အခန်း ၁၈

အခန်း (၁၈)

စီရင်စုစစ်သည်တော်များ

မဟာကျင်းမင်းဆက်၏ စစ်ဘက်ဆိုင်ရာစနစ်သည် ဝမ်ကျင်း၏ယခင်ဘဝက ဟန်မင်းဆက်၏ စစ်စနစ်နှင့် ဆင်တူလှရာ ၎င်းသည် ဧကန်မုချ ထိုစီနီယာ၏ လက်ရာဖြစ်ပေလိမ့်မည်။

မဟာကျင်းမင်းဆက်၏ စစ်ဘက်ဆိုင်ရာ ဖွဲ့စည်းပုံစနစ်မှာ

တပ်မတော်

စစ်သေနာပတိရာထူး - ဗိုလ်ချုပ်ကြီး

တပ်ဖွဲ့အင်အား - အယောက် ၈,၀၀၀

တပ်မဟာ

စစ်သေနာပတိရာထူး - ဗိုလ်မှူးချုပ်

တပ်ဖွဲ့အင်အား - အယောက် ၁,၆၀၀

တပ်ရင်း

စစ်သေနာပတိရာထူး - ဗိုလ်မှူးကြီး

တပ်ဖွဲ့အင်အား - အယောက် ၈၀၀

တပ်ခွဲကြီး

စစ်သေနာပတိရာထူး - စစ်ဘက်ဆိုင်ရာ စီမာ

တပ်ဖွဲ့အင်အား ။ အယောက် ၄၀၀

တပ်ခွဲ

စစ်သေနာပတိရာထူး - စစ်ဘက်ဆိုင်ရာ မားကွစ်

တပ်ဖွဲ့အင်အား - အယောက် ၂၀၀

တပ်စုကြီး

စစ်သေနာပတိရာထူး - ရာခံမှူး

တပ်ဖွဲ့အင်အား - အယောက် ၁၀၀

တပ်စု

စစ်သေနာပတိရာထူး - တပ်စုမှူး

တပ်ဖွဲ့အင်အား - အယောက် ၅၀

တပ်စိတ်

စစ်သေနာပတိရာထူး - တပ်စိတ်မှူး

တပ်ဖွဲ့အင်အား ။ ၁၀ ယောက်

တပ်ဖျား

စစ်သေနာပတိရာထူး - တပ်ဖျားမှူး၊ တပ်ကြပ်

တပ်ဖွဲ့အင်အား - ၅ ယောက်

တပ်မတော်တစ်ခုလျှင် တပ်မဟာငါးခုကို ကွပ်ကဲရပြီး၊ တပ်မဟာတစ်ခုလျှင် တပ်ရင်းနှစ်ခု၊ တပ်ရင်းတစ်ခုလျှင် တပ်ခွဲကြီးနှစ်ခု၊ တပ်ခွဲကြီးတစ်ခုလျှင် တပ်ခွဲနှစ်ခု၊ တပ်ခွဲတစ်ခုလျှင် တပ်စုနှစ်ခု၊ တပ်စုတစ်ခုလျှင် လူငါးဆောက်ကို ကွပ်ကဲသည်။ တပ်စုတစ်ခုသည် လူငါးယောက်ကို ကွပ်ကဲပြီး တပ်စိတ်တစ်ခုသည် တပ်ဖျားနှစ်ခုကို ကွပ်ကဲသည်။

နန်ယန်စီရင်စုသည် နယ်စပ်ဒေသတွင် တည်ရှိသဖြင့် ပြင်ပမှ အန္တရာယ်များကို ကာကွယ်စောင့်ရှောက်ရန် လိုအပ်သောကြောင့် စီရင်စုစစ်သည်တော်အမြောက်အမြားကို စုဆောင်းထားခဲ့ရသည်။ ထိုနေရာတွင် တပ်မတော်နှစ်ခုရှိပြီး ၎င်းတို့ကို မာကျီက ကွပ်ကဲကာ စစ်သေနာပတိများအဖြစ် ဗိုလ်မှူးချုပ် ၁၀ ဦးနှင့် ဗိုလ်မှူးကြီး ၂၀ ဦး ရှိကြသည်။

