အခန်း ၁၅၈

အခန်း (၁၅၈)

သူတို့၏ ရှေ့တွင် ခေါင်းတလားအမည်းကြီး တစ်ခု မားမားမတ်မတ် ရှိနေသည်။ သေမင်း၏ အငွေ့အသက်များ ရစ်သိုင်းနေပြီး အတွင်းဘက် အခြေအနေကို မမြင်ရပေ။

'နွားကြီး... လက်စမလွန်စေနဲ့နော်။ သူ့ကို မသတ်နဲ့ဦး'

ချန်ရွှင်သည် နွားနက်ကြီး၏ ခေါင်းထဲသို့ နတ်အသိဖြင့် သတိပေးလိုက်သည်။ နွားနက်ကြီးက ခေါင်းညိတ်ပြပြီး ခွာကို ဝှေ့ယမ်းလိုက်ရာ အမည်းရောင် ခေါင်းတလားမှ အလင်းရောင်များ ဖျတ်ခနဲ လင်းသွားသည်။

ထိုအခါမှသာ အတွင်းမှ အသံများကို ကြားရတော့သည်။ စူးစူးဝါးဝါး အော်ဟစ်သံများနှင့် တောင်းပန်သံများသာ ထွက်ပေါ်နေသည်။ မသိနားမလည်ခြင်းသည် ကြောက်ရွံ့မှု၏ အဓိက အကြောင်းရင်းပင် ဖြစ်သည်။

"မင်း ဒီနေ့ အပြင်ထွက်လာတာက ငါ့ရဲ့ အမျက်ဒေါသကို ဆွပေးလိုက်တာပဲ။ ဒီအပြစ်ကို ဘယ်လို ပြန်ပေးဆပ်မလဲ"

"အား... ဒီလို တားမြစ်ချက်မျိုး ရှိမှန်း ကျွန်တော်မျိုး တကယ် မသိခဲ့ပါဘူး စီနီယာ... လိုချင်တာ ရှိရင် ပြောပါ အကုန် ပေးပါ့မယ်"

ခေါင်းတလားထဲတွင် ချင်ရွှမ်ချင်း၏ မျက်နှာကြွက်သားများ တွန့်လိမ်သွားပြီး အလွန်အမင်း ကြောက်ရွံ့နေသည်။ မိမိ ဘယ်နေရာ ရောက်နေမှန်းပင် မသိတော့ပေ။ "ဘိုးဘေး ယန်ဟွာ မျက်နှာကို ထောက်ပြီး ကျွန်တော်မျိုးကို ချမ်းသာပေးပါဗျာ"

"ဟမ့်... ယန်ဟွာ လား။ ငါနဲ့ သိကျွမ်းဖူးပါတယ်။ ဒါကြောင့်လည်း မင်းကို ချက်ချင်း အသေသတ်မပစ်တာပေါ့"

ချန်ရွှင်က မျက်နှာပြောင်တိုက်ပြီး လိမ်ညာလိုက်သည်။ ဘေးနားရှိ နွားနက်ကြီးကလည်း 'အစ်ကိုကြီး အဆက်အသွယ်က တကယ် မိုက်တာပဲ' ဆိုသည့် အကြည့်ဖြင့် မျက်လုံးပြူးကာ ကြည့်နေသည်။

"ဪ... ဒါဆိုရင် ကိုယ့်လူတွေ အချင်းချင်း နားလည်မှု လွဲသွားတာပေါ့... စီနီယာ လိုချင်တာ ရှိရင် ကျွန်တော်မျိုး အသက်နဲ့ ရင်းပြီး ရှာပေးပါ့မယ်"

ချင်ရွှမ်ချင်း အနည်းငယ် စိတ်အေးသွားသည်။ သူ့ကို သတ်ရန် ရည်ရွယ်ချက် မရှိပါက မျှော်လင့်ချက် ရှိသေးသည်။ သို့သော် ပတ်ဝန်းကျင်ရှိ ကြောက်မက်ဖွယ်ကောင်းသော အခြေအနေများကတော့ ပုံမှန်မဟုတ်ပေ။

"မင်း အနောက်မှာ ယန်ဟွာ ရှိနေတယ် ဆိုတော့ ငါလည်း အတင်းအကျပ် မလုပ်ပါဘူး။ သင့်တော်တဲ့ ဆေးဖော်နည်း တစ်ခုလောက် ပေးရင် ငါ ခွင့်လွှတ်ပေးမယ်"

"ဗျာ..."

