အခန်း ၁၃

အပိုင်း ၁၃

အရာရှိများမှာ ဇာတ်လမ်း အရှိန်တက်နေသည်ကို ကြည့်ရှုနေကြစဉ် ညီလာခံ မပြီးဆုံးမီမှာပင် ယဉ်ကျေးမှုဝန်ကြီးနှင့် ဧကရာဇ်၏ ဦးလေးဖြစ်သူ ကုကျန်းယွမ်က ရှေ့သို့ တိုးထွက်လာပြီး ဟိန်းထွက်သော အသံဖြင့် ပြောလိုက်လေ၏။ "အရှင် ကျွန်တော်မျိုးမှာ တင်ပြစရာ ရှိပါတယ်"

အားလုံး၏ အကြည့်များမှာ ကုကျန်းယွမ်ထံသို့ ရောက်ရှိသွားကြသည်။ သူ၏ ဝန်ကြီးရာထူးမှာ ဧကရာဇ်က သူ၏ဦးလေးအား ဂုဏ်သိက္ခာပေးရန်အတွက် ချီးမြှင့်ထားသော အဆောင်အယောင်မျှသာ ဖြစ်ကြောင်း လူတိုင်း သိထားကြ၏။ ဝန်ကြီးဌာနကလည်း သူ့အား အရေးမပါသော စာရွက်စာတမ်း အလုပ်များကိုသာ ပေးအပ်ထားခြင်း ဖြစ်လေသည်။

ယခင် ညီလာခံများတွင် ကုကျန်းယွမ်သည် အမြဲတမ်း တိတ်ဆိတ်နေလေ့ရှိသူပင်။ ယခု သူ ရုတ်တရက် ထွက်ပေါ်လာခြင်းမှာ ပြဿနာတစ်ခုခု ရှိနေပြီဖြစ်ကြောင်း ညွှန်ပြနေ၏။

မြို့စားလီ ဖြစ်သူ ကုကျင်းဟွေ့က မျက်မှောင်ကြုတ်လိုက်ပြီး မကျေမနပ် ဖြစ်သွားသည်။ သူ၏ညီဖြစ်သူက ဤကဲ့သို့ စာလွှာမတင်မီ သူ့အား အဘယ်ကြောင့် တိုင်ပင်ခြင်း မပြုရသနည်း။ ကုမိသားစု၏ အကြီးအကဲဖြစ်သူ သူ့အား ကုကျန်းယွမ်က မလေးစားတော့ခြင်းလော။

ထိုစဉ်မှာပင် ကုကျန်းယွမ်၏ အသံ ထွက်ပေါ်လာ၏။ "ကျွန်တော်မျိုးရဲ့ အစ်ကိုကြီး မြို့စားလီက ယခင် ဧကရာဇ် ကွယ်လွန်ခြင်းအတွက် ဝမ်းနည်းပူဆွေးနေရတဲ့ ကာလအတွင်းမှာ အရက်သေစာနဲ့ ပျော်ပါးမှုတွေကို ပြုလုပ်ခဲ့ပြီး ကိုယ်လုပ်တော်တစ်ဦးကို ကိုယ်ဝန်ရစေခဲ့တဲ့အတွက် ကျွန်တော်မျိုးက စွဲချက်တင်ပါတယ်"

"သူက လာဘ်ပေးလာဘ်ယူမှုတွေ လုပ်ခဲ့တယ်၊ ရာထူးတွေကို ရောင်းဝယ်ခဲ့တယ်၊ ပြီးတော့ တိုင်းပြည်ရဲ့ ဥပဒေတွေကိုလဲ ချိုးဖောက်ခဲ့ပါတယ်"

သူ၏ ဟိန်းထွက်နေသော အသံမှာ ခန်းမတစ်ခုလုံး၌ ပဲ့တင်ထပ်နေပြီး စကားလုံးတိုင်းမှာ ကုကျင်းဟွေ့အား တစ်ကြိမ်တည်းနှင့် အသေသတ်ရန် ရည်ရွယ်ထားသော ဓားမြှောင်များကဲ့သို့ပင် ဖြစ်လေ၏။

ကုကျင်းဟွေ့သည် သူ၏ညီဖြစ်သူအား ပထမဆုံးအကြိမ် မြင်ဖူးသကဲ့သို့ မယုံကြည်နိုင်စွာ ကြည့်နေမိသည်။ သူ၏ လည်ချောင်းထဲတွင် သွေးများ စုတက်လာပြီး တုန်ရီနေသော အသံဖြင့် ခက်ခဲစွာ ပြောနိုင်တော့လေ၏။ "မင်း... မင်း..."

