အခန်း ၄၂၈

အပိုင်း (၄၂၈) သူတော်စင်လမ်းစဉ်

ကျန်းယန်က ဂူဒူအာကို အံ့အားသင့်စွာ ကြည့်လိုက်သည်။ ဤမိစ္ဆာက မိုက်ရူးရဲဆန်နိုင်လွန်းလှသည်မဟုတ်ပါလော။ သူက မေးလိုက်၏။

"ဘာဖြစ်လို့လဲ"

ဂူဒူအာက လန်ကျားအထွတ်အမြတ်မြေဆီသို့ လှမ်းကြည့်လိုက်ပြီးနောက် ဖြည်းညင်းစွာ ပြောလေသည်။ "ဒီလောကကြီးမှာ မူလကတည်းက လမ်းဆိုတာမရှိခဲ့ဘူး။ တစ်ယောက်ယောက်က ဦးဆောင်ပြီး လမ်းဖောက်ပေးခဲ့လို့သာ နောက်လူတွေအတွက် လျှောက်စရာလမ်းဆိုတာ ရှိလာခဲ့တာ"

"လမ်းသစ်ကို ပထမဆုံးဖောက်လုပ်ခဲ့သူတွေကို ရှေ့ဆောင်လမ်းပြတွေလို့ ခေါ်ကြတယ်။ လက်ရှိအချိန်အထိ ဒီလောကမှာ အမတ၊ မိစ္ဆာ၊ သားရဲနဲ့ တစ္ဆေဆိုတဲ့ လမ်းစဉ်လေးခုကိုပဲ အောင်အောင်မြင်မြင် ဖွင့်လှစ်နိုင်ခဲ့သေးတာပဲ"

"ငါတို့လို တခြားလူအများစုကတော့ ဒီလမ်းစဉ်လေးခုပေါ်မှာပဲ ဆက်လျှောက်လှမ်းနေကြရတာ။ ငါတို့လိုလူမျိုးတွေကိုတော့ နောက်လိုက်တွေလို့ ခေါ်ကြတယ်"

"နောက်လိုက်တွေ သက်သက်သာဖြစ်နေတဲ့အတွက် သူတို့တွေက ရှေ့ဆောင်လမ်းပြတွေကို ကျော်လွန်သွားဖို့ဆိုတာ မဖြစ်နိုင်ဘူး။ တခြားတစ်မျိုးပြောရရင် ငါတို့ရောက်နိုင်တဲ့အမြင့်ဆုံးနေရာဟာ ရှေ့ဆောင်လမ်းပြတွေ ရောက်ခဲ့တဲ့အမြင့်ဆုံးနေရာလောက်ပဲ ရှိနိုင်တယ်"

"ပြီးတော့ ရှေ့ဆောင်လမ်းပြတိုင်းက ကောင်းကင်နဲ့မြေကြီးရဲ့ အချစ်တော်တွေလို့ ပြောလို့ရတယ်။ ဒီကမ္ဘာကြီးက ဖန်ဆင်းရှင်တွေ ပေါ်ထွက်လာတာကြောင့်သာ စွမ်းအားကြီးမားလာခဲ့တာပဲ"

"အခု သူတော်စင်သခင်က ရှေ့ဆောင်လမ်းပြတစ်ယောက်ရဲ့ အရည်အသွေးတွေကို ပြသနေပြီ။ ပြီးတော့ သူတော်စင်လမ်းစဉ်ကလည်း အတိုင်းအတာတစ်ခုအထိ အောင်မြင်နေပြီ။ ဒါပေမဲ့ သူ့ရဲ့သူတော်စင်လမ်းစဉ်က ပြီးပြည့်စုံတဲ့အဆင့်ကို မရောက်သေးဘူး။ ဒါကြောင့် အခုအချိန်က သူ့ကို ဖြုတ်ချဖို့ အကောင်းဆုံးအချိန်ပဲ"

