အခန်း ၄၁၇

အခန်း ၄၁၇

ထိခိုက်မှုမဖြစ်ပေါ်မီ အချိန်လေးမှာပင် ရှေးခေတ်ဆီးနှင်းနတ်ဆိုးဘုရင်၏ ရှေ့တွင် ရေခဲတောင်ကြီးတစ်လုံး ရုတ်တရက် ပေါ်ပေါက်လာပြီး တိုက်ခိုက်မှုအားလုံးကို သူ၏ကိုယ်စား လက်ခံသွားခဲ့သည်။

သို့သော် ချန်ကျီရှင်းက ဆီးနှင်းနတ်ဆိုးဘုရင်အား ရည်ရွယ်ပြီး အထူးထုတ်သုံးထားသည့် ဤလက်စွမ်းမှာ ထိုမျှလွယ်ကူစွာဖြင့် တားဆီးနိုင်မည့် အရာမဟုတ်ပေ။

ရှေ့ရှိ အနက်ရောင်မီးလျှံများက ရေခဲတောင်ကို ဖောက်ထွင်းလောင်ကျွမ်းသွားပြီးနောက် နောက်ဆုံးတွင် မီးပွားအချို့သည် ဆီးနှင်းနတ်ဆိုးဘုရင်ပေါ်သို့ ကျရောက်သွားသည်။

ချန်ကျီရှင်းသည် အနည်းငယ် ခါးညွှတ်ကာ ဂါရဝပြုလိုက်သည်။

"အဘိုး... အဘိုးက ဒီ ရေခဲမြေပြင်မှာ ကျန်ရစ်ခဲ့တဲ့ ဝိညာဉ်အမှတ်အသားသက်သက်ပါပဲ။ အဘိုးရဲ့ သက်တမ်းကလည်း သေခြင်းနဲ့ ရှင်ခြင်း တရားတွေရဲ့ ဥပဒေသအောက်မှာ တဖြည်းဖြည်း လျော့ပါးနေတာပါ။ အဲဒီလိုမဟုတ်ခဲ့ရင် ကျွန်တော် ဒီလိုမျိုး စွန့်စားပြီး စိန်ခေါ်ရဲမှာ မဟုတ်ပါဘူး"

ရေခဲရုပ်တုများ ကွဲအက်သွားသည့် အသံများ ပျံ့လွင့်လာသည်။

အနက်ရောင်မီးတောက်များ ကူးစက်ခံထားရသော ဆီးနှင်းနတ်ဆိုးဘုရင်၏ ခန္ဓာကိုယ်မှာ လျော့ပါးလာသည့် သက်တမ်း၏ အဆုံးသတ်သို့ ရောက်ရှိသွားသကဲ့သို့ပင်။

တည်ရှိနေခြင်း၏ အခြေခံအုတ်မြစ်မှာ ပျက်စီးသွားပြီး သူ၏ခန္ဓာကိုယ်ပေါ်တွင် အက်ကြောင်းများ စတင်ပေါ်ပေါက်လာသည်။

ခရက်….

ခရက်…

ရေခဲများ ကွဲအက်သံများကြားတွင် ဤဆီးနှင်းနတ်ဆိုးဘုရင်က သက်ပြင်းတစ်ချက် ချလိုက်သည်။

"မင်း... မင်း တကယ်တော်တာပဲ"

နောက်တစ်ခဏတွင် ဂူ၏ အနက်ရှိုင်းဆုံးနေရာ၌ အပြာနုရောင် မျက်ဝန်းတစ်စုံမှာ တောက်ပလာသည်။

ချန်ကျီရှင်းသည် ဤမြင်ကွင်းကို မြင်လိုက်ရသည့်အခါ တိတ်ဆိတ်စွာ သက်ပြင်းချလိုက်မိသည်။

သူ ရင်ဆိုင်နေရသော တတိယမြောက် စမ်းသပ်ချက်မှာ ဤဆီးနှင်းနတ်ဆိုးဘုရင်တစ်ပါးတည်းသာ မဟုတ်ကြောင်း သူ သိလိုက်ရသည်။

...

