အခန်း ၉၈

အခန်း (၉၈) လီဟူ၏ အံ့အားသင့်မှု

"သန်းရာချီ တန်တယ်… မိတ်ဆွေလေးစု… မင်း ဘာကို ဆိုလိုတာလဲ…"

အဘိုးဝမ် က နားမလည်နိုင်စွာဖြင့် မေးမြန်းလိုက်၏။

သေချာပေါက် သူတို့သည် အနောက်လမ်း ရှေးဟောင်းပစ္စည်းဈေးတန်း တွင် ယွမ်သန်းရာချီတန်သော ပစ္စည်းတစ်ခုကို ရှာဖွေတွေ့ရှိခဲ့ခြင်းတော့ မဖြစ်နိုင်ချေ။

ယခုအချိန်တွင် ရှေးဟောင်းပစ္စည်းဈေးတန်း ၌ သာမန်တန်ဖိုးရှိသော ပစ္စည်းတစ်ခုကို ဈေးပေါပေါဖြင့် ရရှိရန်ပင် ခက်ခဲနေပြီဖြစ်ရာ ယွမ်သန်းရာချီတန်သော ရတနာတစ်ခုကို ရှာဖွေတွေ့ရှိရန် ဆိုသည်မှာ ဝေလာဝေးပင် ဖြစ်သည်။

သူက ငါနဲ့ စီးပွားရေးအကြောင်း ဆွေးနွေးချင်နေတာများလားဟု အဘိုးဝမ် တွေးလိုက်မိ၏။

အဘိုးဝမ် စက္ကန့်အနည်းငယ်ခန့် စဉ်းစားပြီးနောက် ထိုသို့သာ ဖြစ်နိုင်ကြောင်း သဘောပေါက်သွားပေသည်။

"အဘိုးဝမ်… ဒီကနေ့ ရှေးဟောင်းပစ္စည်းနဲ့ လက်ရေးလှစာလိပ် ဈေးကွက်မှာ ဘယ်အနုပညာရှင်ရဲ့ လက်ရာတွေက အတန်ဖိုးအရှိဆုံးလဲဆိုတာ မေးချင်လို့ပါ…"

စုယွမ်က အလျင်အမြန် မေးမြန်းလိုက်သည်။

"ဟားဟား… ဘယ်သူ့ရဲ့ လက်ရေးလှစာလိပ်တွေနဲ့ ပန်းချီကားတွေက အတန်ဖိုးအရှိဆုံးလဲဆိုတာလား…"

"ဆိုရိုးစကားရှိတဲ့အတိုင်း ရှားပါးတဲ့အရာတွေက တန်ဖိုးရှိတာပေါ့ကွာ… ဥပမာပြောရရင် စုန့်မင်းဆက်က ဟွမ်ထင်ကျန်းရဲ့ လက်ရေးလှစာလိပ်တွေနဲ့ ပန်းချီကားတွေ… မင်မင်းဆက်က ပါရမီရှင်ကြီး ထန်ပေါ်ဟူရဲ့ ပန်းချီကားတွေဆိုရင် မိုးထိအောင် မြင့်မားတဲ့ ဈေးနှုန်းတွေနဲ့ လေလံတင်ရောင်းချခဲ့ရတယ်… တကယ်လို့ တစ်ယောက်ယောက်က သူတို့ရဲ့ ပန်းချီကား ဒါမှမဟုတ် လက်ရေးလှစာလိပ် တစ်ခုခုကို ပိုင်ဆိုင်ထားမယ်ဆိုရင် အနည်းဆုံး ယွမ်သန်းရာချီ တန်ကြေးရှိမှာပဲ…"

"ဘာလဲ… မိတ်ဆွေလေးစု ပြောနေတဲ့ ယွမ်သန်းရာချီတန်တဲ့ ပရောဂျက်ဆိုတာ ဒါကိုများ ပြောတာလား… ဒါမှမဟုတ် မိတ်ဆွေလေးစု က ဒီလို နာမည်ကြီး ပန်းချီကား ဒါမှမဟုတ် လက်ရေးလှစာလိပ် တစ်ခုခုကို ပိုင်ဆိုင်ထားလို့လား…"

