အခန်း ၄၂၁

အခန်း (၄၂၁) - ဖိနှိပ်မှု

လေပြင်းကဲ့သို့ ပြေးလွှားနေသော ချန်ဖေးအတွက် ပင်လယ်ပြင်က မြေပြန့်ကဲ့သို့ ညီညာနေပြီး မည်သည့် အဟန့်အတားမျှ မရှိချေ။ ချန်ဖေးက ဟိုင်ယန် မြို့ဆီသို့ တည့်မတ်သော လမ်းကြောင်းအတိုင်း နီးပါး ဦးတည်သွား၏။ အစွမ်းထက်သော အင်အားစုများ ရှိသည့် ကျွန်းများကို ဖြတ်သန်းသွားချိန်တွင်သာ ချန်ဖေးက မလိုအပ်သော နားလည်မှုလွဲမှားခြင်းများကို ရှောင်ရှားရန် အနည်းငယ် ကွေ့ရှောင်သွားခဲ့သည်။

နာရီအနည်းငယ်ကြာ အချိန်ယူ၍ အင်အားစု တစ်ဒါဇင်ကျော်၏ ကျွန်းများကို ဖြတ်ကျော်ပြီးနောက် နောက်ဆုံးတွင် ချန်ဖေးက အဝေးမှနေ၍ ဟိုင်ယန် မြို့၏ ဧရာမ မြို့ရိုးများကို မြင်တွေ့လိုက်ရ၏။ တစ်ချိန်တည်းမှာပင် ဖြတ်သန်းသွားသော ဒွာရသန့်စင်ခြင်း အဆင့်ရှိသူများနှင့် ရေယာဉ် အရေအတွက်က သိသိသာသာ တိုးများလာပြီး စည်ကားလှသော ချီစွမ်းအင်များက လမ်းတစ်လျှောက်လုံးမှ ထွက်ပေါ်လာသည်။

ဟိုင်ယန် မြို့တွင် ဒွာရသန့်စင်ခြင်း အဆင့်များ၌ ကြီးမားသော အခွင့်ထူးများ မရှိချေ။ ချန်ဖေးက လူအုပ်ကြားတွင် ရပ်ကာ လူစီးကြောင်းနှင့်အတူ ဟိုင်ယန် မြို့ အတွင်းသို့ ဖြည်းညင်းစွာ ဝင်ရောက်သွား၏။ ပြီးခဲ့သည့် အကြိမ်နှင့် နှိုင်းယှဉ်ပါက ဟိုင်ယန် မြို့မှာ လုံးဝ ပြောင်းလဲသွားခြင်း မရှိဘဲ ယခင်ကကဲ့သို့ပင် စည်ကားနေဆဲ ဖြစ်သည်။

ဈေးသည်များ၏ အော်ဟစ်ရောင်းချသံများက မပြတ်တမ်း ထွက်ပေါ်နေပြီး ဒွာရသန့်စင်ခြင်း အဆင့်ရှိ သိုင်းပညာရှင်များကို နေရာတိုင်းတွင် မြင်တွေ့နိုင်၏။ အများစုမှာ ဒွာရသန့်စင်ခြင်း အစောပိုင်းအဆင့်နှင့် အလယ်အလတ်အဆင့်များ ဖြစ်ကြပြီး ဒွာရသန့်စင်ခြင်း နောက်ဆုံးအဆင့်များမှာ အနည်းငယ် နည်းပါးလှသည်။

ဒွာရသန့်စင်ခြင်း အထွတ်အထိပ်အဆင့်နှင့် ပတ်သက်၍မူ လူအနည်းငယ်ကိုသာ ရံဖန်ရံခါ လှမ်းမြင်ရလေ့ ရှိ၏။ ဒွာရပေါင်းစည်းခြင်း အဆင့်၏ မျိုးစေ့များ ဖြစ်ကြသော ဒွာရသန့်စင်ခြင်း အထွတ်အထိပ်အဆင့်များမှာ ရှားပါးသော လူနည်းစုအဖြစ် ရှိနေဆဲပင် ဖြစ်သည်။

"သခင်လေး... ဟိုင်ယန် မြို့ကို ပထမဆုံးအကြိမ် လာတာလား... လမ်းပြ လိုအပ်သလား... ငွေဆယ်ကျပ်တည်းနဲ့ ဟိုင်ယန် မြို့ တစ်ခွင်လုံးကို လိုက်ပို့ပေးနိုင်ပါတယ်"

