အခန်း ၈၇၁
Vol. 83 Ch. 871
အခန်း (၈၇၁) - သတ္တမအဆင့် ဆေးဖော်စပ်ပညာရှင်အဖြစ် တိုးတက်ခြင်း၊ ထိုက်ရွှမ် အံ့ဖွယ်တစ်သောင်းဆေးလုံးနှင့် ခန္ဓာပေါင်းစည်းခြင်း ကပ်ဘေးသုံးပါး (၁)
"ဒါကြောင့် ကျုပ်တို့ ဖြည်းဖြည်းချင်းပဲ သွားရမယ်။ ကြီးမားတဲ့ အကျိုးအမြတ်နောက်ကို မလိုက်သင့်ဘူး...”
"ကျုပ်တို့ဆီမှာ မိုးထိအောင် မြင့်မားတဲ့ စည်းစိမ်တွေကို ထိန်းထားနိုင်လောက်တဲ့ လုံလောက်တဲ့ အင်အားမရှိရင်ပေါ့...”
"မဟုတ်ရင်တော့ ကျုပ်တို့အားလုံး သေဘေးနဲ့ ရင်ဆိုင်ရမှာ အသေအချာပဲ...”
လော့ကျင်းပေါင်က လေးနက်သော လေသံဖြင့် မိမိမိသားစုမှ မျိုးဆက်သစ်များကို သတိပေးလိုက်၏။
"ကောင်းပါပြီ ဘိုးဘေး...”
လူတိုင်းက ခေါင်းညိတ် ထောက်ခံကြလေသည်။ သူတို့သည်လည်း စောစောက လောဘဇော တက်မိသွားကြခြင်း ဖြစ်၏။
လေဟာနယ်သန့်စင်ခြင်းအဆင့် ကန္တာရသားရဲများကို အမဲလိုက်ရသည်မှာ အလွန်လွယ်ကူသည်ဟု ထင်မှတ်ကာ အကြီးအကျယ် သားရဲအမဲလိုက်ရန် စိတ်ကူးမိခဲ့ကြသည်။
သို့သော် အနည်းငယ်မျှ သတိလက်လွတ် ဖြစ်သွားရုံဖြင့် ကြီးမားသော ဘေးဒုက္ခများကို ဆွဲဆောင်မိပြီး မရေမတွက်နိုင်သော သေဆုံးဒဏ်ရာရမှုများကို ဖြစ်စေနိုင်သည်ကို မေ့လျော့နေခဲ့ကြပေသည်။
"တကယ်လို့ ဘိုးဘေးကျိုးသာ ခန္ဓာပေါင်းစည်းခြင်းအဆင့်ကို ရောက်သွားရင် သိပ်ကောင်းမှာပဲ...”
"အဲဒီအချိန်ကျရင် ခန္ဓာပေါင်းစည်းခြင်းအဆင့် ကန္တာရသားရဲတွေကိုတောင် ယဉ်ပါးအောင် လုပ်နိုင်မလား မသိဘူး...”
"တကယ်လို့ အဲဒီလိုသာ ဖြစ်လာခဲ့ရင် ကျုပ်တို့ လူသားမျိုးနွယ်တွေ တကယ်ကြီး ပွပေါက်တိုးပြီပဲ...”