ကုကျန်းယွမ်ကမူ ခိုင်ခိုင်မာမာ ရပ်တည်ကာ တရားမျှတဟန်ဖြင့် ဆိုလိုက်သည်။ "အစ်ကိုကြီး... ကျွန်တော်တို့မှာ တူညီတဲ့ သွေးသားတွေ ရှိပေမဲ့ ညီအစ်ကို သံယောဇဉ်ကို ငဲ့ပြီး အစ်ကိုကြီးရဲ့ ပြစ်မှုတွေကိုတော့ ကျွန်တော် မဖုံးကွယ်ပေးနိုင်ပါဘူး။ အစ်ကိုကြီးက အရှင်မင်းကြီးရဲ့ ယုံကြည်မှုကို သစ္စာဖောက်ခဲ့ပြီး ကုမိသားစုကို အရှက်ရစေခဲ့တယ်။ ဘိုးဘေးတွေကို အစ်ကိုကြီး ဘယ်လိုမျက်နှာပြရဲမှာလဲ"

ကုကျင်းဟွေ့က သူ့ကို တစ်ချက်ကြည့်လိုက်ပြီး နဂါးပလ္လင်ပေါ်တွင် မြင့်မားစွာ ထိုင်နေသော ဧကရာဇ်မင်းမြတ်ထံသို့ အကြည့်ကို လွှဲလိုက်သည်။ ဧကရာဇ်၏ မျက်နှာအမူအရာမှာ တည်ငြိမ်နေပြီး သူ၏ မျက်ဝန်းများမှာ နက်ရှိုင်းလှသဖြင့် ထိုအချိန်တွင် သူ ဘာတွေးနေသည်ကို သိရှိရန် မဖြစ်နိုင်ပေ။

ထိုအခိုက်အတန့်တွင် ကုကျင်းဟွေ့သည် ရုတ်တရက် နားလည်သွားခဲ့သည်—သူ၏ အသက်နှင့် ရာထူးကို လိုချင်နေသူမှာ သူ၏ညီမဟုတ်ဘဲ သူ၏တူဖြစ်သူသာ ဖြစ်ကြောင်းပင်။

၎င်းမှာ သူက နန်းပြင်တွင် ယွီကျဲယွီနှင့် ပတ်သက်သည့် ကောလာဟလများကို ဖြန့်ဝေခဲ့ခြင်းကြောင့်လော။

သို့မဟုတ်ပါက သူ၏သမီးအား မိဖုရားခေါင်ကြီး ဖြစ်လာစေရန် သူ၏ ရည်မှန်းချက်ကို မစွန့်လွှတ်နိုင်ခဲ့ခြင်းကြောင့်လော။ သူ၏အစ်မဖြစ်သူမှာ ကုမိသားစုတွင် အကြီးဆုံးဖြစ်သော်လည်း သူတို့အပေါ် မိသားစု သံယောဇဉ် အလွန်နည်းပါးခဲ့သည်။ ကု မိသားစု၏ သာယာဝပြောရေးကို ဆက်ထိန်းသိမ်းရန်အတွက် သူသည် သူ၏သမီးကို နန်းတွင်းသို့ တွန်းပို့ခဲ့ခြင်း ဖြစ်၏။

ယခု ဧကရာဇ်တွင် ကုမိသားစု၏ သွေးသားများ ပါဝင်နေရုံမျှဖြင့် သူသည် မဖြစ်နိုင်သော မျှော်လင့်ချက်များကို မထားရှိသင့်ပေ။ ဧကရာဇ်သည် သူတို့အား မည်သည့်အခါမျှ ဆွေမျိုးကဲ့သို့ မသတ်မှတ်ခဲ့ချေ။ လွန်ခဲ့သည့် ဆယ့်နှစ်နှစ် ယခင် ဧကရာဇ် နတ်ရွာစံပြီး သူ၏တူဖြစ်သူ နန်းတက်စဉ်က သူ့အား မြို့စားဘွဲ့ ပေးအပ်သည့် အမိန့်တော်မှာ နှောင့်နှေးခဲ့ဖူးသည်။ ထိုစဉ်က ဧကရာဇ်သည် သူ၏မယ်တော်အား မယ်တော်ကြီးက ငယ်စဉ်အခါက နှိပ်စက်ခဲ့မှုကြောင့် သူတို့အပေါ် အာဃာတ ထားရှိနေခြင်းဖြစ်မည်ဟု သူတို့ ခန့်မှန်းခဲ့ကြ၏။ သူ၏မိခင် သက်ရှိထင်ရှား ရှိနေသရွေ့ ထိုဆူးမှာ ဘယ်တော့မှ ပျောက်ကွယ်သွားမည် မဟုတ်ပေ။

ထိုစဉ်က သူသည် သူ၏မိခင်အား သူမ ရှိနေခြင်းက ကုမိသားစု တိုးတက်ရေးအတွက် အတားအဆီး ဖြစ်နေကြောင်း ပြောခဲ့ဖူးသည်။

သူ၏မိခင်က သူ့အား အေးစက်စွာ ကြည့်ရင်း ပြောခဲ့သည်။ "ငါ သေသွားရင် သူက မင်းကို သူ့ဦးလေးလို့ တကယ် သတ်မှတ်လိမ့်မယ် ထင်နေတာလား"

"သူ မင်းကို မနှစ်သက်တော့တဲ့ တစ်နေ့မှာ မင်းရဲ့ ကံကြမ္မာကလဲ ငါ့ထက် ပိုကောင်းလာမှာ မဟုတ်ဘူး"

