အခန်း ၄၁၈

အခန်း ၄၁၈

"ဆီးနှင်းနတ်ဆိုးမျိုးနွယ်စုမှာ ယဉ်ကျေးမှုတစ်ခု ရှိခဲ့ဖူးတာပေါ့ မြို့ပြတွေ တည်ဆောက်ခဲ့တဲ့ ယဉ်ကျေးမှုမျိုးလား"

သတ္တမမြောက် မြင်ကွင်းတွင် အကြောင်းရင်းမသိရသော အခြေအနေကြောင့် မြို့ထဲရှိသူများသည် အချင်းချင်း သတ်ဖြတ်ကြသည်။

တချို့က မြို့ထဲမှ ထွက်ခွာရန် ရွေးချယ်ကြပြီး မြို့ကြီးတစ်ခုလုံး ရေခဲနှင့်နှင်းများအောက်တွင် မြုပ်နှံသွားသည်ကို ငေးကြည့်နေကြသည်။

အဌမမြောက် မြင်ကွင်းတွင်တော့ လူတချို့က ရေခဲမြေပြင်မှ ထွက်ခွာနိုင်မည့် နည်းလမ်းကို စတင်ရှာဖွေလာကြသည်။

နဝမမြောက်...

ဒသမမြောက်...

နှစ်ဆယ့်တစ်မြောက် မြင်ကွင်းတွင်တော့ ပန်းချီကားထဲ၌ လူတစ်ယောက်သည် လက်စွပ်ပုံစံ အရာဝတ္ထုတစ်ခုကို မြှောက်ထားပြီး ဝမ်းမြောက်စွာ အော်ဟစ်နေကြသော ဆီးနှင်းနတ်ဆိုးများအလယ်တွင် ရေခဲမြေပြင်၏ နယ်စပ်သို့ ရောက်ရှိသွားသည်။

"ဒီပန်းချီကားက တကယ် စိတ်ဝင်စားဖို့ကောင်းတယ်။ ရှေ့ဆုံးမှာ ဆီးနှင်းနတ်ဆိုးဘုရင်နောက် လိုက်ပါနေတဲ့ လူအုပ်စုကို တွေ့ရပေမဲ့ နယ်စပ်ရောက်တဲ့အခါ ဆီးနှင်းနတ်ဆိုးဘုရင်က အုပ်စုရဲ့ အဆုံးမှာ ရပ်နေပြန်တယ်"

နှစ်ဆယ့်နှစ်မြောက်...

နှစ်ဆယ့်သုံးမြောက်...

လေးဆယ့်ကိုးမြောက် မြင်ကွင်းဖြစ်သည့် ဤဘုရားကျောင်းအတွင်းရှိ နောက်ဆုံးပန်းချီကားတွင်တော့ နန်းတက်ပြီးနောက် သူ၏သမီးကို ဤရေခဲပြင်မှ စေလွှတ်ခဲ့သည့် နောက်ဆုံးမျိုးဆက် ဆီးနှင်းနတ်ဆိုးဘုရင်မကို ဖော်ပြထားသည်။

"အပြင်ကို စေလွှတ်ခံလိုက်ရသူက ငါ့အမေပဲ"

ပန်းချီကားထဲရှိ ဆီးနှင်းနတ်ဆိုးဘုရင် ကိုင်ထားသည့် လက်စွပ်ကို ကြည့်ရင်း ချန်ကျီရှင်းသည် ဤစမ်းသပ်ချက်မှာ ဘာကိုဆိုလိုသလဲဆိုသည်ကို အကြမ်းဖျင်း နားလည်သွားသည်။

မျှော်လင့်ထားသည့်အတိုင်းပင် ဆီးနှင်းနတ်ဆိုးဘုရင်မ သို့မဟုတ် ချန်ကျီရှင်း၏ အဘွားဖြစ်သူ၏ အသံက သူ၏နောက်ကျောဘက်မှ ထွက်ပေါ်လာသည်။

"ငါ့လက်ထဲကနေ မင်း ဒါကို ယူမှာလား ဒါက ဘယ်လောက်ကြီးမားတဲ့ တာဝန်ကို ကိုယ်စားပြုလဲဆိုတာနဲ့ ဒါကို ပိုင်ဆိုင်သူကို ဘယ်လို စွမ်းအားတွေ ပေးစွမ်းနိုင်လဲဆိုတာ မင်း သိပါတယ်။ ဒါကတော့ ရေခဲမြေပြင်ကနေ ထွက်ခွာနိုင်စေမှာ အမှန်ပါပဲ"

ဘယ်အချိန်ကတည်းက ရောက်နေမှန်းမသိသော ဆီးနှင်းနတ်ဆိုးဘုရင်မသည် ဘုရားကျောင်းထဲတွင် ပေါ်လာသည်။

