အခန်း ၆၉၉

အခန်း (၆၉၉)။

ဗဟိုကမ္ဘာတွင် အကျဉ်းထောင်တစ်ခု ရှိနေသည်။

ထိုအကျဉ်းထောင်အတွင်း၌ ဗဟိုကမ္ဘာက နှစ်ပေါင်းများစွာအတွင်း ဖမ်းဆီးချိတ်ပိတ်ထား ခဲ့သည့် ထိပ်သီးပညာရှင်များစွာကို ပိတ်လှောင်ထားရသည်။ ဤသတင်းမှာ ဟုန်ယွိကို အမှန်ပင် တုန်လှုပ်သွားစေခဲ့သည်။

သို့သော် သေချာစဉ်းစားကြည့်လျှင် ဤစကားမှာ အလွန်ပင် ယုတ္တိတန်လှ၏။ ဗဟိုကမ္ဘာ ကဲ့သို့ နေရာမျိုးတွင် အကျဉ်းထောင်တစ်ခု မရှိဘဲနေမည် မဟုတ်သလို၊ သူတို့ဖမ်းမိသမျှ ပညာရှင်တိုင်းကိုလည်း သတ်ပစ်မည် မဟုတ်ပေ။ အကြောင်းမှာ ပညာရှင်များဆိုသည်မှာ အလွန်အဖိုးတန်သောကြောင့် ဖြစ်သည်။

အထွက်အထိပ် လူသားအင်မော်တယ် ပညာရှင်တစ်ဦးကို ဖမ်းဆီးနိုင်ခဲ့လျှင်ပင်၊ သူ၏ ခန္ဓာကိုယ်ကို သန့်စင်ပြီး မှတ်ဉာဏ်များကို ထုတ်ယူနိုင်သော်လည်း နောက်ထပ် အထွက်အထိပ် လူသားအင်မော်တယ်တစ်ဦးကိုတော့ အသစ်ဖန်တီး၍ မရနိုင်ပေ။

ဗဟိုကမ္ဘာ၏ အကျဉ်းထောင်ထဲတွင် လီဖူယန်လော့၊ ရှောင်ရှိူက်နှင့် အနန္တဘိုးဘေး သခင် တို့ကဲ့သို့ ပုဂ္ဂိုလ်များစွာ ရှိနေပေလိမ့်မည်။ အကယ်၍ ဟုန်ယွိသည် ထိုပုဂ္ဂိုလ်ကြီးများကို ကယ်တင်နိုင်ပြီး တစ်ယောက်ချင်းစီကို စည်းရုံးနိုင်ခဲ့မည်ဆိုလျှင်၊ ဟုန်ယွိ၏ အင်အားစုမှာ မည်မျှအထိ ကြီးမားလာမည်နည်း။ သူသည် မဟာကမ္ဘာလောကတစ်ခုလုံးကို သိမ်းပိုက် နိုင်ရုံသာမက၊ ကောင်းကင်အပြင်ပနယ်မြေမှ ကျူးကျော်မှုများကိုပင် ခုခံကာကွယ်နိုင်ပြီး ကောင်းကင်နှင့် မြေကြီးကြား ထာဝရတည်မြဲသော ဖြောင့်မတ်ခြင်းလမ်းစဉ်ကိုတောင် တည်ထောင်နိုင်ပေလိမ့်မည်။

လီဖူယန်လော့က ဤအကြောင်းကို ပြောလိုက်သည်နှင့် ဟုန်ယွိက သူ၏ဉာဏ်ပညာဖြင့် ဖြစ်နိုင်ခြေအားလုံးကို ချက်ချင်း တွေးတောတွက်ချက်လိုက်မိသည်။ သူ၏ ကြီးမားသော ထိုက်ကျိမူလစိတ်ဝိညာဉ်မှာ အဟုန်ဖြင့် လည်ပတ်နေပြီး ‘အနာဂတ်သခင်’ ၏ တွက်ချက်မှု များကဲ့သို့ပင် အတွေးစများ တဖျတ်ဖျတ် ထွက်ပေါ်နေတော့သည်။

ဟုန်ယွိ၏ လက်ရှိ ထိုက်ကျိမူလစိတ်ဝိညာဉ်၏ နားလည်နိုင်စွမ်းနှင့် တွက်ချက်နိုင်စွမ်းမှာ ‘အနာဂတ်သခင်’ ထက် သာလွန်နေသော်လည်း၊ စိတ်ဝိညာဉ်စွမ်းအား သုံးစွဲရမူက အလွန် များပြားလှသဖြင့် နေ့ညမပြတ် မနားတမ်း တွက်ချက်နိုင်စွမ်းရှိသည့် ‘အနာဂတ်သခင်’ ကိုတော့ ထိုအချက်တွင် မယှဉ်နိုင်သေးပေ။

“အဲဒီပညာရှင်တွေကို ဘယ်နေရာမှာ အကျဉ်းချထားတာလဲ။ ပြီးတော့ ပညာရှင်တွေ ဘယ်လောက်များများ ရှိနေလဲ” ဟုန်ယွိက စကားလုံးတစ်လုံးချင်းစီကို ရှင်းလင်းစွာ မေးမြန်းလိုက်ရင်း လီဖူယန်လော့ကို စိုက်ကြည့်လိုက်သည်။

