အခန်း ၄၁၉

အခန်း ၄၁၉

ချန်ထျန်ချန်းက "တတိယညီလေး ပြောတာ အမှန်ပါပဲ။ ဆီးနှင်းနတ်ဆိုးဘုရင်မကြီး စိတ်ချပါ။ ကျွန်တော်တို့ ချန်မိသားစုက ထာဝရအသက်ရှည်ခြင်းအဆင့် ကျင့်ကြံသူတွေ ပိုင်ဆိုင်တဲ့ မိသားစုဖြစ်သလို ပြိုင်ဘက်ကင်းတဲ့ ဘိုးဘေးတစ်ဦးလည်း ရှိပါတယ်။ ထာဝရအသက်ရှည်ခြင်းအဆင့် လက်နက်တွေလည်း ရှိနေပြီး ကျီရှင်းလိုမျိုး ထူးချွန်တဲ့မျိုးဆက်သစ်လည်း ရှိနေတာကြောင့် တတိယညီလေးနဲ့ ညီမလေးတို့ကို ကာကွယ်ပေးနိုင်ဖို့ ကျွန်တော်တို့ ယုံကြည်မှုအပြည့်ရှိပါတယ်" ဟု ပြန်လည်ဖြေကြားသည်။

"မှန်တယ် မှန်တယ် ကျွန်တော်တို့ အသက်ကို ပေးဆပ်ရမယ်ဆိုရင်တောင်မှ တတိယတောင်ထိပ်နေအိမ်ရဲ့ သခင်မလေးကို ဆံဖျားတစ်ခုလောက်တောင် ထိခိုက်မှုမဖြစ်အောင် ကာကွယ်ပေးမှာပါ"

"စိတ်ချပါ ဆီးနှင်းနတ်ဆိုးဘုရင်မကြီး ချန်မိသားစုက အရှေ့ပိုင်းဒေသရဲ့ အကြီးမားဆုံး ထာဝရအသက်ရှည်ခြင်းအဆင့် မိသားစုပါ။ ကျီရှင်းဆိုတာကလည်း သမိုင်းတစ်လျှောက် အထူးချွန်ဆုံး ပါရမီရှင် ဖြစ်တဲ့အတွက် သူ့မိခင်ကို သူ ဘာလို့ မကာကွယ်နိုင်ရမှာလဲ"

"ကျွန်တော်တို့ အသက်ကို ပေးဆပ်ဖို့ အသင့်ပါ..."

သူတို့ဘေးတွင် အကြီးအကဲ မဟူရာနှင့် အခြားသူများကလည်း တစ်ယောက်တစ်ပေါက် ထောက်ခံစကား ပြောကြသည်။

"အဲ့ဒီလိုလား"

ဆီးနှင်းနတ်ဆိုးဘုရင်မက ခေါင်းညိတ်လိုက်ပြီး သူ၏အကြည့်များမှာ ရှေ့တွင်ရှိနေသည့် ချန်ကျီရှင်းထံသို့ ပြန်ရောက်လာသည်။

ပထမဆုံးအကြိမ်အဖြစ် သူမ၏မျက်ဝန်းထဲတွင် ကြင်နာမှု အရိပ်အယောင်လေး ပေါ်လာသည်။

"ဒါက တကယ်ကို ထူးချွန်တဲ့ ကလေးပါပဲ။ ရွှမ်းရွှမ်းက သားကောင်းတစ်ယောက်ကို မွေးဖွားပေးခဲ့တာပါ။ ဒါပေမဲ့ ဖခင်ကောင်းတစ်ယောက်ကိုတော့ မရခဲ့ရှာဘူး"

ချန်ထျန်းလျန် "….."

