အခန်း ၃၅၀

အခန်း ၃၅၀

"မစ္စတာရဲ၊ သွားမယ့်နေရာက ဒီမှာဆိုတာ သေချာရဲ့လား"

အန်ဂျီနှင့် သူမ၏နောက်မှ လိုက်ပါလာသော သုတေသီအဘိုးအိုတို့က မြို့ရိုးပေါ်သို့ တက်လာကြလေ၏။

အောက်ဘက်ရှိ ဧရာမ အိုအေစစ်ကြီးကို ကြည့်ရင်း သူတို့၏ မျက်နှာများထက်တွင် ရှုပ်ထွေးမှုများ ပြည့်နှက်နေလေသည်။ ဤကမ္ဘာကြီးတွင် ဧရာမ အိုအေစစ်ကြီးတစ်ခု ထွက်ပေါ်လာခြင်းမှာ မည်မျှပင် ထူးဆန်းနေကြောင်းကို ရဲချီယန်ကိုယ်တိုင်ပင် ကောင်းကောင်းကြီး သိထားလေ၏။ ဤနေရာတွင် နေထိုင်ကြသော ဌာနေလူသားများအတွက် ဆိုလျှင်တော့ ပြောနေစရာပင် မလိုတော့ချေ။

သို့တိုင်အောင်။ အိုအေစစ်တစ်ခု ထွက်ပေါ်လာခြင်းက မြို့တွင်းရှိ လူအများစုကို မျှော်လင့်ချက်ပေးခဲ့သည်မှာ သံသယဖြစ်ဖွယ် မရှိပေ။

အချိန်တိုလေးအတွင်းမှာပင် အရေးကြီးသော သယံဇာတများကို သွားရောက်စုဆောင်းရန်အတွက် လူအတော်များများက စေတနာ့ဝန်ထမ်းအဖြစ် စာရင်းပေးသွင်းခဲ့ကြချေပြီ။ သစ်သား၊ ရေ၊ အစားအစာများသာမက အရေးမပါလှသော မြက်ပင်လေးတစ်ပင်ကအစ။ သူတို့အတွက်တော့ ထိုအရာအားလုံးက အဖိုးတန်ပစ္စည်းများ ဖြစ်နေကြလေ၏။

ဤအရာကို အန်ဂျီကိုယ်တိုင်လည်း တားဆီးနိုင်မည် မဟုတ်ပေ။

ဤအိုအေစစ်အတွင်းတွင် အန္တရာယ်ရှိနေကြောင်းကို လူတိုင်း သိထားကောင်း သိထားကြပေမည်။ သို့သော် ဘာဖြစ်သနည်း။ ဤအိုအေစစ် ခရီးစဉ်မှ ရရှိလာသော သယံဇာတများက နောက်ထပ် သဘာဝဘေးအန္တရာယ်တစ်ခုကို ဖြတ်ကျော်နိုင်ရန် သူတို့ကို ကူညီပေးနိုင်လိမ့်မည် မဟုတ်ပါလော။

ရဲချီယန်ကလည်း သူတို့ အိုအေစစ်အတွင်းသို့ ဝင်ရောက်ခြင်းကို မတားဆီးခဲ့ပေ။ သို့သော် သူ့အား ကာကွယ်ပေးမည့်သူ သို့မဟုတ် သူ၏နောက်သို့ လိုက်ပါမည့်သူကိုလည်း သူ မလိုအပ်ခဲ့ချေ။

အိုအေစစ်အတွင်းသို့ ဝင်ရောက်ပြီး မကြာမီမှာပင် ရဲချီယန်က နှင်းဖြူရောင် မြို့တော် စူးစမ်းလေ့လာရေးအဖွဲ့နှင့် လမ်းခွဲခဲ့လေသည်။

"ဒီနေရာက ပုံမှန်လွန်းနေလို့ကို လုံးဝ ပုံမှန်မဟုတ်သလို ဖြစ်နေတာပဲ"

၎င်းကို အိုအေစစ်ဟု ခေါ်ဆိုသော်လည်း ဤဧရိယာမှာ အပူပိုင်းမိုးသစ်တောတစ်ခုနှင့် ပိုမိုတူညီနေလေ၏။ သို့သော် ကွာခြားချက်မှာ ဤနေရာတွင် မည်သည့် တိရစ္ဆာန်မျှ မရှိခြင်းပင်၊ အင်းဆက်ပိုးမွှားလေး တစ်ကောင်တောင် မရှိပေ။

