အခန်း ၄၉

အခန်း (၄၉)

သံတမန်ရေးရာ တာဝန်

ချီဝေသည် တည်ကြည်လေးနက်သော မျက်နှာအမူအရာဖြင့် တံဆိပ်တုံးအား ချီယန်ထံသို့ ကမ်းပေးလိုက်ပြီး သူ၏ပုခုံးကို အားပေးသည့်အနေဖြင့် ပုတ်ပေးလိုက်သည်။

"ယန်အာ... ဒီခရီးက ငါတို့မိသားစုအတွက်တင်မကဘူး၊ နန်ယန်နဲ့ မဟာကျင်းနိုင်ငံတော်တစ်ခုလုံးအတွက်ပါ ဖြစ်တယ်။ မင်းထမ်းဆောင်ရမယ့် တာဝန်က တကယ်ကို ကြီးမားလှတယ်။"

ချီယန်၏ ချောမောသော မျက်နှာထက်တွင် ပြတ်သားသော အမူအရာတစ်ခု ပေါ်လာပြီး သူ၏မျက်လုံးများမှာလည်း စိတ်အားထက်သန်မှု၊ တိုက်ခိုက်လိုစိတ်တို့ဖြင့် တောက်ပနေခဲ့သည်။ ချီမိသားစု၏ အကြီးဆုံး သားအရာရှိ ပီပီ၊ သူသည် မိသားစု၏ အရင်းအမြစ်များကို အပြည့်အဝ အသုံးချခွင့်ရရှိခဲ့ပြီးဖြစ်ရာ မိသားစုအတွက် ပြန်လည်စွမ်းဆောင်ရမည့် အချိန်တွင် တာဝန်ကို ရှောင်လွှဲ၍မရမှန်း သိထားပေသည်။

ယခုအချိန်တွင် သူတို့၏ ချီမိသားစုမှာ အနည်းငယ် ဆုတ်ယုတ်ကျဆင်းနေပြီ ဖြစ်သော်လည်း၊ သူတို့၏ ဘိုးဘေးများမှာ နာမည်ကျော် အရာရှိကြီးများ ဖြစ်ခဲ့ကြသည်။ ဘိုးဘေးတို့၏ ဂုဏ်သိက္ခာကို ပြန်လည်ဆယ်တင်ပြီး မိသားစု၏ အရှိန်အဝါကို ပြန်လည်ဆန်းသစ်စေခြင်းသည် မြင့်မြတ်သောအထက်တန်းလွှာ မိသားစုမှ သခင်လေးတိုင်း၏ ရည်မှန်းချက်ပန်းတိုင်ပင် ဖြစ်ပေသည်။

ယခုမူ ထိုအခွင့်အရေးသည် သူ၏ မျက်စိရှေ့မှောက်သို့ ရောက်ရှိလာပြီ ဖြစ်ရာ ချီယန်၏ ရင်ထဲတွင် ရဲရင့်ထက်သန်သော စိတ်ဓာတ်များ လှိုင်းလုံးပမာ ထကြွလာတော့သည်။ သူသည် သဘာဝအရ တည်ငြိမ်သူတစ်ဦး ဖြစ်သော်လည်း လူငယ်တို့၏ ရင်တွင်းအရှိန်အဝါကြောင့် စိတ်လှုပ်ရှားမှုကို မထိန်းနိုင်ဘဲ ရှိနေခဲ့သည်။

ချီဝေသည် စိတ်လှုပ်ရှားနေသော သူ၏သားကို ကြည့်ရင်း သူ၏ မျက်နှာအမူအရာမှာ တဖြည်းဖြည်း လေးနက်သွားခဲ့သည်။ စိတ်ထဲတွင် စိုးရိမ်ပူပန်နေမိသော်လည်း နုတ်မှမူ ဆုံးမပဲ့ပြင်သည့် လေသံဖြင့် ပြောလိုက်သည်။

"သံတမန်တစ်ယောက် လုပ်ရတယ်ဆိုတာ ကြီးမားတဲ့ ကိစ္စရပ်တစ်ခု ဖြစ်တယ်၊ အရာရာတိုင်းမှာ သတိထားဖို့ လိုအပ်တယ်။ မင်းက ငါတို့ချီမိသားစုရဲ့ ပါရမီရှင် သားကောင်းပဲ။ မိသားစုရဲ့ ကြီးပွားတိုးတက်မှုက မင်းရဲ့ ပုခုံးပေါ်မှာ တည်ရှိနေတာ။ ဘယ်တော့မှ မင်းကိုယ်မင်း အန္တရာယ်ရှိတဲ့ အခြေအနေထဲ မတွန်းပို့စေနဲ့။"

