အခန်း ၈၁

အခန်း (၈၁) လက်ဆောင်များကို လုယူခြင်း

နောက်တစ်နေ့ နံနက် ၇ နာရီခွဲခန့်တွင် စုယွမ် နိုးလာခဲ့၏။ ယမန်နေ့ညက မောက်ထိုင်အရက်ကို သောက်ခဲ့သော်လည်း အများကြီးမသောက်ခဲ့သဖြင့် ယနေ့နံနက် နိုးလာချိန်တွင် ခေါင်းကိုက်ခြင်း မရှိခဲ့ချေ။

မျက်လုံးဖွင့်လိုက်သည်နှင့် တစ်ပြိုင်နက် စုယွမ်သည် ယနေ့အတွက် သတင်းအချက်အလက် ၅ ခုကို ဦးစွာ ကြည့်ရှုလိုက်သည်။

သတင်းအချက်အလက် (၁) အပူပိုင်း လေဖိအားမြင့်ရပ်ဝန်း၏ သက်ရောက်မှုကြောင့် တရုတ်နိုင်ငံ မြောက်ပိုင်းတွင် အလွန်ပူပြင်းသော ရာသီဥတုကို ကြုံတွေ့နေရပါတယ်... ဒီအပူဒဏ်ဟာ ကာလတိုအတွင်း လျော့ကျသွားဖို့ မရှိပါဘူး... အဲဒီဒေသကို ခရီးသွားမယ့်သူတွေနဲ့ အလုပ်လုပ်မယ့်သူတွေအနေနဲ့ နေပူဒဏ်ခံနိုင်ဖို့ ကြိုတင်ကာကွယ်မှုတွေ လုပ်ဆောင်သင့်ပါတယ်...

လတ်တလော မြောက်ပိုင်းသို့ သွားရန် အစီအစဉ်မရှိသဖြင့် စုယွမ်သည် ဤသတင်းကို အလိုအလျောက် လျစ်လျူရှုလိုက်ပေ၏။

သတင်းအချက်အလက် (၂) Back to Field ဖျော်ဖြေရေးအစီအစဉ်ဟာ ပြန်လည်ရေပန်းစားလာခဲ့ပြီး ထုတ်လုပ်ရေးအဖွဲ့က ရာသီသစ်တစ်ခု ရိုက်ကူးဖို့ စီစဉ်နေပါတယ်... အစီအစဉ်ရဲ့ အဓိကအဖွဲ့ဝင် စားဖိုမှူးဟွမ် ပါဝင်ဖို့ အတည်ပြုထားပြီး ဖြစ်ပါတယ်...

“ပဲစိမ်းဖြစ်ရပ်” “မြေဆီလွှာတိုက်စားမှု” စသည့် နာမည်ကြီး ဖြစ်ရပ်များကို ကြည့်ရုံဖြင့်ပင် ဤအစီအစဉ်သည် မှတ်မိစရာကောင်းသော Meme များစွာကို မွေးဖွားပေးခဲ့ကြောင်း သိသာလှပေသည်။

စုယွမ်ကိုယ်တိုင်လည်း ထိုတည်းဖြတ်ထားသော ဗီဒီယိုများကို မကြာခဏ ကြည့်ရှုလေ့ရှိ၏။

ရိုးရိုးသားသား ပြောရမည်ဆိုလျှင် သူသည် အရင်တုန်းက ဤအစီအစဉ်ကို သိပ်စိတ်မဝင်စားခဲ့ချေ။

သို့သော် အွန်လိုင်းပေါ်ရှိ လူများက ပြန်လည်တည်းဖြတ်ပြီးနောက်တွင်တော့ အလွန် ရယ်မောစရာ ကောင်းလာခဲ့လေသည်။ ၄င်းကို နောက်ဆုံးအပိုင်းသာ ပြသလိုက်မည်ဆိုပါက ကြည့်ရှုနှုန်းများ အလွန်အမင်း တက်သွားမည်မှာ သေချာနေပေ၏။