"ဒီပန်းချီကားတွေက အလွန်ကို ရှားပါးတယ်… မိတ်ဆွေလေးစု က ဒီနေရာမှာ တိုက်ဆိုင်စွာနဲ့များ ရှာတွေ့ခဲ့တာတော့ မဟုတ်ပါဘူးနော်…"

အဘိုးဝမ် က ပြုံးလျက် ပြောဆိုလိုက်၏။

ဤစကားကို ကြားချိန်တွင် စုယွမ် အနည်းငယ် ပြုံးလိုက်သော်လည်း စကားများများစားစား မဆိုခဲ့ချေ။ သူသည် စားပွဲပေါ်တွင် ဖြန့်ထားသော ပန်းချီကားဆီသို့ ကင်မရာကို တိုက်ရိုက် ချိန်ရွယ်လိုက်ပြီးနောက် မေးမြန်းလိုက်ပေသည်။

"အဘိုးဝမ်… ဒီပန်းချီကားရဲ့ တန်ဖိုးကို ခင်ဗျား ဘယ်လိုထင်လဲ…"

"ဟားဟားဟား… အဲဒါက ဘာကိုဆိုလိုတာလဲဆိုတော့…"

တစ်ချက်ကြည့်ရုံဖြင့် အဘိုးဝမ် က စုယွမ် ဝယ်ယူထားသော အရည်အသွေးမြင့် ပုံတူကူးယူထားသည့် ပန်းချီကားတစ်ချပ်ဟု ထင်မှတ်ခဲ့သော်လည်း အသေအချာ စစ်ဆေးကြည့်ချိန်တွင် ထိုပန်းချီကားသည် တစ်ချက်တည်းဖြင့် ပြီးပြည့်စုံစွာ ရေးဆွဲထားပြီး အလွန်အမင်း ချောမွေ့သော ရစ်သမ်တစ်ခု ရှိကာ ဈေးကွက်တွင် တစ်ကြိမ်တစ်ခါမျှ မမြင်တွေ့ဖူးသေးသော အမျိုးအစားတစ်ခု ဖြစ်နေပေ၏။

အသေအချာ စစ်ဆေးကြည့်ပြီးနောက် အဘိုးဝမ် သည် ရုတ်တရက် တည်ငြိမ်မှုများ ပျောက်ဆုံးသွားပြီး ထန်ပေါ်ဟူ၏ ပန်းချီကားကို လက်ညှိုးထိုးကာ သူ၏ ခန္ဓာကိုယ်တစ်ခုလုံး စိတ်လှုပ်ရှားမှုကြောင့် တုန်ရီနေတော့သည်။

"ဘုရားရေ…"

"ဘာတွေဖြစ်နေတာလဲ…"

"ဒီစိတ်ဝိညာဉ်… ဒီစုတ်ချက်တွေ… တစ်ခုလုံးရဲ့ ချောမွေ့နေတဲ့ အချိတ်အဆက်တွေ…"

"တောက်…"

ပုံမှန်အားဖြင့် ယဉ်ကျေးပြီး လေးစားခံရသော သက်ကြီးရွယ်အိုတစ်ဦးဖြစ်သည့် အဘိုးဝမ် သည် ရုတ်တရက် ဆက်တိုက် ဆဲဆိုနေတော့၏။

"ပြီးပြည့်စုံတဲ့ လက်မှတ်တစ်ခုပါဝင်တဲ့ ထန်ပေါ်ဟူရဲ့ စစ်မှန်တဲ့ လက်ရာတစ်ခု… ဝိုး…"

အဘိုးဝမ် သည် ဗီဒီယိုဖုန်းခေါ်ဆိုမှု၏ အခြားတစ်ဖက်မှ ပန်းချီကားကို ဂရုတစိုက် စစ်ဆေးကြည့်ရှုနေပြီး အချိန်အတော်ကြာသည့်တိုင်အောင် သူ၏ ခန္ဓာကိုယ်အတွင်း၌ အပူလှိုင်းများ ဖြတ်ပြေးနေသည်ကို ခံစားနေရဆဲပင် ဖြစ်သည်။

"မိတ်ဆွေလေးစု… ဒီ ထန်ပေါ်ဟူရဲ့ စစ်မှန်တဲ့ ပန်းချီကားကို မင်း ဘယ်ကနေ ရလာတာလဲ…"