တိတ်ဆိတ်ငြိမ်သက်နေသော တောအုပ်အတွင်း၌ စီးဆင်းနေသော ရေသံနှင့် လေတိုက်ခတ်မှုကြောင့် သစ်ရွက်များ လှုပ်ခတ်သံတို့ကိုသာ ထူးထူးခြားခြား ရှင်းလင်းပြတ်သားစွာ ကြားနေရလေ၏။

ကျီးကန်းနတ်ဆိုးနှင့် သိမ်းငှက်တို့က ကောင်းကင်ယံတွင် လှည့်ပတ်ပျံသန်းနေသော်လည်း မည်သည့် အန္တရာယ် သဲလွန်စကိုမျှ မတွေ့ရှိခဲ့ရချေ။ ဖျော့တော့သော အပြာရောင် ကျောက်မျက်ရတနာ၏ လမ်းညွှန်မှုဖြင့် သူက အိုအေစစ်၏ အနက်ရှိုင်းဆုံးနေရာရှိ မိုးထိအောင် မြင့်မားလှသော သစ်ပင်ကြီးတစ်ပင်၏ အရှေ့သို့ ရောက်ရှိလာခဲ့လေသည်။

သြဒိနိတ်များမှာ သိပ်ပြီး တိကျလှခြင်း မရှိဘဲ အကြမ်းဖျင်း ဧရိယာတစ်ခုကိုသာ ပြသပေးနိုင်ပေသည်။ ၎င်းကို ရှာဖွေတွေ့ရှိရန်အတွက် အချိန်အနည်းငယ် ယူရဦးမည်သာ ဖြစ်လေ၏။

"ယုတ္တိတန်တန် စဉ်းစားကြည့်ရရင် ကတ်ပြား အစီအစဉ်ရဲ့ အတားအဆီးက ဧရိယာအကျယ်ကြီးကို ဖုံးလွှမ်းထားတာလေ၊ မြေကြီးပေါ်မှာ မရှိဘူးဆိုရင် မြေအောက်မှာများလား၊ ဒါမှမဟုတ်..."

ရဲချီယန်က သူ၏အရှေ့ရှိ မိုးထိအောင် မြင့်မားလှသော သစ်ပင်ကြီးကို အထက်အောက် လှမ်းကြည့်လိုက်လေသည်။

"ဒီလောက်ကြီးတဲ့ သစ်ပင်ကြီးက အထဲမှာသာ အခေါင်းပေါက်ဖြစ်နေရင် အတားအဆီးတစ်ခုကို တကယ်ပဲ ဖွက်ထားနိုင်လောက်တယ်"

ရွှီး။

လေပြေတစ်ချက် တိုက်ခတ်သွားလေ၏။

သစ်ရွက်များမှ ထွက်ပေါ်လာသော အသံမှာ ရှင်းပြ၍မရနိုင်လောက်အောင် ကြမ်းတမ်းလာသယောင် ထင်မှတ်ရပေသည်။

ရွှီး

ရဲချီယန်၏ အောက်တည့်တည့်မှနေ၍

ချွန်ထက်သော သစ်မြစ်များက သူ့ကို ထိုးဖောက်ရန်အတွက် ရုတ်တရက် ထိုးထွက်လာကြလေ၏။

ကံမကောင်းစွာဖြင့် ရဲချီယန်မှာ ဤအိုအေစစ်အတွင်းသို့ ဝင်ရောက်လာကတည်းက ကြိုတင်ပြင်ဆင်ထားခဲ့ပြီး ဖြစ်လေသည်။ လွင့်မျောကြယ် သန့်စင်သော အမှတ်အသားက အလိုအလျောက် အသက်ဝင်လာကာ သေနတ်သံတစ်ခုနှင့်အတူ အနက်ရောင် အလင်းကြက်တောင် အနည်းငယ်သာ ကျန်ရစ်ခဲ့ပြီး သူ မူလရပ်နေခဲ့သော နေရာသို့ လွင့်ကျသွားတော့သည်။

"ဒီလောက်ရိုးရိုးရှင်းရှင်းနဲ့ ရနိုင်ဖို့က လုံးဝမဖြစ်နိုင်ဘူးဆိုတာ ငါ သိနေပြီးသားပါ၊ ပြီးတော့ ဒီနေရာမှာ တစ်ခုခု မှားယွင်းနေတယ်ဆိုတာ သေချာတယ်"

