အခန်း ၉၀၄

အခန်း (၉၀၄) ရွှေအမြုတေ ဓားသွားဝိညာဉ်။ နတ်ဘုရားမျိုးစေ့ လေးခု။ (၁)

ဒါတွေအားလုံးက ငါ့ရှေ့က တာ့ဝူဖုန်းကြောင့်ပဲ။

အကယ်၍ ထိုသူ၏ ဖိအားပေးမှုသာ မရှိခဲ့လျှင် သူသည် နတ်ဘုရားမျိုးစေ့တစ်ခုလုံးကို ယခုကဲ့သို့ အတင်းအဓမ္မ သန့်စင်ရန် မလိုပါ။ ဤသို့ ပြုလုပ်လိုက်ခြင်းကြောင့် နောင်အနာဂတ်တွင် တတိယမြောက် နတ်ဘုရားစွမ်းရည်ကို ကျွမ်းကျင်ရန်မှာ အလွန်ပင် ခက်ခဲသွားတော့မည် ဖြစ်သည်။

"မင်းကို ငါ သတ်မယ်။ ငါ မင်းကို သတ်ပစ်မယ်။"

ရှီကျင့်ထျန်းသည် စူးချန်ခုန်း၏ အပေါ်မှ ပေ ၁၀၀၀ ကျော် မြင့်သော ခန္ဓာကိုယ်ကြီးဖြင့် အုပ်မိုးထားသည်။ သူ၏ ခန္ဓာကိုယ်တစ်ခုလုံးမှာ ကျောက်စိမ်းနက်ရောင်သို့ ပြောင်းလဲသွားပြီး နတ်အလင်းတန်းများ ဝန်းရံနေသည်။ သူ၏ ခန္ဓာကိုယ်မှ ထွက်ပေါ်လာသော ဖိအားကြောင့် ဘေးမှလူများမှာ နှလုံးခုန်ပင် ရပ်သွားမတတ် ခံစားရသည်။

ရှီကျင့်ထျန်း၏ မျက်လုံးများမှာ သွေးရောင်လွှမ်းနေ၏။ အကယ်၍ သူသာ တတိယ ကောင်းကင်ဘုံ သိုင်းဝိဇ္ဇာသူတော်စင်အဆင့်သို့ ရောက်ရှိပြီး မြင့်မြတ်သော ရှေးဟောင်းနိုင်ငံသို့ သွားနိုင်ခဲ့လျှင် သူသည် အင်အားကြီးအဖွဲ့အစည်းတစ်ခုသို့ ဝင်ရောက်ကာ ကျင့်ကြံမှု အရင်းအမြစ်များ ရရှိမည် ဖြစ်သည်။ ထိုမှတစ်ဆင့် သူ၏ နတ်ဘုရားမျိုးစေ့နှင့် နတ်ဘုရား အမှတ်အသားများကို တိုးတက်စေကာ နတ်ဘုရားခန္ဓာကို တည်ဆောက်နိုင်မည် ဖြစ်သည်။ သို့သော် ယခုမူ အားလုံးမှာ ပျက်စီးသွားခဲ့လေပြီ။

"ရှီကျင့်ထျန်းက... အရင်ကထက်တောင် ပိုကြောက်စရာကောင်းလာတာလား"

လီစုန့်ပင်လျှင် သူ၏ ရှေ့မှ ရှီကျင့်ထျန်းသည် ယခင်ကထက် များစွာ ပိုမို ကြောက်စရာကောင်းလာသည်ကို ခံစားမိသည်။ နတ်ဘုရားစွမ်းရည်တစ်ခု ကျွမ်းကျင်ခြင်းနှင့် နှစ်ခုကျွမ်းကျင်ခြင်းမှာ လုံးဝ ခြားနားလှကြောင်း သူ နားလည်လိုက်သည်။

"ဟင်… အဲဒါ ရှီကျင့်ထျန်းပဲ။ သူ့ရဲ့ အရှိန်အဝါက အတော်လေး ပြင်းထန်နေတယ်။ သူက သိုင်းဝိဇ္ဇာသူတော်စင် ဒုတိယကောင်းကင်ဘုံအဆင့်ကို ရောက်နေပြီ။"