ဆုံးမစကားများမှာ သူ၏ နက်ရှိုင်းသော ဂရုစိုက်မှုကို မဖုံးကွယ်နိုင်ခဲ့ချေ။ သို့သော် ဤတာဝန်အတွက် ချီမိသားစုသည် အသင့်တော်ဆုံး ဖြစ်ပြီး ယွဲ့ဒေသအပေါ် သူတို့၏ နားလည်တတ်ကျွမ်းမှုကြောင့် အခြားမည်သူမဆိုထက် ဤတာဝန်ကို ပိုမိုကောင်းမွန်စွာ ထမ်းဆောင်နိုင်မည် ဖြစ်သည်။

ချီမိသားစုအတွင်း၌လည်း ချီယန်တစ်ဦးတည်းသာ အသင့်တော်ဆုံး ဖြစ်ပေသည်။ နယ်စားမင်း ဝမ်၏ ဆိုလိုရင်းမှာ အလွန်ရှင်းလင်းပါသည်။ ချီမိသားစုအနေဖြင့် သံတမန်အဖြစ် မည်သူ့ကိုမဆို ရွေးချယ်နိုင်ပြီး၊ တာဝန်ပြီးဆုံးပါက ထိုသူကို ခရိုင်မြို့ဝန်ရာထူး ခန့်အပ်ပေးမည် ဖြစ်သည်။

ချီမိသားစုအနေဖြင့် ဤမျှကြီးမားသော ဆွဲဆောင်မှုကို ငြင်းပယ်နိုင်စွမ်း မရှိချေ။ ချီမိသားစုအတွင်း၌လည်း ချီဝေနှင့် ချီယန် နှစ်ဦးတည်းသာ ဤတာဝန်ကို ထမ်းဆောင်နိုင်စွမ်း ရှိကြသည်။ ချီဝေသည် အသက်ကြီးရင့်နေပြီဖြစ်ရာ ဤအခွင့်အရေးကို သူ၏သားဖြစ်သူအား ပေးလိုခြင်း ဖြစ်သည်။ အစိုးရအရာရှိလောကထဲသို့ အသက်ငယ်ငယ်ရွယ်ရွယ်ဖြင့် ဝင်ရောက်နိုင်လေ ပိုကောင်းလေပင်။ ထို့အပြင် တစ်ခုခု အမှားအယွင်း ဖြစ်သွားခဲ့လျှင်ပင် မိသားစုတစ်ခုအနေဖြင့် ဆက်ခံမည့်သူ ဆုံးရှုံးနိုင်သော်လည်း မိသားစုအကြီးအကဲကိုမူ ဆုံးရှုံး၍မဖြစ်ချေ။

ချီဝေ၏ ဂရုစိုက်မှုနှင့် စိုးရိမ်ပူပန်မှု စကားများကို ကြားရသောအခါ၊ ချီယန်သည် သူထွက်ခွာသွားပြီးနောက် ဖခင်ဖြစ်သူ စိုးရိမ်သောကရောက်နေမည်ကို စိုးရိမ်သဖြင့် ပြောလိုက်သည်။

"အဖေ... စိတ်ချပါ။ ဒီခရီးစဉ်မှာ အရှင်မင်းကြီး စေလွှတ်ပေးလိုက်တဲ့ သိုင်းပညာရှင်တွေ ဝန်းရံစောင့်ရှောက်သွားမှာ ဖြစ်သလို၊ ယွဲ့ဒေသမှာလည်း အစိုးရဝန်ထမ်းတွေ အများကြီး ရှိပါတယ်။ သားရဲ့ လုံခြုံရေးကတော့ စိတ်ချရပါတယ်။"