"ဒါကလည်း ရှေးဟောင်းပစ္စည်းဈေးတန်း မှာ ဈေးပေါပေါနဲ့ ရလာတာလို့တော့ ငါ့ကို မပြောလိုက်နဲ့နော်…"

အဘိုးဝမ် က မျက်နှာပေါ်တွင် အံ့အားသင့်မှုများ အပြည့်ဖြင့် ပြောဆိုလိုက်လေသည်။ သူသည် ရှေးဟောင်းပစ္စည်းဈေးတန်း သို့ မကြာခဏ သွားရောက်လေ့ရှိပြီး ဤစစ်မှန်သော လက်ရာသည် ထိုနေရာမှ ဈေးပေါပေါဖြင့် ရရှိခဲ့ခြင်းသာ တကယ်ဖြစ်နေပါက ၎င်းသည် အလွန်တရာ အံ့သြဖွယ်ကောင်းလှပေလိမ့်မည်။

အကယ်၍ ထိုသို့သာ ဖြစ်ခဲ့ပါက ရှေးဟောင်းပစ္စည်းဈေးတန်း တစ်ခုလုံးကို တုန်လှုပ်သွားစေမည့် ကြီးမားသော သတင်းကြီးတစ်ခု ဖြစ်လာမည်ဖြစ်ပြီး ကျန်းချန် ရှေးဟောင်းပစ္စည်းဈေးတန်း သည် ကမ္ဘာပေါ်တွင် အကျော်ကြားဆုံးသော ရှေးဟောင်းပစ္စည်းဈေးတန်း ဖြစ်လာပေတော့မည်။

"မဟုတ်ပါဘူး…"

စုယွမ်က ဖြည်းညင်းစွာ ပြောဆိုလိုက်၏။

ဤစကားကို ကြားချိန်မှသာ အဘိုးဝမ် အနည်းငယ် စိတ်သက်သာရာ ရသွားတော့သည်။ ထန်ပေါ်ဟူ၏ ပန်းချီကားများသည် အလွန်အမင်း ရှားပါးလှပြီး ဤကဲ့သို့သော လက်ရာမြောက် ပန်းချီကားတစ်ချပ်ကို ဈေးပေါပေါဖြင့် ရှာဖွေတွေ့ရှိနိုင်မည်ဆိုပါက ၎င်းသည် တကယ်ကို…

သေချာပေါက် ရှေးဟောင်းပစ္စည်းလောကတွင် ဆယ်စုနှစ်များစွာ ကျင်လည်ခဲ့ပြီးသည့်တိုင် ဤမျှ ရှားပါးသော ပစ္စည်းမျိုးကို သူ ရှာမတွေ့ခဲ့ဖူးချေ။ ငယ်ရွယ်သော စုယွမ်က မည်သို့လုပ်၍ ထိုသို့ စွမ်းဆောင်နိုင်မည်နည်း။

ဤအချက်ကို တွေးမိချိန်တွင် အဘိုးဝမ် သည် များစွာ ပို၍ တည်ငြိမ်သွားပေ၏။ အခြားသူများ ကောင်းစားနေသည်ကို သူ မကြည့်ရက်ခြင်း မဟုတ်ဘဲ သူ၏ အသက်အရွယ်နှင့် ဂုဏ်သတင်းတို့ဖြင့် လူငယ်တစ်ယောက်၏ အကြိမ်ကြိမ် အနိုင်ယူခံရခြင်းက အလွန်အမင်း အရှက်ရဖွယ်ကောင်းသည်ဟု သူ ခံစားရသောကြောင့်ပင်။

ထို့ကြောင့် ဤစကားကို ကြားရချိန်တွင် အဘိုးဝမ် အနည်းငယ် စိတ်သက်သာရာ ရသွားခဲ့လေသည်။

"ဟားဟား… မင်းက တကယ် ကံကောင်းတဲ့ ကောင်လေးပဲ… မင်းက မင်းမိသားစုအမွေအနှစ် ပန်းချီကားကို တကယ်ပဲ ရအောင် ယူနိုင်ခဲ့တာပဲ… မင်းက ဒါကို တကယ်ပဲ လက်လွှတ်ရက်လို့လား…"

