အခန်း ၅၈၉

အခန်း ၅၈၉ ငါတို့ပြန်တွေ့ကြပြီ

ပိုင်ကျီဟန်၏ သဘောတူညီချက်နှင့်အတူ ဤကိစ္စရပ်မှာ ချောမောစွာပင် အဆုံးသတ်သွားခဲ့သည်။

ပိုင်မျိုးနွယ်စုသည် ကြားနေမဟာမိတ်အဖွဲ့ထဲသို့ တရားဝင် ဝင်ရောက်လာခဲ့ပြီဖြစ်သည်။

သဘောတူညီချက်ကို အပြီးသတ်လိုက်သည့်အချိန်တွင် မိသားစုခေါင်းဆောင်ရွှယ်မှာ သူ၏အမူအရာကို မထိန်းချုပ်နိုင်တော့ပေ။

ထို အဘိုးအို၏ မျက်နှာပေါ်တွင် မဖုံးကွယ်နိုင်သော စိတ်လှုပ်ရှားမှုများ ပြည့်နှက်နေသည်။

တကယ်တော့ သူသည် ပိုင်မျိုးနွယ်စုထံသို့ ချဉ်းကပ်ခဲ့စဉ်က ကံစမ်းကြည့်ရုံမျှသာ ရည်ရွယ်ခဲ့ခြင်းဖြစ်သည်။

အကောင်းဆုံးဖြစ်လာလျှင် ပိုင်မျိုးနွယ်စုက သူတို့ဘက်မှ စကားတစ်ခွန်းနှစ်ခွန်း ပြောပေးလိမ့်မည်၊ သို့မဟုတ် ကြားနေပေးလိမ့်မည်ဟုသာ တွေးထားခဲ့သည်။

ပိုင်ကျီဟန်ကိုယ်တိုင် မဟာမိတ်အဖွဲ့ထဲသို့ ဝင်ရောက်လာလိမ့်မည်ဟု သူအိပ်မက်ထဲ၌ပင် မတွေးဝံ့ခဲ့ပေ။

ဤအချိန်မှစ၍ မည်သည့်မင်းသား၊ မင်းသမီးကများ ကြားနေမဟာမိတ်အဖွဲ့ကို အတင်းအကျပ် ဘက်ရွေးခိုင်းရဲတော့မည်နည်း။

အကယ်၍ သူတို့သာ ထိုသို့အတင်းအကျပ်ပြုလုပ်မည်ဆိုပါက ၎င်းသည် ပိုင်မျိုးနွယ်စုကို လူသိရှင်ကြား စိန်ခေါ်ခြင်းနှင့် ထူးမခြားနားပေ။

ရရှိလာမည့် အကျိုးအမြတ်ထက် ပေါ်ပေါက်လာမည့် နောက်ဆက်တွဲဆိုးကျိုးများက ပို၍ကြီးမားလွန်းသည်။

မိသားစုခေါင်းဆောင်ရွှယ်သည် သူတို့၏ခေါင်းပေါ်တွင် ဧရာမသစ်ပင်ကြီးတစ်ပင် ရုတ်တရက် ပေါက်လာသကဲ့သို့ ခံစားလိုက်ရသည်။

ယခင်က ကြားနေမဟာမိတ်အဖွဲ့သည် ပြင်းထန်သော မုန်တိုင်းကြားတွင် အားကိုးရာမဲ့ မျောပါနေသည့် လှေငယ်လေးတစ်စင်းနှင့် တူနေခဲ့သည်။

သို့သော် ယခုမူကား မည်သို့နည်း။

ပိုင်မျိုးနွယ်စု၏ ကျောထောက်နောက်ခံကြောင့် မည်မျှပြင်းထန်သော လေမုန်တိုင်းများပင် တိုက်ခတ်ပါစေ၊ သူတို့ကို လွယ်လွယ်ဖြင့် လှန်ပစ်နိုင်တော့မည်မဟုတ်ပေ။