ထိုစဉ်က သူသည် နားမထောင်ဘဲ ရှေ့ရေးကို ကြည့်ရန်နှင့် အနာဂတ် မျိုးဆက်သစ်များအတွက် စဉ်းစားရန် သူ၏မိခင်အား ခေါင်းမာစွာ တိုက်တွန်းခဲ့သည်။

နောက်ဆုံးတွင် သူ၏မိခင်သည် သူတို့အတွက်ကြောင့် အဆိပ်ရည်ကို သောက်သုံးခဲ့ရ၏။

သူ၏မိခင် သေဆုံးသွားသည့် မြင်ကွင်းမှာ ကုကျင်းဟွေ့၏ စိတ်ထဲတွင် လျှပ်ခနဲ ပေါ်လာခဲ့ပြီး၊ ထိုအခိုက်အတန့်တွင် သူသည် အမှန်တရားကို နားလည်သွားခဲ့သည်—ဧကရာဇ်သည် ယခင်က သူ၏မိခင်အရင်းကိုပင် သည်းမခံနိုင်ခဲ့သကဲ့သို့ သူ့ကိုလည်း သည်းခံနိုင်တော့မည် မဟုတ်ပေ။ အကယ်၍ သူသာ ပြစ်မှုများကို ဝန်ခံလိုက်ပါက အနည်းဆုံးတော့ သူ့မိသားစု မျိုးဆက်ကို ထိန်းသိမ်းနိုင်ပေလိမ့်မည်။

သူ၏မျက်နှာမှာ ဖြူလျော့သွားပြီး ဒူးထောက်ကာ လျှောက်တင်ခဲ့၏။ "ကျွန်တော်မျိုးက အကြိမ်ပေါင်းများစွာ သေထိုက်ပါတယ် "

သူသည် မိမိကိုယ်ကိုယ် ခုခံကာကွယ်ခြင်း မပြုဘဲ ပြစ်မှုများကို တိုက်ရိုက် ဝန်ခံခဲ့သည်။ သူသည် ထိုပြစ်မှုများကို အမှန်တကယ် ကျူးလွန်ခဲ့သော်လည်း ယခင်ကမူ ၎င်းတို့ကို အရေးကြီးသည်ဟု မယူဆခဲ့ဖူးချေ။

ဖေးလင်ယွဲ့၏ မျက်နှာအမူအရာမှာ တည်ငြိမ်နေဆဲ ဖြစ်သော်လည်း သူ၏ အသံမှာမူ အေးစက်ကာ ပြတ်သားလှသည်။ "မြို့စားလီ ကုကျင်းဟွေ့ဟာ စည်းမျဉ်းတွေကို လျစ်လျူရှုပြီး ခမည်းတော် ဧကရာဇ်အတွက် ဝမ်းနည်းနေရတဲ့ ကာလအတွင်းမှာ ကိုယ်လုပ်တော်ကို ကိုယ်ဝန်ရစေခဲ့တယ်—ဒါဟာ အလွန်ကို မလေးစားရာ ရောက်တဲ့ လုပ်ရပ်ပဲ။ ဒါ့အပြင် သူဟာ ရာထူးတွေကို ရောင်းဝယ်ဖောက်ကားပြီး နန်းတွင်းကို ညစ်ညမ်းအောင် လုပ်ခဲ့တယ်။ ဒါကြောင့် ဒီနေ့ကစပြီး မြို့စားလီ ဘွဲ့ကို ရုပ်သိမ်းလိုက်တယ်၊ သူ့ကိုလဲ ရာထူးကနေ ထုတ်ပယ်ပြီး ဆောင်းဦးရာသီအပြီးမှာ ကွပ်မျက်ရမယ်။ ကုမိသားစု အကြီးအကဲရဲ့ ပိုင်ဆိုင်မှု အားလုံးကို သိမ်းဆည်းပြီး တခြားသူတွေအတွက် သတိပေးချက်အနေနဲ့ ဘဏ္ဍာတိုက်ထဲကို ထည့်သွင်းရမယ်"

"ယဉ်ကျေးမှုဝန်ကြီး ကုကျန်းယွမ်ဟာ သူ၏ ရိုးသားဖြောင့်မတ်မှုနဲ့ သစ္စာရှိမှုကြောင့် မြို့စားဘွဲ့ကို ဆက်ခံရမယ်၊ ဒါပေမဲ့ သူ၏ အရည်အချင်းကို အသိအမှတ်ပြုတဲ့အနေနဲ့ ရာထူးအဆင့် တစ်ဆင့်တော့ လျှော့ချမယ်"

"သာမန်လူ ဖြစ်သွားတဲ့ ကုကျင်းဟွေ့ကို နန်းတွင်းအကျဉ်းထောင်ထဲ ခေါ်သွားလိုက်တော့"