သူမ၏ သစ္စာခံမှုကို ရရှိထားသော်လည်း ဟုန်ယွိမှာ အနည်းငယ် စိုးရိမ်စိတ် ရှိနေဆဲ ဖြစ်သ ဖြင့် သတိလက်လွတ် မထားရဲသေးပေ။ အကြောင်းမှာ အထွက်အထိပ် လူသားအင်မော် တယ် တစ်ဦး၏ အတွေးအမြင်များမှာ အသွင်မျိုးစုံပြောင်းလဲနေပြီး နားလည်ရန် ခက်ခဲ သောကြောင့် ဖြစ်သည်။

ရှောင်ရှိူက်ကို ဥပမာထားကြည့်လျှင်ပင် သိနိုင်သည်။ သူသည် ဧကရာဇ် ယန်ဖန်ဘက်၌ ခိုလှုံနေသော်လည်း သူ၏ရင်ထဲ၌ ကိုယ်ပိုင်အစီအစဉ်များ ရှိနေဆဲ ဖြစ်သည်။ နောင်တချိန် အရေးကြီးဆုံးအချိန်၌ သူသည် သစ္စာဖောက်သွားနိုင်သည့် အခြေအနေမျိုး ရှိသည်။

ထို့အပြင် ဤလီဖူယန်လော့မှာလည်း ဟုန်ရွှန်ကျိနှင့် ပတ်သက်မှုအချို့ ရှိနေခဲ့သူ ဖြစ်သည်။ ထို့ကြောင့် ဟုန်ယွိ အနေဖြင့် သူမကို လုံးဝ ပုံအပ်ယုံကြည်လောက်သည် အထိ တော့ မမိုက်မဲပေ။

သို့သော် သူမ ပြောပြလိုက်သည့် သတင်းကတော့ ဟုန်ယွိကို အမှန်ပင် ဆွဲဆောင်သွားခဲ့ သည်။

...

“အဲဒီနေရာက ကြယ်စုတန်းတစ်ခုရဲ့ အလယ်ဗဟိုတည့်တည့် အလွန်ဝေးကွာတဲ့ ကြယ်ကြီး ပေါ်မှာ ရှိနေတာပါ။ အဲဒီကြယ်ကို ‘သေမင်းကြယ်’ လို့ခေါ်တယ်။ ဗဟိုကမ္ဘာက အဲဒီ ကြယ်တစ်ခုလုံးကို အကျဉ်းထောင်အဖြစ် အသုံးပြုပြီး မရေတွက်နိုင်တဲ့ ပညာရှင်တွေကို အကျဉ်းချထားတာပါ။ အဲဒီနေရာကို ‘သေမင်းတိတ်ဆိတ်ခြင်း ကောင်းကင် အကျဉ်းထောင်’လို့ ခေါ်ကြတယ်။ အဲဒါက ဘယ်သူမှ မသိနိုင်တဲ့ လျှို့ဝှက်ဖြစ်ပြီး၊ ဒဏ္ဍာရီလာ မူလနဝမချောက်နက် နတ်ဘုရားနယ်မြေထက်တောင် ပိုပြီးတော့ လျှို့ဝှက် ဆန်းကြယ်ပြီး အန္တရာယ်များတယ်။ အဲဒီအကျဉ်းထောင်ထဲကို ရောက်သွားပြီဆိုရင် ကိုယ့်အသက်ကို ကိုယ်တိုင် မပိုင်တော့ဘူး။ အဲဒါက တကယ့်ကို ကြောက်စရာကောင်းတဲ့ နေရာပဲ။”

လီဖူယန်လော့က ပြောပြလိုက်သည်။ သူမသည် ‘သေမင်းတိတ်ဆိတ်ခြင်း ကောင်းကင် အကျဉ်းထောင်’ ဟူသော စကားလုံးကို ပြောလိုက်ချိန်တွင် သူမ၏ ခန္ဓာကိုယ်မှာ သိသိ သာသာ တုန်ယင်သွားပါသည်။ ထိုစကားလုံးက သူမအတွက် အလွန်ပင် ကြောက်စရာ ကောင်းသော အရာတစ်ခု သို့မဟုတ် သူမ၏ရင်ထဲမှ အနာဟောင်းတစ်ခု ဖြစ်နေသည်မှာ သိသာလှသည်။

“သေမင်းတိတ်ဆိတ်ခြင်း ကောင်းကင်အကျဉ်းထောင် ဟုတ်လား။”

ဟုန်ယွိသည် စစ်ဘက်ရေးရာဝန်ကြီး၏ မှတ်ဉာဏ်များအတွင်း၌ ဂရုတစိုက် ထပ်မံ၍ ရှာဖွေလိုက်သည်။ အချိန်တော်တော်ကြာ ရှာဖွေပြီးနောက်မှာတော့ စစ်ဘက်ရေးရာ ဝန်ကြီး၏ ကြီးမားသော မှတ်ဉာဏ်ဘဏ်တိုက်ကြီးအတွင်းမှ ထိုအကျဉ်းထောင်နှင့် ပတ်သက်သည့် အချက်အလက်အချို့ကို တွေ့ရှိလိုက်ရသည်။

၎င်းမှာ မှတ်ဉာဏ်ပင်လယ်ပြင်ကြီးထဲ၌ မြုပ်နှံနေသော အလွန်သေးငယ်သည့် မှတ်ဉာဏ် စလေးတစ်ခုသာ ဖြစ်သည်။