ချင်ရွှမ်ချင်း ချွေးစေးများ ပြန်လာသည်။ မူလဝိညာဉ်အဆင့် ဘိုးဘေးတွေ အသုံးပြုတဲ့ ဆေးဖော်နည်းမျိုး သူ့ဆီမှာ ဘယ်လိုလုပ် ရှိနိုင်မှာလဲ။ "စီ... စီနီယာ..."

"မရှိဘူးလား။ ဒါဆိုလည်း မင်း သေလမ်းကိုသာ ရွေးလိုက်တော့"

"နေ... နေပါဦးဗျာ"

ချင်ရွှမ်ချင်း ခေါင်းတလားထဲမှနေ၍ ကျယ်လောင်စွာ အော်ဟစ်လိုက်သည်။ သူ့ထံသို့ တိုးဝင်လာသော သေမင်း၏ အငွေ့အသက်များ ချက်ချင်း ရပ်တန့်သွားသည်။ "စီနီယာ လိုချင်တဲ့ ဆေးဖော်နည်းမျိုးကို ကျွန်တော်မျိုး သေချာပေါက် ရှာပေးပါ့မယ်"

"ရွှေအမြူတေအဆင့် ကောင်လေးတွေဆီက ဆေးဖော်နည်းကို ငါက ဘာလုပ်ရမှာလဲ။ ဒါပေမဲ့ မင်းက ငါ့ရဲ့ အမျက်ဒေါသကို ဆွပေးလိုက်ပြီ ဆိုတော့ လျော်ကြေးတော့ ပေးရမှာပေါ့"

"ဟုတ်ကဲ့... ဟုတ်ကဲ့ပါ"

ချင်ရွှမ်ချင်း ခန္ဓာကိုယ်တစ်ခုလုံး ချွေးများ ရွှဲနစ်နေသည်။ နှစ်ပေါင်းရာချီ ကျင့်ကြံလာခဲ့ပြီးမှ ဒီလို အဖြစ်ဆိုးမျိုး ကြုံရလိမ့်မည်ဟု တစ်ခါမျှ မထင်ထားပေ။ "စီနီယာ ကျေနပ်လောက်တဲ့ လျော်ကြေးမျိုးကို သေချာပေါက် ပေးပါ့မယ်"

"မူလဝိဉာဉ်ဆေး ဖော်နည်း ဆိုရင် ရပါပြီ။ မင်းတို့ ရွှေအမြူတေအဆင့်တွေ လက်လှမ်းမီနိုင်တဲ့ အမြင့်ဆုံး အရာပဲလေ။ ငါလည်း အတင်းအကျပ် မတောင်းဆိုပါဘူး"

ချန်ရွှင်က အေးစက်စွာ ပြုံးလျက် ပြောလိုက်သည်။ ဤနေရာသို့ သူတို့ ဘာကြောင့် ရောက်လာရသနည်း ဆိုသည်ကို သူတို့ ကောင်းကောင်း သိထားပြီး ဖြစ်သည်။

အင်အားကြီးဂိုဏ်း သုံးခု၏ အနောက်တွင် မော့ယွီစံအိမ် ရှိနေပြီး စီးပွားရေးအရ အလွန် နီးကပ်စွာ ဆက်နွှယ်နေကြသည်။ သူတို့သည် ပတ်ဝန်းကျင် နိုင်ငံများတွင် အချမ်းသာဆုံးနှင့် အင်အားအကြီးဆုံး အဖွဲ့အစည်း ဖြစ်သည်။

