အခန်း ၁၁၈

အခန်း (၁၁၈) အကြမ်းဖျင်း လေလံကြေး ယွမ် ၂ သိန်း

စုယွမ်နှင့် အခြားသူများမှာ အဘိုးဝမ်တို့နှင့်အတူ ဒုတိယတန်းတွင် ဝင်ထိုင်ကာ နေရာယူထားပြီး ဖြစ်ပေသည်။

ပထမတန်းတွင် ဆိုသဘီလုပ်ငန်းစု၏ အကြီးအကဲနှင့် အကဲဖြတ် ကျွမ်းကျင်ပညာရှင် သုံးဦးတို့ ထိုင်နေကြ၏။

၆ နာရီ ၆ မိနစ်အချိန်၌ ခေါင်းလောင်းသံနှင့်အတူ လေလံမှူးသည် စင်မြင့်ပေါ်သို့ ကျက်သရေရှိစွာ လျှောက်လှမ်းလာခဲ့သည်။

"လူကြီးမင်းများနဲ့ ဂုဏ်သရေရှိ ဧည့်သည်တော်များရှင်... ဆိုသဘီလုပ်ငန်းစုရဲ့ နွေရာသီ အထူးလေလံပွဲမှ ကြိုဆိုပါတယ်..."

အလွန်ကြည်လင်ပြတ်သားသော အသံတစ်သံ ထွက်ပေါ်လာပြီးနောက် လေလံခန်းမအတွင်း၌ လက်ခုပ်သံများ ချက်ချင်း ပဲ့တင်ထပ်သွားတော့၏။

ဤနေရာသို့ လေလံဆွဲရန် လာရောက်နိုင်သူများမှာ အလွန်ချမ်းသာသူများ သို့မဟုတ် ဩဇာတိက္ကမ အလွန်ကြီးမားသူများသာ ဖြစ်ကြပေသည်။

"လေလံပွဲ မစတင်ခင် ဒီပွဲစဉ်အတွက် လေလံစည်းမျဉ်းတွေကို ရှင်းပြခွင့်ပြုပါ..."

"......"

လေလံပွဲ၏ အဖွင့်အမှာစကားများကို ဘာသာစကားနှစ်မျိုးဖြင့် မိတ်ဆက်ကာ အဆုံးသတ်လိုက်လေ၏။

ဤအထူးလေလံပွဲတွင် ပစ္စည်းဆယ့်ငါးမျိုးသာ ပါဝင်သဖြင့် ကမ်းလှမ်းထားသော ပစ္စည်းအရေအတွက်အရ အတော်လေး သေးငယ်သော လေလံပွဲတစ်ခု ဖြစ်ပေသည်။

"အချိန်ဆွဲမနေတော့ဘဲ ဒီနေ့ လေလံတင်မယ့် ကျွန်မတို့ရဲ့ ပထမဆုံးပစ္စည်းကတော့ နတ်သမီးလေး ပန်းကြဲနေတဲ့ ပုံဖော်ထားတဲ့ ချင်းမင်းဆက် ရွှန်းကျီခေတ်က အပြာနဲ့အဖြူရောင် ကြွေပန်းကန်လုံးပဲ ဖြစ်ပါတယ်... စတင်လေလံကြေးက ယွမ် ၅ သိန်းဖြစ်ပြီး လေလံဆွဲတဲ့ အကြိမ်တိုင်းမှာ အနည်းဆုံး ယွမ် ၁ သိန်း တိုးမြှင့်ရပါမယ်..."

သူမ စကားပြောအပြီးမှာပင် ပရိသတ်ထဲမှ တစ်ဦးက လေလံကတ်ပြားကို မြှောက်လိုက်ပြီး နှစ်စက္ကန့်အတွင်း၌ပင် လူသုံးဦးမှ ငါးဦးအထိ တစ်ပြိုင်နက်တည်း ကတ်ပြားမြှောက်လာကြတော့၏။

"ခြောက်သိန်း... ခုနစ်သိန်း... ရှစ်သိန်း..."