တစ်ယောက်က စိတ်လှုပ်ရှားစွာဖြင့် ရေရွတ်လိုက်လေသည်။
သံသယဖြစ်စရာမလို၊ လေဟာနယ်သန့်စင်ခြင်းအဆင့်တွင်ပင် ကျိုးစွေ့သည် ဤမျှ ကြောက်မက်ဖွယ် ကောင်းနေခဲ့ပြီး လေဟာနယ်သန့်စင်ခြင်းအဆင့် ကန္တာရသားရဲများစွာကို စိတ်ကြိုက် လွှမ်းမိုးထိန်းချုပ်နိုင်ခဲ့သည်။ အကယ်၍ ခန္ဓာပေါင်းစည်းခြင်းအဆင့်သို့ တက်လှမ်းနိုင်ခဲ့လျှင် အခြေအနေမှာ ပို၍ပင် အံ့မခန်း ဖြစ်လာပေလိမ့်မည်။
ထိုအချိန်တွင် ခန္ဓာပေါင်းစည်းခြင်းအဆင့် သားရဲအကောင်ရေ ဆယ်ဂဏန်း သို့မဟုတ် ရာဂဏန်းကို ယဉ်ပါးအောင် လုပ်နိုင်ပါက သူတို့သည် ဤအရပ်၌ မည်သူ့ကိုမျှ ကြောက်စရာမလိုဘဲ စိတ်ကြိုက် သွားလာနိုင်ပေတော့မည်။
"ကျုပ်အမြင်အရတော့ တာအိုရောင်းရင်းကျိုးရဲ့ ပါရမီနဲ့ဆိုရင် ခန္ဓာပေါင်းစည်းခြင်းအဆင့်ကို ရောက်ဖို့က အနှေးနဲ့အမြန်ပါပဲ...”
"ဒါပေမဲ့ အခုက ငယ်သေးတော့ နောက်ထပ် အနှစ်ငါးထောင်အတွင်း ခန္ဓာပေါင်းစည်းခြင်းအဆင့်ကို ရောက်နိုင်ရင်ကို တော်တော်လေး ဟုတ်နေပြီ...”
"ဘာပဲဖြစ်ဖြစ် အချိန်တိုအတွင်းမှာတော့ ဒါတွေကို အများကြီး မမျှော်လင့်ဘဲ ဂရုတစိုက် နေထိုင်တာက ပိုကောင်းပါတယ်...”
"တာအိုရောင်းရင်းကျိုးသာ ဘာမှမဖြစ်ဘူးဆိုရင် အနာဂတ်မှာ ကျုပ်တို့ လူသားမျိုးနွယ်ရဲ့ ဧကရာဇ်အသစ် ဖြစ်လာမှာ အသေအချာပဲ...”
လော့ကျင်းပေါင်သည် ကျိုးစွေ့အပေါ် မျှော်လင့်ချက် ကြီးမားပေသည်။ ဤသည်မှာ လူသားမျိုးနွယ်၏ အနာဂတ်မျှော်လင့်ချက် ဖြစ်သည်ဟု သူ ခံစားနေရ၏။
လူသားမျိုးနွယ်တွင် ဧကရာဇ်သစ်တစ်ပါး ပေါ်ထွန်းလာပါက လူသားတို့အတွက် ရရှိမည့် အကျိုးကျေးဇူးများမှာ မည်မျှ ကြီးမားမည်ကို တွေးကြည့်ရုံဖြင့် သိနိုင်ပေသည်။
တစ်ဖက်လူ၏ ပါရမီအရဆိုလျှင် ဧကရာဇ်သစ် ဖြစ်လာရန်မှာ လုံးဝကို သဘာဝကျလှသည်ဟု သူ တွေးတောမိ၏။
ထို့အပြင် အတိတ်က လူသားဧကရာဇ်များ၏ အောင်မြင်မှုများကိုပင် ကျော်လွန်သွားနိုင်သေးသည်။
လက်ရှိအချိန်တွင် တစ်မြို့လုံးရှိ လေဟာနယ်သန့်စင်ခြင်းအဆင့် ဘိုးဘေးများအားလုံးသည် ကျိုးစွေ့၏ အမိန့်ကိုသာ နာခံနေကြရသည်။
အားလုံးသည် ကျိုးစွေ့၏ အင်အားအပေါ် မှီခိုပြီး ရှင်သန်နေကြရ၏။
"ဘိုးဘေး... ဖုန်းရှီးကျွန်းမှာ မြို့အသစ်တွေ ထပ်ဆောက်မယ်လို့ ကြားတယ်၊ အဲဒါ တကယ်ပဲလား...”
လှေထိုးသားတစ်ဦးက သိချင်စိတ်ဖြင့် မေးလိုက်၏။
"ဟုတ်တယ်။ တကယ်ပဲ အဲဒီလို အစီအစဉ် ရှိတယ်...”