သတင်းအချက်အလက် (၃) စုကော်ချန်မှာ ယွမ် ၈၈၀,၀၀၀ တန်ကြေးရှိတဲ့ ချင်မင်းဆက် ယုံကျန်းခေတ်က ထုတ်လုပ်ခဲ့တဲ့ တော်ဝင်မီးဖိုထွက် အပြာနဲ့အဖြူရောင် နဂါးရုပ်ပန်းကန်လုံးတစ်လုံး ရှိပါတယ်... လက်ရှိမှာ စုကော်ချန်ဟာ အဲဒီပန်းကန်လုံးကို ခွေးစာကျွေးဖို့ အသုံးပြုနေပါတယ်...

ဤသတင်းကို မြင်လိုက်ရချိန်တွင် စုယွမ် ချက်ချင်း ထရပ်လိုက်မိတော့သည်။

ဘုရားရေ ငါ့ဦးလေးက အမြဲတမ်း ချွေတာတတ်ပေမဲ့ ယွမ် ၈ သိန်းကျော်တန်တဲ့ ပန်းကန်လုံးနဲ့ ခွေးစာကျွေးနေလိမ့်မယ်လို့ ငါ ဘယ်တုန်းကမှ မထင်ထားခဲ့ဘူး...

တကယ်လို့ သူသာ ဒီပန်းကန်လုံးရဲ့ တန်ဖိုးကို သိသွားရင် သူ့မျက်နှာအမူအရာ ဘယ်လိုဖြစ်သွားမလဲ မသိဘူး...

ဤသည်မှာ ဦးလေးမိသားစုပိုင် ပစ္စည်းဖြစ်သဖြင့် ကိုယ်ကျိုးရှာရန် မလိုအပ်ချေ။ အကယ်၍ ဦးလေးက ရောင်းချင်ပါက သူဝယ်ယူပြီး အခြားသူများအား ပြန်လည်ရောင်းချပေးနိုင်ပေသည်။

သတင်းအချက်အလက် (၄) (စုမိသားစုရွာ) စုယွမ် ချမ်းသာနေတာကို မြင်သွားတဲ့ စုကျိုကျန်းတို့ မိသားစုဟာ သူ့မိသားစုရဲ့ ပိုင်ဆိုင်မှုတွေကို ရယူဖို့အတွက် သမီးဖြစ်သူ စုချန်ချန်ကို စုယွမ်နဲ့ ပေးစားဖို့ စီစဉ်နေပါတယ်...

ဤသတင်းကို ဖတ်ပြီးနောက် စုယွမ် ပြင်းထန်စွာ မျက်မှောင်ကြုတ်သွားလေ၏။

ချီးပဲ ငါက ဒီလိုအရှုပ်အထွေးထဲ ဘယ်လိုလုပ် ပါသွားတာလဲ...

စုကျိုကျန်းအပေါ် စုယွမ်က သံသယဝင်နေခြင်း မဟုတ်ချေ။ အမှန်တကယ်တော့ သူသည် လမ်းပေါ်မှခွေးကပင် ဟောင်ရလောက်အောင် အကျင့်စရိုက်ဆိုးရွားသူမျိုး ဖြစ်ပေသည်။

သူ၏အမေ လီမေ့ဟွာက ပို၍ပင် ခန့်မှန်းရခက်သေး၏။ သူမသည် လူကြီးတစ်ယောက်ဖြစ်ပါလျက် ကလေးတစ်ယောက်အလား ဆိုးနွဲ့ကာ ဒေါသတကြီး အော်ဟစ်တတ်ပြီး သူမနှင့် စကားများသူများကို ခြောက်လှန့်ရန်အတွက် သေဆုံးသွားပြီဖြစ်သော ခင်ပွန်းဖြစ်သူကို မကြာခဏပင် တိုင်တန်လေ့ရှိပေသည်။