"သူ့ကိုသတ်၊ သူ့ရဲ့တာအိုအသီးအပွင့်ကို လုယူပြီး ရှေ့ဆောင်လမ်းပြတစ်ယောက် ဖြစ်လာဖို့ဆိုတာ အကြီးမားဆုံးသော အခွင့်အရေးကြီးပဲ"

ကျန်းယန်မှာ အလွန်အမင်း တုန်လှုပ်သွားခဲ့ရသည်။ တာအိုကျင့်ကြံသူများအကြားတွင် ရှေ့ဆောင်လမ်းပြများနှင့် နောက်လိုက်များဟူ၍ ကွဲပြားခြားနားမှုရှိနေလိမ့်မည်ဟု သူတစ်ခါမှ တွေးမထင်ထားခဲ့ပေ။

ဆိုလိုသည်မှာ ဖန်ဆင်းခြင်းစိတ်ဝိညာဉ်ခန်းမထဲက ထိုထိပ်သီးပုဂ္ဂိုလ်ကြီးလေးဦးက တည်ထောင်သူတွေဖြစ်ရမည်သာ။

သူတို့က အမတ၊ မိစ္ဆာ၊ သားရဲနှင့် တစ္ဆေလမ်းစဉ်တို့ကို လက်ဆင့်ကမ်းပေးခဲ့ကြခြင်းဖြစ်သည်။

နှောင်းခေတ်က ရေတွက်မရနိုင်သောလူများစွာသည် ကျင့်ကြံရန်အတွက် ဤလမ်းစဉ်လေးခုထဲမှ တစ်ခုကို ရွေးချယ်ခဲ့ကြသည်။

သေချာသည်မှာ လူများစွာသည် စိတ်ဝိညာဉ်ပိုင်းဆိုင်ရာ ကျင့်ကြံနေစဉ်အတွင်း သူတို့၏ကိုယ်ပိုင်လမ်းစဉ်ကို တဖြည်းဖြည်း ရှာဖွေတွေ့ရှိလာကြခြင်းပင်။ ဥပမာအားဖြင့် သူတော်စင်သခင်၏ သူတော်စင်လမ်းစဉ်မျိုး ဖြစ်သည်။ ဥပမာဆိုရလျှင် ချင်းယွင်ကျိ၏ မိစ္ဆာနှိမ်နင်းခြင်းလမ်းစဉ်မျိုး ဖြစ်ပေသည်။ ဤလမ်းစဉ်များသည် ယခင်က လျှောက်လှမ်းခဲ့သော လမ်းများနှင့် ကွာခြားပေသည်။

အမှန်တကယ်တော့ ယခင်က ဤလမ်းစဉ်များကို မည်သူမှ မပြုပြင်ခဲ့ခြင်းမျိုး မဟုတ်ဘဲ အမှန်တကယ် လျှောက်လှမ်းနိုင်မည့် လမ်းတစ်ခုကို မဖန်တီးနိုင်ခဲ့ခြင်းသာ ဖြစ်သည်။ ထို့ကြောင့် နှောင်းလူများက လိုက်လံမလျှောက်လှမ်းနိုင်ခဲ့ဘဲ အမတများ၊ မိစ္ဆာများ၊ သားရဲများနှင့် တစ္ဆေများကဲ့သို့သော အခြေအနေမျိုးကို မဖန်တီးနိုင်ခဲ့ကြပေ။

သူတော်စင်သခင်က ကပ်ဘေးဖြတ်ကျော်ခြင်းနှောင်းပိုင်းအဆင့်သို့ ရောက်ရှိနေပြီဖြစ်၏။

သူတော်စင်လမ်းစဉ်ကလည်း လုံးဝနီးပါး ထွက်ပေါ်လာခဲ့ပြီဖြစ်သည်။

ထို့ကြောင့်ပင် သူတော်စင်သခင်ကို အမဲလိုက်သတ်ဖြတ်ခြင်းက အကြီးမားဆုံး

အခွင့်အရေးဖြစ်လိမ့်မည်ဟု ဂူဒူအာက ပြောခဲ့ခြင်းဖြစ်သည်။

ကျန်းယန်က ခဏမျှစဉ်းစားလိုက်ပြီးနောက် ဂူဒူအာကို တစ်ချက်ကြည့်ကာ မေးလိုက်သည်။

"ခင်ဗျားကရော ဘာလို့ သူ့နေရာကို မယူတာလဲ"