ဝမ်ကျင်းသည် ကျန်းလျောင်၊ စီမာယီတို့နှင့်အတူ စီရင်စုတပ်မတော်၏ ပင်မစစ်စခန်းကြီးသို့ ထွက်ခွာခဲ့သည်။ စနစ်မှတစ်ဆင့် ခေါ်ယူထားသော စစ်သည်များနှင့် အရပ်သားများသည် ငွေကြေး၊ ရိက္ခာ၊ ချပ်ဝတ်တန်ဆာ၊ စစ်လက်နက်ပစ္စည်းများနှင့် အမျိုးမျိုးသော စစ်အသုံးအဆောင်ပစ္စည်းများကို ပင်မစစ်စခန်းသို့ ပို့ဆောင်ရန် သယ်ယူပို့ဆောင်နေကြသည်။

ရထားလုံးအတွင်း၌မူ ဝမ်ကျင်းသည် ကျန်ရှိတော့သော နှစ်သန်းအောက် လျော့နည်းသည့် စနစ်ရန်ပုံငွေအမှတ်များကို ကြည့်ကာ ရင်ထဲ၌ အောင့်သက်သက်ဖြင့် နှမြောတသ ဖြစ်နေခဲ့သည်။ သို့သော်လည်း ဤအရာများသည် ရှောင်လွှဲ၍မရသော ကုန်ကျစရိတ်များဖြစ်ပြီး စီရင်စုစစ်သည်တော် နှစ်သောင်းကို သူ၏ထိန်းချုပ်မှုအောက်သို့ ဧကန်မုချ သွတ်သွင်းရမည် ဖြစ်သည်။

နောင်အနာဂတ်စစ်ပွဲများတွင် စစ်ပွဲအားလုံးကို စနစ်မှခေါ်ယူထားသော စစ်သည်တော်များဖြင့်သာ တိုက်ခိုက်ရန်မဖြစ်နိုင်ပေ။ အဘယ်ကြောင့်ဆိုသော် ဆုံးရှုံးမှုများသည် လွန်စွာကြီးမားလွန်းသဖြင့် တောင့်ခံနိုင်မည်မဟုတ်သောကြောင့် ဖြစ်သည်။ စနစ်မှ ခေါ်ယူထားသော စစ်သည်တော်များကို အထူးရွေးချယ်ထားသည့် သစ္စာရှိကိုယ်ရံတော်များအဖြစ် ထားရှိကာ စစ်ပွဲ၏အနိုင်အရှုံးကို အဆုံးအဖြတ်ပေးမည့် ကဏ္ဍတွင် အသုံးပြုပြီး၊ ဒေသခံစစ်သည်တော်များကိုမူ အရန်အင်အားနှင့် စတေးခံတပ်ဖွဲ့များအဖြစ် အသုံးပြုခြင်းက အကောင်းဆုံးဖြစ်ပေလိမ့်မည်။

အတွေးကမ္ဘာထဲ၌ နစ်မျောနေစဉ် ရထားလုံး၏ အနည်းငယ် တုန်ခါလှုပ်ရှားမှုကြောင့် ဝမ်ကျင်းသည် မျက်ခွံများ လေးလံလာကာ သတိမထားမိဘဲ အိပ်ပျော်သွားခဲ့တော့သည်။ စီမာယီသည် သူ၏ပုခုံးထက်၌ မှေးစက်နေသော ဝမ်ကျင်းကို ကြည့်ကာ သက်ပြင်းမောချလျက် ခေါင်းကိုခါယမ်းရင်း တိုးညွှတ်စွာ ရေရွတ်လိုက်သည်။

"သခင်ကြီးက ငယ်ရွယ်ပါသေးတယ်။ အုပ်ချုပ်သူတစ်ယောက်အနေနဲ့ တည်ကြည်ခန့်ညားပြီး ဩဇာအာဏာရှိရမယ်။ ဒါပေမဲ့ ရှေ့ဆက်ရမယ့်လမ်းက အဝေးကြီး လိုပါသေးတယ်..."