မိသားစုခေါင်းဆောင်ရွှယ်သည် တွေးလေလေ ပို၍ ပျော်ရွှင်လေလေဖြစ်သည်။

တစ်ချိန်တည်းမှာပင် ပိုင်မျိုးနွယ်စုနှင့် နီမျိုးနွယ်စုအကြား ယခင်က ဖြစ်ပျက်ခဲ့သည့် ကိစ္စရပ်များအပေါ် သူအလွန်အကျွံ စိုးရိမ်ခဲ့မိသည်ကို ပြန်လည်ရယ်မောမိသည်။

မူလက လက်ထပ်ထိမ်းမြားမှု ပျက်ပြားခြင်းနှင့် နီဖန်းကျိုးတို့နှင့် ပတ်သက်သည့် အကြောင်းရင်းများကြောင့် နှစ်ဖက်စလုံးတွင် မကျေနပ်ချက်များ ကျန်ရှိနေလိမ့်မည်ဟု သူစိုးရိမ်ခဲ့သည်။

သို့သော် ယခု ပိုင်ကျီဟန်နှင့် နီယွမ်ဖုန်းတို့ တည်ငြိမ်စွာ စကားပြောဆိုနေသည်ကို မြင်ရသည်မှာ ရန်ငြိုးထားသူများထက် ရင်းနှီးသူဟောင်းများဟုပင် ထင်မှတ်ရပေသည်။

မိသားစုခေါင်းဆောင်ရွှယ်သည် စိတ်ထဲတွင် မှတ်သားလိုက်သည်။

ဤအချိန်မှစ၍ ရွှယ်မျိုးနွယ်စုသည် နီမျိုးနွယ်စုကို အထူးလေးစားစွာ ဆက်ဆံရပေမည်။

၎င်းသည် ပိုင်မျိုးနွယ်စုနှင့် ဆက်ဆံရေး တိုးတက်လာခြင်းကြောင့်သာမက

နီဖန်းကျိုးကြောင့်လည်း ဖြစ်သည်။

နီဖန်းကျိုးဟူသော ထိုလူငယ်လေးကို တွေးမိသည့်အခါ မိသားစုခေါင်းဆောင်ရွှယ် အမူအရာမှာ မသိလိုက်ဘဲ လေးနက်သွားသည်။

နီဖန်းကျိုးသည် မျိုးဆက်သစ်ဖြစ်သော်လည်း သူကိုယ်တိုင်ထက်ပင် ပိုမိုအားကောင်းနေခဲ့သည်။

ထို့ပြင် သူ၏ တိုးတက်နှုန်းမှာ ကြောက်ခမန်းလိလိပင် ဖြစ်သည်။

နီဖန်းကျိုးသည် အနာဂတ်တွင် မည်သည့်အဆင့်ထိ ရောက်ရှိသွားမည်ကို မိသားစုခေါင်းဆောင်ရှဲ့ မတွေးဝံ့ပေ။

(အနည်းဆုံးတော့... အင်မော်တယ်နယ်ပယ်

အထိပေါ့။)

ထိုအတွေးသည် သူ၏စိတ်ထဲသို့ ရုတ်တရက် ပေါ်ပေါက်လာသည်။

ထိုသို့တွေးလေလေ ဖြစ်နိုင်ခြေ ပိုများလေလေဖြစ်သည်။

အကယ်၍ နီဖန်းကျိုးသည် တစ်နေ့တွင် အင်မော်တယ် နယ်ပယ် ကျွမ်းကျင်သူတစ်ဦး ဖြစ်လာခဲ့လျှင် နီမျိုးနွယ်စု၏ အဆင့်အတန်းသည် ရွှယ်မျိုးနွယ်စု လိုက်မီနိုင်သည့် အနေအထားထက် များစွာကျော်လွန်သွားလိမ့်မည်။

ထိုအချိန်သို့ ရောက်လျှင် တစ်နိုင်ငံလုံးကပင် နီမျိုးနွယ်စုကို ပြန်လည်သုံးသပ်ရတော့မည်မှာ အသေအချာပင်။

ပိုင်ကျီဟန်နှင့် မိသားစုခေါင်းဆောင်ရွှယ်တို့ ထွက်ခွာရန် ပြင်ဆင်နေချိန်တွင်...