"ငါတို့နဲ့မသင့်တော်လို့ပါ" ဂူဒူအာက ခေါင်းခါပြလိုက်သည်

။ "လန်ကျားကုန်းမြေတိုက်ကြီးမှာ ရှိနေတုန်းက ငါလေ့လာကြည့်တော့ သူတော်စင်လမ်းစဉ်က လောကကြီးကို ပညာပေးလမ်းညွှန်တဲ့ လမ်းကြောင်းပေါ်ကနေ သွားတယ်ဆိုတာ တွေ့ရတယ်။ အဲ့ဒါက ငါတို့လုပ်နိုင်တဲ့အရာ မဟုတ်ဘူး"

"အကယ်၍ ကိုက်ညီမှုမရှိဘူးဆိုရင် နောက်ပိုင်းမှာ ကွင်းဆက်ကို ပြန်ဆက်လို့ရမှာမဟုတ်ဘူး။ မင်းတစ်ယောက်တည်းကသာ အတိအကျ ကိုက်ညီနေတာ။ ဒါကြောင့် ဒီအခွင့်အရေးကို မင်းဆုပ်ကိုင်နိုင်မှသာ ရလိမ့်မယ်"

"ဘယ်လိုလဲ။ ငါတို့ အဲ့ဒီအခွင့်အရေးကို ယူကြမလား"

ဂူဒူအာက ကျန်းယန်ကို စိတ်အားထက်သန်သော မျက်လုံးများဖြင့် စိုက်ကြည့်နေခဲ့သည်။

၎င်းက ရှေ့ဆောင်လမ်းပြတစ်ယောက်၏ မွေးဖွားလာမှုပင် ဖြစ်နိုင်ပေသည်။ ရှေ့ဆောင်လမ်းပြတစ်ယောက် အောင်မြင်စေရန် ကူညီပေးခြင်းဖြင့် သူတို့အနေနှင့် အကျိုးကျေးဇူးမည်မျှ ရရှိနိုင်မည်နည်း။

ယင်းက လောက၏အမြင့်ဆုံးနေရာတွင် ရပ်တည်နိုင်ပြီး ထိုထိပ်သီးပုဂ္ဂိုလ်ကြီးလေးဦးထဲမှ တစ်ဦးဖြစ်လာရန် အမှန်တကယ် အခွင့်အရေးကြီးပင် ဖြစ်သည်။

ကျန်းယန်က ခဏမျှ စဉ်းစားခန်းဝင်သွားပြီးနောက် ခေါင်းခါကာ ပြောလိုက်သည်။

"ဒါက အဓိပ္ပာယ်မရှိဘူး။ ကျွန်တော် မလိုချင်ပါဘူး"

ကဗျာကျမ်း၊ သမိုင်းကျမ်း၊ ဓလေ့ထုံးစံကျမ်း၊ ပြောင်းလဲခြင်းကျမ်းနှင့် ဂီတကျမ်းတို့ကို မဆိုထားနှင့်။ ကွန်ဖြူးရှပ်၏ ဩဝါဒကျမ်းများကိုပင် သူအပြည့်အစုံ ရွတ်ဆိုနိုင်စွမ်းမရှိပေ။

သူ့မှတ်ဉာဏ်များအရ သူတော်စင်လမ်းစဉ်က အဆုံးသတ်တွင် ပြိုလဲသွားမည်သာဖြစ်သည်။

ထောင်ပေါင်းများစွာသော နှစ်များတစ်လျှောက် ပညာဖြန့်ဝေခြင်းတွင် မိမိကိုယ်ကို နှစ်မြှုပ်ထားခဲ့သော သူတော်စင်သခင်က ကျန်းယန်ထံမှ အကြံဉာဏ်အနည်းငယ် ရရှိပြီးသည်နှင့် တစ်ဟုန်ထိုး တိုးတက်လာခဲ့သည်။