အချိန်မည်မျှ ကုန်လွန်သွားသည်မသိဘဲ ဝမ်ကျင်းသည် စီမာယီ၏ နှိုးမှုကြောင့် နိုးလာခဲ့သည်။

"သခင်ကြီး... ကျွန်တော်တို့ ရောက်ပါပြီ။ မနေ့က ကြည့်ခဲ့တဲ့ စာရင်းဇယားကို မှတ်မိပါသေးသလား။"

ဝမ်ကျင်းသည် ဝေဝေဝါးဝါးဖြင့် နိုးလာခဲ့ပြီး စီမာယီ၏မေးခွန်းကြောင့် သူ၏ဦးနှောက်မှာ ဗလာဖြစ်သွားကာ မူးဝေစွာဖြင့် ခေါင်းခါပြလိုက်သည်။ ထိုစာရင်းအင်းများ၏ အကြောင်းအရာများသည် မနေ့ညက သူ၏အတွင်းစွမ်းအားအနှစ်သာရ များနှင့်အတူ ခန္ဓာကိုယ်ပြင်ပသို့ စွန့်ထုတ်ခြင်း ခံလိုက်ရပြီထင်ရ၏။

စီမာယီသည် ဝမ်ကျင်း၏ ဝတ်ရုံထက်မှ တွန့်ကြေနေသည်များကို သပ်ရပ်အောင် ပြင်ဆင်ပေးရင်း တိုးညွှတ်စွာ ဆိုလိုက်သည်။

"သခင်ကြီး မမှတ်မိလည်း ကိစ္စမရှိပါဘူး။ သူတို့က အရေးမပါတဲ့ အောက်ခြေစစ်ဗိုလ်လေးတွေတင်ပါ။ ဒီနေ့ သူတို့ကို မျက်နှာသာပေးပြီးတဲ့နောက်... သူတို့ဟာ ခွေးတွေလို သစ္စာရှိလာလိမ့်မယ်၊ မဟုတ်ရင် ခေါင်းဖြတ်ခံရလိမ့်မယ်။ တပ်မတော်ထဲမှာ စိတ်နှစ်ခွဖြစ်ပြီး မတည်ငြိမ်တဲ့သူတွေကို အချင်းချင်း သွေးခွဲဖို့ ကွဲပြားအောင် ချန်ထားလို့မရဘူး။ သခင်ကြီး... စိတ်ပျော့လို့ မဖြစ်ဘူးဆိုတာ သတိရပါ။"

ထိုစကားကို ကြားလိုက်ရသောအခါ ဝမ်ကျင်း၏ မျက်လုံးများ မှေးစင်းသွားပြီး သူ၏ဦးနှောက်မှာ ချက်ချင်းပင် နိုးကြားတက်ကြွသွားခဲ့သည်။

"စိတ်မပူပါနဲ့ စီမာယီ၊ ငါ ဘယ်တော့မှ စိတ်မပျော့စေရဘူး။"

ထိုသို့ပြောပြီးနောက် သူသည် ထရပ်ကာ ရထားလုံးပြင်ပသို့ ခြေလှမ်းလှမ်းလိုက်သည်။

မာကျီနှင့် သူ၏ ဗိုလ်မှူးချုပ် ၁၀ ဦး၊ ဗိုလ်မှူးကြီး ၂၀ ဦးတို့သည် ပင်မစစ်စခန်း၏ အပြင်ဘက်တွင် ရပ်စောင့်နေကြသည်။ ဝမ်ကျင်း ရထားလုံးပေါ်မှ ဆင်းလာသည်ကို မြင်သောအခါ ၎င်းတို့သည် ခရီးဦးကြိုပြုရန် အလျင်အမြန် ရှေ့သို့ တိုးလာကြသည်။ မာကျီနှင့် အခြားသူများသည် ဝမ်ကျင်းနှင့် ကိုက်ငါးဆယ်ခန့်အကွာသို့ ရောက်ရှိလာချိန်တွင် ရထားလုံးဘေး၌ မြင်းစီးလျက် လိုက်ပါလာသော ကျန်းလျောင်က ဟိန်းဟောက်လိုက်သည်။

