အခန်း ၄၇၀

အခန်း။ ၄၇၀

သာမန်အချိန်ဆိုလျှင် လုံယီအတွက် တစ်စုံတစ်ယောက်က ထွက်ရပ်ပေးကြမည်မှာ အမှန်ပင်။

သို့သော် အချစ်ရေးနှင့် မနာလိုမှုတို့နှင့် ပတ်သက်လာလျှင်မူ မည်သူမျှ ဝင်ပါလိုခြင်း မရှိကြချေ။

“ဘယ်လိုလဲ ငါ့စိန်ခေါ်မှုကို လက်ခံရဲသလား”

လုံယီက ချက်ချင်း ပြန်မဖြေသည့်အတွက် အဆင့်သုံး ခန္ဓာကိုယ်ကျင့်ကြံသူ ယွန်းရှောင်ဟွာမှာ ဒေါသထွက်လာပြီး သူ၏ ရည်ရွယ်ချက်ကို ပွင့်ပွင့်လင်းလင်း ဖော်ပြလိုက်သည်။

ရှီချိုင်ဖုန်း၏ မျက်ခုံးများမှာ တွန့်ချိုးသွားသည်။

“ယွန်းရှောင်ဟွာ မင်း ကျင့်ကြံတာ ဘယ်နှစ်နှစ်ရှိပြီလဲ။ ငါ့အစ်ကိုရှူက ကျင့်ကြံတာ အနှစ်အနည်းငယ်ပဲ ရှိသေးတာ ရှက်ဖို့ မကောင်းဘူးလား”

“သူ အားနည်းတာက သူ့အမှားပဲ အကြောင်းပြချက် မဟုတ်ဘူး”

ယွန်းရှောင်ဟွာက အေးစက်စွာ ပြောသည်။

“မင်းတော့...”

ရှီချိုင်ဖုန်းမှာ ဒေါသထွက်ကာ ချက်ချင်း ထရပ်လိုက်ပြီး သူမ၏ အရှိန်အဝါများမှာ ပွက်ပွက်ဆူလာကာ ယွန်းရှောင်ဟွာကို တိုက်ခိုက်ရန် အသင့်ဖြစ်နေသည်။

“ညီမလေး မင်းက ငါ့ရဲ့ ပြိုင်ဘက် မဟုတ်ဘူး”

ယွန်းရှောင်ဟွာက တည်ငြိမ်စွာ ပြန်ပြောသည်။

လုံယီမှာ မျက်မှောင်ကြုတ်လျက် စကားပြောရန် ပြင်ဆင်နေချိန်တွင် အေးစက်စက် အသံတစ်ခုက ဝင်ရောက်လာသည်။

“သူ့နေရာမှာ ငါ ဝင်ပြိုင်မယ်”

မွှေးပျံ့သော လေပြေတစ်ခု တိုက်ခတ်သွားပြီးနောက် ယိုချင်းယီမှာ စိန်ခေါ်မှုနယ်ပယ်ထဲသို့ အလိုအလျောက် ဝင်ရောက်လာသည်။

သူမ၏ ဝိညာဉ်စွမ်းအားမှာ အနည်းငယ် တောက်ပနေသည်။

သူမ၏ အရေပြားမှာ ကျောက်စိမ်းထက် ပိုမိုဖြူဝင်းပြီး ကောင်းကင်မှ ဆင်းသက်လာသော နတ်သမီးကဲ့သို့ အေးစက်သည့် အရှိန်အဝါကို ပိုင်ဆိုင်ထားသည်။

ဂိုဏ်းဝင်ပြီး ငါးနှစ်မပြည့်မီ ချီကျင့်ကြံခြင်း နောက်ဆုံးအဆင့်သို့ ရောက်ရှိခဲ့သည့် စံချိန်သစ်ကြောင့် သူမကို အလောင်းထိန်းချုပ်ခြင်းဂိုဏ်း၏ နံပါတ်တစ် ထူးချွန်သူဟု သတ်မှတ်ထားကြသည်။

ထိုမျှ ထူးချွန်သော အမျိုးသမီးတစ်ဦးက လုံယီအတွက် အခြားသူတစ်ဦးကို ခုခံရန် ရှေ့ထွက်လာသည်။