သူသာလျှင် သူတော်စင်လမ်းစဉ်အတွက် စစ်မှန်သော ကိုယ်စားလှယ်လောင်း ဖြစ်ပေသည်။ ယင်းကသာ ရှေ့ဆောင်လမ်းပြတို့၏ စစ်မှန်သောစိတ်ဝိညာဉ် ဖြစ်၏။

ကျန်းယန်ငြင်းဆန်လိုက်သည်ကို မြင်သောအခါ ဂူဒူအာ၏မျက်နှာတွင် နှမြောတသဖြစ်သွားဟန် ပေါ်လာခဲ့သည်။

သူ၏အမြင်တွင် ဤအရာက အမှန်တကယ်ပင် ကြီးမားလှသော အခွင့်အရေးကြီးတစ်ရပ် ဖြစ်နေခဲ့သည်။

ကျန်းယန်ကတော့ ထိုထက်မက ပို၍နက်နက်ရှိုင်းရှိုင်း တွေးတောနေခဲ့သည်။

သူက ပညာရေးစနစ်၏ အစိတ်အပိုင်းတစ်ခုကိုသာ သူတော်စင်သခင်အား ဖွင့်ဟပြသခဲ့ပြီး သူတော်စင်သခင်က သူတော်စင်လမ်းစဉ်ကို ဖွင့်လှစ်နိုင်ခဲ့သည်။ အကယ်၍ သူကသာ ဗုဒ္ဓဘာသာစနစ်အကြောင်းကို ဟွေ့ချင်းအား ရှင်းပြလိုက်မည်ဆိုပါက ဟွေ့ချင်းအနေဖြင့်လည်း ဗုဒ္ဓလမ်းစဉ်တစ်ခုကို ဖွင့်လှစ်နိုင်လိမ့်မည်မဟုတ်ပါလော။

ငါက ရှေ့ဆောင်လမ်းပြတစ်ယောက် မဟုတ်ရင်တောင်မှ ရှေ့ဆောင်လမ်းပြပေါင်းများစွာကို လမ်းညွှန်ပြသပေးခဲ့ဖူးတာပဲလေ။

သူပြန်ရောက်သည်နှင့် ဤကိစ္စကို သေချာစွာ စီစဉ်ရမည်ဟု သူခံစားလိုက်ရသည်။

"တစ်နေ့ကျရင် မင်းနောင်တမရဖို့ မျှော်လင့်ပါတယ်ကွာ" ဂူဒူအာက ကျန်းယန်ကိုကြည့်ကာ ခေါင်းခါလိုက်သည်။ "ဒီလိုအခွင့်အရေးမျိုးက နောက်ထပ်တစ်ခါ လာချင်မှ လာတော့မှာ"

ကျန်းယန်က ပြုံးကာ ပြောလိုက်သည်။

"ကိုယ့်အတွက် အသင့်တော်ဆုံးအရာက အကောင်းဆုံးပါပဲ"

"ဒါနဲ့ စီနီယာ။ အမတတွေ၊ မိစ္ဆာတွေ၊ သားရဲတွေနဲ့ တစ္ဆေတွေကို ဖန်တီးခဲ့တဲ့လူတွေအကြောင်း ကျွန်တော့်ကို ပြောပြလို့ရမလား။ သူတို့ရဲ့ လက်ရှိအခြေအနေက ဘယ်လိုရှိလဲ"

ဂူဒူအာက သက်ပြင်းချကာ ပြောလိုက်သည်။

"အဲ့ဒီရှေ့ဆောင်လမ်းပြလေးယောက်စလုံးက လွန်ခဲ့တဲ့နှစ်ပေါင်းများစွာက လူတွေလေ"