သူမသည် ပန်းချီကားထဲတွင် ပါသည့်အတိုင်းပင် အဖြူရောင်ကြိုးလေးနှင့် ချည်နှောင်ထားသည့် လက်စွပ်ကို ကိုင်ထားသည်။ ၎င်းမှာ ရေခဲပြင်မှ ထွက်ခွာနိုင်စေသည့် လက်စွပ်ပင်။

ချန်ကျီရှင်းသည် နောက်သို့ လှည့်ကြည့်လိုက်ပြီး သူ့ရှေ့မှ ဆီးနှင်းနတ်ဆိုးဘုရင်မကို ကြည့်ကာ "ခင်ဗျား ဒါကို ကျွန်တော့်ကို ပေးဖို့ ဆန္ဒရှိတာလား" ဟု မေးလိုက်သည်။

"ဘာလို့ မပေးရမှာလဲ"

ဆီးနှင်းနတ်ဆိုးဘုရင်မက ပြုံးလျက် "ဘယ်လိုပဲဖြစ်ဖြစ် မင်းဟာ ရွှမ်းရွှမ်းရဲ့သား ငါ့ရဲ့ မြေးပဲလေ။ ငါတို့ ပထမဆုံးအကြိမ် တွေ့ဆုံခြင်းအတွက် အဘွားတစ်ယောက်က မြေးအတွက် လက်ဆောင်လေး ပေးတာက သင့်လျော်တဲ့ ကိစ္စပဲ မဟုတ်ဘူးလား"

"ဘာလို့ အရင်က ကျွန်တော့်အမေကို ဒီရေခဲပြင်ထဲမှာ ပိတ်လှောင်ထားခဲ့တာလဲ"

"အပြင်မှာ အန္တရာယ်များလို့လေ။ ငါ့သမီး ရွှမ်းရွှမ်း အန္တရာယ်ကြုံမှာကို ငါ မလိုလားဘူး"

"ကျွန်တော့်ချန်မိသားစုက..."

"အန္တရာယ်ဆိုတာ မင်းတို့ ချန်မိသားစုဆီက လာတာပဲ။ မင်းတို့ ချန်မိသားစုရဲ့ အရင်က အခြေအနေကို မင်း ကောင်းကောင်းသိပါတယ်။ အရှုပ်အထွေးတွေနဲ့ ပြည့်နှက်နေတဲ့ နေရာတစ်ခုလေ။ မိခင်တစ်ယောက်အနေနဲ့ ငါ့သမီး အဲဒီထဲမှာ နှစ်မြုပ်နေတာကို ငါ အတ္တဆန်ဆန်ပဲ မလိုလားတာပါ။ အဲဒါမှာ ဘာမှ အမှားမရှိပါဘူး"

"ဒါဆို အခုကော..."

"အခုတော့"

ပထမမျိုးဆက် ဆီးနှင်းနတ်ဆိုးဘုရင်မက ပြုံးလျက် ခေါင်းခါလိုက်သည်။

ချန်ကျီရှင်း၏ ဦးခေါင်းကို ပုတ်ရန် လက်လှမ်းလိုက်သော်လည်း မသင့်တော်ဘူးဟု တွေးမိဟန်ဖြင့် လက်ကို ပြန်ရုပ်သိမ်းလိုက်ကာ ပြုံးပြသည်။

"အခုလည်း အန္တရာယ်ရှိတာပဲ။ သမိုင်းကြောင်းကနေ ပြန်ရောက်လာကြသူတွေကို မင်း မြင်ပြီးလောက်ပါပြီ။ သူတို့တွေ ပြန်ရောက်လာကြပြီ"

"ဘယ်သူတွေလဲ"

ချန်ကျီရှင်း၏ မျက်လုံးများ ကျဉ်းမြောင်းသွားသည်။

ချက်ချင်းပင် သူ၏စိတ်ထဲတွင် ပဟေဠိများစွာ ပေါင်းစပ်သွားပြီး အလွန်ကြောက်မက်ဖွယ်ကောင်းသော အမှန်တရားတစ်ခုသို့ ဦးတည်သွားသည်။

"သူတို့ပဲ။ မင်း ထင်ထားတဲ့အတိုင်းပဲ။ ဖြစ်နိုင်တာက သူတို့တင် မဟုတ်ဘူး။ ပိုဟောင်းတဲ့ သူတွေ အခုမှ ပေါ်လာတဲ့ ငယ်ရွယ်တဲ့ သူတွေပါ အကုန်လုံးပါပဲ။ ဒီလို ခမ်းနားတဲ့ ခေတ်ကြီးမှာ ဒီလို အစွမ်းထက်တဲ့ ပုဂ္ဂိုလ်တွေ အားလုံးက တစ်ယောက်ပြီးတစ်ယောက် နိုးထလာကြတော့မှာ။ သူတို့တွေ ပြန်ရောက်လာကြမယ်။ နာမည်ကြီးလာကြမယ်။ ပြီးတော့ သူတို့ရဲ့ မပြီးဆုံးသေးတဲ့ ဒဏ္ဍာရီတွေ၊ ပုံပြင်တွေကို ဆက်လက် ရေးသားကြတော့မှာပေါ့"