ထိုသူမှာ အခြားအမျိုးသမီးတစ်ဦး၏ ဖက်တွယ်ခြင်းကို ခံနေရသည့်တိုင်အောင်ပင်။

ဖြန်း

လူတိုင်း၏ ရင်ထဲတွင် လျှပ်စီးတစ်စင်း ဖြတ်သွားသကဲ့သို့ ခံစားလိုက်ရပြီး သူတို့၏ ကမ္ဘာအမြင်များပင် ပျက်စီးသွားသည်။

ဒီကောင်လေးမှာ ဘယ်လိုမှော်ပညာတွေ ရှိနေလို့... ထူးချွန်ထက်မြက်တဲ့ အမျိုးသမီးနှစ်ယောက်စလုံးက သူ့အပေါ်မှာ ဒီလောက်တောင် စွဲလမ်းနေရတာလဲ...

ယိုချင်းယီ၏ လုပ်ရပ်ကြောင့် သူမကို အားပေးသူများမှာ မျက်ရည်ပင် ကျလုနီးပါး ဖြစ်သွားကြသည်။

[ဘာသာပြန်သူမှတ်ချက် - ပုံမှန်ဆို ယောကျာ်းလေးတွေကပဲ မိန်းကလေးတွေကိုကာကွယ်ပေးတာ။ အခုကျကိုယ်တွေရဲ့လုံယီက မိန်းကလေးတွေကာကွယ်ပေးတာခံနေရတယ်🤣🤣။ လုံယီ ဘယ်သူနဲ့ညားမယ်ထင်လဲ စာဖတ်သူတို့….]

“ဟေ့ကောင် မိန်းမတွေရဲ့ နောက်ကွယ်မှာပဲ ပုန်းနေရဲတာလား”

ဂျူနီယာညီမလေးနှင့် တူညီသော မိန်းကလေး၏ ခုခံမှုကို ခံရသည့်အတွက် ယွန်းရှောင်ဟွာမှာ မနာလိုလွန်းသဖြင့် မျက်လုံးများ နီရဲလာပြီး ဒေါသထွက်နေသည်။

လုံယီမှာ ရှီချိုင်ဖုန်း၏ လက်မှ လွတ်အောင် ရုန်းထွက်နိုင်ခဲ့ပြီး တစ်ခုခု ပြောရန် ပြင်ဆင်လိုက်သော်လည်း...

ဝုန်း

ယိုချင်းယီမှာ စိန်ခေါ်မှုနယ်ပယ်ထဲသို့ ရောက်ရှိနေပြီဖြစ်ပြီး ထူထဲသော မီးခိုးရောင် ဝိညာဉ်မြှားတစ်စင်းက ယွန်းရှောင်ဟွာဆီသို့ ပြင်းထန်စွာ ပစ်လွှတ်လိုက်သည်။

“ငါတော့...”

လုံယီမှာ ယိုချင်းယီ၏ အခြေအနေကို ကြည့်လိုက်ရာ သူမ၏ အရှိန်အဝါမှာ မငြိမ်မသက်ဖြစ်နေပြီး တစ်ခုခုကို ထုတ်လွှတ်ရန် လိုအပ်နေကြောင်း သိလိုက်သည်။

ထားလိုက်ပါတော့ တစ်ခုခု ထုတ်လွှတ်လိုက်တာ ကောင်းပါတယ်ဟု လုံယီ တွေးလိုက်သည်။

သို့သော် ကျန်ရှိသူများမှာ အမှန်တရားကို မသိကြပေ။

ချင်းလွန်းနန်းတော်မှ လှပသော အမျိုးသမီးများအပါအဝင် အားလုံးက လုံယီမှာ မိန်းမနားခိုသည့် လူညံ့တစ်ဦးဟု ထင်မှတ်သွားကြသည်။

ဤအခြေအနေကြောင့် လုံယီမှာ စိတ်ပျက်နေသော်လည်း ရှင်းပြရန် ခက်ခဲနေသည်။

...