စစ်ဘက်ရေးရာဝန်ကြီး၏ မှတ်ဉာဏ်များမှာ အလွန်တရာ ကြီးမားကျယ်ပြန့်လွန်းသည်။ ယခုအချိန်တွင် ဟုန်ယွိသည် ကောင်းကင်အပြင်ပနယ်မြေ ဆိုင်ရာ အခြေခံအချက်အလက် များ၊ ဝန်ကြီးအသီးသီး၏ အကြောင်းများနှင့် အရေးကြီးသော စစ်ပွဲမြင်ကွင်းအချို့ကိုသာ ရင်းနှီးကျွမ်းဝင်သေးသည်။ မှတ်ဉာဏ်ပင်လယ်ထဲ၌ နစ်မြုပ်နေသော အပိုင်းအစများကိုမူ သူ သိပ်ပြီး ဂရုမပြုမိခဲ့ပေ။

အကြောင်းမှာ မှတ်ဉာဏ်များမှာ အလွန်များပြားလွန်းသဖြင့် အားလုံးကို လေ့လာနေပါက သူ၏ စိတ်ဝိညာဉ်အပေါ် ဝန်ထုပ်ဝန်ပိုး ဖြစ်စေနိုင်သောကြောင့်ပင်။ အရာရာကို အလွန် အကျွံ မှတ်သားထားခြင်းက စိတ်ဝိညာဉ်ကို ထိခိုက်စေနိုင်သည်။

ကျင့်ကြံခြင်း၏ အမြင့်ဆုံးအဆင့်တွင် လူတစ်ဦး၏ စိတ်အာရုံမှာ ဗလာဖြစ်နေရမည် ဖြစ်ပြီး၊ မည်သည့်အရာကိုမျှ မတွေးတောဘဲ စကြဝဠာနှင့် တစ်သားတည်း ဖြစ်နေရမည်။

ထိုခဏအတွင်းမှာပင် စစ်ဘက်ရေးရာဝန်ကြီး၏ မှတ်ဉာဏ်များထဲမှ ‘သေမင်းတိတ်ဆိတ် ခြင်း ကောင်းကင်အကျဉ်းထောင်’ နှင့် ပတ်သက်သမျှကို အကုန်ဆွဲထုတ်လိုက်သည်။ ထိုအခါ ထူးဆန်းသော ကြယ်ကြီးတစ်လုံးမှာ ဟုန်ယွိ၏ ထိုက်ကျိမူလစိတ်ဝိညာဉ် အတွင်း ၌ ပေါ်ထွက်လာတော့သည်။

ထိုကြယ်မှာ ဟင်းလင်းပြင်ထဲ၌ တစ်စင်းတည်း အထီးကျန် တည်ရှိနေခြင်း ဖြစ်သည်။

သူ့ဘေးနားတွင် မည်သည့်ကြယ်မျှ မရှိပေ။ စကြဝဠာ၏ အနက်ရှိုင်းဆုံးနေရာ၌ လုံးဝ အဆက်အသွယ်ပြတ်တောက်၍ အထီးကျန်စွာ တည်ရှိနေသော အရာတစ်ခုနှင့်ပင် တူနေသည်။ အခြားအရာများကို ကြည့်နေစရာ မလိုဘဲ ဤ ‘သေမင်းတိတ်ဆိတ်ခြင်း ကြယ်’ ကို ကြည့်လိုက်ရုံနှင့် ဟုန်ယွိ၏ ရင်ထဲ၌ အထီးကျန်မှုများ လှိုင်းထသွားကာ တစ်ကိုယ်လုံး မလုံခြုံသကဲ့သို့ ခံစားလိုက်ရ၏။ သူ့ရင်ထဲမှာ အသည်းခိုက်အောင် မျှော်လင့် ချက်မဲ့သည့် မိစ္ဆာအတွေးများ ပေါ်ပေါက်လာသည်။

“တကယ်ကို ဆန်းကြယ်တဲ့ နေရာပါလား” ဟုန်ယွိက ရေရွတ်လိုက်မိသည်။ “ဒီကြယ် တစ်စင်းတည်းမှာတင် အလွန်အစွမ်းထက်တဲ့ နတ်ဘုရားစွမ်းအားတွေ သုံးထားတာပဲ။ ဒါကို ဘယ်သူက ဖန်တီးထားတာပါလိမ့်။”

ရုတ်တရက် ထိုကြယ်၏ အစွန်းပိုင်းတွင် စစ်ဘက်ရေးရာဝန်ကြီး ပေါ်လာသည်။ တစ်ချိန် တည်းမှာပင် သူ့နောက်မှ ပညာရှင်ရာပေါင်းများစွာ လိုက်ပါလာသည်။ ထိုပညာရှင်များမှာ စိတ်ဝိညာဉ် အစီအရင်အမျိုးမျိုးကို ခင်းကျင်းထားကြပြီး မသေမျိုးစစ်အလံနှင့် တူသော အလံတော်တစ်ခုကို သယ်ဆောင်ထားကြသည်။ ထိုအလံ၏ အလယ်ဗဟို၌ ပြင်းထန်သော အရှိန်အဝါတစ်ခု ရှိနေသည်။

