အခန်း ၄၁၇

အပိုင်း (၄၁၇) - ချီမြောင်ရွှမ် နှင့်တိုက်ခိုက်ခြင်း

ကူမော့သည် ပြန်လည် ဖြေကြားခြင်း မရှိဘဲ မေးမြန်းလိုက်သည်။

"ဒါဆို... အဲဒီတုန်းက ကပ်ဆိုးနတ်ဘုရား က ခင်ဗျားနဲ့ ပူးပေါင်းခဲ့တာပေါ့..."

ချီမြောင်ရွှမ် က ဆိုသည်။

"မင်း ပြောတာ မှန်ပါတယ်... ငါ ဒဏ်ရာရနေရင်တောင်မှ သာမန် မီးဝိညာဉ်မျိုးနွယ်စု ရဲ့ အစောင့်အရှောက် တစ်ယောက်က ငါ့ကို တားဆီးနိုင်မှာ မဟုတ်ပါဘူး... ဒါပေမဲ့ အဲဒီတုန်းက သူ့ကို ငါ မသတ်ခဲ့ဘူးလေ... အဲဒီအစား သူ့ကို ရွေးချယ်စရာ တစ်ခု ပေးခဲ့တယ်... အသက်ရှင်ဖို့၊ သူ့ရဲ့ ဆန္ဒကို ဖြည့်ဆည်းပေးဖို့၊ သူ့ကို မသေနိုင်တဲ့ စွမ်းရည် ပေးဖို့နဲ့ ငါ့အတွက် အလုပ်လုပ်ပေးဖို့ပေါ့..."

"အဲဒါက ရွေးချယ်ဖို့တောင် မလိုတဲ့ ရွေးချယ်မှု တစ်ခုပါ၊ ဒါကြောင့် သူ သေဖို့ကို ရွေးချယ်မှာ မဟုတ်ပါဘူး... သူ့ရဲ့ ဆန္ဒက မီးဝိညာဉ်မျိုးနွယ်စု အပေါ် ကျရောက်နေတဲ့ မီးချီလင် ရဲ့ ကျိန်စာကို ဖယ်ရှားပြီး မီးဝိညာဉ်မျိုးနွယ်စု က လူတွေကို ပုံမှန် ဘဝအတိုင်း ရှင်သန်နိုင်ဖို့ပါပဲ...”

“ ပြီးတော့ တိုက်တိုက်ဆိုင်ဆိုင်ပဲ ငါ တန်ဖိုးထားတာက သူ့ရဲ့ ပြိုင်ဘက်ကင်းတဲ့ ဆေးပညာ အရည်အချင်း ကိုပါပဲ... ဒါကြောင့်မို့လို့၊ မီးဝိညာဉ်မျိုးနွယ်စု က ကိုးကွယ်နေတဲ့ ချီလင် ဥ ကို လေ့လာဖို့ ငါ သူ့ကို ပေးခဲ့တာလေ..."

"ငါ သူ့ကို စွမ်းရည်တွေ ပေးသနားခဲ့တယ်၊ သူ လိုအပ်တဲ့ လျှို့ဝှက် ကျမ်းစာတွေ၊ ငွေကြေးတွေနဲ့ ရှားပါးတဲ့ ရတနာတွေ ဘာမဆို ပေးခဲ့တယ်၊ သူကလည်း ငါ့ကို စိတ်ပျက်အောင် မလုပ်ခဲ့ပါဘူး..."

"သူက ဆေးပညာရပ်မှာ ကြုံဖူးနားဝ မရှိတဲ့ တက်လှမ်းခြင်းနယ်ပယ် သွားရာ လမ်းကြောင်းကို ဖန်တီးခဲ့ပြီး တားမြစ် ကပ်ဆိုးနတ်ဘုရား တစ်ပါး ဖြစ်လာခဲ့တယ်... နောက်ထပ် ရာစုနှစ် အနည်းငယ် အကြာမှာတော့၊ ချီလင် ရဲ့ စွမ်းအားနဲ့ ပတ်သက်တဲ့ သူရဲ့ သုတေသနတွေက ပိုမို နက်ရှိုင်းလာခဲ့ပြီး နောက်ဆုံးမှာတော့ ယဲ့ကျင့်လန် အပေါ် ငါ့ရဲ့ စမ်းသပ်ချက်က အောင်မြင်သွားခဲ့တယ်လေ..."