ညီလာခံခန်းမတစ်ခုလုံးမှာ သေမင်းတမျှ တိတ်ဆိတ်သွားခဲ့၏။ ကုကျင်းဟွေ့ ကျူးလွန်ခဲ့သော ပြစ်မှုများအရ ဧကရာဇ်၏ ပြစ်ဒဏ်မှာ ဥပဒေနှင့်အညီ မျှတလှသည်။ သို့သော်လည်း ဧကရာဇ်သည် သွေးသားတော်စပ်မှုကို လုံးဝ လျစ်လျူရှုကာ၊ ဘုရားဖူးသွားနေသော မယ်တော်ကြီး၏ မျက်နှာကိုပင် မထောက်ထားလိမ့်မည်ဟု မည်သူမျှ မထင်ထားခဲ့ကြချေ။ ရာထူးကို ရုပ်သိမ်းကာ ပိုင်ဆိုင်မှုများကို သိမ်းဆည်းရုံသာမက သူ၏ဦးလေးအရင်းကိုပါ သေဒဏ်ပေးခဲ့ခြင်း ဖြစ်သည်။

ဧကရာဇ်၏ ဦးလေးအရင်းပင်လျှင် ဤကဲ့သို့သော ဆက်ဆံမှုကို ခံရပါက ကျန်ရှိသော အရာရှိများအတွက် မည်သို့သော မျှော်လင့်ချက် ရှိပါဦးမည်နည်း။ သူတို့သည်လည်း ထိုကဲ့သို့သော အမှားများ မပြုမိစေရန် အလွန် သတိထားကြရတော့မည် ဖြစ်၏။

အချို့သော ဝန်ကြီးများမှာ ယခင်က သူတို့ အရေးမပါဟု ထင်မြင်ခဲ့သော သူတို့၏ အပြုအမူများကို ပြန်လည် စဉ်းစားမိကာ ကျောချမ်းသွားကြသည်။ သူတို့သည် မည်သူမျှ အပြစ်ရှာမရစေရန် သူတို့၏ အလုပ်များကို သေချာစွာ ပြန်လည် စီစစ်ရန် ဆုံးဖြတ်လိုက်ကြသည်။

မျှော်လင့်မထားဘဲ ဘွဲ့ထူးကို ရရှိလိုက်သော ကုကျန်းယွမ်မှာမူ ဝမ်းမြောက်ဟန် မပြဘဲ ကြောင်အမ်းအမ်း ဖြစ်နေခဲ့၏။

သူ၏တူဖြစ်သော ဧကရာဇ်သည် သူ၏အစ်ကိုကြီးအား အသက်ရှင်ရန် လမ်းစပင် မကျန်အောင် အဘယ်ကြောင့် ဤမျှ ပြတ်သားစွာ သေဒဏ် ပေးခဲ့ပါသနည်း။

သူ၏အစ်ကိုဖြစ်သူက တိတ်ဆိတ်စွာ ဝန်ခံနေသည်ကို ကြည့်ရင်း ကုကျန်းယွမ်သည် ရုတ်တရက် နားလည်သွားခဲ့သည်—သူ၏အစ်ကိုကြီးသည် ဧကရာဇ်၏ သည်းခံနိုင်စွမ်းကို ကျော်လွန်သွားစေသည့် တစ်စုံတစ်ခုကို လျှို့ဝှက်စွာ လုပ်ဆောင်ခဲ့ခြင်း ဖြစ်ရပေမည်။

အိမ်ပြန်ရောက်လျှင် သူ၏မိသားစုဝင်များကို ပြင်းထန်စွာ သတိပေးရပေလိမ့်မည်။ ပင်မအိမ်တော် ခေါင်းဆောင်၏ ကံကြမ္မာမှာ သူတို့၏ မျက်စိရှေ့မှာပင် ရှိနေသည်မဟုတ်ပါလား—သူတို့ ခေါင်းငုံ့ကာ နေထိုင်ကြရပေလိမ့်မည်။

ယခုမှစ၍ ပင်မ အိမ်တော်မှာ ဒုတိယအိမ်တော်ကို ရန်သူကဲ့သို့ သတ်မှတ်တော့မည်မှာ အမှန်ပင်။

ကုကျန်းယွမ်၏ စိတ်ထဲတွင် ခံစားချက်ပေါင်းစုံ ရောပြွမ်းနေပြီး ခဏတာမျှ မည်သို့ ပြောဆိုရမည်ကိုပင် မသိ ဖြစ်နေခဲ့၏။

...

ကုမိသားစု၏ အိမ်တော်မှာ သိမ်းဆည်းခံနေရစဉ်အတွင်း ယွီမြောင်ဟွာသည် မီးဖိုဆောင်မှ ပို့ပေးထားသော လိပ်ပြာပုံစံ မုန့်ကြွပ်များကို မြိန်ရှက်စွာ စားသုံးနေခဲ့သည်။

သူမ ကြည့်ရှုနေသော အချစ်ဇာတ်လမ်းတွဲမှာ မကြာသေးမီကပင် ပြီးဆုံးသွားခဲ့ပြီး သူမ ဇာတ်လမ်းတွဲများ ကြည့်ရှုနေစဉ်အတွင်း ဤမုန့်အပါအဝင် မုန့်လုပ်နည်း အချို့ကို မှတ်သားထားခဲ့ခြင်း ဖြစ်၏။

မီးဖိုဆောင်မှ လူများမှာ ထိုမုန့်ကို အောင်မြင်စွာ ပြုလုပ်နိုင်ရန်အတွက် အချိန်အတော်ကြာ စမ်းသပ်ခဲ့ရသည်။

