အခန်း ၅၃

အခန်း (၅၃) စုံစမ်းစစ်ဆေးမှု စတင်ပြီ

မကြာမီမှာပင် စုယွမ်သည် ပြီးပြည့်စုံသော သက်သေအထောက်အထား ကွင်းဆက်တစ်ခုကို သူ၏ အီးမေးလ်ထံသို့ ပေးပို့လိုက်လေ၏။

ကိစ္စရပ်များ တိုးတက်ဖြစ်ပေါ်လာမည့်အချိန်ကို စောင့်ဆိုင်းရန်သာ လိုအပ်တော့ချေသည်။

ထို့နောက် စုယွမ်က မီဒီယာအေဂျင်စီတစ်ခု၏ ဖုန်းနံပါတ်ကို ခေါ်ဆိုလိုက်ပေသည်။ စက္ကန့်အနည်းငယ်အတွင်းမှာပင် ဖုန်းဝင်သွားခဲ့၏။

"ဟယ်လို… ဒီက သန်ဒါသတင်းဌာနပါ… ဘာများကူညီပေးရမလဲခင်ဗာ…"

ဖုန်းဖြေဆိုလိုက်သော အသံမှာ သက်လတ်ပိုင်းအရွယ် အမျိုးသားတစ်ဦး၏ အသံဖြစ်ပြီး အသံကို နားထောင်ကြည့်ရုံဖြင့် သူသည် ထိပ်ပြောင်နေသော အမျိုးသားတစ်ဦး ဖြစ်နိုင်ကြောင်း ခန့်မှန်းနိုင်ပေ၏။

"ကျွန်တော်ဆီမှာ အရမ်းစိတ်ဝင်စားစရာကောင်းတဲ့ သတင်းဦးတစ်ခုရှိတယ်… ခင်ဗျားတို့ လိုချင်မလားတော့ မသိဘူး…"

စုယွမ်သည် တိုက်ရိုက် မပြောဆိုဘဲ အခြေအနေကို အရင်ဆုံး စမ်းသပ်လိုက်လေသည်။

"အို… ဘာသတင်းဦးလဲ… ကျွန်တော်က သန်ဒါသတင်းဌာနရဲ့ အယ်ဒီတာချုပ်ပါ… ကျွန်တော့်ကို ပြောပြလို့ရပါတယ်…"

"ဒါပေမဲ့ ကျွန်တော်တို့ဆီမှာ သတင်းအသေးစားလေးတွေကိုတော့ လက်မခံပါဘူး… ကျယ်ကျယ်ပြန့်ပြန့် ဆွေးနွေးမှုတွေ ဖြစ်ပေါ်စေနိုင်ပြီး ကျွန်တော်တို့အတွက် တန်ဖိုးရှိစေမယ့် သတင်းမျိုးကိုပဲ လိုချင်တာ… ခင်ဗျား နားလည်တယ်မလား…"

သန်ဒါသတင်းဌာန၏ အယ်ဒီတာချုပ်က ပြောဆိုလိုက်သည်။

"ဒီသတင်းက ခင်ဗျားတို့ ကိုင်တွယ်နိုင်တာထက် ကြီးမားလွန်းနေမှာကို စိုးရိမ်မိတယ်…"

စုယွမ်က လှောင်ပြုံးတစ်ခုဖြင့် ပြောဆိုလိုက်၏။

"ဟီးဟီး… လူကြီးမင်း… ကျွန်တော်တို့က မရင်းနှီးကြလို့သာ ကျွန်တော်က ကြွားလုံးထုတ်နေတာထင်ပါလိမ့်မယ်… သန်ဒါသတင်းဌာနဆိုတာ တင်းဆင့်အောက်က သတင်းကုမ္ပဏီတစ်ခုလေ… ကျွန်တော်တို့က ပြဿနာကြီးသွားမှာကို မကြောက်ဘူး… သေးသွားမှာကိုပဲ ကြောက်တာပါ…"

"ဒါပေမဲ့ ကျွန်တော်တို့မှာလည်း မူဝါဒတွေရှိတယ်… ကျွန်တော်တို့ ဖော်ထုတ်တဲ့အရာတွေက အမှန်တကယ်ဖြစ်ရမယ်… လုပ်ကြံဖန်တီးထားတာမျိုးတော့ မရဘူး…"

ဖုန်းတစ်ဖက်မှလူက ကမ္ဘာကြီးကို တုန်လှုပ်စေလောက်သည့် သတင်းမျိုး ပေးနိုင်မည်ဟု အယ်ဒီတာချုပ်က လုံးဝ မယုံကြည်ထားကြောင်း ထင်ရှားနေပြီး သူ၏ လေသံမှာ အနည်းငယ် အေးစက်နေပေသည်။