"ရပ်စမ်း။"

ဝေအင်ပါယာ၏ ရဲရင့်သောမြင်းစီးစစ်သည်အချို့သည် မြင်းများကို အရှိန်မြှင့်တင်ကာ ရှေ့သို့ စီးနင်းသွားပြီး ၎င်းတို့၏ လက်နက်များကို သိမ်းဆည်းလိုက်ကြသည်။ ဤလူများသည် သိုင်းပညာထူးချွန်သူများဖြစ်ကြပြီး အားလုံးမှာ အတွင်းအားအဆင့် ကျွမ်းကျင်သူများ ဖြစ်ကြသည်။ ထို့ပြင် ယခုအချိန်တွင် ၎င်းတို့သည် ချပ်ဝတ်တန်ဆာ အပြည့်အစုံ ဆင်ယင်ထားကြရာ စစ်တပ်အတွင်း သစ္စာဖောက်များ ရှိမရှိကို မရေရာသဖြင့် သတိကြီးစွာ ထားရှိခြင်းက ပို၍စိတ်ချရပေသည်။

၎င်းတို့၏ လက်နက်များအားလုံး အသိမ်းခံလိုက်ရသည်ကို မြင်သောအခါ ဝမ်ကျင်းသည် ရင်းနှီးပျူငှာသော အပြုံးတစ်ခုကို ဖော်ပြလျက် နှုတ်ဆက်ရန် ရှေ့သို့ လှမ်းခဲ့သည်။

အားလုံးက အလျင်အမြန် ဦးညွှတ်အရိုအသေပြုလိုက်ကြသည်။ "စီရင်စုမင်းကြီးကို ဂါရဝပြုအပ်ပါတယ်"

"အားနာစရာမလိုပါဘူး စစ်သူကြီးတို့။ အားလုံး အသင့်ဖြစ်ပြီလား။"

မာကျီသည် လက်ဝါးချင်းယှက်ကာ အရိုအသေပြုလျက် လျှောက်တင်လိုက်သည်။ "ဤစီရင်စု၏ စစ်သည်တော်အားလုံး လေ့ကျင့်ရေးကွင်းပြင်မှာ စုဝေးရောက်ရှိနေကြပြီး သခင်ကြီး၏ စစ်ဆေးမှုကို စောင့်ဆိုင်းနေကြပါတယ်"

"ကောင်းပြီ... လမ်းပြချေ။"

"အမိန့်အတိုင်းပါ"

ဝမ်ကျင်းသည် ခရီးဦးကြိုပြုသူများကို အကြမ်းဖျင်းအားဖြင့် အကဲခတ်ကြည့်ရှုလိုက်သည်။ ဗိုလ်မှူးချုပ် ၁၀ ဦးမှာ မာကျီထက် ပိုမိုရိုးရှင်းသော သံချပ်အင်္ကျီများကို ဆင်ယင်ထားကြသဖြင့် အတော်အတန် ကြည့်ကောင်းသေးသည်။ ဟောင်းနွမ်းနေသော်လည်း အသုံးပြု၍ ရနိုင်သေးပေသည်။ ကျန်ရှိသော ဗိုလ်မှူးကြီးများမှာမူ သံချပ်ဝတ်စုံအပြည့်အစုံပင် မရှိကြချေ။ အများစုမှာ သံဦးထုပ်နှင့် သားရေချပ်ဝတ်ကိုသာ ဝတ်ဆင်ထားကြသဖြင့် လွန်စွာ နွမ်းပါးချို့တဲ့ပုံ ပေါက်နေခဲ့သည်။

ဤအချက်ကို ကြည့်ခြင်းအားဖြင့် အခြေအနေမှာ ပိုမိုကောင်းမွန်သည်ဟု ဆိုရမည်။ အနည်းဆုံးတော့ မာကျီသည် နန်းတွင်း၏ စစ်အာဏာကို ဆုပ်ကိုင်ထားနိုင်ဆဲဖြစ်ပြီး ပြင်ပမှ မည်သည့်စွက်ဖက်မှုကိုမျှ ခွင့်မပြုခဲ့ပေ။