ကြွပ်ဆတ်သော လက်ဖျစ်တီးသံတစ်ခုက တောအုပ်အတွင်းသို့ ပဲ့တင်ထပ်သွားလေ၏။

ကောင်းကင်ဥက္ကာပျံ မောင်းနှင်စနစ်။

နိမိတ်မကောင်းသည့် ငွေရောင်တောင်ပံ ကြယ်ကြီးက ရဲချီယန်၏ ဘေးနားတွင် ဟိန်းဟောက်လိုက်လေသည်။

သူက ကောင်းကင်ယံသို့ ပျံသန်းတက်သွားတော့သည်။

သူ မြင်လိုက်ရသည်မှာ။ အိုအေစစ်တစ်ခုလုံးမှာ ရူးသွပ်စွာ လှုပ်ရှားရုန်းကန်နေသော အခြေအနေသို့ ရောက်ရှိနေခြင်းပင်။

ဝှီး၊ ဝှီး၊ ဝှီး...

မရေမတွက်နိုင်သော အစိမ်းရောင် နွယ်ပင်များက ဆက်တိုက်ဆိုသလို တိုက်ခိုက်လာကြလေ၏။ လှည့်စားရှောင်တိမ်းမှုများနှင့်အတူ တိုက်ခိုက်မှုအားလုံးကို သူက အလွယ်တကူ ရှောင်ရှားလိုက်နိုင်သည်။

ဤနေရာမှာ လူသားများအတွက် အိုအေစစ်တစ်ခု မဟုတ်ဘဲ သက်ရှိ တောအုပ်ကြီးတစ်ခု ဖြစ်လေ၏။

"အီဗ်၊ ထွက်လာပြီး မီးရှို့လိုက်စမ်း"

သူ၏ လက်ဝါးက လေဟာနယ်ကို ဆုပ်ကိုင်လိုက်လေသည်။ လက်နက်တပ်ဆင်မှု နေရာလွတ်က အသက်ဝင်လာတော့သည်။ ယခင်က သူ တမင်တကာ ထည့်သွင်းထားခဲ့သော အီဗ်က ဆင့်ခေါ်ခြင်း ခံလိုက်ရလေ၏။

မွန်ရိုးဂျီနာ ရှာပေးခဲ့သော 【နတ်ဆိုးပန်းက တိုက်ခိုက်မှုအားလုံးကို မကောင်းဆိုးဝါး၏ မီးတောက်အလွှာတစ်ခုဖြင့် ဖုံးလွှမ်းသွားစေမည် ဖြစ်သည်။ ၎င်းမှာ ဤသစ်သားများကို ကိုင်တွယ်ရန်အတွက် အလွန်ပင် သင့်တော်လှပေသည်။

လက်နက် နေရာလွတ် သုံးဆယ့်ခြောက်ခုလုံး ပွင့်ဟသွားလေ၏။ လက်နက်များဖြင့် ပေါင်းစပ်ဖန်တီးထားသော တောင်ပံတစ်စုံအလား လက်နက်အားလုံးက လေဟာနယ်အတွင်းမှ ဆန့်ထွက်လာကြတော့သည်။

အစွမ်းကုန် ပစ်ခတ်မှု။ နတ်ဆိုးပန်း၏ မီးတောက်များက ၎င်းတို့အပေါ်တွင် တွယ်ကပ်နေလေ၏။

၎င်းက ရဲချီယန်၏ ဘေးတွင် လိုက်ပါလာကာ တိုက်ခိုက်ရန် ကြိုးစားလာသော ဆူးနွယ်ပင်များအားလုံးကို ချေမှုန်းပစ်လိုက်လေသည်။

ခရမ်းရောင်သန်းနေသော အနီရောင်မီးတောက်များ မြင့်တက်လာလေ၏။ မကောင်းဆိုးဝါး၏ ပူပြင်းလောင်ကျွမ်းနေသော မီးတောက်များက ဤနေရာမှနေ၍ အပြင်ဘက်သို့ ပြန့်နှံ့သွားတော့သည်။

တောအုပ်ကြီးမှာ လှုပ်ရှားရုန်းကန်ကာ ဂနာမငြိမ်ဖြစ်လာလေ၏။ ၎င်းတို့ကြားတွင် သတ္တုအရောင်ရှိသော အထူးအပင်တစ်စုက ဤမီးတောက်များကို လုံးဝဖယ်ကြဉ်ပစ်ရန် ကြိုးစားရင်း မြေကြီးထဲမှ ထွက်ပေါ်လာကြသည်။

