အခန်း ၁၀၆

အခန်း (၁၀၆) မျှော်လင့်ထားသည့်အတိုင်းပင်

စမ်းသပ်မှုများ တိုးတက်လာသည်နှင့်အမျှ တိုက်ရိုက်ထုတ်လွှင့်မှု ကြည့်ရှုသူဦးရေမှာ တစ်သိန်းကျော်အထိ လျင်မြန်စွာ မြင့်တက်လာပြီး တစ်ချိန်တည်း ကြည့်ရှုသူဦးရေ အမြင့်ဆုံးအမှတ်မှာ တစ်သန်းကိုပင် ကျော်လွန်သွားခဲ့လေ၏။

မရေမတွက်နိုင်သော ကွန်မင့်များက ဖန်သားပြင်ပေါ်တွင် ပြည့်နှက်သွားပြီး ချက်ဘောက်စ်တစ်ခုလုံးကို ချက်ချင်း လွှမ်းမိုးသွားတော့သည်။

[ခွန်းခွန်း - ဘုရားရေ... Ar နည်းပညာကုမ္ပဏီက ဘယ်လိုတွေတောင် ဖြစ်နေတာလဲ... သူတို့က ဒီလောက် အစွမ်းထက်တဲ့ ဉာဏ်ရည်တုနည်းပညာကို သတ်မှတ်ချိန်ထက်စောပြီး တီထွင်နိုင်ခဲ့တာပဲ... Tencent နဲ့ Alibaba တို့တောင် ဒီလို မလုပ်နိုင်သေးဘူး...]

[ဝမ်ကျိုင် ကျိုးယွီ - မိုက်တယ်ဟ... တကယ်ကို အံ့ဩစရာကောင်းလိုက်တာ... ဒီတစ်ခါတော့ ငါတို့ နိုင်ငံရဲ့ AI နည်းပညာက ရုတ်တရက်ဆိုသလို နာမည်ကျော်ကြားလာပြီပဲ... တကယ်ကို စိတ်လှုပ်ရှားစရာ ကောင်းတဲ့ကိစ္စပါလား...]

[စပ်စပ်မွှေးမွှေး ကျူးကဲ - ဒီဆော့ဖ်ဝဲလ်က မကြာခင် ထွက်လာတော့မှာမလား... စမ်းသုံးကြည့်ဖို့တောင် မစောင့်နိုင်တော့ဘူး...]

[ကြိုးသိုင်းလက်သီး - ဂုဏ်ပြုပါတယ်... အလကားနေ ကျပန်း နှိပ်ဝင်ကြည့်လိုက်တာ ဒီလိုရလဒ်မျိုး တွေ့ရမယ်လို့ တစ်ခါမှ မထင်ထားခဲ့ဘူး...]

ကမ္ဘာကို ဦးဆောင်နိုင်မည့် အရာတစ်ခုအား အောင်မြင်စွာ တီထွင်နိုင်ခဲ့ခြင်းမှာ အလွန်စိတ်လှုပ်ရှားဖွယ် ကောင်းလှသဖြင့် လူများစွာသည် Ar နည်းပညာကုမ္ပဏီ၏ သတင်းစာရှင်းလင်းပွဲကို ကြည့်ရှုပြီးနောက် ဂုဏ်ယူဝင့်ကြွားနေခဲ့ကြ၏။ သို့သော် ချီးကျူးမှုများနှင့်အတူ ဝေဖန်မှုများကလည်း ယှဉ်တွဲလျက် ရှိနေပေသည်။

[ကလေးပေါက်စ - ဟီးဟီး... မင်းတို့တွေက တကယ်ကို ရယ်ရတာပဲ... သေချာတာကတော့ ဘယ်သူမှ အမှန်တရားကို ပြောနေတာ မဟုတ်ဘူးမလား...]

[အစိမ်းရောင် တွားသွားကောင် - ဟုတ်တယ်... သူတို့က ဒီနည်းပညာကို ဘာကြိုတင်သတိပေးချက်မှ မရှိဘဲ ဖြန့်ချိလိုက်တာလေ... အဲဒါက ဖြစ်နိုင်တယ်လို့ မင်းတို့ ထင်နေကြတာလား...]