ဝမ်ကျင်းက ၎င်းတို့ကို စောင့်ကြည့်နေစဉ် ၎င်းတို့ကလည်း မိမိတို့၏ အသစ်ခန့်အပ်ခံရသော အထက်လူကြီးကို အကဲခတ်နေကြသည်။ သူသည် ငယ်ရွယ်သော်လည်း သူ၏အရာရှိဝတ်ရုံသည် ထူးကဲလှသော အရှိန်အဝါနှင့် ခန့်ညားမှုကို ပေါ်လွင်စေသည်။ အထူးသဖြင့် သိုင်းပညာရှင်တို့၏ အသိစိတ်အရ ကျန်းလျောင်ထံမှ ထွက်ပေါ်နေသော ဖိအားများကို ခံစားမိကြရာ ဝမ်ကျင်းအပေါ် ပိုမို၍ ရိုသေခန့်ညားစိတ်များ ဖြစ်ပေါ်လာစေသည်။

၎င်းတို့နောက်ကွယ်မှ အဆုံးမရှိသော ရထားလုံးယာဉ်တန်းကြီးကို သတိပြုမိသောအခါ ၎င်းတို့၏နှလုံးသားများသည် ပိုမိုလှုပ်ရှားတက်ကြွလာခဲ့သည်။ ထို့ပြင် ဝမ်ကျင်း၏ ဘေးပတ်လည်ရှိ ချပ်ဝတ်တန်ဆာအပြည့်ဖြင့် စွမ်းအားပြည့်ဝနေသော ကိုယ်ရံတော်များကို မြင်ရသောအခါ စီရင်စုမင်းကြီး၏ ကြီးမားလှသော ငွေကြေးအင်အားနှင့် အနောက်ခံအင်အားကို ရိပ်မိနိုင်ကြပေသည်။ ၎င်းတို့၏ ဗိုလ်မှူးကြီးများ၏ ဝတ်စုံများသည်ပင်လျှင် သူ၏ ဘေးပတ်လည်မှ ကိုယ်ရံတော်များ၏ ဝတ်စုံများကို မမှီကြချေ။

လူစုသည် ခန့်ညားထည်ဝါစွာဖြင့် လေ့ကျင့်ရေးကွင်းပြင်ဆီသို့ ချီတက်ခဲ့ကြသည်။

ဝမ်ကျင်းနှင့် အခြားသူများသည် လေ့ကျင့်ရေးကွင်းပြင်၏ ရှေ့မှောက်ရှိ စစ်သူကြီးစင်မြင့်ဆီသို့ လျှောက်လှမ်းသွားချိန်တွင် အောက်ခြေ၌ တိတ်ဆိတ်ခြင်းများ ဖုံးလွှမ်းသွားပြီး စစ်သည်တော်များသည် ငြိမ်သက်စွာ မတ်တတ်ရပ်နေကြသည်။ ဝမ်ကျင်းသည် မာကျီ၏ စစ်စည်းကမ်းစနစ်ကျမှုကို စိတ်ထဲမှ မချီးကျူးဘဲ မနေနိုင်ခဲ့ချေ။ သူသည် ဧကန်မုချ စစ်တပ်ကို ကွပ်ကဲရာတွင် ထူးချွန်သော ပါရမီရှင်တစ်ဦး ဖြစ်ပေသည်။

ဝမ်ကျင်းသည် အားလုံးကို ဦးဆောင်ကာ စစ်သူကြီးစင်မြင့်ထက်သို့ တက်ရောက်ပြီး အောက်သို့ ငုံ့ကြည့်လိုက်သည်။ ရှေ့ဆုံးတန်းမှ စစ်သည်တော်များမှာ အခြေအနေ ပိုကောင်းကြပြီး သားရေချပ်ဝတ်များ ဝတ်ဆင်ကာ လက်နက်များကို ကိုင်ဆောင်ထားကြလျက် စစ်စိတ်စစ်မာန် တက်ကြွနေကြသည်။ နောက်သို့ ရောက်လေလေ ၎င်းတို့၏ စစ်အသုံးအဆောင်ပစ္စည်းများသည် ဟောင်းနွမ်းဆိုးရွားလာလေဖြစ်ပြီး အချို့ဆိုလျှင် သားရေချပ်ဝတ်ပင် မရှိကြချေ။