"မီးကို ကြောက်လို့ မီးကာကွယ်ရေးအတွက် သီးသန့် အပင်တွေတောင် စိုက်ပျိုးထားတာလား၊ တော်တော်လေး စိတ်ဝင်စားဖို့ကောင်းတာပဲ၊ ဒါပေမဲ့ မီးက ဒီထက်ပိုပြီး ကြီးသွားရင်ရော ဘယ်လိုလုပ်မလဲ"

ရဲချီယန်က မုန်တိုင်းမျက်လုံး ကျောက်တုံးကို ထုတ်ယူကာ လက်ဝါးထဲတွင် ဆုပ်ကိုင်ထားလိုက်လေ၏။ ပြင်းထန်သော လေရူးကြီးတစ်ခုက သူ့ကို ဗဟိုပြုကာ အပြင်ဘက်သို့ ပြန့်နှံ့သွားတော့သည်။ ထိုလေရူးကြီးက နတ်ဆိုးပန်း၏ မီးတောက်များနှင့် ရောနှောသွားကာ ယခင်က လွင်တီးခေါင်ပြင်တွင် ရဲချီယန် မြင်တွေ့ခဲ့ဖူးသော မီးလေဆင်နှာမောင်းကြီးကဲ့သို့သော အရာတစ်ခုအဖြစ် ဖန်တီးသွားလေသည်။

ကောင်းကင်ယံမှာ အနီရောင်အဖြစ် စွန်းထင်းသွားတော့သည်။

တောက်လောင်နေသော အသံများမှာ ဤတောအုပ်ကြီး သေဆုံးခြင်းကို ခံစားနေရသည့်အလား ထင်မှတ်ရပေသည်။

"အာ... အာ..."

ကျီးကန်းနတ်ဆိုးက လေထဲတွင် လှည့်ပတ်ပျံသန်းနေလေ၏။ ၎င်း၏ မှောင်မိုက်နေသော မျက်လုံးများက ပတ်ဝန်းကျင်ရှိ အရာအားလုံးကို အဆက်မပြတ် စကင်ဖတ်နေသည်။

"အာ..."

၎င်းက စူးရှသော အော်ဟစ်သံတစ်ခုကို ထုတ်လွှတ်လိုက်လေ၏။

ရဲချီယန်က ၎င်းကြည့်နေသော ဦးတည်ရာသို့ လှမ်းကြည့်လိုက်သည်။

အနီရဲရဲ မီးပင်လယ်ကြီးအဖြစ် ပြောင်းလဲသွားပြီးဖြစ်သော တောအုပ်ထဲတွင် အပင်အများအပြားက ဦးတည်ရာတစ်ခုတည်းဆီသို့ စုစည်းသွားနေကြလေ၏။

၎င်းမှာ စောစောက သူ မြင်တွေ့ခဲ့ရသော မိုးထိအောင် မြင့်မားလှသည့် သစ်ပင်ကြီးပင်တည်း။

မီးလောင်နေသော ထိုသစ်ပင်ကြီးက ၎င်း၏ အမြစ်များကို မြေကြီးထဲမှ ဖြည်းညှင်းစွာ ဆွဲထုတ်လိုက်လေသည်။ ပတ်ဝန်းကျင်ရှိ မရေမတွက်နိုင်သော အပင်များက ၎င်းနှင့် လာရောက်ထိတွေ့ကာ ပေါင်းစပ်သွားကြပြီး နောက်ဆုံးတွင်တော့ ဧရာမ လူသားပုံစံ သစ်ပင် မကောင်းဆိုးဝါးကြီးတစ်ခုအဖြစ် အမှန်တကယ် အသွင်ပြောင်းသွားတော့သည်။

၎င်း၏ လက်မောင်းများမှာ နွယ်ပင်များစွာဖြင့် ဖွဲ့စည်းထားပြီး ဆန့်ထွက်လာကာ ဖိသိပ်သွားပြီးနောက် ဧရာမ ကြာပွတ်ကြီးတစ်ခုအဖြစ် ပြောင်းလဲသွားလေ၏။

"ဂါး..."