ကူမော့က မေးလိုက်သည်။

"ဒါဆို... ခို့ရွှီး အပျက်အစီး ပွင့်လာတိုင်း ခင်ဗျား နဲ့ ကပ်ဆိုးနတ်ဘုရား တို့ ဒီကို လာရတဲ့ ရည်ရွယ်ချက်က မီးချီလင် ဘယ်မှာ ရှိနေသလဲ ဆိုတာကို အတည်ပြုဖို့ပေါ့..."

ချီမြောင်ရွှမ်က ခေါင်းညိတ်လိုက်ပြီး ဆိုသည်။

"ဘာပဲဖြစ်ဖြစ်၊ ဒီသားရဲက တခြား နေရာမှာ ပုန်းနေရင် ရှာဖို့ တကယ် ခက်ခဲတယ်လေ... ယုရှီအာ က သူ့ရဲ့ အထောက်အထားနဲ့ မီးဝိညာဉ်မျိုးနွယ်စု နဲ့ ဆက်သွယ်ပြီး မီးချီလင် နိုးထလာသလား သို့မဟုတ် ထွက်သွားပြီလား ဆိုတာကို အတည်ပြုနိုင်တယ်..."

ကူမော့ က ဆိုသည်။

"ဒါဆို ဘာလို့ ဒီလောက် ဒုက္ခခံနေရတာလဲ... ကပ်ဆိုးနတ်ဘုရား က ခင်ဗျားရဲ့ ကျေးကျွန်ပဲလေ၊ ခင်ဗျားတို့ နှစ်ယောက် ဘာလို့ ပူးပေါင်းပြီး အတင်း မဝင်ကြတာလဲ..."

ချီမြောင်ရွှမ်က ဆိုသည်။

"ယဲ့ကျင့်လန် ကို စစ်တပ် ဦးဆောင်ခိုင်းတာက..."

"အဲဒီအဖွဲ့က အခြေအနေ နှစ်ခုလုံးအတွက် ပြင်ဆင်ထားတာပါ... ကပ်ဆိုးနတ်ဘုရား က မီးချီလင် ရဲ့ စွမ်းအင် ရှိနေတယ်လေ၊ သူသာ ခို့ရွှီး အပျက်အစီး ထဲကို ဝင်သွားရင်၊ သူ့ကို သေချာပေါက် အာရုံခံမိသွားမှာပါ...”

“ ဒါကြောင့်မို့လို့၊ တစ်ခုတည်းသော ရွေးချယ်စရာကတော့ မီးချီလင် ရဲ့ နယ်ပယ် အတားအဆီးကို ခုခံဖို့အတွက် ဟင်းလင်းပြင်ဝင်္ကပါ ကို ထိန်းချုပ်ရာမှာ မီးဝိညာဉ်မျိုးနွယ်စု ကို ကူညီခိုင်းဖို့ပါပဲ..."

"ဒါပေမဲ့၊ မျှော်လင့်မထားတဲ့ အခြေအနေတွေ မဖြစ်လာဘူးလို့ အာမခံချက် မရှိပါဘူး... ဒါကြောင့်မို့လို့ ငါက ယဲ့ကျင့်လန် ကို အရန်အစီအစဉ် တစ်ခု အနေနဲ့ စစ်တပ် ဦးဆောင်ခိုင်းခဲ့တာပါ... သူတို့ရဲ့ တိုက်ခိုက်ရေး ချီစွမ်းအား ကလည်း မီးနယ်ပယ် ကို ယာယီ ခုခံနိုင်စွမ်း ရှိတယ်လေ... “

“မဟုတ်ရင် ကပ်ရောဂါနတ်ဘုရား နဲ့ ငါသာ မီးနယ်ပယ် ထဲမှာ မီးချီလင် နဲ့ ထိပ်တိုက် ရင်ဆိုင်ရမယ် ဆိုရင်၊ ငါတို့ သူတို့ကို သတ်နိုင်သေးတယ် ဆိုပေမဲ့၊ ငါတို့ အနာတရ ကင်းကင်းနဲ့ ပြီးမယ်လို့ အာမခံချက် မရှိဘူးလေ..."