"သူတို့ရဲ့နောက်လိုက်တွေထဲမှာတောင် ဧကရာဇ်အဆင့်ရှိတဲ့ စွမ်းအားရှင်တွေ ထွက်ပေါ်လာခဲ့တာဆိုတော့ အဲ့ဒီလေးယောက်က ဘယ်လောက်တောင် စွမ်းအားကြီးမလဲဆိုတာ နားလည်နိုင်စွမ်းကို ကျော်လွန်နေပြီ။ သူတို့က နာမည်တွေလောက်ပဲ ချန်ရစ်ထားခဲ့ကြတာ"

ဤနေရာသို့ရောက်သောအခါ သူက ကျန်းယန်ကို အဓိပ္ပာယ်ပါပါ စိုက်ကြည့်လိုက်ပြီး ပြောလေသည်။

"မိစ္ဆာလမ်းစဉ်ကို ရှေ့ဆောင်ခဲ့တဲ့သူကို မြေအောက်ကမ္ဘာမိစ္ဆာဧကရာဇ်လို့ ခေါ်ကြတယ်။ မင်းကျင့်ကြံနေတဲ့ မြေအောက်ကမ္ဘာမိစ္ဆာနတ်ဘုရားပညာရပ်ဆိုတာ သူ့ရဲ့သီးသန့်ပညာရပ်ပဲ"

"အမတလမ်းစဉ်ကို ရှေ့ဆောင်ခဲ့တဲ့သူကိုတော့ ဥပဒေသသောင်းချီအမတဧကရာဇ်လို့ ခေါ်ကြတယ်။

သားရဲလမ်းစဉ်ကို ရှေ့ဆောင်ခဲ့သူကို ပြောင်မြောက်သောသားရဲဧကရာဇ်လို့ ခေါ်ပြီး တစ္ဆေလမ်းစဉ်ကို ဖွင့်လှစ်ခဲ့သူကို လူဝင်စားခြင်းတစ္ဆေဧကရာဇ်လို့ ခေါ်ကြတယ်"

အခြားမိစ္ဆာများအားလုံးကလည်း ကျန်းယန်ကို အဓိပ္ပာယ်ပြည့်ဝသော အကြည့်များဖြင့် ကြည့်လာကြသည်။

သူတို့အမြင်တွင် ကျန်းယန်သည် မြေအောက်ကမ္ဘာမိစ္ဆာဧကရာဇ်၏ ဆက်ခံသူပင် ဖြစ်နေခဲ့သည်။ သူက မိစ္ဆာကျင့်စဉ်လမ်းကြောင်းပေါ်ရှိ အမြင့်မြတ်ဆုံးသခင်၏ ဆက်ခံသူပင် ဖြစ်၏။

ကျန်းယန်က မျက်တောင်တဖျတ်ဖျတ်ခတ်လိုက်ပြီး သူ၏နှလုံးသားထဲတွင် တုန်လှုပ်မှုများဖြင့် ပြည့်နှက်သွားခဲ့သည်။ သူ၏ မြေအောက်ကမ္ဘာမိစ္ဆာနတ်ဘုရားပညာရပ်က အမှန်တကယ်တွင် မြေအောက်ကမ္ဘာမိစ္ဆာဧကရာဇ်၏ ပညာရပ်ဖြစ်နေကြောင်း ယခုမှသာ သူနားလည်သဘောပေါက်သွားတော့သည်။

ဂူဒူအာက သက်ပြင်းချကာ ကျန်းယန်ကိုကြည့်၍ ခေါင်းခါလိုက်သည်။

အကယ်၍ ကျန်းယန်သာ သူတော်စင်လမ်းစဉ်ကို လိုက်နာကျင့်ကြံပါက တစ်နေ့တွင် သူတော်စင်ဧကရာဇ်ကျန်းယန် ဟူသောဘွဲ့ကို ရရှိလာနိုင်သည်ဟု သူက ရိုးသားစွာ ခံစားနေရသောကြောင့် ဖြစ်သည်။

