆင်ပြေမှာ မဟုတ်ဘူး။’

အမှန်အတိုင်း ပြောရလျှင် အကယ်၍ ဝမ်ကျင်းတွင် သူ၏ အစွမ်းထက်စနစ်သာ မရှိခဲ့ပါက ဤကဲ့သို့ ဆိုးရွားလှသော နယ်မြေသို့ ရောက်ရှိလာချိန်တွင် ဆယ်နှစ်၊ အနှစ်နှစ်ဆယ် ကြိုးပမ်းလျှင်ပင် မည်သည့်တိုးတက်မှုမျှ ရရှိနိုင်မည် မဟုတ်ချေ။ လူဦးရေကလည်း ကျဲပါးလှပြီး အခွန်အတုတ်ကလည်း နည်းပါးကာ၊ မြေယာမတရားသိမ်းပိုက်မှုကလည်း ပြင်းထန်လွန်းလှသလို နယ်ခြားမျိုးနွယ်စုများ၏ ကျူးကျော်လုယက်မှု ဘေးအန္တရာယ်ကလည်း အစဉ်အမြဲ ရှိနေခဲ့သည်။ ခွေးတစ်ကောင်တောင်မှ ဤနေရာကို မြင်လျှင် ခေါင်းခါသွားရပေလိမ့်မည်။

သူ၏နောက်မှ လိုက်ပါလာကြသော သူများသည်လည်း တိတ်ဆိတ်စွာဖြင့် စကားတစ်ခွန်းမျှ မဆိုရဲကြချေ။ သူတို့သည် နန်ယန်စီရင်စု၏ အခြေအနေမှာ မည်မျှအထိ ကြပ်တည်းဆိုးရွားနေသည်ကို ကောင်းမွန်စွာ သိရှိထားကြသောကြောင့် ဖြစ်သည်။ အရာရှိဝတ်စုံများ ဆင်ယင်ထားသည့် ဤအရာရှိကြီးငယ်တစ်စုသည် မြို့မလမ်းမကြီးတစ်လျှောက် လျှောက်လှမ်းလာကြစဉ်၊ ဖြတ်သန်းသွားလာနေကြသည့် သာမန်အရပ်သားပြည်သူများသည် အရာရှိများ၏ လမ်းကြောင်းကို မပိတ်ဆို့မိစေရန်အတွက် အဝေးမှနေ၍ ကမန်းကတန်း ရှောင်ကွင်းသွားကြသည်။

ဖြတ်သန်းသွားလာနေသော ပြည်သူအများစု၏ မျက်နှာများမှာ ညှိုးငယ်နေကြပြီး ရုပ်သွင်များမှာ ပိန်ချောင်ကာ၊ ဝဝလင်လင်လည်း မစားရသလို ငတ်မွတ်၍လည်း သေဆုံးခြင်းမရှိသေးသည့် သနားစရာကောင်းလှသော ပုံရိပ်များကို ဖော်ပြနေကြသည်။

ဝမ်ကျင်းသည် လမ်းမကြီး၏ ဝဲယာဘက်ရှိ ဆိုင်ခန်းများကို ကြည့်လိုက်ရာ၊ သူတို့၏ အပြင်အဆင်များမှာ ဟောင်းနွမ်းအိုမင်းနေကြပြီ ဖြစ်သည်။ လမ်းပေါ်တွင် ဖြတ်သန်းသွားလာသူ အလွန်နည်းပါးသဖြင့် အရောင်းအဝယ် လုပ်ငန်းများလည်း ကောင်းမွန်ပုံမရချေ။ နန်ယန်စီရင်စုသည် နယ်စပ်ဒေသတွင် တည်ရှိသဖြင့် ကျော်ကြားသော ဒေသထွက်ပစ္စည်း သို့မဟုတ် ထူးခြားသော လက်မှုပညာရပ်များ မရှိချေ။