အသုံးပြုထားသော ပါဝင်ပစ္စည်းများမှာ အဆင့်မြင့်လှပြီး ထွက်ပေါ်လာသော မုန့်များမှာလည်း အလွန်ပင် အရသာရှိလှ၏။ ယွီမြောင်ဟွာသည် တစ်ခုပြီးတစ်ခု မရပ်မနား စားသုံးနေမိတော့သည်။

အချိုမုန့်များမှာ အမှန်တကယ်ပင် စိတ်ကို ရွှင်လန်းစေ၏။

ခဏမျှ တွေးတောပြီးနောက်တွင် သူမသည် မီးဖိုဆောင်အား နောက်ထပ်တစ်သုတ် ပြင်ဆင်ခိုင်းကာ ကျန်းဖေး ထံသို့ တစ်ပန်းကန် ပို့ပေးရန် ညွှန်ကြားလိုက်သည်။

သူမနှင့် ကျန်းဖေးတို့မှာ ရာထူးတူညီကြပြီး နှစ်ဦးစလုံးမှာလည်း အစားအသောက် အလွန်နှစ်သက်ကြသူများ ဖြစ်ကြသည်—၎င်းမှာ သူတို့ကြားရှိ တူညီသော စိတ်ဝင်စားမှုတစ်ခု ဖြစ်၏။ သူမ၏ မီးဖိုဆောင်မှ အရသာရှိသော အရာတစ်ခုခုကို ပြုလုပ်နိုင်သည့်အခါတိုင်း သူမသည် အမြဲတမ်း ဝေမျှလေ့ရှိလေသည်။

သူမသည် စားပွဲပေါ်ရှိ ကျန်ရှိနေသော မုန့်များကို နှမြောတသစွာ ကြည့်လိုက်သည်—တော်ပြီ! သူမ ထပ်ပြီး မစားသင့်တော့ပေ။

"မီးဖိုဆောင်ကို နောက်ထပ် နှစ်ပန်းကန် ထပ်လုပ်ခိုင်းလိုက်ပါ" သူမ ချင်းလျိုနှင့် ချွေ့ဝေတို့အား ပြောလိုက်သည်။ "ဟုန်ရှင်း အတွက်လည်း အချို့ ဖယ်ထားပေးလိုက်အုံး"

ဟုန်ရှင်းသည် ကျွမ်းကျင်သူတစ်ဦးဖြစ်ပြီး ယခုအချိန်အထိ သူမသည် ယုံကြည်ထိုက်သူ ဖြစ်ကြောင်း သက်သေပြခဲ့ပြီး ဖြစ်သည်။ ယွီမြောင်ဟွာထံသို့ ရောက်ရှိလာသမျှ အရာအားလုံးကို ဟုန်ရှင်း ကိုယ်တိုင် စစ်ဆေးပြီးမှသာ သိမ်းဆည်းလေ့ရှိ၏။

ချွေ့ဝေသည် ပျော်ရွှင်စွာဖြင့် မီးဖိုဆောင်သို့ ထွက်သွားခဲ့လေသည်။

မုန့်များ စားပြီးနောက်တွင် ယွီမြောင်ဟွာသည် ပန်းလက်ဖက်ရည်ကို သောက်ရင်း နောက်ထပ် ဘာလုပ်ရမလဲဟု တွေးတောနေမိသည်။ ဇာတ်လမ်းတွဲ အသစ်တစ်ခု စကြည့်လျှင် ကောင်းမလား။

ဘဝက တကယ့်ကို အေးအေးလူလူ ရှိလှ၏။

ဘယ်ဇာတ်လမ်းကို ကြည့်ရမလဲ။ စနစ်က သူမအတွက် စာရင်းတစ်ခု ပြုလုပ်ပေးထားခဲ့ပြီးဖြစ်သော်လည်း သူမ အများစုကို မကြည့်ရသေးချေ။

သူမသည် ရွေးချယ်စရာများကို ကြည့်ရှုနေစဉ်မှာပင် သူမ၏ စိတ်ထဲတွင် နားကွဲမတတ် အော်ဟစ်သံတစ်ခု ထွက်ပေါ်လာခဲ့သည်။

[အားးး—ဒါကို ငါ မယုံနိုင်ဘူး! ဒါက တကယ်ပဲ ဖြစ်နေတာလား]

ယွီမြောင်ဟွာ၏ ဦးခေါင်းမှာ ကိုက်ခဲသွားရ၏။

[တော်တော့! အော်မနေနဲ့တော့! မင်း ဗိုင်းရပ်စ် ကူးနေတာလား ဘာလား]

[Host ဟာ နန်းတွင်းလုပ်ကြံမှု အဓိကတာဝန် ၁.၃ ကို ပြီးမြောက်သွားပါပြီ- အလှအပအတွက် ဧကရာဇ်ကို ဒေါသထွက်စေပါ၊ သင့်အတွက် သူ့ဦးလေးကို အပြစ်ပေးခိုင်းပြီး သူ့မိသားစု ပိုင်ဆိုင်မှုတွေကို သိမ်းဆည်းခိုင်းပါ! ဆုလာဘ်—ဂွမ်းစေ့များကို မကြာခင် ထုတ်ပေးပါ့မယ်၊ ဂွမ်းထွက်တဲ့ ဒေသတွေရဲ့ မြေပုံပါပါဝင်ပါ့မယ်]