ပိန်ပါးပြီး သေးသွယ်သော မိန်းကလေး တစ်ဦးက ချန်ဖေးထံသို့ ဂရုတစိုက် လျှောက်လာ၏။ သူမ၏ အဝတ်အစားများက အဖာအထေးများဖြင့် ပြည့်နှက်နေပြီး အရောင်လွင့်နေသော်လည်း အလွန် သပ်ရပ်နေသည်။ သူမ၏ ခန္ဓာကိုယ်က သေးငယ်ပုံရသော်လည်း သူမ၏ မျက်လုံးများက အလွန် တောက်ပနေပြီး တစ်ချက် ကြည့်လိုက်ရုံဖြင့် ထိုမျက်လုံးများကို မှတ်မိသွားစေသည်။

"မင်း နာမည် ဘယ်လိုခေါ်လဲ"

ချန်ဖေးက မိန်းကလေးကို ကြည့်ကာ မျက်နှာပေါ်တွင် သဲ့သဲ့ ပြုံးရောင်လေး ထွက်ပေါ်လာရင်း မေးလိုက်၏။

ဟိုင်ယန် မြို့က အနီးအနားတွင် အကြီးဆုံးမြို့ ဖြစ်သော်လည်း ဤကဲ့သို့သော မြို့ကြီးတွင် နေထိုင်ရုံဖြင့် လူတိုင်းက ဇိမ်ကျကျ နေထိုင်ရမည်ဟု မဆိုလိုပေ။ နေရာတိုင်းတွင် ချမ်းသာသူနှင့် ဆင်းရဲသူကြား ကွာဟချက် ရှိစမြဲဖြစ်ပြီး ဟိုင်ယန် မြို့တွင်လည်း ထူးမခြားနားလှချေ။

"သခင်လေး... ကျွန်မ နာမည် မီရှန်းပါ"

ချန်ဖေးက သူမ၏ နာမည်ကို မေးသည်ကို ကြားသောအခါ မီရှန်း၏ မျက်နှာပေါ်တွင် တောက်ပသော အပြုံးတစ်ခု လင်းလက်သွား၏။

"ဉာဏ်အလင်းပွင့် မျှော်စင်ကို သိလား"

ချန်ဖေးက ငွေဆယ်ကျပ်ကို ပေါ့ပေါ့ပါးပါး ထုတ်ယူ၍ လှမ်းပေးလိုက်သည်။

"သခင်လေး... ဟိုင်ယန် မြို့မှာ ဉာဏ်အလင်းပွင့် မျှော်စင်ကို မသိတဲ့သူ မရှိပါဘူး"

မီရှန်းက ဗီဇအရပင် ငွေများကို လှမ်းယူလိုက်ပြီး ပမာဏကို မြင်သောအခါ အလျင်အမြန် ပြောလိုက်၏။

"သခင်လေး... အခု ပိုက်ဆံ အကုန်ပေးစရာ မလိုပါဘူး... ပြီးမှ ပေးလည်း ရပါတယ်"

"ယူထားလိုက်ပါ... ဉာဏ်အလင်းပွင့် မျှော်စင်ကို အရင် သွားကြတာပေါ့"

ချန်ဖေးက လက်ကို ဝှေ့ယမ်း၍ ပြောလိုက်သည်။

"ဟုတ်ကဲ့ပါ သခင်လေး"

မီရှန်းက ရယ်မောလိုက်ရာ သူ၏ မျက်လုံးများက လခြမ်းကွေးလေးများအဖြစ် ပြောင်းလဲသွားပြီး လမ်းပြရန် အပေါ်အောက် ခုန်ပေါက်သွား၏။

"ဟိုင်ယန် မြို့မှာ အကျော်ကြားဆုံး စားသောက်ဆိုင်က ကျွေ့ယွဲ့ မဏ္ဍပ် ဖြစ်ပေမဲ့ အကောင်းဆုံး အစားအစာတွေကိုတော့ တခြားနေရာတွေမှာပဲ ရနိုင်တာပါ"

ချန်ဖေးက စကားပြောရ လွယ်ကူကြောင်း ခံစားမိသဖြင့် မီရှန်းက မြို့တွင်းရှိ အင်အားစုများ ပြန့်ကျက်မှုမှစ၍ စားသောက်နေထိုင်မှု နေ့စဉ်ဘဝများအထိ ဟိုင်ယန် မြို့၏ ကဏ္ဍအသီးသီးကို ချန်ဖေးအား အဆက်မပြတ် မိတ်ဆက်ပေးနေ၏။