"အိုး… ခင်ဗျား ထျန်းကျန်းလုပ်ငန်းစုအကြောင်း သိလား… ကျွန်တော် ဖော်ထုတ်မယ့်ကိစ္စက ထျန်းကျန်းလုပ်ငန်းစုရဲ့ အမွေဆက်ခံသူနဲ့ ပတ်သက်နေတာ…"

၎င်းတို့တွင် အင်အားကြီးမားသော နောက်ခံရှိပြီး ပြဿနာကြီးထွားသွားမည်ကို မကြောက်ရွံ့ကြသဖြင့် ဤကိစ္စက ပို၍ လွယ်ကူသွားစေသည်။

"ထျန်းကျန်းလုပ်ငန်းစုရဲ့ အမွေဆက်ခံသူ… လူကြီးမင်း ဒါက သတင်းမဟုတ်ဘူးလေ… အားလုံးသိပြီးသား ကိစ္စကြီးကို… ကျိုးကျန်းဟိုင်ရဲ့ သားအကြီးဆုံး ကျိုးရွေ့ကို အမွေဆက်ခံသူအဖြစ် သတ်မှတ်ထားတာ ကြာလှပြီ… အဲဒါကို မသိတဲ့သူမှ မရှိတာ… တကယ်လို့ ခင်ဗျားက ကျွန်တော့်ကို နောက်ပြောင်နေတာဆိုရင်တော့ ဖုန်းချလိုက်တော့မယ်…"

အယ်ဒီတာချုပ်မှာ စိတ်မရှည်တော့ကြောင်း သိသာထင်ရှားနေပေ၏။

"ကောင်းပြီလေ… ခင်ဗျား ဖုန်းချလိုက်လို့ရပါပြီ…"

"ကျိုးရွေ့ မမျှော်လင့်ဘဲ သေဆုံးသွားတဲ့ကိစ္စကို တခြားမီဒီယာတွေကို သတင်းပို့ခိုင်းထားပြီးပြီ… ခင်ဗျား ဘဝကို ပျော်ရွှင်စွာ ဖြတ်သန်းနိုင်ပါစေလို့ ဆုတောင်းပါတယ်…"

စုယွမ်က ဂရုမစိုက်ဟန်ဖြင့် ပြောဆိုလိုက်သည်။

ဖုန်းတစ်ဖက်မှ အသံမှာ တစ်စက္ကန့်ခန့် တိတ်ဆိတ်သွားပြီးနောက် ရုတ်တရက် အလွန်အမင်း အရေးတကြီးဖြစ်သွားသော လေသံဖြင့် ထွက်ပေါ်လာခဲ့ပေ၏။

"ဟလို လူကြီးမင်း… ခုနက ကျွန်တော် ရိုင်းစိုင်းသွားတယ်… ဒီလောက်ကြီးမားတဲ့ သတင်းမှန်း ဘာလို့ စောစောကတည်းက မပြောတာလဲ…"

"ကျွန်တော်တို့ သန်ဒါသတင်းဌာနက နိုင်ငံတစ်ဝန်းမှာ အကြီးမားဆုံး သတင်းဌာနတွေထဲက တစ်ခုပါ… ခင်ဗျား တခြားသူတွေကို သတင်းသွားပေးစရာ အကြောင်းမရှိပါဘူး…"

" ကျွန်တော် တောင်းပန်ပါတယ်… ဘာတွေဖြစ်ခဲ့တာလဲ မြန်မြန်ပြောပြပါဦး…"

သန်ဒါသတင်းဌာန၏ အယ်ဒီတာချုပ်မှာ ချက်ချင်းပင် စိတ်ဝင်စားသွားခဲ့လေပြီ။

မကြာသေးမီ နှစ်များအတွင်း ထျန်းကျန်းလုပ်ငန်းစုသည် ကျိုးကျန်းဟိုင်၏ ဦးဆောင်မှုအောက်တွင် မယုံနိုင်လောက်အောင် အောင်မြင်မှုများ ရရှိခဲ့ပေသည်။ သို့ရာတွင် ကျန်းမာရေး ပြဿနာအချို့ကြောင့် သူသည် ကျိုးရွေ့ထံသို့ လုပ်ငန်းတာဝန်များကို မကြာမီ လွှဲပြောင်းပေးအပ်တော့မည်ဟု လူအများက ခန့်မှန်းထားကြ၏။