"ကိုးသိန်းငါးသောင်း..."

"နံပါတ် ၃၅ က ယွမ် တစ်သန်းတစ်သိန်း လေလံဆွဲထားပါတယ်..."

"နံပါတ် ၆၀ က မစ္စတာလီက ယွမ် တစ်သန်းသုံးသိန်းနဲ့ လေလံဆွဲထားပါတယ်..."

"တစ်သန်းလေးသိန်းငါးသောင်း..."

"တစ်သန်းရှစ်သိန်း..."

"တစ်သန်းရှစ်သိန်း... ပိုပေးမယ့်သူ ရှိသေးလားရှင်... တစ်သန်းရှစ်သိန်း ပထမအကြိမ်..."

"တစ်သန်းကိုးသိန်း... ဝယ်ယူသူ နံပါတ်ခြောက်က နတ်သမီးလေး ပန်းကြဲနေတဲ့ ပုံဖော်ထားတဲ့ ချင်းမင်းဆက် ရွှန်းကျီခေတ်က အပြာနဲ့အဖြူရောင် ကြွေပန်းကန်လုံးအတွက် ယွမ် တစ်သန်းကိုးသိန်း ပေးထားပါတယ်... တစ်သန်းကိုးသိန်း ပထမအကြိမ်..."

"တစ်သန်းကိုးသိန်း ဒုတိယအကြိမ်..."

"နှစ်သန်းတစ်သိန်း..."

"နံပါတ် ၃၃ က ယွမ် နှစ်သန်းတစ်သိန်း လေလံဆွဲထားပါတယ်..."

"ဈေးထပ်တိုးမယ့်သူ ရှိသေးလားရှင်..."

"နတ်သမီးလေး ပန်းကြဲနေတဲ့ ပုံဖော်ထားတဲ့ ချင်းမင်းဆက် ရွှန်းကျီခေတ်က အပြာနဲ့အဖြူရောင် ကြွေပန်းကန်လုံးကို ယွမ် နှစ်သန်းတစ်သိန်းနဲ့ ပထမအကြိမ်..."

"နှစ်သန်းတစ်သိန်း ဒုတိယအကြိမ်..."

"နှစ်သန်းတစ်သိန်း တတိယအကြိမ်..."

"အရောင်းအဝယ် ဖြစ်သွားပါပြီ..."

ဘန်း..

တူရိုက်သံနှင့်အတူ ပထမဆုံးပစ္စည်းကို ယွမ် နှစ်သန်းတစ်သိန်းဖြင့် အောင်မြင်စွာ လေလံဆွဲနိုင်ခဲ့ပြီး တကယ်ကို ကျက်သရေရှိသော အစပျိုးမှုတစ်ခု ဖြစ်ပေသည်။

ဤလေလံပွဲမှာ အတော်လေး ဆန်းသစ်နေကြောင်း စုယွမ် ခံစားလိုက်ရသည်။ အထူးသဖြင့် စင်မြင့်ပေါ်ရှိ လေလံမှူး၏ စကားလုံးများ၊ မျက်နှာအမူအရာများ၊ ကိုယ်ဟန်အမူအရာများနှင့် စိတ်ပိုင်းဆိုင်ရာ သက်ရောက်မှုများအားလုံးမှာ အလွန်ကောင်းမွန်စွာ လုပ်ဆောင်နိုင်စွမ်း ရှိပေ၏။

"မိတ်ဆွေလေး စုယွမ်က ဒီပစ္စည်းကို ဘယ်လိုထင်လဲ..." အဘိုးဝမ်က စိတ်ဝင်တစား မေးလိုက်သည်။

စုယွမ်မှာ သဘာဝကျကျပင် မသိရှိသော်လည်း လေလံပွဲက ဤစျေးနှုန်းအထိ ရောက်ရှိသွားသဖြင့် အတော်လေး ယုတ္တိတန်နေပေသည်။ "တကယ်လို့ ကျွန်တော်သာဆိုရင် ၁.၉ သန်းအထိပဲ လေလံဆွဲမှာ..."