စိမ်းစိုထူထပ်သော တောတောင်များမှ ထွက်ရှိသည့် သစ်လုံးအချို့ကိုသာ ရောင်းချရန် ပံ့ပိုးပေးနိုင်ပေသည်။ စီရင်စုတစ်ခု၏ ဗဟိုချက်မ မြို့တော်ဖြစ်သော်လည်း၊ ယင်း၏ စည်ကားဝပြောမှု အဆင့်အတန်းမှာ ချမ်းသာကြွယ်ဝသော အချို့သော ခရိုင်မြို့ငယ်လေးများကိုပင် မမှီချေ။

ဤအရာမှာ မဆန်းလှချေ။ မဟာကျင်းမင်းဆက်၏ ပြည်နယ်ကြီး (၁၆) ခုအနက် ‘လျောင်ပြည်နယ်’ မှလွဲလျှင် ‘ယွဲ့ပြည်နယ်’ သည် အဆင်းရဲဆုံးဖြစ်ပြီး၊ ယွဲ့ပြည်နယ်၏ နယ်မြေ (၁၀) ခုအနက် နန်ယန်စီရင်စုသည် အဆင်းရဲဆုံး ဖြစ်နေသောကြောင့်ပင်ဖြစ်သည်...။

ဝမ်ကျင်းနှင့် အခြားသူများ စီရင်စုရုံးတော်သို့ ပြန်လည်ရောက်ရှိချိန်တွင်မူ ညမှောင်နေခဲ့ပြီ ဖြစ်သည်။ "မိတ်ဆွေတို့... စစ်ဆေးမှုတွေ လုပ်ပြီးတဲ့နောက်မှာ ငါတို့ရဲ့ နန်ယန်စီရင်စုကို တိုးတက်အောင် လုပ်ဖို့အတွက် ရှည်လျားတဲ့ လမ်းကြောင်းကြီး ရှိနေသေးတယ်။ ဒီနေရာကို ကောင်းမွန်စွာ စီမံအုပ်ချုပ်နိုင်ဖို့အတွက် မိတ်ဆွေတို့အားလုံးရဲ့ ကူညီပံ့ပိုးမှုတွေ မရှိရင် မဖြစ်ပါဘူး။"

ထိုသို့ ပြောကြားစဉ် ဝမ်ကျင်းသည် နောက်ဆုံးစကားလုံးအချို့ကို လေးနက်လှသောအသံဖြင့် ဖိပြောခဲ့သည်။

ထပ်မံ၍ စကားအရှည်ကြီး ပြောရန်မလိုတော့ချေ၊ နားလည်သောသူများသည် သဘာဝကျကျပင် သဘောပေါက်သွားကြပေလိမ့်မည်။

အကယ်၍ နားမလည်သောသူများ ရှိခဲ့ပါကလည်း ဝမ်ကျင်းအနေဖြင့် သူတို့အား နားလည်သဘောပေါက်သွားအောင် သင်ခန်းစာ ပေးပါလိမ့်မည်။

"လောလောဆယ်မှာ အကြီးမားဆုံး ပြဿနာကတော့ ဆန်စပါးရိက္ခာ သိုလှောင်မှုဟာ လွန်စွာ နည်းပါးလွန်းနေတာပဲ။ အကယ်၍ ယွဲ့လူမျိုးတွေ နယ်စပ်ကို ကျူးကျော်လာခဲ့ရင် သို့မဟုတ် ဒီနှစ်ရဲ့ ရိတ်သိမ်းမှုသာ ပျက်စီးသွားခဲ့ရင် ငါတို့ရဲ့ နန်ယန်အတွက် ကြီးမားတဲ့ ဘေးဒုက္ခကြီး ဖြစ်လာလိမ့်မယ်။ အချိန်ကျရင် ငါအရာရှိအနေနဲ့ ဧကရာဇ်မင်းမြတ်ကို ဘယ်လိုမျက်နှာပြရတော့မှာလဲ။ ငါ့ရဲ့ လေးစားရတဲ့ ဆရာသခင်ကြီးကိုကော ဘယ်လို ရင်ဆိုင်ရတော့မှာလဲ။"

စကားအဆုံးတွင် ဝမ်ကျင်းသည် စားပွဲခုံကို ခွန်အားအပြည့်ဖြင့် ဝုန်းခနဲ ရိုက်ချလိုက်လေသည်။