"ဘာလို့လဲဆိုတော့ ကျုပ်တို့ ဖုန်းရှီးကျွန်းရဲ့ လူဦးရေ တိုးတက်နှုန်းက အရမ်းမြန်လွန်းနေလို့ပဲ...”
"မြို့တွေ ထပ်မဆောက်ရင် လူဦးရေအမြောက်အမြားကို ဆန့်တော့မှာ မဟုတ်ဘူး...”
လော့ကျင်းပေါင်က ခေါင်းညိတ်ကာ ထိုသတင်းမှာ အမှန်ဖြစ်ကြောင်း ဝန်ခံလိုက်၏။
လွန်ခဲ့သော နှစ်ပေါင်းတစ်ရာအတွင်း ဖုန်းရှီးကျွန်းတွင် ကြီးမားသော ပြောင်းလဲမှုများ ဖြစ်ပေါ်ခဲ့သည်မှာ ထင်ရှားလှသည်။
လူသားများသည် ဤကျွန်းကြီးကို စတင်စိုးမိုးလာပြီး ကျွန်း၏ နေရာအနှံ့အပြားသို့ မိမိတို့၏ နယ်မြေများကို ချဲ့ထွင်ခဲ့ကြ၏။
ထိုသို့ဖြင့် မြို့ပြအသစ်များ တစ်လုံးပြီးတစ်လုံး ပေါ်ထွန်းလာခဲ့သည်။
လူဦးရေမြောက်မြားစွာသည် တိုးပွားလာခဲ့ပြီး ဖုန်းရှီးမြို့တော်အတွင်း၌သာ ပိတ်မိနေရန် မလိုတော့ပေ။
တစ်နည်းအားဖြင့် ဖုန်းရှီးကျွန်းသည် လူသားတို့၏ နိုင်ငံတစ်ခုကဲ့သို့ ဖြစ်လာခဲ့ချေပြီ။
ဖုန်းရှီးမြို့တော်သည် လူသားမျိုးနွယ်၏ မြို့တော်ကြီး ဖြစ်လာပြီး အခြားမြို့ငယ်များသည် အရပ်ရပ်၌ ပျံ့နှံ့တည်ရှိနေကြသည်။
လမင်းကြီးကို ကြယ်တာရာများ ဝန်းရံထားသည့်နှယ်ပင်။
ယခုအချိန်တွင် ဖုန်းရှီးကျွန်း၌ မြို့ပေါင်း တစ်ရာ့သုံးဆယ့်ခြောက်မြို့ ပေါ်ထွန်းလာခဲ့ပြီ ဖြစ်သည်။
မြို့တစ်မြို့စီသည် လူဦးရေ သန်းရာနှင့်ချီ၍ ဆံ့ပေသည်။
လွန်ခဲ့သော နှစ်ပေါင်းတစ်ရာအတွင်း ဖုန်းရှီးကျွန်း၏ လူဦးရေမှာ အလွန်အမင်း တိုးပွားလာခဲ့ပြီး ယခုအချိန်တွင် ဘီလီယံတစ်ရာခန့်အထိ ရှိနေပြီ ဖြစ်လေသည်။
လူဦးရေတိုးတက်မှု ဤမျှ မြန်ဆန်ရခြင်းမှာ အကြောင်းရင်း ရှိပေသည်။
အဘယ်ကြောင့်ဆိုသော် လွန်ခဲ့သော နှစ်တစ်ရာအတွင်း ဖုန်းရှီးကျွန်းမှ လူသားများမှာ သေဆုံးမှု အလွန်နည်းပါးခဲ့သောကြောင့် ဖြစ်၏။
လူသားများသည် ကျင့်ကြံခြင်းကို တတ်မြောက်လာပြီးနောက် သက်တမ်းမှာ များစွာ ပိုမိုရှည်လျားလာခဲ့သည်။ အနည်းဆုံးအနေဖြင့် ရွှေအမြုတေအဆင့်သို့ တက်လှမ်းနိုင်ပြီး သက်တမ်း လေးငါးရာနှစ်အထိ ရရှိကြသဖြင့် သက်ကြီးရွယ်အိုများ မသေဆုံးသေးမီ ကလေးသူငယ်အသစ်များ ဆက်တိုက် မွေးဖွားလာကြခြင်း ဖြစ်ပေသည်။