သို့သော် ကျိုးရွေ့သာ မရှိတော့ပါက ထျန်းကျန်းလုပ်ငန်းစု၏ ဥက္ကဋ္ဌသစ်မှာ မည်သူဖြစ်လာမည်နည်း။ ထျန်းကျန်းလုပ်ငန်းစုက မည်သို့ ဆက်ဖြစ်သွားမည်နည်း။

ပြိုင်ဘက်များက မည်သို့သော လှုပ်ရှားမှုများ ပြုလုပ်လာကြမည်နည်း။

ဤသတင်းကြောင့် ရရှိလာမည့် လူအများ၏ စိတ်ဝင်စားမှု လှိုင်းတံပိုးမှာ လုံးလုံးလျားလျား အံ့မခန်းဖြစ်သွားမည်ဟု ယုံကြည်ရဲပေသည်။

အကယ်၍ ၎င်းတို့အနေဖြင့် ဤသတင်းတင်ဆက်ခွင့် အခွင့်အရေးကိုသာ အမိအရ ဆုပ်ကိုင်နိုင်ပါက သန်ဒါသတင်းဌာနအတွက် ကြီးမားလှသော အကျိုးအမြတ်များကို ဆောင်ကြဉ်းပေးနိုင်မည် ဖြစ်၏။

"အင်း… မကြာသေးခင်က အွန်လိုင်းမှာ သတင်းကြီးနေတဲ့ မေ့ယင်းရဲ့အမှုအကြောင်းကို ခင်ဗျား သိမှာပေါ့…"

"မေ့ယင်း အဖမ်းမခံရခင်လေးမှာ ချီထားတဲ့ ကလေးက ကျိုးရွေ့ရဲ့သားလေ… သူက ကျိုးကျန်းဟိုင်ရဲ့ အနာဂတ် အမွေဆက်ခံသူလည်း ဖြစ်တယ်…"

"ပြီးတော့ ထျန်းကျန်းလုပ်ငန်းစုလို ကုမ္ပဏီကြီးတစ်ခုရဲ့ ဥက္ကဋ္ဌမြေးက လူကုန်ကူးသူဆီ ဘယ်လိုလုပ်ပြီး အဖမ်းခံရမှာလဲ… ခင်ဗျား အဲဒါကို မထူးဆန်းဘူးလား…"

"ကျိုးရွေ့ သေဆုံးသွားပြီးနောက်မှာ ဘယ်သူက ဥက္ကဋ္ဌရာထူးကို အလိုချင်ဆုံး ဖြစ်နေမလဲ… အဲဒီအကြောင်း ကျွန်တော် ထပ်ပြောပြစရာ မလိုတော့ဘူးမလား…"

"ကျိုးကျန်းဟိုင်က မွေးကင်းစကလေးငယ် တစ်ယောက်ကို လုပ်ငန်းစုကြီးရဲ့ အနာဂတ်ခေါင်းဆောင်ဖြစ်လာဖို့ ပြုစုပျိုးထောင်ချင်နေတယ်ဆိုတဲ့ သတင်းသာ ပေါက်ကြားသွားရင် ဘယ်လောက်တောင် တုန်လှုပ်သွားစေမလဲ…"

"အယ်ဒီတာချုပ်… ခင်ဗျားက ဒီလုပ်ငန်းမှာ ကျင်လည်နေတဲ့သူဆိုတော့ ကျွန်တော် အသေးစိတ် ပြောပြနေစရာ မလိုဘူးမလား…"

၎င်းတို့က သတင်းတင်ဆက်မည် မဟုတ်ကြောင်းကို စုယွမ် မစိုးရိမ်ခဲ့ချေ။

"ဘုရားရေ…"

သန်ဒါသတင်းဌာန၏ အယ်ဒီတာချုပ်က ရေရွတ်လိုက်ပြီးနောက် ဆက်လက်ပြောဆိုလိုက်၏။

"လူကြီးမင်း… ဒါက နောက်ဆော့လို့ရတဲ့ ကိစ္စမဟုတ်ဘူးနော်… ခင်ဗျား တကယ်ပြောနေတာလား…"

"ဘယ်လိုပဲဖြစ်ဖြစ် ကျွန်တော် ခင်ဗျားကို ပြောပြပြီးသွားပြီ… ဒါက အမှန်လား အမှားလားဆိုတာတော့ ခင်ဗျားတို့လို ကုမ္ပဏီကြီးအနေနဲ့ စုံစမ်းအတည်ပြုနိုင်မယ့် နည်းလမ်းတွေ ရှိမှာပါ…"

