အခန်း ၁၃၀

အခန်း (၁၃၀) ငါ့ကားကို မတိုက်ပါနဲ့

အသစ်စက်စက် G - wagon ၏ ဈေးနှုန်းသတ်မှတ်ချက်ကို စိုက်ကြည့်ရင်း EV ကားပိုင်ရှင်သည် လုံးဝ အံ့သြမှင်တက်သွားတော့၏။

ဘုရားရေ... အဲ့ဒါက ယွမ်နှစ်သန်းကျော်တောင် ကုန်ကျမှာပဲ...

ထိုဈေးနှုန်းဖြင့် သူ၏ကိုယ်ပိုင်ကားမျိုး အစီးရေများစွာကို ဝယ်ယူနိုင်ပေသည်။

အခိုက်အတန့်မျှ သူသည် ဤကားက အလွန်တရာ ကြီးကျယ်ခမ်းနားပြီး ကြည့်ကောင်းကြောင်း ခံစားလိုက်ရလေသည်။

"ဟားဟားဟား... ဒီကောင်ရဲ့ မျက်နှာအမူအရာကို ကြည့်ရတာ G - wagon ရဲ့ ဈေးနှုန်းကို သိသွားလို့ ဆက်ပြီး မမိုက်ရဲတော့ဘူးလား..." အနီးနားရှိ လူတစ်ဦးက EV ကားပိုင်ရှင်၏ တုန်လှုပ်သွားသော အမူအရာကို မြင်ပြီး G - wagonသည် သူ၏ကိုယ်ပိုင်ကား ဖြစ်နေသည့်အလား အလွန်အမင်း ဝမ်းသာအားရ ဖြစ်နေခဲ့သည်။

ဤစကားကို ကြားချိန်တွင် EV ကားပိုင်ရှင်သည် အလွန်ယုံကြည်ရသော တုံးချယ်ဝမ် ဆော့ဖ်ဝဲလ်မှ အလျင်အမြန် ထွက်လိုက်ပြီး ဖုန်းကို သိမ်းဆည်းလိုက်ပေ၏။

သူသည် ကား၏ ဈေးနှုန်းကို သိရှိသွားပြီဖြစ်သော်လည်း ချက်ချင်း အလျှော့ပေးလိုက်ပါက သူ၏ ဂုဏ်သိက္ခာများ လုံးဝ ကျဆင်းသွားမည် မဟုတ်လော။

မဟုတ်ဘူး... မဟုတ်ဘူး... ငါ့ကားက ဒီကားလောက် မဈေးကြီးရင်တောင်မှ ငါ အလျှော့ပေးလို့ မရဘူး... EV ကားပိုင်ရှင် တစ်ယောက်ရဲ့ မြင့်မြတ်တဲ့ ဟန်ပန်ကို ငါ ထိန်းသိမ်းထားရမယ်...

"ဟေး ညီလေး... မင်းကားက... အဆင်ပြေပါတယ်... သိပ်ပြီးတော့လည်း ထူးထူးခြားခြား မရှိပါဘူး..."

"အဓိကက မင်းကားက တစ်ပတ်ရစ်ကားမို့လို့... သိပ်မကုန်လောက်ပါဘူး..."

"တစ်ပတ်ရစ်ကား ဖြစ်နေတော့ သဘာဝကျကျပဲ ငါ့ကားနဲ့ ယှဉ်လို့မရဘူးပေါ့... ဒါပေမဲ့ အဆင့်မြင့်ကားပိုင်ရှင် တစ်ယောက်အနေနဲ့ ငါမင်းကို ပြောစရာ တစ်ခုရှိတယ်..."

"ဘာလို့လဲဆိုတော့ လူငယ်တွေက သိပ်ပြီး အချည်းနှီး မာနမကြီးသင့်ဘူးလေ... ကားသစ်မဝယ်နိုင်ရင် ချမ်းသာချင်ယောင်ဆောင်ပြီး တစ်ပတ်ရစ်ကားကို ဝယ်ကြတယ်... ဒီတစ်ပတ်ရစ်ကားက တော်တော်လေး ဈေးပေါမယ်ဆိုတာ ငါရဲရဲကြီး လောင်းရဲတယ်... ဟုတ်တယ်မလား..."