မော့ယန်ရှန့်နှင့် အခြားနှစ်ဦးတို့သည်လည်း တိုက်ပွဲဖြစ်ရာသို့ ရောက်ရှိလာကြသည်။ အဝေးမှကြည့်လျှင် ရှီကျင့်ထျန်း၏ ပေ ၁၀၀၀ ကျော် မြင့်မားသော ခန္ဓာကိုယ်ကြီးမှာ အနက်ရောင် ကျောက်သားဘီလူးကြီး တစ်ကောင်အလား မြင်နေရသည်။ မော့ယန်ရှန့်သည် ရှီကျင့်ထျန်း အသုံးပြုနေသော နတ်ဘုရားစွမ်းရည်များကို ကြည့်ကာ ၎င်းမှာ ရှီမိသားစုမှ အသစ်တက်လှမ်းလာသော သိုင်းဝိဇ္ဇာသူတော်စင် ရှီကျင့်ထျန်း ဖြစ်ကြောင်း ချက်ချင်း သိလိုက်သည်။

ရှီကျင့်ထျန်းသည် လူသားနိုင်ငံများကြားတွင် နာမည်မသေးလှပေ။ သူသည် ကျဆုံးနေသော မျိုုရိုးမြင့် မျိုးနွယ်စု အချို့ကို အမြစ်ပြတ် သုတ်သင်ခဲ့ဖူးသည့် နာမည်ဆိုးဖြင့် ကျော်ကြားသူ ဖြစ်သည်။ မကြာသေးမီကမှ သူသည် သိုင်းဝိဇ္ဇာသူတော်စင်အဆင့်သို့ တက်လှမ်းနိုင်ခဲ့ကြောင်း ကြေညာခဲ့သည်။ မိမိဘာသာ ကျင့်ကြံကာ ထိပ်တန်းပညာရပ်ဖြင့် သိုင်းဝိဇ္ဇာသူတော်စင်အဆင့် ရောက်လာသူများသည် နတ်ဘုရားမျိုးစေ့ကို သန့်စင်ပြီးမှ အဆင့်တက်လာသူများထက် အလားအလာ ပိုရှိပြီး လူသားနိုင်ငံများ၏ အနာဂတ်တွင် ထိပ်တန်းခေါင်းဆောင်များ ဖြစ်လာလိမ့်မည်ဟု ယူဆထားကြသည်။

"သူက ရှီကျင့်ထျန်းလား။ ကျောက်ဝါ ကောင်းကင်ဂူနန်းကို အတင်းအဓမ္မ ဖွင့်ခဲ့တာ သူလား။"

မော့ယန်လန်၏ မျက်နှာမှာ လေးနက်သွားသည်။ သူကိုယ်တိုင် သိုင်းဝိဇ္ဇာသူတော်စင် ဝင်ရောက်ခြင်းအဆင့် ဖြစ်သော်လည်း ရှီကျင့်ထျန်းထံမှ ထွက်ပေါ်လာသော ဖိအားကို ခံစားနေရသည်။ သူသည် ဟွမ်ထျန်းနိုင်ငံ၏ ဘုရင်ဖြစ်သော သူ၏ ဖခင်ထံမှ နတ်ဘုရားမျိုးစေ့ကို ရရှိကာ သန့်စင်ပြီးမှ အဆင့်တက်လာသူ ဖြစ်သဖြင့် ရှီကျင့်ထျန်းနှင့် အရည်အသွေးချင်း ကွာခြားလှသည်။

"သူနဲ့ တိုက်နေတာက တာ့ဝူဖုန်းလား။ တာ့ဝူဖုန်းလည်း သိုင်းဝိဇ္ဇာသူတော်စင်အဆင့်ကို ရောက်သွားတာလား"

အပြာရောင် ဝတ်စုံနှင့် ခပ်ချောချော အမျိုးသမီး မော့ယန်ချင်မှာ အံ့အားသင့်သွားရသည်။ ရှီကျင့်ထျန်း၏ ဒေါသတကြီး အော်သံကို ကြားရသဖြင့် သူ၏ ပြိုင်ဘက်မှာ တာ့ဝူဖုန်း ဖြစ်ကြောင်း သူ သိလိုက်သည်။ တာ့ဝူဖုန်းမှာလည်း နာမည်ကျော်တစ်ဦး ဖြစ်သော်လည်း သိုင်းဝိဇ္ဇာသူတော်စင်အဆင့်သို့ ရောက်ရှိကြောင်း သတင်းမထွက်ခဲ့ပေ။ ယခုမူ သူသည် တိတ်တဆိတ် အဆင့်တက်ခဲ့ရုံသာမက ဤနေရာရှိ ရတနာများအတွက် ရှီကျင့်ထျန်းနှင့် ထိပ်တိုက်တွေ့နေသည့်ပုံပင်။