တစ်နာရီခန့် ကြာပြီးနောက် ပေပေါင်းတစ်သောင်းခန့် ကျယ်ဝန်းသော ချောက်ကမ်းပါးကြီးအဖြစ် ပြောင်းလဲသွားသည့် ဂူ၏အောက်ခြေတွင် ချန်ကျီရှင်းသည် နောက်ဆုံးကျန်ရှိသော ဆီးနှင်းနတ်ဆိုးဘုရင်ထံမှ လက်သည်းခွံအရွယ်အစားရှိ စတုဂံပုံစံ ရေခဲအပိုင်းအစလေးကို ရရှိသွားပြီးနောက် ၎င်းကို သူ၏ နဖူးပေါ်သို့ ဖြည်းညှင်းစွာ ထည့်သွင်းလိုက်သည်။

ထိုမြင်ကွင်းကို မြင်သောအခါ ဆီးနှင်းနတ်ဆိုးဘုရင်၏ မျက်ဝန်းထဲတွင် ဝမ်းမြောက်ခြင်း အရိပ်အယောင်များ ပေါ်လာသည်။

၎င်းမှာ ထူးချွန်သော ဆက်ခံသူတစ်ဦးကို တွေ့မြင်လိုက်ရ၍ နှလုံးသားထဲမှ ဖြစ်ပေါ်လာသော ဝမ်းမြောက်ခြင်းပင်။

"ကလေး... မင်းရဲ့ မူလအမှတ်အသားကို စိတ်မပူပါနဲ့။ ဒီနေ့ကစပြီး မင်းက ငါတို့ ဆီးနှင်းနတ်ဆိုးမျိုးနွယ်စုရဲ့ အမြင့်မြတ်ဆုံးဘုရင် ဖြစ်လာပြီ။ မင်း ခံစားမိလား မင်း ငါတို့ဆီကနေ ရာဇပလ္လင်ကို လက်ခံရယူလိုက်တဲ့ အခိုက်အတန့်မှာ ရေခဲမြေပြင်တစ်ခုလုံးက မင်းရဲ့ ဘိသိက်ပွဲကို ဂုဏ်ပြုနေကြတယ်။ ကောင်းကင်နဲ့ မြေကြီးကြားက အေးစက်တဲ့ လေပြေတွေက မင်းရဲ့ နာမည်ကို ခေါ်ဆိုနေကြပြီ"

ချန်ကျီရှင်း ခံစားမိသည်။

ရေခဲအပိုင်းအစကို သူ၏နဖူးတွင် ပေါင်းစပ်လိုက်သည်နှင့် သူ၏မိခင်ထံမှ ရရှိလာသော ဆီးနှင်းနတ်ဆိုးသွေးသားမှာ လျင်မြန်စွာ လှုပ်ရှားလာပြီး ချန်ကျီရှင်းပင် အံ့ဩရလောက်အောင် စွမ်းအားများ ပေါက်ကွဲထွက်လာသည်။

ဤစွမ်းအားသည် ရေခဲမြေပြင်တစ်ခုလုံးနှင့် အပေးအယူ အပြန်အလှန် ဖြစ်နေပြီး အတူတူ အသက်ရှူနေရသကဲ့သို့ တစ်သားတည်း ဖြစ်တည်နေသည့် ခံစားချက်ကို ရရှိသည်။

ထိုအခိုက်အတန့်တွင် ချန်ကျီရှင်းသည် ဆီးနှင်းနတ်ဆိုးမျိုးနွယ်စု၏ ဘုရင်အစစ်အမှန် ဖြစ်လာခဲ့ကာ ရေခဲမြေပြင်တစ်ခုလုံး၏ ဘုရင် မသေနိုင်သော ဘုရင်ပင်။

သို့မဟုတ်ပါကလည်း ဤလှောင်အိမ်ကို စောင့်ကြပ်ပေးရန် တာဝန်ပေးအပ်ခြင်းခံရသော အကျဉ်းသားများထဲမှ တစ်ဦးပင်။

တစ်ချိန်တည်းမှာပင် ရေခဲမြေပြင်မှ ရရှိလာသော ထူးခြားသည့်စွမ်းအားကြောင့် သူသည် နိဗ္ဗာနအဆင့်တွင် ရှိနေပါလျက်နှင့် အထွတ်အထိပ်အဆင့်၏ အချိန်ကို အတွေ့အကြုံ ရရှိစေသည်။

သူ၏နဖူးပေါ်မှ အမှတ်အသားသည် တောက်ပလာသည်နှင့်အမျှ ချန်ကျီရှင်း၏ မျက်ဝန်းထဲတွင် ကမ္ဘာကြီးသည် နှေးကွေးသွားသယောင် ရှိသည်။

နှင်းမှုန်များပင် ရပ်တန့်လုနီးပါး ဖြစ်သွားပြီး ၎င်းတို့၏ ကျဆင်းမည့် လမ်းကြောင်းကိုပါ ရှင်းလင်းစွာ မြင်တွေ့နေရသည်။

"အံ့ဩစရာကောင်းတဲ့ ခံစားချက်ပဲ။ ဒါက အထွတ်အထိပ်အဆင့်ရဲ့ စွမ်းအားဆိုတာ ဒါမျိုးလား"