အောက်ခြေရှိ စစ်သည်တော်များကို ကြည့်ရင်း ဝမ်ကျင်းသည် လည်ချောင်းကို တစ်ချက်ရှင်းလိုက်သည်။

"အရာရှိများနှင့် စစ်သည်တော်အပေါင်းတို့... ငါက ဒီစီရင်စုရဲ့ စီရင်စုမင်းကြီးအသစ် ပဲ"

ထို့နောက် သူသည် ခေတ္တမျှ ရပ်တန့်ကာ အောက်ခြေရှိ အမိန့်ပြန်စစ်သည်တော်များက သူ၏စကားကို တပ်မတော်တစ်ခုလုံးသို့ ထပ်ဆင့်ကြေညာပေးသည်ကို စောင့်ဆိုင်းလိုက်သည်။ ခဏအကြာတွင်

"ဒီအရာရှိ ရောက်ရှိလာတဲ့အခါ ယွဲ့လူမျိုးတွေရဲ့ စဉ်ဆက်မပြတ် နှောင့်ယှက်ဖျက်ဆီးမှုတွေကြောင့် စီရင်စုအတွင်းက ပြည်သူတွေရဲ့ စားဝတ်နေရေးဟာ ဆင်းရဲကျပ်တည်းနေပြီး ငွေကြေးနဲ့ ရိက္ခာတွေ ပြတ်လပ်နေတာကို သိရှိခဲ့ရတယ်။ သင်တို့ထဲက အများအပြားဟာ စစ်လစာတွေကို မရရှိခဲ့တာ ကြာမြင့်နေပြီဖြစ်တယ်။ ဒါပေမဲ့ အခုအချိန်မှာတော့။ ဒီအရာရှိ ရောက်ရှိလာပြီ။"

ငွေကြေးနှင့် ရိက္ခာများကို ခွဲဝေပေးနိုင်သော်လည်း အောက်ခြေရှိ သာမန်စစ်သည်တော်များအနေဖြင့် ဤအရာများကို မည်သူက ပေးသနားသည်ကိုလည်းကောင်း၊ နောင်အနာဂတ်တွင် မည်သူ့အတွက် တိုက်ပွဲဝင်ရမည်ကိုလည်းကောင်း သိရှိရန် လွန်စွာ အရေးကြီးလှပေသည်။

အမိန့်ပြန်စစ်သည်က စကားကို ထပ်ဆင့်ကြေညာပြီးနောက် ဝမ်ကျင်းသည် ဝေအင်ပါယာ မြင်းစီးစစ်သည်တစ်ဦးကို လက်ဟန်ပြလိုက်ရာ ယူဆောင်လာသော သေတ္တာပေါင်း ဒါဇင်ပေါင်းများစွာကို စင်မြင့်ထက်သို့ သယ်ဆောင်လာခဲ့ကြသည်။ ထို့နောက် သေတ္တာအားလုံးကို ဖွင့်လှစ်ကာ မှောက်ချလိုက်ရာ တောက်ပပြောင်လက်နေသော ငွေသားပုံကြီးများသည် ချက်ချင်းပင် လျှံကျလာခဲ့တော့သည်။

ဤအရာသည် ချပ်ဝတ်တန်ဆာ အပြည့်အစုံပင် မဝယ်ယူနိုင်ကြသော စင်မြင့်ထက်မှ ဆင်းရဲနွမ်းပါးလှသည့် စစ်သူကြီးများကို အံ့အားသင့်သွားစေရုံသာမက အောက်ခြေရှိ ငတ်မွတ်နေသော သာမန်စစ်သည်တော်များကိုပါ စိတ်လှုပ်ရှားတက်ကြွစေသဖြင့် ၎င်းတို့သည် ဝမ်းသာအားရ ဟိန်းဟောက် အော်ဟစ်လိုက်ကြသည်။