ဧည့်ခံခန်းအပြင်ဘက်မှ အလျင်စလို အရှိန်အဝါတစ်ခု ရုတ်တရက် ရောက်ရှိလာသည်။

ခဏအကြာတွင် လူငယ်တစ်ဦးသည် အခန်းထဲသို့ အလျင်အမြန် ဝင်ရောက်လာသည်။

သူ၏ အသက်ရှူသံမှာ မညီမညာဖြစ်နေပြီး သတင်းကြားသည်နှင့် ချက်ချင်းဆိုသလို အပြေးရောက်လာပုံရသည်။

သူဝင်လာသည်နှင့် သူ၏စူးရှသော မျက်ဝန်းများသည် ပိုင်ကျီဟန်ထံသို့ ချက်ချင်းဆိုသလို ရောက်ရှိသွားသည်။

နီဖန်းကျိုး

ခန်းမအတွင်းရှိ လေထုမှာ အနည်းငယ် ပြောင်းလဲသွားသည်။

တစ်ချိန်တည်းမှာပင် နီချင်းယု၏ မျက်ဝန်းများမှာ ချက်ချင်းပင် လင်းလက်သွားသည်။

"အစ်ကို”

နီဖန်းကျိုးသည် ပိုင်ကျီဟန်ကိုယ်တိုင် နီမျိုးနွယ်စု အိမ်တော်သို့ ရောက်ရှိနေကြောင်း သတင်းရထားသည်မှာ ထင်ရှားသည်။

ထိုသတင်းကို ကြားသည်နှင့် သူသည် ကျင့်ကြံခြင်းကို ရပ်တန့်ကာ ချက်ချင်း ပြန်ပြေးလာခဲ့ခြင်းဖြစ်သည်။

ပိုင်ကျီဟန်၏ ရည်ရွယ်ချက်မှာ မည်သို့ပင် ဖြစ်နေပါစေ၊ သူ့မိသားစုအနီးတွင် ထိုကဲ့သို့သော လူမျိုး ရှိနေသည်ကို နီဖန်းကျိုး မည်သို့မျှ စိတ်အေးနိုင်မည်မဟုတ်ပေ။

သို့သော် ရောက်ရှိလာသည့်အခါတွင်မူ ထိခိုက်မှုမရှိသည့် ခန်းမ၊ တည်ငြိမ်နေသည့် လေထုနှင့် သူ့ဖခင်နှင့် ညီမဖြစ်သူတို့ ဘေးကင်းနေသည်ကို မြင်လိုက်ရသဖြင့် သူသည် စိတ်အေးလက်အေးဖြင့် အသက်ရှူလိုက်သည်။

ကံကောင်းထောက်မစွာဖြင့် မည်သည့်အရာမှ ဖြစ်ပျက်မသွားခဲ့ပေ။

ထိုအချိန်တွင် ပိုင်ကျီဟန်၏ သွေးနီရောင် မျက်ဝန်းများသည်လည်း နီဖန်းကျိုးထံသို့ ရောက်ရှိလာသည်။

ခဏတာမျှ သူတို့နှစ်ဦးမှာ တစ်ယောက်ကိုတစ်ယောက် စိုက်ကြည့်နေကြသည်။

ထို့နောက် ပိုင်ကျီဟန်က အနည်းငယ် ပြုံးလိုက်သည်။

"ပြန်တွေ့ကြပြီ”

သူ၏ တည်ငြိမ်သော အကြည့်များသည် နီဖန်းကျိုးကို အသေးစိတ် စူးစမ်းလိုက်သည်။

"မင်း ပိုပြီး အားကောင်းလာခဲ့ပြီပဲ။"

သူ၏ လေသံထဲတွင် စစ်မှန်သော အသိအမှတ်ပြုမှု အရိပ်အယောင်များ ပါဝင်

နေသည်။

ပိုင်ရွှယ်ချင်းလက်ထဲတွင် ရှုံးနိမ့်ခဲ့ရသော်လည်း တိုးတက်ခြင်း ရပ်တန့်မသွားခဲ့သည်မှာ ထင်ရှားလှသည်။

သို့သော် နီဖန်းကျိုး၏ တစ်စုံတစ်ခုမှာ ယခင်နှင့် အနည်းငယ် ကွဲပြားခြားနားနေသည်ကို ပိုင်ကျီဟန် ရိပ်မိလိုက်သည်။

သူ၏ တိုးတက်နှုန်းမှာ ယခင်ကထက် အနည်းငယ် နှေးကွေးသွားခဲ့သည်။

(မျှော်လင့်ထားတဲ့အတိုင်းပဲ...)