ထို့ကြောင့် ဖုန်းရှီးကျွန်း၏ လူဦးရေမှာ သဘာဝအတိုင်း အဆက်မပြတ် တိုးပွားလာနေတော့သည်။
ကံကောင်းသည်မှာ ဖုန်းရှီးကျွန်းသည် ကီလိုမီတာနှစ်သန်းခန့် ကျယ်ဝန်းပြီး လူဦးရေ ထရီလီယံချီ၍ ဆံ့နိုင်ပေသည်။
ထို့ကြောင့် လတ်တလောတွင် ဖုန်းရှီးကျွန်း၏ လူဦးရေကန့်သတ်ချက်ကို စိုးရိမ်ရန် မလိုသေးပေ။
နောက်ထပ် အချိန်အတော်ကြာအောင် ဆက်လက် ဖွံ့ဖြိုးတိုးတက်နိုင်သေးသည်။
"ဘိုးဘေး... ဒါက တကယ်ကို ထူးဆန်းလွန်းတယ်...”
"အမှန်အတိုင်းပြောရရင် ကျုပ်တို့ ကြယ်ကွဲပင်လယ်ကို ရောက်လာတာ နှစ်ပေါင်းနှစ်ရာကျော်ပြီ မဟုတ်လား...”
"ဖုန်းရှီးမြို့ရဲ့ သိုလှောင်ထားတဲ့ ရင်းမြစ်တွေက ဘယ်လောက်ပဲများများ အခုလောက်ဆို ကုန်နေရမှာ...”
"ဒါပေမဲ့ ဘာလို့ ဒီနေ့အထိ ကျုပ်တို့ရဲ့ ရင်းမြစ်တွေက မကုန်သွားတဲ့အပြင် ပိုတောင် များလာရတာလဲ...”
"ဈေးကွက်ထဲမှာလည်း ကျင့်ကြံရေးရင်းမြစ်မျိုးစုံက ပိုပိုများလာသလိုပဲ...”
လှေထိုးသားအများအပြားမှာ အလွန် ဇဝေဇဝါ ဖြစ်နေကြ၏။
ဖုန်းရှီးကျွန်း၏ ရင်းမြစ်များမှာ မည်မျှပင် ကြွယ်ဝစေကာမူ လိုအပ်သမျှ ရင်းမြစ်အားလုံး ရှိနေရန်မှာ မဖြစ်နိုင်ပေ။
အခြားနေရာများမှ သက်ရှိများနှင့် ကုန်သွယ်မှုပြုလုပ်မှသာ ကျင့်ကြံရေးရင်းမြစ်အမြောက်အမြားကို အပြန်အလှန် ဖလှယ်ရရှိနိုင်မည် ဖြစ်၏။
ပြဿနာမှာ ယခုအခါ ဖုန်းရှီးကျွန်းသည် ပြင်ပကမ္ဘာနှင့် လုံးဝ အဆက်အသွယ် မရှိပေ။ သို့ဆိုလျှင် ဤမျှများပြားသော ရင်းမြစ်များကို မည်သည့်နေရာမှ ရရှိနေသနည်း။
"ဟားဟား... မင်းတို့ မသိတာလည်း မဆန်းပါဘူး...”
"ကျုပ်တို့က ပြင်ပနဲ့ အဆက်အသွယ် မရှိဘူးလို့ ဘယ်သူပြောလဲ...”
"တကယ်တော့ တာအိုရောင်းရင်းကျိုးက အခြားကျွန်းတွေကို ကူးသန်းနိုင်တဲ့ တည်နေရာရွှေ့ပြောင်းအစီအရင်တစ်ခုကို အစောကြီးတည်းက ရှာတွေ့ထားပုံရတယ်...”