သိသင့်သိထိုက်သူ မည်သူကိုမဆို ရှင်းပြမည့် အရာအားလုံးကို မီရှန်းက ချန်ဖေးအား ရှင်းပြပေးခဲ့သည်။ ချန်ဖေးက ရံဖန်ရံခါ ခေါင်းညိတ်၍ အလွန် စိတ်ဝင်တစား နားထောင်နေခဲ့၏။ ငွေဆယ်ကျပ် အသုံးပြုရုံဖြင့် အတော်လေး အသုံးဝင်သော အချက်အလက်များစွာကို ကြားသိရလိမ့်မည်ဟု ချန်ဖေး မမျှော်လင့်ထားခဲ့ပေ။

"မင်းရဲ့ မွေးရာပါ ကိုယ်ရည်ကိုယ်သွေးက သိပ်မကောင်းလှပေမဲ့ သိုင်းပညာကို ဇွဲရှိရှိ လေ့ကျင့်ရင် ကျင့်ကြံမှု တချို့ ရနိုင်သေးတယ်... ဟိုင်ယန် မြို့မှာ သိုင်းပညာ လေ့ကျင့်ဖို့ နေရာတွေ အများကြီး ရှိတယ်... ဘာလို့ မသွားခဲ့တာလဲ"

လမ်းတစ်လမ်းကို ချိုးကွေ့လိုက်ရာ ဟိုင်ယန် မြို့၏ အလယ်ဗဟို ရင်ပြင်သို့ ရောက်ရှိသွားပြီး ထိုနေရာတွင် ဧရာမ မျှော်စင်ကြီး တစ်ခု မားမားမတ်မတ် ရပ်တည်နေ၏။ ဤသည်က ဉာဏ်အလင်းပွင့် မျှော်စင်ပင် ဖြစ်သည်။ ဉာဏ်အလင်းပွင့် မျှော်စင်ကို အဝေးမှ လှမ်းကြည့်ပြီးနောက် ချန်ဖေးက မီရှန်းကို လှည့်ကြည့်လိုက်သည်။

"ကျွန်မရဲ့ မောင်လေးက အခု သိုင်းပညာ လေ့ကျင့်နေပါတယ်... သူက ဟိုင်ယန် မြို့ရဲ့ အကြီးဆုံး သိုင်းကျောင်းတော် ဖြစ်တဲ့ ဖေးယွင် ခန်းမက တာဝန်ခံတွေရဲ့ တန်ဖိုးထားမှုကို ခံရသူပါ"

မီရှန်း၏ မျက်နှာပေါ်တွင် ပျော်ရွှင်သော အပြုံးတစ်ခု လင်းလက်သွား၏။

"ကျွန်မ မောင်လေး ပညာသင်တာသာ အောင်မြင်သွားရင် ကျွန်မတို့ မိသားစုဘဝလည်း တိုးတက်လာမှာပါ"

"သိုင်းပညာ သင်နေတာ ဘယ်လောက်ကြာပြီလဲ... အခု ဘယ်အဆင့်ကို ရောက်နေပြီလဲ"

ချန်ဖေးက ဉာဏ်အလင်းပွင့် မျှော်စင်ဆီသို့ လျှောက်သွားရာ သူ နီးကပ်လာသည်နှင့်အမျှ ငြိမ်းချမ်းသော ချီစွမ်းအင် တစ်ခုက သူ၏ နှလုံးသားထဲသို့ ပြန့်နှံ့ဝင်ရောက်လာ၏။ ရင်ပြင်က အလွန် ကြီးမားကျယ်ဝန်းပြီး လူအများအပြား ထိုနေရာတွင် တင်ပျဉ်ခွေထိုင်ကာ ကျင့်စဉ်များကို အဆက်မပြတ် လေ့ကျင့်နေကြသည်။

တစ်ခါတစ်ရံ တစ်စုံတစ်ယောက်က တစ်ခုခုကို ရုတ်တရက် နားလည်သဘောပေါက်သွားတတ်ပြီး တစ်ခါတစ်ရံတွင် တစ်စုံတစ်ယောက်က မျက်မှောင်ကြုတ်၍ နက်နက်နဲနဲ စဉ်းစားနေသော်လည်း ဘာမျှ မရရှိတတ်ချေ။

ဝိညာဉ် ရတနာ ဖြစ်သော ဉာဏ်အလင်းပွင့် မျှော်စင်၏ ချီနယ်ပယ်အောက်တွင် ကျင့်ကြံခြင်း ဖြစ်စေ၊ ကျင့်စဉ်များ လေ့လာခြင်း ဖြစ်စေ အားလုံးကို မူလကျောက်တုံးများ ပေးချေစရာ မလိုဘဲ အားထုတ်မှု တစ်ဝက်ဖြင့် ရလဒ် နှစ်ဆ ရရှိနိုင်ပေသည်။