[ဝမ်ဝမ် ရှောင်ချောင် - ကွက်တိပဲ... Ar နည်းပညာကုမ္ပဏီလို ကုမ္ပဏီသေးသေးလေးက ဒီလိုလုပ်နိုင်တယ်ဆိုတာ တကယ်ကို ရယ်စရာကောင်းလိုက်တာ... သူတို့ဆီမှာ ဒီလိုရလဒ်မျိုးတွေ တီထွင်နိုင်တယ်ဆိုတာကို ငါတော့ မယုံဘူး... ဒီအောက်ခြေအဆင့် လူတွေက လှည့်စားခံရတာ အရမ်းလွယ်လွန်းတယ်... စကားအနည်းငယ်လေးနဲ့တင် သူတို့တွေ လုံးလုံးလျားလျား ယိမ်းယိုင်သွားကြပြီ... ရယ်စရာကောင်းလိုက်တာ...]

[အပြာရောင် ဂတ်လင်သေနတ် - ဒါသာ တကယ်ဆိုရင် ငါ လက်ထောက်ပြီး ချီးစားပြမယ်... ငါတို့ တကယ်ကို ကြီးကြီးမားမား အနိုင်ရလိုက်ပြီ...]

မလိုလားအပ်သော ကွန်မင့်အချို့လည်း စတင်ပျံ့နှံ့လာခဲ့သည်။ မည်သို့ပင်ဆိုစေကာမူ ယခင်က တစ်ကြိမ်တစ်ခါမျှ မကြားဖူးခဲ့သော Ar နည်းပညာကုမ္ပဏီကဲ့သို့ ကုမ္ပဏီငယ်လေးတစ်ခုအနေဖြင့် ဤသို့သော ရလဒ်မျိုးကို ထုတ်ဖော်ပြသနိုင်မည်မှာ သဘာဝကျကျပင် အလွန် သံသယဝင်စရာ ကောင်းနေပေ၏။

ဤသို့ မှတ်ချက်ပေးသူများထဲမှ အချို့မှာ တမင်သက်သက် သွေးခွဲရန် ကြိုးပမ်းနေကြခြင်းဖြစ်ပြီး အခြားသူများမှာမူ သူတို့၏ လမ်းလွဲမှုနောက်သို့ ပါသွားကာ သဘောတူညီသည့်အနေဖြင့် သူတို့၏ ထင်မြင်ချက်များကို ဖော်ပြနေကြခြင်းပင် ဖြစ်သည်။

[ဇာဖစ် - ဟား... မင်းတို့ကောင်တွေပဲ မယုံကြတာ... ဒါက အစစ်အမှန်ဖြစ်တယ်ဆိုတာ ယုံကြည်ဖို့ အဲဒီလောက်တောင် ခက်ခဲနေလို့လား...]

[မာလုံ - ဘာပဲဖြစ်ဖြစ် ဆော့ဖ်ဝဲလ်က မကြာခင် ထွက်လာတော့မှာလေ... ကမ္ဘာ့ထိပ်တန်းအဆင့် ဟုတ်မဟုတ်ဆိုတာ လူတိုင်း စမ်းသုံးကြည့်တာနဲ့ သိသွားကြမှာပဲကို...]

[လီရှောင်ယောင် - ငါ သေချာပေါက် အသေးစိတ် စမ်းသပ်ကြည့်မယ်... ပြီးတော့ ဒီလူတွေရဲ့ မျက်နှာကို ဖြတ်ရိုက်ဖို့ ဗီဒီယိုတစ်ခု တင်လိုက်မယ်...]

[ကိုင်ဇာ - ဟက်... မသိနားမလည်တဲ့ အရူးတွေ... ငါ့မျက်နှာကို မင်းတို့ ဘယ်လိုလာရိုက်မလဲဆိုတာ စောင့်ကြည့်နေမယ်...]

[စတော့ရှယ်ယာအကြောင်း နားမလည်ဘူး - ဘုရားရေ... မင်းတို့အနေနဲ့ မှားယွင်းကြောင်း သက်သေပြဖို့ ဗီဒီယိုတွေ တင်နေစရာတောင် မလိုတော့ဘူး ထင်တယ်... Ar နည်းပညာကုမ္ပဏီရဲ့ စတော့ရှယ်ယာတွေ အခု ဒုံးပျံလို ထိုးတက်နေပြီဟေ့...]