[အို... ဘုရားရေ၊ ဧကရာဇ်က တကယ့်ကို အံ့ဩစရာကောင်းလိုက်တာ! ငါတော့ တစ်သက်လုံး သူ့ရဲ့ ပရိသတ် ဖြစ်သွားပြီ၊ ဟီးးး]

ယွီမြောင်ဟွာမှာ အံ့အားသင့်ကာ မှင်သက်သွားခဲ့သည်- ဘာ... တာဝန်က တကယ်ပဲ ပြီးသွားတာလား။

မနေ့ညက ဧကရာဇ် ပြောခဲ့သော စကားများမှာ သူမ၏ စိတ်ထဲတွင် လျှပ်ခနဲ ပေါ်လာပြီး သူမမှာ မျက်ရည်ပင် ဝဲသွားရတော့၏။

သူက သူမကို လိမ်ပြောနေတာ မဟုတ်ဘူးပေါ့။ သူက တကယ်ပဲ သူ့ဦးလေးရဲ့ ပိုင်ဆိုင်မှုတွေကို သိမ်းလိုက်တာလား—သူမအတွက်လား။

အံ့ဩစရာ ကောင်းလိုက်တာ! ဂွမ်းစေ့တွေကို ရပြီပေါ့!

သူမသည် ဂွမ်းစိုက်ပျိုးရေးကို နေရာအနှံ့ ပျံ့နှံ့အောင် လုပ်ဆောင်မည် ဖြစ်၏။

နေပါဦး... ဧကရာဇ်ရဲ့ ဦးလေးက မယ်တော်ကြီးရဲ့ မောင်လေ။

ပြီးတော့ မယ်တော်ကြီးက အခုထိ သက်ရှိထင်ရှား ရှိနေသေးတယ်။

ဒုက္ခပဲ။ အကယ်၍ မယ်တော်ကြီးသာ ဧကရာဇ်က သူမအတွက်ကြောင့် ဒေါသတကြီးနဲ့ အခုလို လုပ်လိုက်တာကို သိသွားရင်၊ သူမက ဧကရာဇ်ကို ပြုစားထားတဲ့ မြူဆွယ်တတ်တဲ့ မိန်းမဆိုးတစ်ယောက်လို့ ထင်သွားမှာ မဟုတ်ဘူးလား။

မယ်တော်ကြီးတစ်ဦးအနေဖြင့် သူမကဲ့သို့သော အဆင့်နိမ့် ကိုယ်လုပ်တော်တစ်ဦးကို ဖျက်ဆီးပစ်ရန်မှာ ထမင်းစားရသည်ထက်ပင် လွယ်ကူလိမ့်မည်။ ဤခေတ်ကာလတွင် မိဘအပေါ် ရိုသေမှုကို အလွန်ပင် အလေးထားကြသည်—ဧကရာဇ်က သူမကို မည်မျှပင် ချစ်မြတ်နိုးပါစေ၊ သူမအတွက်နှင့် သူ၏မိခင်အရင်းကို ဘယ်တော့မှ ဆန့်ကျင်လိမ့်မည် မဟုတ်ချေ။

ယွီမြောင်ဟွာ၏ အပြုံးများမှာ ပျောက်ကွယ်သွားခဲ့သည်။ သူမမှာ ငိုချင်စိတ်ပင် ပေါက်လာရ၏။

ကောင်းကင်နဲ့ မြေကြီးကို သက်သေထူရဲပါတယ်၊ သူမက ဧကရာဇ်ရဲ့ နားထဲမှာ ဘာတစ်ခွန်းမှ မပြောခဲ့ပါဘူး! သူမ အပြစ်ကင်းပါတယ်! QAQ

ခဏတာမျှ စိုးရိမ်ပူပန်ပြီးနောက် ယွီမြောင်ဟွာသည် ဤကိစ္စကို ထပ်၍ အာရုံမနောက်တော့ရန် ဆုံးဖြတ်လိုက်သည်။ မည်သို့ပင်ဆိုစေကာမူ မယ်တော်ကြီးမှာ နန်းတော်သို့ ပြန်မရောက်သေးသည့်အပြင်၊ အလွန်အကျွံ တွေးတောနေခြင်းကလည်း လက်ရှိအခြေအနေကို ပြောင်းလဲနိုင်မည် မဟုတ်ချေ။

သူမသည် အအေးနန်းဆောင်ရှိ ဘဝကိုပင် ကြံ့ကြံ့ခံခဲ့ပြီးပြီ ဖြစ်ရာ အဆိုးဆုံး ဘာဖြစ်နိုင်ဦးမည်နည်း။ လိုအပ်ပါက ထိုနေရာသို့ ပြန်သွားပြီး ဟင်းသီးဟင်းရွက်များ ပြန်စိုက်ရုံသာ ရှိတော့သည်။

