အခန်း ၄၁၉

အပိုင်း (၄၁၉) - ချီမြောင်ရွှမ် နှင့်တိုက်ခိုက်ခြင်း ၃

ထိုအချိန်တွင်ပင်... သူ့ထံ ဦးတည်လာသော နဂါးကြီး၏ ထက်မြက်လှသည့် ခြေသည်းမှာ ပစ်မှတ်ကို လွဲချော်သွားခဲ့ပြီးနောက် အသံကြီးတစ်ခု ထွက်ပေါ်လာခဲ့သည်။

"အဘိုးကြီး၊ ခင်ဗျား ဘာကို ရှောင်နေတာလဲ..."

ထိုအသံကြီး မစဲခင်မှာပင်... နဂါးကြီးသည် ဖြူဖွေးလှသော အကြေးခွံများကို နိမ့်ချလိုက်ပြီး၊ ကောင်းကင်ယံတစ်ခုလုံးကို ဖုံးလွှမ်းသွားမတတ် ၎င်း၏ခြေသည်းငါးချောင်းကို ကျယ်ပြန့်စွာ ဖြန့်ကားလိုက်သည်။

ထိုအချိန်တွင် ချီမြောင်ရွှမ်သည် တစ်လက်မခန့်သာ ရှည်သော ဓားမြှောင်ကို အမြန်ဆုံး ပစ်ပေါက်လိုက်ရာ၊ ၎င်း၏ဓားသွားထိပ်ဖျားမှ အေးစက်လှသော ခရမ်းရောင်အလင်းတန်းတစ်ခု ပေါက်ကွဲထွက်လာခဲ့သည်။ ဓားမြှောင်က လေထုကို ဖြတ်သန်းခုတ်ပိုင်းလိုက်သည့်ခဏ၌ ပတ်ဝန်းကျင်ရှိ လေထုမှာ အချွန်အတက်များပြည့်နေသော အာကာသအက်ကွဲကြောင်းတစ်ခုအဖြစ် ပွင့်ဟသွားတော့သည်။

ထို့နောက် သူသည် ဘေးနားတွင် မီးတောက်များဖြင့် လူးလွန့်နေသော မီးချီလင်သားရဲကြီးကို အသာအယာ ဖမ်းဆွဲလိုက်ရာ၊ သားရဲကြီးထံမှ မီးတောက်များသည် ဝဲဂယက်တစ်ခုအဖြစ် ပေါက်ကွဲသွားပြီး ချက်ချင်းပင် ထိုအက်ကွဲကြောင်းအတွင်းသို့ ပျောက်ကွယ်သွားခဲ့သည်။

ချီမြောင်ရွှမ်ကိုယ်တိုင် ထိုအက်ကွဲကြောင်းထဲသို့ ဝင်ရောက်ရန် ပြင်လိုက်စဉ်မှာပင်... အဖြူရောင်နဂါးကြီးက အရှိန်အဟုန်ဖြင့် ရှေ့သို့ ပြေးဝင်လာပြီး ၎င်း၏ဦးခေါင်းဖြင့် ချီမြောင်ရွှမ်၏ရင်ဘတ်ကို ဆောင့်တိုက်သွားသည်။

ဒဏ်ရာရထားပြီးဖြစ်သော သူ၏ရင်ဘတ်မှာ ချက်ချင်းပင် ကြေမွသွားခဲ့ရပြီး၊ နဂါး၏ဆောင့်အားကြောင့် ကောင်းကင်ယံသို့ လွင့်စင်သွားကာ မြေပြင်ပေါ်သို့ ပြင်းထန်စွာ ပြုတ်ကျပြီး ဧရာမကျင်းကြီးတစ်ခု ဖြစ်ပေါ်သွားစေခဲ့သည်။

ချီမြောင်ရွှမ်သည် ဒေါသတကြီးဖြင့် နဂါးကို ခုတ်ပိုင်းရန် သူ၏ဓားမြှောင်ကို ဝှေ့ယမ်းလိုက်သော်လည်း ထိုအခိုက်အတန့်၌ပင် နဂါးကြီးသည် ကူမော့အဖြစ် ပြန်လည်ပြောင်းသွားခဲ့သည်။ ကူမော့သည် လက်ကို ဆန့်ထုတ်ကာ 'ထိုက်ရွှီးဓား' ကို လေထဲတွင် ဝဲပျံစေလျက် ချီမြောင်ရွှမ်၏ လက်ကောက်ဝတ်ကို အမိအရ ခုတ်ပိုင်းလိုက်ရာ သူ၏လက်တစ်ဖက်မှာ ချက်ချင်း ပြတ်တောက်သွားတော့သည်။