"ဒီခေတ်မှာ မွေးဖွားလာတဲ့ မင်းတို့အတွက်တော့ တကယ့်ကို စိတ်ညစ်စရာ ကာလပါပဲ"

"ဒီအရာအားလုံးကို နောက်ကွယ်ကနေ ကြိုးကိုင်ခြယ်လှယ်နေတဲ့ ကြိုးကိုင်ရှင်က ဘယ်သူလဲဆိုတာ မင်း သိလား"

"ခန့်မှန်းရတာ မခက်ပါဘူး။ အဲဒါ တာလျို သန့်ရှင်းသောနယ်မြေပဲ။ လူသားတွေ လုပ်သမျှကို ကြည့်ရှုနေတဲ့ ဘေးလူတစ်ယောက်အနေနဲ့ အဘိုးအိုတစ်ယောက်အတွက်တော့ ဒါကိုမြင်ဖို့ ခက်ခဲတဲ့အရာ မဟုတ်ပါဘူး"

စကားဝိုင်းက ထိုနေရာကို ရောက်သည့်အခါ ဆီးနှင်းနတ်ဆိုးဘုရင်မ၏ အပြုံးမှာ ပျောက်ကွယ်သွားပြီး ချန်ကျီရှင်းကို အလေးအနက်ထားသည့် အကြည့်ဖြင့် ကြည့်ကာ "ရှေးခေတ်ကာလတုန်းက ဆီးနှင်းနတ်ဆိုးမျိုးနွယ်စုက အခုခေတ်နဲ့ မတူဘဲ လူသားမျိုးနွယ်စုနဲ့ လက်ထပ်ထိမ်းမြားတာကို မရှောင်ရှားခဲ့ကြပါဘူး။ ဒါပေမဲ့ ငါ့သမီးက ဒီလို အရှုပ်အထွေးတွေနဲ့ ပြည့်နှက်နေတဲ့ ခေတ်ကြီးမှာ မွေးဖွားလာခဲ့ရတာဆိုတော့ သူမအပေါ်မှာ ရက်စက်ပြီး တင်းကျပ်ခဲ့တဲ့ ငါ့ကို အပြစ်မတင်နိုင်ပါဘူး"

ချန်ကျီရှင်းသည် တိတ်ဆိတ်နေလိုက်သည်။

အကြီးဆုံး သန့်ရှင်းသောနယ်မြေ သုံးခုထဲမှ တစ်ခုဖြစ်သော တာလျို သန့်ရှင်းသောနယ်မြေသည် ဤရွှေရောင်ခေတ်ကြီးတွင် ပြဿနာရှာရန် ကြိုးပမ်းနေသည်ကို သိလိုက်ရသောအခါ သူ့ရှေ့မှ ဆီးနှင်းနတ်ဆိုးဘုရင်မ လုပ်ဆောင်ခဲ့သည့်အရာမှာ လက်ခံနိုင်စရာ မရှိတော့သည့် အရာမျိုးမဟုတ်ဘူးဟု ခံစားလိုက်ရသည်။

"အပြင်လောကကြီးက အရမ်းကို အန္တရာယ်များတယ်။ မိခင်တစ်ယောက်အနေနဲ့ ငါ့ကလေးတွေကို ငါ့အနားမှာပဲ ရှိစေချင်တာပါ။ ဘာပဲဖြစ်ဖြစ် ဒီ ရေခဲမြေပြင်ကတော့ သူတို့ကို အကာအကွယ် ပေးနိုင်ပါသေးတယ်"

"ဒါဆိုရင်လည်း ဒါပဲပေါ့"

"ကဲ... ဒီလက်စွပ်ကို သေချာ သိမ်းထားပါ။ ဈေးနှုန်းကတော့..."