အဘိုးဝမ် က မေးမြန်းလိုက်သည်။

"အင်း… ဒီပန်းချီကားက ကျွန်တော့်မိသားစုရဲ့ အမွေအနှစ် မဟုတ်ပါဘူး…"

စုယွမ်က ပြောဆိုလိုက်၏။

"ဟမ်… မင်းမိသားစုရဲ့ အမွေအနှစ် မဟုတ်ဘူးပေါ့… မင်းက ဒါကို တခြားတစ်နေရာကနေ ဈေးကြီးကြီးပေးဝယ်ပြီးတော့ ငါ့ကို လာပြတာလား…"

အဘိုးဝမ် က သံသယဖြင့် မေးမြန်းလိုက်သည်။

"မဟုတ်ပါဘူး… ဒီပန်းချီကားကို ရှေးဟောင်းပစ္စည်းဈေးတန်း ကနေ ရခဲ့တာ မဟုတ်ပါဘူး… တခြားနေရာကနေ ရခဲ့တာပါ… ရှေးဟောင်းပစ္စည်းဈေးတန်း အကြောင်းကို ခင်ဗျား သိပါတယ်… သူတို့ဆီမှာ ဒီပန်းချီကား ရှိနေဖို့ဆိုတာ လုံးလုံးလျားလျား မဖြစ်နိုင်ပါဘူး…"

စုယွမ်က တည်ငြိမ်စွာ ပြောဆိုလိုက်ပေသည်။

"ဟားဟားဟား… ငါ သိသားပဲ…"

အဘိုးဝမ် ၏ စကားလုံးများ ဆို့နင့်သွားပြီး သူ၏မျက်နှာပေါ်တွင် အံ့အားသင့်မှုများ တစ်ဖန် ပြန်လည်ထွက်ပေါ်လာပြန်၏။

မင်းက တခြားနေရာကနေ တိုက်ဆိုင်စွာနဲ့ ရှာတွေ့ခဲ့တာလား… ဒါက ဈေးပေါပေါနဲ့ ရခဲ့တာပဲ မဟုတ်ဘူးလား… ဈေးပေါပေါနဲ့ ရခဲ့တဲ့ နေရာက တကယ်ပဲ အဲဒီလောက် အရေးကြီးနေလို့လားဟု အဘိုးဝမ် တွေးမိလိုက်သည်။

ဤပစ္စည်းကို ဈေးပေါပေါဖြင့် ရရှိရန်ဆိုသည်မှာ မျက်စိလျင်ရုံဖြင့် မရနိုင်ချေ။ မယုံနိုင်လောက်အောင် ကံကောင်းမှု၊ အနိုင်ယူ၍မရနိုင်သော စိတ်ဓာတ်နှင့် လုံးဝထက်မြက်မှုတို့ ရှိမှသာ ရရှိနိုင်မည် ဖြစ်ပေ၏။

ဤပန်းချီကားနှင့်သာ မျက်နှာချင်းဆိုင် တွေ့ကြုံလိုက်ရမည်ဆိုပါက တစ်သက်လုံး စိတ်တည်ငြိမ်မှုကို ထိန်းသိမ်းလာခဲ့သူ တစ်ယောက်ပင်လျှင် စိတ်လှုပ်ရှားမှု မဖြစ်ဘဲ နေနိုင်တော့မည် မဟုတ်ချေ။

အရောင်းအဝယ် ပြုလုပ်နေစဉ်အတွင်း ဝယ်ယူသူ၏ သေးငယ်သော လှုပ်ရှားမှုလေးတိုင်းကို ရောင်းချသူက မြင်တွေ့နိုင်ပေသည်။

ဤအကြောင်းကို တွေးမိချိန်တွင် အဘိုးဝမ် သည် စုယွမ်၏ စွမ်းဆောင်ရည်များအပေါ် နက်ရှိုင်းသော လေးစားမှုများ မဖြစ်ပေါ်ဘဲ မနေနိုင်တော့ချေ။

"ဟူး… အိုလာပြီဆိုတာ အိုလာတာပါပဲ… ငြင်းလို့မရတော့ဘူး…"