၎င်းမှာ စစ်ဘက်ရေးရာဝန်ကြီးက ချိတ်ပိတ်ထားသည့် ပညာရှင်တစ်ဦး ဖြစ်သည်။

စစ်ဘက်ရေးရာဝန်ကြီးသည် ‘သေမင်းတိတ်ဆိတ်ခြင်း ကောင်းကင်အကျဉ်းထောင်’ ၏ အစွန်းပိုင်းအထိသာ သွားခဲ့ခြင်း ဖြစ်သည်။ သူသည် အတွင်းသို့ မဝင်ဘဲ တစ်စုံတစ်ယောက် ကို စောင့်ဆိုင်းနေသကဲ့သို့ ရှိနေသည်။ ရုတ်တရက် အကျဉ်းထောင်၏ အစွန်းပိုင်းရှိ ဟင်းလင်းပြင်မှာ အနည်းငယ် တုန်ခါသွားပြီး လူရိပ်တစ်ခု ထွက်ပေါ်လာသည်။

ရွှီဝူယွိ….

ဟုန်ယွိသည် ဤလူရိပ်ကို ကြည့်လိုက်သည်နှင့် ၎င်းမှာ ရွှီဝူယွိ ဖြစ်ကြောင်း သိလိုက်သည်။

“ရွှီဝူယွိက ဒီအကျဉ်းထောင်ကို စောင့်ကြပ်သူ ဖြစ်နေတာကိုး။ ဟုတ်တာပေါ့... သူလို လူမျိုးမှပဲ ဒီအကျဉ်းထောင်ကို စောင့်ကြပ်နိုင်မှာ။” ဟုန်ယွိ ကြက်သီးပင် ထသွားမိသည်။ “ဒါပေမဲ့ အခု သူက ဒီမဟာကမ္ဘာလောကကို ရောက်နေတော့၊ ဒီအကျဉ်းထောင်ရဲ့ အကာအကွယ်တွေက တော်တော်လေး အားနည်းနေမှာပဲ။”

ဟုန်ယွိ စဉ်းစားနေစဉ်မှာပင် သူ၏ မှတ်ဉာဏ်ထဲမှ ရွှီဝူယွိသည် စစ်ဘက်ရေးရာဝန်ကြီး၏ ရှေ့တွင် ဖျတ်ခနဲ ပေါ်လာသည်။ ဧရာမ လက်ကြီးတစ်ဖက်က မသေမျိုးစစ်အလံ အတွင်း၌ ချိတ်ပိတ်ခံထားရသော အစွမ်းထက် ပုဂ္ဂိုလ်တစ်ဦးကို ကြမ်းတမ်းစွာ လှမ်းဖမ်းယူလိုက် သည်။ ထို့နောက် သူသည် မည်သည့်စကားမျှ မဆိုဘဲ ချက်ချင်းပင် နောက်သို့ ပျံသန်းပြီး ပျောက်ကွယ်သွားသည်။ တစ်ချိန်တည်းမှာပင် စစ်ဘက်ရေးရာဝန်ကြီးလည်း နောက်သို့ ပြန်လည် ပျံသန်းထွက်ခွာသွားခဲ့သည်။

ထိုအခါ ‘သေမင်းတိတ်ဆိတ်ခြင်းကြယ်’ မှာလည်း သူ၏ မှတ်ဉာဏ်ထဲမှ ပျောက်ကွယ် သွားလေသည်။

ဤကဲ့သို့ မြင်ကွင်းမျိုးမှာ နှစ်ကြိမ် သုံးကြိမ်ခန့် ပေါ်ပေါက်ခဲ့ဖူးသည်။ ၎င်းတို့မှာ စစ်ဘက် ရေးရာဝန်ကြီးက ဖမ်းဆီးပြီး ‘သေမင်းတိတ်ဆိတ်ခြင်းကြယ်’ ပေါ်တွင် ချုပ်နှောင်ထားရန် လွှဲပြောင်းပေးခဲ့သည့် အစွမ်းထက် ပညာရှင်များ ဖြစ်ကြသည်။

စစ်ဘက်ရေးရာဝန်ကြီး၏ မှတ်ဉာဏ်ထဲတွင် ထိုအကျဉ်းထောင်နှင့် ပတ်သက်ပြီး အချက် အလက် များများစားစား မရှိပေ။ ဝန်ကြီးအားလုံးအတွက်ပင် ထိုအကျဉ်းထောင်မှာ လျှို့ဝှက်ဆန်းကြယ်သော နေရာတစ်ခု ဖြစ်သည်။ ထိုအကျဉ်းထောင်မှာ အရေးအကြီးဆုံး ရာဇဝတ်သားများကိုသာ ချုပ်နှောင်သည့် သီးသန့်အကျဉ်းထောင် ဖြစ်သည်။

ထို ‘သေမင်းတိတ်ဆိတ်ခြင်း ကောင်းကင်အကျဉ်းထောင်’ နှင့် ပတ်သက်သမျှ ကိစ္စရပ် အားလုံးကို စွမ်းအင်ဘုရင် ရွှီဝူယွိကသာ ဆုံးဖြတ်ပုံရသည်။