ကံမကောင်းစွာဖြင့် ထိုကောင်လေးက လက်ခံရန် ဆန္ဒမရှိပေ။

ရှေ့ဆောင်လမ်းပြတစ်ယောက်ဖြစ်လာရန် အခွင့်အရေးက သူ့လိုမိစ္ဆာမျိုးအတွက် အဘယ်ကြောင့် ဤမျှ ဆွဲဆောင်မှုရှိနေရသည်ကို သူနားမလည်နိုင်အောင် ဖြစ်နေခဲ့သည်။ အကယ်၍ သူသာ စစ်မက် လမ်းစဉ်ပေါ်သို့ ရောက်ရှိမနေခဲ့ပါက ဤအခွင့်အရေးကို လွတ်မြောက်သွားခွင့်ပေးမည် မဟုတ်ပေ။

ငါ့ရှေ့က ဒီလူငယ်လေးဟာ အမတလမ်းစဉ်ရဲ့ ဝိညာဉ်အခြေတည်အဆင့်မှာပဲ ရှိနေသေးတာ။ ဒါကို သူက ဘာလို့များ စိတ်နည်းနည်းလေးတောင် မလှုပ်ရှားရတာလဲ။

စကားစမြည်ပြောဆိုနေကြရင်း သူတို့အုပ်စုသည် အဇူရာတိမ်ဂိုဏ်းသို့ ပြန်လည်ရောက်ရှိလာခဲ့ကြသည်။

အနောက်ဘက်တောင်တန်းရှိ တားမြစ်နယ်မြေသို့ မိစ္ဆာများကို ပြန်ပို့ပြီးနောက် ကျန်းယန်သည် အဇူရာတိမ်တောင်ထွတ်သို့ ပြန်လာကာ ချင်းယွင်ကျိနှင့် တွေ့ဆုံလေသည်။

"အခြေအနေ ဘယ်လိုရှိလဲ" ချင်းယွင်ကျိက မေးလိုက်သည်။ သူတော်စင်သခင် ကပ်ဘေးအောင်မြင်စွာ ဖြတ်ကျော်သွားနိုင်ခဲ့သည်ကို သူသိထားသော်လည်း ထို့နောက်တွင် ဘာတွေဆက်ဖြစ်ခဲ့သည်ကိုမူ သူ မသိရှိပေ။

ကျန်းယန်က အပြုံးဖြင့် ပြောလိုက်သည်။

"သူတော်စင်သခင်က ကပ်ဘေးကို အောင်မြင်စွာ ဖြတ်ကျော်သွားနိုင်ခဲ့ပါပြီ။ ဒါ့အပြင် သူက အလွန်ကိုပြီးပြည့်စုံတဲ့ ရလဒ်တစ်ခုကို ရရှိသွားခဲ့တာ"

"သူတော်စင်သခင်က ကျောင်းထိုင်ဆရာတော်ကို နောက်ဆုတ်သွားအောင် ဖိအားပေးနိုင်ခဲ့တာကိုကြည့်ရင် သူ့ရဲ့စွမ်းအားတွေက သိသိသာသာကို တိုးတက်လာခဲ့တာ သေချာတယ်။ ပြီးတော့ သူတော်စင်သခင်က လန်ကျားအထွတ်အမြတ်မြေ အခြေအနေတည်ငြိမ်သွားတာနဲ့ ကျွန်တော်တို့ အဇူရာတိမ်ဂိုဏ်းဆီ လာလည်မယ်လို့လည်း ပြောခဲ့သေးတယ်"

ချင်းယွင်ကျိမှာ အနည်းငယ် အံ့အားသင့်သွားခဲ့သည်။ ဤအဖိုးကြီးက ယခုလေးတင် ကပ်ဘေးဖြတ်ကျော်ထားသော်လည်း သူ၏စွမ်းအားများ လျော့ကျသွားခြင်းမရှိသည့်အပြင် ကျောင်းထိုင်ဆရာတော်ကိုပင် နောက်ဆုတ်သွားစေရန် ဖိအားပေးနိုင်ခဲ့သည် မဟုတ်ပါလော။