"မောင်လေးက သိုင်းပညာ လေ့ကျင့်နေတာ ခြောက်နှစ် ရှိပါပြီ... အခုတော့ ခန္ဓာကိုယ် ကြံ့ခိုင်ခြင်း အဆင့်ကို ရောက်နေပါပြီ"

မီရှန်းက ပြုံး၍ ပြောလိုက်၏။

"ခြောက်နှစ်တောင်မှ ခန္ဓာကိုယ် ကြံ့ခိုင်ခြင်း အဆင့်ပဲလား"

ချန်ဖေးက ခြေလှမ်းများ အနည်းငယ် တန့်သွားပြီး မီရှန်းကို လေးလေးနက်နက် လှည့်ကြည့်ကာ ပြောလိုက်သည်။

"ခြောက်နှစ်တောင် ကျင့်ကြံခဲ့ရင် အရိုးသန့်စင်ခြင်း အဆင့်ကို ရောက်နေသင့်ပြီလေ"

"ဟင်"

ချန်ဖေး၏ စကားများကို ကြားသောအခါ မီရှန်းမှာ အနည်းငယ် ကြောင်အမ်းအမ်း ဖြစ်သွား၏။

"ငါ့ကို ဒီမှာပဲ စောင့်နေ... တစ်ရက်ထက် ကျော်လွန်သွားပြီး ငါ ထွက်မလာသေးရင် မင်းဘာသာမင်း ပြန်လို့ ရပြီ"

ချန်ဖေးက စကားခြွေချန်ရစ်ခဲ့ပြီး ဉာဏ်အလင်းပွင့် မျှော်စင်ဆီသို့ စတင် လျှောက်လှမ်းသွားသည်။

မီရှန်းက ချန်ဖေး၏ ကျောပြင်ကို ကြောင်အမ်းအမ်း စိုက်ကြည့်နေပြီး ချန်ဖေး ယခုလေးတင် ပြောသွားခဲ့သည်များကို ပြန်တွေးနေမိ၏။ သူမ၏ မျက်လုံးများက အနည်းငယ် တောက်ပသွားသော်လည်း ထို့နောက်တွင် မီရှန်းက သူမ၏ ကိုယ်ပိုင် အခြေအနေကို သဘောပေါက်သွားပြီး အခြား တစ်ယောက်ကို သိုင်းကျောင်းတော်သို့ ပို့ရန် အင်အား မရှိတော့ချေ။

ယနေ့ခေတ်တွင် ဖေးယွင် ခန်းမ၌ လူတစ်ဦးတည်းသာ နေခွင့်ရလျှင်တောင် အလွန် ခက်ခဲလှသည်။ သို့သော်လည်း သိုင်းကျောင်းတော်များက ခွင့်ပြုချက် မရှိဘဲ ပုဂ္ဂလိက သင်ကြားပေးမှုကို ခွင့်မပြုချေ။ အကယ်၍ သိရှိသွားပါက သင်ကြားပေးသူမှာ သူ၏ ကျင့်ကြံမှုကို ရုပ်သိမ်းခံရရုံသာမက လျှို့ဝှက် သင်ယူသူများလည်း ပြင်းထန်သော အပြစ်ပေးမှုကို ခံရမည် ဖြစ်၏။

မီရှန်း၏ မျက်လုံးများက တစ်ဖန် အထီးကျန်ဆန်သွားပြန်သည်။ သူ၏ အင်္ကျီလက်ထဲရှိ ငွေဆယ်ကျပ်ကို စမ်းသပ်ရင်း သူ ဖြည်းညင်းစွာ ခေါင်းငုံ့သွား၏။

"ရပ်လိုက်စမ်း!"