ဤကွန်မင့်ကို ပို့လိုက်သည်နှင့် တစ်ပြိုင်နက် လူအများအပြားသည် Ar နည်းပညာကုမ္ပဏီ၏ စတော့ရှယ်ယာများကို ချက်ချင်း အာရုံစိုက်လာကြတော့၏။

ရုတ်တရက် Ar နည်းပညာကုမ္ပဏီ၏ စျေးကွက်တန်ဖိုးမှာလည်း ရူးသွပ်လုမတတ် နှုန်းထားတစ်ခုဖြင့် ထိုးတက်သွားခဲ့ပြီး မရေမတွက်နိုင်သော ရင်းနှီးမြှုပ်နှံသူများနှင့် ကုန်သည်များ စီးဝင်လာခဲ့ကြလေသည်။

ဤရုတ်တရက် အခြေအနေက လူတိုင်းကို မျှော်လင့်မထားသော အနေအထားသို့ ရောက်ရှိသွားစေခဲ့၏။

Ar နည်းပညာကုမ္ပဏီ၏ သတင်းစာရှင်းလင်းပွဲနှင့် ပတ်သက်၍ အမှန်တရားကို မသိရသေးသော်လည်း ငွေကြေးအရင်းအနှီးမြှုပ်နှံ့သူများ၏ ထက်မြက်လှသော အမြင်အာရုံမှာမူ သံသယဝင်စရာ မရှိချေ။

[ဘေလ် - ဘုရားရေ... ငါက ဝါရင့် စတော့ရှယ်ယာ ရင်းနှီးမြှုပ်နှံသူ တစ်ယောက်ပဲ... ဒီနှုန်းအတိုင်းဆိုရင် Ar နည်းပညာကုမ္ပဏီရဲ့ စတော့ရှယ်ယာတွေက ဆက်တိုက် မြင့်တက်လာတော့မှာ... မဖြစ်ဘူး... ငါ ဆက်ပြီး တွန့်ဆုတ်နေလို့ မရတော့ဘူး... အခု ချက်ချင်း ဝယ်မှဖြစ်မယ်...]

စတော့ဈေးကွက် ဖွင့်ပြီး နှစ်နာရီအကြာမှာပင် Ar နည်းပညာကုမ္ပဏီ၏ စတော့ရှယ်ယာများသည် နေ့စဉ် အမြင့်ဆုံးသတ်မှတ်ချက်သို့ ရောက်ရှိသွားခဲ့ရာ လူတိုင်းကို ချက်ချင်း ဆွံ့အသွားစေခဲ့လေ၏။

[လီလီ - ဘုရားရေး... ငါ မြင်တာ မှန်ရဲ့လား... ငါ တောင်တက်နေတုန်းမှာ စတော့ရှယ်ယာတွေက နေ့စဉ် အမြင့်ဆုံးသတ်မှတ်ချက်ကို ရောက်သွားတာလား...]

[ခွေးကလေး - ဘုရားရေ... ငါ အရမ်း နှေးသွားခဲ့တယ်... မိသားစုတို့ရေ... ဒါက ငါ့အတွက် အရမ်းကို ခက်ခဲလွန်းတယ်...]

[မစ္စတာ ဒေးဗစ်ဒေး - အို... မင်းတို့ ဘယ်လိုလုပ်သင့်တယ်လို့ ထင်လဲ... Ar နည်းပညာကုမ္ပဏီကို Blacklist သွင်းပစ်လိုက်ရမလား...]

Ar နည်းပညာကုမ္ပဏီ၏ စတော့ရှယ်ယာဈေးနှုန်းများ ထိုးတက်သွားသည်နှင့်အမျှ လူများစွာသည် သတင်းစာရှင်းလင်းပွဲ၏ အကြောင်းအရာများကို ယုံကြည်လာခဲ့ကြပြီး ယခင်က လှောင်ပြောင်ခဲ့ကြသူများမှာမူ တိတ်ဆိတ်သွားကြကာ စကားတစ်ခွန်းမျှ ထပ်မပြောတော့ချေ။

[ခွေးကလေး - Ar နည်းပညာကုမ္ပဏီရဲ့ အဲဒီသူဌေးကြီးက ဘယ်သူများလဲ... သူက အမြော်အမြင် အရမ်းကြီးမားတာပဲ... ဒီတစ်ခေါက်တော့ သူ သေချာပေါက် ချမ်းသာသွားတော့မှာ... တကယ်လို့ ငါတို့သာ နေရာချင်း လဲလိုက်မယ်ဆိုရင် ငါ သူ့ကို တပည့်အဖြစ် လက်ခံလိုက်မယ်...]

[ဆရာကော - ကြည့်စမ်း... တစ်ယောက်ယောက်က တင်လိုက်ပြီ... Ar နည်းပညာကုမ္ပဏီရဲ့ လျှို့ဝှက်ဆန်းကြယ်တဲ့ အဓိကရှယ်ယာရှင် နာမည်က စုယွမ်တဲ့... ဒါက ငါတို့ နိုင်ငံရဲ့ အလွန်ချမ်းသာတဲ့ သူဌေးကြီးအသစ်တစ်ယောက် ဖြစ်လာတော့မှာပဲ...]