ထူးဆန်းသည်မှာ... ပြတ်တောက်သွားသော ချီမြောင်ရွှမ်၏ လက်သည် မြေပြင်ပေါ်သို့ ကျသွားသည့်ခဏ၌ပင် ပျောက်ကွယ်သွားပြီး၊ လက်အသစ်တစ်ဖက် ချက်ချင်း ပြန်လည်ပေါက်လာခဲ့ခြင်း ဖြစ်သည်။ ထို့ပြင် သွေးချင်းချင်းနီနေသော သူ၏ရင်ဘတ်ပေါ်တွင်လည်း ထိုဓားမြှောင်သည် တစ်ဖန် ပြန်လည် ထွက်ပေါ်လာခဲ့ပြန်သည်။

"ကောင်လေး... မင်းက သေချင်နေတာပဲ..."

ချီမြောင်ရွှမ် သည် ဒေါသတကြီး ဟိန်းဟောက်လိုက်ပြီး၊ သူ၏ လက်ဖဝါးဖြင့် ကူမော့ဆီသို့ ပြင်းထန်စွာ ရိုက်ချလိုက်လေသည်။

ကူမော့သည် ထိုက်ရွှီးဓား ကို လက်နှစ်ဖက်ဖြင့် ဆုပ်ကိုင်ကာ အောက်သို့ ထိုးစိုက်လိုက်လေသည်။

သူတို့၏ လက်ဖဝါးများ ထိခိုက်မိချိန်တွင် ချီမြောင်ရွှမ်၏ ကြေမွနေသော ရင်ဘတ်မှာ ချက်ချင်းပင် ကျက်သွားတော့သည်။ သူသည် ကူမော့ကို စိုက်ကြည့်ကာ ဟိန်းဟောက်လိုက်သည်။

"ကောင်လေး... မင်းက တတိယမြောက် နဂါးပဲ... မင်းကို သေချင်လောက်အောင် ငါ လုပ်ပြမယ်..."

ထိုအချိန်မှာပင်၊ ချီမြောင်ရွှမ်၏ ရင်ဘတ်ပေါ်တွင် နောက်ထပ် ဒဏ်ရာတစ်ခု ပေါ်လာပြီး ထူးဆန်းသော ဓားမြှောင်၏ ထိပ်ဖျားမှာ တစ်ဖန် ထွက်ပေါ်လာကာ ဒေါသတကြီး ဟိန်းဟောက်သံ တစ်ခုကို ထုတ်လွှတ်လိုက်သည်။

" အောက်တန်းကျတဲ့ ကျေးကျွန်... မင်းက ဘယ်လိုလုပ်ပြီး ငါ့ကို အကြံအစည် လုပ်ရဲတာလဲ..."

"ပြန်သွားစမ်း..."

ချီမြောင်ရွှမ် သည် သူ၏ အခြား လက်တစ်ဖက်ဖြင့် ဓားမြှောင် ထိပ်ဖျားကို ရိုက်ချလိုက်လေသည်။ တစ်ချိန်တည်းမှာပင် ကပ်ဆိုးနတ်ဘုရား သည် အမည်းရောင် မြူခိုးတစ်စအဖြစ် ပြောင်းလဲသွားပြီး၊ ချီမြောင်ရွှမ်၏ လက်ဖဝါးကို ရစ်ပတ်သွားတော့သည်။ ချီမြောင်ရွှမ်၏ ရင်ဘတ်ပေါ်တွင် မှော်ဝင်္ကပါ တစ်ခု ပေါ်လာပြီး ဓားမြှောင်ကို ဖြည်းညင်းစွာ အထဲသို့ ပြန်တွန်းပို့လိုက်လေသည်။

"အောက်တန်းကျတဲ့ ကျေးကျွန်၊ အောက်တန်းကျတဲ့ ကျေးကျွန်... ငါ သတိပြန်ရလာတဲ့ အချိန်ကျရင် မင်းကို အမှုန့်ကြိတ်ပစ်မယ်..."

"အောက်တန်းကျတဲ့ ကျေးကျွန်..."