ဂိုဏ်းအသီးသီး၏ အင်အားများ လျော့နည်းနေချိန်သည် 'အားကြီးသူကို နှိမ်နင်းရန်' အကောင်းဆုံး အချိန်ပင် ဖြစ်သည်။

ထို့အပြင် ယခင်က လုယူခဲ့သော သိုလှောင်အိတ် သုံးလုံး၏ အခြေအနေကို ကြည့်ခြင်းအားဖြင့် ဤဂိုဏ်းမှ ရွှေအမြူတေအဆင့် ကျင့်ကြံသူများသည် ပစ္စည်းကောင်းများစွာ စုဆောင်းထားမည်မှာ သေချာသည်။ ဂိုဏ်းချုပ်ဆိုလျှင် ပို၍ပင် များပြားပေလိမ့်မည်။

"စီနီယာ... ရှိပါတယ်။ ကျွန်တော်မျိုးဆီမှာ ရှိပါတယ်"

ချင်ရွှမ်ချင်း အလျင်အမြန် အော်ဟစ်လိုက်ပြီး ရင်ထဲမှ အလုံးကြီး ကျသွားသည်။ ဆေးဖော်နည်း ဆိုသည်မှာ အကြိမ်ကြိမ် ကူးယူ၍ ရသောအရာ ဖြစ်ပြီး ကိုယ်ပိုင် ဆေးဖော်စပ်နည်း လျှို့ဝှက်ချက်များ သို့မဟုတ် ဝိညာဉ်ဆေးပင် အစစ်အမှန်များကို ပေးစရာ မလိုပေ။ "စီနီယာ... တခြား လိုချင်တာ ရှိရင်လည်း ကျွန်တော်မျိုး အကုန် ပေးပါ့မယ်"

အသက်အန္တရာယ်နှင့် ကြုံတွေ့လာရသောအခါ အခြားအရာများ အားလုံးသည် သေးမွှားသွားသည်။ အထူးသဖြင့် နတ်အသိကို ပိတ်ဆို့ခံထားရပြီး ကောင်းကင်ကို အော်ဟစ်တောင်းပန်၍မရ၊ မြေကြီးကို အကူအညီတောင်း၍မရသော အခြေအနေမျိုးတွင် ပို၍ပင် ကြောက်မက်ဖွယ် ကောင်းလှသည်။

ချန်ရွှင်၏ တောင်းဆိုမှုမှာ အလွန် နည်းပါးသည်ဟုပင် သူ ထင်မှတ်နေမိသည်။ ဖေ့ယင် ဆေး ဖော်နည်း ဆိုသည်မှာ တန်ဖိုးကြီးမားသော်လည်း မော့ယွီစံအိမ်၏ အင်အားနှင့်ဆိုလျှင် သိပ်ပြီး ခက်ခဲသော အရာ မဟုတ်ပေ။

တကယ်တော့ ဆေးဖော်နည်း ဆိုသည်မှာ ယေဘုယျအားဖြင့်သာ ဖော်ပြထားခြင်း ဖြစ်သည်။ လိုအပ်သော ဝိညာဉ်ဆေးပင် အမျိုးအစားနှင့် သက်တမ်းကိုသာ ရေးသားထားပြီး အရေးအကြီးဆုံးဖြစ်သော 'ဆေးပင်များ ထည့်သွင်းရမည့် အစီအစဉ်' နှင့် 'မီးအပူချိန် အတက်အကျ' စသည့် အဓိက လျှို့ဝှက်ချက်များ မပါဝင်ပေ။

ရှားပါးသော ဝိညာဉ်ဆေးပင်များ ရှာဖွေရခက်ခဲခြင်းကို မဆိုထားနှင့်၊ ဆေးဖော်နည်းကို ကြည့်ပြီး ကိုယ့်ဘာသာ ဖော်စပ်မည် ဆိုပါက ရာခိုင်နှုန်းပြည့် ပျက်စီးသွားပြီး အမှိုက်များသာ ထွက်ပေါ်လာမည် ဖြစ်သည်။ နောက်တစ်ကြိမ် ထပ်မံ ဖော်စပ်ရန်အတွက် ဆေးပင်များ ပြန်လည် စုဆောင်းရန်မှာလည်း ကောင်းကင်သို့ တက်ရသည်ထက်ပင် ခက်ခဲပေလိမ့်မည်။