သူ၏သမီး စုချန်ချန်မှာမူ အရပ် ၁.၆ မီတာသာ ရှိသော်လည်း ပေါင် ၂၀၀ ခန့် အလေးချိန်ရှိပြီး အစားအသောက်ကြီးသူတစ်ဦး ဖြစ်ကြောင်း စုယွမ် သိထားလေသည်။ နှစ်အတော်ကြာ မတွေ့ရပြီးနောက် စုချန်ချန်မှာ အစားပိုကြီးလာသလားဟုပင် သူ တွေးမိသွား၏။

ထို့အပြင် စုချန်ချန်၏ အပြုအမူများမှာလည်း အလွန်အမင်း မောက်မာပြီး ထူးဆန်းလှပေသည်။ စုကျိုကျန်းတို့ မိသားစုက သူမကို သူ့အား ပေးစားချင်နေရလောက်အောင် ဘာတွေ တွေးနေကြသလဲဆိုတာ သူ မသိတော့ချေ။

အဲဒါ တကယ့်ကို ရယ်စရာကောင်းလွန်းတယ်...

နောက်ဆုံးသတင်းအချက်အလက်ကို ဖတ်ပြီးနောက် စုယွမ်သည် အိပ်ရာမှထကာ မျက်နှာသစ်ပြီး မနက်စာ အနည်းငယ် စားလိုက်သည်။ ထို့နောက် ယနေ့ သူ၏ဦးလေးအိမ်သို့ သွားလည်ရန်အတွက် လက်ဆောင်များကို ပြင်ဆင်လိုက်တော့၏။

ဝူလျန်ယဲ့ တစ်ဖာ မောက်ထိုင် အရက် နှစ်ပုလင်းနှင့် ကျုံးဟွာ စီးကရက် နှစ်တောင့် ဖြစ်ပေသည်။

လက်ဆောင်များမှာ များပြားပုံရသော်လည်း စုယွမ်အတွက်မူ သိပ်မများလှချေ။

ထို့အပြင် အကြီးဆုံး ဦးလေး စုကော်ချန်၏ အိမ်နှင့် တတိယဦးလေး စုကျွင်းချန်၏ အိမ်မှာ ဘေးချင်းကပ်လျက် ဖြစ်ပေသည်။ မိသားစုတိုင်းတွင် ကိုယ်ပိုင်အခက်အခဲများ ရှိကြသဖြင့် အတိတ်က သူတို့မိသားစု အခက်အခဲကြုံနေရချိန်တွင် တတိယဦးလေးက မကူညီခဲ့ခြင်းကို စုယွမ် နားလည်ပေးနိုင်လေသည်။

သို့သော် သူ၏ ခနဲ့တဲ့တဲ့ စကားများနှင့် အထင်သေးသော မျက်နှာအမူအရာများကိုမူ စုယွမ် မေ့ဖျောက်၍ မရနိုင်ခဲ့ချေ။

စုယွမ်သည် ဆက်လက်၍ သည်းမခံနိုင်တော့သဖြင့် ဤတစ်ကြိမ် ဦးလေး၏ အိမ်သို့သွားရာတွင် သူ့ကို သေချာပေါက် ပြသရမည် ဖြစ်သည်။

သိုသိုသိပ်သိပ် နေရမည်ဆိုသည်မှာ အဓိပ္ပာယ်မရှိချေ။ ထင်ထင်ရှားရှား နေမှသာလျှင် ဤကဲ့သို့ မျက်နှာလိုမျက်နှာရ လုပ်တတ်သူများ မိမိအား လာရောက်မနှောင့်ယှက်အောင် တားဆီးနိုင်မည် ဖြစ်၏။

"အဖေ အဘိုးတို့အဘွားတို့ ချန်ထားခဲ့တဲ့ အဖိုးတန်ပစ္စည်းတွေ ဘာမှမရှိဘူးလား သားမှတ်မိသလောက် အဘိုးက အဲဒီလိုပစ္စည်းတွေအကြောင်း အများကြီး သိတယ် မဟုတ်လား..." စုယွမ်က စမ်းသပ်သည့်အနေဖြင့် မေးမြန်းလိုက်သည်။