ဉာဏ်အလင်းပွင့် မျှော်စင်ရှေ့တွင် ကြီးကြပ်ရေးမှူး တပည့်တစ်ဦးက ချန်ဖေး၏ လမ်းကို ပိတ်ဆို့လိုက်သည်။

"ငါ ဉာဏ်အလင်းပွင့် မျှော်စင်ထဲ ဝင်ချင်လို့ပါ"

ချန်ဖေးက ကြီးကြပ်ရေးမှူး တပည့်ကို ကြည့်၍ ပြောလိုက်၏။

"ဘယ်အဆင့် အဖွဲ့အစည်းကလဲ"

ကြီးကြပ်ရေးမှူး တပည့်က တိုးတိုးလေး မေးလိုက်သည်။

"အဆင့် ခြောက်ပါ"

"အဆင့်နိမ့် မူလကျောက်တုံး ငါးဆယ် ပေးရမယ်"

"ကောင်းပါပြီ"

ချန်ဖေးက ခေါင်းညိတ်လိုက်ပြီး သူ၏ နောက်ကျောမှ အထုပ်ကို လှမ်းပေးလိုက်၏။

ဉာဏ်အလင်းပွင့် မျှော်စင်သို့ ဝင်ရောက်ရန် မူလကျောက်တုံးများ လိုအပ်ကြောင်း ချန်ဖေး ကြိုတင် သိရှိထားပြီး ဖြစ်သည်။ သို့သော်လည်း ဉာဏ်အလင်းပွင့် မျှော်စင်သို့ ဝင်ရောက်ရန် လူတိုင်းက မူလကျောက်တုံးများ သုံးစွဲရန် မလိုအပ်ချေ။ အကယ်၍ အင်အားစု အဆင့်က လုံလောက်စွာ မြင့်မားပါက နှစ်စဉ် အခမဲ့ ဝင်ရောက်ခွင့် အချို့ ရှိပြီး အဆင့် မြင့်လေ၊ ဝင်ခွင့် ပိုများလေ ဖြစ်၏။

ဒွာရသန့်စင်ခြင်း နောက်ဆုံးအဆင့်ရှိ သိုင်းပညာရှင် မျှသာဖြစ်သော ယွမ်ချန်ဓားဂိုဏ်း ကဲ့သို့သော အင်အားစုများက အဆင့် ခြောက် အင်အားစုများတွင် ပါဝင်သည်။

ဒွာရသန့်စင်ခြင်း အထွတ်အထိပ်အဆင့် ရှိပါက အဆင့် ငါး အင်အားစု အဖြစ်သို့ ပြောင်းလဲနိုင်သည်။ နတ်တိမ်ဓားဂိုဏ်း ကဲ့သို့ အစွမ်းထက်သော ဒွာရပေါင်းစည်းခြင်း

အစောပိုင်းအဆင့် ရှိပါက အဆင့် ၄ အင်အားစု အဖြစ် အလိုအလျောက် ရောက်ရှိသွားမည် ဖြစ်၏။

ဤအဆင့်မှ အထက်တွင် ဒွာရပေါင်းစည်းခြင်း အထွတ်အထိပ်အဆင့် အစွမ်းထက်သူ တစ်ဦး ရှိပါက ထောင်ချီ ငှက်မွေး မဟာမိတ်အဖွဲ့၏ ပထမတန်းစား အင်အားစု တစ်ခု ဖြစ်လာမည် ဖြစ်သည်။

စတုတ္ထအဆင့် အင်အားစုမှ စတင်၍ ထောင်ချီ ငှက်မွေး မဟာမိတ်အဖွဲ့ အတွင်းရှိ သယံဇာတ အမျိုးမျိုးက သူတို့အပေါ် မျက်နှာသာပေးလေ့ ရှိပြီး ဉာဏ်အလင်းပွင့် မျှော်စင်ကလည်း ထိုမျက်နှသာပေးမှုများအနက်မှ တစ်ခု ဖြစ်၏။ အခြား အရေးကြီးသော အချက်မှာ နှစ်စဉ် အဖွဲ့အစည်း တိုင်းက ထောင်ချီ ငှက်မွေး မဟာမိတ်အဖွဲ့၏ ဆင်ခြေဖုံး ဒေသများသို့ လူများကို စေလွှတ်၍ မိစ္ဆာသားရဲ သတ်ဖြတ်ပွဲများတွင် ပါဝင်ရမည် ဖြစ်သည်။

ဤသည်က ထောင်ချီ ငှက်မွေး မဟာမိတ်အဖွဲ့ အတွင်းရှိ အင်အားစုတိုင်း ဖြည့်ဆည်းရမည့် တာဝန်ဝတ္တရား တစ်ရပ် ဖြစ်၏။ အင်အားစု အဆင့် မြင့်လေ၊ စေလွှတ်ရမည့် လူအရေအတွက် နည်းလေ ဖြစ်ပြီး ပို၍ ရရှိလေ ဖြစ်သည်။ ယင်းက အနည်းငယ် အကြောင်းပြချက် မခိုင်လုံသကဲ့သို့ ထင်ရသော်လည်း အမှန်တရားက ဤအတိုင်းပင် ဖြစ်၏။