ကျင့်ကြံခြင်းလောကတွင် အမှန်တကယ် တန်ဖိုးရှိသော အရာမှာ 'ဆေးဖော်နည်း' သက်သက် မဟုတ်ဘဲ ဆေးပညာရှင်များ ချန်ရစ်ခဲ့သော 'အသေးစိတ် မှတ်တမ်းများ' သာ ဖြစ်သည်။ ထိုအရာကမှ အစစ်အမှန် ရတနာ ဖြစ်သည်။

"ထုတ်ပေးလိုက်။ ဒါဆိုရင် မင်းကို ဒုက္ခမပေးတော့ဘူး"

ချန်ရွှင်၏ မျက်ဝန်းများ စူးရှသွားပြီး နွားနက်ကြီးထံသို့ နတ်အသိဖြင့် အချက်ပြလိုက်သည်။ 'နွားကြီး... လုပ်တော့'

'မွန်း...' နွားနက်ကြီးလည်း နတ်အသိဖြင့် ပြန်လည် ဖြေကြားလိုက်ပြီး မျက်လုံးများ အရောင်တောက်လာသည်။

ချင်ရွှမ်ချင်း၏ အပေါ်သို့ သက်ရောက်နေသော ဖိအားများ ရုတ်တရက် လျော့ကျသွားသည်။ မိမိ၏ နတ်အသိကို ပြန်လည် အသုံးပြုနိုင်ပြီ ဖြစ်သော်လည်း ပတ်ဝန်းကျင်တွင် နတ်အသိကို ပိတ်ဆို့ထားသော အရာများ ဖုံးလွှမ်းနေဆဲ ဖြစ်ရာ အပြင်ဘက် အခြေအနေကိုတော့ မမြင်ရသေးပေ။

သူသည် အခက်အခဲများစွာကြားမှ သိုလှောင်လက်စွပ်ထဲရှိ ဆေးဖော်နည်း စာအုပ်များစွာကို ထုတ်ယူလိုက်ပြီး ဖေ့ယင် ဆေး ဖော်နည်းကို တွေဝေခြင်းမရှိဘဲ ရွေးချယ်လိုက်သည်။

အကယ်၍ ဤစီနီယာကြီးသာ လူသတ်ပြီး ပစ္စည်းလုချင်သူ ဖြစ်ပါက သူသည် အလောင်းတစ်လောင်း ဖြစ်နေသည်မှာ ကြာပြီဖြစ်သည်။ အမှန်တကယ်ပင် 'တားမြစ်ချက်' တစ်ခုခုကို ချိုးဖောက်မိခဲ့၍သာ ဖြစ်ပေလိမ့်မည်။

နွားနက်ကြီးက ခွာကို ဝှေ့ယမ်းလိုက်ရာ ဆေးဖော်နည်း စာအုပ်သည် ချက်ချင်း ပျောက်ကွယ်သွားသည်။ နွားနက်ကြီးသည် အလျင်အမြန် မှတ်စုစာအုပ်ငယ်လေး တစ်အုပ်ကို ထုတ်ယူကာ မှော်စွမ်းအင်ကို အသုံးပြု၍ အတွင်းပါ အကြောင်းအရာများကို ကူးယူ မှတ်တမ်းတင်လိုက်သည်။

ချန်ရွှင် မျက်မှောင်ကြုတ်သွားသည်။ တကယ်ကြီး ရှိနေလိမ့်မည်ဟု သူ မထင်ထားပေ။ လင်းရှူကုန်သည်အဖွဲ့ တွင် အင်အားကြီးအဖွဲ့ သုံးဖွဲ့က ဤဆေးဖော်နည်းကို ရောင်းချနေသည်ကို သူ တစ်ခါမျှ မတွေ့ဖူးခဲ့သလို၊ ချန်နိုင်ငံရှိ မည်သည့်ဂိုဏ်းတွင် ဤဆေးဖော်နည်း ရှိသည်ဟုလည်း မကြားဖူးပေ။

ထိပ်သီးဂိုဏ်းဆယ်ခုက ကိုယ့်နိုင်ငံက ဂိုဏ်းတွေကို နောက်ကွယ်ကနေ ဖိနှိပ်ထားတာများလား...