"နောက်ဆုံးတော့ မျိုးဆက်သစ်တွေက မျိုးဆက်ဟောင်းတွေကို ကျော်လွန်သွားပြီး လှိုင်းတစ်လုံးထက် တစ်လုံး ပိုမြင့်လာတယ်ဆိုတာ တကယ်မှန် တာပဲ…"

"မိတ်ဆွေလေးစု… ငါတော့ မင်းကို လုံးလုံးလျားလျား အထင်ကြီးသွားပြီ…"

"မင်းရဲ့ ပန်းချီကားက လေလံပွဲမှာဆိုရင် အရမ်းမြင့်မားတဲ့ ဈေးနှုန်းတစ်ခု တန်ကြေးရှိတယ်… ငါက ဝယ်ချင်ပေမဲ့ ဝယ်နိုင်စွမ်းတော့ မရှိဘူး…"

အဘိုးဝမ် က သက်ပြင်းချလျက် ပြောဆိုလိုက်၏။

"ဟားဟား… အဘိုးဝမ်… ခင်ဗျားက အရမ်းနှိမ့်ချလွန်းနေပါပြီ… ကျွန်တော်က ကံကောင်းသွားရုံပါ… ခင်ဗျားနဲ့ ကြိုးတူပူးပေါင်းချင်လို့ ကျွန်တော် ဖုန်းဆက်လိုက်တာပါ…"

"အဘိုးဝမ် က ရှေးဟောင်းပစ္စည်းလောကမှာ အကြီးအကဲတစ်ယောက်ဖြစ်ပြီး အဆက်အသွယ်တွေကလည်း သဘာဝကျကျပဲ အလွန်ကျယ်ပြန့်တယ်လေ… ကျွန်တော့်ရဲ့ အဓိက ရည်ရွယ်ချက်က အဘိုးဝမ် ကို ကြားခံအဖြစ် ဆောင်ရွက်ပေးဖို့နဲ့ ဒီပန်းချီကားကို အမြန်ဆုံး လေလံပွဲဆီ ရောက်သွားအောင် လုပ်ပေးဖို့ပါ… ဒါမှ အမြန်ရောင်းထွက်မှာလေ…"

စုယွမ်က ပြောဆိုလိုက်သည်။

"အိုး… မိတ်ဆွေလေးစု စီစဉ်ထားတာက အဲဒီလိုကိုး… အဓိပ္ပာယ်ရှိတာပဲ…"

"ပြည်တွင်း ပြည်ပမှာရှိတဲ့ လေလံရုံ ပိုင်ရှင်များကြီးကို ငါ တကယ်ပဲ သိထားတယ်… ပြီးတော့ ဒီပစ္စည်းကို လေလံပွဲဆီ ရောက်သွားအောင် လုပ်ပေးနိုင်တဲ့ စွမ်းရည်လည်း ငါ့မှာ ရှိတယ်…"

အဘိုးဝမ် ၏ လေသံမှာ တည်ကြည်လေးနက်သွားပေ၏။

ယနေ့ခတ်အထိ ထန်ပေါ်ဟူ၏ အတန်ဖိုးအရှိဆုံး ပန်းချီကားများသည် ဒေါ်လာ ဘီလီယံနှင့်ချီ၍ လေလံတင်ရောင်းချခဲ့ရပြီး အပေါဆုံး ပန်းချီကားများပင်လျှင် သန်းဆယ်ဂဏန်းချီ၍ တန်ကြေးရှိနေဆဲပင် ဖြစ်သည်။

ဤပန်းချီကားသည် ရှင်းလင်းစွာပင် ထန်ပေါ်ဟူ၏ အလယ်အလတ်မှ အမြင့်ဆုံး အရည်အသွေးရှိသော လက်ရာတစ်ခု ဖြစ်ပေ၏။ ရှေးဟောင်းပစ္စည်းများနှင့် နှစ်ပေါင်းများစွာ ထိတွေ့ဆက်ဆံခဲ့သော အဘိုးဝမ် အနေဖြင့် ဤပန်းချီကားကို ဝယ်ယူသူထံမှ တိုက်ရိုက် ဝယ်ယူမည်ဆိုပါက ယွမ်သန်း ၂၀၀ နီးပါး ရရှိနိုင်မည်ကို သိရှိထားလေသည်။ အကယ်၍ လေလံပွဲတွင်သာ ရောင်းချမည်ဆိုပါက ဈေးနှုန်းက ပို၍သာ မြင့်မားသွားပေလိမ့်မည်။