ကူမော့သည် ခေါင်းအနည်းငယ် ညိတ်လိုက်ပြီး ဆိုသည်။

"ကျွန်တော် နားလည်ပါပြီ..."

ချီမြောင်ရွှမ်က ဆိုသည်။

"မူလကတော့၊ အခု အချိန်မှာ မင်းကို ငါ့ကိုယ်ငါ ဖွင့်မပြချင်သေးလို့ ကပ်ဆိုးနတ်ဘုရား ကို ငါနဲ့အတူ လှုပ်ရှားခိုင်းခဲ့တာပါ... မင်းနဲ့အတူ အချိန်အတန်ကြာ ပျော်ရွှင်ချင်ခဲ့တာ၊ ဒါပေမဲ့ မင်းက ဒီလောက်အထိ မျက်စိရှင်ပြီး ပြဿနာကို မြင်သွားခဲ့တယ်လေ..."

"နှမြောစရာပဲ၊ မင်းက ငါ့ရဲ့ ပျော်ရွှင်မှု အများကြီးကို ယူသွားခဲ့ပြီ ကောင်လေး... ချီမြောင်ရွှမ် ဆိုတဲ့ အထောက်အထားက ငါ့ကို အတော်လေး ပျော်ရွှင်မှု ပေးခဲ့တာပါ... မူလက မင်းနဲ့ ငါ သူငယ်ချင်း တစ်ယောက်အနေနဲ့ အနှစ် နှစ်ဆယ် သုံးဆယ်လောက် အချိန်ဖြုန်းဖို့ စီစဉ်ထားခဲ့တာ၊ ဒါပေမဲ့ မင်းက... ဟူး၊ မင်း တကယ်ကို ငါ့ကို မဖော်ထုတ်ခဲ့သင့်ဘူးလေ..."

ချီမြောင်ရွှမ်၏ မျက်နှာပေါ်တွင် အပြုံးတစ်ခု ရုတ်တရက် ပေါ်လာသော်လည်း၊ ၎င်းမှာ အလွန် ထူးဆန်းနေပုံရသည်။

သူသည် ကူမော့ကို စိုက်ကြည့်ကာ ဆိုသည်။

"ဒါပေမဲ့ ငါ့မျက်လုံးထဲမှာတော့ မင်းက အရမ်းကို ချစ်ဖို့ကောင်းတဲ့ အိမ်မွေးတိရစ္ဆာန်လေး ဖြစ်နေတုန်းပါပဲ... ဒါကြောင့် မင်း အမှားလုပ်ခဲ့ပေမဲ့ ငါ မင်းကို ခွင့်လွှတ်ပေးပါ့မယ်... အဲဒီအမှားမျိုး မင်း ထပ်လုပ်မှာ မဟုတ်ဘူး မဟုတ်လား... မင်း ဉာဏ်ပညာရှိတဲ့ ရွေးချယ်မှု တစ်ခု လုပ်မှာ မဟုတ်လား..."

ကူမော့က လက်ကို ဝှေ့ယမ်းလိုက်ရင်း ဆိုသည်။

"တောင်းပန်ပါတယ် အဘိုးကြီး... ငါ က ခွေး မလုပ်နိုင်ဘူးလေ..."

"မင်း ဘယ်လိုလုပ် ခွေး ဖြစ်ရမှာလဲ..."

ချီမြောင်ရွှမ် က ဆိုသည်။

"မင်းရဲ့ မူလဝိညာဉ် အပေါ်မှာ သေးငယ်တဲ့ ကန့်သတ်ချက်လေး တစ်ခုပဲ ငါ ထားမှာပါ... စိတ်မပူပါနဲ့၊ ယုရှီအာ လိုမျိုးပဲ၊ မင်း လိမ္မာနေသရွေ့ မင်း အမြဲတမ်း လွတ်လပ်နေမှာပါ..."

ကူမော့က သံသယဖြင့် မေးလိုက်သည်။

"ဒါဆို ကျွန်တော့် မျက်လုံးတွေကို ကုသပေးတုန်းက ခင်ဗျား ဘာလို့ တစ်ခုခု မလုပ်ခဲ့တာလဲ..."