"ဒါ့အပြင် အဲဒီလော့နန်နိုင်ငံက အခုအချိန်မှာ အတွင်းဘေး အပြင်ဘေးတွေနဲ့ ရင်ဆိုင်နေရတာပါ။ ဥတွေဆင့်ထားသလိုမျိုး အလွန်အန္တရာယ်ကြီးတဲ့ အခြေအနေကို ရောက်နေတာမို့လို့ သူတို့တွေ မဟာမိတ် လိုအပ်နေတဲ့ အချိန်ဖြစ်မှာ သေချာပါတယ်။ သားအနေနဲ့ ဒီခရီးကနေ အောင်မြင်စွာ ပြန်လာနိုင်မယ်လို့ ယုံကြည်ချက်ရှိပါတယ်။ အကယ်၍ မဟာမိတ်ကိစ္စ ပျက်ပြားသွားရင်တောင် သူတို့တွေ သားရဲ့ ဆံခြည်တစ်မျှင်ကိုတောင် ထိဝံ့မှာ မဟုတ်ပါဘူး။ လူရိုင်းမျိုးနွယ်စုရဲ့ ရိုက်နှက်မှုကို ခံနေရတဲ့ နိုင်ငံငယ်လေးတစ်နိုင်ငံက ကျွန်တော်တို့ရဲ့ မဟာကျင်းနိုင်ငံတော်ကြီးကို ဘယ်လိုလုပ်ပြီး ရန်စဝံ့မှာလဲ။"

သူ့ကို နှစ်သိမ့်ပေးသော ချီယန်၏ စကားများကို ကြားရသောအခါ ချီဝေလည်း အမှန်တကယ်ပင် ထိုသို့ တွေးမိထားပြီးသား ဖြစ်သည်။ သို့မဟုတ်ပါက သူသည် မိမိ၏ တန်ဖိုးအထားဆုံး အကြီးဆုံးသားကို သံတမန်အဖြစ် စေလွှတ်မည် မဟုတ်ချေ။ ထို့ကြောင့် သူ၏ မျက်မှောင်ကြုတ်နေမှုများမှာ များစွာ လျော့ပါးသက်သာသွားခဲ့သည်။

ဖခင်ဖြစ်သူ၏ မျက်နှာအမူအရာ လျော့ကျသွားသည်ကို မြင်လျှင် ချီယန်က ခေတ္တမျှ စဉ်းစားပြီး ပြောလိုက်သည်။

"ရှောင်ကျိ ကိုလည်း သားနဲ့အတူ ခေါ်သွားခွင့်ပြုပါဦး၊ သူ့အတွက်လည်း အမြင်ကျယ်သွားတာပေါ့။ သူ တစ်နေကုန် အိမ်ထဲမှာပဲ ပုန်းပြီး သိုင်းကျင့်နေတာ၊ သူ့ဦးနှောက်တွေ တုံးအကုန်တော့မယ်။"

ချီယန်သည် သူ၏ ညီဖြစ်သူကို အမြဲတစေ စိတ်ပူပေးတတ်ဆဲ ဖြစ်သည်။ ယွီလော့ကို ဝမ်ကျင်းထံသို့ ဆက်သလိုက်ရကတည်းက ချီကျိသည် အမြဲတမ်း စိတ်မကောင်းဖြစ်ကာ မှိုင်တွေနေခဲ့သည်။ ချီယန်ကဲ့သို့သော လူမျိုးများအတွက်မူ 'ချစ်သော်လည်း မပိုင်ဆိုင်ရခြင်း' ၏ အဓိပ္ပာယ်ကို အပြည့်အဝ နားမလည်နိုင်ကြချေ။

သူသည် အနောက်ဘက်ဒေသမှ ကချေသည်မလေးများကို ချီကျိထံသို့ ပို့ပေးခဲ့သော်လည်း ချီကျိက အထူးတလည် စိတ်ဝင်စားခြင်း မရှိသည်ကိုသာ သိထားသည်။ ထို့ကြောင့် ချီယန်က သူ၏ ညီလေးသည် ယွဲ့ဒေသမှ မိန်းကလေးများကိုသာ ကြိုက်နှစ်သက်ခြင်း ဖြစ်နိုင်သည်ဟု တွေးတောမိကာ၊ လော့နန်နိုင်ငံသို့ ခေါ်သွားပြီး ယွဲ့မိန်းကလေး အမြောက်အမြားကို ပြသကာ စိတ်ပြေလက်ပျောက် ဖြစ်စေရန် ဆုံးဖြတ်လိုက်ခြင်း ဖြစ်သည်။