"ခင်ဗျားတို့ဆီမှာ စုံထောက်တွေ အများကြီး ငှားထားတယ်လို့ ကြားဖူးတယ်… တကယ်လို့ ခင်ဗျား စိုးရိမ်နေရင် ကျွန်တော့်ရဲ့ ညွှန်ကြားချက်တွေအတိုင်း လိုက်လုပ်ကြည့်လိုက်… အမှန်လား အမှားလားဆိုတာ အလွယ်တကူ သိလာလိမ့်မယ်…"

"ဒါကို ကျွန်တော် သင်ပေးနေစရာ မလိုဘူးမလား…"

"ကောင်းပြီ… ဒီလောက်ဆို ရှင်းလောက်ပြီ… ဒီသတင်း ထွက်လာတာကို မကြာခင် မြင်တွေ့ရဖို့ မျှော်လင့်ပါတယ်… မဟုတ်ရင်တော့ ခင်ဗျားတို့ဆီမှာ သီးသန့်သတင်းဦး ရှိတော့မှာ မဟုတ်ဘူး…"

စုယွမ်က အပြုံးတစ်ခုဖြင့် ပြောဆိုလိုက်ပြီး အကြောင်းပြန်မှုကိုပင် မစောင့်တော့ဘဲ ဖုန်းချလိုက်လေသည်။

ဤသည်မှာ ၎င်းတို့၏ အသက်မွေးဝမ်းကျောင်း အလုပ်ဖြစ်ပြီး ကျိုးရွေ့၏ သေဆုံးမှုကိုလည်း အချိန်ကြာမြင့်စွာ ဖုံးကွယ်ထားနိုင်မည် မဟုတ်ချေ။ ယခုအချိန်သည် စုံစမ်းစစ်ဆေးမှုမှ ရလဒ်များကို ရယူရန် အလွယ်ကူဆုံးအချိန်ပင် ဖြစ်ပေသည်။

ဤကိစ္စရပ်များ မည်မျှအထိ ကြီးထွားလာမည် ဆိုသည်ကတော့ စုယွမ်၏ ထိန်းချုပ်နိုင်စွမ်းထက် ကျော်လွန်နေပြီ ဖြစ်သည်။

သန်ဒါသတင်းဌာန။

အယ်ဒီတာချုပ် ကူးတာဟိုင်သည် စီးကရက်တစ်လိပ်ကို မီးညှိလိုက်၏။ လူအနည်းငယ်က သူ၏ရှေ့တွင် မတ်တတ်ရပ်နေကြသည်။

"မင်းတို့အားလုံး ဘာဖြစ်ခဲ့တယ်ဆိုတာ သိတယ်မလား… ငါ အမြန်ဆုံး အမှန်တရားကို သိဖို့လိုတယ်…"

သူ၏ အမိန့်ပေးမှုအောက်တွင် လူအနည်းငယ်က ချက်ချင်း ထွက်သွားကြလေသည်။ ထို့နောက် ကူးတာဟိုင်သည် ကျန်ရစ်နေသူများကို ညွှန်ကြားလိုက်၏။

"ဒီနေ့ မွန်းလွဲပိုင်းမတိုင်ခင် ဒီကိစ္စနဲ့ပတ်သက်တဲ့ သတင်းဆောင်းပါးတစ်ခု ရေးထားကြ… အဲဒါက လုံလောက်အောင် ဆွဲဆောင်မှုရှိနေရမယ်… အကောင်းဆုံး ရေးနိုင်တဲ့သူကို ထိုက်တန်တဲ့ ဆုချီးမြှင့်မယ်…"

ထွက်ခွာသွားကြသော လူအုပ်ကြီး၏ ကျောပြင်များကို ကြည့်ရင်း ကူးတာဟိုင်သည် နက်ရှိုင်းသော အတွေးများထဲသို့ မနစ်မြောဘဲ မနေနိုင်ခဲ့ချေ။ ဖုန်းခေါ်ဆိုခဲ့သူက မည်သူနည်း။

ကျိုးမိသားစု၏ သားအကြီးဆုံး သေဆုံးမှုမှာ အလွန်တရာ လျှို့ဝှက်ထားရမည် ဖြစ်သော်လည်း ထိုသူသည် ဤမျှတိုတောင်းသော အချိန်အတွင်း၌ သိရှိနိုင်ခဲ့ပေသည်။

သူသည် စုယွမ်ကို စုံစမ်းစစ်ဆေးရန် စဉ်းစားခဲ့ဖူးသော်လည်း ၎င်းမှာ လုပ်ငန်းခွင် စည်းမျဉ်းများနှင့် ဆန့်ကျင်နေပြီး စုယွမ်ကဲ့သို့ သတင်းပေးသူတစ်ဦးတွင် အင်အားကြီးမားသော နောက်ခံတစ်ခု ရှိနေရမည်မှာ သေချာပေ၏။