ရူးသွပ်သော ဟိန်းဟောက်သံ တစ်ခု ဓားမြှောင်အတွင်းမှ ပဲ့တင်ထပ်လာတော့သည်။

တစ်ချိန်တည်းမှာပင် ကူမော့သည် ချီမြောင်ရွှမ်၏ ဗိုက်ကို ကန်လိုက်ရာ လွင့်စင်သွားစေတော့သည်။ ထို့နောက် ထိုက်ရွှီးဓား ကို ဆုပ်ကိုင်လျက် သူသည် လေထဲသို့ ရောက်ရှိသွားပြီး ဓားဖြင့် အောက်သို့ ခုတ်ပိုင်းကာ လှောင်ပြောင်လိုက်သည်။

"အဘိုးကြီး ခင်ဗျား ဘာလို့ ကျေးကျွန် တစ်ယောက် ရှာချင်နေတာလဲဆိုတာ မဆန်းပါဘူး... တကယ်တော့ ခင်ဗျားရဲ့ သနားစရာကောင်းတဲ့ ဘဝ ကို ကယ်တင်ဖို့ပဲ ဖြစ်ရမယ်... ဘာ မသေမျိုး လဲ... ခင်ဗျားက မသေမျိုး ကျွန် တစ်ယောက် သက်သက်ပဲ.."

"ကူမော့... မင်းက သေဖို့ ကောင်းတယ်၊ မင်း ခွေးကောင်..."

ဖော်ထုတ်ခံလိုက်ရပြီးနောက် ချီမြောင်ရွှမ် ကျယ်လောင်စွာ ကျိန်ဆဲတော့သည်။

ကူမော့က သူ၏ဓားကို အရှိန်အဟုန်ဖြင့် အောက်သို့ ခုတ်ချလိုက်ရာ၊ ချီမြောင်ရွှမ်လည်း ခုခံရန် ချက်ချင်း ပြင်ဆင်လိုက်သည်။ သို့သော်လည်း ထိုအခိုက်အတန့်တွင် သူ၏ရင်ဘတ်အတွင်းမှ တစ်စုံတစ်ရာက ပိုမိုပြင်းထန်စွာ ရုန်းကန်လာသောကြောင့် အခြားလက်တစ်ဖက်ဖြင့် ဓားမြှောင်ကို အတင်းအကျပ် ဖိချထားလိုက်ရသည်။

ထိုသို့ တစ်စက္ကန့်မျှ အာရုံလွတ်သွားသည့် ခဏ၌ပင်... ကူမော့၏ပြင်းထန်လှသော ဓားချက်က ချီမြောင်ရွှမ်၏ဦးခေါင်းကို နှစ်ခြမ်းကွဲသွားစေခဲ့သည်။ ပြင်းထန်လှသော ဓားစွမ်းအင်များ ပေါက်ကွဲထွက်လာပြီး ချီမြောင်ရွှမ်၏ခန္ဓာကိုယ်ကို အပိုင်းပိုင်း ကြေမွသွားစေပြီး ကပ်ဆိုးနတ်ဘုရားမှာလည်း ချက်ချင်းပင် မီးခိုးငွေ့များအဖြစ် ပျောက်ကွယ်သွားတော့သည်။

ထို့နောက် ကူမော့က အေးစက်စွာ နှာမှုတ်လိုက်ပြီး လက်ကို ဝှေ့ယမ်းလိုက်ရာ ပတ်ဝန်းကျင်မှာ ချက်ချင်းပင် အဖြူနှင့်အမည်း အရောင်နှစ်မျိုးအဖြစ် ပြောင်းလဲသွားခဲ့သည်။

ထိုစဉ် ချီမြောင်ရွှမ်သည် လေထုထဲ၌ ပြန်လည်ပေါ်လာပြန်သည်။ သူ၏လက်နှစ်ဖက်မှာ ဓားမြှောင်ကို တင်းကျပ်စွာ ဆုပ်ကိုင်ထားသော်လည်း ထိုဓားမြှောင်၏ ဆန်းကြယ်လှသော စွမ်းအားကြောင့် လက်နှစ်ဖက်စလုံးမှာ သွေးချင်းချင်းနီနေသည့် အရိုးစုများအဖြစ်သို့ ပြောင်းလဲသွားခဲ့ရသည်။ တစ်ဖက်တွင်လည်း ကပ်ဆိုးနတ်ဘုရားသည် တောက်ပသော လရောင်၏ ဖုံးလွှမ်းမှုကို ခံလိုက်ရသဖြင့် ကြေမွသွားပြီး လူသားပုံစံကိုပင် ဆက်လက်မထိန်းသိမ်းနိုင်တော့ပေ။