ချီမြောင်ရွှမ်က ပြန်ဖြေသည်။

"အိမ်မွေးတိရစ္ဆာန် ရွေးချယ်တဲ့အခါ ငါ့မှာ လိုအပ်ချက်တွေ ရှိတယ်လေ၊ ကြားလား... ကြောင် ဒါမှမဟုတ် ခွေး တစ်ကောင်ကပဲ အရည်အချင်း ပြည့်မီတယ်လို့ မင်း ထင်နေတာလား... ဒါပေမဲ့ ငါ ဝန်ခံရပါမယ်၊ အဲဒီတုန်းက ငါ သူ့အပေါ် အကဲဖြတ်တာ မှားသွားခဲ့တယ်..."

ကူမော့က ဆိုသည်။

"ဒါဆို၊ ယဲ့ကျင့်လန်၊ ခင်ဗျား..."

"သူက အဲဒီလို လုပ်ခံရဖို့ မတန်ပါဘူး..."

ကူမော့က

"ယဲ့ကျင့်လန် ကိုယ်စား ကျွန်တော် ကျေးဇူးတင်ပါတယ်..."

ချီမြောင်ရွှမ် သည် သူ၏ လက်များကို ဖြည်းညင်းစွာ ဖြန့်ကားလိုက်ပြီး ဆိုသည်။

"ကူမော့... မင်းရဲ့ ရွေးချယ်မှုကို လုပ်ရမယ့် အချိန် ရောက်ပြီ... မင်းက ထာဝရ အသက်ရှင်ဖို့အတွက် ငါ့ရဲ့ ကျေးကျွန် ဖြစ်ဖို့ ရွေးချယ်မှာလား၊ ဒါမှမဟုတ်... သေမလား..."

ကူမော့က ခပ်ဖွဖွ ရယ်မောလိုက်သည်။

"ကျွန်တော်က တတိယ ရွေးချယ်စရာကို ရွေးတယ်... ခင်ဗျားကို သတ်ဖို့လေ..."

ကူမော့ စကားပြောပြီးသည်နှင့် တစ်ပြိုင်နက် ချီမြောင်ရွှမ်၏ ခန္ဓာကိုယ်ထဲမှ စူးရှသော အသံတစ်သံ ပေါက်ကွဲထွက်လာသည်။ မရေမတွက်နိုင်သော ငွေရောင်ဓားစွမ်းအင်ငယ်လေးများသည် သူ၏ ခန္ဓာကိုယ်တွင်းမှ ထွက်လာပြီး ရူးသွပ်စွာ ဆွဲဖြဲနေတော့သည်။

ထိုအရာမှာ ကူမော့၏ ယခင်ဓားချက်မှ ချန်ရစ်ခဲ့သော ဓားအနှစ်သာရဖြစ်ပြီး လုံးဝပေါက်ကွဲသွားပြီ ဖြစ်ရာ ချီမြောင်ရွှမ်အနေဖြင့် ဖိနှိပ်ထားနိုင်စွမ်း မရှိတော့ပေ။

ဓားစွမ်းအင်များ ဝဲပျံသွားစဉ် စူးရှသော မြည်ဟည်းသံနှင့်အတူ ချီမြောင်ရွှမ်၏ ခြေလက်များနှင့် အရိုးများတစ်လျှောက် ချက်ချင်းပြန့်နှံ့သွားပြီး၊ သူ၏ အနက်ရောင်ဝတ်ရုံကို ဆွဲဖြဲကာ အသားများနှင့် သွေးကြောများကို အမှုန့်ကြိတ်ပစ်လိုက်တော့သည်။

၎င်းမှာ သာမန်ဓားချက်တစ်ခု မဟုတ်ဘဲ အတွင်းမှနေ၍ အပြင်သို့ လုံးဝပြိုကွဲသွားခြင်း ဖြစ်သည်။ တောက်ပသော ငွေရောင်အလင်းတန်းတစ်ခုအတွင်း၌ ချီမြောင်ရွှမ်၏ ခန္ဓာကိုယ်သည် သွေးတစ်စက်မျှပင် မရှိဘဲ၊ မရေမတွက်နိုင်သော အဖြူရောင်အမှုန့်များအဖြစ်သို့ ပြောင်းလဲသွားတော့သည်။

သို့သော် ထိုအမှုန့်များ မြေပြင်ပေါ်သို့ ကျရောက်သွားသည့် အခိုက်အတန့်မှာပင်

"ဟီးဟီးဟီး..."