သူသည် အောက်တွင် ခေါင်းငိုက်စိုက်ချလျက် ရပ်နေကြသော လူအုပ်ကြီးကို စိုက်ကြည့်လိုက်၏။

ထို့နောက်မှ ဝမ်ကျင်း၏ လေသံမှာ အနည်းငယ် ပျော့ပြောင်းသွားခဲ့သည်။

"အားလုံးပဲ ဒီနေ့ တော်တော်လေး ပင်ပန်းသွားကြပြီ။ ပြန်လည်နားနေနိုင်ကြပါပြီ။"

"မနက်ဖြန်ကျမှ ဆွေးနွေးမှုကို ဆက်ကြစို့။"

အားလုံးသည် စိတ်သက်သာရာရမှုကို ခံစားလိုက်ရပြီး တစ်ယောက်ပြီးတစ်ယောက် ဦးညွှတ်ကာ ထွက်ခွာသွားကြတော့သည်။

စီရင်စုစစ်သေနာပတိ မာကျိ တစ်ဦးသာလျှင် စကားတစ်ခွန်း ပြောချင်သကဲ့သို့ အမူအရာ ဖြစ်ပေါ်ခဲ့သော်လည်း၊ နောက်ဆုံးတွင် ဘာမျှမဆိုဘဲ ခေါင်းခါလျက်သာ ထွက်ခွာသွားခဲ့သည်။

ဝမ်ကျင်းသည် သူ ဘာပြောချင်သည်ကို အကြမ်းဖျင်း ခန့်မှန်းမိသဖြင့် သူ့ကို အတင်းအကျပ် ဆွဲမထားခဲ့ချေ။

သူသည် စီမာယီကို ခေါ်ဆောင်ကာ၊ အချိန်အတော်ကြာ စောင့်ဆိုင်းနေခဲ့သော အာဟူကို ရှာဖွေတွေ့ရှိပြီးနောက် အိမ်တော်သို့ ပြန်လည်ဦးတည်ခဲ့ကြသည်။

မြင်းရထားအတွင်း၌ "စီမာယီ... မင်းရဲ့ အထင်အရတော့ ဒေသခံ ဩဇာကြီးမိသားစုတွေက ‘အခြေအနေကို နားလည်’ ကြပါ့မလား။"

စီမာယီက ပြုံးလျက် ပြန်လည်ဖြေကြားခဲ့သည်။

"သူတို့ နားလည်ကြပါလိမ့်မယ်။ အခြေအနေကို စောင့်ကြည့်ပြီး ဘေးအန္တရာယ်ကို ရှောင်ကွင်းကာ အကျိုးစီးပွားကို ရှာဖွေခြင်းက အဲလို ဩဇာကြီးမိသားစုတွေအတွက် မရှိမဖြစ် သင်ယူထားရမယ့် အခြေခံသင်ခန်းစာတစ်ခု ဖြစ်လို့ပါပဲ။ သူတို့ရဲ့ အခြေခံအုတ်မြစ်ကြီးတစ်ခုလုံးကို လှုပ်ခတ်စေမယ့် ကိစ္စမျိုးမဟုတ်သရွေ့တော့ အရာရာတိုင်းကို ဆွေးနွေးညှိနှိုင်းလို့ ရနိုင်ပါတယ်"

စီမာယီကိုယ်တိုင်ကလည်း ‘စီမာမျိုးနွယ်စု’ ဟူသော ထိပ်တန်းအထက်တန်းလွှာမိသားစုမှ ဆင်းသက်လာသူတစ်ဦး ဖြစ်သဖြင့်၊ မိမိလူတန်းစားအကြောင်းကို မိမိအသိဆုံး ဖြစ်သည်ဟု ဆိုရပေမည်။ "ဒါပေမဲ့... အကယ်၍ သူတို့က အခြေအနေကို နားမလည်ကြဘူးဆိုရင်တော့... ငါတို့ကပဲ သူတို့ကို နားလည်သဘောပေါက်သွားအောင် ကူညီပေးရုံပေါ့။"