သို့သော် ဟုန်ယွိအနေဖြင့် ထိုအကြောင်းကို ရွှီဝူယွိထံမှ မေးမြန်း၍ မရနိုင်ပေ။ ထို့အပြင် ထိုအကျဉ်းထောင်ထဲ၌ မည်ကဲ့သို့ အစွမ်းထက် ပုဂ္ဂိုလ်များ ပိတ်လှောင်ထားရသည်ကို လည်း သူ မသိပေ။ သို့သော် စစ်ဘက်ရေးရာဝန်ကြီး ဖမ်းဆီးခဲ့သည့် ပုဂ္ဂိုလ်အချို့မှာ ကောင်းကင် အပြင်ပနယ်မြေရှိ ကြယ်စုတန်းများကို အုပ်ချုပ်သော ကြယ်သခင်များ ဖြစ်ကြသည်။ သို့သော် စစ်ဘက်ရေးရာဝန်ကြီး၏ အမြင်အရ ဆိုလျှင် ထိုပုဂ္ဂိုလ်များသည် ထိုအကျဉ်းထောင်ထဲ၌ သာမန် အကျဉ်းသားများသာ သတ်မှတ်ထားပုံရသည်။

...

ဟုန်ယွိ၏ မျက်နှာမှာ အတွေးများစွာဖြင့် မရေမရာ ဖြစ်နေသည်။ သူက စစ်ဘက်ရေးရာ ဝန်ကြီး၏ မှတ်ဉာဏ်များကို ရှာဖွေနေစဉ်အတွင်း လီဖူယန်လော့မှာ မလှုပ်မယှက်ဘဲ တိတ်ဆိတ်စွာ စောင့်ဆိုင်းနေခဲ့သည်။ သူမသည် ဟုန်ယွိ စကားပြောလာမည့်အချိန်ကို စိတ်ရှည်လက်ရှည် စောင့်နေခြင်း ဖြစ်သည်။

အထွက်အထိပ် လူသားအင်မော်တယ် ပညာရှင်တစ်ဦးတွင် ဤမျှအထိ စိတ်ရှည်မှုမျိုး အမြဲတမ်း ရှိနေတတ်သည်။

“ဒီ ‘သေမင်းတိတ်ဆိတ်ခြင်း ကောင်းကင်အကျဉ်းထောင်’ အကြောင်းကို ဟုန်ရွှန်ကျိရော သိလား။ ပြီးတော့ မိတ်ဆွေ လီဖူက ဟုန်ရွှန်ကျိနဲ့ ဘယ်လိုလုပ်ပြီး ပတ်သက်မိခဲ့တာလဲ။” ဟုန်ယွိက စစ်ဘက်ရေးရာဝန်ကြီး၏ မှတ်ဉာဏ်များကို ဖယ်ထုတ်လိုက်ပြီး စိတ်ကို တည်ငြိမ်အောင် ထိန်းကာ လီဖူယန်လော့ကို ရုတ်တရက် မေးမြန်းလိုက်သည်။

“ဟုန်ရွှန်ကျိလည်း အဲဒီအကြောင်းကို သိတာပေါ့။ ဒါပေမဲ့ အဲဒီ အကျဉ်းထောင်ကို ဖောက်ဝင်ဖို့ သူ ဘယ်တုန်းကမှ အခွင့်အရေး မရခဲ့ဘူး။ ပြီးတော့ ဗဟိုကမ္ဘာက လူတွေက အရမ်း အစွမ်းထက်လွန်းတယ်။ ‘ယန်နတ်ဘုရား’ ပညာရှင်တစ်ယောက်တောင် ဗဟိုကမ္ဘာ တစ်ခုလုံးကို တစ်ယောက်တည်း ရင်ဆိုင်မယ်ဆိုရင် သေချာပေါက် သေရမှာပဲ။” လီဖူ ယန်လော့က ဘာမျှ မဖုံးကွယ်ဘဲ ပြောပြသည်။ “ဟုန်ရွှန်ကျိနဲ့ ကျွန်မတို့က မကြာခင်ကမှ စိတ်အာရုံကနေ တစ်ဆင့် ဆက်သွယ်မိကြတာပါ။ သူက ကျွန်မကို မဟာကမ္ဘာလောက ဘက် ပါလာအောင် အစွမ်းကုန် စည်းရုံးခဲ့တယ်။ ကျွန်မတို့နှစ်ယောက် သိုင်းပညာတွေ အပြန်အလှန် ဖလှယ်ခဲ့ကြတယ်။ ‘၃၃ ဘုံ ကောင်းကင်နန်းတော်’ ရဲ့ ထူးခြားတဲ့ သိုင်းကွက် ကို သူက ကျွန်မကို ပေးခဲ့ပြီး၊ ကျွန်မရဲ့ အစွမ်းထက် သိုင်းကွက်ကိုလည်း သူက သင်ယူခဲ့ တယ်။”

“သိုင်းပညာ ဖလှယ်ခဲ့ကြတာလား...” ဟုန်ယွိ ခေါင်းငြိမ့်လိုက်သည်။ “ဟုန်ရွှန်ကျိက သိုင်းပညာမှာ တကယ်ကို ကျွမ်းကျင်တာပဲ။ သူ့နားလည်နိုင်စွမ်းက အလွန်တရာ နက်ရှိုင်း တယ်။ သူက သွေးတစ်စက်မှပြန်လည်မွေးဖွားခြင်းအဆင့်ကို ရောက်နေပြီလား။”