ချန်ထျန်းလျန်၏ အခက်တွေ့နေသော မျက်နှာအမူအရာကို မြင်သောအခါ ဆီးနှင်းနတ်ဆိုးဘုရင်မက ကျယ်လောင်စွာ ရယ်မောလိုက်သည်။

"မင်းကပဲ လက်ထပ်ခဲ့တာဆိုတော့ မင်းဆီကနေ တင်တောင်းငွေတောင်းပြီး နောက်လိုက်လက်ဆောင်နဲ့အတူ ပြန်ပေးလိုက်မယ်ဆိုရင် ဒါက တောင်းဆိုမှု အရမ်းများလွန်းရာ ရောက်မလား"

"မများပါဘူး မများပါဘူး... တကယ်တော့... အဟမ်း ဖြစ်သင့်တာပါပဲ။ ထျန်းလျန် ခရမ်းရောင်ရွှေတောင်ကို ပြန်ရောက်တာနဲ့ တင်တောင်းငွေပေးပို့ဖို့အတွက် လူလွှတ်လိုက်ပါ့မယ်"

ထိုသို့ ပြောလိုက်ချိန်တွင် ချန်ထျန်းလျန်မှာပင် ရှက်ရွံ့သွားမိသည်။

တင်တောင်းငွေလည်း မပေးခဲ့ရသလို နောက်လိုက်လက်ဆောင်လည်း မပါခဲ့ဘဲ ယင်ရွှမ်းရွှမ်းနှင့် လက်ထပ်ခဲ့သည့်နေ့က သတို့သမီးဘက်မှ ဆွေမျိုးသားချင်းများပင် မရှိခဲ့ပေ။

၎င်းမှာ အပြေးအလွှားလက်ထပ်ခြင်းသာ ဖြစ်သည်။

ချန်ထျန်းလျန်သည်လည်း သူတို့၏သမီးကို ခိုးပြေးလာသော လူဆိုးလူမိုက်တစ်ယောက်သာ ဖြစ်သည်...

ချန်ထျန်းလျန်ကို ဆက်လက် မစနောက်တော့ပေ။

သူ့ကို သိပ်ပြီး သဘောမကျသော်လည်း သူသည် သူ၏ သမက်ဖြစ်သူဖြစ်ပြီး သားကောင်းတစ်ယောက်ကိုလည်း မွေးဖွားပေးခဲ့သူပင်။

ထိုင်ခုံတွင် ပြန်ထိုင်လိုက်ပြီးနောက် ဆီးနှင်းနတ်ဆိုးဘုရင်မသည် လက်ခုပ်တီးကာ အပြင်ဘက်သို့ လှမ်းခေါ်လိုက်သည်။

"အပြင်မှာ ခိုးနားထောင်နေတာ ရပ်လိုက်တော့။ လီရွှမ်း သူတို့ကို ခေါ်လာခဲ့"

ထိုစကားကို ကြားသည်နှင့် တံခါးများ ပွင့်လာပြီး လီရွှမ်း ခေါင်းဆောင်သော ဆီးနှင်းနတ်ဆိုးမျိုးနွယ်စုမှ လူငယ်မျိုးဆက်သစ် စစ်သည်များ အုပ်စုလိုက် ဝင်ရောက်လာကြသည်။

"ဘိုးဘေး"

"အင်း"

ဆီးနှင်းနတ်ဆိုးဘုရင်မက ခေါင်းညိတ်ကာ "မင်းတို့အားလုံး အပြင်လောကကို စူးစမ်းချင်ကြတာပဲ။ ဒီနေ့တော့ ငါ မင်းတို့ကို အခွင့်အရေး ပေးမယ်။ ရွှမ်းရွှမ်းနဲ့အတူ ကျန်းကျိုးက ချန်မိသားစုဆီ လိုက်သွားဖို့ မင်းတို့ ဆန္ဒရှိကြလား" ဟု ပြောသည်။

ထိုစကားကို ကြားသောအခါ ဆီးနှင်းနတ်ဆိုးစစ်သည်အုပ်စုသည် အချင်းချင်း ကြည့်လိုက်ကြပြီးနောက် ဘေးတွင် ရပ်နေသည့် ချန်ကျီရှင်းထံသို့ အကြည့်များ ရောက်သွားကြသည်။