အဘိုးဝမ်သည် ပြင်းပြင်းထန်ထန် သဘောတူညီကြောင်း ခေါင်းညိတ်ပြကာ "ဟုတ်တယ်... စျေးနှုန်းက ၂.၁ သန်းအထိ တက်သွားပြီ... ဒါက တကယ်တော့ ပုဂ္ဂိုလ်ရေး အကြိုက်အပေါ်မှာပဲ မူတည်တာလေ... တကယ်လို့ တစ်ယောက်ယောက်က အရမ်းသဘောကျနေတယ်ဆိုရင် ၅ သန်းအထိတောင် ပေးဝယ်နိုင်တယ်..."

ပထမပစ္စည်းကို လေလံတင်ပြီးနောက် ဒုတိယပစ္စည်းကို ဆက်လက် လေလံတင်ခဲ့သည်။ ၎င်းမှာလည်း ဧကရာဇ်တော်ဝင်မီးဖိုမှ ကြွေထည်ပစ္စည်းတစ်ခု ဖြစ်သော်လည်း လက်ရာမှာ ပထမတစ်ခုထက် ပိုမိုကောင်းမွန်နေပေ၏။ ၎င်းတွင် တုံချိုက် နည်းစနစ်ကို အသုံးပြုထားပြီး လေလံပွဲစတင်သည်နှင့် တစ်ပြိုင်နက် လူအများအပြားက ၎င်းအတွက် လေလံဆွဲခဲ့ကြသည်။

ကနဦးစျေးနှုန်းမှာ ယွမ် ရှစ်သိန်းဖြစ်သော်လည်း နောက်ဆုံးစျေးနှုန်းမှာ ယွမ် သုံးသန်းအထိ ခုန်တက်သွားခဲ့လေ၏။

တုံချိုက် ပန်းကန်လုံးများသည် စျေးကွက်ထဲတွင် အလွန်ရေပန်းစားနေဆဲဖြစ်ကြောင်း ပြောရမည်သာ ဖြစ်ပေသည်။

လေလံပွဲ အရှိန်အဟုန် အပြည့်ဖြင့် ကျင်းပနေစဉ်မှာပင် ယနေ့အတွက် သတင်းအချက်အလက် ငါးခုကို မစစ်ဆေးရသေးကြောင်း စုယွမ် ရုတ်တရက် သတိရသွားသည်။ ထို့ကြောင့် သူ၏ ကိုယ်ပိုင်စုဆောင်းမှုဆီသို့ မရောက်မီ သူ၏ထံသို့ တွန်းပို့ထားသော သတင်းအချက်အလက် ငါးခုကို စစ်ဆေးကြည့်လိုက်၏။

သတင်းအချက်အလက် (၁) ဆိုသဘီလေလံလုပ်ငန်းစုမှ အကဲဖြတ် ကျွမ်းကျင်ပညာရှင် သုံးဦးထဲမှ တစ်ဦးဖြစ်သော အဘိုးဟန်သည် ငယ်ရွယ်စဉ်က ဟောင်ကောင်တွင် ဩဇာကြီးမားသည့် ပုဂ္ဂိုလ်တစ်ဦးဖြစ်ပြီး ဟုန်ဂိုဏ်း၏ အဖွဲ့ဝင်တစ်ဦး ဖြစ်ခဲ့ပါတယ်... သူဟာ သစ္စာရှိမှုနဲ့ ဖြောင့်မတ်တည်ကြည်မှုကြောင့် လူသိများခဲ့ပေမဲ့ မြေအောက်လောကကို ရွံရှာသွားတဲ့အတွက် ဟုန်ဂိုဏ်းကနေ ထွက်ခွာခဲ့ပြီး ရှေးဟောင်းပစ္စည်း လုပ်ငန်းမှာပဲ သူ့ကိုယ်သူ မြှုပ်နှံခဲ့ပါတယ်...