ခဏမျှအတွင်း အောက်ခြေ၌ တိုးတိုးတိုးတိုး ပြောဆိုသံများ ထွက်ပေါ်လာပြီး စနစ်ကျလှသော စစ်ဗျူဟာတပ်ကွင်းကြီးသည်ပင် စတင်လှုပ်ခတ်သွားခဲ့သည်။

ကျန်းလျောင်သည် ရှေ့သို့ ခြေတစ်လှမ်းတိုးကာ အသက်ကို ပြင်းထန်စွာ ရှူသွင်းလိုက်ပြီး သူ၏ခန္ဓာကိုယ်ဘေးပတ်လည်တွင် ‘ကန်းချီ အကာအကွယ်အရှိန်အဝါ’ များ လှည့်ပတ်စီးဆင်းစေလျက် ထိုအရှိန်အဝါများ ပါဝင်သော ဟိန်းဟောက်သံတစ်ချက်ကို လွှတ်ထုတ်လိုက်သည်။

"တိတ်စမ်း။"

အောက်ခြေရှိ ဆူညံသံများသည် ချက်ချင်းပင် ရုတ်ချည်း ငြိမ်သက်သွားခဲ့သည်။ မာကျီ၏ မျက်နှာအမူအရာမှာ တည်ကြည်လေးနက်သွားပြီး စိတ်ထဲမှ ရေရွတ်လိုက်သည်။

'မျှော်လင့်ထားတဲ့အတိုင်းပဲ... သူက တကယ့်ကို ကန်းချီအဆင့် သခင်ကြီးတစ်ဦးပဲ။ ဒီလို ကန်းချီအဆင့် မြင့်မြတ်တဲ့ ပညာရှင်တစ်ယောက်က ဘာကြောင့် ဒီလိုနေရာမျိုးမှာ အောက်ကျနောက်ကျ လာရောက်ခစားနေလဲဆိုတာ ငါ တကယ်ကို စဉ်းစားလို့မရဘူး။'

ကျန်းလျောင်၏ ဘေးပတ်လည်၌ စိမ်းစိုသော ကန်းချီအကာအကွယ်အရှိန်အဝါများ လှည့်ပတ်နေသည်ကို မြင်လိုက်ရသောအခါ စိတ်ထဲ၌ လျှို့ဝှက်အကြံအစည်ငယ်များ ရှိနေကြသော စစ်သူကြီးများနှင့် အရာရှိအချို့သည် ၎င်းတို့၏ အတွေးများကို ချက်ချင်းပင် လက်လွှတ်လိုက်ကြတော့သည်။ နောက်ပြောင်နေတာလား။ ကန်းချီ အဆင့်ရှိတဲ့ ကျင့်ကြံသူ ပညာရှင်တစ်ဦးလေ။ လောကကြီးတစ်ခုလုံးမှာပင် ထိုသို့သောသူ လက်ချိုးရေတွက်လို့ရရုံသာ ရှိသည်။ ယခု သူတို့၌ လူအင်အား မည်မျှပင် များပြားနေပါစေ... အကယ်၍ အားလုံးက ရှေ့သို့ တစ်ပြိုင်နက် တိုးဝင်သွားလျှင်ပင် တစ်ယောက်ချင်းစီ ခုတ်ထစ်ခံရရုံသာ ရှိလိမ့်မည်။ အတွင်းအား နှင့် ကန်းချီအကာအကွယ်အရှိန်အဝါတို့အကြား ကွာခြားချက်မှာ လွန်စွာ ကြီးမားလွန်းလှပေသည်။

အောက်ခြေရှိ သာမန်စစ်သည်တော်များသည် ထိုအကာအကွယ်အရှိန်အဝါဖြင့် ပေးပို့လိုက်သော ဟိန်းဟောက်သံကြောင့် ပိုမို၍ မှင်တက်သွားကြသည်။ လူတစ်သောင်းကို တစ်ကိုယ်တည်းဖြင့် တားဆီးနိုင်သည်ဟု ဒဏ္ဍာရီလာရှိသော ကန်းချီအဆင့် သခင်ကြီး၏ အရှိန်အဝါသည် ငွေစင်များကြောင့် ဖြစ်ပေါ်လာသော လှုပ်ရှားရုန်းကြွမှုများကို တစ်ခဏချင်းအတွင်း ငြိမ်သက်သွားစေခဲ့သည်။