သူ၏နဖူးပေါ်မှ စတုဂံပုံစံ ရေခဲကျောက်အမှတ်အသားကို မြင်လိုက်ရသောအခါ သူတို့သည် ဆီးနှင်းနတ်ဆိုးဘုရင်မကို ဦးညွှတ်လိုက်ကြသည်။

"ဘိုးဘေးရဲ့ အမိန့်အတိုင်း ကျွန်တော်တို့ ဆန္ဒရှိပါတယ်"

သူတို့၏ တုံ့ပြန်မှုကို မြင်သောအခါ ဆီးနှင်းနတ်ဆိုးဘုရင်မသည် ကျေနပ်စွာ ခေါင်းညိတ်လိုက်ပြီး အားနာနေသော ချန်ထျန်းလျန်ကို စောင်းကြည့်လိုက်သည်။

"သိပ်တော့ မကောင်းပါဘူး။ ဒါပေမဲ့ မင်းကတော့ သားကောင်းတစ်ယောက်ကို မွေးဖွားပေးနိုင်ခဲ့တယ်"

ချန်ထျန်းလျန်က ထိုနောက်ပြောင်မှုကို လက်ခံလိုက်သည်။

ဘာပဲဖြစ်ဖြစ် အနည်းငယ် အလှောင်ခံလိုက်ရပေမဲ့ နိဗ္ဗာနအဆင့်ရှိ လက်ထောက် ၈ ဦးကို ရလိုက်ခြင်းမှာ တကယ့်ကို ကံကောင်းခြင်းပင်။

ဇနီးသည်၏ နောက်လိုက်လက်ဆောင် ဖြစ်နေရင်တောင်မှပင်။

ဘယ်လိုပဲဖြစ်ဖြစ် ဇနီးသည်၏ နောက်လိုက်လက်ဆောင်ဆိုသည်မှာ သားဖြစ်သူ၏ လက်ဆောင်ပင်။

သူ့သား ချန်ကျီရှင်း တစ်ဦးတည်းသော သားဖြစ်သည့် ချန်ကျီရှင်း၏ ထူးချွန်ထက်မြက်မှုမှာ ဆီးနှင်းနတ်ဆိုးဘုရင်မ ပြောပြစရာမလိုဘဲ ကောင်းကင်အောက်ရှိ လူတိုင်း သိရှိပြီးသား ဖြစ်သည်။

သမိုင်းတစ်လျှောက် အထူးချွန်ဆုံး ပါရမီရှင်ဆိုသည်မှာ ချန်ကျီရှင်းကို လူတိုင်း သတ်မှတ်ထားသည့် အဓိပ္ပာယ်ပင်။

သန့်ရှင်းသောနယ်မြေများသို့ ဝင်ရောက်ရန် ငြင်းဆန်ခဲ့သည့် ချန်ကျီရှင်းအပေါ် လူအချို့မှာ ခံစားချက် အမျိုးမျိုး ရှိကြသော်လည်း သူ၏ တောက်ပမှုကို မည်သူမျှ မငြင်းဆိုနိုင်ပေ။

အဘယ်ကြောင့်ဆိုသော် ၁၈ နှစ်သားအရွယ်နှင့် နိဗ္ဗာနအဆင့်၇ ဆင့်... မဟုတ်ဘဲ အဆင့် ၈ သို့ ရောက်ရှိနေပြီ ဖြစ်သောကြောင့်ပင်။

ဆီးနှင်းနတ်ဆိုးဘုရင်မနှင့် ဆွေးနွေးပြီးနောက် ချန်ကျီရှင်းသည် ရေခဲမြေပြင်၌ ၃ ရက်ကြာ တရားကျင့်ကြံကာ နတ်ဘုရားခန်းမမှ ရရှိခဲ့သည့် အဇူရာဆီးနှင်း နတ်ဘုရားအနှစ်သာရကို စားသုံးပြီးနောက် နိဗ္ဗာနအဆင့်၈ ဆင့်သို့ အောင်မြင်စွာ တက်လှမ်းနိုင်ခဲ့သည်။