အစွမ်းထက်သူများ ပိုမို အစွမ်းထက်လာလေ၊ တာဝန်ဝတ္တရား နည်းပါးလေ ဖြစ်သည်။ ဆန့်ကျင်ဘက်အားဖြင့် အားနည်းသူများက ပို၍ ထမ်းဆောင်ရပြီး အနည်းဆုံး ရရှိကြသည်။ အထက်သို့ တက်လှမ်းရန် ကြိုးစားရမည် သို့မဟုတ် အခြားသူများ၏ အဆက်မပြတ် အမြတ်ထုတ်မှုကို စောင့်ဆိုင်းရမည် ဖြစ်၏။

ယွမ်ချန်ဓားဂိုဏ်းနှင့် ချန်ရွှေတောင်ကြားဂိုဏ်းတို့က နောက်ထပ် လဝက်ခန့်အကြာတွင် ထောင်ချီ ငှက်မွေး မဟာမိတ်အဖွဲ့၏ ဆင်ခြေဖုံး ဒေသများသို့ လူများကို စေလွှတ်ရမည် ဖြစ်သည်။ ထောင်ချီ ငှက်မွေး မဟာမိတ်အဖွဲ့က အင်အားစု အသစ်များ အလိုက်သင့် ဖြစ်စေရန် တစ်နှစ်သာ အချိန်ပေးထား၏။ တစ်နှစ် ပြည့်ပြီးနောက် တာဝန်နှင့် ဝတ္တရားများ အားလုံးကို တစ်ခုမျှ မကျန်ရစ်ဘဲ လုပ်ဆောင်ရမည် ဖြစ်သည်။

"မခံနိုင်ရင် အတင်း မလုပ်နဲ့... တစ်ဆင့်လောက် ပြန်ဆင်းလိုက်ရင် ဖိအားက အများကြီး သက်သာသွားလိမ့်မယ်... အချိန်ကြာလာတာနဲ့အမျှ အထဲမှာ ဖိအားတွေက ပိုများလာလိမ့်မယ်... အတင်းအကျပ် တောင့်ခံနေရင် ဒွာရတွေကို ထိခိုက်နိုင်တယ်"

ကြီးကြပ်ရေးမှူး တပည့်က ချန်ဖေးကို ကြည့်၍ ကြင်နာစွာ သတိပေးလိုက်၏။

"ကျေးဇူးတင်ပါတယ်"

ချန်ဖေးက လက်ယှက် ဂါဝရပြုကာ ဉာဏ်အလင်းပွင့် မျှော်စင် အတွင်းသို့ ဝင်ရောက်သွားသည်။

အပြင်ဘက်မှ ကြည့်လျှင် ဉာဏ်အလင်းပွင့် မျှော်စင်က အလွန် ကြီးမားနေပြီ ဖြစ်သော်လည်း အတွင်းသို့ ရောက်သောအခါ ချန်ဖေးက အတွင်းပိုင်းမှာ အပြင်ဘက်မှ မြင်ရသည်ထက် များစွာ ပိုကြီးမားနေကြောင်း သဘောပေါက်သွား၏။

"နေရာလွတ် စွမ်းအားလား"

ချန်ဖေး၏ စိတ်က အနည်းငယ် လှုပ်ရှားသွားပြီး ဉာဏ်အလင်းပွင့် မျှော်စင်၏ ပထမအလွှာမှ ယူဆောင်လာသော ဖိအားကို ခံစားလိုက်ရသော်လည်း သူ ဘာမျှ မခံစားရချေ။ ပထမအလွှာတွင် လူအတော်များများက တင်ပျဉ်ခွေထိုင်ကာ တစ်ယောက်ချင်းစီ လုံ့လဝီရိယရှိစွာ ကျင့်ကြံနေကြ၏။

ချန်ဖေးက လှေကားများအတိုင်း လိုက်သွားပြီး ဒုတိယအလွှာသို့ ဝင်ရောက်သွားသည်။ ပထမအလွှာနှင့် နှိုင်းယှဉ်ပါက ဉာဏ်အလင်းပွင့် မျှော်စင်၏ ဒုတိယအလွှာတွင် လူများစွာ ပိုနည်းပါးပြီး ဒုတိယအလွှာမှ ဖိအားက ပထမအလွှာထက် အဆပေါင်းများစွာ ပိုမြင့်မား၏။

သို့သော်လည်း ဤဖိအားက ချန်ဖေးအတွက် များစွာ မခံစားရသဖြင့် သူက ဆက်လက်၍ အထက်သို့ တက်သွားသည်။ တတိယအလွှာ၊ စတုတ္ထအလွှာ၊ ပဉ္စမအလွှာ!