ပိုင်ကျီဟန်၏ မျက်ဝန်းများမှာ အနည်းငယ် ကျဉ်းမြောင်းသွားသည်။

ပိုင်ရွှယ်ချင်းလက်ထဲတွင် ရှုံးနိမ့်ခဲ့ရခြင်းက သူ့အပေါ် အလွန်အမင်း သက်ရောက်မှု ရှိခဲ့သည်မှာ ထင်ရှားသည်။

အဘယ်ကြောင့်ဆိုသော် ထိုတိုက်ပွဲမှာ သာမန်ရှုံးနိမ့်ခြင်းမျိုးမျှသာ မဟုတ်ခဲ့ပေ။

နီဖန်းကျိုးအတွက် ပိုင်ရွှယ်ချင်းသည် ပန်းတိုင်တစ်ခုနှင့် တာဝန်တစ်ခု ဖြစ်ခဲ့သည်။

သူ အသည်းအသန် အနိုင်ယူချင်ခဲ့သော သူတစ်ဦးဖြစ်သည်။

သူ အနိုင်ယူရန် အခွင့်အရေး ရခဲ့သော်လည်း နောက်ဆုံးတွင် ရှုံးနိမ့်ခဲ့ရသည်။

ထိုသို့သော စိတ်ပျက်မှုမျိုးက နှလုံးသားထဲတွင် အမာရွတ်တစ်ခု ကျန်ရစ်ခဲ့စေသည်မှာ သဘာဝပင်။

ပို၍အရေးကြီးသည်မှာ ထိုတိုက်ပွဲအတွင်း နီဖန်းကျိုးသည် ပြင်ပအကူအညီကိုပင် ရယူခဲ့ခြင်းဖြစ်သည်။

ထိုအချက်မှာ အလွန်ပင် ထူးခြားဆန်းပြားလှသည်။

အနည်းဆုံးတော့ ပိုင်ကျီဟန် ဖတ်ရှုဖူးသည့် ကောင်းကင်ဘုံက ရွေးချယ်ရသူခံများသို့မဟုတ် ဇာတ်လိုက်များနှင့် နှိုင်းယှဉ်လျှင် ဖြစ်သည်။

ပုံမှန်အားဖြင့် ကံကြမ္မာ၏ အလိုကျဖြစ်သူများသည် အလွန်အမင်း မာနကြီးတတ်ကြသည်

သူတို့၏ အသက်အန္တရာယ် ကြီးကြီးမားမား မရှိသရွေ့ အဆင့်တူပြိုင်ဘက်များနှင့် ယှဉ်ပြိုင်ရာတွင် ပြင်ပအကူအညီကို ရှားရှားပါးပါးပင် လက်ခံတတ်ကြသည်။

သူတို့သည် ကိုယ်ပိုင်စွမ်းအားကိုသာ အမြဲအားကိုးတတ်ကြသည်။

သို့သော် နီဖန်းကျိုးကမူ ထိုပုံစံကို ချိုးဖောက်ခဲ့သည်။

၎င်းသည် တစ်ခုတည်းသော အချက်ကိုသာ သက်သေပြနေသည်။

ပိုင်ရွှယ်ချင်း၏ ဖိအားပေးမှုမှာ အလွန်ပင် ကြီးမားလှသည်။

နီဖန်းကျိုးကဲ့သို့သော သူပင်လျှင် ယှဉ်ပြိုင်နိုင်ရန်အတွက် သူ၏မာနကို စွန့်လွှတ်လိုက်ရသည်အထိ ဖြစ်ခဲ့သည်။

ဟုတ်ပေသည်၊ ထိုကဲ့သို့သော ကောင်းကင်ဘုံက ရွေးချယ်ခံရသူများသည် နောက်ဆုံးတွင် အနိုင်ရမည်ဖြစ်ကြောင်း ပိုင်ကျီဟန် သိရှိသည်။