သူတော်စင်သခင်နှင့် ကျောင်းထိုင်ဆရာတော်တို့ကြား အပြန်အလှန်တိုက်ခိုက်မှုမှာ ခေတ္တမျှသာဖြစ်ပြီး နက်နက်ရှိုင်းရှိုင်း တိုက်ခိုက်ခြင်းမရှိဘဲ သူတို့၏သဘောထားများကို ပြသရုံသက်သက်သာ ဖြစ်သောကြောင့် ချင်းယွင်ကျိအနေဖြင့် တိုက်ပွဲ၏ လှိုင်းဂယက်များကို မခံစားမိခဲ့ပေ။

သို့သော် ကျောင်းထိုင်ဆရာတော်အား နောက်ဆုတ်သွားရန် ဖိအားပေးနိုင်ခဲ့သည့်အချက်က သူတော်စင်သခင်သည် ကပ်ဘေးဖြတ်ကျော်ခြင်းနှောင်းပိုင်းအဆင့်၌ ရှိနေသည့်တိုင် ထည့်သွင်းစဉ်းစားရလောက်အောင် ကြီးမားသည့် တိုက်ခိုက်ရေးစွမ်းအားများ ပိုင်ဆိုင်ထားဆဲဖြစ်ကြောင်း ပြသနေပေသည်။

"သူက အဇူရာတိမ်ဂိုဏ်းကို လာလည်မယ်ပြောတာက တခြားရည်ရွယ်ချက်များ ရှိနေသေးလို့လား" ချင်းယွင်ကျိက ဆက်မေးလိုက်သည်။

ကျန်းယန်က ခေါင်းခါလိုက်၏။ "အခုထိတော့ ဘာမှမပြောတတ်သေးဘူး။ ဒါပေမဲ့ သူအရမ်းလွန်ကဲတဲ့ အလုပ်မျိုးတော့ လုပ်မယ်မထင်ပါဘူး"

"ဒါမှမဟုတ် သူက ကပ်ဘေးဖြတ်ကျော်ခြင်းနှောင်းပိုင်းအဆင့်ကို ရောက်သွားပြီဆိုတော့ သူ့ရဲ့စွမ်းအားကိုပြသပြီး ကျွန်တော်တို့ မဟာမိတ်အဖွဲ့ကို ထိန်းချုပ်ချင်နေတာများလား"

နောက်ပိုင်းအကြောင်းပြချက်က ပို၍ဖြစ်နိုင်ချေများကြောင်း ကျန်းယန် ခံစားလိုက်ရသည်။

သို့သော် အကယ်၍ သူတော်စင်သခင်သာ ကပ်ဘေးဖြတ်ကျော်ခြင်းနှောင်းပိုင်းအဆင့်သို့ ရောက်ရှိနေရုံမျှဖြင့် အဇူရာတိမ်ဂိုဏ်းကို သူ့အားနာခံစေရန် ပြုလုပ်နိုင်မည်ဟု ထင်နေပါက ထိုအရာက တကယ်ကို လွန်ကဲစွာ တွေးတောနေခြင်းပင် ဖြစ်သည်။

အဖွဲ့နှစ်ဖွဲ့စလုံးသည် အပြန်အလှန် အကျိုးစီးပွားများအပေါ် အခြေခံကာ ပူးပေါင်းထားကြခြင်းဖြစ်ပြီး သူတို့အကြားတွင် သခင်နှင့်ကျွန် ဆက်ဆံရေးမျိုး မရှိပေ။

အကယ်၍ သူတော်စင်သခင်က သူ၏သိုင်းပညာစွမ်းရည်များ တိုးတက်လာသည်ဟု ခံစားရကာ အဇူရာတိမ်ဂိုဏ်း၏ အခြေအနေများကို ကြီးစိုးခြယ်လှယ်ချင်နေမည်ဆိုလျှင်... အကယ်၍ သူကသာ တကယ်ကို ကျေးဇူးကန်းလွန်းနေမည်ဆိုလျှင် ကျန်းယန်အနေဖြင့် ဂူဒူအာ၏ အကြံပြုချက်ကို စဉ်းစားရတော့မည်သာ။