"တာ့ဝူဖုန်း… မင်း ငါ့ရဲ့ အနာဂတ်ကို ဖျက်ဆီးပြီး ငါ့ရဲ့ သိုင်းပညာလမ်းစဉ်ကို ဖြတ်တောက်လိုက်တယ်။ မင်းရဲ့ အရိုးတွေကို အမှုန့်ကြိတ်ပြီး မင်းရဲ့ အရေခွံကို အရှင်လတ်လတ် ခွာပစ်မယ်။"

ရှီကျင့်ထျန်းက ဒေါသတကြီး အော်ပြောလိုက်သည်။ သူသည် စူးချန်ခုန်းကို အရှင်လတ်လတ် အပိုင်းပိုင်း ဖြတ်တောက်ချင်နေပြီ ဖြစ်သည်။

'စောစောက သူကျိန်ဆိုခဲ့တဲ့ ပြင်းထန်တဲ့ ကျိန်စာက... တကယ် ဖြစ်လာပြီပဲ'

လီစုန့်သည် ရှီကျင့်ထျန်း၏ ကြောက်မက်ဖွယ်ကောင်းသော အရှိန်အဝါကြောင့် တုန်လှုပ်နေသော်လည်း တစ်ဖက်တွင်လည်း ထူးဆန်းစွာ တွေးမိနေသည်။ ရှီကျင့်ထျန်းသည် သူ့ကို လိမ်လည်ခဲ့သဖြင့် ပြင်းထန်သော ကတိသစ္စာ ဆိုခဲ့ရသည်။ နတ်ဘုရားမျိုးစေ့ကို ရသည်နှင့် သူသည် ကတိဖောက်ဖျက်ကာ လီစုန့်ကို ဒုက္ခပေးခဲ့သည်။ ယခုမူ စူးချန်ခုန်း၏ ဖိအားပေးမှုကြောင့် နတ်ဘုရားမျိုးစေ့ကို အချိန်မတိုင်မီ သန့်စင်လိုက်ရသဖြင့် သူ၏ သိုင်းပညာလမ်းစဉ်မှာ နိဂုံးချုပ်သွားချေပြီ။ ဒါက ဝဋ်လည်တာပင် မဟုတ်ပါလား။

'ဒါပေမဲ့ သူ့ရဲ့ ရူးသွပ်မှုနဲ့ ဒေါသကို ကြည့်ရင် သူ နတ်ဘုရားမျိုးစေ့ကို သန့်စင်လိုက်ပုံရတယ်။ တာ့ဝူဖုန်းက ရှီကျင့်ထျန်းကို ဒီလောက်အထိ အကျပ်ရိုက်အောင် လုပ်နိုင်တာလား'

မော့ယန်ရှန့်က အခြေအနေကို ကြည့်ကာ စိတ်ထဲမှ တွေးနေမိသည်။ ရှီကျင့်ထျန်းသည် နတ်ဘုရားမျိုးစေ့ကို သန့်စင်လိုက်သဖြင့် ဒုတိယ ကောင်းကင်ဘုံအဆင့် သိုင်းဝိဇ္ဇာသူတော်စင် ဖြစ်သွားခြင်း ဖြစ်သည်။ ရှီကျင့်ထျန်းကဲ့သို့ ပါရမီရှင်တစ်ဦးက မိမိအနာဂတ်ကို ဖျက်ဆီးပြီး နတ်ဘုရားမျိုးစေ့ကို အတင်းအဓမ္မ သန့်စင်လိုက်သည်ဆိုလျှင် စူးချန်ခုန်းသည် သူ့ကို အသက်အန္တရာယ်ရှိသည်အထိ ဖိအားပေးနိုင်ခဲ့သည်မှာ ထင်ရှားသည်။

စူးချန်ခုန်း၏ အစွမ်းမှာ မည်မျှအထိ ရှိသနည်းဟု မော့ယန်ရှန့် စိုးရိမ်မိသွားသည်။ ရှီကျင့်ထျန်းမှာ သာမန် သိုင်းဝိဇ္ဇာသူတော်စင် မဟုတ်သော်လည်း စူးချန်ခုန်းထံမှ ထွက်ပြေးရန်ပင် မတတ်နိုင်သဖြင့် အဆင့်တက်ရန် ရွေးချယ်ခဲ့ရခြင်း ဖြစ်သည်။ သို့သော် ယခုမူ ရှီကျင့်ထျန်းသည် နတ်ဘုရားစွမ်းရည် နှစ်ခုကို ပိုင်ဆိုင်ထားသဖြင့် ယခင်ကနှင့် လုံးဝ ခြားနားသွားပြီဖြစ်ရာ တာ့ဝူဖုန်း အခက်တွေ့ရပေလိမ့်မည်။