ဤသတင်းကို ပေါက်ကြားစေခြင်းက ထျန်းကျန်းလုပ်ငန်းစုကို စော်ကားပြီးဖြစ်သွားရာ အကယ်၍ ၎င်းတို့က အခြားသော ဧရာမအင်အားစုတစ်ခုကို ထပ်မံစော်ကားမိပါက ကြီးမားလှသော ဆုံးရှုံးမှုကြီး ဖြစ်သွားပေလိမ့်မည်။

စီးကရက်ကို ခေါင်းမာစွာဖြင့် ဖိသတ်လိုက်ရင်း ကူးတာဟိုင်သည် ဤသတင်းကြောင့် ရရှိလာမည့် ကြီးမားလှသော အကျိုးအမြတ်များကို စဉ်းစားမိကာ သူ၏ဆံပင်များ ထူထပ်များပြားစဉ်ကကဲ့သို့ စိတ်အားထက်သန်မှုနှင့် တက်ကြွမှုများကို ခံစားလိုက်ရတော့သည်။

ကျန်းချန် အခွန်ဌာန။

မကြာသေးမီက ကျန်းချန်မြို့တွင် အခွန်ရှောင်သူများကို နှိမ်နင်းရန် အဓိက စစ်ဆင်ရေးကြီးတစ်ခုကို စတင်ခဲ့ပြီး လွန်ခဲ့သော ရက်အနည်းငယ်အတွင်း ကုမ္ပဏီအချို့ အပြစ်ပေးခံခဲ့ရပြီး ဖြစ်ပေသည်။

ယနေ့တွင် ၎င်းတို့သည် တကယ်ကို အံ့ဩမှင်တက်ဖွယ်ကောင်းသော အကြောင်းအရာများ ပါဝင်သည့် သတင်းပေး အီးမေးလ်တစ်စောင်ကို ရုတ်တရက် လက်ခံရရှိခဲ့လေ၏။

ဧရာမ ထျန်းကျန်းလုပ်ငန်းစုကြီးက ဤမျှလောက်အထိ အတိုင်းအတာကို ကျူးလွန်ထားခဲ့သည်တဲ့လား။

အတိအကျ သန်းသုံးရာတိတိ။

ထို့အပြင် အီးမေးလ်ထဲရှိ သက်သေအထောက်အထား ကွင်းဆက်မှာ အလွန်ပင် ပြီးပြည့်စုံနေပြီး အပြစ်အနာအဆာ အနည်းငယ်မျှပင် မရှိဘဲ အလွန်ခိုင်လုံသော သက်သေအထောက်အထား တစ်ရပ်ဖြစ်နေပေသည်။

ထိုအချိန်၌ အခွန်ဌာနမှ ခေါင်းဆောင်များအားလုံး အစည်းအဝေးတစ်ခု လုပ်နေကြ၏။

မကြာသေးမီက အထက်အရာရှိများက အခြားသူများကို ဟန့်တားနိုင်ရန်အတွက် ပုံမှန်အမှုတစ်ခုကို အပျက်သဘောဆောင်သည့် ဥပမာတစ်ခုအနေဖြင့် ရှာဖွေပေးရန် တောင်းဆိုခဲ့သော်လည်း ယခင်အမှုများရှိ ပြစ်ဒဏ်များမှာ အလွန်သေးငယ်လွန်းနေခဲ့သည်။

ကြီးကဲသူခေါင်းဆောင်နှင့် ဖုန်းဖြင့် တိုင်ပင်ဆွေးနွေးပြီးနောက် သူသည် မက်ဆေ့ခ်ျတစ်စောင်ကို လက်ခံရရှိခဲ့လေ၏။

ဤကဲ့သို့သော အပြုအမူမျိုး လုပ်ဆောင်သူ မည်သူမဆို ကုမ္ပဏီအရွယ်အစားကို ပဓာနမထားဘဲ အပြစ်ပေးခံရမည် ဖြစ်သည်။

ထျန်းကျန်းလုပ်ငန်းစု၏ ကြီးမားသော အကြွေးပြဿနာများနှင့် ပတ်သက်သည့် ကောလာဟလများကို သူ ကြားခဲ့ဖူးသော်လည်း ယခုအခါ ၎င်းတို့က ဤလုပ်ရပ်ကိုပင် လုပ်ဆောင်ခဲ့ကြလေပြီ။ သေချာစွာ စဉ်းစားသုံးသပ်ပြီးနောက် ထျန်းကျန်းလုပ်ငန်းစုအား စုံစမ်းစစ်ဆေးမှုများ စတင်တော့မည် ဖြစ်ပေသည်။