ဟူသော ကြက်သီးထဖွယ် ထူးဆန်းသော ရယ်မောသံတစ်ခု အရပ်မျက်နှာအသီးသီးမှ ထွက်ပေါ်လာပြီး၊ ကပ်ဆိုးနတ်ဘုရားမှာ လှိမ့်တက်နေသော မီးခိုးများအဖြစ် ပြောင်းလဲကာ ပျောက်ကွယ်သွားသည်။

မီးခိုးများအတွင်းမှ မရေမတွက်နိုင်သည့် တစ္ဆေခေါင်းများ တစ်ခုပြီးတစ်ခု ထွက်ပေါ်လာသည်။ မျက်နှာတစ်ခုစီတိုင်းတွင် နာကျင်မှုနှင့် နာကြည်းမှုများ ပြည့်နေပြီး၊ မျက်လုံးပေါက်များမှ အမည်းရောင်ပြည်များ စီးကျလျက် အစွယ်များကြားမှ စူးရှသော အော်ဟစ်သံများကို ထုတ်လွှတ်နေကြသည်။

၎င်းတို့သည် မီးခိုးတန်းများအဖြစ် ပြောင်းလဲသွားပြီး၊ အေးစက်ကာ ပုပ်အဲ့အဲ့နိုင်သော အရှိန်အဝါများနှင့်အတူ ကူမော့၏ လည်ပင်းနှင့် နှလုံးသားကို မတူညီသော ထောင့်ပေါင်းစုံမှ ကိုက်ဖြတ်ဆွဲဖြဲရန် အတင်းတိုးဝင်လာကြသည်။

ဤအခိုက်အတန့်တွင် အမှောင်ထုကြီးမှာ အသက်ဝင်လာသကဲ့သို့ ဖြစ်နေပြီး၊ မရေမတွက်နိုင်သော တစ္ဆေမျက်နှာများသည် ပေါ်လာလိုက် ပျောက်သွားလိုက် ကြောက်မက်ဖွယ်ကောင်းသော ရုပ်ပုံတစ်ခုကို ဖန်တီးနေတော့သည်။

"ဟမ့်..."

ကူမော့က ခပ်ဖွဖွ နှာမှုတ်လိုက်ရာ သူ၏ သူငယ်အိမ်များ တောက်ပစွာ လင်းလက်သွားသည်။

မျက်စိတစ်မှိတ်အတွင်းမှာပင် သူ၏ ပတ်လည်၌ လရောင်ကဲ့သို့ ထင်ရှားသော အဖြူရောင်အရှိန်အဝါတစ်ခု ရုတ်တရက် စုစည်းသွားသည်။ သူ၏ မူလဝိညာဉ်ဖြင့် မြှင့်တင်ထားသော မွေးရာပါချီစွမ်းအားသည် သူ့ကို လွှမ်းခြုံထားတော့သည်။

တိုးဝင်လာသော တစ္ဆေမီးခိုးများမှာကာကွယ်ရေးအရှိန်အဝါနှင့် ထိတွေ့မိသော အခါ ချက်ချင်းပင် စူးရှစွာ အော်ဟစ်ကာ၊ အရည်ပျော်သွားတော့သည်။ နောက်ထပ် တစ္ဆေမျက်နှာများ တစ်ခုပြီးတစ်ခု ထပ်မံရောက်ရှိလာသော်လည်း ကာကွယ်ရေးအရှိန်အဝါသို့ ချဉ်းကပ်လာသည်နှင့် အလင်းတံတိုင်းကြောင့် ကြေမွပျက်စီးသွားကြရသည်။

ကူမော့ကို ဗဟိုပြု၍ မွေးရာပါချီစွမ်းအားသည် အလင်းရောင်မှာ ပိုမိုတောက်ပလာကာ အကာအကွယ်အကွာအဝေးသည်လည်း လျင်မြန်စွာ ကျယ်ပြန့်လာတော့သည်။

ထိုချီစွမ်းအားက အဆိပ်ငွေ့နယ်မြေကို ဆွဲဖြဲတော့မည့်အချိန်၌ပင် တိုးညင်းသော လှောင်ပြောင်သံတစ်ခု အမှောင်ထု၏ အနက်ရှိုင်းဆုံးနေရာမှ ထွက်ပေါ်လာသည်။