ဪ... ဟုတ်သားပဲ။ သူမတွင် ချန်ပါ ဆန် ရှိနေသေးသည်မဟုတ်ပါလား။ ၎င်းကို အောင်မြင်စွာ စိုက်ပျိုးနိုင်ခဲ့လျှင် မယ်တော်ကြီးပင်လျှင် သူမအား ထိန်းချုပ်ရန် ကြိုးစားမည်ဆိုပါက နှစ်ကြိမ်တိုင်တိုင် ပြန်လည်စဉ်းစားရပေလိမ့်မည်။

ဤသို့ ကိုယ့်ကိုယ်ကိုယ် အားပေးလိုက်ပြီးနောက် ယွီမြောင်ဟွာသည် စိတ်ပြန်လည်ကြည်လင်လာကာ စနစ်ထဲမှ ဇာတ်လမ်းတွဲများကို ပျော်ရွှင်စွာ ဆက်ကြည့်ရှုနေတော့သည်။ မဖြစ်သေးသော ကိစ္စတစ်ခုအတွက် ကြိုတင်ပူဆွေးနေခြင်းမှာ အဓိပ္ပာယ်မရှိပေ။ အကယ်၍ နောက်ဆုံးတွင် ဘာမှဖြစ်မလာပါက ထိုအပူအပင်များမှာ အလကား ဖြစ်သွားမည် မဟုတ်ပါလား။

သူမသည် ကျောက်စိမ်း နန်းဆောင်၏ အခြေအနေများကို စုံစမ်းခြင်းမပြုဘဲ ဘာမှမသိသလိုပင် ဟန်ဆောင်နေခဲ့သည်။ မည်သို့ပင်ဆိုစေကာမူ သူမသည် ထိုသတင်းကို စနစ်မှတစ်ဆင့်သာ သိရှိခဲ့ခြင်း ဖြစ်လေသည်။

သူမအတွက်မူ ယခုအချိန်တွင် ဂွမ်းစေ့များ ရရှိရေးကသာ အဓိက ဖြစ်သည်။ သူမသည် ယခင်က နည်းလမ်းဟောင်းကိုသာ ဆက်အသုံးပြုရန် ဆုံးဖြတ်လိုက်၏။

ထူးချွန်လှသော "ထုန်ထုန်(စနစ်)" သည် ခမ်းနားစွာ ပြန်လာတော့မည် ဖြစ်သည်။ သကြားဖြူနှင့် ကျောက်သကြားတို့၏ အောင်မြင်မှု သာဓကများ ရှိထားသဖြင့် ဧကရာဇ်သည် ယခုတစ်ကြိမ်တွင်လည်း ထုန်ထုန်၏ လက်ရာများကို လျစ်လျူရှုမည် မဟုတ်သည်မှာ သေချာလှပေ၏။

ယခင်တစ်ခေါက်က ယွီမြောင်ဟွာသည် စာအုပ်မျက်နှာဖုံးပေါ်တွင် အမည်ကို အထင်အရှား မရေးခဲ့ပေ။ ထိုအစား သူမသည် ကျောက်သကြားလုပ်နည်းကို အမျိုးမျိုးသော စာရေးဆရာများ၏ အက်ဆေးများ စုစည်းထားသည့် စာအုပ်တစ်အုပ်ထဲတွင် လိမ္မာပါးနပ်စွာ ဝှက်ထားခဲ့ခြင်း ဖြစ်သည်။ ဤသိမ်မွေ့သော စီစဉ်မှုက ယွီမြောင်ဟွာသည် အမှန်တကယ်ပင် ကံကြမ္မာ၏ မျက်နှာသာပေးမှုကို ရရှိထားသူဟု ပညာရှိများက ယုံကြည်သွားစေခဲ့သည်။ အမှန်စင်စစ် သူမသည် ဒုတိယအကြိမ်တွင် အခြားစင်ပေါ်မှ စာအုပ်တစ်အုပ်ကို ကြိုတင်မကြည့်ဘဲ မတော်တဆ နှိုက်ယူခဲ့ခြင်းသာ ဖြစ်လေသည်။

ထို့ကြောင့် သူမသည် သူမ၏ နန်းတွင်းလုပ်ကြံမှု စနစ်နှင့် တိုင်ပင်လိုက်သည်။

"ထုန်ထုန် ဒီတစ်ခါလည်း အရင်ကလိုပဲ နောက်ကွယ်ကနေ စီစဉ်ပေးဦးနော်။ ဂွမ်းအကြောင်း ဆောင်းပါးတွေနဲ့ မြေပုံတွေကို တခြားစာအုပ်တွေထဲမှာ ထည့်ထားလိုက်၊ ပြီးရင် ငါ အဲဒါတွေကို သွားငှားလိုက်မယ်"

ဂွမ်းစေ့များအတွက်မူ ယခုအခါ မလိုအပ်တော့ပေ။ ဧကရာဇ်သည် ၎င်းတို့စိုက်ပျိုးရာ ဒေသမှ မျိုးပင်များကို ယူဆောင်လာရန် လူလွှတ်ရုံသာ ရှိတော့သည်။