"ဒါက ပျက်စီးနေတဲ့ကားဆိုတာ ငါတစ်ချက်ကြည့်ရုံနဲ့ သိနိုင်တယ်... ဟားဟားဟား... လူငယ်လေး... မျက်နှာပန်းလှအောင် ကားကိုအသုံးပြုဖို့ မင်းရဲ့အကြံအစည်ကတော့ ပျက်စီးသွားပြီ..."

EV ကားပိုင်ရှင်သည် သူ့ဘာသာသူ ဆက်လက်ပြောဆိုနေခဲ့ပြီး စကားပြောလေလေ ပို၍ ယုံကြည်မှု ရှိလာလေလေဖြစ်ကာ လူအုပ်ကြီးကို ကျေနပ်အားရနေသော အကြည့်ဖြင့် ကြည့်လိုက်လေသည်။

ဟုတ်တယ်... ငါ ခုနက တကယ်ပဲ အရူးလုပ်ခံလိုက်ရတာ... ဒီလူက အရမ်းငယ်သေးတယ်... ငါ့ထက် အနည်းဆုံး ဆယ်နှစ်လောက် ငယ်တယ်... သူက ဘယ်လိုလုပ်ပြီး ဒီလောက် ဈေးကြီးတဲ့ကားကို ဝယ်နိုင်မှာလဲ...

ဒါကြောင့် ဒါက မတော်တဆဖြစ်ထားတဲ့၊ ရေမြုပ်ထားတဲ့၊ ပြီးတော့ မိုင်ကုန်နေတဲ့ ကားဖြစ်ရမယ်... သူတို့က အပြင်ပိုင်းကိုပဲ ပြန်ပြင်ထားတာဖြစ်ပြီး အဲ့ဒါကို ဝယ်ဖို့တောင် ယွမ် သုံးသိန်းကနေ လေးသိန်းအထိ ကုန်ကျသေးတယ်...

ကြွားဝါဖို့အတွက် ကားကိုအသုံးပြုတာက တကယ့်ကို မိုက်မဲလွန်းလှပေ၏။

EV ကားပိုင်ရှင်၏ အရှက်မဲ့သော စကားများကို ကြားလိုက်ရသဖြင့် ဘေးပတ်လည်ရှိ လူများအားလုံး ကူကယ်ရာမဲ့သော အမူအရာများ ဖြစ်သွားကြလေသည်။

ဤကဲ့သို့သော နေ့ရက်မျိုးတွင် သူ့ကို ရှက်ရွံ့သွားစေရန် ပြုလုပ်ဖို့မှာ လုံးဝ ခက်ခဲလွန်းလှပေသည်။

EV ကားပိုင်ရှင်က ကျေနပ်အားရနေချိန်မှာပင် စုယွမ်က ကားတံခါးကိုဖွင့်ကာ ကားထဲသို့ ဝင်ရန် ပြင်ဆင်နေသည်ကို ရုတ်တရက် မြင်တွေ့လိုက်ရ၏။

ဤသည်က သူ ယခုလေးတင် ပြောဆိုခဲ့သော စကားများ မှန်ကန်သည်ဟု ထင်မှတ်သွားစေကာ သူ့ကို ပို၍ပင် စိတ်လှုပ်ရှားသွားစေခဲ့သည်။ သူက စုယွမ်အား အလျင်အမြန် ပြောဆိုလိုက်သည်။ "လူငယ်လေး... မင်းအစ်ကို ပြောတာကိုသာ နားထောင်ပါ... မျက်နှာပန်းလှဖို့အတွက် အဲ့ဒီလောက်ကြီး ဂရုစိုက်နေစရာ မလိုပါဘူး... တကယ်လို့ ငါ့လိုမျိုး အကဲခတ်ကောင်းတဲ့သူနဲ့ တွေ့ရင် မင်းရဲ့ အကွက်တွေ ပေါ်သွားလိမ့်မယ်..."

"တကယ်လို့ မင်းရဲ့ စိတ်ထဲက ဒီအချည်းနှီး မာနတွေကို ဖယ်ရှားမပစ်ရင် ငါ့လို အဆင့်မြင့် ကားပိုင်ရှင် တစ်ယောက်နဲ့ ဘယ်တော့မှ တစ်တန်းတည်း ဖြစ်လာမှာ မဟုတ်ဘူး..." ဤသို့ပြောဆိုရင်း EV ကားပိုင်ရှင်က လူအုပ်ကြီးကိုလည်း ရန်စသည့် အကြည့်ဖြင့် တစ်ချက် ကြည့်လိုက်လေသည်။