တွေးလေလေ သံသယဖြစ်စရာ ကောင်းလေလေပင်။ ဤနှစ်တစ်ထောင် အတွေ့အကြုံများအရ ထိပ်သီးဂိုဏ်းဆယ်ခုအပေါ် သူ၏ အမြင်မှာ သိပ်မကောင်းလှပေ။

အပေါ်ယံတွင်တော့ တိုင်းပြည် အေးချမ်းသာယာနေသယောင် ရှိသော်လည်း တကယ်တမ်းတွင်မူ ဂိုဏ်းအသီးသီးသည် ဖိနှိပ်ခံနေရပြီး တိုးတက်ရန် လမ်းစများ ပိတ်ဆို့ခံထားရသည်။

ဤနိုင်ငံတွင် အခြေအနေများ ရှုပ်ထွေးနေသယောင် ရှိသော်လည်း ကျင့်ကြံသူများမှာမူ အတော်လေး လွတ်လပ်မှု ရှိကြပြီး ရှေ့ဆက်တက်ရန် လမ်းကြောင်းများ ပိတ်ဆို့မနေပေ။ သို့သော် အောက်ခြေမှ ပြည်သူများကတော့ ငရဲပြည်တွင် နေထိုင်နေရသကဲ့သို့ ဆင်းရဲဒုက္ခ ရောက်နေကြရသည်။

ချန်ရွှင်၏ မျက်မှောင်များ ပိုမို တွန့်ချိုးသွားသည်။ လောကကြီး၏ အပြောင်းအလဲများကို သာမန်လူတစ်ယောက်ဖြစ်ခဲ့ဖူးသော သူက မည်သို့မျှ နားလည်နိုင်မည် မဟုတ်ပေ။

'ထားလိုက်ပါတော့... ငါက ပညာမှ မတတ်တာ' ချန်ရွှင် စိတ်ထဲတွင် သက်ပြင်းချလိုက်သည်။ 'သဘာဝအတိုင်းပဲ နေပြီး ကိုယ့်စိတ်ဆန္ဒအတိုင်းပဲ လုပ်တာ ပိုကောင်းပါတယ်။ အဲဒါကမှ ပိုပြီး ပေါ့ပါးလွတ်လပ်တယ်'

သူတစ်ပါး၏ စည်းမျဉ်းများထဲသို့ သူ ဝင်ရောက်စွက်ဖက်မည် မဟုတ်ပေ။ သူတို့သည် ထာဝရအသက်ရှင်သော ခရီးသွားများသာ ဖြစ်သည်။ တစ်နေရာတည်းတွင် အချိန်ကြာမြင့်စွာ နေထိုင်ပြီး အရာရာကို ဝင်ရောက်စွက်ဖက်နေပါက လောကကြီး ပိုမို ရှုပ်ထွေးသွားပေလိမ့်မည်။

ချန်ရွှင်သည် တည်ငြိမ်စွာ ခေါင်းညိတ်လိုက်ပြီး နှုတ်ခမ်းထောင့်စွန်းများ ကွေးတက်သွားကာ ပြုံးလိုက်သည်။

အချိန်အနည်းငယ် ကြာသောအခါ ဆေးဖော်နည်း စာအုပ်သည် ပြန်လည် ရောက်ရှိလာသည်။ ချင်ရွှမ်ချင်းမှာမူ 'စီနီယာကြီး သဘောမကျလို့များလား' ဟု တွေးကာ အလွန်အမင်း ထိတ်လန့်သွားသည်။

သူသည် အမည်းရောင် ခေါင်းတလားထဲတွင် ကမန်းကတန်း ဒူးထောက်ကာ ကျယ်လောင်စွာ အော်ဟစ်လိုက်သည်။ "စီနီယာ... ချမ်းသာပေးပါဗျာ"

ဘုန်း...