“ဟုတ်တယ်... ရှင်ကရော သိုင်းပညာရဲ့ အမြင့်ဆုံးအဆင့်ဖြစ်တဲ့ သွေးတစ်စက်မှပြန်လည် မွေးဖွားခြင်း အဆင့်အကြောင်းကို ဘယ်လိုလုပ်ပြီး သိနေတာလဲ” လီဖူယန်လော့က အံ့အားတသင့် မေးလိုက်သည်။

“ဒါပေါ့... ကျွန်တော် သိတာပေါ့။ ဒါပေမဲ့ သွေးတစ်စက်မှ ပြန်လည်မွေးဖွားခြင်းအဆင့်က ဆန်းကြယ်ပြီး ရုပ်ခန္ဓာကိုယ်ကို မသေမျိုးနတ်ဘုရားစွမ်းအားတွေ ပိုင်ဆိုင်နိုင်တယ်ဆိုပေ မဲ့၊ အဲဒါက သိုင်းပညာရဲ့ အမြင့်ဆုံးအဆင့် မဟုတ်သေးဘူး။ အဲဒီအဆင့်ရဲ့ အထက်မှာ ‘အသွင်မျိုးစုံပြောင်းလဲခြင်း’ ဆိုတဲ့ နတ်ဘုရားစွမ်းအား နောက်တစ်ဆင့် ရှိသေးတယ်။ ကျွန်တော့် ခန္ဓာကိုယ်က ဘယ်အရာမဆို ပြောင်းလဲနိုင်တဲ့အဆင့်အထိ ကျင့်ကြံပြီးသားပဲ။”

ဟုန်ယွိက ဘာကိုမျှ ဖုံးကွယ်မထားဘဲ ပြောလိုက်သည်။

“ဘာ… သွေးတစ်စက်မှ ပြန်လည်မွေးဖွားခြင်းအဆင့် အထက်မှာ နောက်ထပ် အဆင့် တစ်ခု ရှိသေးတယ် ဟုတ်လား။ ကျွန်မကတော့ အဲဒီအဆင့်ပြီးရင် ‘ဟင်းလင်းပြင် ဖျက်ဆီး ခြင်း’ အဆင့်ကို ရောက်မယ်လို့ ထင်ထားတာ။ ဟုန်ရွှန်ကျိဟာ ‘ထျန်းဖန်ကြယ်’ ကနေ ရလာတဲ့ ‘အင်မော်တယ် နတ်ဘုရားဘုရင်’ ရဲ့ အသွေးအသား အပိုင်းအစတစ်ခုကို ဝါးမျို လိုက်ပြီး၊ အများကြီး နားလည်သွားကာ သွေးတစ်စက်မှပြန်လည်မွေးဖွားခြင်း အဆင့်ကို ရောက်သွားခဲ့တာပဲ။” ထိုသို့ပြောရင်း လီဖူယန်လော့မှာ အံ့အားသင့်နေမိသည်။ “မိတ်ဆွေ ယွိ... ရှင်က တာအိုကျင့်စဉ်ကို ကျင့်ကြံနေတာပဲ။ ရှင့်ခန္ဓာကိုယ်က လူသားအင်မော်တယ် အထွတ်အထိပ်ကို ရောက်ဖို့ မဖြစ်နိုင်ဘူးလေ။ ဘယ်လိုလုပ်ပြီး အဲဒီအဆင့်ရဲ့ အထက်ကို ရောက်နေရတာလဲ”

“ဘာလဲ... ခင်ဗျား ကျွန်တော့်ကို မယုံဘူးလား။ နတ်ဘုရားကျောက်တုံး ဝိညာဉ် သန္ဓေသား... ထွက်လာစမ်း။ အသွင်မျိုးစုံ ပြောင်းလဲပြလိုက်”

ဝုန်း….

အစွမ်းထက်သော ခန္ဓာကိုယ်တစ်ခုမှာ ဟင်းလင်းပြင်ကို ဖောက်ထွက်၍ လီဖူယန်လော့၏ ရှေ့တွင် ပေါ်လာသည်။ ထိုခန္ဓာကိုယ်မှာ နတ်ဘုရားကျောက်တုံး ဝိညာဉ်သန္ဓေသားပင် ဖြစ်သည်။ တခဏချင်းမှာပင် ထိုဝိညာဉ်သန္ဓေသားသည် ‘အသွင်မျိုးစုံပြောင်းလဲခြင်း’ အဆင့် ပညာရပ်ကို ပြသလိုက်သည်။ ဝိညာဉ်သန္ဓေသားသည် မရေမတွက်နိုင်သော ပုံရိပ်များအဖြစ် ပြောင်းလဲသွားပြီး၊ ထို့နောက် သေးငယ်လှသော မှော်သင်္ကေတ သန်းပေါင်း ၄၈၀ အဖြစ် ကွဲထွက်သွားသည်။

လီဖူယန်လော့မှာ မှင်သက်သွားတော့သည်။ သူမသည် တစ်ကိုယ်တည်း တီးတိုးရေရွတ် နေမိသော်လည်း သူမ ဘာတွေပြောနေသည်ကို မည်သူမျှ မသိနိုင်ပေ။

သူမသည် လူသားအင်မော်တယ် အထွတ်အထိပ်သို့ ရောက်နေသည့် ကြယ်သခင်တစ်ဦး ဖြစ်သော်လည်း၊ သိုင်းပညာ၏ အထွတ်အထိပ်ဖြစ်သော ‘အသွင်မျိုးစုံပြောင်းလဲခြင်း’ ပညာ နှင့် ရင်ဆိုင်လိုက်ရသည့်အခါတွင်မူ တုန်လှုပ်သွားခဲ့ရသည်။