"မရှိပါဘူးကွာ သူက ရှေးဟောင်းပစ္စည်းတွေအကြောင်း ဘာမှမသိပါဘူး လျှောက်ကြွားနေတာပါပဲ မင်းအဘိုး ချန်ထားခဲ့တဲ့ အဖိုးတန်ပစ္စည်းဆိုလို့ အဲဒီ စာအုပ်အဟောင်း အနည်းငယ်ပဲ ရှိတာ..." စုဖူချန်က ပြောလိုက်၏။

"အော်..." စုယွမ်က ခေါင်းညိတ်လိုက်ပြီး သူတို့မိသားစုတွင် ရှေးဟောင်းပစ္စည်းများ မရှိကြောင်း နားလည်သွားလေသည်။

"သွားကြစို့..." ဟု ပြောဆိုပြီးနောက် စုယွမ်နှင့် စုဖူချန်တို့သည် လက်ဆောင်များကို ယူကာ စုကော်ချန်၏ အိမ်ဆီသို့ ထွက်ခွာသွားကြတော့သည်။

...

တတိယဦးလေး စုကျွင်းချန်၏ အိမ်တံခါးဝတွင် စုကျွင်းချန်သည် တစ်စုံတစ်ယောက်ကို စောင့်ဆိုင်းနေသည့်အလား ပတ်ဝန်းကျင်ကို ဝေ့ကြည့်နေခဲ့၏။

"ဒီစုယွမ်ကလေ ငါက သူ့ရဲ့ တတိယဦးလေးပါ ငါ ဒီမှာရှိနေတာကိုတောင် သူမသိဘူးလား..."

"အရက်ကောင်းတွေ စီးကရက်ကောင်းတွေ အများကြီး ဝယ်လာတာတောင် ငါ့ကို နည်းနည်းလေးမှ မပေးဘူး ငါ့ကို တတိယဦးလေးအဖြစ်တောင် အသိအမှတ်မပြုဘူးလား.." စုကျွင်းချန်က စိတ်တိုစွာဖြင့် ပြောဆိုလိုက်သည်။

"ရှင့်ရဲ့ ဒုတိယအစ်ကိုအိမ်ကို သွားပါလို့ အစောကြီးကတည်းက ပြောထားတယ်လေ သူတို့ ရှင့်ကို မပေးဘူးဆိုတာ ငါ လုံးဝ မယုံဘူး ရှင်ကသာ သူတို့လာတာကို အတင်းစောင့်ချင်နေတာ..." တတိယအဒေါ် ဝမ်တဖန်က မကျေမနပ်ဖြင့် ပြောဆိုလိုက်ပေသည်။

"မင်း ဘာသိလို့လဲ ငါက သူ့ရဲ့ တတိယဦးလေးလေ ငါသာ သူ့အိမ်ကို မျက်နှာပြောင်တိုက်ပြီး သွားတောင်းရင် ငါ့မျက်နှာ ဘယ်နားသွားထားရမလဲ..." စုကျွင်းချန်က ဒေါသတကြီး ပြောလိုက်၏။

"မျက်နှာက ဘာလုပ်ရမှာလဲ ငါ အဲဒီ မောက်ထိုင်အရက် ဈေးကို စစ်ကြည့်ပြီးပြီ တစ်ပုလင်းကို ယွမ် ထောင်ဂဏန်းလောက် ပေးရတယ် ရှင့်ရဲ့ အသုံးမကျတဲ့ သိက္ခာက အဲဒီလောက် တန်လို့လား..." ဝမ်တဖန်က ပြောဆိုလိုက်သည်။

စုကျွင်းချန်သည် သိက္ခာကို ရွေးချယ်မည်လား သို့မဟုတ် တကယ်ပဲ အမြတ်အစွန်းကို ရွေးချယ်မည်လား စဉ်းစားရင်း သူ၏ မျက်လုံးများ ကျဉ်းမြောင်းသွားတော့၏။

စုကျိုကျန်း၏ အိမ်တွင် စုချန်ချန်သည် သူမ၏ တုတ်ခိုင်သော ခြေထောက်ကြီးများဖြင့် လမ်းလျှောက်နေပြီး ဆံပင်များမှာ ရှုပ်ပွနေကာ မျက်နှာပေါ်တွင် မောက်မာသော အမူအရာများ ရှိနေပေသည်။

"ဟူး ရိုးရိုးသားသားပြောရရင် စုယွမ်က ငါနဲ့ လက်ထပ်ရတာ တကယ်ကို ကံကောင်းတာပဲ..."