စိန်ခေါ်မှုနယ်ပယ်အတွင်း ယိုချင်းယီနှင့် ယွန်းရှောင်ဟွာတို့မှာ ထိပ်တိုက်ရင်ဆိုင်နေကြပြီး တိုက်ပွဲစတင်ရန် နီးကပ်နေပြီဖြစ်သည်။

ယိုချင်းယီမှာ ချီကျင့်ကြံခြင်း နောက်ဆုံးအဆင့်သို့ ရောက်ရှိနေသော်လည်း ခန္ဓာကိုယ်ကျင့်ကြံသူဖြစ်သည့် ယွန်းရှောင်ဟွာကမူ သူမကို အထင်အမြင်သေးနေဆဲပင်။

ဂိုဏ်းလေးခုကြားတွင် စစ်မှန်သောသွေးဂိုဏ်း၏ အစောပိုင်းတိုက်ခိုက်မှု စွမ်းရည်မှာ မည်သည့်ဂိုဏ်းကမျှ မယှဉ်နိုင်ကြောင်း အားလုံးက သိရှိထားကြသည်။

သူက ဟိန်းဟောက်သံတစ်ချက်ပြုလိုက်ပြီး လေးမှလွှတ်လိုက်သော မြှားတစ်စင်းကဲ့သို့ ယိုချင်းယီဆီသို့ ပြေးဝင်သွားသည်။

သူ၏ သံမဏိလက်သီးကို မြှောက်လိုက်ပြီး ဤအမျိုးသမီး ကျင့်ကြံသူကို တိုက်ခိုက်ကာ မိန်းမနောက်ကွယ်တွင်သာ ပုန်းအောင်းနေရဲသော ထိုအမျိုးသားကို အပြင်သို့ ထွက်လာစေရန် ဖိအားပေးလိုက်သည်။

ယိုချင်းယီ၏ မျက်နှာသွင်ပြင်မှာ ပြောင်းလဲမှုမရှိဘဲ သူမဘေးတွင် အရပ်ရှည်သော ရုပ်သွင်တစ်ခု ရုတ်တရက် ပေါ်လာသည်။

ခလောက်

သတ္တုချင်း တိုက်မိသံနှင့်အတူ အရပ်ရှည်သော ရုပ်သွင်မှာ လွင့်စင်သွားသည်။

သို့သော် ယိုချင်းယီကမူ ထိုအခွင့်အရေးကို အသုံးချကာ အသက်ရှူမှားခြင်းကို ပြုပြင်ပြီး နောက်သို့ ကျော့ရှင်းစွာ ဆုတ်ခွာသွားလိုက်သည်။

ထိုအရပ်ရှည်သော ရုပ်သွင်မှာ ခေါင်းပြောင်၊ မျက်ခုံးမွှေးမပါဘဲ၊ ရေစီးကြောင်းကဲ့သို့ လှည့်ပတ်နေသော အနက်ရောင်မျဉ်းကြောင်းများဖြင့် ပြည့်နှက်နေသည့် ရုပ်သွင်ဖြစ်သည်။ သူ၏ အရေပြားမှာ ကြေးရောင်ဖြစ်ပြီး ရင်ဘတ်တွင် ကြာပန်းပုံစံ အမှတ်အသား လေးခုရှိရာ ၎င်းမှာ အားကောင်းလှသော ကြေးရုပ်အလောင်းတစ်ခု ဖြစ်သည်။

ယိုချင်းယီသည် ဂိုဏ်းတွင် ဝင်ရောက်သည်မှာ မကြာသေးသော်လည်း ကြေးရုပ်အလောင်းကို အောင်မြင်စွာ ပြုပြင်နိုင်ခဲ့သဖြင့် တပည့်များစွာကို အံ့အားသင့်စေခဲ့သည်။

သို့သော် ထိုကြေးရုပ်အလောင်းပင်လျှင် ယွန်းရှောင်ဟွာ၏ တိုက်ခိုက်မှုကို မခံနိုင်ဘဲ လွယ်ကူစွာ လွင့်စင်သွားခဲ့ရသည်။