ချန်ကျီရှင်းသည် ထိုနှေးကွေးသော အာရုံခံစားမှုမှ ပြန်လည်နိုးထလာချိန်တွင် နောက်ဆုံးကျန်ရှိသည့် ရှေးခေတ်ဆီးနှင်းနတ်ဆိုးဘုရင်မှာ ရေခဲအပိုင်းအစများအဖြစ် ကွဲကြေပျက်စီးသွားခဲ့ပြီဖြစ်သည်။

ချန်ကျီရှင်းသည် ထိုမြင်ကွင်းကို ကြည့်ကာ ဖြည်းညှင်းစွာ ဦးညွှတ်လိုက်သည်။

"အဘိုး... သင်ကြားပေးမှုအတွက် ကျေးဇူးတင်ပါတယ်"

ဘေးတွင်ရှိသော ချင်းကျီသည် ချန်ကျီရှင်းနှင့် ပဲ့တင်ထပ်နေသကဲ့သို့ ဖြူစင်သော အလင်းရောင်တစ်ခုကို ထုတ်လွှတ်နေသည်။

ချန်ကျီရှင်း မတ်တတ်ရပ်လိုက်သောအခါ ဓားဝိညာဉ် ချင်းကျီက ချက်ချင်းပင် မေးမြန်းလာသည်။

"သခင်လေး... သခင်လေးက အခု ဆီးနှင်းနတ်ဆိုးမျိုးနွယ်စုရဲ့ ဘုရင် ဖြစ်လာပြီ။ ဒါပေမဲ့ ဒီ ရေခဲမြေပြင်ကနေ ဘယ်လို ထွက်ခွာမှာလဲ"

"သဘာဝကျကျပဲ နည်းလမ်းတစ်ခုတော့ ရှိမှာပေါ့"

ချန်ကျီရှင်းက တိုးတိုးလေး ပြန်ဖြေသည်။

"တကယ်တော့ ဆီးနှင်းနတ်ဆိုးဘုရင်တိုင်းမှာ ဒီရေခဲမြေပြင်ကနေ ထွက်ခွာနိုင်တဲ့ နည်းလမ်းရှိသလို တခြားသူတွေကိုလည်း ခေါ်သွားနိုင်တဲ့ နည်းလမ်း ရှိကြပါတယ်။ အဲဒီလိုမဟုတ်ရင် ကျွန်တော့်အမေနဲ့ အဖေတို့ တွေ့ဆုံနိုင်မှာ မဟုတ်ဘူးလေ။ သူတို့က မထွက်သွားဘဲ ဒီတာဝန်ကို ဆက်ခံဖို့ ရွေးချယ်ခဲ့ကြတာပါ"

"အာ ဒါဆို သူတို့က ဘာလို့ မထွက်သွားကြတာလဲ"

ဓားဝိညာဉ်တစ်ဦးဖြစ်သော ချင်းကျီအတွက် တာဝန်ဆိုသည့် စကားလုံး၏ အဓိပ္ပာယ်ကို နားလည်ရန် ခက်ခဲပေလိမ့်မည်။

"တာဝန်ရှိလို့ပေါ့"

"အော်... တာဝန်တဲ့လား။ ဟုတ်ပါပြီ ဒါဆို သခင်လေး... ရေခဲမြေပြင်ကနေ ဘယ်လို ထွက်မှာလဲ ကျွန်မကို ပြောပြပါ"

ချန်ကျီရှင်းမှာ ဤနေရာတွင် ထာဝရနေတော့မည် မဟုတ်ကြောင်း သိလိုက်ရသဖြင့် ချင်းကျီသည် အပြစ်ကင်းစင်သော မိန်းကလေးငယ်တစ်ဦးကဲ့သို့ စိတ်လှုပ်ရှားစွာဖြင့် တကဲကဲ မေးမြန်းနေတော့သည်။

"နောက်ထပ် စမ်းသပ်ချက်တစ်ခုဆီ ရောက်ရင် မင်း သိလာလိမ့်မယ်"

"ဟုတ်ကဲ့ပါ ဟုတ်ကဲ့ပါ"

...