ထိုစကားကို ကြားသောအခါ ချီဝေက သက်ပြင်းချရင်း ခေါင်းခါလိုက်ပြီး သဘောတူလိုက်လေသည်။ သူ အပြင်ထွက်ပြီး အမြင်ကျယ်လာခြင်းက ကောင်းမွန်သောအရာ ဖြစ်သည်။ ထို့အပြင် ချီကျိသည် လူအေးသော်လည်း သိုင်းပညာတွင်မူ ထူးချွန်သော ပါရမီရှိရာ၊ ချီကျိ အတူလိုက်ပါသွားခြင်းက သူတို့အတွက် လုံခြုံရေး နောက်ထပ်အလွှာတစ်ခု ထပ်တိုးလာသကဲ့သို့ ဖြစ်စေမည်ဖြစ်သည်။

အထုပ်အပိုးများ ပြင်ဆင်ပြီးနောက်၊ ချီယန်သည် ချီကျိ အပါအဝင် ဝမ်ကျင်း စီစဉ်ပေးလိုက်သော ကိုယ်ရံတော်များနှင့်အတူ လော့နန်နိုင်ငံသို့ ခရီးစတင် ထွက်ခွာခဲ့တော့သည်။

တစ်ချိန်တည်းမှာပင်၊ ပင်းပြည်နယ်မှ ထွက်ခွာလာခဲ့သော လီအန်းသည်လည်း နန်ယန်စီရင်စုသို့ ရောက်ရှိလာခဲ့ပြီ ဖြစ်သည်။ သူသည် ရထားလုံးပေါ်မှ လိုက်ကာကို ပင့်တင်လိုက်ပြီး နန်ယန်စီရင်စုရှိ လမ်းမဘေးဝဲယာတွင် အသစ်တည်ဆောက်ထားသော ဆိုင်ခန်းများ၊ သပ်ရပ်သန့်ရှင်းသော လမ်းမကြီးများ၊ ကျောက်တုံးကျောက်ခဲပစ္စည်းများကို သယ်ယူပို့ဆောင်နေကြသော ယွဲ့လူမျိုးကျွန်များ၊ စည်ကားလှုပ်ရှားနေသော လူအုပ်ကြီးနှင့် လမ်းဘေးဈေးသည်များ၏ အဆက်မပြတ် အော်ဟစ်ရောင်းချနေသံများကို ကြည့်ရှုလေ့လာနေခဲ့သည်။

"ဟူး... တကယ်ကို မလွယ်ကူလှဘူးပဲ။ ဆင်းရဲမွဲတေပြီး ပျက်စီးယိုယွင်းနေတဲ့ နန်ယန်စီရင်စုကို ဒီလောက်တိုတောင်းတဲ့ အချိန်အတွင်းမှာ ဒီလိုအခြေအနေမျိုး ရောက်အောင် စီမံအုပ်ချုပ်နိုင်တာကို ကြည့်ရင် သူက တကယ်ကို ထူးချွန်တဲ့ အရည်အချင်းရှိသူပဲ။"

"သူက နယ်မြေချဲ့ထွင်နိုင်ရုံတင်မကဘူး၊ တိုင်းပြည်ကိုလည်း ကောင်းကောင်း အုပ်ချုပ်နိုင်တာပဲ။"

နန်ယန်စီရင်စု၏ လက်ရှိအခြေအနေက ပင်းပြည်နယ်မှ ရောက်ရှိလာသော ဤသခင်လေး လီအား အနည်းငယ် တုန်လှုပ်အံ့ဩသွားစေခဲ့သည်။