ချန်ဖေးက အလွှာ သုံးလွှာ ဆက်တိုက် တက်သွားရာ ဉာဏ်အလင်းပွင့် မျှော်စင် တစ်လွှာစီမှ ယခင်အထပ်ထက် အဆများစွာ မြင့်တက်လာသဖြင့်၊ ပဉ္စမထပ်သို့ ရောက်ချိန်တွင် ဖိအားမှာ ပထမထပ်ထက် ဆယ်ဆနီးပါး ရှိနေပြီ ဖြစ်သည်။

ဤဖိအားက ရုပ်ပိုင်းဆိုင်ရာ ခန္ဓာကိုယ်မှသာမက စိတ်ပိုင်းဆိုင်ရာနှင့် ဝိညာဉ်ရေးရာ ဖိအားများမှလည်း လာခြင်း ဖြစ်၏။ အကယ်၍ ဝိညာဉ်စွမ်းအားက မလုံလောက်ပါက ကျင့်စဉ်များကို နားလည်သဘောပေါက်ရန် မဆိုထားနှင့် စဉ်းစား၍ပင် မရနိုင်တော့လောက်အောင် ဖိနှိပ်ခံရနိုင်ပေသည်။

ချန်ဖေးက တစ်ခဏမျှ မတ်တတ်ရပ်နေပြီး အဆင်ပြေသည်ဟု ခံစားရသဖြင့် ဉာဏ်အလင်းပွင့် မျှော်စင်၏ အထက်အလွှာဆီသို့ ဆက်လက် လျှောက်လှမ်းသွား၏။

ဆဋ္ဌမအဆင့်!

ဤနေရာသို့ ရောက်သောအခါ လက်ချိုးရေတွက်၍ ရလောက်အောင် လူအနည်းငယ်သာ ကျန်ရှိတော့ပြီး တစ်ဦးစီ၏ ကျင့်ကြံမှု အဆင့်များက ဒွာရသန့်စင်ခြင်း နောက်ဆုံးအဆင့်တွင် ရှိကြသည်။

ချန်ဖေးက လူအနည်းငယ် လှမ်းကြည့်လိုက်ရာ ဤလူများ၏ ချီစွမ်းအင်များက အလွန် သိပ်သည်းနေပြီး သူတို့ ဖွင့်လှစ်ထားသော ဒွာရ အရေအတွက်က မနည်းကြောင်း သိသာထင်ရှားစွာ ပြသနေ၏။ အနည်းဆုံး တစ်ရာဝန်းကျင်ခန့် ရှိပေလိမ့်မည်။

ချန်ဖေးက အထက်ထပ်ဆီသို့ လှေကားများအတိုင်း ဆက်တက်သွားသည်။ လူနှစ်ဦးက မျက်လုံးဖွင့်၍ ချန်ဖေးကို လှမ်းကြည့်လိုက်ကြ၏။ ချန်ဖေး၏ လုံးဝ အတင်းအကျပ် မဖြစ်နေသော အမူအရာကို မြင်သောအခါ သူတို့၏ မျက်လုံးများတွင် အံ့အားသင့်မှု အချို့ ထွက်ပေါ်လာသည်။

ဉာဏ်အလင်းပွင့် မျှော်စင်၏ ပထမနေ့တွင် အလွှာတစ်ခုစီရှိ ဖိအားမှာ အနည်းငယ်မျှသာ ဖြစ်သော်လည်း ဖိအားက အချိန်နှင့်အမျှ ဆက်လက် မြင့်တက်လာမည် ဖြစ်၏။ သို့သော်လည်း ဆဋ္ဌမအလွှာတွင် တည်ငြိမ်စွာ နေနိုင်ခြင်းကပင်လျှင် ဒွာရသန့်စင်ခြင်း နောက်ဆုံးအဆင့် အများစုထက် များစွာ ပို၍ အစွမ်းထက်နေပြီ ဖြစ်သည်။

"မျက်နှာစိမ်းပဲ... တကယ်ကို မျိုးဆက်သစ်တွေက လူဟောင်းတွေကို ဖယ်ထုတ်နေကြတာပဲ"

တစ်စုံတစ်ယောက်က သက်ပြင်းချလိုက်၏။

"နည်းနည်း စောပါသေးတယ်... သူ မကြာခင် အောက်ပြန်ဆင်းလာမှာပါ"