သို့သော် သူတို့ ရှုံးနိမ့်တော့မည့်အချိန်တွင် ကိုယ်ပိုင် လျှို့ဝှက်ချက် သို့မဟုတ် အသာစီးရသည့် အခွင့်အရေးရှိလျှင် သူတို့သည် အမျိုးမျိုးသော အကြောင်းပြချက်များဖြင့် ထိုအရာများကို အသုံးပြုကြလိမ့်မည်။

အဆင်ပြေချိန်တွင် တရားမျှတမှုအကြောင်း ဝင့်ဝါစွာ ပြောဆိုတတ်သော်လည်း သူတို့ကိုယ်တိုင် အကျပ်ရိုက်လာသည့်အခါမူ အရာအားလုံးကို ပြောင်းပြန်လုပ်ပစ်တတ်ကြသည်။

အကယ်၍ ထိုသူများသည် မျိုးဆက်တူများထဲတွင် မိမိထက်သာလွန်သောသူနှင့် တွေ့ဆုံမိလျှင် နီဖန်းကျိုး ပြုလုပ်ခဲ့သကဲ့သို့ပင် ပြုမူကြလိမ့်မည်မှာ အသေအချာပင်။

ကိုယ်ပိုင်စွမ်းရည်ဖြင့် မနိုင်တော့ကြောင်း သိလိုက်ရသည့်အခါ သူတို့သည် နောက်ဆုံးတွင် အခြားသူများကို အားကိုးခြင်းသို့ ပြန်လည်ရောက်ရှိသွားကြမည်ဖြစ်သည်။

ထိုဇာတ်လိုက်များသည် အမှန်တကယ်ပင် ရှက်ဖို့ကောင်းလှသည်။

တစ်ဖက်တွင် နီဖန်းကျိုးမှာမူ ပိုင်ကျီဟန်ကိုသာ အာရုံစိုက်နေသည်။

သူ၏ အမူအရာမှာ တည်ငြိမ်နေသော်လည်း စိတ်ထဲတွင်မူ သတိဝီရိယဖြင့် အပြည့်ပင်။

ပိုင်ကျီဟန်သည် အပေါ်ယံအားဖြင့် မည်မျှပင် တည်ငြိမ်နေပါစေ၊

လက်ရှိ လေထုမှာ မည်မျှပင် ယဉ်ကျေးနေပါစေ၊

နီဖန်းကျိုးသည် သူ့အနီးတွင် သတိလျော့ခြင်းမျိုး ဘယ်သောအခါမျှ မလုပ်ရဲပေ။

ဤလူမှာ မည်မျှ ကြောက်မက်ဖွယ်ကောင်းကြောင်း သူကောင်းကောင်း သိသည်။

သူ၏ ဆရာဖြစ်သူကပင် အကြိမ်ကြိမ် သတိပေးခဲ့ဖူးသည်။

ပိုင်ကျီဟန်သည် အန္တရာယ်များလှသည်။

သူ၏ ဆရာကဲ့သို့သော အတွေ့အကြုံရင့်သူပင်လျှင် သူ့ကို ယခုအခါတွင် အပြည့်အဝ မခန့်မှန်းနိုင်တော့ပေ။

ထိုမသေချာမှု တစ်ခုတည်းပင်လျှင် နီဖန်းကျိုးကို သတိကြီးစေရန် လုံလောက်နေသည်။

ထို့ကြောင့် ပိုင်ကျီဟန်၏ ရိုးရှင်းသော နှုတ်ဆက်စကားကြားတွင်ပင် နီဖန်းကျိုးသည် အပြည့်အဝ သတိထားနေဆဲဖြစ်သည်။

နီဖန်းကျိုးသည် ခဏတာ စိုက်ကြည့်ပြီးနောက် နောက်ဆုံးတွင် စကားစမြည် ပြောလာသည်။

"ဘာတွေ ဆွေးနွေးခဲ့ကြတာလဲ။"

သူ၏ အသံမှာ တည်ငြိမ်နေသော်လည်း သတိဝီရိယမှာ ထင်ရှားနေသည်။

နီယွမ်ဖုန်းသည် ရှေ့သို့တိုးလာပြီး ကြားနေမဟာမိတ်အဖွဲ့နှင့် ပိုင်မျိုးနွယ်စု ဝင်ရောက်လာမည့် ကိစ္စကို အကျဉ်းချုပ် ရှင်းပြလိုက်သည်။