"အနားမကပ်နဲ့။ ဒီအတိုင်းပဲ စောင့်ကြည့်ကြမယ်"

မော့ယန်ရှန့်က အခြားနှစ်ဦးကို ဆက်သွယ်ကာ သတိပေးလိုက်သည်။ သူတို့အနေဖြင့် ဝင်ရောက်စွက်ဖက်ရန် အစီအစဉ်မရှိဘဲ ကြားကနေ အကျိုးအမြတ်ရရန်သာ ချောင်းနေကြသည်။

"သိုင်းဝိဇ္ဇာသူတော်စင်တွေရဲ့ တိုက်ပွဲကြီးလား"

မော့ယန်ချင်နှင့် မော့ယန်လန်တို့သည်လည်း စိတ်လှုပ်ရှားစွာဖြင့် ခေါင်းညိတ်လိုက်ကြသည်။ သူတို့ကိုယ်တိုင် သိုင်းဝိဇ္ဇာသူတော်စင်များ ဖြစ်သော်လည်း အခြားသိုင်းဝိဇ္ဇာသူတော်စင်များ၏ အသေအကြေ တိုက်ပွဲကို မြင်တွေ့ရမည်မှာ ဤသည်မှာ ပထမဆုံးအကြိမ် ဖြစ်သည်။

ရှီကျင့်ထျန်းသည်လည်း မော့ယန်ရှန့်တို့ ရောက်လာသည်ကို သတိပြုမိသော်လည်း ယခုအချိန်တွင် သူတို့ကို ဂရုမစိုက်နိုင်ပေ။ သူ၏ စိတ်ထဲတွင် ရှေ့မှ စူးချန်ခုန်းကိုသာ အမှုန့်ကြိတ်သတ်ရန် ရှိတော့သည်။

"သေစမ်း"

ရှီကျင့်ထျန်း၏ မျက်လုံးများမှာ နေနှင့်လအလား တောက်ပလာပြီး ဧရာမ ခြေထောက်ကြီးဖြင့် စူးချန်ခုန်းကို ထပ်မံ နင်းခြေလိုက်ပြန်သည်။ ယခုတစ်ကြိမ် တိုက်ခိုက်မှုမှာ ယခင်ကထက် များစွာ ပိုမို ပြင်းထန်လှသည်။

"ရှောင်"

စူးချန်ခုန်း၏ ရင်ထဲတွင် အေးစိမ့်သွားသည်။ သူသည် ထိုတိုက်ခိုက်မှုကို ထိပ်တိုက်မရင်ဆိုင်ရန် ဆုံးဖြတ်လိုက်သည်။ သူ၏ စွမ်းအားသိုလှောင်ရာအတွင်းရှိ ရွှေအမြုတေမှာ အရှိန်အဟုန်ဖြင့် လည်ပတ်လာပြီး ကောင်းကင်ယံရှိ နတ်သမင် ခြေလှမ်းကို အစွမ်းကုန် အသုံးပြုကာ ပေတစ်ထောင်ကျော်အထိ ချက်ချင်း ရှောင်တိမ်းလိုက်သည်။

"ဘုန်း"

ရှီကျင့်ထျန်း၏ တောင်ကြီးတစ်လုံးကဲ့သို့ ခြေထောက်ကြီး မြေပြင်ပေါ်သို့ ကျရောက်သွားရာ ကျောက်ဝါ ကောင်းကင်ဂူနန်း တစ်ခုလုံး တုန်ခါသွားလေ၏။ ရှီကျင့်ထျန်း၏ ခြေထောက် နင်းမိသော နေရာတွင် လေဟာပြင်၌ လေပြင်းများ ဖြစ်ပေါ်လာပြီး အရပ်မျက်နှာ အနှံ့အပြားသို့ ပြင်းထန်သော ရိုက်ခတ်မှုများ ထွက်ပေါ်သွားသည်။

"ဂျွတ်..ဂျွတ်.. ဂျွတ်"

မိုင်ပေါင်းများစွာ ပတ်လည်ရှိ ခိုင်ခံ့လှသော အဆောက်အဦးများမှာ ထိုရိုက်ခတ်မှုကြောင့် ဆွေးမြေ့နေသော သစ်သားများကဲ့သို့ပင် ပြိုပျက်ကုန်တော့သည်။