ထိုသတင်းဖတ်ရှုပြီးနောက် စုယွမ်သည် သူ၏အရှေ့ရှိ အဘိုးဟန်ကို တစ်ချက်ကြည့်လိုက်သည်။ အဘိုးဟန်က ဟောင်ကောင်၌ သူ ကြုံတွေ့ရမည့် မည်သည့် ပြဿနာကိုမဆို ကူညီဖြေရှင်းပေးနိုင်ကြောင်း ယခင်က ပြောထားခဲ့သည်မှာ အံ့ဩစရာ မဟုတ်တော့ချေ။

ဤအဘိုးဟန်မှာလည်း ဟောင်ကောင်၌ ဧရာမ လွှမ်းမိုးနိုင်စွမ်းရှိသည်ဟု ခန့်မှန်းရသော လူကြီးပိုင်းတစ်ဦး ဖြစ်နေသည်ကိုး။

အကယ်၍ ထိုအစ်ကိုကျားသစ်သာ အဘိုးဟန်နှင့် ထိပ်တိုက်ရင်ဆိုင်ရပါက မည်သို့ဖြစ်လာမည်ကို သူ သိချင်နေမိ၏။

သတင်းအချက်အလက် (၂) ဆိုသဘီလေလံလုပ်ငန်းစုရဲ့ နွေရာသီ အထူးလေလံပွဲမှာ ၁၀ ခုမြောက် ပစ္စည်းကတော့ နန်ရှန်းတောင်လို သက်တမ်းရှည်ပါစေ လို့ အမည်ပေးထားတဲ့ ဝမ်သွမ် ရဲ့ တံဆိပ်တုံးပါတဲ့ လက်ရေးလှပန်းချီကား တစ်ချပ်ဖြစ်ပါတယ်... တံဆိပ်တုံး ကိုယ်တိုင်က စစ်မှန်ပေမဲ့ လက်ရေးလှပန်းချီကတော့ ဝမ်သွမ် ရဲ့ လက်ရာ မဟုတ်ပါဘူး... စတင်လေလံကြေးက နိမ့်ပေမဲ့ ဝယ်ယူဖို့ အကြံမပြုပါဘူး... ဒါ့အပြင် ဒီပစ္စည်းမှာ ဝှက်ထားတဲ့ အဓိပ္ပာယ်တစ်ခု ရှိနေပါတယ်... အပြင်ပန်းမှာ နန်ရှန်းတောင်လို သက်တမ်းရှည်ပါစေ လို့ ပုံဖော်ထားပေမဲ့ အတွင်းဘက်မှာတော့ နေဝင်ဆည်းဆာကို ပုံဖော်ထားပါတယ်...

စုယွမ်သည် လက်ရှိ လေလံတင်နေသော ပစ္စည်းများကို တစ်ချက် ကြည့်လိုက်၏။ သူတို့သည် ပစ္စည်းနံပါတ် သုံးသို့သာ ရောက်ရှိသေးပြီး ပစ္စည်းနံပါတ် ဆယ် မရောက်မီ အချိန်အနည်းငယ် လိုနေသေးပေသည်။

သို့သော် ဤစုဆောင်းမှုမှာ အသုံးမဝင်ချေ။ အဘယ်ကြောင့်ဆိုသော် ပထမကတည်းက သူသည် မည်သည့်အရာကိုမျှ ဝယ်ယူရန် ရည်ရွယ်ချက် လုံးဝ ရှိမနေခဲ့သောကြောင့်တည်း။