ဖုန်မှုန့်အဖြစ် ပြောင်းလဲသွားခဲ့သော ချီမြောင်ရွှမ်သည် ကူမော့၏ အနောက်ဘက် တွင် ပြန်လည်ပေါ်ထွက်လာပြီး သူ၏ မျက်နှာပေါ်၌ သဲ့သဲ့မျှသော အပြုံးတစ်ခု ရှိနေသည်။ သူသည် လုံးဝ အနာတရကင်းမဲ့နေပြီး ဓားစွမ်းအင်ကြောင့် အစိတ်စိတ်အမွှာမွှာ ဖြစ်သွားသည့် မြင်ကွင်းမှာ ပုံရိပ်ယောင်တစ်ခုမျှသာ ဖြစ်နေတော့သည်။

သူသည် ကူမော့ကို ကြည့်ကာ ဆိုသည်။

"ကူမော့... မင်းက ဉာဏ် မရှိတဲ့ ဆုံးဖြတ်ချက် တစ်ခုကို ချလိုက်တာပဲ... မင်းအပေါ် ထားရှိတဲ့ ငါ့ရဲ့ ခံစားချက်တွေ ပျောက်ကွယ်သွားပြီ..."

သူသည် လက်ညှိုးကို ဆန့်ထုတ်ကာ ကူမော့၏ ချီစွမ်းအား ဆီသို့ ထိုးချိန်လိုက်လေသည်။ သူ၏ လက်ချောင်းထိပ်မှာ ချီစွမ်းအား ၏ မျက်နှာပြင်ကို မထိတွေ့မီမှာပင် ရွှေရောင် အလင်းလွှာ တစ်ခုမှာ သူ၏ လက်ချောင်းထိပ်မှနေ၍ ပြန့်နှံ့သွားတော့သည်။

"ဖွတ်"

ပူဖောင်းလေး တစ်ခု ပေါက်ကွဲသွားသည့်အလား တိုးညင်းသော အသံလေး တစ်ခု ထွက်ပေါ်လာသည်။

ဖျက်ဆီး၍ မရနိုင်သော၊ အပြစ်အနာအဆာကင်းသည့် မွေးရာပါ ချီစွမ်းအား မှာ ချီမြောင်ရွှမ်၏ လက်ချောင်းထိပ်နှင့် ထိတွေ့လိုက်သည့် အခိုက်အတန့်တွင် အက်ကွဲသွားတော့သည်။

စွမ်းအင်နယ်ပယ်မှာ ရုတ်တရက် ပြိုကျသွားတော့သည်။ ကူမော့သည် နောက်သို့ အနည်းငယ် ဆုတ်လိုက်ရပြီး၊ သူ၏ ကာကွယ်ရေး စစ်မှန်သော ချီစွမ်းအား မှာ အပေါက်ခံရသော လေအိတ် တစ်ခုအလား လျင်မြန်စွာ ယိုစိမ့်ထွက်သွားကာ၊ စွမ်းအင် မညီမျှမှုကြောင့် သူ၏ ခြေအောက်ရှိ အမည်းရောင် မြေပြင်ပင်လျှင် ပြင်းထန်စွာ တုန်ခါသွားတော့သည်။

"မင်း၊ မင်း..."

ချီမြောင်ရွှမ် က သက်ပြင်းချလိုက်သည်။

"မင်းက ဘယ်လိုလုပ်ပြီး ဒီလောက် ကျေးဇူးကန်းနိုင်ရတာလဲ... မီးချီလင် ဆိုတဲ့ အဲဒီတိရစ္ဆာန်ကို ငါ သတ်လိုက်တာကို ကြည့်ပြီး အဲဒါက ငါ့မှာရှိတဲ့ စွမ်းအား အားလုံးပဲလို့ မင်း ထင်နေတာလား... ငါက မင်းကို နောက်ပြောင်နေတာပါ ကောင်လေး...”

“ ကောင်းပြီလေ၊ မင်းကို အရင်ဆုံး သင်ခန်းစာ တစ်ခု ပေးရမယ်... မင်းလို အလားအလာရှိတဲ့ အိမ်မွေးတိရစ္ဆာန်မျိုး ရှာတွေ့ဖို့က ရှားပါတယ်၊ ဒါကြောင့် ငါ မင်းကို နောက်ထပ် အခွင့်အရေး တစ်ခု ပေးသင့်တယ်"