[ဂါဇီ - ဝိုး... နောက်ထပ် ရက်အနည်းငယ်လောက် စောင့်လိုက်မယ်ဆိုရင် Ar နည်းပညာကုမ္ပဏီရဲ့ အဓိကရှယ်ယာရှင် စုယွမ်ဟာ အချမ်းသာဆုံးစာရင်းရဲ့ ထိပ်တန်း (၁၀၀) စာရင်းထဲ ဝင်လာနိုင်တယ်နော်...]

ချက်ချင်းဆိုသလိုပင် လျှို့ဝှက်ဆန်းကြယ်သော သူဌေးကြီး စုယွမ်နှင့်ပတ်သက်သည့် သတင်းများက တစ်ခုပြီးတစ်ခု ထွက်ပေါ်လာခဲ့လေ၏။ လိုင်း (၁) ပေါ်တွင် တင်ထားသော ပို့စ်တစ်ခုမှာ ချက်ချင်းပင် ကြည့်ရှုသူ တစ်သိန်းကျော်နှင့် လိုက်ခ် သောင်းချီ၍ ရရှိသွားခဲ့သည်။

စုယွမ် ဆိုသော နာမည်သည် နည်းပညာလုပ်ငန်းနယ်ပယ် တစ်ခုလုံးတွင် ပျံ့နှံ့သွားခဲ့ပြီး ကုမ္ပဏီကြီးများစွာ၏ စီအီးအိုများက စုယွမ်၏ အဆက်အသွယ် သတင်းအချက်အလက်များကို ရှာဖွေရန် သူတို့၏ လက်အောက်ငယ်သားများကို ခိုင်းစေနေကြတော့၏။

အချိန်တိုအတွင်းမှာပင် ဗီဒီယိုတို ပလက်ဖောင်းတစ်ခုလုံးသည် Ar နည်းပညာကုမ္ပဏီနှင့် လျှို့ဝှက်ဆန်းကြယ်သော သူဌေးကြီး စုယွမ်အကြောင်းကိုသာ သတင်းဖော်ပြနေခဲ့ကြပြီး အက်ပလီကေးရှင်း အသီးသီး၏ ရေပန်းအစားဆုံး ရှာဖွေမှုစာရင်းတွင် ထိပ်တန်း နေရာသုံးခုကို တစ်ပြိုင်နက် သိမ်းပိုက်သွားခဲ့လေသည်။

Ar နည်းပညာကုမ္ပဏီ၏ သတင်းစာရှင်းလင်းပွဲမှာ သံသယဝင်စရာမလိုဘဲ ကြီးကျယ်သော အောင်မြင်မှုတစ်ခု ဖြစ်ပေ၏။ စုယွမ်သည် ဤအရာကို မြင်တွေ့ရချိန်တွင် အလွန်ပင် ကျေနပ်နေခဲ့သည်။ စတော့ရှယ်ယာ ဈေးနှုန်းမြင့်တက်မှု နှုန်းထားအရဆိုလျှင် ရက်အနည်းငယ်အတွင်း စုစုပေါင်း မြင့်တက်မှုမှာ ရာခိုင်နှုန်း ရာပေါင်းများစွာအထိ ရောက်ရှိသွားနိုင်ပေသည်။ ထိုအချိန်ကျလျှင် Ar နည်းပညာကုမ္ပဏီ၏ စျေးကွက်တန်ဖိုးသည် ကြောက်မက်ဖွယ်ကောင်းသော အဆင့်တစ်ခုသို့ ရောက်ရှိသွားပေလိမ့်မည်။

ထိုအချိန်မှာပင် ဖုန်းတစ်ကော ဝင်လာခဲ့ပြီး ပိုင်ချန်ထံမှ ဖြစ်နေကြောင်း စုယွမ် မြင်လိုက်ရသည်။

"စုယွမ်... နင်... နင်..."

"နင် နင်နဲ့ ဘာဖြစ်နေတာလဲ... ဘာလို့ စကားတွေကို ဗလုံးဗထွေး ပြောနေတာလဲ..."

စုယွမ်က ပိုင်ချန်၏ လေသံကို ကြားချိန်တွင် တစ်စုံတစ်ရာ နင်နေသည့်အလား ခံစားလိုက်ရသည်။

"မဟုတ်... မဟုတ်ဘူး..."