"ဖြည်းဖြည်းသွား... မှတ်ထားဦး... နောက်တစ်ခါ EV ကားပိုင်ရှင် တစ်ယောက်နဲ့ ကြုံရင် သိုသိုသိပ်သိပ် နေပါ..." EV ကားပိုင်ရှင်က ညွှန်ကြားလိုက်၏။

"ကျွန်တော် ထွက်သွားတော့မယ်လို့ မပြောခဲ့ပါဘူး..." စုယွမ်က ကားမှန်ကို ချလိုက်ပြီး ဖြည်းညင်းစွာ ပြောဆိုလိုက်သည်။ ယထို့နောက် သူ၏ လက်ထဲမှ စက္ကူတစ်ရွက်ကို ဝှေ့ယမ်းကာ ပြောဆိုလိုက်၏။

"ပွင့်ပွင့်လင်းလင်း ပြောရရင် ကျွန်တော် ဘယ်လိုကားမျိုး မောင်းတယ်ဆိုတာကို ဂရုမစိုက်ဘူး... ပြီးတော့ ခင်ဗျားပြောနေတဲ့ အချည်းနှီး မာနမျိုးလည်း ကျွန်တော့်ဆီမှာ မရှိဘူး..."

“ဒါပေမဲ့ ခင်ဗျား ဒီကားကို မောင်းနေတဲ့ပုံစံကို ကြည့်ရတာတော့ တော်တော်လေး မောက်မာနေသလိုပဲ...

အဆုံးသတ်မှာတော့ ခင်ဗျားက ဒီကားကို ကိုယ့်ရဲ့ အဆင့်အတန်းပြဖို့၊ မျက်နှာပန်းလှဖို့အတွက်ပဲ အသုံးချချင်တာ မဟုတ်လား...

ဒါပေမဲ့ ကားကိုတောင် စည်းကမ်းတကျ မရပ်တတ်တဲ့သူရဲ့ အကျင့်စရိုက်က ဘယ်လောက်ကောင်းနိုင်မှာလဲ...

ခင်ဗျားလို လူမျိုးကတော့ ဘယ်နေရာရောက်ရောက် အထင်သေးခံရဖို့ပဲ ရှိတယ်...”

စုယွမ်က နှာခေါင်းရှုံ့ကာ မထီမဲ့မြင် အပြုံးတစ်ခုဖြင့် ပြောလိုက်သည်။

"မင်း ဘာတွေ အဓိပ္ပာယ်မရှိတာ ပြောနေတာလဲ... ငါ့ကားက အဆင့်မြင့် နည်းပညာရဲ့ ပြယုဂ်ကွ... ပျက်စီးနေတဲ့ တစ်ပတ်ရစ်ကားကို မောင်းတဲ့ မင်းက ငါ့ကို ဒီလိုစကားမျိုးပြောဖို့ ဘာအရည်အချင်းရှိလို့လဲ..." စုယွမ်က အချက်ကျကျ ထောက်ပြလိုက်သောကြောင့် EV ကားပိုင်ရှင်သည် အလွန်အမင်း ဒေါသထွက်သွားခဲ့လေသည်။

"မတော်တဆဖြစ်ပြီး ပျက်စီးနေတဲ့ တစ်ပတ်ရစ်ကားကို မောင်းပြီး ဒီလောက်တောင် မောက်မာနေတာ... ကားပါကင် နှစ်နေရာစာ ယူထားနိုင်တဲ့ ငါများ မှတ်နေလား..." EV ကားပိုင်ရှင်က တစ်ချက်ကြည့်ကာ ပြောဆိုလိုက်၏။

“အင်း... ခင်ဗျား သဘောအတိုင်းပဲ ထင်လိုက်ပါ...

ဒါပေမဲ့ ကံမကောင်းစွာနဲ့ ဒီကားကိုတော့ ကျွန်တော် ငွေသားနဲ့ တစ်ခါတည်း ဝယ်ထားတာပဲ...”