သူ့တွင် အတွေ့အကြုံ မရှိခြင်းကြောင့် မဟုတ်ချေ။ ဆန့်ကျင်ဘက်အနေဖြင့်၊ သူသည် အတွေ့အကြုံ အလွန်ရင့်ကျက်သူ ဖြစ်သောကြောင့် တိုင်းတစ်ပါးမျိုးနွယ်စုများ၏ မကြာခဏ နှောင့်ယှက်ဖျက်ဆီးခြင်းကို ခံရတတ်သော နယ်စပ်စီရင်စုတစ်ခုကို ဤမျှတိုတောင်းသော အချိန်အတွင်း ဤကဲ့သို့ တိုးတက်အောင် လုပ်ဆောင်ရန် မည်မျှခက်ခဲကြောင်း ကောင်းစွာ သိရှိထားခြင်း ဖြစ်သည်။ အင်အားသုံး၍ တိုင်းတစ်ပါးမျိုးနွယ်စုများကို အောင်နိုင်ရုံသာမက တစ်ပြိုင်နက်တည်းမှာပင် စီးပွားရေးကိုပါ တိုးတက်အောင် လုပ်ဆောင်နိုင်ခြင်းသည် လျစ်လျူရှု၍မရသော အောင်မြင်မှုတစ်ခု ဖြစ်ပေသည်။ သူ၏နောက်ကွယ်တွင် လန်ယာ ဝမ်မိသားစု၏ အကူအညီ ရှိနေလျှင်ပင်၊ ဤအရာသည် သာမန်လူတစ်ယောက် စွမ်းဆောင်နိုင်သည့် အရာမျိုး မဟုတ်ချေ။

လီအန်း၏ အမြင်တွင်မူ ဝမ်ကျင်း၏ လျင်မြန်စွာ အာဏာရလာမှုသည် ဝမ်မိသားစု၏ ကူညီပံ့ပိုးမှုကြောင့် ဖြစ်ရမည်ဟု ထင်မှတ်နေခဲ့သည်။ သို့သော် ဝမ်ကျင်းသည် စနစ်ကို အားကိုးထားခြင်းဖြစ်ကြောင်းကိုမူ သူ လုံးဝ မသိရှိခဲ့ချေ။ ထိုသို့မဟုတ်ပါက အရည်အချင်းရှိလှသော အိမ်ရှင်မတစ်ဦးပင် ဆန်မရှိဘဲ ထမင်းချက်၍မရနိုင်သကဲ့သို့၊ အခြေအနေကို စတင်ကိုင်တွယ်နိုင်လျှင်ပင် အနည်းဆုံး နှစ်ပေါင်းများစွာ အချိန်ယူရမည် ဖြစ်သည်။

လီအန်းသည် မှတ်စုစာအုပ်ငယ်လေးတစ်အုပ်ကို ထုတ်ယူကာ နန်ယန်စီရင်စုသို့ ဝင်ရောက်လာကတည်းက သူမြင်တွေ့ခဲ့ရသမျှ အသေးစိတ် အချက်အလက်များနှင့် ဝမ်ကျင်းအပေါ် သူ၏ အမြင်များကို ချရေးမှတ်သားလိုက်သည်။

ပင်းပြည်နယ် လီမိသားစု၏ ထိပ်တန်းမျိုးဆက်သစ် တပည့်တစ်ဦးဖြစ်သည့်အတိုင်း၊ သူသည် ငယ်စဉ်ကတည်းက ဤကမ္ဘာ၏ အကောင်းဆုံး ပညာရေးကို သင်ကြားခဲ့ရသူဖြစ်ရာ နိုင်ငံရေးနှင့် ပြည်သူတို့၏ လူနေမှုဘဝ ကိစ္စရပ်များအပေါ် ထက်မြက်သော အကဲခတ်နိုင်စွမ်းနှင့် ထူးခြားသော အမြင်များ ရှိထားပေသည်။

သူ၏ မျက်နှာချင်းဆိုင်တွင် ထိုင်ကာ မျက်လုံးမှိတ်၍ အနားယူနေသော အကြီးအကဲသူသည် ယခုအခါ မျက်လုံးများကို ဖွင့်လိုက်ပြီး ထောက်လှမ်းရေးသတင်းများကို မှတ်တမ်းတင်ကာ နန်ယန်စီရင်စုကို သုံးသပ်နေသော လီအန်းကို ကြည့်ရင်း အလွန်ပင် သဘောကျ နှစ်သက်နေခဲ့သည်။

လီမိသားစု၏ အကြီးအကဲတစ်ဦးဖြစ်သူ လီထုံသည် လွန်စွာမြင့်မားသော ကျင့်စဉ်အဆင့်အတန်း ရှိရုံသာမက ကျယ်ပြန့်သော အတွေ့အကြုံများလည်း ရှိထားသူ ဖြစ်သည်။ ကြီးမားသော အောင်မြင်မှုများကို ရရှိနိုင်မည့်သူများသည် သေချာစေ့စပ်သော တွေးခေါ်မှုနှင့် ထက်မြက်သော အကဲခတ်မှု ရှိရမည်ဟု သူ ယုံကြည်ထားပြီး၊ သူ၏ရှေ့မှောက်ရှိ လီအန်းသည် လီထုံ၏ အလွန်အမင်း မျက်နှာသာပေး အားကိုးခြင်းကို ခံရသူ ဖြစ်သည်။