သို့သော် ယိုချင်းယီက သူမ၏ တန်ပြန်တိုက်စစ်ကို စတင်လိုက်ပြီဖြစ်သည်။

သူမ၏ ဝိညာဉ်ချီစွမ်းအင်များ လည်ပတ်နေပြီး စောင်းတီးနေသကဲ့သို့ နုနယ်သော လက်ချောင်းများက လှုပ်ရှားနေသည်။

ထိုအချိန်တွင်ပင် ယွန်းရှောင်ဟွာ၏ ရှေ့တွင် သုံးပေအထူရှိသော အပြာရောင် ရေခဲနံရံ တစ်ဆယ်ကျော် ပေါ်ထွက်လာသည်။

ယိုချင်းယီ၏ ထိန်းချုပ်မှုအောက်တွင် ရေခဲနံရံများမှာ ရန်သူကို အနီးကပ် မကပ်နိုင်စေရန် အပေါ်၊ အောက်၊ ဘယ်၊ ညာသို့ လျင်မြန်စွာ လှုပ်ရှားနေသည်။

ရေခဲနံရံများ၏ မျက်နှာပြင်တွင် ပန်းပုံစံများရှိပြီး သာမန်ရေခဲနံရံနည်းစနစ်များနှင့် မတူညီကြောင်း တွေ့ရသည်။

“ဒါက ရေခဲနံရံနည်းစနစ်ကို အဆင့်မြှင့်တင်ထားတာလား ဒါမှမဟုတ် ပိုမိုမြင့်မားတဲ့ နယ်ပယ်ကို ရောက်နေတာလား”

အပြင်ဘက်တွင် ရပ်ကြည့်နေသော အကြီးအကဲများမှာ ယိုချင်းယီ၏ မှော်ပညာကို ကြည့်ကာ အံ့အားသင့်နေကြသည်။

ကျင့်ကြံခြင်း မြန်ဆန်ခြင်းမှာ ဝိညာဉ်အမြစ်များ အားကောင်း၍ ဖြစ်နိုင်သော်လည်း ငါးနှစ်အတွင်း နည်းစနစ်တစ်ခုကို ပြီးပြည့်စုံအောင် ကျွမ်းကျင်ခြင်းမှာ ထက်မြက်မှုသက်သက်ဖြင့် မသတ်မှတ်နိုင်ပေ။

“ဒီလောက် ထူးချွန်တဲ့ ကောင်မလေးက လူတစ်ယောက်အပေါ်မှာ စိတ်ခံစားချက်တွေနဲ့ ဘာလို့ ဒီလောက်တောင် ဖြစ်နေရတာလဲ။ အချိန်မီ စိတ်ခံစားချက်တွေကို မဖြတ်တောက်နိုင်ရင် သူ့ဘဝမှာ အခက်အခဲတွေ အများကြီး ကြုံရလိမ့်မယ်”

ချင်းလွမ်နန်းတော်မှ အကြီးအကဲက ဝမ်းနည်းစွာ ပြောသည်။

သူမသည် အသက်သုံးဆယ်ခန့်ဟု ထင်ရပြီး ခရမ်းရောင် နန်းဝတ်တန်ဆာကို ဝတ်ဆင်ထားကာ လွန်စွာမှ ခန့်ညားလှပသည်။

“ဖျေရီချူးရဲ့ စကားကတော့ လွန်သွားပါပြီ။ ဒီလောကမှာ စိတ်ခံစားချက်ရဲ့ ဆွဲဆောင်မှုကို ဘယ်သူက လွတ်မြောက်နိုင်မှာလဲ။ သူကိုယ်တိုင်ပဲ တွေးခေါ်နိုင်ပြီး စိတ်နတ်ဆိုးတွေကို ဖယ်ရှားနိုင်ရင် သူ ဘာပဲလုပ်လုပ် သူ့ရဲ့ အနာဂတ်တိုးတက်မှုကို ထိခိုက်မှာ မဟုတ်ပါဘူး”

အလောင်းထိန်းချုပ်ခြင်းဂိုဏ်းမှ အကြီးအကဲဖန်က သူတို့ဂိုဏ်း၏ ထူးချွန်သူဘက်မှ ရပ်တည်ကာ ပြန်လည်ချေပကာ ပြောပြောလိုက်သည်။