"သူက ငါနဲ့ ရွာတစ်ရွာတည်းကဆိုတော့ သူ တော်တော်လေး အမြတ်ထွက်သွားတာပေါ့..." စုချန်ချန်က စိတ်ထဲမှ တွေးလိုက်ပြီး စုယွမ်အား ဇိမ်ခံလက်ကိုင်အိတ်အချို့ အရင်ဝယ်ခိုင်းရန် စီစဉ်နေခဲ့သည်။

"သေချာတာပေါ့ ငါ့မြေးအကြီးမလေးက တင်ပါး အကြီးကြီးပဲ သူက သားယောကျ်ားလေး မွေးနိုင်မှာ အသေအချာပဲ စုဖူချန်တို့ မိသားစုက ဒီလိုကောင်းတဲ့ မင်္ဂလာကိစ္စကို ငြင်းဆန်နိုင်မယ်ဆိုတာ ငါ လုံးဝ မယုံဘူး..." လီမေ့ဟွာ၏ မျက်နှာတွင် အရွယ်တင်တွန့်လိပ်မှုများ ပြည့်နှက်နေသော်လည်း သူမသည် အလွန်အမင်း ယုံကြည်ချက် ရှိနေခဲ့၏။

"ငါ့တို့ချန်ချန် သူတို့မိသားစုထဲ ရောက်သွားတာနဲ့ ကျိုကျန်း မင်း သူ့ကားကို ငါတို့သုံးဖို့ ယူလာလို့ရပြီ အဲဒီအခါကျရင် ငါတို့မိသားစုကလည်း ယွမ် သန်းချီတန်တဲ့ ဇိမ်ခံကား ပိုင်ဆိုင်တဲ့ မိသားစု ဖြစ်လာမှာပဲ..." လီမေ့ဟွာ၏ အကြံအစည်မှာ အတော်လေး ဉာဏ်များလှပြီး စုကျိုကျန်းကလည်း အကြိမ်ကြိမ် ခေါင်းညိတ် ထောက်ခံနေခဲ့လေသည်။

ထိုသို့ပြောဆိုပြီးနောက် သူတို့မိသားစုသည် စုယွမ်၏ အိမ်သို့ သွားရောက်စေ့စပ်ရန် အိမ်ထဲမှ ထွက်လာကြတော့သည်။

ဤအခိုက်အတန့်၌ စုကျွင်းချန်သည်လည်း စုယွမ်၏ အိမ်သို့သွားကာ သောက်ရန်အတွက် မောက်ထိုင်အရက် နှစ်ပုလင်း သွားတောင်းရန် ဆုံးဖြတ်ချက်ချလိုက်၏။

အဖွဲ့နှစ်ဖွဲ့သည် အပြင်သို့ရောက်သည်နှင့် တစ်ပြိုင်နက် ဆုံမိကြပြီး နှုတ်ဆက်စကားများ ပြောဆိုကာ ထွက်ခွာရန် ပြင်ဆင်လိုက်ကြလေသည်။

သူတို့ စတင်ထွက်ခွာတော့မည့်အချိန်တွင် အလွန်ရင်းနှီးသော လူနှစ်ဦး သူတို့ရှေ့သို့ ရုတ်တရက် ရောက်လာသည်ကို မြင်တွေ့လိုက်ရပေသည်။

စုကျွင်းချန်က သေချာစွာ ကြည့်လိုက်ရာ သူ၏ ဒုတိယအစ်ကိုနှင့် စုယွမ်တို့ ရောက်လာခြင်းဖြစ်ကြောင်း တွေ့လိုက်ရ၏။