"အန်းအာ... ဒီဝမ်ကျင်းက တကယ်ကို ထူးချွန်တဲ့ အရည်အချင်းရှိသူပဲ၊ မင်း သူ့ကို မိတ်ဆွေဖွဲ့ထားလို့ ရတယ်။ ရာက္ခသဂိုဏ်းကိစ္စနဲ့ ပတ်သက်ရင်တော့ မင်း သင့်တော်သလိုပဲ ကိုင်တွယ်လိုက်ပါ။"

လီအန်းက ခေါင်းငြိတ်လိုက်သည်၊ အမှန်တကယ်တော့ သူလည်း ထိုသို့ပင် တွေးတောထားခြင်း ဖြစ်သည်။ သူ၏ အမြင်တွင် ရာက္ခသဂိုဏ်းနှင့် သူတို့လက်ထဲရှိ ထောက်လှမ်းရေးသတင်းများသည် အရေးကြီးသော်လည်း၊ ၎င်းတို့အတွက်ကြောင့်နှင့် ဝမ်ကျင်းကို ရန်သူဖြစ်အောင် လုပ်ရန် မထိုက်တန်ချေ။

ရာက္ခသဂိုဏ်းဝင်များမှာ သာမန်ရုပ်သေးရုပ် သို့မဟုတ် ကိရိယာတန်ဆာပလာမျှသာ ဖြစ်ပြီး ဝမ်ကျင်းကမူ မိမိနှင့် အဆင့်အတန်းတူညီသော အထက်တန်းလွှာ ပုဂ္ဂိုလ်တစ်ဦး ဖြစ်သည်။ ဤကျယ်ပြန့်လှသော အင်ပါယာကြီး၏ အုပ်ချုပ်သူများအတွက် ကိရိယာတစ်ခုက သခင်ပြောင်းသွားခြင်းသည် မဖြစ်နိုင်သောအရာ မဟုတ်ချေ၊ ၎င်းသည် တန်ဖိုးအပေါ်တွင်သာ မူတည်ပေသည်။

လီအန်း ဤအကြိမ် လာရောက်ရခြင်း၏ ရည်ရွယ်ချက်မှာလည်း ဈေးနှုန်းညှိနှိုင်းရန် ဖြစ်သည်။ အကယ်၍ ဝမ်ကျင်းက ၎င်းတို့ကို ခိုလှုံခွင့်ပေးရန် ဇွတ်အတင်း ဆုံးဖြတ်ထားပါက၊ သူသည် မိမိ၏ လီမိသားစုနှင့် သဘောတူညီချက်တစ်ခု ပြုလုပ်ရမည် ဖြစ်သည်။ အကယ်၍ ဝမ်ကျင်းအနေဖြင့် ၎င်းတို့ကို မဖြစ်မနေ အကာအကွယ်ပေးရန် မလိုအပ်ပါကမူ၊ သူသည် ထိုဂိုဏ်းကို အမြစ်ပြတ် ချေမှုန်းပစ်မည် ဖြစ်သည်။

တစ်ချိန်တည်းမှာပင်၊ နယ်စားမင်းအိမ်တော်အတွင်း၌ ဝမ်ကျင်းသည် လီအန်း မြို့ထဲသို့ ဝင်ရောက်လာသည့် သတင်းကို ရရှိထားပြီး ဖြစ်သည်။ လီအန်းသည် ယခုအကြိမ်တွင် လီမိသားစုကို ကိုယ်စားပြုကာ ယွဲ့ပြည်နယ်သို့ လာရောက်သော သံတမန်အဖြစ် ပေါ်ပေါ်ထင်ထင် လာရောက်ခြင်းဖြစ်ပြီး သူ၏ ခရီးစဉ်ကို လုံးဝ ဖုံးကွယ်ထားခြင်း မရှိချေ။