၁၈ နှစ်သားအရွယ်တွင် နိဗ္ဗာနအဆင့် ၈ ဆင့်သို့ ရောက်ရှိခြင်းမှာ မည်သူမျှ နှိုင်းယှဉ်၍ မရနိုင်သော ပါရမီမျိုးပင်။

သူသည် သမိုင်းတစ်လျှောက် အကြီးမြတ်ဆုံးသူ ဖြစ်သည်ဟု ပြောခြင်းမှာ လွန်ကဲသည်ဟု မဆိုနိုင်ပေ။

သို့သော် အဖွဲ့လိုက် ရေခဲမြေပြင်မှ ထွက်ခွာတော့မည့် အခိုက်အတန့်တွင် ဆီးနှင်းနတ်ဆိုးဘုရင်မက သတိပေးစကား ပြောလိုက်သည်။

"ကလေး... မင်းမှာ ရှားပါးတဲ့ ပါရမီတွေ ရှိပေမဲ့ အထွတ်အထိပ်အဆင့်ကို ကျော်ဖြတ်ပြီးပြီဆိုရင်တော့ သန့်ရှင်းသောနယ်မြေ သုံးခုနဲ့ ဆက်ဆံရေးကောင်းအောင် ထိန်းထားဖို့ လိုလိမ့်မယ်။ မင်းရဲ့ ထာဝရအသက်ရှည်ခြင်း လမ်းစဉ်က နောက်ဆုံးမှာ သူတို့လက်ထဲမှာ ရှိနေတာကိုး"

ချန်ကျီရှင်းက နားလည်ကြောင်း ပြသလိုက်ပြီးနောက် သူ့အဖွဲ့ကို ဦးဆောင်ကာ ရေခဲပြင်များမှတစ်ဆင့် ချန်မိသားစုဆီသို့ ပြန်လည် ထွက်ခွာလာခဲ့သည်။

ရွှေရောင်နဂါးစစ်သည်များ ဆွဲငင်ထားသော ရွှေရောင်ရေယာဉ်တန်းကြီးမှာ ကောင်းကင်ယံကို ဖြတ်သန်းသွားရာ သူတော်စင်ဘုရင်တစ်ပါး၏ ခရီးစဉ်ကဲ့သို့ နတ်ဘုရားများနှင့် ဗုဒ္ဓတို့၏ ရိုသေလေးစားမှုကို ရရှိသည်။

လက်ရှိတွင် ကန်းရွှမ်နယ်မြေရှိ ချန်မိသားစု၏ အမည်မှာ သန့်ရှင်းသောနယ်မြေ သုံးခု၏ အောက်တစ်ဆင့်တွင် ရှိနေပြီး အမြင့်ဆုံး အဆင့်သို့ ရောက်ရှိနေပြီ ဖြစ်သည်။

ကျန်းကျိုးမြို့ ချန်မိသားစု မဟုတ်တော့ဘဲ ယခုဆိုလျှင် တောင်ပိုင်းဒေသ ချန်မိသားစုဟု ခေါ်ဆိုရမည်ပင်။

ချန်မိသားစု၏ အကြီးအကဲဖြစ်သူ ချန်ကျီရှင်းသည် ယခုအခါ ကျန်းကျိုးမြို့မှ မှူးမတ်မိသားစုကိုသာမက တောင်ပိုင်းဒေသတစ်ခုလုံး၏ ကျင့်ကြံခြင်းစွမ်းအားနှင့် ထာဝရအသက်ရှည်ခြင်းအဆင့် မိသားစုများ၏ ခေါင်းဆောင်အဖြစ် ကိုယ်စားပြုနေသည်။