"စုယွမ်... Ar နည်းပညာကုမ္ပဏီရဲ့ သတင်းစာရှင်းလင်းပွဲကို နင် မကြည့်လိုက်ဘူးလား..."

"Ar နည်းပညာကုမ္ပဏီရဲ့ သတင်းစာရှင်းလင်းပွဲမှာ ကမ္ဘာ့ထိပ်တန်း AI သုတေသနရလဒ်တွေကို ထုတ်ပြသွားတယ်လေ..."

"ပြီးတော့ သူတို့ရဲ့ CEO နာမည်ကလည်း စုယွမ်တဲ့..."

"အဲ့ဒီ စုယွမ်က နင် မဟုတ်ဘူးမလား..."

"တစ်ယောက်ယောက်က အဲ့ဒီ စုယွမ်လည်း ကျန်းချန်မှာပဲ ရှိနေတယ်ဆိုတာ ရှာတွေ့ထားတယ်လို့ ငါ မြင်လိုက်တယ်..."

ထိုလူ၏ အသံထဲတွင် မယုံကြည်နိုင်မှုနှင့် စုစမ်းလိုစိတ်များ ပြည့်နှက်နေခဲ့လေသည်။

ပိုင်ချန်က စိတ်လှုပ်ရှားစွာ ပြောဆိုလိုက်၏။ သူသိထားသော စုယွမ်သည် Ar နည်းပညာကုမ္ပဏီ၏ သူဌေးကြီး ဖြစ်နေမည်ဟု သူ ခံစားနေရပေသည်။

"အို... တကယ်လား... တကယ်လို့ အဲဒီလိုသာဆိုရင် အဲဒီ သူဌေးစုယွမ်က တကယ်ကို အံ့ဩစရာကောင်းတာပဲ... အမြင်လည်း အရမ်းကျယ်တယ်... ဒါပေမဲ့ အဲဒီစုယွမ်က ငါ စုယွမ်လောက်တော့ ရုပ်မဖြောင့်နိုင်ဘူးဆိုတာ သေချာပေါက် ပြောရဲတယ်..."

စုယွမ်က ပြုံးကာ ပြောလိုက်သည်။

"အာ... တကယ်ပဲ နင်ဖြစ်နေတာကိုး..."

"ပြီးခဲ့တဲ့ရက်က ညစာစားတုန်းက Ar နည်းပညာကုမ္ပဏီ အကြောင်းပြောတုန်းက နင် ဘာလို့များ ဘာမှမတုံ့ပြန်တာလဲလို့ ငါ တွေးနေခဲ့တာ... နင်က Ar နည်းပညာကုမ္ပဏီရဲ့ သူဌေးကြီး ဖြစ်နေတာကိုး..."

"ဒီလောက် အရေးကြီးတဲ့ ကိစ္စကိုတောင် နင်က ငါ့ကို မပြောပြဘူးနော်... တကယ်ပဲ..."

ပိုင်ချန်သည် စိတ်ပိုင်းဆိုင်ရာ ပြင်ဆင်ထားခဲ့သော်လည်း စုယွမ်က ဝန်ခံလိုက်သည်ကို ကြားချိန်တွင် အလွန်အမင်း စိတ်လှုပ်ရှားနေခဲ့သေး၏။

နောက်ရက်အနည်းငယ် ကြာပြီးနောက် အချမ်းသာဆုံးစာရင်း၏ ထိပ်တန်း (၁၀၀) ဝင်သူများထဲတွင် သူ သိကျွမ်းသူ တစ်ဦး ပါဝင်လာမည်ကို တွေးတောရင်း ပိုင်ချန်သည် ဂုဏ်ယူမှုကို ခံစားလိုက်ရလေသည်။

"အနာဂတ်အတွက် နင့်မှာ ဘာအစီအစဉ်တွေ ရှိလဲ..."

ပိုင်ချန်သည် စိတ်ကို တည်ငြိမ်အောင် လုပ်ပြီးနောက် မေးလိုက်သည်။

"ဒါက မျှော်လင့်ထားပြီးသား ကိစ္စဆိုတော့ ငါ သိပ်ပြီး စိတ်မလှုပ်ရှားပါဘူး..."

"ဒါနဲ့ နောက်ရက်အနည်းငယ်နေရင် လေလံပွဲတစ်ခု တက်ဖို့ ငါ ဟောင်ကောင်ကို သွားမလို့... နင်ရော စိတ်ဝင်စားလား..."

စုယွမ်က မေးလိုက်၏။