"ဟားဟား... မှန်တယ်... ခုနစ်လွှာက ဖိအားက အရမ်းများလွန်းတယ်"

ချန်ဖေးက အောက်ထပ်မှ ဆွေးနွေးသံများကို မကြားလိုက်ချေ။ ဤအခိုက်အတန့်တွင် သူက သတ္တမအလွှာသို့ ရောက်ရှိနေပြီ ဖြစ်၏။ ဤနေရာတွင် ရုပ်ပိုင်းဆိုင်ရာ ဖြစ်စေ၊ စိတ်ပိုင်းဆိုင်ရာ ဖိအားဖြစ်စေ အဆင့်များက ပထမအလွှာထက် အဆပေါင်း ဒါဇင်နှင့်ချီ၍ ကြီးမားနေပြီ ဖြစ်သည်။ ဤသည်က တကယ်ကို ကြောက်မက်ဖွယ်ကောင်းသော အရေအတွက် တစ်ခု ဖြစ်၏။ ဤအခိုက်အတန့်တွင် သတ္တမအလွှာ၌ လူတစ်ဦးတည်းသာ တင်ပျဉ်ခွေ ထိုင်နေသည်။

ခမ်းနားထည်ဝါပြီး သိပ်သည်းလှ၏။ သို့သော်လည်း ပို၍ အရေးကြီးသည်မှာ တုန်လှုပ်ခြင်း မရှိသော မူလစွမ်းအင် သဘောတရားပင် ဖြစ်သည်။

ဤတစ်ဦးတည်းသော ပုဂ္ဂိုလ်က ဒွာရသန့်စင်ခြင်း အထွတ်အထိပ်အဆင့် အစွမ်းထက်သူ ဖြစ်၏။ တစ်သားတည်း ဖြစ်အောင် ဖွဲ့စည်းထားသော ဒွာရ ၁၀၈ ခုဖြင့်သာ ဤကဲ့သို့သော ဖိအားမျိုးကို ခံနိုင်ရည် ရှိမည် ဖြစ်သည်။

ယန်ဇယ်စုန်းက မျက်လုံးဖွင့်၍ ချန်ဖေးကို တစ်ချက် လှမ်းကြည့်လိုက်၏။ ချန်ဖေးမှာ ဒွာရသန့်စင်ခြင်း နောက်ဆုံးအဆင့် ကျင့်ကြံမှု မျှသာ ရှိသည်ကို သဘောပေါက်သွားသောအခါ သူ၏ မျက်လုံးများတွင် အံ့အားသင့်မှု အချို့ ထွက်ပေါ်လာသည်။

သို့သော်လည်း ယန်ဇယ်စုန်းက ဘာမျှ မပြောဘဲ မျက်လုံးများကို ပြန်မှိတ်ကာ ကျင့်စဉ်၏ နက်နဲမှုများကို စတင် နားလည်သဘောပေါက်ရန် ကြိုးစားနေလိုက်၏။

ချန်ဖေးက ဉာဏ်အလင်းပွင့် မျှော်စင်၏ သတ္တမအဆင့်မှ ဖိအားကို ခံစားလိုက်ရပြီး ယင်းက လက်ခံနိုင်ဖွယ် ရှိသည်။ သို့သော်လည်း ဤကဲ့သို့သော ပတ်ဝန်းကျင်တွင် ကျင့်စဉ်ကို ကောင်းစွာ လုပ်ဆောင်နိုင်ခြင်း ရှိမရှိ စမ်းသပ်ကြည့်ရန် လိုအပ်၏။

ချန်ဖေးက နေရာတစ်ခုကို ရွေးချယ်၍ တင်ပျဉ်ခွေ ထိုင်လိုက်ပြီး ယွမ်ချန်ကြယ်စင် ဓားခန္ဓာကို စတင် ပုံဖော် ကြည့်လိုက်သည်။

ဆယ့်ငါးမိနစ် အကြာတွင် ချန်ဖေးက မတ်တတ်ရပ်၍ အဋ္ဌမအလွှာဆီသို့ ဦးတည်သွား၏။ လှေကားပေါ်သို့ နင်းလိုက်ချိန်တွင် သူ၏ ဖိနပ်အောက်ခံများမှ အသံသဲ့သဲ့လေး ထွက်ပေါ်လာပြီး ယန်ဇယ်စုန်း၏ မျက်လုံးများက ပွင့်လာကာ ချန်ဖေး၏ ကျောပြင်ကို စိုက်ကြည့်နေတော့သည်။