စုယွမ်က စကားဆုံးသည်နှင့် လက်ထဲတွင် ကိုင်ထားသော စာရွက်ကို ပေါ့ပေါ့ပါးပါး လွှတ်ချလိုက်သည်။

စာရွက်မှာ လေထဲတွင် လွင့်မျောသွားပြီး ဘေးတွင် ရပ်ကြည့်နေသော လူတစ်ဦး၏ ခြေရင်းသို့ မတော်တဆ ကျရောက်သွားလေ၏။

ထိုလူက စာရွက်ကို အလျင်အမြန် ကောက်ယူလိုက်ပြီး ငွေပေးချေမှု မှတ်တမ်းပေါ်ရှိ ပမာဏကို မြင်လိုက်ရသည့်အခါ မျက်လုံးများ ပြူးကျယ်သွားတော့သည်။

ငွေပေးချေထားသော ပမာဏမှာ ယွမ်နှစ်သန်းကျော် ရှိနေပြီး၊ တန်ဖိုးမြှင့်အခွန်နှင့် အခြားသော အခကြေးငွေများကိုပါ ထည့်တွက်လိုက်လျှင် စုစုပေါင်း ယွမ်သုံးသန်းနီးပါးအထိ ရှိနေပေသည်။

"ဒီလူကို ကြည့်စမ်း... သူက တကယ့် သူဌေးကြီးပဲ... ဒီကားကို ငွေသား ယွမ်နှစ်သန်းကျော်၊ သုံးသန်းနီးပါး ပေးပြီး ဝယ်ခဲ့တာ..."

"မင်းရဲ့ စုတ်ပြတ်နေတဲ့ကားက ဘယ်လိုလုပ် ယှဉ်နိုင်မှာလဲ... ဒီကားနဲ့ ယှဉ်ရင် မင်းက ညီလေးအဆင့်ပဲ ရှိသေးတယ်..."

"ဟုတ်တယ်... ဒီစုတ်ပြတ်နေတဲ့ လျှပ်စစ်ကားကို မောင်းပြီး မင်းက ဘာကို သက်သေပြချင်နေတာလဲ... လျှပ်စစ်ကားကို မောင်းရုံနဲ့ မင်းကိုယ်မင်း နည်းပညာ ရှေ့ဆောင်ကြီးလို့ တကယ်ပဲ ထင်နေတာလား... မင်းကိုယ်မင်း အဆင့်မြင့်တယ်လို့ တကယ်ပဲ ထင်နေတာလား... ကားတစ်စီးနဲ့ ပတ်သက်ပြီး မင်းလိုမျိုး ပြဿနာရှာတဲ့လူကို တစ်ခါမှ မတွေ့ဖူးဘူး..."

"မင်းက လုံးဝ အကျင့်စာရိတ္တ မရှိဘူးပဲ... ကိုယ့်ကားကိုပဲ အကောင်းထင်ပြီး တခြားလူတွေရဲ့ကားကို အမှိုက်လို့ ထင်နေတယ်... မင်းက ကားအကြောင်း ဘာမှနားမလည်ဘဲနဲ့ တခြားလူရဲ့ကားကို မတော်တဆဖြစ်ထားတဲ့ ကားလို့ ခေါ်ရဲသေးတယ်... မင်းက ဘယ်ကနေ သတ္တိတွေ ရလာပြီး အဲ့ဒီလို ပြောရဲတာလဲ..."

"မင်းက ကားပါကင် နှစ်နေရာစာ ယူထားတာ... မင်းမှာ ဘာအရည်အချင်းရှိလို့လဲ... မင်းက အဆင့်မြင့်တယ်ဆိုတဲ့ အဓိပ္ပာယ်မရှိတဲ့ စကားတွေကို ဆက်တိုက်ပြောနေပေမဲ့ ငါထင်တာတော့ မင်းက ကိုယ့်ကိုယ်ကိုယ် ယုံကြည်မှု ကင်းမဲ့နေတဲ့ အဆင့်နိမ့်လူတန်းစား တစ်ယောက်ပဲ... မင်းက အောက်ဆုံးအဆင့်က လူပဲ... သိလား..."

လူအုပ်ကြီးက သူတို့၏ ခေါင်းဆောင်ကို တွေ့ရှိသွားသည့်အလား EV ကားပိုင်ရှင်ကို စကားလုံးများဖြင့် စတင်တိုက်ခိုက်ကြတော့၏။

"မင်း... မင်းတို့အားလုံး... ဘာအဓိပ္ပာယ်လဲ... မင်းတို့က ဘယ်သူ့ကို အဆင့်နိမ့်တယ်လို့ ခေါ်နေတာလဲ..." EV ကားပိုင်ရှင်က အလွန်အမင်း ဒေါသထွက်သွားခဲ့သည်။ တကယ်ကိုပဲ သူ့ကို အဆင့်နိမ့်သည်ဟု ခေါ်ဝေါ်ခဲ့ကြသည် မဟုတ်လော။

သိကြတဲ့အတိုင်းပဲ...