ယွီမြောင်ဟွာသည် မြေပုံကို စစ်ဆေးကြည့်ရာတွင် ဂွမ်းမှာ တချီနှင့် မရေရာသော ဆက်ဆံရေးရှိသည့် ရှန်ယွဲ့ တိုင်းပြည်၌ ပေါက်ရောက်ကြောင်း တွေ့ရှိရသည်။ မျိုးပင်များ ယူဆောင်လာသည့် လုပ်ငန်းစဉ်မှာ အချိန်အတန်ကြာနိုင်ပေလိမ့်မည်။

နန်းတွင်းလုပ်ကြံမှု စနစ်မှာ အလွန်ပင် စိတ်လှုပ်ရှားသွားခဲ့၏။

သကြားဖြူနှင့် ကျောက်သကြားတို့က နန်းတွင်းဘဏ္ဍာတိုက်အတွက် အကျိုးအမြတ်များစွာ ပေးစွမ်းနိုင်ခဲ့သော်လည်း ဂွမ်းနှင့် ယှဉ်လိုက်ပါက ၎င်းတို့၏ အရေးပါမှုမှာ မှေးမှိန်သွားရသည်။

ထုန်ထုန်သည် သမိုင်းတွင် အမည်တွင်ရန် ခြေတစ်လှမ်း ပိုနီးကပ်သွားပြီ ဖြစ်လေသည်။

ထို့ကြောင့် စနစ်သည် အဆမတန် တက်ကြွစွာဖြင့် လုပ်ဆောင်ခဲ့သည်။ ဂွမ်းစိုက်ပျိုးမှုဆိုင်ရာ မြေပုံကို အသေးစိတ် ရေးဆွဲခဲ့သည့်အပြင် ဂွမ်းပင်များကိုလည်း ရိုးရာပန်းချီပုံစံနှင့် မတူဘဲ အသက်ဝင်လှပစွာ ဖော်ပြခဲ့လေသည်။

"အရင်လိုပဲ စာကြည့်တိုက်မှာပဲ ထားခဲ့ရမလား"

ခဏမျှ တွေးတောပြီးနောက် ယွီမြောင်ဟွာက သူမ၏ စိတ်ကူးကို ပြောင်းလဲလိုက်သည်။

"ဒီတစ်ခါတော့ မင်တဲ့ နားနေဆောင်ကိုပဲ ပစ်မှတ်ထားကြစို့"

နေရာသစ်တစ်ခုတွင် ထပ်မံ၍ ဂယက်ထအောင် လုပ်ဆောင်ရမည့် အချိန်ပင် ဖြစ်သည်။

ဟန်လင် ပညာရှိများမှာ နန်းတွင်းကိုယ်လုပ်တော်များ၏ လုပ်ရပ်များကြောင့် အခက်တွေ့နေကြသည်ဟု ကောလာဟလများ ထွက်ပေါ်နေသည်။ အချို့ကမူ ထိုပညာရှိများကို ရတနာသိုက်ပေါ်တွင် ထိုင်နေသော်လည်း ဘာမှမစွမ်းဆောင်နိုင်ဘဲ လစာဖြုန်းနေကြသူများဟု ပြစ်တင်ဝေဖန်ကြ၏။

ထိုအကြောင်းကို ကြားသောအခါ ယွီမြောင်ဟွာမှာ အပြစ်ရှိသကဲ့သို့ပင် ခံစားလိုက်ရသည်။

မင်တဲ့နားနေဆောင်သည် တော်ဝင်မိသားစုဝင်များသာ ဝင်ရောက်ခွင့်ရှိသည့် နန်းတွင်းစာကြည့်တိုက်ဖြစ်ပြီး စာအုပ်ပေါင်း ရှစ်သောင်းခန့် ရှိသည်။ သူမ ယခုကဲ့သို့ မျက်နှာသာပေးခံနေရသည့် အခြေအနေတွင် စာအုပ်ငှားရမ်းခြင်းမှာ အလွန်ပင် လွယ်ကူသော အလုပ် ဖြစ်လေသည်။

သူမ ခန့်မှန်းထားသည့်အတိုင်းပင် ဧကရာဇ် ဖေးလင်ယွဲ့သည် ယွီမြောင်ဟွာ၏ ခြေလှမ်းတိုင်းကို ဂရုတစိုက် စောင့်ကြည့်နေခဲ့သည်။ သူမ မင်တဲ့နားနေဆောင်သို့ သွားလိုကြောင်း ပြောလိုက်သည်နှင့် သူသည် တံဆိပ်ပြားတစ်ခု ပေးအပ်ခဲ့သည့်အပြင် သူမကို ကိုယ်တိုင်လိုက်ပါ ပို့ဆောင်ရန် မိန်းမစိုးတစ်ဦးကိုပင် စေလွှတ်ခဲ့၏။

ယွီမြောင်ဟွာ ထွက်ခွာသွားသည်ကို ကြည့်ရင်း ဖေးလင်ယွဲ့၏ စိတ်အခြေအနေမှာ ကောင်းမွန်သွားခဲ့သည်။

ဒီတစ်ခါတော့ ယွီကျဲယွီက ဂွမ်းအကြောင်း စာအုပ်တွေ သွားငှားတာ ဖြစ်မှာပါလား။

ငါးဆားနယ် ကိုယ်လုပ်တော်