ဝမ်ကျင်းသည် ချက်ချင်း ငြိမ်သက်သွားသော ကွင်းပြင်ကြီးကို ကြည့်ကာ စိတ်ထဲမှ မချီးကျူးဘဲ မနေနိုင်ခဲ့ချေ။ 'ငါ့ရဲ့ စစ်သူကြီးကတော့ တကယ့်ကို အလန်းစားပဲ။'

"ဒီအရာရှိက အစိုးရရုံးတော်က သင်တို့ကို ပေးဖို့ ကြွေးတင်ကျန်နေတဲ့ စစ်တပ်လစာအားလုံးကို အကြေအလည် ပေးချေမှာဖြစ်ပြီး တပ်မတော်တစ်ခုလုံးရဲ့ စစ်လက်နက်ပစ္စည်းတွေကိုလည်း အသစ်လဲလှယ်ပေးမယ်။"

တောက်ပသော ငွေစင်ပုံကြီးများကို မိမိတို့၏ မျက်စိရှေ့မှောက်တွင် မြင်တွေ့နေရသဖြင့် မည်သူမျှ သံသယမဝင်ရဲကြတော့ဘဲ တပ်မတော်တစ်ခုလုံးသည် ကောင်းကင်ယံ တုန်ဟိန်းသွားမတတ် သောင်းသောင်းဖျဖျ အော်ဟစ်ဆုတောင်း အားပေးခဲ့ကြသည်။

အားလုံး ပြန်လည်တည်ငြိမ်သွားပြီးနောက် ဝမ်ကျင်းသည် စနစ်ထံမှ ဝယ်ယူထားသော ချပ်ဝတ်တန်ဆာများကို စင်မြင့်ထက်ရှိ စစ်သူကြီးများနှင့် အရာရှိများထံသို့ တစ်ဦးလျှင် တစ်စုံစီ ကိုယ်တိုင်ကိုယ်ကျ လွှဲပြောင်းပေးအပ်ခဲ့သည်။ အမျိုးမျိုးသော စစ်အသုံးအဆောင်ပစ္စည်းများ တင်ဆောင်ထားသည့် လှည်းကြီးအမြောက်အမြားကိုလည်း စစ်သည်တော်များ၏ မျက်စိရှေ့မှောက်တွင်ပင် စစ်လက်နက်တိုက်အတွင်းသို့ ခွဲဝေရန်အတွက် တွန်းရွှေ့သွင်းလိုက်ကြသည်။

ယခုအချိန်တွင် တပ်မတော်တစ်ခုလုံး၏ အထက်မှအောက်ခြေအထိ လူတိုင်းသည် ဝမ်ကျင်းကို လွန်စွာ ကြည်ညိုလေးစားသော မျက်လုံးများဖြင့် ကြည့်ရှုနေကြတော့သည်။ ငွေကြေးများကို ရက်ရောစွာ သုံးဖြန်းခြင်းသည် ရိုးရှင်းကြမ်းတမ်းလှသည်ဟု ထင်ရသော်လည်း ဧကန်မုချ အထိရောက်ဆုံးသော နည်းလမ်းပင် ဖြစ်ပေသည်။

အကယ်၍ နောင်တွင် ဝမ်ကျင်း၏ အမိန့်တော်သည် မာကျီ၏ အမိန့်နှင့် ကွဲလွဲလာခဲ့လျှင်ပင် လူအများစုသည် တွန့်ဆုတ်ခြင်းမရှိဘဲ ဝမ်ကျင်းနောက်သို့ လိုက်ပါကြမည် ဖြစ်သည်။ ကျန်ရှိသောလူအနည်းငယ်မှာ ဝေခွဲမရ ဖြစ်နေနိုင်သော်လည်း အမိန့်ကိုမူ ဆန့်ကျင်ရဲကြမည် မဟုတ်ပေ။ ဤမျှဆိုလျှင်ပင် လုံလောက်နေပြီ ဖြစ်သည်။