မူလက ဟုန်ယွိသည် သူမ လုံးဝ အထင်ကြီး လေးစားသွားစေရန် ရည်ရွယ်ခဲ့ခြင်း ဖြစ်သည်။ ယခုအခါ ဤပညာရပ်ကို ပြသလိုက်သဖြင့် သူမမှာ အံ့ဩခြင်းများစွာဖြင့် အိပ်မက်မက် နေသကဲ့သို့ပင် ဖြစ်သွားတော့သည်။

မူလက ဟုန်ယွိသည် ကောင်းကင်အပြင်ပနယ်မြေသို့ စိတ်ဝိညာဉ် အတွေးစများဖြင့်သာ ခရီးလှည့်လည်ရန် ပြင်ဆင်ခဲ့သော်လည်း၊ ယခု ‘သေမင်းတိတ်ဆိတ်ခြင်း အကျဉ်းထောင်’ သတင်းကို ကြားလိုက်ရသည့်အခါတွင်မူ သူ၏ခန္ဓာကိုယ်ကိုပါ ဆင့်ခေါ်လိုက်ပြီး အကြီး အကျယ် တိုက်ခိုက်ရန် ပြင်ဆင်လိုက်ခြင်း ဖြစ်သည်။

ဗဟိုကမ္ဘာသည် အလွန်အန္တရာယ်များသော နေရာတစ်ခု ဖြစ်သည်။ အထူးသဖြင့် ဟုန်ယွိ ကဲ့သို့သော လူမျိုးအတွက် ပိုဆိုးပေသည်။ အကယ်၍ သူက စစ်ဘက်ရေးရာဝန်ကြီးကို သတ်လိုက်သည့် သတင်းသာ ပျံ့နှံ့သွားပါက၊ သူသည် သန်းပေါင်းများစွာသော လူများ၏ ဝိုင်းရံ တိုက်ခိုက်မှုကို ခံရနိုင်ပေသည်။

“ဒါ... ဒါဟာ တကယ်ပဲလား... သိုင်းပညာဆိုတာ ဘာလဲ ကျွန်မ အခုမှ နားလည်တော့ တယ်။ သိုင်းပညာကို ကျင့်ကြံတာကလည်း တကယ်ကို မသေမျိုးလမ်းစဉ်ပါလား။” လီဖူယန်လော့က တီးတိုးရေရွတ်လိုက်သည်။

ရှူး

ဟုန်ယွိက သူ၏ ခန္ဓာကိုယ်ကို ပြန်လည် ရုပ်သိမ်းလိုက်ပြီး ထိုက်ကျိမူလစိတ်ဝိညာဉ်မှာ သူ၏ ခန္ဓာကိုယ်အတွင်းသို့ ပြန်ဝင်သွားကာ သူ၏ စစ်မှန်သော ရုပ်ပိုင်းဆိုင်ရာ ဆန်းကြယ် မှုကို ဖော်ပြလိုက်သည်။

“တာအိုပညာကို ကျင့်ကြံတာဟာ အစကတည်းက ထာဝရအသက်အတွက် ဖြစ်ပြီး၊ သိုင်းပညာကို ကျင့်ကြံတာကတော့ အဆုံးသတ်ကျမှပဲ ထာဝရအသက်ကို ပိုင်ဆိုင်ထာပါ။ လမ်းကြောင်းတွေ မတူပေမဲ့ ပန်းတိုင်ကတော့ အတူတူပါပဲ။” ဟုန်ယွိက ပြောလိုက်သည်။

“မိတ်ဆွေယွိ ဆုံးဖြတ်ပြီးပြီလားလို့ ကျွန်မ သိချင်မိတယ်။ ‘သေမင်းတိတ်ဆိတ်ခြင်း အကျဉ်းထောင်’ ကို သွားမှာလား။ အဲဒီနေရာကို ကျွန်မ အနည်းငယ် သိပါတယ်။ မိတ်ဆွေ ယွိရဲ့ အစွမ်းထက်တဲ့ နတ်ဘုရားစွမ်းအားနဲ့ဆိုရင် ဗဟိုကမ္ဘာရဲ့ ခေါင်းဆောင် ရွှီယွိနဲ့တောင် ယှဉ်တိုက်နိုင်မယ် ထင်တယ်။ မဟာကမ္ဘာလောကကြီးကတော့ တကယ့်ကို အင်မော်တယ် လောကဆိုတဲ့နာမည်နဲ့ လိုက်ဖက်ပါတယ်။ ကောင်းကင်အပြင်ပနယ်မြေက လူအများစုက တော့ မဟာကမ္ဘာလောကကြီးဟာ ဆုတ်ယုတ်သွားပြီလို့ ပြောနေကြတာ ရယ်စရာပဲ။ သူတို့တွေဟာ အင်မော်တယ်လောကထဲကို ဝင်ပြီး အမြတ်ထုတ်ဖို့ လက်ချင်း ယှက်နေကြ တာ။”

“ရွှီယွိလား။ အဲဒါက ဗဟိုကမ္ဘာ ခေါင်းဆောင်ရဲ့ နာမည်လား။ သူ့နာမည်မှာလည်း ဘာလို့ ‘ယွိ’ ဆိုတဲ့ စာလုံး ပါနေတာလဲ။ ဒါဟာ တကယ်ပဲ တစ်ခုခု ပတ်သက်နေပုံရတယ်...”