ဝေါ... ဝေါ... ဝေါ...

သူ၏ ခန္ဓာကိုယ်သည် အပေါ်ဘက်သို့ အရှိန်ပြင်းစွာ တက်သွားသည်ကို ခံစားလိုက်ရသည်။ မှော်စွမ်းအင်နှင့် နတ်အသိတို့ ပြန်လည် ဖိနှိပ်ခံလိုက်ရပြီး နှလုံးသည် ပါးစပ်မှ ထွက်ကျလာမတတ် ခုန်ပေါက်နေသည်။

ချင်ရွှမ်ချင်း၏ ရင်ဘတ်များ နိမ့်ချည်မြင့်ချည် ဖြစ်နေပြီး ခန္ဓာကိုယ်အတွင်းရှိ ရွှေရောင်အူတိုင်ကို ပြင်းထန်စွာ အရိုက်ခံလိုက်ရသကဲ့သို့ ခံစားလိုက်ရပြီးနောက်... မျက်လုံးများ ပြာဝေသွားကာ သတိလစ်သွားလေတော့သည်။

ချန်ရွှင်နှင့် နွားနက်ကြီးတို့သည် လေပြေလေညှင်းများကဲ့သို့ ထွက်ခွာသွားကြသည်။ 'လူကိုသာ ကြည့်ပြီး ဂိုဏ်းကို မကြည့်နဲ့'။ လူဆိုးများတွင်လည်း လူဆိုးများ၏ စည်းကမ်း ရှိသည်။ မိစ္ဆာကျင့်ကြံသူများ၏ ကိစ္စရပ်အားလုံးကို သူတို့ ဝင်ရောက် စွက်ဖက်နိုင်မည် မဟုတ်ပေ။ အကြောင်းတိုက်ဆိုင်လျှင် ကူညီမည်ဖြစ်ပြီး၊ မတိုက်ဆိုင်လျှင် အတင်းအကျပ် ဝင်ရောက်စွက်ဖက်မည် မဟုတ်ပေ။

နာရီဝက်ခန့် ကြာပြီးနောက်။

သစ်ပင်ကြီးတစ်ပင်၏ အောက်တွင် မှီလျက် လဲကျနေသော ချင်ရွှမ်ချင်းသည် သွေးတစ်ပွက် အန်ချလိုက်ပြီး သတိပြန်လည်လာသည်။

သူ မတ်တပ်ထရပ်လိုက်သည်နှင့် ပတ်ဝန်းကျင်ရှိ အစီအရင်ငယ်များသည် လွင့်စင်သွားပြီး ဒြပ်ငါးပါး စွမ်းအင်များအဖြစ် ပြောင်းလဲကာ သဘာဝလောကထဲသို့ ပြန်လည် ဝင်ရောက်သွားကြသည်။

ချင်ရွှမ်ချင်း၏ မျက်ဝန်းထဲတွင် အံ့ဩမှုနှင့် သံသယများ ရောယှက်နေပြီး မုတ်ဆိတ်မွေးများမှာ လေထဲတွင် လွင့်ပျံနေသည်။ သို့သော် သူ၏ စိတ်နှလုံးသည် တဖြည်းဖြည်း တည်ငြိမ်လာသည်။

"ထူးဆန်းတယ်... အဲဒီလူက အစကတည်းက ဆေးဖော်နည်းကို မလိုချင်ခဲ့တာများလား"

ချင်ရွှမ်ချင်းသည် ပတ်ဝန်းကျင်ကို ဝေ့ကြည့်လိုက်ပြီး ကျောချမ်းသွားသည်။ "ဘာ ခြေရာလက်ရာမှ မကျန်ခဲ့ဘူး..."