ထို့ကြောင့် ဤကိစ္စကို အဘိုးဝမ် တည်ကြည်လေးနက်စွာ ကိုင်တွယ်ရုံမှလွဲ၍ အခြားရွေးချယ်စရာ မရှိတော့ချေ။

"မိတ်ဆွေလေးစု… ငါက ဒီပန်းချီကားရဲ့ စစ်မှန်မှုကို ဗီဒီယိုကနေပဲ ဆုံးဖြတ်နိုင်တယ် ဆိုပေမဲ့ ဒါက အရမ်းအရေးကြီးတဲ့ ကိစ္စဖြစ်နေလို့ တကယ့် ပစ္စည်းအစစ်ကို လူကိုယ်တိုင် လာကြည့်ချင်သေးတယ်…"

အဘိုးဝမ် က ပြောဆိုလိုက်၏။

"ဒါပေါ့..ဒါက သဘာဝကျပါတယ်…"

"ဒီပန်းချီကားကို အပြင်ထုတ်သွားရင် တစ်ခုခုဖြစ်သွားမှာကို ကျွန်တော် စိုးရိမ်လို့ပါ… အဘိုးဝမ် ပဲ ဒီကိုလာပြီး ကိုယ်တိုင် လာကြည့်ရင်ရော ဘယ်လိုလဲ…"

စုယွမ်က ပြောဆိုလိုက်သည်။

"ကောင်းပြီ… ငါ လာခဲ့မယ်… မိတ်ဆွေလေးစု… ကျေးဇူးပြုပြီး မင်းရဲ့ တည်နေရာကို ပို့ပေးနိုင်မလား…"

အဘိုးဝမ် က ပြန်လည်ဖြေကြားလိုက်၏။

"ကျွန်တော် အခု ပန်းရှန် ဗီလာဧရိယာ က ဗီလာအမှတ် (၆) မှာ ရှိနေတယ်… အဘိုးဝမ် အချိန်မရွေး လာလို့ရပါတယ်…"

စုယွမ်က ဆက်လက်ပြောဆိုလိုက်သည်။

"ကောင်းပြီ… အချိန်ထပ်မဖြုန်းတော့ဘူး… မိတ်ဆွေလေးစု ခဏစောင့်နေ… ငါ အခုပဲ လာခဲ့မယ်…"

"အနည်းဆုံး ယွမ်သန်း ၂၀၀ တန်ကြေးရှိတဲ့ လက်ရာမြောက် ပန်းချီကားတစ်ချပ်ပဲ… မိတ်ဆွေလေးစု… ငါ အခုပဲ မင်းကို ဂုဏ်ပြုလိုက်ပါတယ်…"

သူတို့နှစ်ဦး စကားအနည်းငယ် ဖလှယ်ပြီးနောက် ဖုန်းချသွားကြလေသည်။ စုယွမ် သက်ပြင်းတစ်ချက် ချလိုက်၏။ ဤကိစ္စကို အဘိုးဝမ် က ကိုင်တွယ်ဖြေရှင်းပေးမည်ဆိုပါက ၎င်းသည် ပြီးပြည့်စုံသော ရလဒ်တစ်ခုပင် ဖြစ်ပေသည်။

ဘေးဘက်သို့ ကြည့်လိုက်ချိန်တွင် လီဟူ၏ မျက်နှာအမူအရာသည် လုံးလုံးလျားလျား ဗလာကျင်းနေပြီး ကြီးစွာသော တုန်လှုပ်မှုကို ခံစားလိုက်ရသည့်အလား ဖြစ်နေကြောင်း စုယွမ် ရုတ်တရက် သတိပြုမိလိုက်သည်။

"သူဌေး… သူဌေး ဆိုလိုတာက… ဒီပန်းချီကားက… ယွမ်သန်း ၂၀၀ တန်တယ်လို့ ပြောတာလား…"

လီဟူက ပန်းချီကားကို ကြည့်ရင်း အံ့အားသင့်စွာဖြင့် ပြောဆိုလိုက်လေ၏။