၎င်းက အလျားလိုက် ရမ်းရိုက်လိုက်လေသည်။

ပတ်ဝန်းကျင်ရှိ လေထုမှာ ၎င်း၏ လိမ်ခေါက်ဖိသိပ်မှုကြောင့် ပုံပျက်သွားကာ မီးတောက်များနှင့် ပေါင်းစပ်ပြီး ရဲချီယန် အသက်သွင်းထားသော မုန်တိုင်း အကာအကွယ်ကို ခွဲခြမ်းပစ်ရန် ကြိုးစားလာတော့သည်။

ကံမကောင်းစွာဖြင့်ပင်။ ၎င်း ထိုသို့ မလုပ်နိုင်ခဲ့ချေ။

"ဘာအဖြစ်များ ပြောင်းသွားမလဲလို့၊ မကောင်းဆိုးဝါးတွေချည်း ဖြစ်နေလျက်နဲ့ အကုန်လုံးက လူသားပုံစံ ပြောင်းချင်နေကြတာပဲ၊ ကြည့်ရတာ... ရေနွေးငွေ့ဘုရင်နဲ့များ တူနေမလား၊ မဟုတ်ဘူး၊ သူ့လောက်တော့ မစွမ်းလောက်ပါဘူး"

ရဲချီယန်က နောက်တစ်ကြိမ် လက်ဖျစ်တီးလိုက်လေ၏။

"အီဗ်၊ အကန့်အသတ်ကျော်လွန် မုဒ်၊ ထပ်နေတဲ့ အလွှာ"

"အကန့်အသတ်ကျော်လွန်သော ကြယ်ပွင့်"

ပေါက်ကွဲနိုင်စွမ်းရှိသော သံချပ်ကာက အီဗ်၏ ခန္ဓာကိုယ်ပေါ်တွင် ထွက်ပေါ်လာလေ၏။

၎င်းက ပိုမိုမြင့်မားသော နေရာသို့ ပျံသန်းတက်သွားတော့သည်။

၎င်း၏ အနောက်ရှိ လက်နက်များဖြင့် ဖွဲ့စည်းထားသော တောင်ပံတစ်စုံက ကြယ်များ၏ အလင်းရောင်ဖြင့် တောက်ပနေလေသည်။

၎င်းက လေထဲတွင် တောက်ပသော အပြာရောင် အလင်းကြောင်းတစ်ခု ချန်ရစ်ခဲ့ကာ အလွန်မြန်ဆန်သော အရှိန်ဖြင့် ရွေ့လျားသွားလေ၏။

လက်နက်တပ်ဆင်မှု အပြည့်ဖြင့် နတ်ဆိုးပန်း၏ မီးတောက်များ ဖုံးလွှမ်းနေသော တိုက်ခိုက်မှုက သစ်ပင် မကောင်းဆိုးဝါးကြီး၏ ခန္ဓာကိုယ်ကို ချက်ချင်းပင် ကြီးမားလှသော ဒဏ်ရာအမြောက်အမြား ဖန်တီးပေးလိုက်တော့သည်။

"ဂါး..."

လတ်ဆတ်သော အစိမ်းရောင် လှိုင်းဂယက်တစ်ခုက သစ်ပင် မကောင်းဆိုးဝါးကြီး၏ ခန္ဓာကိုယ်အတွင်းမှ ထွက်ပေါ်လာကာ ၎င်း၏ ခန္ဓာကိုယ်ပေါ်ရှိ ဒဏ်ရာများကို ပြုပြင်ရန် ကြိုးစားလာလေသည်။

သို့သော် အကန့်အသတ်ကျော်လွန်သော ကြယ်ပွင့်၏ အောက်တွင် အီဗ်၏ တိုက်ခိုက်မှုများကို ထိုမျှလွယ်ကူစွာ တားဆီးနိုင်ပါမည်လား။

၎င်းက ကြီးမားသည်မှာ အမှန်ပင်။

သို့သော်

ကြီးမားတိုင်း သန်မာသည်ဟု မဆိုလိုပေ။

ကောင်းကင်ယံအပြည့် ဖုံးလွှမ်းနေသော နွယ်ပင်များကို ရင်ဆိုင်ရင်း အီဗ်က လက်နက်အားလုံးဖြင့် တိုက်ခိုက်ကာ ရှေ့သို့ ဆက်တိုက် တိုးဝင်သွားလေ၏။

၎င်းက သစ်ပင် မကောင်းဆိုးဝါးကြီး၏ ထိပ်ဆုံးအထိ ပြေးတက်သွားတော့သည်။

မဟာကရုဏာ စက်သေနတ်ကြီးနှင့် ခြောက်ပြောင်းလှည့် ရေခဲသွေးကြော အမြောက်တို့က အောက်သို့ စိုက်ဆင်းလာကာ သစ်ပင် မကောင်းဆိုးဝါးကြီး၏ ခန္ဓာကိုယ်အတွင်းသို့ တိုက်ရိုက် ထိုးဖောက်ဝင်ရောက်သွားလေသည်။