သူ၏ နှလုံးခုန်သံများ မြန်ဆန်လာသည်။ ဤသည်မှာ သူ့အပေါ်၊ မဟုတ်ဘူး... ချင်းချီဂိုဏ်း တစ်ခုလုံးအပေါ် ပြင်းထန်သော 'သတိပေးချက်' တစ်ခုပင် ဖြစ်သည်။

သို့သော် မော့ယွီစံအိမ်၏ မျက်နှာကို ထောက်ထားသဖြင့် ကိစ္စကို မကြီးကျယ်စေဘဲ သူ့ကို အသက်ရှင်ခွင့် ပေးခဲ့ခြင်း ဖြစ်ပေလိမ့်မည်။

"တောက်..." ချင်ရွှမ်ချင်း ရှက်ရွံ့သဖြင့် မျက်နှာများ နီရဲလာသည်။ ဘာမှ မဆုံးရှုံးခဲ့သော်လည်း စောစောက သူ သနားစရာကောင်းအောင် အသက်ချမ်းသာပေးရန် တောင်းပန်နေခဲ့သည့် ပုံစံကို တစ်စုံတစ်ယောက် မြင်သွားခဲ့လျှင် ရယ်စရာကောင်းလွန်းလှသည်။

သူသည် စိတ်ကို အလျင်အမြန် တည်ငြိမ်အောင် ထားလိုက်ပြီး ကျင့်ကြံခြင်း စိတ်သဘောထားကို ပြန်လည် ထိန်းချုပ်လိုက်သည်။ ဖြူရော်နေသော မျက်နှာမှာလည်း အနည်းငယ် သွေးရောင် ပြန်လည် လွှမ်းမိုးလာသည်။

ချင်ရွှမ်ချင်းသည် လက်ကို နောက်ပစ်ကာ အေးစက်စွာ နှာခေါင်းရှုံ့လိုက်ပြီး လေပေါ်တွင် လမ်းလျှောက်လျက် ပျံသန်းသွားလေသည်။ ဘာမှ မဖြစ်ခဲ့သကဲ့သို့ ဂိုဏ်းသို့ ပြန်သွားလေသည်။

သို့သော် ဤနေ့မှစ၍ ချင်ရွှမ်ချင်းသည် 'အပြင်မထွက်မီ ဗေဒင်တွက်ခြင်း' အလေ့အထကို ပြုလုပ်လာခဲ့ရာ ဂိုဏ်းမှ အကြီးအကဲများမှာ "ဂိုဏ်းချုပ် ဘာဖြစ်သွားတာလဲ" ဟု နားမလည်နိုင်အောင် ဖြစ်နေကြရလေသည်။

...

ငါးလ ကြာပြီးနောက်

အန်းယွင်နိုင်ငံ၊ အခြားပြည်နယ်တစ်ခုကို အုပ်ချုပ်သော အင်အားကြီးဂိုဏ်းသုံးခုအနက် တစ်ခုဖြစ်သည့် 'လျိုရှန်းဂိုဏ်း'။

ဂိုဏ်းချုပ်ဖြစ်သူ အပြင်မှ ပြန်လာစဉ် ၎င်း၏ ခေါင်းထဲ၌ မိုးခြိမ်းသံကဲ့သို့ ဒေါသတကြီး အော်ဟစ်သံကြီး ပဲ့တင်ထပ်သွားသည်။

"ဒီလမ်းကို ဖြတ်လျှောက်ရဲတယ်ပေါ့... ငါ့ရဲ့ ဒေါသကို လိုက်တာပဲ"

ထို့နောက် ဂိုဏ်းချုပ်၏ ဝက်သတ်သကဲ့သို့ စူးစူးဝါးဝါး အော်ဟစ်သံကြီး ထွက်ပေါ်လာသည်။ "အား..."

သူသည် အမည်းရောင် ခေါင်းတလားကြီးထဲသို့ ဆွဲသွင်းခံလိုက်ရပြီးနောက်... ချန်ရွှင်နှင့် နွားနက်ကြီးတို့၏ 'အကျိုးအကြောင်း ရှင်းပြမှု' များကို နာခံကာ မူလဝိဉာဉ်ဆေး ဖော်နည်းကို အပ်နှံလိုက်ရပြန်သည်။

...