ထိုအကြောင်းကို ကြားလိုက်ရသည့်အခါ သူ၏ နှလုံးသားထဲမှ တင်းမာမှုများမှာ သိသိသာသာ လျော့ကျသွားသည်။

ထို့ကြောင့် ပိုင်ကျီဟန်မှာ နီမျိုးနွယ်စုကို ပစ်မှတ်ထားလာခြင်း မဟုတ်ပေ။

ကြားနေမဟာမိတ်အဖွဲ့အတွက်သာ ရောက်လာခြင်းဖြစ်သည်။

၎င်းမှာ သတင်းကောင်းပင် ဖြစ်သည်။

အနည်းဆုံးတော့ ပိုင်မျိုးနွယ်စုသည် သူ၏မိသားစုကို ခက်ခဲအောင် လုပ်ရန် ရည်ရွယ်ချက် မရှိကြောင်းကို ဆိုလိုသည်။

နီဖန်းကျိုးသည် စိတ်ထဲမှ သက်ပြင်းချလိုက်သည်။

ထိုအချိန်တွင် ပိုင်ကျီဟန်သည် နေရာမှ ဖြည်းညင်းစွာ ထရပ်လိုက်သည်။

ကိစ္စရပ်မှာ ပြီးပြတ်သွားပြီဖြစ်ရာ သူဆက်နေရန် အကြောင်းမရှိတော့ပေ။

"အားလုံး ဆွေးနွေးပြီးပြီဆိုတော့ ငါသွားတော့မယ်။"

သူ၏ လေသံမှာ တည်ငြိမ်၍ အလျင်လိုဟန်မရှိပေ။

သို့သော် ပိုင်ကျီဟန် လှည့်ထွက်သွားမည့်အချိန်တွင်...

"ခဏနေပါဦး”

နီဖန်းကျိုး ရုတ်တရက် အော်ပြောလိုက်သည်။

ပိုင်ကျီဟန် ခြေလှမ်းရပ်လိုက်ပြီးနောက် ဖြည်းညင်းစွာ နောက်သို့ လှည့်ကြည့်သည်။

သူ၏ သွေးနီရောင် မျက်ဝန်းများသည် နီဖန်းကျိုးအပေါ်သို့ ထပ်မံကျရောက်လာသည်။

နီဖန်းကျိုးသည် သူ၏ လက်သီးကို တင်းတင်းဆုပ်လိုက်သည်။

အမှန်စင်စစ် သူပြုလုပ်တော့မည့်အရာမှာ မိုက်မဲနေကြောင်း သူကိုယ်တိုင်ပင် သိသည်။

သို့သော် ထိုသို့ နားလည်နေသော်လည်း သူကိုယ်သူ မတားဆီးနိုင်ခဲ့ပေ။

ပိုင်ရွှယ်ချင်းလက်ထဲတွင် ရှုံးနိမ့်ခဲ့ရသည့်အချိန်ကစ၍...

ထိုနာကျင်ဖွယ် ရှုံးနိမ့်မှုနောက်ပိုင်းကစ၍...

သူ၏နှလုံးသားတွင် အမာရွတ်တစ်ခု ကျန်ရစ်နေခဲ့သည်။

ယခု ပိုင်ကျီဟန်ရှေ့တွင် ရပ်နေရချိန် - သူ့ကို အနိုင်ယူခဲ့သူ၏ အစ်ကိုဖြစ်သူရှေ့တွင်

သူ၏ မကျေနပ်ချက်များမှာ မထိန်းချုပ်နိုင်အောင်ပင် တောက်လောင်လာသည်။

သူ သိချင်သည်။

"ပိုင်မျိုးနွယ်စုခေါင်းဆောင် ပိုင်ကျီဟန်..."

သူ၏ အသံမှာ ခန်းမတစ်ခွင် လွင့်ပျံသွားသည်။

"ကျွန်တော်... ခင်ဗျားကို တိုက်ပွဲတစ်ခု စိန်ခေါ်ချင်တယ်”