ချက်ချင်းဆိုသလိုပင် ပစ်ခတ်လိုက်တော့သည်။

သစ်ပင် မကောင်းဆိုးဝါးကြီးမှာ စတင်ပြိုကျလာကာ ၎င်း၏ ဧရာမ ခန္ဓာကိုယ်ကြီးဖြင့် အီဗ်ကို တားဆီးရန် ရူးသွပ်စွာ ကြိုးစားလာတော့သည်။

သို့သော် အချည်းနှီးသာ ဖြစ်ပေသည်။

တောအုပ်ကြီးက ဒေါသ၊ နာကျင်မှုနှင့် မျှော်လင့်ချက်မဲ့မှုတို့ ရောနှောနေသော အော်ဟစ်သံတစ်ခုကို ထုတ်လွှတ်လိုက်လေ၏။ ဘေးအန္တရာယ်ဟု အမည်ရသော မကောင်းဆိုးဝါးက မြေပြင်မှနေ၍ ရဲချီယန်ကို တိုက်ခိုက်လာတော့သည်။

သစ်ပင် မကောင်းဆိုးဝါးကြီး ပြိုကျမသွားမီ နောက်ဆုံး အခိုက်အတန့်လေးမှာပင်။ ၎င်းက ခန္ဓာကိုယ်အတွင်းရှိ စွမ်းအင်အားလုံးကို နေရာတစ်ခုတည်းသို့ စုစည်းကာ လေထဲတွင် ပေါက်ပေါက်စားရင်း တိုက်ပွဲကို အေးအေးဆေးဆေး ကြည့်ရှုနေသော ရဲချီယန်ထံသို့ ထိုဧရာမ သစ်သားကြာပွတ်ကြီးဖြင့် လှမ်းရိုက်လိုက်လေသည်။

သို့သော်လည်း။

ရဲချီယန်က လက်နက်တပ်ဆင်မှု နေရာလွတ်ထဲမှနေ၍ ဗီလိန်ကို ပေါ့ပေါ့ပါးပါး ဆင့်ခေါ်လိုက်ချိန်တွင်တော့၊ မြင့်မြတ်သော အမြုတေမှ အသွင်ပြောင်းလာသည့် ထိုဒိုင်းလွှာနှစ်ခုက သစ်သားကြာပွတ်ကြီးကို ကြားဖြတ်ဟန့်တားကာ ကာကွယ်လိုက်လေတော့သည်။

သစ်သားကြာပွတ်ကြီးက နောက်သို့ လွင့်စင်သွားကာ အတော်လေး တိုက်ဆိုင်စွာဖြင့် သစ်ပင် မကောင်းဆိုးဝါးကြီး၏ ခန္ဓာကိုယ်အတွင်းသို့ ပြန်လည်စိုက်ဝင်သွားတော့သည်။

နတ်ဆိုးပန်း၏ မီးတောက်များက ဆက်လက် ပြန့်နှံ့နေစဉ်

စိမ်းလန်းမှုများက မီးသွေးပြာများအဖြစ် ပြောင်းလဲသွားချိန်တွင်

"ငါက ဘာလို့ လူဆိုးတစ်ယောက်လို ခံစားနေရတာလဲ"

"ဒါပေမဲ့ ထားလိုက်ပါတော့၊ ငါရှာနေတဲ့အရာက ဒီမီးကြောင့် တကယ်ပဲ လောင်ကျွမ်းပြီး ထွက်ပေါ်လာခဲ့ပြီပဲ"

သစ်ပင် မကောင်းဆိုးဝါးကြီး လဲကျသွားသော နေရာတွင်၎င်း၏ ခန္ဓာကိုယ်အတွင်းမှနေ၍ ပြီးပြည့်စုံသော စက်ဝိုင်းပုံစံ အလင်းပေါက် အတားအဆီးတစ်ခု မြေပြင်ပေါ်သို့ ပြုတ်ကျလာလေ၏။ ထိုအထဲတွင်တော့ သစ်ပင်ပုံစံ ယဇ်ပလ္လင်တစ်ခုကို ရှင်းလင်းပြတ်သားစွာ မြင်တွေ့နေရလေတော့သည်။