သူသည် ယခင်က အဆင့်နိမ့်သည်ဟု မကြာခဏ အပြောခံခဲ့ရသောကြောင့် အဆင့်မြင့်လူတန်းစား တစ်ယောက် ဖြစ်လာစေရန် ဤကားကို ဝယ်ယူခဲ့ခြင်း ဖြစ်သည် မဟုတ်လော။

အကယ်၍ သူက အဆင့်မြင့်လူတန်းစား တစ်ယောက် ဖြစ်လာပြီဆိုလျှင် ဤလူများက သူ့ကို အဘယ်ကြောင့် အဆင့်နိမ့်သူဟု ခေါ်ဆိုနေကြဆဲ ဖြစ်သနည်း။

သူက ဘာလို့ ခံရမှာလဲ။

"အသိဉာဏ်ကင်းမဲ့တဲ့ အဆင့်နိမ့်ကောင်တွေ... မင်းတို့က တကယ့်ကို ရွံစရာကောင်းတာပဲ..."

"ပြီးတော့ မင်း... မင်းက ဘာတွေ ဟန်ဆောင်နေတာလဲ... စုတ်ပြတ်နေတဲ့ သံပုံးကားကို မောင်းပြီးတော့... သတ္တိရှိရင် ငါ့ကားကို ဝင်တိုက်လိုက်စမ်း..." EV ကားပိုင်ရှင်က ဒေါသတကြီး ပြောဆိုလိုက်သည်။

"ကောင်းပြီလေ... ခင်ဗျားပဲ ပြောတာနော်..." စုယွမ်က ပြုံးလိုက်ပြီး ကားသော့ကို လှည့်ကာ လီဗာကို နင်းချလိုက်သည်။ ကားကြီးက EV ကားဆီသို့ ဟိန်းဟောက်ကာ ပြေးဝင်သွားတော့၏။

"ယွမ်သိန်းဂဏန်းလောက်ပဲ မဟုတ်လား... အဲ့ဒီလောက်တော့ အရှုံးခံနိုင်ပါတယ်..."

စုယွမ်၏ မောက်မာသော စကားများကို ကြားလိုက်ရချိန်တွင် EV ကားပိုင်ရှင်သည် ချက်ချင်း ထိတ်လန့်သွားတော့သည်။

ဤသည်က လျော်ကြေးပေးမည် မပေးမည်ဆိုသည့် ပြဿနာသက်သက် မဟုတ်ချေ။ အကယ်၍ တိုက်မိပြီး တကယ်ပျက်စီးသွားပါက ဤကားကို ပြန်ဝယ်ရန် နောက်ထပ် တစ်နှစ်ခန့် အချိန်ယူရမည် ဖြစ်ပေသည်။

"ဒုက္ခပဲ..." EV ကားပိုင်ရှင်သည် တုန်လှုပ်သွားခဲ့၏။ စုယွမ်က ဤမျှလောက်အထိ ရဲတင်းလိမ့်မည်ဟု သူ ဘယ်သောအခါမှ မထင်မှတ်ထားခဲ့ချေ။ စုယွမ်က သူ၏ကားကို တကယ်ပင် ဝင်တိုက်ရဲသည်ကို သူ လုံးဝ သံသယမဝင်တော့ပေ။

သူက မောက်မာသူဖြစ်သော်လည်း ဤကဲ့သို့သော ကားမျိုးကို မောင်းနှင်သူများသည် အလွန်စွမ်းဆောင်ရည်ရှိသူများ ဖြစ်ကြောင်းကိုတော့ သူ သိရှိထားဆဲပင် ဖြစ်၏။

ဤသည်ကို သဘောပေါက်သွားချိန်၌ သူသည် ကားအရှေ့သို့ ချက်ချင်း ပြေးဝင်ရပ်လိုက်ပြီး "အစ်ကိုကြီး... အစ်ကိုကြီး... ကျွန်တော် မှားသွားပါတယ်... ကျေးဇူးပြုပြီး ကျွန်တော့်ကားကို မတိုက်ပါနဲ့..." ဟု အသနားခံကာ အော်ဟစ်လိုက်လေသည်။

နောက်ဆုံးတွင်တော့ EV ကားပိုင်ရှင်သည် ပြိုင်ဘက်ကောင်းနှင့် တွေ့ဆုံသွားချိန်၌ ကြောက်ရွံ့သွားခဲ့လေတော့၏။