နောက်ထပ် ငါးလ ကြာပြီးနောက်

အန်းယွင်နိုင်ငံ၏ နောက်ဆုံး အင်အားကြီးဂိုဏ်းဖြစ်သော 'ဝူတင်းဂိုဏ်း'။

ဂိုဏ်းချုပ်သည် ပုံမှန် အစည်းအဝေးမှ ပြန်လာစဉ် ရုတ်တရက် ကျရောက်လာသော ဘေးဆိုးကြီး ကြောင့် စူးစူးဝါးဝါး အော်ဟစ်လိုက်မိသည်။ အကြောင်းပြချက်မှာ "စီနီယာကြီး မှော်တန်ခိုးပညာ လေ့ကျင့်နေတာကို အနှောင့်အယှက် ပေးမိလို့" ဟူ၍ ဖြစ်သည်။ ထို့နောက် အမည်းရောင် ခေါင်းတလားကြီးထဲသို့ ဖိတ်ခေါ်ခံရပြီး မြေကြီးအောက်သို့ ရောက်သွားလေသည်။

ဤဂိုဏ်းချုပ်သည် အလွန် ခေါင်းမာသူဖြစ်ပြီး သေရင်သေပါစေ အရှုံးမပေးဟူသော စိတ်ဓာတ်ရှိသူ ဖြစ်သည်။ သို့သော် နောက်ဆုံးတွင် 'လူဆိုး' နှစ်ယောက်၏ (ရုပ်ပိုင်းဆိုင်ရာ)ဖြောင်းဖျမှုကြောင့် သဘောပေါက်သွားခဲ့သည်။ နောက်ဆုံးတွင် သူသည် ငိုယိုတောင်းပန်ကာ "စီနီယာ... ကျေးဇူးပြုပြီး မူလဝိဉာဉ်ဆေး ဖော်နည်းကို လက်ခံပေးပါဗျာ" ဟု ကိုယ်တိုင်ကိုယ်ကျ တောင်းဆိုခဲ့ရလေသည်။

ချန်ရွှင်နှင့် နွားနက်ကြီးတို့ ထွက်ခွာသွားကြသော်လည်း ဂိုဏ်းချုပ် သုံးဦးသည် တစ်သက်လုံး မေ့မရနိုင်သော စိတ်ဒဏ်ရာကြီး ရရှိသွားကြသည်။ မိမိတို့၏ ပိုင်နက်နယ်မြေအတွင်း ဤကဲ့သို့ အတိုက်ခိုက်ခံရလိမ့်မည်ဟု အိပ်မက်ထဲတွင်ပင် မထင်မှတ်ထားခဲ့သောကြောင့် ဖြစ်သည်။

ထိုအချိန်မှစ၍ ဂိုဏ်းချုပ် သုံးဦးစလုံးသည် အံ့ဩစရာကောင်းလောက်အောင် သဘောထား တိုက်ဆိုင်သွားကြပြီး ဘယ်သွားသွား တပည့်များစွာကို ကင်း ချထားကြသည်။ အပေါ်ယံ အကြောင်းပြချက်မှာ "လုံခြုံရေးအတွက်" ဟူ၍ ဖြစ်သည်။

သူတို့ချင်း တွေ့ဆုံတိုင်း အချင်းချင်း သံသယဝင်နေကြပြီး သတိထား စောင့်ကြည့်နေကြသည်။ စိတ်ထဲတွင်လည်း ဤသို့ တွေးနေကြသည်။

'ဒီလောက် အရှက်ကွဲခဲ့ရတာ... မင်းများ ဝိညာဉ်ကျောက်တုံးတွေ ပုံအောပြီး အဲဒီ "စီနီယာ" ကို ငှားလိုက်တာတော့ မဟုတ်ပါဘူးနော်'

Top of Form

Bottom of Form