ဆီးနှင်းနတ်ဆိုးတို့၏ အမွေခံနယ်မြေ ၄ ခုမြောက် စမ်းသပ်ချက်မှာ မမျှော်လင့်ဘဲ အလွန်ကျယ်ပြောနေသည်။

၎င်းမှာ ရိုးရှင်းလှသော ခန်းမဆောင်ကြီးတစ်ခုသာ ဖြစ်သည်။

ချန်ကျီရှင်း ဝင်ရောက်သွားသောအခါ နံရံများတွင် ထွင်းထုထားသည့် နံရံဆေးရေးပန်းချီကားများကို တွေ့လိုက်ရသည်။

ပထမဆုံး ပန်းချီကားတွင် အပြင်ဘက်ရှိ ကစဉ့်ကလျား ဖြစ်နေသော လောကကြီးမှ လွတ်မြောက်ရန် ဤရေခဲပြင်ပေါ်သို့ ရောက်ရှိလာပြီး ပုန်းအောင်းနေထိုင်ရန် ရွေးချယ်ခဲ့သည့် လူစုတစ်စုကို ဖော်ပြထားသည်။

ဒုတိယမြောက် မြင်ကွင်းတွင်တော့ ဤလူစုသည် ရေခဲပြင်ပေါ်ရှိ ဂူတစ်ခုကို ရှာဖွေတွေ့ရှိခဲ့ပြီး ဂူအတွင်းပိုင်း၌ ခေါင်းတလားတစ်ခုကို တွေ့ရှိခဲ့ကြောင်း ပြသထားသည်။

သူတို့သည် ထိုခေါင်းတလားကို ဖွင့်လှစ်ရန် ရွေးချယ်ခဲ့ပြီး မသေနိုင်ခြင်းဆိုသည့် စွမ်းအားကို ရရှိသွားခဲ့ကြသည်။

ထိုသို့ဖြင့် ဆီးနှင်းနတ်ဆိုးမျိုးနွယ်စု ပေါ်ပေါက်လာခဲ့ပြီး ခေါင်းတလားကို ဦးဆုံးတွေ့ရှိခဲ့သည့် အမျိုးသမီးမှာ ဆီးနှင်းနတ်ဆိုးမျိုးနွယ်စု၏ ဘုရင်မ ဖြစ်လာခဲ့သည်။

တတိယမြောက် ပန်းချီကားတွင်တော့ မသေနိုင်သော စွမ်းအားကို ရရှိခဲ့သူများသည် ဤအေးခဲသော လောကထဲတွင် ပျော်ရွှင်စွာ နေထိုင်ကာ ပေါက်ပွားခဲ့ကြသည်။

စတုတ္ထမြောက် ပန်းချီကားတွင်တော့ ဆီးနှင်းနတ်ဆိုးများသည် ဤရေခဲပြင်ကနေ ထွက်သွားလို့ မရနိုင်တော့သည့် ကြမ်းတမ်းသော အမှန်တရားကို ရှာဖွေတွေ့ရှိသွားကြသည်။

"အင်း"

ပန်းချီကားပေါ်ရှိ ခြစ်ထုတ်ဖျက်စီးထားသည့် အပိုင်းကို သတိပြုမိလိုက်သဖြင့် ချန်ကျီရှင်းမှာ အံ့အားသင့်သွားသည်။

အနည်းငယ် တွေးတောပြီးနောက် သူသည် ထိုအပိုင်းကို ကျော်သွားပြီး နောက်ထပ် ပန်းချီကားကို ဆက်ကြည့်ရန် ဆုံးဖြတ်လိုက်သည်။

"ပဉ္စမမြောက် မြင်ကွင်းကတော့... ဆီးနှင်းနတ်ဆိုးမျိုးနွယ်စုက ပထမမျိုးဆက် ဆီးနှင်းနတ်ဆိုးဘုရင်မရဲ့ ခေါင်းဆောင်မှုအောက်မှာ ခေါင်းတလားကို ပြန်ပိတ်လိုက်ကြတာလား"

ပန်းချီကားထဲရှိ လူစုသည် ခေါင်းတလားကို ပြန်လည်အလုံပိတ်ကာ ရှေ့တွင် ဒူးထောက်အရိုအသေပေးပြီးနောက် ကြီးမားခမ်းနားသော ခန်းမဆောင်ကြီးတစ်ခုထဲသို့ တွန်းပို့လိုက်သည်ကို မြင်လိုက်ရသောအခါ ချန်ကျီရှင်းမှာ မျက်ခုံးပင့်လိုက်သည်။

နံရံဆေးရေးပန်းချီကားမှ မည်သည့်အကြောင်းအရာကို ဖျက်ဆီးထားသည်ဆိုသည်ကို သူ သဘောပေါက်သွားသယောင် ရှိသည်။

ဆဋ္ဌမမြောက် ပန်းချီကားတွင်တော့ ဆီးနှင်းနတ်ဆိုးမျိုးနွယ်စုသည် ရေခဲမြေပြင်ကို စတင်တည်ဆောက်နေကြပြီး ကြီးမားလှသော မြို့တော်ကြီးတစ်ခုမှာ ပန်းချီကားပေါ်တွင် ပေါ်ထွက်လာတော့သည်။