ဆန်းပြားလှသော ရထားလုံးပေါ်တွင် ထွင်းထုထားသည့် 'လီ' ဟူသော စာလုံး၊ သာမန်လူများ မဟုတ်ကြမှန်း သိသာလှသော ကိုယ်ရံတော်များနှင့် သန်မာထွားကျိုင်းလှသော မြင်းများက သူ၏ အဆင့်အတန်းကို ဖော်ပြနေပေသည်။ ပင်းပြည်နယ် လီမိသားစုမှ လူတစ်ယောက် ရောက်ရှိလာခြင်းပင် ဖြစ်သည်။ မကြာမီအချိန်အတွင်းမှာပင် ရွှေရောင်စာလုံးများဖြင့် ရေးသားထားသော ဖိတ်စာတစ်စောင်ကို အထက်သို့ ပို့သလာခဲ့သည်။

အိမ်တော်၏ ဧည့်ခန်းမဆောင်အတွင်း၌ ဝမ်ကျင်းသည် လီမိသားစုမှ ရောက်ရှိလာသော ဤပါရမီရှင်လူငယ်ကို အကဲခတ်နေခဲ့သည်။ စတုရန်းပုံကျကျ ကြမ်းတမ်းခိုင်မာသော မျက်နှာ၊ အရည်အချင်းရှိပြီး ဖျတ်လတ်သော အမူအရာ၊ မြင့်မားမတ်တတ်သော ခန္ဓာကိုယ် တည်ဆောက်ပုံနှင့် လေတိုက် သဲပွတ်ဒဏ်ကြောင့် အနည်းငယ် ကြမ်းတမ်းနေသော အသားအရေ။ ထိုသူသည် သက်တောင့်သက်သာနှင့် အခွင့်ထူးခံဘဝတွင် အချိန်ဖြုန်းနေတတ်သော သူမျိုးမဟုတ်ကြောင်း ထင်ရှားလှပေသည်။

လီထုံသည်လည်း မဟာကျင်းနိုင်ငံတော်တစ်ခုလုံးတွင် ကျော်ကြားလှသည့် ဝမ်မိသားစုမှ ဤပါရမီရှင်လူငယ်ဖြစ်ပြီး ဥပဒေပြုရေးဝါဒဂိုဏ်း၏ ထိပ်တန်းတပည့်ဖြစ်သူကို အကဲခတ်နေခဲ့သည်။ ဖြူစင်ချောမောသော မျက်နှာ၊ သိုင်းပညာ လေ့ကျင့်ထားသည့် အရိပ်အယောင် လုံးဝမရှိသော လက်တစ်စုံ၊ ဆန်းပြားတန်ဖိုးကြီးလှသော ဝတ်စုံနှင့် အလွန်တရာ လက်ရာမြောက်လှပသော ဤနယ်စားမင်းအိမ်တော်။ သူသည် သန့်ရှင်းသပ်ရပ်သော ဘဝတွင် နေထိုင်ကာ ပျော်ပါးမှုကို နှစ်သက်သောသူတစ်ဦးအဖြစ် ထင်မြင်ရပေသည်။

လီအန်း၏ မျက်နှာထက်တွင် နူးညံ့သော အပြုံးတစ်ခု ပေါ်လာပြီး ဝမ်ကျင်း၏ နောက်ကွယ်မှ သူ့ကို စူးစိုက်ကြည့်နေသော ကုယန်ကိုမူ သူ လုံးဝ ဂရုမစိုက်ဘဲ ထားလိုက်သည်။

"နယ်စားမင်း ဝမ်... အခုလိုမျိုး ရုတ်တရက် လာရောက်လည်ပတ်မိတဲ့အတွက် တောင်းပန်ပါတယ်"

ဝမ်ကျင်းက သူ့ကို လှိုက်လှိုက်လှဲလှဲ ကြိုဆိုနှုတ်ဆက်လိုက်သည်။

"အားနာစရာ မလိုပါဘူး ဗျာ၊ အားနာစရာ မလိုပါဘူး။ ညီအစ်ကို လီက ခရီးဝေးကြီးကနေ လာခဲ့ရတာပဲ။ ကျွန်တော် ညီအစ်ကို့ကို ကြိုဆိုဖို့အတွက် ဂုဏ်ပြုစားပွဲတစ်ခု ပြင်ဆင်ထားပြီးသားပါ။ ကဲ... ကြွပါ"