ဟုန်ယွိအနေဖြင့် ရွှီယွိဆိုသည့် နာမည်ကို ပထမဆုံးအကြိမ် ကြားဖူးခြင်း ဖြစ်သည်။ သူ၏ နှလုံးသားမှာ လှုပ်ရှားသွားပြီး အနာဂတ်တွင် တစ်ခုခု ဖြစ်လာတော့မည်ကို မြင်လိုက်ရ သကဲ့သို့ပင်။

...

“ကျွန်တော် ဒီကိုလာခဲ့တာက ကောင်းကင်အပြင်ပနယ်မြေကို စိတ်ဝိညာဉ်အတွေးစတွေနဲ့ ခရီးလှည့်လည်ပြီး အလယ်ခေတ်က သူတော်စင်ကြီးတွေရဲ့ ခြေရာကို လိုက်ဖို့ပါ။ ဒါပေမဲ့ ‘သေမင်းတိတ်ဆိတ်ခြင်း အကျဉ်းထောင်’ သတင်းကို သိလိုက်ရမှတော့၊ ကျွန်တော် အဲဒီကို သွားပြီး ကြည့်ရမှာပေါ့။ အဲဒီမှာ ချိတ်ပိတ်ခံထားရတဲ့ ပညာရှင်တွေကို ကယ်တင်နိုင်မလား ဆိုတာကတော့ ပြောဖို့ ခက်ပါတယ်။”

ဟုန်ယွိက လှုပ်ရှားလိုက်ပြီး လျှောက်လှမ်းရန် ပြင်လိုက်သည်။

“သူတို့ကို ကယ်တင်လို့ မရရင်တောင်မှ၊ ဗဟိုကမ္ဘာရဲ့ ကျူးကျော်မှုကို ခံထားရတဲ့ ကောင်းကင်အပြင်ပနယ်မြေက ကြယ်စုတန်းတွေမှာ ပညာရှင်တွေ အများကြီး ရှိသေး တယ်။ မိတ်ဆွေယွိက စစ်ဘက်ရေးရာဝန်ကြီးကို သတ်လိုက်တဲ့ သတင်းသာ ပျံ့နှံ့သွားရင်၊ မရေမတွက်နိုင်တဲ့ လူတွေ မိတ်ဆွေယွိဆီကို လာပြီး ခိုလှုံကြမှာပါ။” လီဖူယန်လော့က ပြောလိုက်သည်။ “ဒါပေမဲ့ ဒီသတင်းသာ ပျံ့သွားရင်တော့ ဗဟိုကမ္ဘာက ပညာရှင်တွေ အားလုံး ကျွန်မတို့ကို လိုက်လံ သတ်ဖြတ်ကြလိမ့်မယ်။”

“ကောင်းကျိုးနဲ့ ဆိုးကျိုးက ဒွန်တွဲနေတာပဲ။ အခြေအနေကို ကြည့်ပြီး လုပ်ကြတာပေါ့။”

ဟုန်ယွိက စကားရှစ်လုံးသာ ပြောလိုက်ပြီး သူ၏ ခန္ဓာကိုယ်မှာ ဉမင်လမ်းကြောင်းဆုံး၌ ပျောက်ကွယ်သွားသည်။ သူသည် ကောင်းကင်အပြင်ပနယ်မြေရှိ ‘လီဖူကြယ်’ဆီသို့ ရောက်ရှိသွားခဲ့သည်။

“ဟုတ်ကဲ့”

လီဖူယန်လော့သည် ဟုန်ယွိ ထွက်ခွာသွားသည်ကို မြင်လျှင် သူမ၏ ခန္ဓာကိုယ်ကို အမြန် လှုပ်ရှား၍ နောက်မှ လိုက်ပါသွားခဲ့သည်။ ဟုန်ယွိ၏ လှုပ်ရှားမှုနှင့်အတူ သူတို့သည် ကြီးမားသော နတ်ဘုရားစွမ်းအားနှင့် ဖန်တီးထားသည့် ဥမင်လမ်းကြောင်းတစ်ခုလုံးကို လျှို့ဝှက်လမ်းကြောင်းကို တိုက်ရိုက် ဖြတ်သန်းသွားခြင်း ဖြစ်သည်။

သူ့ရှေ့မှ မြင်ကွင်းမှာ ချက်ချင်း ပြောင်းလဲသွားပြီး၊ သူ၏ ခန္ဓာကိုယ်မှာ ကြယ်မြစ်ကြီး၏ အလယ်ဗဟို၌ လွင့်မျောနေသည်။ ထိုနေရာတွင် ကြယ်ပေါင်းများစွာမှာ သိပ်သည်းစွာ တည်ရှိနေကြပြီး ကြယ်တစ်လုံးနှင့် တစ်လုံးမှာ မိုင်ပေါင်း သန်းနှင့်ချီ၍ ဝေးကွာကြသည်။

နောက်ဆုံးတွင် သူသည် လျှို့ဝှက်ဆန်းကြယ်လှသော ကောင်းကင်အပြင်ပနယ်မြေသို့ ရောက်ရှိလာခဲ့လေပြီ။