သူ၏ လှုပ်ရှားမှုတိုင်းကို မျက်စိပေါင်း မြောက်မြားစွာက စောင့်ကြည့်နေကြသည်။

ရေယာဉ်တန်းကြီး ကျန်းကျိုးမြို့သို့ နောက်ဆုံးတွင် ပြန်လည် ရောက်ရှိလာသည်။

ခရမ်းရောင် ရွှေတောင်ပေါ်တွင်။

ချန်ထျန်းလျန်သည် ၈ နှစ်အတွင်း ပုံပန်းသဏ္ဍာန် လုံးဝပြောင်းလဲသွားသည့် သူ၏ မိသားစုတောင်တံခါးကို ငေးကြည့်ရင်း စိတ်လှုပ်ရှားစွာဖြင့် ငေးမောနေသည်။

"ဒါက... ချန်မိသားစုရဲ့ ခရမ်းရောင် ရွှေတောင်လား"

ချန်ထျန်းလျန် ယုံမှားသံသယဖြစ်နေခြင်းမှာ အကြောင်းမဲ့ မဟုတ်ပေ။ ၈ နှစ်ကျော်ကာလအတွင်း ခရမ်းရောင် ရွှေတောင်၏ အသွင်အပြင်မှာ လုံးဝ ပြောင်းလဲသွားခဲ့သည်။

ဝိညာဉ်စွမ်းအင်များမှာ အရင်ကထက် နှစ်ဆပိုမိုထူထပ်လာရုံသာမက တောင်ထိပ်တိုင်းရှိ ရှားပါးရတနာများမှာလည်း သိသိသာသာ တိုးပွားလာသည်။

ချန်ထျန်းလျန် ထွက်ခွာသွားစဉ်ကထက် ချန်မိသားစု၏ ကျင့်ကြံသူများမှာလည်း များစွာ တိုးတက်ပြောင်းလဲသွားခဲ့သည်။

အရင်က ချန်ထျန်းလျန် ထွက်ခွာစဉ်က ချန်မိသားစုတွင် စစ်မှန်သော ကိုယ်ပိုင်နယ်ပယ် ကျင့်ကြံသူ တစ်ဒါဇင်ခန့်သာ ရှိခဲ့သော်လည်း ယခုတွင်မူ ခရမ်းရောင် ရွှေတောင်ပေါ်၌ ထိုကျင့်ကြံသူ တစ်ရာကျော် ရှိနေပြီဖြစ်သည်။

ချန်ထျန်းလျန် တစ်ယောက် မယုံမကြည်ဖြစ်နေခြင်းမှာ မဆန်းတော့ပေ။

"ဖေဖေ... ဖေဖေ အနှစ်နှစ်အလလ စောင့်ကြည့်နေခဲ့တာ ကျွန်တော် စီမံခန့်ခွဲပုံက ဘယ်လိုရှိလဲ" မိဘနှစ်ပါးကို လိုက်ပါပို့ဆောင်ပေးရင်း ချန်ကျီရှင်းက ပြုံးလျက် မေးသည်။

သူ၏ လက်ရှိအဆင့်တွင် အခြားသူများ၏ ချီးမွမ်းစကားမှာ အရေးမကြီးတော့သော်လည်း ချန်ကျီရှင်းနှင့် ယင်ရွှမ်းရွှမ်းတို့၏ အသိအမှတ်ပြုမှုမှာမူ သူ၏ နှလုံးသားကို အလွန်ပင် ရွှင်လန်းစေသည်။

"ဒါပေါ့... ဒါက တကယ့်ကို အံ့ဩစရာကောင်းလောက်အောင် ထူးခြားလွန်းတယ်"

လမ်းတစ်လျှောက်ရှိ ရှားပါးရတနာပေါင်း မြောက်မြားစွာကို ငေးကြည့်ရင်း ကောင်းကင်နှင့် မြေကြီး ဝိညာဉ်အမြစ်များဖြင့် ပြည့်နှက်နေသည့် သူတို့၏ တတိယမြောက် တောင်ထိပ်ကို မြင်ရသောအခါ ချန်ထျန်းလျန်နှင့် ဇနီးသည်တို့မှာ သူတို့၏ နေအိမ် ဟုတ်မဟုတ်ကိုပင် မယုံကြည်နိုင်အောင် ဖြစ်နေရတော့သည်။