"ဒီကာလအတွင်း ကျွန်းပေါ်မှာ တွေ့နေရတဲ့ ရင်းမြစ်တွေအားလုံးက တာအိုရောင်းရင်းကျိုးက တခြားနေရာကနေ ဝယ်လာပေးတာတွေချည်းပဲ...”
"ဒါကြောင့် ကျုပ်တို့ ဖုန်းရှီးကျွန်းမှာ ကျင့်ကြံရေးရင်းမြစ်တွေ မပြတ်လပ်ဘဲ ရှိနေတာပေါ့...”
လော့ကျင်းပေါင်က လျှို့ဝှက်ချက်တစ်ခုကို ဖွင့်ဟပြောပြလိုက်၏။
ကျိုးစွေ့သည် ဖုန်းရှီးကျွန်းတွင် ထုတ်လုပ်သော မန္တန်အဆောင်များ၊ ဆေးလုံးများ၊ မှော်ရတနာများစွာကို အခြားကျွန်းများသို့ သွားရောက် ရောင်းချနေခြင်းပင် ဖြစ်သည်။
ထို့နောက် စိတ်ဝိညာဉ်ကျောက်တုံးများနှင့် အင်မော်တယ်သလင်းကျောက်များကို အသုံးပြုကာ လိုအပ်သော ကျင့်ကြံရေးရင်းမြစ်များကို ပြန်လည် ဝယ်ယူခဲ့လေသည်။
ဤသို့ အသွားအပြန် ပြုလုပ်ခြင်းဖြင့် များပြားလှသော ကုန်သွယ်မှု အကျိုးအမြတ်များကို ရရှိခဲ့၏။
ဤသည်ကပင် ဖုန်းရှီးကျွန်းမှ ကျင့်ကြံသူများ၏ လိုအပ်ချက်ကို ဖြည့်ဆည်းပေးနိုင်ခဲ့ခြင်း ဖြစ်ပေသည်။
"ဆိုလိုတာက ဘိုးဘေးကျိုးက ကျုပ်တို့ ဖုန်းရှီးကျွန်းရဲ့ ကုန်သွယ်မှုတစ်ခုလုံးကို လက်ဝါးကြီးအုပ်ထားတာပေါ့...”
လူအများအပြားမှာ မျက်လုံးများ ပြူးသွားကြလေသည်။
ကျိုးစွေ့သည် ဤလုပ်ငန်းမှတစ်ဆင့် စည်းစိမ်ဥစ္စာ မည်မျှပင် ရရှိထားမည်ကို သူတို့ မခန့်မှန်းနိုင်တော့ပေ။
အခုလောက်ဆိုလျှင် သူသည် မဟာသူဌေးကြီးတစ်ဦး ဖြစ်နေလောက်ချေပြီ။
"မတတ်နိုင်ဘူးလေ။ အခုချိန်မှာ ကျုပ်တို့က တာအိုရောင်းရင်းကျိုးကိုပဲ မှီခိုနိုင်တာ...”
"ပြီးတော့ တာအိုရောင်းရင်းကျိုးမှာ အဲဒီလို အင်အားမျိုး ရှိတယ်...”
"သူက လေဟာနယ်သန့်စင်ခြင်းအဆင့် ဘိုးဘေးတစ်ယောက်တင် မဟုတ်ဘဲ ဘေးနားမှာလည်း လေဟာနယ်သန့်စင်ခြင်းအဆင့် အဖော်မွန်သုံးယောက်တောင် ရှိသေးတယ်...”
"ဖုန်းရှီးမြို့ရဲ့ အာဏာအားလုံးက သူ့လက်ထဲမှာပဲ ရှိနေတာ၊ ဘယ်သူက ဘာပြောရဲမှာလဲ...”
"တကယ်တော့ တာအိုရောင်းရင်းကျိုးသာ မရှိရင် ကျုပ်တို့ ပြင်ပလောကနဲ့ ဆက်သွယ်ဖို့ လမ်းစတောင်ရှိမှာ မဟုတ်ဘူး...”