“ဒါပေမဲ့ အပြင်ဘက်မှာတော့ ‘နန်ရှန်းတောင်ကဲ့သို့ သက်တမ်းရှည်ပါစေ’ လို့ ဆုတောင်းထားပြီး၊ အတွင်းဘက်မှာကျတော့ ‘အနောက်တောင်တန်းများပေါ် နေဝင်ဆည်းဆာ’ ဆိုတဲ့ စာသား ဖြစ်နေတာက... အင်း... နည်းနည်းတော့... မင်းတို့လည်း နားလည်မှာပါလေ...”စုယွမ်က ထိုသို့ တွေးလိုက်မိသည်။

မကြာမီမှာပင် ရှစ်ခုမြောက် ပစ္စည်းနှင့်အတူ လေလံပွဲ၏ ပထမပိုင်း ပြီးဆုံးသွားလေ၏။ ဤပစ္စည်းရှစ်ခုစလုံးမှာ မည်သည့် အနုပညာကျောင်းတော်ကိုမျှ သီးခြား ကိုယ်စားပြုထားခြင်း မရှိသော်လည်း အားလုံးမှာ စျေးကောင်းရခဲ့သဖြင့် အလွန်အောင်မြင်သော လေလံပွဲတစ်ခု ဖြစ်ခဲ့ပေသည်။

လေလံမှူးမှာ စိတ်အခြေအနေ ကောင်းမွန်နေပြီး အချိန်ပြည့် ပြုံးရွှင်နေခဲ့ရာ လေလံပွဲများမှ ကြီးမားသော ကော်မရှင်ခ ရရှိမည်ဖြစ်သောကြောင့် ဖြစ်ပုံရပေ၏။

ယခုအခါ အချိန်ပိုင်း အနားပေးချိန်သို့ ရောက်ရှိသွားပြီး လေလံပွဲ၏ ဒုတိယပိုင်းကို စတင်တော့မည် ဖြစ်သည်။

ဤအချိန်မှာပင် လူရိပ်တစ်ခုက စုယွမ်၏ အနောက်သို့ ရောက်လာပြီး စုယွမ်၏ ပခုံးကို ပုတ်လိုက်သည်။ စုယွမ် လှည့်ကြည့်လိုက်ချိန်တွင် လီဝေ ဖြစ်နေကြောင်း မြင်တွေ့လိုက်ရ၏။

"မင်းလည်း ဒီမှာ လေလံဆွဲဖို့ ရောက်နေတာ မဟုတ်လား... စိတ်မပူပါနဲ့... တကယ်လို့ မင်းသဘောကျတဲ့ ပစ္စည်းတစ်ခုခုကို တွေ့ရင် အဲဒါကို ဝယ်ဖို့ ငါက ပိုပြီးပေးလိုက်မယ်..." လီဝေက ယုံကြည်မှုအပြည့်ဖြင့် ပြောလိုက်ပြီးနောက် စုယွမ်၏ အဖြေကို မစောင့်တော့ဘဲ လှမ်းထွက်သွားလေသည်။

စုယွမ်မှာ သူ့ဘာသာသူ ရယ်မောလိုက်မိ၏။

" ဒီကောင်က သူ့ကိုယ်သူ ငွေတွေနဲ့ မီးရှို့ဖို့ ကြိုးစားနေတာပဲ..."

ရုတ်တရက် စုယွမ်သည် ပစ္စည်းနံပါတ် ဆယ်ဖြစ်သော ဝမ်သွမ့်၏ လက်ရာကို သတိရသွားသည်။

"လီဝေက ဒီကို မွေးနေ့လက်ဆောင်တစ်ခု လေလံဆွဲဖို့ လာခဲ့တာ မဟုတ်ဘူးလား... ဒီဟာနဲ့ သူ့ကို လှည့်စားဖို့ ပြီးပြည့်စုံတဲ့ အခွင့်အရေးပဲ..." စုယွမ် တွေးတောလိုက်၏။

ခဏတာ အနားယူပြီးနောက် လေလံပွဲ၏ ဒုတိယပိုင်းကို ချက်ချင်း စတင်လိုက်သည်။

"လူကြီးမင်းများနဲ့ ဂုဏ်သရေရှိ ဧည့်သည်တော်များရှင်... ဆိုသဘီ လေလံလုပ်ငန်းစုရဲ့ နွေရာသီ အထူးလေလံပွဲ ဒုတိယပိုင်းကို အခု ဖွင့်လှစ်လိုက်ပါပြီ... ဒုတိယပိုင်းမှာ ပစ္စည်းခုနစ်ခု ပါဝင်ပြီး အားလုံးက ပန်းချီနဲ့ လက်ရေးလှ လက်ရာတွေပဲ ဖြစ်ပါတယ်..."