ထို့အပြင် သူတို့သည် အရက်ကောင်းများနှင့် စီးကရက်များကိုလည်း ကိုင်ဆောင်ထားကြသေးသည်။

စုကျွင်းချန်သည် စုယွမ်က သူ့အတွက် စီးကရက်နှင့် အရက်များ လာပို့ပေးသည်ဟု ထင်မှတ်ကာ အလွန်အမင်း ဝမ်းသာသွားခဲ့သည်။ ထို့ကြောင့် သူက ဘေးရှိလူများကို စိတ်လှုပ်ရှားစွာဖြင့် ပြောဆိုလိုက်၏။

"ဟားဟား တွေ့လား စုယွမ်က ငါ့ကို လက်ဆောင်လာပေးတာလေ ဒီညတော့ ငါ မောက်ထိုင်အရက် သောက်ရတော့မယ် မင်းတို့တော့ အနံ့ပဲ ရှူလိုက်ကြတော့..."

စုကျွင်းချန်သည် အလွန်အမင်း ဂုဏ်ယူဝင့်ကြွားနေပြီး ဘေးရှိလူများအား အထင်သေးသော မျက်လုံးများဖြင့် ကြည့်လိုက်လေသည်။

"မင်းတို့တွေကတော့ တစ်သက်လုံး ဒီလိုပစ္စည်းမျိုးတွေကို အနံ့တောင် ရှူရမှာ မဟုတ်ဘူး..."

တစ်ချိန်တည်းမှာပင် လီမေ့ဟွာကလည်း စုယွမ်နှင့် စုဖူချန်တို့ကို မှတ်မိသွားပြီး အလွန်အမင်း ဝမ်းသာသွားခဲ့ပေ၏။

"ဟားဟား ဒါက ငါတို့အတွက် အလုပ်တော်တော် သက်သာသွားစေတာပဲ ငါတို့ သွားပြီး စေ့စပ်စရာတောင် မလိုတော့ဘူး ကြည့်စမ်း စုဖူချန်နဲ့ စုယွမ်တို့က ငါတို့ဆီကို လာစေ့စပ်တာပဲနေမှာ..."

စုယွမ် ကိုင်ဆောင်လာသော လက်ဆောင်များကို ကြည့်ရင်း လီမေ့ဟွာသည် ပျော်ရွှင်မှုများဖြင့် မျက်နှာဝင်းပသွားခဲ့လေသည်။

စုချန်ချန်က ရွံရှာသော အမူအရာဖြင့် "ငါ ကြိုက်တဲ့ အိတ်တွေတောင် ပါမလာဘဲ လာစေ့စပ်တယ် ဟုတ်လား စေတနာကို မရှိဘူး..." ဟု တွေးလိုက်၏။

လီမေ့ဟွာက အခြားမည်သည့်အရာကိုမျှ ဂရုမစိုက်နိုင်တော့ချေ။ စုယွမ် လက်ထဲရှိ အရက်၏ တန်ဖိုးကို သူမ သိရှိထားသဖြင့် စုကျိုကျန်းအား သွားယူရန် အလျင်အမြန် အချက်ပြလိုက်ပြီးနောက် သူမ၏ ခြေလှမ်းသေးသေးလေးများဖြင့် နောက်မှ လိုက်ပါသွားတော့သည်။

အခြားတစ်ဖက်တွင်လည်း စုကျွင်းချန်သည် ဆက်လက်၍ မထိန်းချုပ်နိုင်တော့ဘဲ စုယွမ်နှင့် စုဖူချန်တို့ဆီသို့ အလျင်အမြန် လျှောက်သွားလိုက်ပေ၏။

မျက်တောင်တစ်ခတ်အတွင်းမှာပင် အဖွဲ့နှစ်ဖွဲ့သည် စုယွမ် ကိုင်ဆောင်လာသော လက်ဆောင်များကို အလုအယက် ပြိုင်ဆိုင်ကြတော့သည်။