ဆီးနှင်းနတ်ဆိုးဘုရင်မသည် သူမရှေ့ရှိ လူငယ်လေး၏ မျက်နှာကို ကြည့်ကာ ပြုံးလိုက်သည်။ "ဈေးနှုန်းကတော့ ငါ ကွယ်လွန်သွားပြီးတဲ့နောက်မှာ မင်း ပြန်လာပြီး ငါ့နေရာကို ဆက်ခံရမယ်။ ဒီ ရေခဲမြေပြင်ကို ဆက်ပြီး စောင့်ကြပ်ပေးရမယ်။ ပြီးတော့ အဲဒီခေါင်းတလားကိုလည်း စောင့်ကြပ်ပေးရမယ်။ ငါ့ကို ယုံပါ တကယ်ကို ကြောက်မက်ဖွယ်ကောင်းတဲ့ အရာက အဲဒီခေါင်းတလားထဲမှာ ရှိနေတာ။ ကမ္ဘာပျက်ကပ်ရဲ့ အရင်းအမြစ် ဖြစ်လာလောက်အောင်အထိ ကြောက်မက်ဖွယ်ကောင်းလွန်းတယ်။

ကဲ... အဘွားနဲ့အတူ ပြန်ကြရအောင်။ မင်းရဲ့အမေ မင်းကို အပြင်မှာ စောင့်နေတယ်။ သူမက မင်းတို့နဲ့အတူ၊ မင်းရဲ့အဖေနဲ့အတူ လိုက်သွားမလားဆိုတာကတော့ သူတို့ရဲ့ ရွေးချယ်မှုအပေါ်မှာပဲ မူတည်တယ်"

.....

ဆီးနှင်းနတ်ဆိုးဘုရင်မ၏ စကားများကို ကြားပြီးနောက် ဆီးနှင်းနတ်ဆိုးဘုရင်မ၏ နန်းတော်အတွင်းတွင် ယင်ရွှမ်းရွှမ်းသည် အလွန်ပင် စိတ်လှုပ်ရှားသွားပြီး မျက်ရည်ဝဲလျက် သူမ၏မိခင်ကို ကြည့်ကာ "အမေက ကျွန်မနဲ့ ထျန်းလျန်ကို အပြင်မထွက်ခိုင်းတာ ကျွန်မတို့ကို ကာကွယ်ပေးချင်လို့လား" ဟု ပြောလိုက်သည်။

ယင်ရွှမ်းရွှမ်း၏ လက်ကို ကိုင်ထားရင်း ချန်ထျန်းလျန်က ပြုံးလိုက်သည်။

သူကတော့ ဤအကြောင်းကို ကြာမြင့်စွာကတည်းက သိရှိပြီးသားဖြစ်သည်။

အကယ်၍သာ ချန်ထျန်းလျန်၏ စရိုက်မျိုးမဟုတ်ပါက ဤ ရေခဲမြေပြင်တွင် ၈ နှစ်တိုင်တိုင် အကျဉ်းချခံထားရသည်ကို သူ လွယ်လွယ်နှင့် လက်ခံလိမ့်မည် မဟုတ်ပေ။

ယခုမူ အမှန်တရား ပေါ်ပေါက်လာပြီဖြစ်ရာ သူ၏သား ချန်ကျီရှင်းကို အခက်တွေ့စေသည့် အခြေအနေမျိုး မဖြစ်စေရန်အတွက် ချန်ထျန်းလျန်က "အမေ ပြောတာ မှန်ပါတယ်။ ဒါပေမဲ့ ကလေးတွေက ကြီးပြင်းလာကြပြီ။ သူတို့မှာလည်း သူတို့ရဲ့ ကိုယ်ပိုင်အယူအဆတွေ၊ သူတို့ စွန့်လွှတ်လို့မရတဲ့၊ စွန့်လွှတ်မှာမဟုတ်တဲ့ ကိစ္စတွေ ရှိလာပြီဆိုတော့ အမေ့ကို စိတ်ပျက်မိစေလိမ့်မယ်" ဟု ပြောလိုက်ရတော့သည်။

ဆီးနှင်းနတ်ဆိုးဘုရင်မက မျက်မှောင်ကြုတ်လိုက်သည်။

"မင်းတို့ တကယ်ပဲ ထွက်သွားချင်နေတာလား"

"သဘာဝကျကျပေါ့ ကျွန်တော်တို့ ထွက်သွားချင်ပါတယ်။ ဘာပဲဖြစ်ဖြစ် ရွှမ်းရွှမ်းကို လက်ထပ်ခဲ့တာ ကျွန်တော် ချန်ထျန်းလျန်ပါ။ ကျွန်တော့် ချန်မိသားစုက ဇီဝေ လင်အန်းမှာ ရှိတာပါ။ ကျွန်တော် ချန်ထျန်းလျန်က ဒီ ရေခဲမြေပြင်ကို လင်ယောက်ျားအဖြစ် နေဖို့ ရောက်လာတာ မဟုတ်ပါဘူး"

သူ့ဘေးရှိ ချန်မိသားစုဝင်များကလည်း တတိယသခင်ကြီး ပြောသည်မှာ အမှန်ပင် ဖြစ်ကြောင်း ခေါင်းညိတ် ထောက်ခံလိုက်ကြသည်။