"ပစ္စည်းနံပါတ် ၉ ကတော့ ချင်းမင်းဆက်က ချန်လုံအင်ပါယာရဲ့ မဟာတံဆိပ်တုံးပါတဲ့ လက်ရေးလှ လက်ရာပဲ ဖြစ်ပါတယ်..."

နဝမမြောက် ပစ္စည်းမှာ အလွန်ဂုဏ်ကျက်သရေရှိသော ပစ္စည်းတစ်ခု ဖြစ်သော်လည်း လေလံဆွဲသူ အရေအတွက်မှာ အံ့ဩစရာကောင်းလောက်အောင် နည်းပါးနေခဲ့၏။

အဘိုးဝမ်သည် သူ၏မျက်မှန်ကို ပင့်တင်ကာ ပြုံးပြီး ပြောလိုက်သည်။ "လူအများစုက ဒီအင်ပါယာရဲ့ လက်ရာတွေကို သိပ်မဝယ်ကြဘူး... ဝယ်တဲ့သူတွေကလည်း အင်ပါယာရဲ့ နာမည်ကြောင့်သာ ဝယ်ကြတာ..."

စုယွမ် ခေါင်းညိတ်ပြလိုက်၏။ ပစ္စည်းနံပါတ် တစ်ဆယ် ထွက်ပေါ်လာတော့မည် ဖြစ်သဖြင့် စုယွမ်သည် ကြိုတင် ပြင်ဆင်လိုက်သည်။ "အဘိုးဝမ်... ကျွန်တော်တို့လည်း လေလံဆွဲဖို့ ကတ်ပြားမြှောက်လို့ ရလား..."

ဤစကားကို ကြားပြီးနောက် အဘိုးဝမ်က ခေါင်းညိတ်ပြလိုက်၏။ "အခန်းထဲက ဘယ်သူမဆို ကတ်ပြားမြှောက်ခွင့် ရှိတယ်..."

စုယွမ်သည် အခြားတစ်ဖက်ရှိ လီဝေအား တစ်ချက် လှမ်းကြည့်လိုက်ရာ လီဝေကလည်း ခြိမ်းခြောက်မှု မရှိသော အကြည့်များဖြင့် သူ့အား ပြန်လည် ကြည့်ရှုနေသည်ကို အံ့အားသင့်စွာ တွေ့ရှိလိုက်ရပေသည်။

စုယွမ်သည် သူ၏ ရန်စသည့်အကြည့်ကို ပြန်လည်တုံ့ပြန်လိုက်ပြီးနောက် သူ၏ လက်ထဲရှိ ကတ်ပြားကို လှုပ်ယမ်းပြလိုက်၏။ လီဝေမှာ သိသိသာသာပင် ရန်စခံလိုက်ရပြီး သူ၏ခေါင်းကို ဒေါသတကြီး တစ်ဖက်သို့ လှည့်သွားတော့သည်။

"နောက်တစ်ခုကတော့ ဒီလေလံပွဲရဲ့ ပစ္စည်းနံပါတ် ၁၀ ဖြစ်တဲ့ နန်ရှန်းတောင်လို သက်တမ်းရှည်ပါစေ ဆိုတဲ့ ဝမ်သွမ်ရဲ့ တံဆိပ်တုံးပါတဲ့ လက်ရေးလှပန်းချီတစ်ခုပါ... စတင်လေလံကြေးကတော့ ယွမ် ၂ သိန်းပါ..."