ကူမော့က လက်ကို ထပ်မံ၍ ဝှေ့ယမ်းလိုက်ရာ၊ စွမ်းအားကြီးမားလှသော ရေလှိုင်းများနှင့် လရောင်များ တိုးဝှေ့ထွက်ပေါ်လာပြီး ချီမြောင်ရွှမ်၏ခန္ဓာကိုယ်ကို တိုက်ရိုက် ကြေမွဖျက်ဆီးပစ်လိုက်တော့သည်။ သို့သော်လည်း ချီမြောင်ရွှမ်မှာမူ မည်သည့်ခံစားချက်မျှ မရှိဘဲ တည်ငြိမ်စွာဖြင့် ပြောလိုက်သည်။

"ကောင်လေး... မင်း ဒီနေ့ ကံကောင်းတာပဲ... ငါ့အထဲက အဲဒီတိရစ္ဆာန်ကို မင်း တကယ်ပဲ နိုးထလာအောင် လုပ်နိုင်ခဲ့တယ်... နောက်တစ်ခါ ငါတို့ တွေ့တဲ့အခါ မင်း သေပြီပဲ..."

သူ၏ စကားများပင် မဆုံးမီမှာပင်၊ ဓားမြှောင်ကို ဆုပ်ကိုင်ထားသော ချီမြောင်ရွှမ်၏ အရိုးစု လက်များမှာ ခပ်ဖွဖွ ခုတ်ပိုင်းလိုက်ပြီး လေသာနယ် အက်ကွဲကြောင်း တစ်ခုကို ဖန်တီးလိုက်လေသည်။

"ဂရွမ်း..."

ကူမော့သည် နဂါးတစ်ကောင်အဖြစ် ပြောင်းလဲသွားပြီး ဟိန်းဟောက်သံ တစ်ခုကို ထုတ်လွှတ်ကာ အောက်သို့ ထိုးဆင်းသွားလေသည်။ သို့သော်လည်း သူ အနည်းငယ် နှေးသွားခဲ့သည်။ အက်ကွဲကြောင်းမှာ ပိတ်သွားခဲ့ပြီ ဖြစ်ကာ ချီမြောင်ရွှမ်၏ တည်ရှိမှုကို သူ မခံစားနိုင်တော့ပါချေ။

သို့သော်လည်း နဂါးသည် တွန့်ဆုတ်မနေဘဲ ၎င်း၏ ဧရာမ ခန္ဓာကိုယ်ကြီးကို ရုတ်တရက် လှည့်ကာ ကပ်ဆိုးနတ်ဘုရား ကို ကြည့်လိုက်လေသည်။

ဤအချိန်တွင် လရောင်ကြောင့် လှုပ်ရှားမရ ဖြစ်နေသော ကပ်ဆိုးနတ်ဘုရား သည် ချီမြောင်ရွှမ် ထွက်ပြေးသွားသည်ကို ကြည့်ကာ သူ၏ ကျိန်ဆဲသံများကို မထိန်းချုပ်နိုင်တော့ချေ။

"သရဲအိုကြီးချီ... မင်းရဲ့ အမေကို ငါ လုပ်မယ်..."

ကပ်ဆိုးနတ်ဘုရား မှာ မျက်စိတစ်မှိတ်အတွင်းမှာပင် မီးခိုးများအဖြစ် ပျောက်ကွယ်သွားတော့သည်။

သို့သော်လည်း နတ်ဘုရား နဂါးမှာ လျှပ်တစ်ပြက် ရောက်ရှိလာလေသည်။ ၎င်း၏ ခန္ဓာကိုယ်မှာ လည်ပတ်သွားပြီး ပျောက်ကွယ်သွားသော အဆိပ်ငွေ့များကို စုပ်ယူလိုက်ရန် လေဆင်နှာမောင်း တစ်ခုကို ဖန်တီးလိုက်လေသည်။

ထို့နောက် ယုရှီအာ ၏ မူလဝိညာဉ်ကို အဆိပ်ငွေ့များအတွင်းမှ အတင်းအကျပ် တွန်းထုတ်လိုက်ပြီး မြေပြင်ပေါ်သို့ ပြိုကျသွားစေတော့သည်။

နတ်ဘုရား နဂါးမှာ အောက်သို့ ထိုးဆင်းသွားပြီး ကူမော့၏ ပုံရိပ်အဖြစ် ချက်ချင်း ပြောင်းလဲသွားတော့သည်။ သူ၏ လက်ကောက်ဝတ်ကို ခါလိုက်ရာ ထိုက်ရွှီးဓား မှာ ပျံသန်းသွားပြီး ယုရှီအာ ၏ ရင်ဘတ်ကို ဖောက်ထွင်းသွားတော့သည်။