"ကျုပ်တို့ရဲ့ အင်အားလေးနဲ့ ကြယ်ကွဲပင်လယ်ထဲ လျှောက်သွားမယ်ဆိုရင် မျိုးနွယ်ခြား ကျင့်ကြံသူတွေရဲ့ ဝါးမြိုတာခံရပြီး အရိုးတောင် ကျန်မှာမဟုတ်ဘူး...”
လော့ကျင်းပေါင်က သက်ပြင်းချကာ ပြောလိုက်၏။
အချို့သော လေဟာနယ်သန့်စင်ခြင်းအဆင့် ကျင့်ကြံသူများသည် ကျိုးစွေ့၏ ကုန်သွယ်မှုလမ်းကြောင်းကို မနာလိုဖြစ်ကြသော်လည်း သူတို့၌ တတ်နိုင်သည့် အစွမ်းမရှိကြပေ။
တစ်ဖက်လူကို ဤကုန်သွယ်မှုလမ်းကြောင်း လွှဲပြောင်းပေးရန် မည်သို့မျှ ဖိအားမပေးရဲကြချေ။
ထို့အပြင် တစ်ဖက်လူကိုသာ အားကိုးနေရသေးသည်။
မည်သူမဆို ဆန့်ကျင်ဘက်အမြင်ကို ပြောရဲပါက ဤကျွန်းပေါ်မှ ထာဝရ ပျောက်ကွယ်သွားရပေလိမ့်မည်။
အမှန်တကယ်ပင် ယခင်က ထိုသို့သော ခေါင်းမာသူများ ရှိခဲ့ဖူးသည်။
သို့သော် ထိုသူများသည် နောက်တစ်နေ့ နံနက်အထိပင် အသက်မရှင်နိုင်ခဲ့ကြချေ။
သူတို့အားလုံး ပူးပေါင်းကြလျှင်ပင် ကျိုးစွေ့၏ပြိုင်ဘက် မဖြစ်နိုင်ဘဲ မျက်စိတစ်မှိတ်အတွင်း၌ပင် အလောင်းပင် ရှာမရအောင် သတ်ဖြတ်ခြင်းခံရမည် ဖြစ်၏။
"ကောင်းပါပြီ...”
ကျင့်ကြံသူအများအပြားက ခေါင်းညိတ်လိုက်ကြသည်။ သူတို့သည် အဆင့်နိမ့်ကျင့်ကြံသူများသာ ဖြစ်သဖြင့် ဤလမ်းကြောင်းကို လွှဲပေးလိုက်လျှင်ပင် အကျိုးအမြတ် ခွဲဝေရရှိနိုင်မည် မဟုတ်ပေ။
သူတို့အတွက် လုံလောက်သော ကျင့်ကြံရေးရင်းမြစ်များကို ဝယ်ယူနိုင်သရွေ့ အဆင်ပြေလှပေသည်။
အကျိုးအမြတ်အများစုကို မည်သူက ရရှိသည်ဖြစ်စေ သူတို့၌ စွက်ဖက်ပိုင်ခွင့် မရှိပေ။
"ကျုပ် ခန့်မှန်းတာ မမှားဘူးဆိုရင်တော့ တာအိုရောင်းရင်းထောင်လည်း မကြာခင် ခန္ဓာပေါင်းစည်းခြင်းအဆင့်ကို တက်လှမ်းနိုင်တော့မယ် ထင်တယ်...”
လော့ကျင်းပေါင်က ရေရွတ်လိုက်၏။
ထောင်ချီလီသာ ခန္ဓာပေါင်းစည်းခြင်းအဆင့်သို့ ရောက်ရှိသွားပါက ကျိုးစွေ့၏ အုပ်စုသည် ပိုမို ခိုင်မာတောင့်တင်းလာမည် ဖြစ်ပြီး မည်သူမျှ ရန်မမူရဲတော့ပေ။
…